ཞིན་ཧྭ་གསར་འགྱུར་ཁང་པེ་ཅིན་ནས་ཟླ་4པའི་ཚེས་26ཉིན་གློག་འཕྲིན་འབྱོར་གསལ། སྤྱི་ཟླ་4པའི་ཚེས་26ཉིན་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་གཉིས་པའི་ཐོག མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་བཅའ་ཁྲིམས་ལ་བརྡས་ཐག་བཅད་ནས་གྲོས་འཆམ་བྱུང་བ་དང་། ཁྲིམས་ལུགས་འདི་2023ལོའི་ཟླ་9པའི་ཚེས་1ཉིན་ནས་ལག་བསྟར་བྱ་རྒྱུ་རེད།
མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་བཅའ་ཁྲིམས་ལ་བསྡོམས་པས་ལེའུ་7ཡོད་དེ། སྤྱིའི་རྩ་དོན་དང་སྐྱེ་ཁམས་བདེ་འཇགས་བཀོད་སྒྲིག །སྐྱེ་ཁམས་སྲུང་སྐྱོབ་སླར་གསོ། སྐྱེ་ཁམས་ཉེན་ཁ་སྔོན་འགོག་ཚོད་འཛིན། འགན་ལེན་དང་ལྟ་སྐུལ། བཅའ་ཁྲིམས་ཀྱི་འགན་འཁྲི། ཞར་བྱུང་བཅས་ཚུད་ཡོད་པ་རེད། བཅའ་ཁྲིམས་འདིར་མཚོ་བོད་མཐོ་སྒང་ཞེས་པ་ནི་བོད་རང་སྐྱོང་ལྗོངས་དང་། མཚོ་སྔོན་ཞིང་ཆེན་གྱི་སྲིད་འཛིན་ས་ཁོངས་ཡོངས་དང་ཞིན་ཅང་ཡུ་གུར་རང་སྐྱོང་ལྗོངས། སི་ཁྲོན་ཞིང་ཆེན། ཀན་སུའུ་ཞིང་ཆེན། ཡུན་ནན་ཞིང་ཆེན་བཅས་ཀྱི་འབྲེལ་ཡོད་རྫོང་རིམ་པའི་སྲིད་འཛིན་ས་ཁོངས་ལ་ཟེར།
བཅའ་ཁྲིམས་སུ་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་ཐད་རང་བྱུང་ལ་བརྩི་འཇོག་དང་རང་བྱུང་དང་བསྟུན་པ། རང་བྱུང་སྲུང་སྐྱོབ་བཅས་བྱེད་དགོས་པ་དང་། སྐྱེ་ཁམས་སྲུང་སྐྱོབ་ཨང་དང་པོར་འཇོག་རྒྱུ་མཐའ་འཁྱོངས་དང་རང་བྱུང་སླར་གསོ་གཙོ་བོར་བྱས་ནས་རང་བྱུང་སྐྱེ་ཁམས་བདེ་འཇགས་ཀྱི་མཐའ་མཚམས་བརྟན་སྲུང་བྱེད་པ། གཅིག་གྱུར་གྱིས་འཆར་འགོད་དང་མཐུན་སྦྱོར། རིགས་བགོས་ཇུས་སྤྱོད། ཚན་རིག་དང་མཐུན་པའི་སྔོན་འགོག་ཚོད་འཛིན་དང་བརྒྱུད་རིམ་ལྡན་པའི་སྒོ་ནས་བཅོས་སྐྱོང་བཅས་བྱེད་དགོས་ཞེས་གསལ་པོར་བཏོན།
བཅའ་ཁྲིམས་སུ་རྒྱལ་ཁབ་ཀྱིས་མཚོ་བོད་མཐོ་སྒང་གི་སྐྱེ་ཁམས་བདེ་འཇགས་བཀོད་སྒྲིག་ལ་སྤྱི་འདོམས་བྱས་ནས་སྐྱེ་ཁམས་བདེ་འཇགས་སྲུང་ཡོལ་མ་ལག་འཛུགས་སྐྱོང་ལེགས་སུ་བཏང་སྟེ་སྐྱེ་ཁམས་མ་ལག་གི་སྤུས་ཚད་དང་སྣ་མང་རང་བཞིན། བརྟན་པོ་རང་བཞིན། རྒྱུན་མཐུད་རང་བཞིན་བཅས་ཆེ་རུ་གཏོང་དགོས་པའི་གཏན་འབེབས་བྱས་ཡོད་པ་དང་།
བཅའ་ཁྲིམས་སུ་སྐྱེ་ཁམས་སྲུང་སྐྱོང་གི་དམར་ཐིག་དང་ཁོར་ཡུག་སྤུས་ཚད་ཀྱི་མཐའ་ཚད། ཐོན་ཁུངས་བེད་སྤྱོད་ཀྱི་ཚད་གཞི་བཅས་ཀྱི་བླང་བྱ་ལྟར་སྐྱེ་ཁམས་ཁོར་ཡུག་ཁུལ་དབྱེའི་དོ་དམ་ཚོད་འཛིན་ཇུས་གཞི་དང་སྐྱེ་ཁམས་ཁོར་ཡུག་ཆོག་འཐུས་ཀྱི་གསལ་ཐོ་བཟོ་དགོས་པ་གསལ་པོར་བཏོན་པ་དང་། བཅའ་ཁྲིམས་སུ་ད་དུང་མཚོ་བོད་མཐོ་སྒང་གི་རྒྱལ་ཁབ་ཀྱི་ས་ཆའི་བར་སྟོང་བེད་སྤྱོད་དང་རྒྱལ་ཁབ་ཀྱི་ས་ཆའི་བར་སྟོང་སྤྱོད་སྒོའི་རྩིས་སྤྲོད་དོ་དམ། རང་བྱུང་སྲུང་སྐྱོབ་ཁུལ་གྱི་མ་ལག་འཛུགས་སྐྲུན་སོགས་ཀྱི་ལམ་ལུགས་དང་བྱ་ཐབས་ཀྱང་གཏན་འབེབས་བྱས་ཡོད།
བཅའ་ཁྲིམས་སུ་རྒྱལ་ཁབ་ཀྱིས་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་དང་སླར་གསོ་བྱ་རྒྱུར་ཤུགས་སྣོན་རྒྱག་པ་དང་། རི་ཆུ་ནགས་གསུམ་དང་། ཞིང་ས། མཚེའུ། རྩྭ་ཐང་། བྱེ་ཐང་དང་འཁྱགས་ཀླུང་བཅས་གཞི་གཅིག་ཅན་གྱི་སྲུང་སྐྱོབ་དང་ཉམས་གསོ་བྱ་རྒྱུ་མཐའ་འཁྱོངས་བྱས་ནས་རང་བྱུང་སླར་གསོ་གཙོ་བོར་བྱེད་པ་དང་། རང་བྱུང་སླར་གསོ་དང་མི་ཐབས་ལ་བརྟེན་ནས་སླར་གསོ་བྱ་རྒྱུ་ཟུང་དུ་འབྲེལ་བའི་མ་ལག་བཅོས་སྐྱོང་བྱེད་དགོས་པའི་བླང་བྱ་བཏོན་པ་དང་། བཅའ་ཁྲིམས་སུ་གངས་རི་དང་འཁྱགས་ཀླུང་དར་ས། གཙང་པོ་དང་མཚེའུ། རྩྭ་ཐང་།
ནགས་ཚལ། ན་གཞུང་སོགས་སྐྱེ་ཁམས་མ་ལག་གི་རྒྱུ་རྐྱེན་གཙོ་བོ་སྲུང་སྐྱོབ་ཉམས་གསོ་དང་སྐྱེ་དངོས་སྣ་མང་རང་བཞིན་སྲུང་སྐྱོབ་ཐད་གཏན་འབེབས་བྱས་པ་དང་། གཙང་གསུམ་འགོ་ཁུངས་སོགས་ཀྱི་ལྟེ་བའི་ས་ཁོངས་གཙོ་གནད་སྲུང་སྐྱོབ་ལ་ཤུགས་སྣོན་རྒྱག་པ། མཚོ་བོད་མཐོ་སྒང་གི་རྩ་ཆེ་ལ་སྟོངས་ཉེར་ཡོད་པའམ་ཡང་ན་དམིགས་བསལ་དུ་ཡོད་པའི་བདག་ཏུ་མ་བཟུང་བའི་སྲོག་ཆགས་དང་རྩི་ཤིང་སྲུང་སྐྱོང་ལ་ཤུགས་སྣོན་བརྒྱབ་ནས་སྐྱེ་ཁམས་བར་ཁྱམས་འཛུགས་པ་དང་། ས་ཆུ་ཤོར་བར་འགོག་བཅོས། ལྗང་མདོག་གཏེར་རི་འཛུགས་པ་སོགས་ཀྱི་ལམ་ལུགས་དང་འཐུས་སྒོ་ཚང་དུ་གཏང་རྒྱུའི་གཏན་འབེབས་བྱས་ཡོད།
སྐྱེ་ཁམས་ཉེན་ཁ་སྔོན་འགོག་ཚོད་འཛིན་ཐད་ནས་བཅའ་ཁྲིམས་སུ་རྒྱལ་ཁབ་ཀྱིས་མཚོ་བོད་མཐོ་སྒང་གི་སྐྱེ་ཁམས་ཉེན་འགོག་ཚོད་འཛིན་མ་ལག་འཛུགས་པ་དང་འཐུས་སྒོ་ཚང་དུ་གཏང་རྒྱུའི་གཏན་འབེབས་བྱས་པ་དང་། ནམ་ཟླའི་འགྱུར་ལྡོག་གི་ལྟ་ཞིབ་ཚད་ལེན་གྱི་ཉེན་ཟོན་ཉེན་བརྡ་དང་ཚོད་དཔག རང་བྱུང་གནོད་འཚེ་བརྟག་དཔྱད་གདེང་འཇོག་དང་ལྟ་ཞིབ་ཚད་ལེན་གྱི་སྔོན་བརྡ། གལ་ཆེའི་ལས་གྲྭའི་སྐྱེ་ཁམས་ཤུགས་རྐྱེན་ལྟ་ཞིབ་ཚད་ལེན། གཞི་རྒྱུའི་ཐོན་ཁུངས་སྲུང་སྐྱོབ་དང་དོ་དམ། ཕྱི་ནས་ཡོང་བའི་བཙན་འཛུལ་དངོས་རིགས་སྔོན་འགོག་ཚོད་འཛིན་སོགས་ཀྱི་ལམ་ལུགས་དང་བྱེད་ཐབས་གཏན་འབེབས་བྱས་འདུག
འགན་ལེན་དང་ལྟ་སྐུལ་ཐད་བཅའ་ཁྲིམས་ནང་ནོར་སྲིད་དང་། དངུལ་རྩ། ཁྲལ་བསྡུ། སྐྱེ་ཁམས་སྲུང་སྐྱོབ་ཁ་གསབ་སོགས་ཀྱི་རྒྱབ་སྐྱོར་སྲིད་ཇུས་ཁ་གསལ་བཟོས་ཡོད། །