ཁམས་བརྒྱད་ཟིལ་བསྐོར་བའི་བསྙེལ་བྱང་། སྟོད།

ཐོག་མའི་ཀུན་སློང་། 

བརྒྱད་ཟིལ་རྫོང་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་ཤར་ལྷོའི་ངོས་སུ་གནས་ཤིང་། དེ་ནི་གནའ་བོའི་བོད་ཀྱི་ཡུལ་གྲུ་ལས་ཉག་ཆུ་སྔོན་མོའི་ཁུགས་སོ་དང་གཤིབ་ནས། དཀར་མཛེས་ཁུལ་གྱི་ཆེས་ས་མཐའི་གནས་སུ་འགྱིང་ཚུལ་དུ་བཞུགས་པའི་ཡུལ་གྲུ་མཛེས་སྡུག་ལྡན་པ་ཞིག་ཡིན་ལ། དེང་དུས་སུ་བོད་རིགས་དང་རྒྱ་རིགས། དབྱིས་རིགས། ཧུའེ་རིགས། མིའོ་རིགས། པའེ་རིགས། ཡའོ་རིགས། ཆའང་རིགས། ཐུའུ་ཅ་རིགས་སོགས་གྲངས་ཉུང་མི་རིགས་བཅུ་གཉིས་ཀྱི་འདུས་སྡོད་རྫོང་ཞིག་ཡིན་པ་དང་། དེ་ལས་བོད་རྒྱ་དབྱིས་གསུམ་གྱི་མི་གྲངས་བརྒྱ་ཆའི་མང་ཤོས་ཟིན་ཡོད། ཆེས་ཐོག་མའི་མིང་གི་འབྱུང་ཁུངས་བོད་ཀྱི་རིག་གནས་དང་འབྲེལ་བ་ཡོད་པར་མ་ཟད། བོད་ཀྱི་དམངས་སྲོལ་རིག་གནས་མི་ཉུང་བ་དང་། སྲིད་པ་བོན་གྱི་ཆོས་ལུགས་བྱེད་སྒོའི་རྗེས་ཤུལ་མི་ཉུང་བ་ད་དུང་ཡང་ལུང་ཁུག་དང་ས་མཐའི་གནས་སུ་ལུས་ཡོད་པ་ཐོས་པའི་མོད་ལ། ཡུལ་དེར་བག་ཕེབས་སོས་དལ་གྱིས་ལྗོངས་རྒྱུ་བྱ་སྙམ་པའི་ས་བོན་སྔར་ནས་བཏབ་ཅིང། དར་མདོ་གྲོང་ཁྱེར་རྡོ་ར་དཀར་མོ་མི་ཉག་རིག་གནས་སྒྱུ་རྩལ་དངོས་མང་བཤམས་སྟོན་གླིང་གིས་མི་ཉག་ཡུལ་གྱི་དམངས་ཁྲོད་རིག་གནས་ལ་རྒྱུས་ལོན་དང་། འཚོལ་བསྡུ། སྔོག་སྤེལ་བཅས་ཀྱི་ལས་གཞི་ལག་ཏུ་བསྟར་བའི་གོ་སྐབས་བཟང་པོའི་རྐྱེན་བྱས་ནས། དབུ་ཁྲིད་རྣམ་པའི་ཐུགས་ཁུར་རྒྱབ་སྐྱོར་དང་གྲོགས་ཏན་བཟང་པོའི་མཐུན་འགྱུར་ལམ་ཁྲིད་བཅས་ཀྱིས། བརྒྱད་ཟིལ་རྫོང་གི་ལུང་ཁུག་སོ་སོར་གནས་པའི་རིགས་མཐུན་རྣམས་ལས་གཙོ་བོ་དམངས་ཁྲོད་རིག་གནས་ལ་རྒྱུས་ལོན་དང་འཚོལ་བསྡུ་བྱེད་པའི་ཞོར། ད་ཡོད་ཀྱི་རིག་དངོས་སྐོར་ཞིག་ལ་ངག་རྒྱུན་གྱི་འགྲེལ་བཤད་བསྐྱོན་ཚུལ་དང་། ས་མིང་ཐོགས་ཚུལ། ལྷག་པར་མི་རིགས་གཞན་གྱི་རིག་གནས་དང་གདོང་ཐུག་བྱུང་བའི་ཁྲོད། སིམ་འདྲེས་དང་གཞན་འགྱུར་སོགས་ཀྱི་སྣང་ཚུལ་ལས། ས་གནས་རང་གི་མི་རྒན་རྣམས་ཀྱི་ངག་རྒྱུན་སོར་བཞག་སྟེང་མཐོང་ཚོར་སྐོར་ཞིག་མི་བརྗེད་བསྙེལ་བྱང་དུ་འགོད་པ་སྤྲོ་བའོ། །

བུ་གཤིའི་དུང་འཁོར་རྙིང་པ། 

དང་པོ། ཐང་མགོ་རུ་ཕྱིན་པ།

སྤྱི་ལོ་2021ལོའི་ཟླ་12པའི་ཚེས་9ཉིན། རྡོ་ར་དཀར་མོ་ཡུལ་སྐོར་རིག་གནས་ཐོན་ལས་གླིང་གི་བཀྲ་ཤིས་ཚེ་རིང་ངེད་གཉིས་རྡོ་ར་དཀར་མོ་ནས་ལམ་ལ་ཆས། ལམ་ཐག་དེ་ཙམ་མི་རིང་མོད། རླངས་འཁོར་མགྱོགས་ཚད་ལེན་པའི་འཕྲུལ་མིག་གང་སར་ཡོད་པས། བསམ་པ་ནང་བཞིན་མགྱོགས་ཐུབ་མ་བྱུང་། རྡོ་ར་ཡུལ་ཚོ་ནས་འགུ་ཞི། ལྕམ་པ། མཁར་འོད། སྨད་པ་གྲོང་། ཝ་ཁྲལ་མཆོད་རྟེན། འགག་པ། སྐྱ་གད་བཅས་བརྒྱུད་ནས་ཕུང་པོ་གཤིས་ཀྱི་རྡོ་ར་གཤིས་སུ་སླེབས་དུས། བླ་མ་སྐལ་བཟང་དགྲ་འདུལ་གྱིས་བསྒུག་འདུག་པ་དང་མཇལ། དེ་ནས་ཁོང་དང་ལྷན་དུ་ས་བདེ་གྲོང་དུ་སླེབས། ལམ་བར་ནས་བླ་མ་སྐལ་བཟང་དགྲ་འདུལ་ངེད་གཉིས་ཀྱིས་ཁ་བརྡ་མང་པོ་བྱས། བླ་མ་ཁོང་འགེ་བ་ཁ་དགོན་པའི་དགོན་དཔོན་གྱི་ལས་སྣེ་ཁུར་ནས་མི་ལོ་ཉི་ཤུ་འགོར་འདུག །ཁུལ་ནང་བསྟན་འཐུན་ཚོགས་ཀྱི་རྒྱུན་ལས་ཚོགས་མི་དང་། དྲུང་ཡིག་གཞོན་པ། གྲོང་ཁྱེར་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་བཅས་རེད། སྐུ་གཟུགས་ཆེན་པོ། སྐད་གསེང་མོ། འདྲིས་བདེ་མོ། ནམ་རྒྱུན་དཔང་བཅད་བྱས་ནས་ཡོད་པ་ཞིག་ཡིན། ཕ་ཡུལ་མི་ཉག་ངོར་པ་རོང་ནས་རེད། ཕ་ཡུལ་དུ་མི་ཉག་སྐད་ཁོ་ན་སྤྱོད་ཀྱི་འདུག་མོད། ཁོང་ཉིད་བོད་སྤྱི་སྐད་ལ་ཆགས་ཐོགས་མེད། ངེད་ཚོས་ཉིན་གུང་ཟས་སྐལ་རྒྱག་ཚད་ཟོས་རྗེས་མུ་མཐུད་དུ་ལམ་ལ་ཆས་པ་ཡིན།

ས་བདེ་ནས་ཅུང་མ་འགོར་བར་ལག་འ་གྲོང་དུ་ཐོན། ལག་འ་གྲོང་ནས་ཀུན་དགའ་རྒྱལ་མཚན་འབོད་པའི་རྒད་པོ་ལོ་72ལོན་པ་ཞིག་དང་ཐུག །ཁོང་གིས་བཤད་ན། ལག་འ་ཞེས་པ་མི་ཉག་སྐད་དེ། སྔོན་ཆད་ཆུ་བོའི་སྟེང་འགྲོ་སར་འགྲང་བའམ་ཐག་པ་འཐེན་ནས་ཡོད་པ་དེར་ཟེར། རིམ་གྱིས་ལུང་པ་དེའི་མིང་དང་ད་ལྟ་ཡུལ་ཚོའི་མིང་དུ་གྱུར་ཡོད་ཟེར། གཞུང་ལམ་མར་ཞབས་ཀྱི་དུད་ཚང་ཞིག་གི་ཤར་གྱི་སྒོ་ཆུང་བརྒྱུད་རྗེས་ཆུ་རྩ་ཕྱོགས་ན་ཞབས་རྗེས་ཤིག་འདུག །དེ་བ་ཚང་གིས་ཞིང་ར་མཐོན་པོ་བརྩིགས་པས་འགྲོ་ས་ཁག་པོ་འདུག་མོད། རྒད་པོ་ལ་དཀའ་ངལ་ཙམ་མེད་པར་མར་བབས་ནས་སོང་། ངས་ཁ་ཕོ་རིས་ལ་བསམ་ནས་རྒད་པོའི་རྗེས་སུ་བབས་པ་ན། ལྷམ་མི་བདེ་བ་དང་འབབ་ལོབས་མེད་པས་དཀའ་ངལ་ཕྲན་ཙམ་བྱུང་། ཡིན་ནའང་བླ་མ་དགྲ་འདུལ་གྱིས་ཞིང་ཁ་ནས་ཡར་བཟུང་པ་དང་། རྒད་པོས་འོག་ནས་ཡར་བསྐྱོར་བས་བདེ་བླག་ངང་འབབ་ཐུབ་བྱུང་། ཞབས་རྗེས་དེ་ཧ་ཅང་ཡ་མཚན་ཅན་འདུག རྒད་པོས་བཤད་ན་སྔོན་ཆད་ཞབས་རྗེས་དེ་ཕ་བླ་མ་རྒྱལ་པོ་ཞུ་བས་བཞག །ཕ་བླ་མས་སྲིན་མོ་འདུལ་ཕྱིར་ཆུ་འདི་དེད་ནས་འགྲོ་སྐབས་ཞབས་རྗེས་འདི་བཞག་པ་རེད། དེ་ལྟར་ཆུ་འདིའི་རྒྱུན་དེད་ནས་ཕོ་བྲང་ལྔ་བརྩེགས་ལ་སླེབས་དུས། ཕ་བླ་མས་སྲིན་མོ་བཏུལ་བ་རེད་ཟེར་སྲོལ་ཡོད། དེང་སང་ཅམ་མི་ཚང་གི་བླ་མའི་ཞབས་རྗེས་རེད་ཟེར་མཁན་ཡང་འདུག་ཟེར། ཅམ་མི་ཚང་གཞུང་ལམ་གྱི་ཡར་སྟེང་དུ་འདུག །ཁང་པ་གསར་པ་ལས་འདུག །མཁས་པ་ལ་ལས་ཅམ་མི་ཞེས་པ་ཙ་མི་རེད། དེ་ཚང་གི་ཅམ་མི་བླ་མ་ཞེས་པ་ཙ་མི་ལོ་ཙཱ་བ་སངས་རྒྱས་གྲགས་ལ་གོ་བ་རེད་ཅེས་འགྲེལ་མཁན་དང་འབྲི་མཁན་ཡོད་འདུག །བླ་མ་དགྲ་འདུལ་གྱིས་བཤད་ན། ཕ་བླ་མ་ཞེས་པ་ལྷ་ལུང་དཔལ་གྱི་རྡོ་རྗེ་རེད། ཕ་བླ་མ་མ་རེད། ཕམ་བླ་མ་རེད། སྐབས་དེར་ཁོང་གིས་རང་ཉིད་ལ་ཕམ་པ་བྱུང་ཡོད་ཅེས་ཡོངས་ལ་སྨྲས་པས་ཕམ་པ་བྱུང་བའི་བླ་མ་ཡིན་པས། ཕམ་བླ་མ་ཞེས་ཐོགས་པ་རེད་ཟེར། གང་ལྟར་ཕ་བླ་མ་ཞེས་པའི་ངག་སྒྲུང་ལུང་པ་དེའི་མགོ་མཇུག་བར་གསུམ་ན་མང་པོ་ཡོད་པར་སྣང་ངོ་། །

རྒད་པོས་ཁང་པའི་སྐོར་བཤད་རྒྱུར། སྔོན་ཆད་ཁོ་རང་རྩིག་བཟོ་ཡིན། ད་རྩིག་པ་མ་བརྩིགས་ནས་ལོ་བཅུ་ལྷག་ཡིན། རྒན་པ་ཚོས་བཤད་ན་ཁང་པའི་སྐར་ཁུང་མི་ཞིག་གི་མིག་རྡོ་དང་འདྲ། བ་སོ་བ་སྒམ་དེའི་སྟེང་གི་རྫི་མ་དང་འདྲ། དུང་ཕྲེང་ནི་དེའི་སྟེང་གི་སྨིན་མ་དང་འདྲ། ཁང་པའི་རྩིག་ཁའི་དུང་ཕྲེང་སོགས་མགོའི་ཅ་ལ་དང་འདྲ་བས་མདོར་ན་ཁང་པའི་ངོས་ལ་མི་ཞིག་གི་ངོ་གདོང་ཚང་ཞེས་བཤད་སྲོལ་ཡོད་ཟེར།

དེ་ནས་ང་ཚོ་མུ་མཐུད་དུ་གཞུང་ལམ་དེད་ནས་བརྒྱད་ཟིལ་རྫོང་དུ་སླེབས། སྐྱིད་ཁྲོ་ལ་བརྒལ་ནས་པོ་རྫོས་སམ་བོན་རྫོང་གྲོང་དུ་འབྱོར། ད་སྐབས་ཐང་མགོ（汤古）ཞེས་འབོད། བསོད་ནམས་ཚེ་རིང་ཞེས་པའི་རྒད་པོ་ལོ་74ལ་ལོན་པ་ཞིག་དང་ཐུག །ལུང་པ་འདི་ལ་སྐྱིད་ཁྲོ་ལུང་ཟེར། སྐྱིད་ཅེས་པ་ཆུའི་དོན་དང་།

ཁྲོ་ཞེས་པ་དཀར་པོའི་དོན་ཡིན། བརྒྱད་ཟིལ་ལ་རྒྱ་སྐད་དུ་ཅིའུ་ལུང་（九龙）ཞེས་འབོད་ཅིང་མི་ཉག་སྐད་དུ་འགུ་ར་ཟེར། འགུ་ར་ཞེས་པ་ལུང་པ་དགུའི་དོན་རེད། ལུང་པ་དགུ་ནི་གསང་སྔགས་རོང་དང་སྦ་བོ་རོང་། ཇ་ཐོན་རོང་། མུ་པ་རོང་། ཧོར་པ་རོང་།

ཤར་ཁ་རོང་། འཇའ་ཁུག་རོང་། ཐང་འགོ་རོང་། སེ་ཧུ་རོང་བཅས་ཡིན་ཟེར། འདིའི་སྐོར་བརྒྱད་ཟིལ་རྫོང་ནང་བསྟན་མཐུན་ཚོགས་ཀྱི་ཚོགས་གཙོའི་གསུང་པ་འོག་ནས་འགོད། གཉེན་སྟོན་ལ་གཉེན་ལམ་ཞེས་འབོད་ཅིང་། དེའི་སྐོར་ངོ་སྤྲོད་མདོར་བསྡུས་བྱས། གནའ་བྲོའི་ཚིག་བཞི་དང་གཞས་གསུམ་གྱི་ཚིག་དང་དབྱངས་རྟ་ངག་ཏུ་བླངས། དེ་དག་མི་ཉག་སྤྱིའི་འགྲོ་སྟངས་དང་འདྲ་མོ་འདུག །ཁོ་ཚང་གི་ཁྱིམ་མཚེས་བསོད་ནམས་དོན་གྲུབ་ཅེས་པ་ནས་འབག་རྒོ་ཞིག་མཐོང་། ཁོ་ཚོས་བཤད་ན་འདིའི“འབག་རྒོ”དང་ལ་ཕར་རྒྱབ་ཁྲོ་འཛི་སོགས་ཀྱི“འབག་རྒོ”ལ་ཁྱད་པར་ཡོད། ཁྲོ་འཛི་སོགས་ཀྱི“འབག་རྒོའི”ཟུར་གཉིས་ལ་ཆགས་བརྒྱད་ཙམ་བཞག་ཡོད། འདི་གར་ཆགས་གཅིག་ཀྱང་མེད་ཟེར།

དེ་ནས་མོ་ཏ་གྲོང་དུ་སོང་། བཀྲ་ཤིས་དོན་གྲུབ་ཟེར་བའི་རྒད་པོ་ལོ་70ལོན་པ་ཞིག་དང་ཐུག །ཁོས་བཤད་ན“མོ་ཏ”ཞེས་པ་མི་ཉག་སྐད་དེ་བྲག་ཐོག་ཅེས་པའི་དོན་རེད། མི་ཉག་གི་ཁྱབ་ཁོངས་ལ་ཤར་བཞག་བྲ་མན་དང་སྟོང་སུ་རའི་ཡན་ལ་མི་ཉག་ཡིན་ཟེར་སྲོལ་ཡོད། སྟོང་སུ་ར་ཞེས་པ་མུ་ལིའི་（木里）ཕྱོགས་ཤིག་ཡིན་པ་འདྲ། མི་ཉག་སྐད་དག་མ་དེ་ང་ཚོས་བཤད་ཀྱི་ཡོད། ལ་ཕར་རྒྱབ་ཁྲོ་འཛི་སོགས་ཀྱིས་སྐད་ལ་བོད་ཀྱི་སྤྱི་སྐད་འདྲེས་ཡོད། དཔེར་ན་སྟར་ཀ་(ཁམ་བུ)ལ་སྟར་ཀ་ཟེར། ང་ཚོས“ཁ་ར”ཟེར་བ་ལས་སྟར་ཀ་མི་ཟེར། སྟར་ཀ་ཞེས་པ་བོད་སྤྱི་སྐད་རེད་ཟེར། འགུ་ར་ཞེས་པའི་ལུང་དགུ་ནི་བརྒྱད་ཟིལ་རོང་དང་། སེ་བོ་རོང་། པུ་ཚ་རོང་། འཇིག་རྟེན་རོང་། སྦ་བོ་རོང་། ས་ང་རོང་། མ་ཏེ་རོང་(མུ་ལིའི་ཁོངས་གཏོགས) ཇ་ཐོན་རོང་། ཤར་ཁ་རོང་བཅས་ལ་ཟེར། གྱོན་ཆས་ཀྱི་སྐོར་ལ་ཁྲོ་འཛི་བ་ཚོ་ལ་འགག་གོ་ཟེར་བ་དཀའ་ལས་རྒྱག་དུས་གྱོན་རྒྱུ་ཡོད། འདི་ན་དཔེ་ལྕ་ཟེར་བ་ཞིག་ཡོད་དེ། ལས་ཀའི་སྐབས་གྱོན་རྒྱུ་ཡིན་ཟེར་ནས་ང་ཚོར་བསྟན་བྱུང་། དེར་གསར་རྙིང་གཉིས་འདུག །རྙིང་པ་དེ་ཁོ་རང་གི་དཀའ་ལས་མང་པོ་བརྒྱབ་ནས་བཟོས་པ་ཡིན་ཏེ། བུ་རྒྱུད་ཚོས་གཡུག་གྲབས་འདུག་མོད། གཡུག་ཏུ་མ་བཅུག་པར་ཉར་ཚགས་བྱས་པ་ཡིན། དེ་བཞིན་རྩམ་སྣོད་སོགས་སྔོན་ཆད་ཀྱི་ཅ་ལག་མང་པོ་མེད་པར་བཟོས་ཚར། དེང་སྐབས་འགྱིག་དང་ལྕགས་ཀྱི་རིགས་ཁོ་ན་སྤྱོད་ཀྱི་ཡོད་ཅེས་སྐྱོ་ཉམས་བཅས་བཤད་བྱུང་། གནའ་བྲོའི་གླུ་ཚིག་བཞི་མཁོ་འདོན་བྱས། མུན་རུབ་ལ་ཁད་འདུག །དེ་ཚང་ལ་གྲོང་པ་དེའི་སྒྲོལ་མ་དགོང་འདོན་བྱེད་མཁན་མང་ཙམ་ཐོན་བྱུང་། དེ་ཚང་གིས་ཀྱང་དགོང་ཟས་ཐུག་པ་བསྐོལ་བཞིན་འདུག །ང་ཚོས་བཀའ་དྲིན་ཞུས་ནས་བརྒྱད་ཟིལ་རྫོང་དུ་ཕྱིན་པ་ཡིན།

སྐབས་དེར་ང་ཚོ་ལ་ལམ་ཁྲིད་པ་གཞན་ཞིག་ཡོད། མིང་ལ་བློ་བཟང་ཟླ་བ་ཟེར་ཞིང། བརྒྱད་ཟིལ་དགོན་པའི་དགོན་དཔོན་རེད། ཁོང་གི་རྗེས་དེད་ནས་གྲོང་དུ་འབྱོར། ཁང་བརྩེགས་ལྔ་པར་བོད་ཟས་ཁང་ཞིག་ཏུ་སླེབས། དེ་ན་བརྒྱད་ཟིལ་རྫོང་ནང་བསྟན་མཐུན་ཚོགས་ཀྱི་ཚོགས་གཙོ་ཆུ་བོ་ཚེ་རིང་དང་། ཚོགས་མི་གཞན་གསུམ་བཅས་ཀྱིས་བསྒུག་འདུག །ང་ཚོས་ཟ་མ་ཟ་བཞིན་ཁ་བརྡ་བྱས། ཚོགས་གཙོ་ལགས་ནི་བརྒྱད་ཟིལ་རྫོང་གི་འགུ་ར་ལུང་ནས་རེད་འདུག །ཨ་ར་དགོན་པའི་སྤྲུལ་སྐུ་ཡིན། འགུ་ར་སྐད་སྨྲ་བ་ལས་མི་ཉག་སྐད་མི་ཤེས། ཚོགས་གཙོས་གསུང་ན་རྫོང་འདིའི་བོད་རིགས་ལ་སྐད་སྣ་ལྔ་སྤྱོད་མཁན་འདུག་སྟེ། བོད་སྤྱི་སྐད་དང་མི་ཉག་སྐད། འཕེན་མིའི་སྐད（དེ་མུ་ལིའི་སྐད་དང་ཐག་ཉེ） ན་མོ་ཡུག་སྐད（ན་མོ་ཡུག་ལ་རྒྱ་སྐད་ཀྱིས་ཤིས་ཧྥན（西番）ཟེར་ཞིང་། ཤིས་ཟེར་བ་ནུབ་དང་ཧྥན་ལ་འདོན་སྟངས་མང་ཙམ་ལས་དོན་དུ་བོད་ཅེས་པའི་དོན་རེད། ཆོས་ལུགས་གདོད་མའི་བོན་ཆོས་ཡིན། ཁོ་ཚོས་ཟེར་སྲོལ་ལ་ཨོ་རྒྱན་པདྨ་འབྱུང་གནས་བོད་དུ་ཕེབས་ནས་བསམ་ཡས་བཞེངས་སྐབས་རྒྱལ་པོས་ཆོས་ཁྲིམས་བཞག་པ་ཁུར་མ་འདོད་པས་ས་འདིར་ཡོང་བ་རེད་ཟེར） དེ་མིན་འགུ་ར་སྐད། འགུ་ར་དེ་བརྒྱད་ཟིལ་གྱི་གཉུག་མར་གནས་པའི་བོད་པ་ཡིན། སྐད་རིགས་ལྔའི་ནང་གི་སྤྱོད་མཁན་མང་ཤོས་དེ་ཡིན་ཟེར། སྔོན་ཆད་འདི་དག་ལྕགས་ལ་རྒྱལ་པོའི་ཁོངས་གཏོགས་ཡིན། ཁོ་ཚོའི་ངག་རྒྱུན་ལ་མི་ཉག་མུ་ལི་མན་ལས（冕宁）གསུམ། ས་ཨ་དམ་ཡང་དམ་རྒྱས་དམ་གསུམ་ཞེས་པའི་བཤད་སྲོལ་ཡོད་ཟེར།

གཉིས་པ། ཇ་ཐོན་རོང་དུ་ཕྱིན་པ།

མུ་ཏིག་ལྷ་ཁང་ནང་གི་ལྡེབས་རིས། 

བརྒྱད་ཟིལ་རྫོང་ནང་བསྟན་མཐུན་ཚོགས་ཀྱི་ཡེ་ཤེས་ངག་དབང་དང་། བརྒྱད་ཟིལ་དགོན་པའི་དགོན་བདག་ཟླ་བ། ཨ་ར་དགོན་པའི་དགོན་བདག་རིན་ཆེན། ངེད་གསུམ་བཅས་ཁྱོན་མི་དྲུག །རླངས་འཁོར་གཉིས་ལ་བསྡད་ནས་བརྒྱད་ཟིལ་རྫོང་གི་ལྷོ་ཕྱོགས་སྤྱི་ལེ་དགུ་བཅུ་ཙམ་སོང་བ་ན་ཉག་ཆུའི་འགྲམ་དུ་སླེབས། དེའི་ཕར་ངོགས་ལིའང་ཧྲན（凉山）མུ་ལིའི（木里）ས་ཡིན་པ་དང་། ཚུར་ངོགས་ཇ་ཐོན་རོང་རེད། ད་སྐབས་ཁེ་འཐོན（魁多）འབོད། ཇ་ཐོན་རོང་ནི་ཇ་ཤིང་དང་གཡེར་མ། ཚ་ལུ་མ། ཨ་རུ་ར་སོགས་ཤིང་ཏོག་སྣ་ཚོགས་སྐྱེ་ས་དང་། དགུན་ཁ་ཡིན་ཡང་དྲོ་བས། ནམ་ཟླ་ཧ་ཅང་སྐྱིད་པོ་ཞིག་འདུག །ཁོ་ཚོས་ངོ་སྤྲོད་བྱས་པ་ལྟར་ན། རང་རྒྱལ་ནང་ཁུལ་གྱི་མཚོ་བབ་ཆེས་མཐོ་བའི་ཇ་ཤིང་རྨོ་བའི་ཡུལ་ཁམས་ཡིན་ལ། སྔོན་ཆད་བརྒྱད་ཟིལ་ཡོངས་རྫོགས་ནས་དེ་གའི་ཇ་འདྲེན་པར་མ་ཟད། མི་ཉག་སྐྱ་གད་ཕྱོགས་ནས་ཀྱང་དེ་གའི་ཇ་ལེན། ཇ་དེ་ལ་རོང་ཇ་ཞེས་འབོད། མི་ཉག་ཡུལ་གྱི་ཇའི་ཐོན་ཁུངས་གཙོ་བོ་ཞིག་རེད། མི་རྣམས་ཀྱིས་འཕེན་མིའི（普米）སྐད་བཤད་བཞིན་ཡོད། ཡུལ་དེ་ལ་འཕེན་མིའི་སྐད་དུ“རྗེ་འཐོན”ཟེར། “རྗེ”ཟེར་བ་ཇའི་དོན་དང“འཐོན”ཟེར་བ་ཐོན་པའི་གནས་ཀྱི་དོན་ཡིན་པས། དོན་དུ་ཇ་ཐོན་ཟེར་བ་འདྲ། འཕེན་མིའི་སྐད་དང་མི་ཉག་སྐད་འདྲ་ས་མང་པོ་འདུག་སྟེ། ཆུ་ཁོལ་འཐུང་ལ། ཅུ་ཙ་གྲང་མོ་ལ་ཅུ་ཛ་ཟེར་བ་སོགས་སོ། །སྐབས་ལར་མི་ཉག་སྐད་ལ་ལས་ཀྱང་འཕེན་མིའི་སྐད་འདི་བོད་སྤྱི་སྐད་ལ་ཐག་ཉེ་པོ་འདུག་སྟེ། འཕེན་མིའི་ཟ་མ་ལ་རྫན་དང་། མི་ཉག་སྐད་དུ་འཛུ་ཞེས་འབོད། བོད་སྤྱི་སྐད་ལ་ཟ་མ་ལ་གཟན་ཞེས་འབོད་པས་འཕེན་མིའི་སྐད་འདི་བོད་སྐད་ལས་ཟུར་ཆག་པའམ་ཡང་ན་གནའ་བོའི་བརྡ་རྙིང་ལས་གྱེས་པ་རེད་སྙམ། སྐད་བརྡ་རིག་པའི་ཞིབ་འཇུག་པ་ལ་དཔྱད་གཞི་གལ་ཆེན་མང་པོ་ཡོད་པ་འདྲ།

རྩོམ་པ་པོ་དང་མུ་ཏིག་ལྷ་ཁང་གི་གཉེར་པ་དང་ལྷན་དུ། 

འཕེན་མི་ལ་བརྒྱ་འདུས་ལས། འཕེན་མི་ཞེས་པའི་ཐ་སྙད་དེ་འཕེན་མིའི་སྐད་ཡིན་ལ། དོན་དུ“མི་དཀར”ཞེས་པའི་དོན་ཡིན། ས་གནས་མི་འདྲ་བའི་འཕེན་མི་སོ་སོ་ལ་རང་སོ་སོར་མིང་འདོགས་མི་འདྲ་བ་ཡོད། དཔེར་ན་ལན་ཕིང་（兰坪）དང་། ལི་ཅང་།

（丽江）ཡུང་ཧྲེང་（永胜）བཅས་ཀྱི་འཕེན་མིས་ཕུའུ་དབྱིན་སྨི་ཞེས་འབོད་པ་དང་། ཉིང་ལང་（宁蒗）གི་འཕེན་མིས་རང་ལ་ཕུ་རི་སྨིའམ་འཕེན་མི་ཞེས་འབོད། མི་ཞེས་པ་འཕེན་མིའི་སྐད་དུ་མི་ཞེས་པའི་དོན་དང་། འཕེན་དང་ཕུའུ་དབྱིན། ཕུའུ་རི་སོགས་དོན་གཅིག་སྟེ། དཀར་པོ་ཞེས་པའི་དོན་ཡིན། དེའི་ཕྱིར་འཕེན་མི་ཞེས་པ་མི་དཀར་ཞེས་པའི་དོན་རེད། ཁོ་ཚོས་རང་ཉིད་མི་རྒྱུད་དཀར་པོ་ཡིན་ཞེས་པ་ནི་ཁོ་ཚོའི་གནའ་སྲོལ་དུ་དཀར་པོར་བརྩི་མཐོང་བྱེད་པ་དང་དཀར་པོ་བཀྲ་ཤིས་པའི་རྟགས་སུ་ངོས་འཛིན་པའི་དམངས་སྲོལ་དང་འབྲེལ་བ་ཡོད་ཅེས་འཁོད་ཡོད།

ཇ་ཐོན་རོང་གི་སྡེ་དཔོན་དྲུང་ཡིག་བསོད་ནམས་རིག་འཛིན་གྱིས་བཤད་ན། ཁོ་ཚོ་བོད་མི་ཡིན་ཡང་འཕེན་མིའི་སྐད་སྨྲ་བ་རེད། དེ་བས་འཕེན་མིའི་རིགས་ཞེས་འབོད་ཟེར། ང་ཚོ་ཁོང་ཚང་གི་ཁང་པ་རྙིང་པ་ཞིག་ཏུ་ཁྲིད། ཁང་པ་དེར་ལོ་ངོ་ཉིས་བརྒྱའི་ལོ་རྒྱུས་ལྡན་ཟེར། ཁང་པའི་ནང་དུ་འཛུལ་བ་ན་འགྲུལ་པ་སྣེ་ལེན་བྱེད་ས་དང་འདྲ་བའི་ཤག་ཅིག་འདུག །ཤག་དེའི་རྩིག་ངོས་སུ་བཀྲ་ཤིས་རྟགས་བརྒྱད་ཀྱི་རི་མོ་ཤིང་ལ་བརྐོས་པ་ཞིག་དཔྱངས་འདུག །དེ་ནས་གཡོན་དུ་འཁོར་བ་ན་ཇ་ཁང་རེད། ཇ་ཁང་ནང་སྒྱེད་པུ་རྡོ་གསུམ་ལ། སྒྱེད་རྡོ་རྣམས་ཟོར་དབྱིབས་སུ་བཞོག་པ་དང་། ཐབ་ཀའི་སྟེང་དུ་ཤིང་གི་ར་བཞི་ཞིག་གནམ་ལ་བཏགས་ནས་འབུད་ཤིང་འཇོག་ས་བྱས་འདུག །ས་བདེའི་ཕྱོགས་ཀྱི་མི་ཉག་ནའང་སྲོལ་དེ་ཡོད་ཟེར། དེ་ནས་ཁང་ཐོག་སོང་བ་ན་མཆོད་ཁང་རེད། ནང་ལ་རྔ་རྙིང་པ་ཞིག་དང་།

ཁང་པའི་སྒོ་སྟེང་དུ་རིགས་གསུམ་མགོན་པོའི་བསྙེན་པ་དང་ཁྱུང་གི་རི་མོ་བརྐོས་འདུག

ཁོ་ཚོའི་གྲོང་པར་དགོན་པ་ཞིག་འདུག །མིང་ལ་“ཐོག་གླིང་དགོན་པ་“དང་གྲུབ་མཐའ་དགེ་ལུགས། བརྒྱད་ཟིལ་དགོན་པའི་བུ་དགོན་ལྟ་བུ་ཞིག་རེད། དེ་ན་བླ་མ་ཞིག་འདུག །མིང་ལ་ངག་དབང་ཟེར། ལོ་87རེད། ཆུང་དུས་འབྲས་སྤུངས་ལ་གྲྭ་སར་ཕེབས། མི་ཉག་ཁང་ཚན་ནས་ལོ་མང་པོར་བཞུགས། མཚན་ཉིད་ལོ་གསུམ་དང་རྒྱུད་པར་ལོ་བདུན་བཞུགས། དུས་འགྱུར་སྐབས་རང་ཡུལ་དུ་སླེབས། སྐྱ་སར་བབས། དེང་སྐབས་བུ་རྒྱུད་དྲུག་ཡོད། ཁོ་ཚོ་སྡེ་པས་ཁོ་ལ་བླ་མར་འབོད། ཁོང་གིས་སྔོན་ཆད་ཇ་ཐོན་རོང་འདིའི་ཡུལ་ཀུན་བོད་པ་མ་གཏོགས་མེད། འདི་ཚང་མ་སྟོད་ཀྱི་རྒྱལ་པོའི་མངའ་ཁོངས་ཡིན། ཤོད་སྲོལ་ལ་སྔོན་ཆད་དུད་ཚང་བརྒྱ་དང་ལྔ་བཅུ་ཡོད་པ་ལས། རྒྱལ་པོའི་བཀའ་ལ་མི་ཉན་པ་རྣམས་རེ་རེ་ནས་ས་མཐར་བསྐྱུངས་པས། ས་སྟོང་ལྟ་བུར་ལུས་པ་ལ་འཕེན་མི་སོགས་མི་རིགས་གཞན་པ་མང་པོ་ས་འདིར་ཐོན་ཟེར། སྔོན་ལོ་སར་སྐབས་སུ་ཁོ་ཚོ་ལུང་པའི་སྐྱེས་པ་རྣམས་ཀྱིས་རྟ་ཞོན་ནས་རི་བསང་འགྲོ་བ་སོགས་བོད་པ་དག་མའི་སྲོལ་རྒྱུན་ཡོད་རེད་ཟེར། ཡིན་ནའང་ད་སྐབས་ཕལ་ཆེར་ནུབ་ཟིན་ཏོ། །

བསང་ཡིག་རྙིང་པ་ཞིག་ང་ཚོར་བསྟན་པ་ལ། དབུ་སྡེབ་ཏུ《དྲག་རྩལ་ཆེན་པོ་ལོག་ཁོ་སྐྱོག་བསང་》ཞེས་བྲིས་ཡོད་པ་དང། ནང་དུ་ལོག་ཁོ་སྐྱོག་ཅེས་པ་རྟ་དཀར་སྔོན་དམར་ལ་ཆིབས་མཁན། དར་དཀར་པོའི་ན་བཟའ་གསོལ་མཁན། གཡས་ན་གསེར་གྱི་བྱིན་ཆུ་དང་གཡོན་ན་བ་དན་དཀར་པོ་ཕྱར་མཁན་གྱི་གཞི་བདག་ཅིག་ལ་བསང་མཆོད་ཕུལ་ཡོད་པ་དང་། དེའི་ནང་ན་ནུབ་ལ་གསེར་གྱི་བྱ་རོག་ཀྱོག་ཅེས་པ་འདུག །གཞན་བསང་ཡིག《ཁ་དྲག་བུ་བཞིན་རྩེ་བསང་མཆོད》ཅེས་པ་ཞིག་བསྟན། ནང་དུ་ལྕགས་མཁར་སྔོན་པོ་དགུ་བརྩེགས་ཀྱི་ནང་དུ་ཁ་དྲག་མཐུ་ཆེན་ཟོ་དོར་རམ་མཐུ་ཆེན་ཁ་དྲག་བུ་བཞིན་བཙན་སྐུ་མདོག་དཀར་པོ་དར་གྱི་ཟ་འོག་ཅན། དབུ་ལ་ནོར་བུ་ཁྲ་བཅས། གཡས་ལ་རལ་གྲི་དང་གཡོན་པར་བ་དན་རྩེ་བརྒྱད། མདའ་གཞུ་འཁོར་གསུམ་རྐེད་ལ་དྲངས་པ། ཞབས་ལ་སོག་ལྷམ་མནབས་པ། དམག་ལ་ཆས་ཚེ་སེང་གེ་ཞོན་པ་ཞིག་ལ་བསང་མཆོད་ཕུལ་ཡོད། དེའི་ཕྱོགས་བཞི་ན་དཀར་སེར་དམར་སྔོན་བཞིའི་མདོག་ཅན་གྱི་དམག་དཔོན་བཞི། ཚང་མ་རྟ་ལ་ཞོན་མཁན་ཡིན། གཞན་ཡང་བསང་ཡིག《འཇང་རིགས་བསང་མཆོད》ཅེས་པ་ཞིག་བསྟན། ནང་དུ་འཇང་བདེ་མཚམས་སུ་འཇང་རི་སྨུག་པོའམ་ཉག་ཆུ་སྔོན་མོའི་མདུན་ཕྱོགས་ཀྱི་ཁ་དྲག་འཇང་རི་སྨུག་པོ་ཞེས་པ་དབུ་ལ་གཡུ་ཞྭ་སྔོན་པོ་གསོལ་བ། སྐུ་ལ་འཇང་ཕྱྭང་གྱོན་པ། རྟ་ནག་པོར་ཆིབས་པ། ཕྱག་ན་རྦ་སྙུག་མདའ་གཞུ་མནམས་པ་ཞིག་ལ་བསང་མཆོད་ཕུལ་བ་དང་། བསང་ཡིག་གཞན་ཞིག་ན་འཛམ་གླིང་གི་གཞི་བདག་སྤྱི་དང་བུ་བཞི་བཙན། འཇང་རི་ཡབ་ཡུམ། གཞི་བདག་ས་ར་བུ། རྒྱལ་ཆེན་བློ་ལེན་འཇང་（བསང་ཡིག་གཞན་ཞིག་ཏུ་བློ་གླིང་འཇམ）ཁ་དྲག་བྱ་སྨོན་རི་སོགས་ལ་བསང་མཆོད་ཕུལ་འདུག

དེ་ནས་ང་ཚོ་ཕྱིར་བརྒྱད་ཟིལ་རྫོང་ཕྱོགས་སུ་ཕྱིན། ཨ་ར་དགོན་པའི་འདབས་སུ་འབྱོར། དེ་གར་བསོད་ནམས་བློ་གྲོས་ཞེས་པའི་ཨ་མཆོད་ཅིག་འདུག ལོ་89རེད། གྲྭ་པ་བྱས་མྱོང་མེད། གཞན་ལ་ཨ་མཆོད་དང་མདོས་གླུད་འཕེན་སར་འགྲོ། དེ་འདྲ་བ་སྔོན་ཆད་ལུང་ཁོག་འདིར་གྲོང་ཚོ་རེ་ལ་རྡོག་རེ་ཙམ་ཡོད་ཟེར། ད་ལྟ་ཁོང་འདོན་སར་འགྲོ་མི་ཐུབ། ཁོང་གིས་གྲྭ་པ་སློབ་མ་གཅིག་ཡོད། ཁོས་ང་ཚོར་འདོན་རྒྱུའི་དཔེ་ཆ་བསྟན། ནང་དུ་ཆུ་ཀླུད་མཇལ་བ་དང་། གཏོར་དཔེ་ཤོག་ལྡེབ་གཉིས། བསང་མཆོད་རིན་ཆེན་ཕྲེང་བ། བདུད་དཀར་བཙན་མཆོད། བཙན་མཆོད། རྡོ་རྗེ་བློ་གྲོས་ཀྱི་བསང་། སྒྲོལ་མའི་བསང་སོགས་བཞུགས་འདུག

ཐང་མགོ་ལྷ་ཁང་གི་ལྡེབས་རིས། 

གསུམ་པ། གསང་སྔགས་རོང་དུ་ཕྱིན་པ།

ཞོགས་ཇ་འཐུང་ཚར་རྗེས་མགྲོན་ཁང་ལས་ཕྱིར་བུད་པ་ན། ཨ་ར་དགོན་པའི་དགོན་བདག་རིན་ཆེན་དང་། མུ་ཏིག་ལྷ་ཁང་གི་མཁས་གྲུབ། ངེད་གསུམ་བཅས་ཁྱོན་མི་ལྔ་གསང་སྔགས་རོང་ལ་གཏད་ནས་བརྒྱད་ཟིལ་རྫོང་གི་ནུབ་ཕྱོགས་ལུང་པར་སོང་། གསང་སྔགས་རོང་ལ་དེང་སྐབས་བསམ་ཡན་ལུང་（三岩龙）འབོད། ལམ་དེ་ཙམ་བདེ་མོ་མིན་རུང་། མཁས་གྲུབ་ཀྱིས་གསང་སྔགས་རོང་གི་བོན་པོའི་རིག་གནས་དང་འཕེན་མིའི་རིག་གནས་རྣམས་ཁ་བརྡ་བཤད་པས། ལམ་ཐག་དེ་ཙམ་རིང་སྣང་མ་ཤར། ལ་ཞིག་བརྒལ་རྗེས་མཚོ་ཞིག་འདུག །དེ་ལ་འཇའ་གླུ་མཚོ་ཟེར། དེ་ནས་མར་བབས་རྗེས་ཚོམས་དང་པོ་དང་གཉིས་པ་སོགས་ཆུ་དང་འགྲོགས་ནས་ཡོད་ལ། དེ་གའི་ལམ་དེད་ནས་རི་ངོགས་སུ་འཛེགས། ལམ་ཐག་ཧ་ཅང་རིང་ས་ཞིག་ཏུ་སླེབས་པ་ན་སྣེ་ཁྲིད་པས་འབྲེལ་བ་བྱས་ཟིན་པ་ལྟར་དེ་གའི་ཁྱིམ་བདག་གང་ཞིག་གིས་ཁ་བཏགས་བཟུང་ནས་ང་ཚོ་བསྒུག་འདུག །རླངས་འཁོར་ལས་བབས་ནས་ཁང་རྩེག་གཉིས་པར་སོང་། ཞོག་ཁོག་དང་སྐྱུར་པོ། མར་ནང་དུ་ཨ་པེས་གཏུབ་མ་ཅན། རླངས་ཚོས་བཅས་ཟས་སུ་བསྒྲིགས་ནས་ཡོད་པར། ལྟོགས་ཆེ་བས་ཡིན་ནམ་ཧ་ཅང་ཞིམ་པའི་སྣང་བ་བྱུང་།

དེ་ནས་ང་ཚོ་མུ་ཏིག（猛董）ལྷ་ཁང་དུ་སོང་། གྱ་གྱུ་བརྒྱུད་པའི་རི་བོའི་ལ་ཁར་བུད། དེ་ནས་ལམ་དོག་མོ་ཅན་གྱི་རི་སྐེད་གཉིས་བརྒྱུད་ནས་གདང་མགོར་བུད། དེ་ནས་མར་བབས་པ་ན་ད་གཟོད་མུ་ཏིག་ལྷ་ཁང་དུ་སླེབས། ལྷ་ཁང་ནང་གི་ལྡེབས་རིས་རྣམས་ལ་ཞིབ་ཀྱིས་མཇལ། ཕལ་ཆེར་གཡུང་དྲུང་བོན་གྱི་ལྷ་ཡིན་འདྲ། སྣེ་ཁྲིད་པས་གྱང་ལྷ་དེ་དག་ལ་ལོ་ངོ་དྲུག་བརྒྱ་ལྷག་གི་ལོ་རྒྱུས་ཡོད་ཟེར། དགོན་པ་ཕྱིའི་རྩིག་པ་དང་ཆགས་ལུགས་ལ་བལྟས་ན་རྒྱས་སྤྲོས་ཅི་ཡང་མེད་པར་སྲ་ཐག་ཆོད་པ་ཞིག་རེད། ད་སྐབས་ལྷ་ཁང་སྟེང་དུ་ཟངས་རྫུན་གྱི་རྒྱ་ཕིབས་བཞག་པས་གནའ་ཉམས་མེད་པར་བཟོས་པ་ལ་གྱོང་ཁ་ཆེ་ཙམ་རེད།

མུ་ཏིག་གི་སྐོར་རྒྱ་ཡིག་ཏུ་（猛董）ནི་དཀར་མཛེས་ཁུལ་བརྒྱད་ཟིལ་རྫོང་བསམ་ཡན་ལུང་ཡུལ་ཚོའི་ལྷོ་ཕྱོགས་སུ་ཡོད་ལ། མིང་ལ་མུ་ཏིག་ཟེར་ཞིང་ས་གནས་རང་གི་སྐད་དུ་ཁུ་ཏོ་ཞེས་འབོད། ས་གནས་འཕེན་མིའི་སྐད་དུ་པ་ཙོ་མེས་ཁུ་ཏོ་ལམ་བུ་ཟེར། དུས་རབས་སྔོན་མར་ཨ་མི་རི་ཀའི་འཚོལ་ཞིབ་པ་ལོ་ཁི（洛克）ཡིས། མུ་ཏིག་ནི་འཛམ་གླིང་སྟེང་ཆེས་མཛེས་པའི་ཡུལ་ཁམས་ཤིག་རེད་ཅེས་བཤད་མྱོང་། ས་གནས་འདིར་མཛེས་སྡུག་ལྡན་པའི་རི་བོ་མུ་ཏིག་གངས་དཀར་ཡོད་ལ། དེར་ངོ་མཚར་བའི་མཚོ་མོ་བདུན་གྱིས་བསྐོར་ཡོད། མུ་ཏིག་གངས་དཀར་གྱི་སྟེང་དུ་དུས་བཞི་ཁ་བས་གཡོགས་ཡོད། མཚོ་འཕགས་མཐོ་ཚད་མིག་སྔར་བར་མཇལ་མྱོང་མེད། རི་དེར་བསྐོར་བའི་མཚོ་བདུན་ལ་མིང་རེ་འདུག་ཀྱང་།

དེང་སྐབས་བཏགས་པའམ་སྔོན་ནས་ཡོད་པར་ཆ་མ་འཚལ་བས་རྒྱ་ཡིག་ནང་ལྟར་བྱས་ན་འདི་ལྟར།（第一个组米湖，第二个花子湖，第三个花组湖，第四个花给湖，第五个枯喷湖，第六个瓦藏湖，第七个甲花湖）བཅས་སོ། །ཡུལ་དེར་ནོར་བུ་བོན་རི་ཞེས་པ། བོན་པོའི་གནས་རི་གྲགས་ཆེན་གསུམ་གྱི་ཡ་གྱལ་ཞིག་ཡོད། བོན་པོའི་གནས་རི་གྲགས་ཆེན་གསུམ་ནི། གངས་ཏི་སེ་དང་།

ཀོང་པོའི་བོན་རི། ནོར་བུ་བོན་རི་བཅས་ཡིན། ནོར་བུ་བོན་རིའི་རི་སྐེད་དུ་མུ་ཏིག་ཡུལ་ཚོ་ཡོད། དེར་གནའ་བོའི་བོན་པོའི་ཆོས་ལུགས་ཀྱི་ལྷ་ཁང་རྙིང་པ་ཞིག་ཡོད། མིང་ལ་མུ་ཏིག་ལྷ་ཁང་ཟེར། (ཡུལ་སྐད་དུ་པ་ཙོས་མེས་ལྷ་ཁང་ཞེས་འབོད) ལྷ་ཁང་འདི་བརྒྱད་ཟིལ་རྫོང་གིས་མིག་སྔར་སྲུང་སྐྱོབ་ཐུབ་པའི་ཆེས་ལྷ་ཁང་རྙིང་གྲས་ཡིན། དགོན་པ་དེ་ལག་ཀ་བསྟན་པའི་རྒྱལ་མཚན་གྱིས་རྟེན་འབྲེལ་དང་བཅས་བཏབ་པ་དང་། ལོ་ངོ་དྲུག་བརྒྱ་ལྷག་གི་ལོ་རྒྱུས་ཡོད་པར་མ་ཟད། དགོན་པའི་ལྡེབས་རིས་རྣམས་སྔར་ནས་འཐོར་བརླག་མ་ཤོར་བར་གནས་ཡོད། ལོ་བཅོ་ལྔའི་གོང་དུ་དགོན་པའི་བླ་རྒན་ཞིག་ཡོད་པ་འདས་རྗེས་ད་བར་དགོན་པ་ལ་གྲྭ་སེར་མེད་རུང་། དད་ལྡན་པ་མང་པོ་ཡོད་ཅེས་བྲིས་ཡོད།

ང་ཚོ་ལྷ་ཁང་ནས་ཕྱིར་ཡུལ་ཚོ་རུ་ཐོན་དུས། ཁོ་ཚོས་ཟ་མ་གྲ་སྒྲིག་བྱས་འདུག །ཁོ་ཚོ་འཕེན་མིའམ་མི་ཉག་གང་ཡིན་རུང་མགྲོན་པོ་ལ་སྣེ་ལེན་འཛུམ་གྱིས་ཞུ་བ་དང་། རྣམ་འགྱུར་ཧ་ཅང་ཡག་པོ་རེད། ཟ་མ་ཟོས་ནས་སྒོར་བུད་སྐབས། གྲོང་ཚོ་དེའི་ཕོ་གསུམ་དང་མོ་གཉིས་ཀྱིས་ཁོ་རང་ཚོའི་སྲོལ་རྒྱུན་ཆས་གོས་བྱས་ནས་སླེབས་བྱུང་། ང་ཚོས་མཉམ་དུ་པར་བླངས་པ་དང་ཕན་ཚུན་བཀའ་དྲིན་ཞུས་ནས་ཁ་གྱེས་པ་ཡིན།

རིམ་གྱིས་རི་ངོ་ནས་ཁོག་ཏུ་བབས། ཁོག་གི་གྲོང་ཚོ་ཞིག་ནས་གཡུང་དྲུང་བཀྲ་ཤིས་ཟེར་བའི་རྒད་པོ་ཞིག་དང་ཐུག་སྟེ་ལོ་77རེད། ཁོས་བཤད་པ་ལྟར་ན་ཆུང་དུས་ལོ་བཅུ་གསུམ་སྟེང་མུ་ཏིག་ལྷ་ཁང་དུ་ཚོགས་ལ་ཞུགས་མོད། ལོ་གཉིས་ནས་དུས་འགྱུར་ལ་ཁེལ། རྗེས་སོར་ལོ་བཞི་བཅུའི་སྟེང་ད་གཟོད་ཀ་ཁ་སློབ་པ་ཡིན། ད་སྐབས་ང་ཚོའི་གྲོང་ཚོར་བོད་ཡིག་ཤེས་མཁན་ཧ་ཅང་ཉུང་། སྔོན་ཆད་མི་ཉག་ཕྱོགས་དང་འབྲེལ་བ་ཆེ་བར་མ་ཟད། གཉེན་སྟོན་མོའི་སྐབས་སུ་མི་ཉག་ས་བདེའི་ཕྱོགས་དང་འདྲ་མོ་རེད། ང་ཚོ་ལ་གཉེན་གཏམ་དང་། བྲོ་གཏམ། བྲོ་གཞས། ལ་གླུ་སོགས་མང་པོ་ཡོད་མོད། ད་སྐབས་ཤེས་མཁན་ཉུང་ཟེར། དེ་ནས་ཁྱེད་ཀྱིས་ཉུང་ཙམ་བཤད་རོགས་ཞེས་ཨུ་ཚུགས་བྱས་མཐར། བྲོ་གཏམ་ཡག་པོ་ཞིག་བཤད་བྱུང་། ཚིག་རེ་ཟུང་མི་གསལ་བ་མ་གཏོགས་བོད་ཀྱི་གནའ་གཏམ་ཧ་ཅང་ཕུན་སུམ་ཚོགས་པ་ཞིག་རེད།

དེ་ནས་ཅུང་ཙམ་སོང་རྗེས་དཔོན་པོ་གྲོང་དུ་སླེབས། དེ་གར་ཕུན་ཚོགས་ཟེར་བའི་ལོ་86ཅན་གྱི་བླ་རྒན་ཞིག་དང་ཐུག །ཁོང་གིས་བཤད་ན་ཁོ་ཚོའི་དགོན་པར་བསེ་རུ་དགོན་པ་ཟེར། སྔོན་ལ་ཁམས་གསུམ་གྲགས་ཀྱི་དགོན་ལག་ཡིན། ད་སྐབས་ཨ་ར་དགོན་པའི་དགོན་ལག་ལྟ་བུ་རེད། དགོན་པ་འདི་སྔོན་ཆད་གངས་རི་བདེ་བ་བློ་གྲོས་ཀྱིས་བཏབ་པ་རེད། བརྒྱད་ཟིལ་ཕྱོགས་འདིར་ཨ་ར་ཆོས་རྗེ་སེང་གེ་དང་། མཁར་གསེས་འཇམ་དཔལ་སེང་གེ། གངས་རི་བདེ་བ་བློ་གྲོས་གསུམ་གྱིས་རྒྱལ་བསྟན་རྒྱས་པར་མཛད་ཡོད། གངས་རི་བདེ་བ་བློ་གྲོས་ལ་ལོ་རྒྱུས་ཡིག་ཆ་མེད་རུང་།

ངག་རྒྱུན་ལ་ཐག་རིང་ཞིག་ནས་ཕེབས་པ་རེད་ཟེར། བསེ་རུ་དགོན་ལ་སྔོན་གྲྭ་པ་ཉི་ཤུ་ལྷག་ཡོད་རུང་ད་སྐབས་མེད། གངས་རི་བདེ་བ་བློ་གྲོས་ཀྱིས་མཛད་པའི་གསང་སྔགས་རོང་གི་སྒོ་མེ་གཞི་བདག་གི་བསང་ཡིག་ཡོད་ཟེར་ནས་སློག་སར་ཕེབས་རུང་རྙེད་མ་བྱུང་། ང་ཚོ་དང་ཐོག་ཁོ་ཚོའི་ཁྱིམ་དུ་འཛུལ་བ་ན་རྒན་མོ་ཞིག་གིས“ན་འོ་བརྒྱལ་ཐག་འ”ཟེར། བླ་མ་དགྲ་འདུལ་གྱིས་ཡ་མཚན་ཁྱེད་ཚོས་མི་ཉག་སྐད་དག་མ་བཤད་ཀྱི་འདུག་ཅེས་སྨྲས་པ་ན། ཟུར་གྱི་མི་རྣམས་ཀྱིས་མ་རེད། དེ་ཙམ་ཤེས་པ་རེད་མ་གཏོགས་ང་ཚོ་འཕེན་མི་དག་མ་ཡིན་ཞེས་བཤད།

ཉིན་དེར་ང་ཚོས་ཉམས་བཞག་པ་ན། འཕེན་མིའི་སྐད་ལ་མི་ཉག་སྐད་དང་འདྲ་ས་མང་པོ་འདུག །

ཁོ་རང་ཚོས་བོད་པ་ཡིན་པ་ལས་མི་ཉག་པ་མིན་ཞེས་བཤད་ཀྱི་འདུག །གང་ལྟར་རིག་གནས་སྲོལ་རྒྱུན་དང་།

ཆོས་ལུགས་དད་མོས། སེམས་ཁམས་བཟོ་ལྟ། གུས་སྲོལ་གཟུགས་དབྱིབས་སོགས་བོད་པ་དག་མ་རེད་འདུག་གོ །（མུ་འགོད）