༡
ང་དེ་རིང་ཁྱོད་ཀྱི་གློ་སྙིང་མཆིན་གསུམ་གྱི་རྩེ་རུ་ལངས་ཏེ།
ལུས་ཀྱི་འཕར་རྩ་རེ་རེར་དམ་དུ་འཁྱུད་དོན།
ཁྱེད་ཀྱི་སྙིང་གཏམ་ལ་རྣ་བ་བློག་ནས།
ཁྱེད་ཀྱི་བརྩེ་བ་ཡོད་ཚད་སེམས་ཀྱིས་མྱོང་ཆེད་ཡིན།
༢
རྨ་རྒྱལ་སྤོམ་རའི་ཟུངས་ཁྲག་ནུ་ཞོ་རུ་སྦྲུམ་སྟེ།
སྐུང་གསེར་ཁམས་མདོའི་བྲང་གཞོང་ལ་དགུ་སྐོར་བརྒྱབ་པས།
ངོ་མཚར་བའི་གཏམ་རྒྱུད་དང་རྒྱུན་རིང་བའི་བྱུང་བ་ཡོད་ཚད།
ལྗང་ནེམ་ནེམ་གྱི་ས་གཞི་རུ་ཁྲ་ཆིལ་ལེར་བཏང་།
༣
རྡུལ་ནག་རྨིག་པར་འཚུབ་པའི་འབྲོང་ཁྱུ་ཞིག་བཤར་སོང་།
བལ་དཀར་སྤྲིན་ལ་འདྲེས་པའི་ལུག་ཁྱུ་ཞིག་ཞོགས་སོང་།
སྦྲ་ནག་ཐང་ལ་ཕུབ་པའི་འབྲོག་སྡེ་ཞིག་ཆགས་སོང་།
ལྷ་སྒྲུང་ངག་ལ་འདྲེན་པའི་མི་རབས་ཤིག་ཆས་བྱུང་།
༤
ཨ་མྱེས་སྐུ་བླའི་དབུ་རྩེ་ནས་མཆེད་པའི་འཚེར་སྐད་སིང་སིང་དེས།
རྨ་སྨད་གཡུ་ལུང་སུམ་མདོའི་རྨི་ལམ་དཀྲོགས་པས།
གླིང་སྐྱེས་བུའི་ཕ་མཁར་ཇེ་བཙན་དུ་གྱུར་ཅིང་།
སྨན་འབྲུག་མོའི་བླ་རི་ཇེ་མཐོ་རུ་བརྩིགས།
༥
རྒྱུད་དྲུག་གི་དབྱངས་རྟར་འཇུས་པའི།
ཚེ་སྲོག་གི་སྨོན་འདུན་ཡོད་ཚད།
རྨ་ཀླུང་རིང་མོའི་ཁུ་སིམ་པའི་རླབས་ཕྲེང་ལ་བསྐྱོན་ཏེ།
རྨ་ཁུག་ནོར་བུ་དགའ་འཁྱིལ་ནས།
ཡང་བསྐྱར་ལམ་ལ་ཆས་པར་རྩོམ།