མཐོ་འབྲིང་སྐད་ཡིག་སློབ་དེབ་ཁྲོད་ཀྱི་བསྡུས་ཚན་འགའ་གླེང་བ།

[གནད་བསྡུས] གཏན་ཚིགས་རིགས་པས་ཤར་ནུབ་ཀྱི་སློབ་གསོའི་ཁྲོད་དུ་གོ་གནས་གལ་ཆེན་བཟུང་ཡོད་པ་བཞིན་དུ། བསྡུས་གྲྭའི་རིགས་ལམ་ལའང་མཐོ་འབྲིང་སློབ་གསོའི་ཁྲོད་གོ་གནས་གལ་ཆེན་ཡོད། ཡིན་ནའང་། མིག་སྔར་ལག་སོན་བྱུང་བའི་དཔྱད་འབྲས་ཁྲོད། མཐོ་འབྲིང་སློབ་མར་བསྡུས་གྲྭའི་རིགས་ལམ་ཁྲིད་ཚུལ་གྱི་སྐོར་ན་དཔྱད་འབྲས་རེ་འགའ་ལས་མེད། སློབ་མའི་བློ་གྲོས་དང་རྣམ་དཔྱོད་སྤེལ་བ་ལ་མཆོག་ཏུ་གྱུར་པའི་སློབ་ཁྲིད་ཀྱི་ལམ་སྲོལ་འདིར་དོ་སྣང་ཆེན་པོ་བྱེད་འོས་པར་འདོད། དཔྱད་རྩོམ་འདིར་གཙོ་བོ་ཡིག་ཚང་རིག་པའི་ཐབས་ཀྱིས་བསྡུས་གྲྭའི་ཆེས་གཞི་རྩར་གྱུར་པའི་རིགས་ལམ་འགྲོ་ཚུལ་དཔེ་རིས་ཟུང་འབྲེལ་གྱིས་ངོ་སྤྲད་རྗེས། མཐོ་འབྲིང་སྐད་ཡིག་བསླབ་གཞིའི་གཏན་ཚིགས་རིགས་པའི་བསྡུས་ཚན་འགར་འབྲེལ་ནས་མཐོ་འབྲིང་སློབ་མར་བསྡུས་གྲྭའི་སློབ་ཁྲིད་བྱེད་ཚུལ་གྱི་བསམ་ཚུལ་འགའ་བཏོན་ཡོད།

[གནད་ཚིག] མཐོ་འབྲིང་སློབ་མ། སློབ་ཁྲིད། བསྡུས་གྲྭ།

མཐོ་འབྲིང་སློབ་མར་མཚོན་ན། རྣམ་དཔྱོད་དང་བློ་གྲོས་གང་གི་ཆ་ནས་ཀྱང་རིགས་ལམ་སློབ་ཁྲིད་བྱས་ན་འོས་ཤིང་འཚམ་པའི་སྐབས་ལ་ཁེལ་ཡོད། གནད་དེར་དམིགས་ནས་ལྗོངས་ཞིང་ལྔའི་མཉམ་བསྒྲིགས་སློབ་གཞི་སྟེ། 2017ལོར་བསྒྲིགས་པའི་མཐོ་འབྲིང་སྐད་ཡིག་བསླབ་དེབ་ཁྲོད། ངེས་སྦྱོང་དང་འདེམ་སྦྱོང་གཉིས་ཀར་བསྡུས་གྲྭའི་རིགས་ལམ་སྦྱོང་བརྡར་གྱི་སྐོར་བཀོད་ཡོད་དེ། དེབ་གསུམ་པར་རྩོད་གླེང་ཞེས་པའི་ཚན་པ་ཞིག་བཀོད་ཡོད་པ་ནི་ཤར་ནུབ་ཐུན་མོང་གིས་སྤྱོད་པའི་རྩོད་པའི་ཐབས་ཀྱི་རྨང་གཞིའི་ཤེས་བྱ་ཡིན་འདུག དེ་ནི་ཕལ་ཆེར་རིགས་ལམ་སྦྱོང་བརྡར་གྱི་སྟ་གོན་ལྟ་བུར་ཆགས་ཡོད། དེབ་བཞི་པའི་གོ་བརྡ་སྤྲོད་པ་དང་བརྗེ་རེས་ཞེས་པར་བསྡུས་གྲྭའི་ཤེས་བྱ་ལས་ཤེས་བྱའི་རྣམ་གྲངས་བཤད་པ་དང་མཚན་མཚོན་གྱི་རྣམ་གཞག སྤྱི་དང་བྱེ་བྲག་གསུམ་བཀོད་ཡོད། དེབ་ལྔ་པའི་གོ་བརྡ་སྤྲོད་པ་དང་བརྗེ་རེས་ཞེས་པར་བསྡུས་གྲྭའི་ཁྲོད་ཀྱི་རྒྱུ་དང་འབྲས་བུ་བཤད་པ། འགལ་འབྲེལ་བཤད་པ། བློ་རིག་དང་རྟགས་རིགས་ཀྱི་རྣམ་གཞག་ཅུང་ཟད་བཤད་པ། རང་ལུགས་འཇོག་ཚུལ་དང་གཞན་ལུགས་དགག་ཚུལ་སོགས་ཀྱི་དོན་ཚན་བཀོད་ཡོད། འདེམ་སྦྱོང་དང་པོའི་ཚད་མ་རིག་པའི་ཤེས་བྱ་ཞེས་པའི་སྡེ་ཚན་དུ་ཚད་མ་རིག་པའི་བརྡ་ཆད་འགའི་འགྲེལ་བཤད་དང་ཁ་དོག་དཀར་དམར་གྱི་རྣམ་གཞག གཞི་གྲུབ་ཀྱི་རྣམ་གཞག་བཅས་བཀོད་ཡོད། བསླབ་དེབ་ཏུ་བསྡུས་གྲྭའི་ཤེས་བྱ་མང་པོ་བཞག་པ་ནི་བསྡུས་གྲྭའི་གལ་ཆེན་རང་བཞིན་ལ་དམིགས་པ་རེད། གཞན་ཡང་། རྒྱལ་ནང་གི་མཚན་ཉིད་རིག་པ་བ་ཡུས་ཧྥ་ལིའང་གིས་ཀྱང་ཆེད་དམིགས་ཀྱིས་གཏན་ཚིགས་རིག་པ་འདི་ཉིད་མཐོ་འབྲིང་གི་སློབ་ཁྲིད་ཁྲོད་འཇོག་པའི་སྐོར་ནས་དཔྱད་རྩོམ་བྲིས་ཡོད།①དེ་དག་ལས་བསྡུས་གྲྭའི་རིགས་ལམ་གྱིས་མཐོ་འབྲིང་གི་སློབ་ཁྲིད་ཁྲོད་དུ་གོ་གནས་གལ་ཆེན་བཟུང་ཡོད་པ་མཚོན་ཐུབ་བོ། །

སྤྱིར་རིགས་ལམ་སློབ་ཁྲིད་ཟེར་བ་ནི་སློབ་དཔོན་ཕྱོགས་གླང་ཡབ་སྲས་ཀྱིས་མཚོན་པའི་མཁས་གྲུབ་དུ་མ་ནས་བརྒྱུད་ལ། བོད་ཀྱི་སློབ་དཔོན་ཕྱྭ་པ་ཆོས་ཀྱི་སེངྒེ་མཆོག་གིས་སྲོལ་བཏོད་པའི་བསྡུས་གྲྭ་ལས་བྱུང་བའི་རྩོད་པ་བྱེད་པ་གཙོར་མཛད་པའི་སློབ་གཉེར་བྱེད་ཚུལ་ཞིག་ལ་གོ བསྡུས་གྲྭ་ཟེར་བ་ནི“གསུང་རབ་སྤྱིའི་དགོངས་འགྲེལ་ཚད་མ་མདོ་དང་སྡེ་བདུན་གྱི་རིགས་པ་རྣམས་ཕྱོགས་གཅིག་ཏུ་བསྡུས་པའི་གྲྭ་ལ་བསྡུས་གྲྭ་ཞེས་གྲགས”②ཞེས་པ་ལྟར། བསྡུས་གྲྭ་ལ་ཚད་མ་སྡེ་བདུན་དང་ཚད་མ་མདོ་སོགས་ཀྱི་གནད་མང་པོ་འདུས་ཡོད་ཀྱང། འདིར་མཐོ་འབྲིང་སློབ་མར་བསྡུས་གྲྭའི་རིགས་ལམ་སློབ་ཁྲིད་བྱེད་ཚུལ་གྱི་སྐོར་ཡིན།

དང་པོ། བསྡུས་གྲྭའི་རིགས་ལམ་རགས་ཙམ་བཤད་པ།

བསྡུས་གྲྭའི་རིགས་ལམ་སློབ་ཁྲིད་བྱེད་ཚུལ་ངེས་པ་ལ་བསྡུས་གྲྭའི་རིགས་ལམ་སློབ་ཁྲིད་བྱེད་ཚུལ་གྱི་གོ་དོན་གསལ་བོར་ཤེས་དགོས། བསེ་བསྡུས་གྲྭ་གཞིར་བཟུང་ནས་གླེང་ན། གཅིག་ནས་རིགས་ལམ་སློབ་ཁྲིད་ནི་དགེ་རྒན་དང་སློབ་མ། སློབ་མ་དང་སློབ་མའི་བར་གྱི་བགྲོ་གླེང་ནས་མགོ་བརྩམས་ཆོག་ལ། དེ་ནི་ཐོག་མར་བསྡུས་གྲྭའི་རིགས་ལམ་རྩོད་པ་ནས་བྱུང་བར་མངོན། རིགས་ལམ་སློབ་ཁྲིད་ཟེར་བ་ནི་བསྡུས་གྲྭའི་རིགས་ལམ་བཀོལ་ནས་བསླབ་བྱའི་ནང་དོན་རྣམས་སློབ་པའམ་ཁྲིད་པ་ལ་གོ གོ་བདེར་བཤད་ན། རིགས་ལམ་རྩོད་པ་ལ་རང་གི་འདོད་ཚུལ་གཞན་ལ་སྒྲོག་པའི་རིགས་སློང་བ་དང་། རིགས་སློང་བའི་འདོད་ཚུལ་ཁྲོད་ཀྱི་མ་རྟོགས་ལོག་རྟོག་གི་ཆ་ལ་སུན་འབྱིན་པར་ཁས་ལེན་པའི་དམ་བཅའ་བ། དེ་གཉིས་ཀྱི་རྩོད་པའི་རྒྱལ་ཕམ་འབྱེད་པའི་དཔང་པོ་བཅས་གསུམ་ངེས་པར་ཚང་དགོས། དེ་ནི་རིགས་ལམ་རྩོད་པའི་གང་ཟག་གི་ཆ་རྐྱེན་རེད། གཉིས་ནི་གཞུང་ལུགས་ཀྱི་ཆ་རྐྱེན་ཡིན་ཏེ། རིགས་ལམ་ནི་ཚད་མ་རིག་པའི་གནད་དམ་ཉིང་བཅུད་མཚོན་པའི་བསྡུས་གཞུང་གཞིར་བཟུང་ནས་ཁྲིད་དགོས་ཏེེ། གཞུང་ལུགས་ཀྱི་ཤེས་བྱ་མང་པོ་རང་རྒྱུད་དུ་བླངས་ནས། དེ་ཉིད་ལག་ལེན་གྱི་སྟེང་ནས་དགག་གཞག་སྤོང་གསུམ་གྱི་རྣམ་པས་སོ་སོར་འབྱེད་པ་རེད། དེས་ཐོག་མར་རིགས་ལམ་རྩོད་པ་ལ་ཞུགས་མཁན་གྱི་བསམ་གཞིག་གི་སྒོ་ཕྱེ་བར་ཕན། དཔེར་ན། ཁ་ཅིག་གིས་ཁ་དོག་ཡིན་ན་དམར་པོ་ཡིན་པས་ཁྱབ་ཅེས་པས། སློབ་མའི་བསམ་གཞིག་གི་སྒོ་ཀུན་ནས་སློང་སྲིད་དེ། སློབ་མ་ཚོས་ཁ་དོག་ལ་དམར་པོ་གཅིག་པུས་མི་ཚད་པ་མིག་མཐོང་ལག་ཟིན་ཡིན་ཡང། ཅིའི་ཕྱིར་དམར་པོ་གཅིག་པུ་ལས་ཁ་དོག་མེད་ཅེས་ཁས་བླངས་པ་རེད་དམ། དམར་པོ་དང་ཁ་དོག་དམར་པོ་ལ་ཁྱད་པར་ཡོད་དམ། ཅིའི་ཕྱིར་ཁ་དོག་ཐོག་མར་རྩོད་དགོས་པ་རེད་སོགས་ཀྱི་དྲི་བ་མང་པོ་འབྱུང་ངེས། དེ་ལྟ་བུའི་བསམ་གཞིག་དང་དོགས་སློང་གིས་སློབ་མའི་རྒྱུད་ཀྱི་བག་ལ་ཞ་བའི་ལྷན་སྐྱེས་ཀྱི་རྣམ་དཔྱོད་མྱུར་མོར་སློང་སྲིད། སྤྱིར་བཏང་གི་བསྡུས་གྲྭའི་རིགས་ལམ་འགྲོ་སྟངས་གཞན་ནས་ཤེས་པར་བྱའོ། །

གཉིས་པ། རིགས་ལམ་སློབ་ཁྲིད་ཀྱི་བསམ་གཞིག་འགའ།

“གཏན་ཚིགས་རིག་པ་དང་མཚན་ཉིད་རིག་པ་ལ་ཕྱོགས་མཐོང་ཙམ་ཡང་མེད་ན་སུམ་རྟགས་ཙམ་གྱི་འུར་སྒྲ་དེས་གར་ཡང་ཕྱིན་མི་འདུག་ལ།”①ཞེས་པ་ལྟར། བསྡུས་གྲྭའི་རིགས་ལམ་དང་བྲལ་ཚེ་མཐོ་འབྲིང་སློབ་མའི་སྦྱང་བྱའི་བརྡ་སྤྲོད་དང་སྙན་ངག རྩོམ་རིག་གིས་མཚོན་པའི་སྐད་ཡིག་གི་བསླབ་བྱའི་གནས་དང་། ལོ་རྒྱུས་ས་རྒྱུས་དངོས་ལུགས་ཀྱིས་མཚོན་པའི་རིག་ཚན་དང་རྩིས་དངོས་རྫས་གསུམ་གྱིས་མཚོན་པའི་རྩིས་ཚན་གྱི་བསླབ་བྱའི་གནས་སོགས་ལ་འཇུག་པའི་དབྱེ་ཞིབ་ཀྱི་ནུས་པ་དང་སློབ་སྦྱོང་གི་སྤྲོ་སྣང་རིམ་གྱིས་ཉམས་ཉེན་ཡོད་པས། མཐོ་འབྲིང་སློབ་མར་བསྡུས་གྲྭའི་རིགས་ལམ་སློབ་ཁྲིད་བྱེད་པ་ལ་ནན་གྱིས་འགན་འཁུར་དགོས་པ་མ་ཟད། ད་དུང་འཆར་གཞི་དང་གོ་རིམ་ཡོད་པའི་སྒོ་ནས་སྦྱོང་བ་གལ་ཆེ། གུས་པས་མཐོ་འབྲིང་སློབ་མར་རིགས་ལམ་སློབ་ཁྲིད་ཀྱི་སྐོར་ནས་བསམ་ཚུལ་འགའ་གླེང་འདོད།

1.ཐོག་མར་སྤྲོ་སྣང་བསྐྱེད་པ།

མཐོ་འབྲིང་སློབ་མར་སྤྲོ་སྣང་བསླངས་ནས་བསླབ་བྱ་འདིར་དགའ་རྒྱུ་ནི་དགེ་རྒན་གྱི་ཆེས་ཐོག་མའི་འོས་འགན་ཡིན། རྩོད་པའི་ལོ་རྒྱུས་ཁྲོད་དུ་བྱུང་བའི་དགོད་བྲོ་བའི་གཏམ་རྒྱུད་དང་དངོས་བྱུང་གི་འདས་དོན་གྱིས་སློབ་མ་རྣམས་ཀྱི་ཡིད་སེམས་བཀུག་ནས། ཁོང་ཚོ་སྤྲོ་སྣང་གིས་བསླབ་བྱ་འདིར་འཇུག་པའི་མཐུན་རྐྱེན་བསྐྲུན་དགོས། དཔེར་ན། སྔར་ཨ་རིག་དགེ་བཤེས་ཆེན་མོས་དབུས་གཙང་དུ་དམ་བཅའ་འཛིན་སྐབས། ཨ་རིག་མ་མོས་རྩྭ་མི་བཟའ། ཨ་རིག་མ་མོས་ཆུ་མི་འཐུང་ཞེས་པའི་དམ་བཅའ་ཤོར་བའི་དགོད་བྲོའི་གཏམ་རྒྱུད་དང་རིགས་ལམ་རྩོད་པར་འཁོར་གསུམ་བསྐོར་ཚུལ། ཚ་རྒྱག་ལུགས་སོགས་གཏམ་རྒྱུད་ཀྱི་ལམ་ནས་ངོ་སྤྲོད་བྱས་ཏེ། སློབ་མའི་རིག་པ་ནང་དུ་བསྡུས་ནས་སློབ་སྦྱོང་ལ་བློ་རྩེ་གཅིག་སྒྲིམ་བྱ་བར་འབད་དགོས།

2.རྟགས་གསལ་རྩོད་གཞི་གསུམ་ངོས་འཛིན་པ།

མཐོ་འབྲིང་སློབ་མ་མང་ཆེ་བར་མཚོན་ན། ཐོག་མར་རྟགས་གསལ་རྩོད་གཞི་གསུམ་ངོས་འཛིན་དུ་འཇུག་དགོས། དེ་ཡང་ལོ་རིམ་དང་པོའི་སྐབས་སུ་གཙོ་བོ་

འདེམ་སྦྱོང་གི་བསླབ་གཞིར་བསྟེན་ནས། སོ་སོའི་ཆུ་ཚད་དང་དགའ་ཁ་མོས་ཕྱོགས་གཞིར་བྱས་ཏེ་ལ་ལར་ཚད་མའི་བརྡ་ཆད་དང་མང་ཆེ་བར་ཁ་སྐད་ཀྱི་ལམ་ནས་རྟགས་གསལ་རྩོད་གཞི་གསུམ་གསལ་བོར་སྟོན་དགོས། ཐལ་འགྱུར་གྱི་ལམ་ནས་རྩོད་པ་བྱེད་ཤེས་པའི་སྐབས་སུ། སློབ་མ་ཚོའི་ཤེས་རྒྱུད་ནས་ཡུན་རིང་འདུག་ཕྱིར། རང་རང་གི་འགྲོ་འདུག་ཉལ་འཆག་དང་འབྲེལ་བའི་དཔེར་བརྗོད་མང་པོ་བཞག་ནས་ཁོ་ཚོར་ཡང་ཡང་སྦྱོང་བརྡར་བྱ་རུ་འཇུག་དགོས། དེ་ལྟར་ན་སློབ་མའི་སྤྲོ་སྣང་སྔར་ལས་ཆེས་ཆེར་བརྒལ་ནས་མུ་མཐུད་དུ་བསྡུས་གྲྭའི་རིགས་ལམ་ལ་འཇུག་ངེས། ཐལ་འགྱུར་གྱི་ལམ་ནས་རྩོད་པ་བྱེད་ཚུལ་རྒྱུད་ལ་གསལ་བོར་ངེས་ཡོད་མེད་བརྟག་དཔྱད་བྱེད་པའི་ཆེད་དུ། སློབ་གྲོགས་ཚོས་ཕན་ཚུན་བར་འགྲན་བསྡུར་དང་ཕན་ཚུན་ལ་དྲི་བ་དྲིས་ལན་གྱི་རྣམ་པས་དེ་དག་གསལ་གྱི་ལེར་ཤེས་སུ་འཇུག་དགོས།

3.ཚད་མའི་བརྡ་ཆད་དག་ལ་གོ་བ་ཟབ་མོ་བླངས་ནས་རིགས་ལམ་རྩོད་པར་ཞུགས་དགོས།

རྟགས་གསལ་རྩོད་གཞི་གསུམ་ལ་བརྒལ་བརྟག་གིས་ངོས་འཛིན་གསལ་བོ་ཐོབ་པའི་རྨང་གཞིའི་ཐོག འདེམ་སྦྱོང་དང་པོའི་ཁྲོད་བྱུང་བའི་ཚད་མའི་བརྡ་ཆད་ཀྱིས་མཚོན་པའི་བརྡ་ཆད་དམིགས་བསལ་བ་དང་ཐུན་མོང་བ་དག་ལ་སློབ་གཉེར་བརྒྱུད་དེ་དག་གི་གོ་དོན་གསལ་བོར་རྟོགས་དགོས། དེའི་སྟེང་དེང་རབས་ཀྱི་དྲྭ་རྒྱ་སོགས་སྤྱད་ནས་འཛམ་གླིང་ཤར་ནུབ་དང་རྒྱལ་ཁབ་ཕྱི་ནང་གི་རྩོད་པ་བྱེད་པའི་བརྙན་དང་པར། དཔེ་དེབ་སོགས་ལ་བལྟས་ནས། རིགས་ལམ་རྩོད་པ་བྱེད་ཚུལ་གྱི་འདྲ་ས་དང་མི་འདྲ་སའི་ཁྱད་པར་སོགས་ལ་རྒྱུས་ལོན་བྱེད་དགོས། དེར་མཐུད། བསྡུས་གྲྭའི་རིགས་ལམ་རྩོད་པའི་ཡན་ལག་ཏུ་གྱུར་པའི་རྩོད་མཁན་གྱི་གང་ཟག་དང་རྩོད་ཡུལ། རྩོད་ཚུལ་སོགས་ལའང་ཐོག་མའི་ཆ་ནས་རྒྱུས་ལོན་བྱས་རྗེས། དགེ་སློབ་ཕན་ཚུན་བར་དང་སློབ་གྲོགས་ཕན་ཚུན་བར་དུ་རིགས་སློང་བ་དང་དམ་བཅའ་བའི་ཚུལ་བཟུང་ནས་རྩོད་པ་བྱས་ཏེེ། དེ་དག་གི་རྣམ་འགྱུར་དང་བརྡ་ཆད་སོགས་ཀྱང་ཇི་བཞིན་ཐོན་པར་བྱེད་དགོས། དེ་ཡང་ཚུགས་ཀ་ཙམ་དང་རྣམ་འགྱུར་ཙམ་གྱིས་མི་ཆོག་པར། འདི་ཉིད་བསྡུས་གྲྭའི་རིགས་ལམ་སྦྱོང་བའི་མཐུན་རྐྱེན་དུ་འགྱུར་དགོས།

རང་རྒྱལ་གྱི་ཕྱོགས་བསྡུས་སློབ་གསོའི་གཞུང་ལུགས་ལ་གཞི་བཅོལ་ནས། སློབ་མ་ནི་ནམ་ཡང་སློབ་ཁྲིད་ཀྱི་སྙིང་བོར་འཇོག་དགོས་པའི་དགོངས་ཚུལ་མངོན་དུ་བཅུག་ནས། དགེ་རྒན་གྱིས་ངེས་པར་དུ་སློབ་མ་དང་ལྷན་དུ་རིགས་ལམ་རྩོད་པའི་འགྲོས་ཀྱིས་ཕན་ཚུན་བགྲོ་གླེང་བྱས་ནས་སྣ་མང་ཤེས་བྱའི་གནས་ལ་བརྒལ་བརྟག་གིས་ཐེ་ཚོམ་གཅོད་དགོས། དེའི་མཐའ་འབྲས་སུ་སློབ་མ་རྣམས་ནི་གཞན་གྱི་ཟེར་སྒྲོས་ཙམ་གྱི་རྗེས་སུ་མི་འབྲངས་པར། རང་རང་གི་བློ་གྲོས་ཀྱི་རྩལ་གྱིས་བརྟག་དཔྱད་ཞིབ་འཇུག་ལ་དགའ་བའི་གོམས་སྲོལ་ཆགས་སུ་འཇུག་དགོས།

4.དུས་ཚོད་ངེས་ཅན་བཀོལ་ནས་ཡང་ཡང་སྦྱོང་དགོས།

བསྡུས་གྲྭའི་རིགས་ལམ་སློབ་ཁྲིད་ཁྲོད་མེད་དུ་མི་རུང་བ་ཞིག་ཡོད་པ་ནི་རིགས་ལམ་རྩོད་པ་རེད། བསྡུས་གྲྭའི་རིགས་ལམ་སློབ་ཁྲིད་ལས་རྩོད་པ་ལ་གལ་ཆེ་བའི་གོ་གནས་ཡོད་དེ། ངེས་པར་དུ་འདེམ་སྦྱོང་ཁྲོད་ཀྱི་བསྡུས་གྲྭའི་བརྡ་ཆད་དག་རྒྱུད་ལ་ངེས་དགོས་ཤིང། ངེས་སྦྱོང་ཁྲོད་ཀྱི་བསྡུས་ཚན་དག་གི་དོན་ཡང་གོ་བར་བྱེད་དགོས་ལ། ཐལ་འགྱུར་གྱི་ལམ་ནས་རྩོད་པ་བྱེད་ཐུབ་པའི་ཚད་ལའང་སླེབས་དགོས། དེ་འདྲའི་ཚད་ལ་སླེབས་ཐུབ་པའི་སླད་དུ། བསྡུས་གྲྭའི་རྩོད་པ་ལ་ངེས་པར་དུ་ནན་ཏན་གྱིས་སྦྱོང་དགོས། དང་ཐོག་རྟགས་གསལ་རྩོད་གཞིའི་ངོས་འཛིན་དང་བཀོལ་སྤྱོད་ལ་བྱང་བར་བྱས་ནས། ཚད་མའི་བརྡ་ཆད་དག་ལ་ཡང་དང་ཡང་དུ་འབད་པས་སྦྱངས་ན། འདི་ཉིད་རིག་གཞུང་ཀུན་ལ་འཇུག་པའི་ལྡེ་མིག་ལྟ་བུར་འགྱུར་ངེས་ཏེ། བསྡུས་གྲྭའི་རྩོད་པ་ལེགས་པོ་ཞིག་སོང་ཡོད་ཚེ་དོན་གྱི་གོ་བའི་ཆ་ལ་གཞན་ལས་ལྡབ་འགྱུར་གྱིས་ལྷག་པ་ཡོང་ཐུབ། དེ་བས། མཐོ་འབྲིང་སློབ་མར་བསྡུས་གྲྭའི་རིགས་ལམ་གྱི་སློབ་ཁྲིད་བྱེད་དུས། ངེས་པར་དུ་དུས་ཚོད་འདང་ངེས་ཤིག་བཀོལ་ནས་རིགས་ལམ་རྩོད་པར་འཇུག་དགོས། དེ་ལ་རྩོད་སྟངས་ཀྱི་ཆ་ནས་ཟླ་བོ་ཉིས་ཆ་དང་ཚོ་ཆུང་ཚོ་ཆུང་བར་གྱི་རྩོད་པ། འཛིན་གྲྭ་འཛིན་གྲྭའི་བར་བརྩད་ཆོག མཉམ་འཇོག་གནང་དགོས་པ་ཞིག་ནི་རྩོད་པའི་གཞི་གདམ་པའི་སྐབས་སུ། བསླབ་དེབ་རྐྱང་རྐྱང་གི་ཤེས་བྱའི་སྒྲོམ་དུ་མི་ཚུད་པར། ཉིན་རྒྱུན་གྱི་འཚོ་བའི་ཁྲོད་འཕྲད་པའི་དོན་སྣ་ཚོགས་དང་རང་གི་ཉེ་འཁོར་གྱི་ཅ་ལག་སྣ་ཚོགས་རྩོད་གཞིར་བཟུང་ནས་བརྩད་ན་སློབ་མ་ཚོའི་རྒྱུད་ལ་བསྡུས་གྲྭ་ནི་ང་ཚོའི་ཉེ་འཁོར་ན་འདུག་ཨང་སྙམ་པའི་སྙིང་ཉེ་བའི་ཚོར་བ་སྐྱེ་བ་དང། ཁོ་ཚོའི་ཤེས་རྒྱུད་ན་བག་ལ་ཞ་བའི་སློབ་སྦྱོང་གི་སྤྲོ་བ་བསྐྱེད་པར་ཡང་ནུས་པ་བླ་ལྷག་ཐོན་ངེས།

5.དགེ་རྒན་གྱིས་ཁྲིད་པ་དང་སློབ་མས་རྩོད་པ་མཉམ་དུ་སྦྲེལ་དགོས།

བསྡུས་གྲྭའི་རིགས་ལམ་རྩོད་པ་ནི་རིག་གཞུང་ཀུན་པོ་སྦྱོང་བའི་རམ་འདེགས་སུ་འགྱུར་དགོས་ཏེ།“ཚད་མའི་རིགས་ལམ་གྱི་སྒོ་ནས་དབུ་ཚད་བྱམས་ཆོས་སོགས་ཀྱི་སློབ་གཉེར་ལ་འཕེལ་རྒྱས་ཆེན་པོ་འགྲོ་བའི་སྐུལ་མ་ཆེན་པོ་བྱུང་།”①ཞེས་དང་། གུང་ཐང་བསྟན་པའི་སྒྲོན་མེས་ཀྱང་།“གཞུང་དོན་ཟབ་མོའི་ལུས་ཀྱི་རྩལ་རྫོགས་ཀྱང་། ། རིགས་ལམ་འཕྲུལ་གྱི་མཆེ་སྡེར་མི་ལྡན་པ། །

རྒོལ་ངན་གླང་བོ་འཇོམས་པར་མི་ནུས་པས། ། ཚིག་འཁྲིའི་སྦྱོར་བ་འགའ་ཟུང་གཏམ་དུ་སྨྲས། །”②ཞེས་པ་ལྟར་བསྡུས་གྲྭའི་རིགས་ལམ་འདི་ཉིད་ལ་བློ་གྲོས་དང་ཁ་ལྕེ། རྣམ་དཔྱོད་སོགས་དང་སྦྱར་ནས་ཟུང་འབྲེལ་གྱིས་བསླབས་ན། ཆེ་ས་ནས་བོད་ཀྱི་རིག་གནས་ཆེ་ཆུང་བཅུར་འཇུག་པའི་སྒོ་ཐེམ་གལ་ཆེན་དུ་འགྱུར་ལ་སློབ་གཉེར་ལ་ཕན་པའི་སྨན་མཆོག་ཡིན་ལ། ཆུང་ས་ནས་སློབ་མ་རང་རང་གི་བསླབ་བྱའི་དོན་གྱི་གོ་བ་གནད་ལ་ཕིགས་པའི་ཐབས་མཆོག་ལྟ་བུར་འགྱུར་ངེས། དེའི་ཕྱིར། བསྡུས་གྲྭའི་རིགས་ལམ་ལ་སློབ་ཁྲིད་དང་རྩོད་པ་ལྷན་དུ་སྦྱར་ནས་འབད་པས་སྦྱངས་དགོས།

གསུམ་པ། མཇུག་སྡུད།

མདོར་ན། རིགས་ལམ་གྱི་རྩོད་པ་ནི་རིག་གཞུང་ཀུན་ལ་འཇུག་པའི་ཐེམ་སྐས་དང་ལྡེ་མིག་ལྟ་བུ་ཡིན་པས། དེས་མཐོ་འབྲིང་སློབ་མའི་སློབ་གཉེར་དང་ཉིན་རྒྱུན་གྱི་འཚོ་བ་ལའང་དགེ་མཚན་བླ་མེད་ཐོན་ཡོད། དཔེར་མཚོན་ཙམ་དྲངས་ན། བསྡུས་གྲྭའི་རིགས་ལམ་བཀོལ་ནས་སྐད་ཡིག་གི་བསླབ་གཞི་དང་རིག་ཚན་ཤེས་བྱར་རིགས་པ་དང་བཅས་པས་ངེས་ཤེས་རྙེད་པ་དང་།བག་ཆགས་ཟབ་མོ་འཇོག་ཐུབ་པ། ཟུར་མི་འདྲ་བའི་སྒོ་ནས་དབྱེ་ཞིབ་བྱེད་པ་སོགས་གཞུང་ལུགས་དང་ལག་ལེན་ཟུང་འཇུག་གིས་སློབ་གཉེར་བྱེད་སྟངས་དེས། ཚད་ངེས་ཅན་ཞིག་གི་ངོས་ནས་སློབ་མའི་རིགས་སྒོ་འབྱེད་པ་དང་བློ་གྲོས་རྒྱས་པ། སློབ་སྦྱོང་གི་གྲུབ་འབྲས་སྔར་ལས་བཟང་བ་སོགས་ཕྱོགས་ཡོངས་ཀྱི་ནུས་རྩལ་འཕེལ་རྒྱས་སུ་འགྲོ་བ་ལ་ནུས་པ་མི་དམན་པ་ཐོན་ཡོད། །

* སྨན་བླ་སྐྱབས། མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང2020ལོའི་ཚད་མ་རིག་པའི་རབ་འབྱམས་ཞིབ་འཇུག་སློབ་མ་ཡིན།

7.png

① 俞发亮.高中语文应开设逻辑学选修课程 [J] .语文建设,2013.

② རྭ་བསོད་ནམས་དབང་རྒྱལ་དང་བསེ་ངག་དབང་བཀྲ་ཤིས། རྭ་བསྡུས་དང་བསེ་བསྡུས་རྩོམ་འཕྲོ་བཞུགས་སོ། ། [M] བོད་ལྗོངས་མི་དམངས་དཔེ་སྐྲུན་ཁང་། 2010:340.

① ས་སྐྱ་པཎྜིཏ་ཀུན་དགའ་རྒྱལ་མཚན། རིགས་གཏེར་རང་འགྲེལ། [M] མི་རིགས་དཔེ་སྐྲུན་ཁང་། 1988:393.

① དམུ་དགེ་བསམ་གཏན། བློ་གསལ་རིགས་སྒོ། [M] མཚོ་སྔོན་མི་རིགས་དཔེ་སྐྲུན་ཁང་། 2006:198.

① ཕྱྭ་བ་ཆོས་སེང་། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས། བཀའ་གདམས་གསུང་འབུམཕྱོགས་བསྒྲིགས་ཐེངས་དང་པོ། [M] སི་ཁྲོན་མི་རིགས་དཔེ་སྐྲུན་ཁང་། 2006:45.

① གུང་ཐང་བསྟན་པའི་སྒྲོན་མེ། ཚད་མའི་དགོངས་དོན་བདེ་བླག་ཏུ་རྟོགས་པའི་ལྡེ་མིག [M] ཀན་སུའུ་མི་རིགས་དཔེ་སྐྲུན་ཁང་། 1997:3.

① དམུ་དགེ་བསམ་གཏན། བློ་གསལ་རིགས་སྒོ། [M] མཚོ་སྔོན་མི་རིགས་དཔེ་སྐྲུན་ཁང་། 2006:198.

① ཕྱྭ་བ་ཆོས་སེང་། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས། བཀའ་གདམས་གསུང་འབུམཕྱོགས་བསྒྲིགས་ཐེངས་དང་པོ། [M] སི་ཁྲོན་མི་རིགས་དཔེ་སྐྲུན་ཁང་། 2006:45.

① གུང་ཐང་བསྟན་པའི་སྒྲོན་མེ། ཚད་མའི་དགོངས་དོན་བདེ་བླག་ཏུ་རྟོགས་པའི་ལྡེ་མིག [M] ཀན་སུའུ་མི་རིགས་དཔེ་སྐྲུན་ཁང་། 1997:3.

① ཕྱྭ་པ་ཆོས་ཀྱི་སེངྒེ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས། བཀའ་གདམས་གསུང་འབུམ་ཕྱོགས་བསྒྲིགས་ཐེངས་དང་པོ། [M] སི་ཁྲོན་མི་རིགས་དཔེ་སྐྲུན་ཁང་། 2006:45.

② གུང་ཐང་བསྟན་པའི་སྒྲོན་མེ། ཚད་མའི་དགོངས་དོན་བདེ་བླག་ཏུ་རྟོགས་པའི་ལྡེ་མིག [M] ཀན་སུའུ་མི་རིགས་དཔེ་སྐྲུན་ཁང་། 1997:3.