ཆོས་དབྱིངས་སྐྱིད་ལ་གསེར་གྱི་རྟགས་མ་གསབ་སྤྲོད་བྱས།
ས་གནས་དེ་གའི་དུས་ཚོད་ཟླ་3པའི་ཚེས་30ཉིན། རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་ལག་བསྟར་ཨུ་ཡོན་ལྷན་ཁང་གི་ཚོགས་འདུ་དེ་མཐའ་མའི་གྲོས་རིམ་ལ་སླེབས། ངར་སྐྱེད་སྨན་རྫས་ལ་ངོ་རྒོལ་བྱེད་པའི་སྲོལ་ཡིག་དང་འགལ་བའི་རྐྱེན་གྱིས་ལུས་རྩལ་པ་གཉིས་ཀྱི་འགྲན་ཞུགས་ཐོབ་ཐང་མེད་པར་བཟོས་པས། རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་ལག་བསྟར་ཨུ་ཡོན་ལྷན་ཁང་གིས་2012ལོའི་ལུན་ཏུན་ཨོ་རྩལ་འགྲན་ཚོགས་ཀྱི་རྣམ་གྲངས་ཁག་གཅིག་གི་འགྲན་བསྡུར་བྱ་དགའི་རྟགས་མ་བསྐྱར་དུ་བགོ་བཤའ་རྒྱག་རྒྱུའི་གཏན་འབེབས་བྱས་པ་རེད།
བུད་མེད་ཀྱི་སྤྱི་ལེ་20ཡི་འདུར་འགྲོས་འགྲན་བསྡུར་ནང་དང་ཐོག་ཨང་དང་པོ་ཐོབ་མཁན་དེའི་ཐོབ་ཐང་མེད་པ་བཟོས་པས། ཀྲུང་གོའི་འགྲན་ཞུགས་པ་ཆོས་དབྱིངས་སྐྱིད་ལ་2012ལོའི་ལུན་ཏུན་ཨོ་རྩལ་འགྲན་ཚོགས་ཀྱི་སྤྱི་ལེ་20ཡི་འདུར་འགྲོས་འགྲན་བསྡུར་གྱི་གསེར་གྱི་རྟགས་མ་ཐོབ་ཡོད་པ་དང་། དེ་བཞིན་ལིའུ་ཧུང་དང་ལུའེ་ཞིའུ་ཀྲི་གཉིས་ལ་དངུལ་གྱི་རྟགས་མ་དང་ཟངས་ཀྱི་རྟགས་མ་ཐོབ་ཡོད།
ད་ལོར་ལོ་32ལ་སླེབས་པའི་ཆོས་དབྱིངས་སྐྱིད་ཀྱིས་ཀྲུང་གོའི་རུ་ཁག་གི་ཚབ་བྱས་ནས་ལུན་ཏུན་དང་། ལི་ཡུའེ། ཐོ་ཁིའུ་བཅས་ཀྱི་ཨོ་རྩལ་འགྲན་ཚོགས་སྐབས་གསུམ་ལ་ཞུགས་མྱོང་ཡོད་ཅིང་། ད་ཐེངས་རིམ་གསབ་བྱས་པའི་ལུན་ཏུན་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་ཐོབ་རྗེས། ཁོང་ཉིད་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་ཐོབ་པའི་ཀྲུང་གོའི་བོད་རིགས་ལུས་རྩལ་པ་ཐོག་མ་དེར་གྱུར་པ་རེད། དེ་ལས་གཞན། ཁོང་ལ་སྔོན་ཆད་འཛམ་གླིང་ལེགས་སྐྱེས་འགྲན་བསྡུར་གྱི་དངུལ་གྱི་རྟགས་མ་གཅིག་དང་འཛམ་གླིང་ལེགས་སྐྱེས་འགྲན་བསྡུར་གྱི་ཟངས་ཀྱི་རྟགས་མ་གསུམ་ཐོབ་མྱོང་ཡོད། །
ཤམ་བྷ་ལའི་དཔེ་ཀློག་གི་འཛམ་གླིང་དཔེ་ཀློག་ཉིན་མོ་བསུ་བའི་བྱེད་སྒོ་གཟབ་རྒྱས་ངང་འཚོགས།
སྤྱི་ཟླ་4པའི་ཚེས་22ཉིན། ཁམས་པའི་བརྙན་འཕྲིན་ཁང་དང་སི་ཁྲོན་མི་རིགས་དཔེ་སྐྲུན་ཁང་གིས་མཉམ་སྒྲུབ་གནང་བའི་ཤམ་བྷ་ལ་དཔེ་ཀློག་གི་འཛམ་གླིང་དཔེ་ཀློག་ཉིན་མོ་བསུ་བའི་ཐད་གཏོང་བྱེད་སྒོ་ཁྲེང་ཏུའུ་ཡི་སྨིན་དྲུག་ལྷ་མོའི་གསོལ་ཚིགས་ཁང་ནས་བདེ་བླག་ངང་སྤེལ་བ་རེད། བྱེད་སྒོའི་ཁྲོད་སློབ་ཆེན་གྱི་སློབ་མ་དང་། ཕ་མ་བུ་ཁྲིད། དཔེ་སྐྲུན་ལས་སྒྲུབ་པ་སོགས་ཀྱིས་དཔེ་ཀློག་སྐོར་ནས་བགྲོ་གླེང་བྱས་པ་རེད།
རྒྱུས་ལོན་བྱུང་བ་ལྟར་ན། ཁམས་པའི་བརྙན་འཕྲིན་ཁང་གི་ཤམ་བྷ་ལའི་དཔེ་ཀློག་གི་ལེ་ཚན་འགོ་བཙུགས་ནས་ལོ་གསུམ་ཕྱིན་ཡོད་ལ། ལོ་གསུམ་ནང་ཁོ་ཚོས་དུས་བཞིའི་དཔེ་ཀློག་བྱེད་སྒོ་དང་། དཔེ་དེབ་འོས་སྦྱོར། ཆུང་འབྲིང་སློབ་མའི་དཔེ་ཀློག །སྙན་ངག་གྱེར་འདོན། དགོང་འདོན་སོགས་ཆེད་སྒྲིག་ལེ་ཚན་མང་པོ་བཀོད་སྒྲིག་བྱས་ནས། སྤྱི་ཚོགས་ལས་རིགས་ཀུན་གྱི་དོ་ཁུར་ཆེན་པོ་ཐོབ། །
ཀན་ལྷོ་གཡང་ལྡན་ཕྱུག་མོ་རུ“ཀྲུང་གོའི་འགྲོས་ཡག”འཚོལ་བ།
སྤྱི་ཟླ་4པའི་ཚེས་9ཉིན། ཀྲུང་གོའི་འགྲོས་ཡག་སྐབས་བཅུ་གཅིག་པའི་ཀན་ལྷོའི་འགྲན་ཁུལ་གྱི་འགྲན་སྡུར་གཙོས་གྲོང་ཁྱེར་དུ་སྤེལ་ཏེ། ཀན་ལྷོ་ཁུལ་གྱི་ས་གནས་སོ་སོའི་ན་ཆུང་བྱིས་པ་60ལྷག་འགྲན་སྡུར་དུ་ཞུགས།
ཐེངས་འདིའི་འགྲན་སྡུར་ནི་ཁུལ་རིག་གནས་རྒྱང་བསྒྲགས་བརྙན་འཕྲིན་དང་ཡུལ་སྐོར་ཅུས་ཀྱིས་གཙོ་སྒྲུབ་བྱས་ཤིང་། ཁུལ་བོད་ཀྱི་གླུ་བྲོ་ཟློས་གར་གླིང་དང་ཁུལ་རིག་གནས་ཁང་། ཁུལ་རོལ་མོ་དང་ཞབས་བྲོ་བའི་མཐུན་ཚོགས། ཁུལ་ཤམ་བྷ་ལའི་ན་གཞོན་སྒྱུ་རྩལ་ཚོགས་པ་བཅས་ཀྱིས་རོགས་སྒྲུབ་བྱས་པ་ཡིན་ལ། འགྲན་སྡུར་འདི་སྤེལ་བའི་དགོས་པ་ནི། ཀན་ལྷོ་ཁུལ་གྱི་དུས་རབས་གསར་པའི་གྱོན་གོས་རིག་གནས་ཕུན་སུམ་ཚོགས་པ་ཕྱི་རུ་མངོན་པ་དང་། གསར་གཏོད་ཀྱི་ནུས་པ་ལྡན་པའི་སྒྱུ་རྩལ་འཇོན་མི་འདེམས་པ། གཞོན་ནུའི་སྒྱུ་རྩལ་གྱི་རྣམ་པ་སྐྱོན་བྲལ་ངང་འཕེལ་རྒྱས་འགྲོ་བའི་ཐབས་ལམ་འཚོལ་བ། ཁུལ་ན་ཆུང་གཞོན་ནུ་རྣམས་ལ་ནུས་པ་མངོན་པའི་སྟེགས་བུ་བསྐྲུན་པ་བཅས་ཀྱི་ཆེད་དུ་ཡིན།
ཐེངས་འདིའི་འགྲན་སྡུར་དུ་ན་ཆུང་བྱིས་པ་རྣམས་ལོ་ཚོད་ལྟར་ཚོ་ཆུང་མི་འདྲ་བ་གསུམ་དུ་བཀར་བ་དང་། དཔྱད་འདེམས་དགེ་རྒན་རྣམས་ཀྱིས་མི་རིགས་གྱོན་གོས་དང་བརྗིད་ཉམས་མངོན་པའི་གྱོན་གོས། ལུས་ཉམས་དང་བཟོ་ལྟ། གོམ་སྟབས་སྒྱུར་ལུགས་སོགས་ཕྱོགས་དུ་མ་ནས་སྐར་མ་བརྒྱབ་ཏེ། མཐར་འགྲན་ཞུགས་པ་ཡོངས་ལས་བྱིས་པ་30ལྷག་ཀན་ལྷོའི་འགྲན་ཁུལ་ལས་རྣམ་པར་རྒྱལ་ཏེ་ཞིང་ཆེན་གྱི་འགྲན་སྡུར་ལ་ཞུགས་པའི་ཆོག་མཆན་ཐོབ།