ང་དང་གྱེས་སོང་བའི་ནག་སྣུམ་གྱི་སྐྲ་ལོ།

ཀྱེ།

འཛུམ་མདངས་དང་འགྲོགས་ཏེ་གྲྭ་པ་ཞིག་གི་རང་གཟུགས་གྲུབ་པ་ནས་བཟུང་།

ངའི་ནག་སྣུམ་གྱི་སྐྲ་ལོ་རིང་མོ།

ངའི་མི་ཚེ་འདི་དང་རིང་དུ་གྱེས་སོང་།

གངས་རིའི་སྒྲོལ་མས་བཤད་མྱངས།

ངའི་སྐྲ་ལོ་འདི་ཁོ་མོའི་རེ་ལྟོས་ཡིན་ཟེར།

རྩྭ་ཐང་འཇོལ་མོས་བཤད་མྱངས།

ངའི་སྐྲ་ལོ་འདི་ཁོ་མོའི་ཕུགས་འདུན་ཡིན་ཟེར།

སྐྲ་ལོ། ནག་སྣུམ་གྱི་སྐྲ་ལོ།

ཁྱེད་དང་རིང་དུ་གྱེས་པ་ནས་བཟུང་།

རླུང་བསེར་བུའི་འཇབ་རྒོལ་རྒྱུན་མ་ཆད་ལ།

ཆུ་ཆར་པའི་བརྙས་བཅོས་གྲངས་མི་ལོན།

སྨྲ་བ་བཅད་ནས་བསྡད་ན་ཡང་།

སུ་ཞིག་ལ་ཕོག་ཐུག་བཟོས་པ་བཞིན།

འབུ་དང་གྲོག་མ། ཐ་ན་དགུན་ལྗོངས་ཀྱི་གནམ་གཤིས་ཀྱིས་ཀྱང་།

རྫི་གླུ་ཐོལ་གྱིས་བརྡོལ་བའི་ཞིང་ཁམས་དེ་ན།

ངའི་ནག་སྣུམ་སྐྲ་ལོའི་ལང་ཚོ་ཡོད་ལ།

ཅང་ཤེས་གོམ་ལག་མྱུར་བའི་ལྗོངས་ཁམས་དེ་ན།

ངའི་ནག་སྣུམ་སྐྲ་ལོའི་རྨི་ལམ་ཡོད།

སྐྲ་ལོ། ངས་ཁྱེད་མ་དྲན་ཉིན་གཅིག་མི་འདུག

རླུང་བསེར་བུ་འགོག་ནུས་པའི་བློ་གྲོས་དང་།

ཆུ་ཆར་པར་རྒོལ་ནུས་པའི་སྙིང་སྟོབས།

སྟོན་རླུང་ཤུར་ཤུར་དང་འགྲོགས་ནས་ངའི་སྐྲ་ལོ་རིང་མོས།

ཆུ་བོ་དེའི་ཕ་རོལ་ནས།

སྐྱ་རེངས་དང་འགྲོགས་པའི་ངའི་མངར་སྐྱུར་གྱི་འཚོ་བར།

རྒྱང་ལྟ་ཐེངས་ཤིག་བྱས།

དབྱར་དུས་བུད་སོང་དགུན་དུས་སླེབས་བྱུང་།

ཆར་ཆུ་ཟད་སོང་ཁ་བ་འཚུབ་བྱུང་།

ངས་ཁྱེད་ཤིན་ཏུ་དྲན།

ཁྱེད་ཀྱིས་ང་རང་རུམ་པའི་དགུན་ལྗོངས་དྲོན་མོ་དེ་ཤིན་ཏུ་དྲན།

རྒྱང་བཞུད་པར་ལེན་པའི་སྐྲ་ལོ་རིང་མོ།

ངའི་ཡིད་ཀྱི་སྨོན་པ་སྐྱེ་ས་དེ་ཡིན།

གཡས་སུ་འཁྱིལ་བའི་ངའི་སྐྲ་ལོ་རིང་མོ་ཁྱེད།

རྨི་ལམ་གྱི་ཞིང་ཁམས་ཤིག་ནས་ང་དང་ལྷན་འཛོམས་བྱུང་།

ནག་སྣུམ་གྱི་སྐྲ་ལོ།

གངས་སེང་གི་གཡུ་རལ།

འབྲོང་གཡག་གི་སྤུ་ཁ།

གྱི་ལིང་གི་རྔོག་མ།

རེ་བཞག་རླུང་འཚུབ་དང་བསྡོངས་ནས་ཕྱོགས་བཞིར་འཁུར་ལ།

བརྩེ་དུང་ཁ་ཆར་དང་འདྲེས་ནས་ཟིལ་ཐིགས་བཞིན་ཟེགས།

ངའི་སྐྲ་ལོ་རིང་པོའི་ལས་དབང་།

མ་ཡུམ་སུ་ཞིག་གི་ངག་སྒོའི་བཤད་ས་དེ་ཡིན་འདུག །