[གནད་བསྡུས] རྩོམ་ཡིག་འདིའི་ནང་དུ་རྩོམ་པ་པོས་ཐོག་མར་ཆ་འཕྲིན་ལག་རྩལ་གྱི་དགེ་མཚན་ངོ་སྤྲོད་དང་། བར་དུ་སློབ་ཆུང་བོད་སྐད་ཡིག་སློབ་ཁྲིད་ཁྲོད་དུ་ཇི་ལྟར་བེད་སྤྱོད་སྟངས། མཐའ་མར་ཆ་འཕྲིན་ལག་རྩལ་ནི་དགེ་སློབ་ཐུན་མོང་གི་སྟེགས་བུ་ཞིག་ཏུ་ངོས་བཟུང་ནས་བོད་སྐད་ཡིག་སློབ་ཁྲིད་ཀྱི་རིན་ཐང་རྟོགས་པར་བྱ་དགོས་པ་སོགས་ཀྱི་གྲོས་གཞི་འགའ་བཏོན་ཡོད།
[གནད་ཚིག] ཆ་འཕྲིན་ལག་རྩལ། སློབ་ཆུང་བོད་སྐད་ཡིག་སློབ་ཁྲིད། བེད་སྤྱོད་བྱེད་སྟངས། སློབ་ཁྲིད་སྤུས་ཚད།
སྤྱི་ཚོགས་འཕེལ་རྒྱས་ཀྱི་གོམ་འགྲོས་དང་བསྟུན་ཏེ་ཆ་འཕྲིན་ཅན་གྱི་ཕྱོགས་སུ་འཕེལ་འགྱུར་བྱུང་བ་དང་། ཆ་འཕྲིན་ལག་རྩལ་གྱི་སྤྱོད་སྒོ་ཡང་འཚོ་བའི་ཕྱོགས་སྣ་ཚོགས་སུ་ཁྱབ་གདལ་བྱུང་སྟེ། ཞིང་ལས་དང་བཟོ་ལས་ཐོན་སྐྱེད། རིག་གནས་ཐོན་ལས་སོགས་གཞི་གྲངས་ཅན་དུ་འགྱུར་བཞིན་པས། སློབ་ཁྲིད་ཁྲོད་དུ་ཆ་འཕྲིན་ལག་རྩལ་བེད་སྤྱོད་གཏོང་རྒྱུ་ཁ་ཚ་དགོས་གཏུགས་ཀྱི་ལས་ཤིག་ཏུ་གྱུར་ཡོད། སློབ་གསོ་སློབ་ཁྲིད་ཀྱི་ཁྱབ་ཁོངས་སུ་ཆ་འཕྲིན་ལག་རྩལ་ཡོངས་ཁྱབ་ངང་བེད་སྤྱོད་བྱེད་རྒྱུ་ནི། སློབ་གསོའི་ལས་དོན་གྱི་འཕེལ་རིམ་རིང་མོའི་ཁྲོད་ངེས་པར་དུ་བརྒྱུད་དགོས་པའི་ལམ་བུ་གལ་ཆེན་ཞིག་ཡིན། ཆ་འཕྲིན་ལག་རྩལ་བེད་སྤྱོད་ཀྱི་ཐབས་ལམ་བརྒྱུད་ནས་སློབ་གསོ་སློབ་ཁྲིད་ཀྱི་སྤུས་ཚད་མཐོར་འདེགས་གཏོང་ཐུབ་པ་དང་། དེ་ནི་ད་ལྟའི་སློབ་གསོ་བཅོས་སྒྱུར་བྱེད་པའི་གོ་རིམ་ཁྲོད་སྤྱིའི་ཁ་ཕྱོགས་འགངས་ཆེན་ཞིག་ཏུ་ཡང་གྱུར་ཡོད།
དང་པོ། ཆ་འཕྲིན་ལག་རྩལ་གྱི་དགེ་མཚན།
དེང་རབས་ཆ་འཕྲིན་ལག་རྩལ་གྱི་འགྲོས་མྱུར་བའི་འཕེལ་རྒྱས་དང་བསྟུན་ཏེ། སློབ་གསོའི་ལས་དོན་པ་དག་གིས་ཆ་འཕྲིན་ལག་རྩལ་གྱི་སྨྱན་སྦྱོར་ལ་བརྟེན་ནས་གསར་དར་སློབ་ཁྲིད་མ་དཔེ་ལ་འཚོལ་ཞིབ་ཀྱིས། ཆ་འཕྲིན་ཅན་དེ་སློབ་གསོ་དེང་རབས་ཅན་ལ་ཕྱོགས་པར་སྐུལ་འདེད་དང་དུས་རབས་ཀྱི་དགོས་འདུན་དང་འཚམ་པར་བརྩོན་ལེན་བྱེད་བཞིན་མཆིས། དེང་རབས་ཆ་འཕྲིན་ལག་རྩལ་གྱི་ལག་ཐབས་གང་དེ་སློབ་ཐུན་ཁྲོད་སྤྱད་ན་སློབ་མའི་སྤྲོ་སྣང་ཆེས་ཆེར་སྐུལ་འདེད་ཐུབ་པ་དང་སློབ་ཁྲིད་ཀྱི་ཕན་ནུས་ཀྱང་ཇེ་མཐོར་འགྲོ་ཐུབ་པ་མ་ཟད། ད་དུང་སློབ་ཁྲིད་ཀྱི་སྦྱོར་དངོས་རྗེས་གསུམ་གང་ལའང་སྟབས་བདེ་བསྐྲུན་ཡོད་པས། 《རྒྱལ་ཁབ་ཀྱི་དུས་ཡུན་འབྲིང་རིང་གི་སློབ་གསོའི་བཅོས་སྒྱུར་དང་འཕེལ་རྒྱས་འཆར་འགོད་རྩ་གནད》ལས“སློབ་གསོའི་ཁྱབ་ཁོངས་ཁྲོད་ཆ་འཕྲིན་ཅན་གྱི་སློབ་གསོ་ནི་རང་རྒྱལ་གྱི་སློབ་གསོ་དེང་རབས་ཅན་དུ་འགྱུར་བ་དང་། སློབ་སྦྱོང་ཅན་གྱི་སྤྱི་ཚོགས་བསྐྲུན་པའི་ཐབས་ཇུས་གལ་ཆེན་ཞིག་ཏུ་གྱུར་ཡོད”①ཅེས་གཏན་འབེབས་གནང་ཡོད་ཅིང་། དེ་བཞིན་སློབ་གསོའི་མཁས་པ་ཀུའུ་མིང་ཡོན་གྱིས“སློབ་གསོའི་ལས་དོན་པ་ཞིག་ཡིན་པའི་ཆ་ནས་ངེས་པར་དུ་རང་ཉིད་གནས་པའི་དུས་སྐབས་ནི་ཆ་འཕྲིན་ཅན་གྱི་དུས་སྐབས་ཤིག་ཡིན་པར་ངོས་ཟིན་གཏིང་ཟབ་ཡོད་དགོས་ཤིང་། འདུ་ཤེས་དེ་འདྲ་ལ་ངོས་འཛིན་དང་ཁས་ལེན་ཡང་དག་བྱས་ཏེ། མི་སོ་སོ་བ་རྣམས་སློབ་གསོ་ཆ་འཕྲིན་ཅན་གྱི་མི་སྣ་ཚད་ལྡན་ཞིག་ཏུ་འགྱུར་བར་བྱེད་དགོས།”②ཞེས་པ་ལྟར། ཆ་འཕྲིན་ལག་རྩལ་གང་ཞིག་སློབ་གསོའི་ཁྱབ་ཁོངས་སུ་བེད་སྤྱོད་བྱ་རྒྱུ་ཤིན་ཏུ་འགངས་ཆེན་ཡིན་པར་བསྟན།
ཆ་འཕྲིན་ལག་རྩལ་གྱི་ཐབས་ཤེས་སྤྱད་ནས་ཡིག་རིས་དང་པར་གཞི། ཡུལ་ལྗོངས། རོལ་དབྱངས། སྒྲ་གཟུགས་འགུལ་རིས་སོགས་སློབ་ཐུན་དུ་བེད་སྤྱད་ན། བྱིས་པ་ཚོའི་མཚར་སེམས་དང་ཤེས་འདོད་ཀྱི་བློ་ཡིད་ཡོངས་སུ་ཚིམ་པར་བྱེད་ནུས། ལྷག་པར་དུ་སྐད་ཡིག་སློབ་ཁྲིད་ཁྲོད་ཀྱི་ལྗོངས་རིས་བྲིས་པའི་གསལ་བཤད་རྩོམ་ཡིག་དང་། མི་སྣའི་གཟུགས་རིས་ཞིབ་འབྲི་བྱས་པ་གཙོ་བོར་བཟུང་བའི་སྒྲུང་གཏམ་སོགས་ལ་མཚོན་ན། བསླབ་གཞིའི་བརྗོད་སྙིང་དང་དམིགས་ཚད་གཞིར་བཟུང་སྟེ། འགུལ་རིས་ཀྱི་རྟོག་བཟོའི་འཇིག་རྟེན་གསར་བ་ཞིག་བསྐྲུན་ཏེ། བདེ་མྱུར་ངང་རྩོམ་ཡིག་གི་བརྗོད་དོན་གསལ་འགྲེལ་ཐུབ་པ་དང་། སློབ་མར་བག་ཆགས་ཟབ་མོ་འཇོག་ཐུབ་པ་ཡིན། རྒྱུ་མཚན་དེ་འདྲ་ལ་དམིགས་ན་ཆ་འཕྲིན་ལག་རྩལ་གྱི་དགེ་མཚན་ཤིན་ཏུ་འགངས་ཆེ་བ་གསལ་བོར་རྟོགས་ཡོང་།
གཉིས་པ། བོད་སྐད་ཡིག་སློབ་ཁྲིད་ཁྲོད་བེད་སྤྱོད་སྟངས།
རང་ཉིད་ནི་སློབ་གསོའི་ལས་རྐང་གི་དགེ་རྒན་ཞིག་ཡིན་པའི་ཆ་ནས། གཅིག་ནས་ཆ་འཕྲིན་ཅན་གྱི་སློབ་གསོའི་གཞི་རྩའི་དགོངས་དོན་ལ་སློབ་སྦྱོང་རྒྱུས་ལོན་དང་། གཉིས་ནས་རང་གི་དངོས་བརྒྱུད་ལག་ལེན་མྱོང་བ་ལ་གཞིགས་ཏེ། བོད་སྐད་ཡིག་སློབ་ཁྲིད་ཁྲོད་ཆ་འཕྲིན་ལག་རྩལ་བེད་སྤྱོད་སྟངས་འགའ་གླེང་བར་བྱའོ། །
གཅིག སྲོལ་རྒྱུན་གྱི་སློབ་ཁྲིད་བྱེད་སྟངས་དང་ཆ་འཕྲིན་ལག་རྩལ་གྱི་སློབ་ཁྲིད་བྱེད་སྟངས་མཉམ་དུ་སྤྱོད་པ།
དུས་རྒྱུན་གྱི་སློབ་ཁྲིད་ལག་ལེན་ཁྲོད། སྲོལ་རྒྱུན་གྱི་སློབ་ཁྲིད་བྱེད་སྟངས་ཀྱི་རྨང་གཞིའི་སྟེང་ནས་དེང་རབས་ཆ་འཕྲིན་ལག་རྩལ་གྱི་སློབ་ཁྲིད་བྱེད་སྟངས་བེད་སྤྱོད་བྱེད་དགོས་པ་མ་གཏོགས། དེང་རབས་ཀྱི་སློབ་ཁྲིད་བྱེད་ཐབས་ལ་བལྟོས་ཏེ་སྲོལ་རྒྱུན་གྱི་སློབ་ཁྲིད་བྱེད་སྟངས་རིང་དུ་འདོར་བའི་ཕྱོགས་སུ་ལྷུང་མི་རུང་བར། ཐབས་ལམ་གཉིས་ཀ་ཟུང་འབྲེལ་སྒོས་སྤྱོད་དགོས་སྙམ།
བོད་ཡིག་ནི་སྦྱོར་ཀློག་གི་ཡི་གེ་ཡིན་པ་དང་སློབ་ཆུང་སྐབས་སུ་སྒོ་ཀུན་ནས་སྐད་ཡིག་གི་རྨང་གཞིའི་ཤེས་བྱར་ཤུགས་སྣོན་རྒྱག་རྒྱུ་ནི་སློབ་ཁྲིད་ཀྱི་དམིགས་ཚད་གཙོ་བོ་ཞིག་ཏུ་གྱུར་ཡོད་པས། སྲོལ་རྒྱུན་གྱི་སློབ་ཁྲིད་བྱེད་ཐབས་ཀྱིས་སྐད་ཡིག་སློབ་ཁྲིད་ཁྲོད་དུ་གོ་གནས་འགངས་ཆེན་ཟིན་ཡོད། དེ་ཡང་ཐོག་མར་ཡི་གེའི་སྦྱོར་ཀློག་ནས་བཟུང་ཡི་གེ་འབྲི་ཐབས་དང་། ཐ་སྙད་སྒྲིག་སྟངས། རིམ་གྱིས་སུམ་རྟགས་ཀྱིི་དོན་ལ་ངེས་ཤེས་བསྐྱེད་དེ་རྩོམ་རིག་འབྲི་སྦྱོང་གི་ལམ་ཁར་འཁྲིད་དགོས་པས། ཚིག་གི་དག་ཆ་འདུས་པའི་རྨང་གཞིའི་ཤེས་བྱ་ལེགས་པར་ངེས་ན་སྐད་ཡིག་གི་རྨང་གཞི་ལེགས་པོ་ཆགས་ཐུབ། གོ་རིམ་དེ་ལས་རྨང་གཞིའི་ཤེས་བྱ་སྲ་བརྟན་དུ་འགྲོ་བ་དང་སྐད་ཡིག་གི་སློབ་ཁྲིད་སྤུས་ཚད་རིམ་གྱིས་མཐོར་འདེགས་ཡོང་བཞིན་ཡོད། དེ་ནི་ཀློག་པ་དང་འབྲི་བ། འགྲེལ་བ། སྐྱོར་བ་སོགས་ཀྱི་གོ་རིམ་ཁྲོད་མངོན་འགྱུར་ཡོང་བ་ཡིན་ཕྱིར། སྲོལ་རྒྱུན་སློབ་ཁྲིད་བྱེད་ཐབས་གང་དེ་འདོར་དུ་མེད་པའི་རྒྱུ་མཚན་ཡང་ཡིན། སྲོལ་རྒྱུན་སློབ་ཁྲིད་ཀྱི་ལེགས་ཆ་བླངས་པའི་རྨང་གཞིའི་སྟེང་། ཆ་འཕྲིན་ལག་རྩལ་གྱི་སྨྱན་ཆས་སོགས་སློབ་ཁྲིད་ཁྲོད་བེད་སྤྱད་ན། སློབ་ཁྲིད་དམིགས་ཚད་བདེ་བླག་ངང་ལེགས་འགྲུབ་འབྱུང་སྟབས། ང་ཚོས་དུས་དང་རྣམ་པ་ཀུན་ཏུ་སྲོལ་རྒྱུན་དང་དེང་རབས་ཀྱི་སློབ་ཁྲིད་བྱེད་ཐབས་ཟུང་འབྲེལ་གྱི་སྒོ་ནས་སློབ་ཁྲིད་སྤུས་ཚད་མཐོར་འདེགས་གཏོང་བར་བསམ་གཞིག་ཞིབ་མོ་གཏོང་དགོས།
གཉིས། སློབ་ཁྲིད་ཀྱི་རྒྱུ་ཆ་སྤུས་ལེགས་སྤྱད་ནས་སློབ་མའི་ཧུར་སེམས་མཐོར་འདེགས་གཏོང་དགོས།
མ་ལག་ལྡན་ཞིང་འཐུས་སྒོ་ཚང་བའི་ཆ་འཕྲིན་ལག་རྩལ་བེད་སྤྱོད་ཐུབ་ན་སློབ་གསོ་འཕེལ་རྒྱས་འབྱུང་བར་སྐུལ་འདེད་གཏོང་ཐུབ་པས། ཆ་འཕྲིན་ལག་རྩལ་གྱི་དགེ་མཚན་གང་ནུས་སྒོས་སྔོག་འདོན་བྱས་ཏེ་བེད་སྤྱོད་ལེགས་པོ་གཏོང་དགོས། ཆ་འཕྲིན་ལག་རྩལ་གྱི་ནུས་པ་དམིགས་བསལ་བ་ཞིག་ནི་ཡུལ་དུས་ཀྱི་བཀག་རྒྱ་ལས་བརྒལ་ཏེ། འཕྲིན་ལམ་བརྒྱུད་ནས་སྤུས་ལེགས་སློབ་གསོའི་སློབ་ཁྲིད་ཐོན་ཁུངས་མྱོང་རོལ་བྱས་ཆོག་པས། ས་ཕྱོགས་མི་གཅིག་ཀྱང་དྲ་ལམ་ན་མཆིས་པའི་སློབ་ཁྲིད་ཀྱི་རྒྱུ་ཆ་སྤུས་ལེགས་མཉམ་སྤྱོད་བྱས་ཆོག དཔེར་ན་ཉེ་བའི་ལོ་འགའི་ནང་དུ་ཡོངས་འཛིན་དྲ་བ་སོགས་སུ་སློབ་ཁྲིད་ཀྱི་རྒྱུ་ཆ་ལེགས་པོ་གང་མང་ཞིག་འཚོལ་སྔོག་ཐུབ་ཅིང། ལྷག་པར་དུ་མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་གི་དགེ་འོས་ཁ་ཕྱོགས་ཀྱི་སློབ་མ་དག་གིས་ཆུང་འབྲིང་སློབ་མའི་བློ་ཁ་དང་དགེ་རྒན་དག་ལ་སྟབས་བདེ་ཡོང་ཆེད། སློབ་ཁྲིད་ཀྱི་རྒྱུ་ཆpptཡི་རྣམ་པར་བཟོས་ཏེ་དྲ་ལམ་དུ་བཀྲམ་པ་ནི། ཆ་འཕྲིན་ལག་རྩལ་རྒྱ་ཆེར་དར་བའི་མངོན་ཚུལ་ཞིག་ཡིན་ལ་ཆ་འཕྲིན་ལག་རྩལ་གྱི་སྟབས་བདེ་ཡི་ཆ་དེ་བེད་སྤྱོད་གང་ལེགས་བྱས་པའི་མངོན་རྟགས་ཤིག་ཀྱང་རེད། དེ་ལྟར་ཆ་འཕྲིན་ཐོན་ཁུངས་ཁྱད་མེད་དུ་བེད་སྤྱོད་བྱས་ཆོག་པས་བེད་སྤྱོད་ཀྱི་བར་སྟོང་རྒྱ་ཆེན་པོ་ཞིག་ཐོབ་པ་ཡིན་པས། རྣམ་ཀུན་གྱི་སྐད་ཡིག་སློབ་ཁྲིད་ཁྲོད་དུ་སྒྲ་གཟུགས་འགུལ་རིས་གཅིག་བསྡུས་ཀྱི་སྨྱན་ཆས་སྤྱད་པ་ན་ཡིག་ཐོག་ལྐོག་གྱུར་གྱི་ཆ་རྣམས་ཐད་ཀར་མཐོང་བའི་གཟུགས་རིས་ཀྱི་རྣམ་པར་ཤར་བ་ཡིན་པས། སྐད་ཡིག་གི་སྒྱུ་རྩལ་རང་བཞིན་དང་གསོན་ཉམས་རང་བཞིན་འབུར་དུ་ཐོན་ཐུབ་པ་འབྱུང་ངེས།
གསུམ། སློབ་མའི་གསར་གཏོད་ནུས་པར་སྐུལ་འདེད་གཏོང་དགོས།
སློབ་གསོའི་མཐར་ཐུག་ནི་མི་གསོ་སྐྱོང་བྱེད་པ་ཡིན་པས། སློབ་ཁྲིད་ཀྱི་ཐབས་ལམ་གང་ཞིག་བརྒྱུད་ན་ཡང་མཐའ་མའི་དམིགས་གཞི་སློབ་མ་ཡིན་ཞིང་། ཆ་འཕྲིན་ལག་རྩལ་གྱི་ལག་ཐབས་སྤྱད་པ་ཡང་དགེ་རྒན་དག་ལ་སློབ་ཁྲིད་ཀྱི་སྟབས་བདེ་བསྐྲུན་པ་ཙམ་ཞིག་མ་ཡིན་པར། གནད་ཀྱི་གཙོ་བོ་ནི་སློབ་མ་དག་གི་བསམ་གཞིགས་ཀྱི་ནུས་པ་དང་གསར་གཏོད་ཀྱི་ནུས་པ་སྐྱེད་བསྲིང་རྒྱུ་དེ་ཡིན། དེ་ཡང་ཆ་འཕྲིན་ལག་རྩལ་གྱི་ཐབས་ལམ་སྤྱད་ན་གཟུགས་རིས་ཅན་ཐད་ཀར་ཚོར་ཐུབ་པའི་རི་མོ་དང་སྒྲ་སོགས་ཡོད་སྟབས། སྲོལ་རྒྱུན་སློབ་ཁྲིད་དང་མི་འདྲ་བར་སློབ་མ་དག་གི་བསམ་གཞིག་གི་ནུས་པ་བསྐྱེད་ཐུབ་ཅིང་བསམ་བློ་གཏོང་བའི་བར་སྟོང་རྒྱ་ཆེན་པོ་ཞིག་བསྩལ་ཡོད། དེ་འདྲའི་གནས་ཚུལ་འོག སྨྱན་ཆས་སློབ་ཁྲིད་ཀྱི་སྐུལ་འདེད་འོག་སློབ་མའི་གསར་གཏོད་ཀྱི་ནུས་པ་དང་བློ་ཡི་སྦུབས་རྒྱ་གྲོལ་ཅི་ཐུབ་ལ་འབད་རྒྱུ་ནི་ཁ་ཕྱོགས་འགངས་ཆེན་ཞིག་ཡིན་པར་འདོད་ཅིང་།“སློབ་མ་ལ་རང་སྟོབས་སྒོས་སློབ་སྦྱོང་བྱེད་པའི་བར་སྟོང་སྩོལ་དགོས”①ཞེས་གསུངས་པ་ལྟར། སློབ་མ་དག་ལ་སློབ་ཁྲིད་བྱས་པའི་མཇུག་ཏུ་བསམ་གཞིག་གིི་ནུས་པ་དང་གསར་གཏོད་ཀྱི་ནུས་པ་བླ་ལྷག་ཅིག་འཐོབ་པར་བྱེད་དགོས།
གསུམ་པ། བེད་སྤྱོད་སྟངས་སྐོར་གྱི་གྲོས་གཞི་འགའ།
རྩོམ་འདིར་གཞུང་ལུགས་དང་ལག་ལེན་ཟུང་འབྲེལ་བྱེད་པའི་བྱེད་ཐབས་སྤྱད་ཅིང་བཀོད་འཛུགས་གཞུང་ལུགས་ཀྱི་མཛུབ་སྟོན་འོག་ནས། ཆ་འཕྲིན་ལག་རྩལ་གང་དེ་སྐད་ཡིག་སློབ་ཁྲིད་ཁྲོད་སྤྱོད་སྟངས་ཐད་གྲོས་གཞི་འགའ་འདོན་པར་བྱ་སྟེ།
གཅིག ཆ་འཕྲིན་ལག་རྩལ་ནི་དགེ་སློབ་ཐུན་མོང་གི་སྟེགས་བུ་ཞིག་ཏུ་ངོས་བཟུང་ནས་སྐད་ཡིག་སློབ་ཁྲིད་ཀྱི་རིན་ཐང་གལ་ཆེན་རྟོགས་པར་བྱ་དགོས། དེང་རབས་ཆ་འཕྲིན་ལག་རྩལ་བེད་སྤྱོད་བྱས་པ་དང་བསྟུན་ནས། ལྐོག་གྱུར་གྱི་ཤེས་བྱའི་གནས་གང་ཞིག་ལས་སྣོན་བྱས་ཆོག་སྟེ། སྒྲ་བརྙན་གཟུགས་རིས་ཀྱི་རྣམ་པར་བརྟེན་ནས་ཤེས་བྱའི་སྤྲོ་སྣང་མཐོར་འདེགས་བཏང་ཆོག་ལ་སློབ་མའི་སྤྲོ་བ་བསྲིང་ཐུབ་པས། སློབ་མ་དག་གིས་རང་འགུལ་ངང་སློབ་སྦྱོང་བྱེད་པ་དང་སློབ་ཐུན་གྱི་ཕན་ནུས་མཐོར་འདེགས་ཆེན་པོ་འབྱུང་ངེས།
གཉིས། དེང་རབས་ཆ་འཕྲིན་ལག་རྩལ་གྱི་ཐབས་ལམ་སྣ་ཚོགས་ལ་བརྟེན་ནས་སྐད་ཡིག་སློབ་ཁྲིད་ཀྱི་ནང་དོན་ཕུན་ཚོགས་ཇེ་ཚོགས་སུ་གཏོང་དགོས། སྨྱན་མང་གཟུགས་ཀྱི་སློབ་ཁྲིད་ལག་ཐབས་གང་དེ་སྐད་ཡིག་སློབ་ཁྲིད་ཁྲོད་སྤྱད་ཚེ། དགེ་རྒན་གྱིས་དྲ་རྒྱ་ལ་བརྟེན་ཏེ་སློབ་ཁྲིད་ཐོན་ཁུངས་སྔར་ལས་ལེགས་པར་བརྟེན་ཆོག་ཅིང་། སློབ་ཁྲིད་མ་དཔེ་ལ་ཆ་རྐྱེན་གང་ལེགས་འདོན་སྤྲོད་བྱས་ཆོག དྲ་རྒྱར་བརྟེན་ནས་ཤེས་བྱའི་ཐོན་ཁུངས་གསར་ཤོས་འཚོལ་ཐུབ་པ་དང་དགེ་རྒན་གྱི་སློབ་ཁྲིད་ཐོན་ཁུངས་ཕུན་སུམ་ཇེ་ཚོགས་སུ་གཏོང་ཐུབ་པས་སློབ་མ་ལ་སློབ་སྦྱོང་གི་སྟེགས་བུ་སྔར་ལས་ལེགས་པ་ཞིག་བསྐྲུན་པ་ཡིན།
གསུམ། ལུགས་མཐུན་སྒོས་དེང་རབས་ཆ་འཕྲིན་ལག་རྩལ་བེད་སྤྱད་དེེ་སློབ་མའི་སྐད་ཡིག་གི་ཤེས་བྱའི་སྒྲོམ་གཞི་ཆགས་པར་རམ་འདེགས་བྱ་དགོས། ཉམས་མྱོང་ལྡན་པའི་དགེ་རྒན་གྱིས་སློབ་ཐུན་ཁྲོད་དུ་ཆ་འཕྲིན་ལག་རྩལ་གྱི་ལག་ཐབས་སྤྱད་ཅིང་། གཟུགས་སྣང་རང་བཞིན་དང་ཐད་མཐོང་རང་བཞིན་གྱི་ཆ་ལེགས་པར་སྤྱད་ནས་སློབ་མ་དང་མཉམ་དུ་སྐད་ཡིག་ཤེས་བྱའི་སྒྲོམ་གཞི་ཞིག་ཆགས་པར་འཇུག་ཐུབ། སྐད་ཡིག་ཤེས་བྱའི་སྒྲོམ་གཞི་ཞིག་ཆགས་པར་བྱེད་པ་ནི་སློབ་མར་ཤེས་བྱ་གསེད་བཀྲོལ་བྱེད་པའི་ཐབས་མཆོག་ཅིག་ཡིན་ཞིང་། ཤེས་བྱ་སྣ་ཚོགས་བར་གྱི་འབྲེལ་བ་ལ་རྒྱུས་ལོན་བྱེད་དུ་བཅུག་པ་ཞིག་ཡིན་པས། སློབ་མ་དག་གིས་དྲི་ལན་འདེབས་དུས་སྒོ་ཚང་ཞིང་ཕྱོགས་ཡོངས་ཁེབས་པའི་སྒོ་ནས་དྲི་བར་ལན་འདེབས་ཐུབ་པས། ལུགས་མཐུན་སྒོས་ཆ་འཕྲིན་ལག་རྩལ་གྱིས་སློབ་མ་དང་མཉམ་དུ་ཤེས་བྱའི་སྒྲོམ་གཞི་ཞིག་ཆགས་པར་འབད་འབུངས་བྱ་དགོས།
མཇུག་བསྡུ་བ།
མདོར་ན་སློབ་ཁྲིད་སྤུས་ཚད་མཐོར་འདེགས་གཏོང་རྒྱུ་ནི་སློབ་ཐུན་སློབ་ཁྲིད་ཀྱི་གཞི་རྩའི་དམིགས་ཚད་ཡིན་ཞིང་། ཆ་འཕྲིན་ལག་རྩལ་གྱི་སློབ་ཁྲིད་བྱེད་ཐབས་སྤྱད་པ་དེ་ཡིས་སློབ་ཁྲིད་སྤུས་ཚད་མཐོར་འདེགས་གཏོང་བར་རམ་འདེགས་ཀྱི་ནུས་པ་ཆེན་པོ་ཐོན་ཐུབ། འདིར་རང་ཉིད་ཀྱི་ལོ་ངོ་གང་མང་གི་སློབ་ཁྲིད་ལག་ལེན་ཁྲོད་ཀྱི་མྱོང་བ་གཞིར་བྱས་ཐོག བོད་སྐད་ཡིག་སློབ་ཁྲིད་ཁྲོད་དུ་ཆ་འཕྲིན་ལག་རྩལ་བེད་སྤྱོད་སྟངས་དང་སྒོས་སུ་གྲོས་གཞི་འགའ་གླེང་བ་རྣམས་སློབ་གསོའི་དོན་གཉེར་མཁན་དག་ལ་དཔྱད་གཞི་ཙམ་དུ་ཕུལ་བ་ཡིན། །
* དོན་གྲུབ་སྐྱིད། མཚོ་བྱང་ཁུལ་རྐང་ཚ་རྫོང་མཚོ་འཁྱིལ་ཞང་བཅའ་སྡོད་ལུགས་མི་རིགས་སློབ་ཆུང་དུ་ཕྱག་ལས་གནང་བཞིན་ཡོད།
10.png
① 楚江亭主编.国家中长期教育改革和发展规划纲要[M]北京.北京师范大学出版社，2020:418.
② 顾明远.中国教育的文化基础[M]西安.陕西教育出版社，2004:314.
① 顾明远：中国教育的文化基础，[M]西安：陕西教育出版社，2004年，P308.
① 顾明远.中国教育的文化基础[M]西安.陕西教育出版社，2004:308.