བདུད་རྩི་ལྔའི་ལུམས་ཀྱི་སྐོར་ནས་ཅུང་ཟད་འཕྲོས་པ།

གཅིག །ཅི་ཞིག་ལ་བདུད་རྩི་ལྔའི་ལུམས་ཞེས་བྱ།

བདུད་རྩི་ལྔའི་ལུམས་ཞེས་པ་དེ་ཉིད་ནི་སྨན་གྱི་སྦྱོར་བ་ཞིག་ལས་གྲུབ་ཅིང་། དེའི་སྨན་སྦྱོར་གྱིས་ལུམས་སུ་ཞུགས་པ་ཞིག་ཡིན་ཏེ། གཙོ་བོར་བ་ལུ་དང་། ཤུག་པ། མཚེ། འོམ་བུ། མཁན་སྐྱ་བཅས་སྨན་སྣ་ལྔ་ལས་གྲུབ་པ་ཞིག་ཡིན་སྟེ། ཀུན་གསལ་སྣང་མཛོད་ལས། བ་ལུ་མི་ཡི་བདུད་རྩིས་ལྤགས་མཉེན་བྱེད། །ཤུག་པ་ལྷ་ཡི་བདུད་རྩི་ཡོན་ཏན་མང་། །མཚེ་ལྡུམ་བཙན་གྱི་བདུད་རྩིས་ལུས་ཟུངས་བརྟས། །འོམ་བུ་ཀླུ་ཡི་བདུད་རྩིས་རུས་དུག་འབྱིན། །མཁན་སྐྱ་སྡེ་བརྒྱད་བདུད་རྩིས་འབྱུང་བ་སྙོམས། །ཞེས་གསུངས་པ་བཞིན་བ་ལུ་དང་། ཤུག་པ། མཚེ། འོམ་བུ། མཁན་སྐྱ་བཅས་འདི་ལྔ་པོ་ཡིན། བ་ལུའི་མེ་ཏོག་དང་སྡོང་པོ་སོགས་ལས་ཆེས་མཆོག་ཏུ་གྱུར་པ་ནི་མེ་ཏོག་ཡིན་པར་བཤད། ཤུག་པའི་ལོ་མ་དགོས་ཤིང་། ཤུག་པ་ལའང་ཤུག་པ་ཚེར་ཅན་དང་རྒྱ་ཤུག་ལེབ་མོ་སོགས་ཤུག་པ་འདི་དག་དབྱེ་བ་དང་བཞེད་ཚུལ་མི་མཐུན་པ་མང་དུ་འདུག་ཀྱང་དོན་དངོས་ཀྱི་ཐོག་ལ་ཁྱད་པ་ཆེར་མ་མཆིས་ཏེ། འཁྲུངས་དཔེ་དྲི་མེད་ཤེལ་གྱི་མེ་ལོང་ལས། གཞན་ཡང་སྐྱེ་ཚུལ་ཅུང་ཟད་མི་འདྲ་བའི་ཤུག་རིགས་མང་ཡང་དོན་དུ་རོ་ནུས་མཚུངས་པས་ཤུག་པ་རང་གི་ཁོངས་སུ་གཏོགས་པའོ། །ཞེས་གསུངས་པ་འདིས་ཀྱང་རྟོགས་ནུས་སོ། །མདོར་ན་གོང་དུ་བཤད་མ་ཐག་པའི་སྨན་སྣ་ལྔ་པོ་དེ་ཉིད་སྦྱོར་བ་ཚུལ་བཞིན་བྱས་ནས་ལུམས་སུ་ཞུགས་པ་བྱེད་པར་དེ་ལ་བདུད་རྩི་ལྔའི་ལུམས་ཞེས་བྱ་བ་ཡིན་ནོ། །གཞན་ཡང་བདུད་རྩི་ལྔ་པོ་དེ་ཉིད་གཙོ་བོ་བྱས་ཐོག་ནད་སོ་སོ་ལ་ལྟོས་ཏེ་སྨན་གཞན་གྱི་ཁ་ཚར་ཡང་འདེབས་རུང་བ་ཡིན་ཏེ། དཔེར་ན་གྲང་བས་རྐྱེན་པའི་ཆུ་སེར་གྱི་ནད་ལ་སྤོས་དཀར་དང་སོ་མ་རཱ་ཛ། ཐལ་ཀ་རྡོ་རྗེ་བཅས་ཆུ་སེར་གྱི་སྨན་གསུམ་སོགས་ཁ་ཚར་གདབས་པ་བཞིན་དུ་གཞན་ལ་ཡང་རིགས་འབྲེལ་གྱིས་ཁ་ཚར་འདེབས་ན་ཕན་ཐོག་ལྷག་ཏུ་ཆེ་བ་ཡིན་ནོ། །

གཉིས། བདུད་རྩི་ལྔའི་ལུམས་ལ་ཞུགས་སུ་རུང་མི་རུང་ཅི་རིགས་ཡོད་པ་ལས་ཞུགས་སུ་རུང་བའི་སྡེ་ནི།

བདུད་རྩི་ལྔའི་ལུམས་ལ་ཞུགས་སུ་རུང་བ་ནི། དཔལ་ལྡན་《རྒྱུད་བཞི》ལས། རུང་བ་ཡན་ལག་རེངས་འཁུམས་ཞ་བ་དང་། །

འབྲས་དང་ལྷོག་པ་རྨ་རྙིང་རྨ་གསར་སྐྲངས། །ཚབས་དང་སྒུར་པོ་ཤ་རུས་ཆུ་སེར་གཡོས། །རླུང་ནད་མ་ལུས་ཀུན་ལ་བསྔགས་པ་ཡིན། །

ཞེས་པ་ལྟར། རྐང་པ་དང་ལག་པ་སོགས་ཡན་ལག་གི་ཆུ་རྒྱུས་རེངས་འཁུམས་བྱུང་བ་དང་། ཞ་བ་སྟེ་ནུས་པ་ཉམས་སོང་བ། རྩ་དཀར་གྱི་ནད་དང་། འབྲས་ནད་དང་ལྷོག་པ། རྨ་གསར་རྙིང་སྐྲངས་པ་དང་།

བུད་མེད་ཀྱི་ཚབས་ནད། རྒལ་ཚིགས་བུད་པ་དང་རྐང་ལག་སོགས་རུས་ཚིགས་ལ་ན་ཟུག་རྒྱག་པ། ཤ་ལྤགས་དང་རུས་ཚིགས་སོགས་ཀྱི་བར་ལ་ཆུ་སེར་གཡོས་པ། རླུང་ནད་སྤྱི་དང་ཁྱད་པར་དུ་རླུང་ནད་ད་རྒན་དང་། རླུང་ནད་ཕྱོགས་གཅིག་གུག་པ་སོགས་མདོར་ན་རླུང་གི་ནད་དང་དྲེག་གྲུམ་གྲང་བའི་ནད་སོགས་ལ་བདུད་རྩི་ལྔ་ཡི་ལུམས་སུ་ཞུགས་རུང་བ་ཡིན་པས་མ་ཚད་མཆོག་ཏུ་བསྔགས་པ་ནི་སུས་ཀྱང་སྨོས་མ་དགོས་པ་ཡིན་ནོ། །

གསུམ། བདུད་རྩི་ལྔའི་ལུམས་ལ་ཞུགས་སུ་རུང་མི་རུང་ཅི་རིགས་ཡོད་པ་ལས་ཞུགས་སུ་མི་རུང་བའི་སྡེ་ནི།

བདུད་རྩི་ལྔའི་ལུམས་ལ་ཞུགས་སུ་མི་རུང་པ་ནི། དཔལ་ལྡན་《རྒྱུད་བཞི》ལས། མི་རུང་རིམས་འཁྲུགས་ཚ་རྒྱས་སྐྱ་རྦབ་དང་། །ཉམ་ཆུང་དང་ག་འགགས་ལ་སྤང་བར་བཤད། །མིག་དང་མཁུར་ཚོས་དྲེག་བཞི་རླིག་པ་དང་། །ལྟོ་བ་སྙིང་གའི་གནས་སུ་ལུམས་མི་རུང་། །ཞེས་གསུངས་པ་ལྟར། །རིམས་དང་འཁྲུགས་པ་རྒྱས་པ་ལ་སོགས་པའི་ཚ་བའི་ནད་རིགས་ཤིན་ཏུ་རྒྱས་པ་དང་། སྐྱ་རྦབ་དང་འོར་ནད། དམུ་ཆུ་ལ་སོགས་པ་དང་། ལུས་ཞན་ཞིང་ཉམ་ཆུང་བ། མ་ཞུ་བའི་ནད་ཀྱིས་དང་ག་འགགས་པ། ཁྲག་ཤེད་མཐོ་བ་དང་བུད་མེད་སྦྲུམ་མ། བུད་མེད་ལ་ཟླ་མཚན་འབྱུང་བཞིན་པའི་དུས། བུ་བཙས་མ་ཐག་པ་དང་། སྙིང་ཁམས་སོགས་མི་བདེ་བའི་དུས་སྐབས། ལུས་གང་སར་དུ་རྨ་ཁ་ཡོད་པའི་དུས་སོགས་ལ་ཅིས་ཀྱང་བདུད་རྩི་ལྔའི་ལུམས་སུ་ཞུགས་མི་རུང་པ་བསྟན་པར་ཡིན་ནོ། །

ད་དུང་དེས་མ་ཚད་པར་མིག་གི་གནས་དང་། མཁུར་ཚོས། མཐིལ་བཞི་དང་། རླིག་པ་སོགས་དང་། ཁྱད་པར་དུ་ཕོ་བ་རྒྱུ་ལོང་གི་ཡུལ། སྙིང་ག་བཅས་རབ་ན་བསྟེན་མི་རུང་པ་ཡིན་ནོ། །

བཞི། བདུད་རྩི་ལྔའི་ལུམས་སུ་ཞུགས་པའི་ཕན་ནུས་བཤད་པ་ནི།

དཔལ་ལྡན་《རྒྱུད་བཞི》ལས། ལུམས་ཀྱིས་ཚ་རླངས་ཆུ་སེར་བ་སྤུར་འདོན། །རླུང་འདུལ་སྐྲངས་འཇོམས་སྐེམ་པོ་ཤ་རྒྱས་བྱེད། །

ཞེས་གསུངས་སོ། །མ་ཚད་བདུད་རྩི་ལྔའི་ལུམས་འདི་ཉིད་བསྟེན་པས་ནད་མེད་པ་ཞིག་ཡིན་ནའང་ཕྱིས་སུ་མི་ན་ཞིང་ཡུན་རིང་དུ་འཚོ་བར་བྱེད་པ་དང་། ན་བ་དག་གསོ་བར་བྱེད་པའི་ཕན་ནུས་ཆེན་པོ་དང་ལྡན་པ་ཡིན་ལ། ལྷག་པར་དུ་གཤང་བ་ཡོང་མི་ཐུབ་པ་དང་བུ་མོ་ཚོ་ལོ་ཚོད་ཀྱིས་ཟླ་མཚན་ཆད་ཁ་རུ་ལུས་སུ་ཚ་དྲོད་རྒྱག་པ་སོགས་ལ་ཧ་ཅང་ཕན་པ་ཡིན། མདོར་ན་ཁོག་པའི་ནང་གི་ནད་གཞི་མཐའ་དག་བ་སྤུའི་བུ་ག་བརྒྱུད་ནས་ཕྱིར་འདྲེན་པར་བྱེད་པ་ཡིན་ལ། ཁྱད་པར་དུ་རླུང་གི་ནད་རིགས་ཀུན་ལ་འདི་ཉིད་ཁོ་ན་ལས་གཞན་གང་ཡང་མི་དགོས་པ་ཡིན་ནོ། །

ལྔ། བདུད་རྩི་ལྔའི་ལུམས་ལ་ཞུགས་སྐབས་ངེས་པར་དུ་དོ་སྣང་བྱེད་དགོས་པ་འགའ།

ཆུའི་དྲོ་གྲང་ལ་ངེས་པར་དུ་དོ་སྣང་བྱེད་དགོས་ཤིང་། ཧ་ཅང་ཚ་མི་ཆེ་ཞིང་གྲང་ཡང་མི་ཆེ་བ་ཚད་ལ་རན་པ་ཞིག་དགོས་པ་ཡིན། གཞན་ཡང་ལུས་ཀྱི་དྲོད་ཕྱིར་ལ་ཤོར་བ་དང་། རྔུལ་འབྱམས་པ། རྒྱས་ཚད་སྐྱེས་པ། ཁྲག་ཤེད་མཐོ་བ་དང་མགོ་ཡུ་འཁོར་བ། སྙིང་གཡུགས་པ་སོགས་ནི་འབྱུང་སྲིད་པ་ཡིན་པས་སྨན་པ་དང་ནད་གཡོག་པས་ངེས་པར་སྔ་ནས་གསལ་འདེབས་བྱེད་པ་དང་དེ་ལ་དོགས་ཟོན་ནན་མོ་བྱེད་དགོས་པ་དང་། ནད་པ་རང་ཉིད་ཀྱིས་ཀྱང་དེ་ཚོ་ལ་དོ་སྣང་གང་ལེགས་བྱེད་དགོས་པ་ཡིན། ནད་དུག་ལ་སོགས་པ་མི་འགོས་པའི་ཆེད་དུ་གཙང་སྦྲ་དང་འཕྲོད་བསྟེན་ནི་ཤིན་ཏུ་གལ་ཆེ་བ་ཞིག་ཡིན་པར་ནི་སུས་ཀྱང་བཤད་མ་དགོས་པ་ཡིན་ཏེ། དཔེར་ན། ལུམས་བྱ་སྣོད་ཀྱི་ཁྲུས་གཞོང་སོགས་དུག་སེལ་དང་གཙང་སྦྲ། ཐེངས་གཅིག་སྤྱོད་པའི་ཁུག་མ་སོགས་ངེས་པར་དུ་ཚུལ་ལྡན་བྱེད་ནས་བཀོལ་སྤྱོད་བྱེད་དགོས། གཞན་ནད་པའི་གནས་ཚུལ་སོགས་གོང་དུ་བཤད་པ་བཞིན་ལུམས་སུ་ཞུགས་རུང་མིན་ལ་སྔོན་མ་ནས་བརྟག་དཔྱད་ལེགས་པོ་བྱེད་དགོས་པ་ནི་སྨན་པ་དང་ནད་པ་གཉིས་ཀའི་ཆེས་བརྗེད་དུ་མི་རུང་པའི་གནད་དོན་ཆེས་གལ་ཆེ་བ་དེ་ཡིན་ནོ། །མ་ཚད་ད་རུང་རླུང་སྨན་ཨ་གར་སོ་ལྔ་ལྟ་བུ་སོགས་དང་། རླུང་བདུག་རིགས་ལ་སོགས་པ་འབྲེལ་ཡོད་མྱུར་སྐྱོབ་ཀྱི་སྨན་སོགས་གང་ལ་གང་འཚམས་ཤིག་ཀྱང་གྲ་སྒྲིག་ལེགས་པོར་བྱེད་དགོས་པ་ཡིན་ནོ། །