ང་རང་མཚན་མོ་དེར་བདག་པོས་རིང་ཐག་བྱས་ནས་བརྟོད།
ནམ་གུང་དགུང་གི་སྐར་མ་ཚང་དུས།
རྨིག་འོག་གི་ས་གཞི་འགུལ་བའི་ཚོར་བ་བྱུང་བས།
(མ་གཞི་ས་འགུལ་ཕྲན་ཙམ་བརྒྱུག་པ་རེད)
ང་རང་འདྲོགས་ཏེ་རྟོད་ཐག་ཀྱང་དྲུད་ནས་ཤོར།
ལམ་བར་ནས་ངས་རང་གི་སྲབ་མདའ་བོར་སོང།
བདག་པོས་ང་རང་བཙལ་བཞིན་ཡོད་ངེས།
ང་སྔོན་གྱི་གནས་དེ་ན་མེད་དེ།
ལུང་པའི་ཕུ་ཡི་རྟ་ཁྱུ་ཞིག་གི་གྲལ་ལ་ཐོན་ཡོད།
རྟ་ཕོ་འདི་དག་ཕལ་ཆེར་རི་ཤོར་རེད་འདུག
མགོ་ལ་སྲབ་མཐུར་བཞག་ཤུལ་མེད་ལ།
རྒྱབ་ལ་རྐང་རྡོག་ཅིག་ཀྱང་བརྒྱབ་ཚོད་མི་འདུག
ང་མཐོང་བས་ཚང་མས་མགོ་བོ་ཀྲོག་གེར།
ཐག་རིང་ཞིག་ལ་ལྐོག་ཉན་བྱེད་པ་ལྟར་སྣང་།
ངའི་མགོ་ན་སྲབ་སྐྱོགས་ཡོད་རུང་།
སྲབ་མདའ་བཅད་ནས་བོར་བཞག
ཞོགས་པའི་ཟིལ་རྩྭའི་ནང་།
སྲབ་མདའ་དྲུད་ནས་སོང་བའི།
ཚོར་བ་དེའང་ཇི་འདྲའི་སྐྱིད་ཨང་།
རྩྭ་གསེབ་ནས་ད་དུང་སྒྲ་དབྱངས་ཤིག་ཀྱང་གྲག་ཡོང་།
རི་ཤོར་འདི་ཚོས་ཚོར་བ་འདི་ག་ལ་ཤེས་ཏེ།
ཐ་ན་ཁོ་ཚོའི་མགོར་སྲབ་ཅིག་ཀྱང་བཞག་མྱོང་མེད་ན།
ཁོ་ཚོ་ད་དུང་རྐྱང་ལ་འདྲེས་མི་ཐུབ་པ་ག་རེ་ཡིན་ནམ།
ང་རང་རྟ་ཁྱུ་འདིར་འཚམས་པོ་ཡེ་ནས་མེད་དེ།
ཁོ་ཚོས་ང་ལ་རྔོགས་རྩེ་དང་འཕྲ་རྩེད་བྱས་ཏེ།
གང་ཞིག་ནས་མཐོང་ཆུང་གི་རྣམ་འགྱུར་བསྟན་ཡོང་།
ང་རང་མྱུར་མོར་ཕྱིར་སོང་ནས།
རང་གི་སྲབ་མདའ་བཙལ་དགོས།
བདག་པོས་ཀྱང་ང་རང་བཙལ་བཞིན་ཡོད་ངེས།
ངས་རང་གི་བདག་པོར་འདི་ལྟར་ཁྲེལ་མེད་བྱེད་སྲོལ་ག་ལ་ཡོད།
ངའི་སྲབ་མདའ་དེའི་རྒྱུ་བལ་དཀར་ཡིན་པས།
ཧ་ཅང་འཇམ་ལ་ཡང་བ་ཞིག་ཡིན།
ངས་སྲབ་མདའ་དེ་འཚོལ་དོན་ནི།
རང་གི་བདག་པོའི་སེམས་ཁ་མི་དཀྲུགས་ཆེད་དང་།
རང་སེམས་རང་གིས་གཅུན་ཐབས་ཙམ་ཡིན།
སྔ་དྲོ་རྟ་ཕོ་ཆས་ཀྱིས་གསོས་ན།
ཕྱི་དྲོ་དྲིན་ལན་འཕྲ་ཡིས་འགྱེད་པ་ག་ལ་རུང་ཨང་།
དེ་བས་ཀྱང་། ཁ་ལོ་བཏུལ་ཟིན་པ་ཞིག
རི་ཤོར་དུ་འགྱུར་ག་ལ་རུང་ཨང་།
ངས་ངེས་པར་དུ་རང་གི་སྲབ་མདའ་འཚོལ་དགོས།
སྲབ་མདས་ཀྱང་གང་ཞིག་ན་ང་ལ་བསྒུག་སྟེ་ཡོད་ངེས། ། 