རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་ལས་དོན་ཨུ་ཡོན་ལྷན་ཁང་སྲིད་འཛིན་ཁྲིམས་ལུགས་ཁང་གི་ཀྲུའུ་རེན་ཡོན་ཅེ་ཡིས་མཚོ་བོད་མཐོ་སྒང་ནི་འཛམ་གླིང་གི་ཡང་རྩེ་དང་ཨེ་ཤ་ཡའི་ཆུ་མཛོད་ཡིན་པར་མ་ཟད། སའི་གོ་ལའི་མཐའ་སྣེ་གསུམ་པ་དང་། རང་རྒྱལ་གྱི་སྐྱེ་ཁམས་བདེ་འཇགས་སྲུང་ཡོལ་གལ་ཆེན་བཅས་ཡིན་པས་སྐྱེ་ཁམས་སྲུང་སྐྱོབ་ཀྱི་གནས་བབ་དམིགས་བསལ་དང་ཁྲིམས་འཛུགས་ཀྱི་དོན་སྙིང་གལ་ཆེན་ལྡན་ཡོད།
ཡོན་ཅེ་ཡིས་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་བཅའ་ཁྲིམས་བཟོ་རྒྱུ་ནི་རྒྱལ་ཁབ་ཀྱི་སྐྱེ་ཁམས་བདེ་འཇགས་འགན་ལེན་དང་སྐྱེ་ཁམས་ཉེན་ཁ་སྔོན་འགོག་ཚོད་འཛིན་ལ་ཤུགས་སྣོན་བྱ་བའི་ཕྱི་རོལ་ཡུལ་གྱི་བླང་བྱ་དང་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་ཀྱི་དམིགས་བསལ་གནད་དོན་ཐག་གཅོད་དང་། མཚོ་བོད་མཐོ་སྒང་གི་མི་དམངས་མང་ཚོགས་ཀྱི་རེ་སྒུག་གསར་པར་ལན་འདེབས་པའི་དངོས་ཡོད་ཀྱི་དགོས་མཁོ་ཞིག་ཡིན་པས་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་ཐད་རྩ་བ་བརྟན་ཚུགས་དང་། སྔོན་དཔག་བརྟན་པོ། ཕུགས་ལ་ཕན་པ་བཅས་ཀྱི་ནུས་པ་ཐོན་ཐུབ་པས་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་ལ་ཤུགས་སྣོན་རྒྱག་པ་དང་རྒྱལ་ཁབ་ཀྱི་སྐྱེ་ཁམས་ཤེས་དཔལ་མཐོ་ས་བསྐྲུན་པ། དཔལ་འབྱོར་དང་སྤྱི་ཚོགས་རྒྱུན་མཐུད་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ནས་མི་དང་རང་བྱུང་ཁམས་ཞི་མཐུན་མཉམ་གནས་ཡོང་རྒྱུར་དོན་སྙིང་གལ་ཆེན་ལྡན་ཡོད་ཅེས་བཤད་པ་རེད།
མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་བཅའ་ཁྲིམས་ལ་བསྡོམས་པས་ལེའུ་7དང་དོན་ཚན་63ཡོད་པ་རེད། ཡོན་ཅེ་ཡིས་ངོ་སྤྲོད་བྱས་དོན། བཅའ་ཁྲིམས་སུ་སྐྱེ་ཁམས་སྲུང་སྐྱོབ་ཨང་དང་པོར་འཇོག་རྒྱུ་མཐའ་འཁྱོངས་ཀྱིས་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་ཀྱི་འགལ་ཟླ་གཙོ་བོ་དང་དམིགས་བསལ་གནད་དོན། མངོན་གསལ་དོད་པའི་ཁྱད་ཆོས་བཅས་ལ་དམིགས་ཏེ་རི་ཆུ་ནགས་གསུམ་དང་། ཞིང་ས། མཚོ་དང་མཚེའུ། བྱེ་ཐང་དང་འཁྱགས་ཀླུང་བཅས་གཞི་གཅིག་ཅན་སྲུང་སྐྱོབ་དང་མ་ལག་བཅོས་སྐྱོང་བྱ་རྒྱུ་མཐའ་འཁྱོངས་བྱས་ནས་བཅའ་ཁྲིམས་འདིའི་གཏན་འབེབས་ལས་འགལ་བའི་བྱེད་སྤྱོད་ཀྱི་བཅའ་ཁྲིམས་འགན་འཁྲི་སོགས་གཏན་འབེབས་ཁ་གསལ་བྱས་པ་དང་། དོ་དམ་སྒྲིག་སྲོལ་འཐུས་ཚང་དུ་གཏོང་བ། སྐྱེ་ཁམས་བདེ་འཇགས་བཀོད་སྒྲིག་ལ་སྤྱི་འདོམས་བྱེད་པ། སྐྱེ་ཁམས་སྲུང་སྐྱོབ་དང་སླར་གསོ་བྱ་རྒྱུར་ཤུགས་སྣོན་རྒྱག་པ། སྐྱེ་ཁམས་ཉེན་ཁ་སྔོན་འགོག་ཚོད་འཛིན་ལ་ཤུགས་སྣོན་རྒྱག་པ། འགན་ལེན་དང་ལྟ་སྐུལ་འཐུས་ཚང་དུ་གཏོང་བ་བཅས་བྱས་པར་མ་ཟད། བཅའ་ཁྲིམས་འདིའི་གཏན་འབེབས་ལས་འགལ་བའི་བྱེད་སྤྱོད་ཀྱི་བཅའ་ཁྲིམས་ཀྱི་འགན་འཁྲི་སོགས་གཏན་འབེབས་བྱས་པ་རེད། །