སོར་མཛུབ་བར་གྱི་ཞེན་ཆགས།

གཅོད་པ་འཚོ། 1990ལོའི་ཟླ4པའི་ཚེས3ཉིན་ཀན་ལྷོ་ཨ་མཆོག་ཏུ་སྐྱེས། 2012ལོའི་དབྱར་ཁར་ནུབ་བྱང་མི་རིགས་སློབ་ཆེན་དུ་རྒྱུགས་འཕྲོད་པ་ནས2022ལོའི་བར་སློབ་གྲྭ་དེ་ག་ནས་རབ་འབྱམས་པ་དང་འབུམ་རམས་པ་བཅས་བསྟུད་མར་ལོ་བཅུ་ལྷག་ལ་བཏོན། ད་ལྟ་རྔ་བ་དགེ་འོས་སློབ་ཆེན་དུ་དགེ་རྒན་གྱི་ལས་ཀ་གཉེར་གྱིན་ཡོད་ལ། ཞིབ་འཇུག་གི་ཞོར་དུ་རང་གི་དགའ་ཁ་ཁྱེར་ཕྱོགས་ཀྱིས《ཟླ་ཟེར》དང《 བོད་ཀྱི་རྩོམ་རིག་སྒྱུ་རྩལ》 《 གངས་དཀར་རི་བོ》 《 མི་རིགས་རྩོམ་རིག》 《 སྤྲིན་གྱི་མེ་ཏོག》སོགས་གཞུང་སྒེར་གྱི་དུས་དེབ་དང་དྲ་ཚིགས་སོགས་སུ་བརྩམས་ཆོས་མི་ཉུང་བ་ཞིག་སྤེལ་བ་མ་ཟད། 2018ལོར་སྒྲུང་ཐུང་ཕྱོགས་བསྒྲིགས《ལུག་རྫི་བུ་མོ》 ཞེས་པ་སི་ཁྲོན་མི་རིགས་དཔེ་སྐྲུན་ཁང་ནས་དཔར་དུ་བསྐྲུན། སྔ་ཕྱིར་གཙང་བོའི་ཕ་རོལ་སོགས་འགྱུར་རྩོམ་དང་སྒྲུང་གཏམ། དཔྱད་རྩོམ་ཁག་ཅིག་ལ་ཞིང་ཆེན་ཕྱི་ནང་གི་བྱ་དགའ་ཡང་ཐོབ། ཀན་སུའུ་ཞིང་ཆེན་རྩོམ་རིག་དཔྱད་བརྗོད་མཐུན་ཚོགས་ཀྱི་ཚོགས་མི་ཡིན།

ས་རུབ་སྟེ་སྨག་ནག་གེར་ཡོད་ནའང་། སྔས་འགྲམ་གྱི་གློག་སྒྲོན་ལ་རེག་ཙམ་བྱ་རྒྱུའི་སྤོབས་པ་ཡང་མ་བྱུང་། ནམ་རྒྱུན་བདག་གི་སྣང་ངོར་གློག་འོད་ཇེ་གསལ་དུ་སོང་ཚེ་རང་ཉིད་དང་ཉེ་བར་བཅར་མཁན་གྱི་མི་དེ་དག་གི་གདོང་པ་དང་མིག་ཀོང་། འཛུམ་དམུལ་ལེར་ཡོད་པའི་མཆུ་སྒྲོས་སོགས་ནི་མག་མོག་ཏུ་གྱུར་ཅིང་མཐའ་མཇུག་རྒྱུས་མེད་ཅིག་ཏུ་ཆགས་འགྲོ བབ་ཆགས་ཤིང་སྙིང་ལ་བྲིན་པའི་སྐད་ཆའི་ཉམས་དང་། སྦོམ་ཕྲ་དང་དལ་མགྱོགས་རན་པའི་སྐད་ཆའི་འགྲོས། སྙིང་དུ་སྡུག་ཅིང་ལྷོད་ཤ་ཆེ་བའི་སྐད་ཆའི་འབྲུ་རེ་རེས་བདག་གི་གཉོམ་ཤ་དོད་པའི་ནང་སེམས་ཀྱི་ཟབ་སར་ཉེས་ཆད་ཡང་ཡང་བཅད། རྒྱུ་མཚན་དེའི་དབང་གིས་ཞེན་ཆགས་ཀྱིས་བསྐྱེད་པའི་ལག་པའི་སོར་མོ་རྣམས་ལ་མིའི་རིགས་ཀྱི་རེ་བ་སྐོང་བའི་ནུས་པ་ཡོད་ནའང་། མིའི་རིགས་ཀྱི་ཧམ་སེམས་སྐོང་བའི་ནུས་པ་ཡེ་ནས་མི་འདུག འོན་ཏེ། དགོད་བྲོ་ཞིང་བློ་ཡུལ་དུ་ཤོང་དཀའ་བ་ཞིག་ལ་ཁྱོད་ཀྱི་གཟུགས་པོ་དང་ཁྱེད་ཀྱི་མིག་ཟུང་། ཁྱེད་ཀྱི་མཆུ་སྒྲོས་སོགས་ཀྱི་གྲུབ་པའི་ཁྱོད་ནི་བདག་གི་ས་ཡིན་ལ་གནམ་ཡང་ཡིན་པའི་སྣང་བ་ཞིག་འགོག་མེད་དུ་སྐྱེས། ཐ་ན་ཁྱེད་ཀྱི་སྐྲའི་ཉག་མ་རེ་རེ་དང་མིག་མཐར་བབས་པའི་གཉེར་རིས་རེ་རེའང་ཇི་འདྲའི་ཡིད་གར་འོང་ཞིང་སྙིང་དུ་སྡུག་པ་ལ་ཨང་།

“མི་ལ་ལས་བཤད་ན། བརྩེ་དུང་ནི་འཆར་ཡན་གྱི་ཁྲོད་ནས་དབུ་བཙུགས་ཏེ་དངོས་ཡོད་ཀྱི་ཁྲོད་ནས་མཇུག་བསྡུ་དགོས་པ་ཞིག་ཏུ་སྣང་ཞེས་ཟེར་མོད་ཀྱི། བརྩེ་དུང་གི་ཆེད་དུ་ཡོད་ཚད་བློས་གཏོང་མཁན་གྱི་མི་ཞིག་ལ་མཚོན་ན། བརྩེ་དུང་ནི་ཧ་ཅང་རླབས་ཆེ་ལ་ཡང་ཤིན་ཏུ་ཉམ་ཆུང་བའི་རྣམ་ཤེས་གཉིས་ཀྱི་ཕྲད་སྦྱོར་ལས་བྱུང་བའི་ཟློས་གར་རིང་མོ་ཞིག་དང་། གནམ་བསྐོས་ཀྱི་སྲས་པོ་དང་སྲས་མོ་དག་གིས་སྣང་བའི་གར་སྟེགས་སུ་བཞེངས་པའི་ལོ་རྒྱུས་ཀྱི་གླེགས་བམ་འབའ་ཞིག་གོ”ཞེས་པ་པད་སྒྲོན་གྱིས་རང་གི་སྐད་འཕྲིན་གྱི་རྒྱབ་ལོགས་སུ་བྲིས།

“ང་ནི་ཆེས་སྤྱིར་བཏང་གི་མི་ཞིག་ཡིན། རེ་བའི་ས་བོན་ལ་འོད་ཀྱི་མྱུ་གུ་འབུས་མི་སྲིད་པའི་ལས་འབྲས་ལ་སུ་ཞིག་གིས་འགྲེལ་བཤད་རྒྱག་ཐུབ་བམ། བདག་གི་བསམ་ཚུལ་ཞིག་ལ་འཇིག་རྟེན་སྟེང་གི་བྱ་བྱེའུ་འབའ་འབུ་གཤོག་ཐོགས་ཀྱི་རིགས་དང་། ཤྭ་བ་དང་སྟག་གཟིག་རི་དྭགས་གཅན་གཟན་སོགས་ཡོད་ཚད་ལྟོ་རྒྱབ་དང་བརྩེ་དུང་གི་ཆེད་དུ་འཐབ་ཅིང་འཁྲུག དེ་བཞིན་དུ་མིའི་རིགས་ཀྱི་སྣང་བའི་ཁམས་ནས་ཀྱང་བདེ་བ་ཞིག་རྙེད་ཐབས་མི་འདུག་ཨང་། ཏན་ཏན་ང་ནི་མི་ཅོལ་ཆུང་ཞིག་ཡིན། ཕྱིར་ཡོང་མེད་པའི་ལོ་ཟླ་དང་གས་ཆག་ཤོར་བའི་ལོ་མའི་ཕོན་པོ་དག་བསམ་ན་སྟོང་པ་ཁོ་ན་ཉིད་དོ།།”ཞེས་བདེ་ལེགས་ཀྱིས་སྐད་འཕྲིན་གྱི་བར་སྟོངས་སུ་དེ་ལྟར་བྲིས།

    སོར་མཛུབ་དབར་ནས་ཤོར་བའི་ཡིག་འབྲུ་དེ་དག་དང་ཁ་དན་བྱས་པའི་དམ་བཅའི་ཁྲོད་ནས་ངའི་སྐྲ་ལོའི་ཁ་དོག་ཟད་ཅིང་། འཁོར་སྒམ་ཨང་རྟགས་སོ་བརྒྱད་པའི་འདུག་སྟེགསA48དེ་ཡིད་ལ་ཡང་ཡང་འཁོར་བྱུང་། དང་པོ་མ་མཐོང་བའི་དབང་དུ་བྱས་ན། གཉིས་པ་སེམས་གཅོང་དེ་འདྲ་ཡོང་དོན་མི་འདུག་ཨང་། ངས་ཡང་བསྐྱར་འགོ་བརྩམས་ཀྱང་ཆོག པད་སྒྲོན་ལ་ཉེས་པ་ཅི་ཡང་མེད། འདི་ནི་པད་སྒྲོན་གྱིས་ང་ལ་བྱིན་པའི་བརྩེ་དུང་གི་ཕམ་ཁ་ཡིན་ཀྱང་སྲིད། ང་ནི་མི་ཅོལ་ཆུང་ཞིག་ཡིན་ངེས་ཏེ། ལོ་ངོ་གཉིས་ཀྱི་རིང་ལ་ངས་མོའི་སེམས་འགུག་ཐུབ་མ་སོང་། ངས་བསམ་ན་རང་གི་འཚོ་བ་འདིར་དོན་སྙིང་ཅུང་ཙམ་ཡང་མི་གདའ། ང་པད་སྒྲོན་གྱི་མཛའ་བོར་ཡེ་ནས་འཛའ་ཡི་མི་འདུག ཡིན་ན་ཡང་། དང་ཐོག་མོ་ང་ལྟ་བུའི་མི་ཅོལ་ཆུང་ཞིག་ལ་ཅིའི་ཕྱིར་འགྲོགས་པ་ཡིན་ནམ།

“དགོངས་པ་མ་ཚོམ། བདེ་ལེགས། ཕལ་ཆེར་འུ་གཉིས་དང་ཐོག་ངོ་ཤེས་པ་ནས་ནོར་འཁྲུལ་གྱི་འགོ་བརྩམས་ཡོད་པ་འདྲ། རེད་དེ། ངས་ཁྱོད་ལྟ་བུའི་མི་ཡ་རབས་ཤིག་བསྐྱུར་རྒྱུ་ནི་ལས་སླ་མོ་ཞིག་ག་ལ་ཡིན། ཡིན་ན་ཡང་། འུ་གཉིས་ཀྱི་བརྩེ་དུང་བསམ་ན་ང་ངེས་པར་དུ་ཁྱེད་དང་གྱེས་དགོས།”

“པད་སྒྲོན། ངས་ཁྱོད་ལ་ལེ་བདའ་བྱེད་ཀྱིན་མེད། དངོས་གནས་ལེ་བདའ་བྱེད་ཀྱིན་མེད། ག་དུས་ཡིན་ཡང་ངས་ཁྱོད་ལ་ལེ་བདའ་གཏན་ནས་མི་བྱེད།”

《 རྨོ་མོ་ལགས་ཀྱི་སྐར་མ》ཞེས་པའི་བྱིས་སྒྲུང་དེའི་ནང་དུ་བུ་མོ་སྐྱ་རིས་མ་ནམ་གུང་གི་ཆུ་ཚོད་བཅུ་གཉིས་ཀྱི་ཐོག་ཡིན་གཅིག་མིན་གཉིས་ཡུལ་ལ་ལོག་དགོས། དེ་མ་གཏོགས་མི་ཡུལ་གྱི་མི་དཀྱུས་མ་ཞིག་ཏུ་ལོག་འགྲོ་ཞེས་བྲིས་འདུག ཡིན་ན་ཡང་། དངོས་ཡོད་འཚོ་བ་དང་བྱིས་སྒྲུང་གཉིས་ཁ་ཁ་རེད། ངའི་གཏམ་རྒྱུད་ནི་ཨ་མའི་ཁྲག་གི་ཁྲོད་ནས་བཞུར་ཡོང་བའི་ནད་དེ་ནས་འགོ་བརྩམས་དགོས། ལོ་སུམ་ཅུ་ཡི་གཞུག་ནས་རྨི་ལམ་དང་འགྲོགས་ཏེ་འཇིག་རྟེན་གཞན་ཞིག་ལ་འགྲོ་དགོས། རྨོ་ལགས་འདས་པའི་ལོ་དེར་ཨ་མའི་སེམས་ལ་རང་ཉིད་ལོ་སུམ་ཅུ་ཡི་བགེགས་དེ་ནས་མཐར་ཐུབ་ན་ཐང་འདོད་ཡོད། མ་བསམ་ས་ནས་མོ་ལོ་ཉེར་དགུར་བུད་པའི་ལོ་དེར་ངའི་མིག་མདུན་ནས་བལྟས་བལྟས་རིག་རིག་ལ་འདས་སོང་། དེ་ནི་ང་འགྲོ་སའི་ལམ་བུ་ཞིག་ཀྱང་ཡིན། སྔ་མོ་ནས་གཏན་འཁེལ་བྱས་ཟིན་པའི་ལམ་ཞིག་རེད། རྒྱུ་མཚན་དེའི་དབང་གིས་བདེ་ལེགས་ངའི་ཆེད་དུ་སྡུག་ལ་སྦྱོར་མི་རུང་། ལྷག་པར་ང་འཇིག་རྟེན་གཞན་ཞིག་ཏུ་འགྲོ་བཞིན་པ་མཐོང་དུ་འཇུག་མི་ཉན། ཁོས་སྡུག་མ་འཁྱོགས་པར་ངའི་རྗེས་སུ་འབྲང་ཚེ་ཅི་བྱ། དེ་གཏན་ནས་བྱ་མི་ཉན།

ཟླ་དྲུག་པའི་ཚེས་བཅུ་ལ། ཉི་གཞོན་གྱི་འོད་ཟེར་གང་སར་འཕྲོས་འདུག སྤྱིར་བཏང་རེ་བ་ཡིས་ཁེངས་ཡོད་པའི་མཐར་ཕྱིན་གྱི་ཉིན་མོ་ཞིག་ཡིན་ཆོག་མོད། བདེ་ལེགས་ལ་མཚོན་ན་ཆེས་བཟོད་ཐབས་མེད་པའི་ཉིན་མོ་ཞིག་ཏུ་གྱུར། སློབ་གྲྭའི་སྐྱེད་ཚལ་གྱི་མེ་ཏོག་སྣ་ཚོགས་ཀྱིས་ཚ་བ་མ་བཟོད་པར་མགོ་བོ་དུད་དེ་ཚ་གདུག་གི་ཀློང་ན་ཁ་ཁུ་སིམ་མེར་མཆིས། ཕར་འགྲོ་ཚུར་འོང་གི་མི་ཚོགས་ཀྱི་འདུ་འཛི་དང་། གདོང་མདོག་མི་གཅིག་པའི་མི་རིགས་སྣ་ཚོགས་ཀྱི་གོམ་འགྲོས། ཉི་ཐིག་གིས་གཙེས་པའི་ལམ་འགྲམ་གྱི་ཤིང་ལོ། སློབ་གྲྭའི་ཁོར་ཡུག་ལ་གར་བརྡར་བྱེད་མཁན་གྱི་ཨ་ཡེ་ཚོའི་ལབ་གླེང་། བར་མེད་དུ་གྲགས་པའི་སློབ་རའི་རྒྱང་སྒྲོག་གི་སྒྲ་དབྱངས། གཟའ་མཇུག་གི་དུས་སུ་སློབ་གྲྭའི་ཁོར་ཡུག་ནི་འདུ་ལོང་འཁྲུག་པའི་ཁྲོམ་སྲང་ཞིག་དང་གཉིས་སུ་མ་མཆིས། བདེ་ལེགས་ལམ་འགྲམ་ཞིག་ཏུ་བསྡད་དེ་མིག་ཆུ་ཏོག་ཙམ་བཏང་བྱུང་། གློ་བུར་ཁོའི་མགོ་ཐོག་ནས་མེ་ཏོག་གི་འདབ་མ་གཅིག་ཆུ་ལ་ལྷུང་། ཕྱེ་ལེབ་སྒེག་མོ་ཞིག་འཕུར་ནས་གནམ་ལ་ཐོགས། སྐབས་དེ་ཁོས་ཁ་རོག་ཁ་རོག་གེར་མིག་ཆུ་ཕྱིས་ཏེ་སྐད་འཕྲིན་གྱི་ཁ་ཕྱེས་པ་ན།

“ཏུའུ། ཏུའུ།” སྐད་འཕྲིན་གྱི་བརྡ་ཞིག་སླེབས་བྱུང་།

“བདེ་ལེགས། ཁྱོད་ངོ་མ་རི་བོ་ནང་བཞིན་བརྟན་ཅིང་བརླིང་བས་ངས་ཁྱེད་ལ་གངས་རི་ཞེས་སྐད་འཕྲིན་གྱི་མིང་བྱང་འདི་བཏགས་པ་ཡིན། བདེ་ལེགས། ངས་རྒྱུས་ཡོད་ཀྱི་གྲོང་ཁྱེར་འདི་ནས་རྒྱུས་མེད་ཀྱི་ངོ་གདོང་ཞིག་འཚོལ་དགོས་སམ།”

“པད་སྒྲོན། ཁྱོད་ནི་ངོ་མ་ཆུ་མོ་ནང་བཞིན་ཞི་ཞིང་འཇམ་པས་གངས་ཆབ་ཅེས་པའི་སྐད་འཕྲིན་གྱི་མིང་བྱང་དེ་སྦྱར་ཡོད། ངས་ལམ་འགྲམ་ན་ཁྱོད་ཀློག་རྒྱུར་དགའ་བའི《འཆི་བ》ཞེས་པའི་སྒྲུང་གཏམ་དེ་ཀློག་བཞིན་ཡོད།”

 ས་རུབ་མ་ཐག ཞག་སྡོད་ཐོག་ཁང་གི་གློག་སྒྲོན་རེ་རེ་གསལ་ཆ་ལེར་བཀར་བྱུང་ལ། དེ་དང་བསྟུན་ནས་ནད་ཁང་གི་དྲོད་ཚད་ཀྱང་རིམ་གྱིས་མཐོ་རུ་འཕགས་ཏེ་ནད་པ་རྣམས་ཀྱི་གདོང་ཧྲིལ་བོར་རྔུལ་ཆུས་ཁེངས་ཤིང་། དཀར་སེར་སྐྱ་འཐབ་ཀྱི་གདོང་པ་རེ་རེའི་ངོས་སུ་ཀོང་ཚུགས་སུ་ལྷུང་བའི་མིག་ཟུང་གིས་གནམ་གཅལ་དུ་དཔྱངས་པའི་སྨན་ཁབ་རེ་རེར་ཨུ་ཚུགས་ཀྱིས་ཅེར།

“ཐིག ཐིག ཐིག”ཅེས་འགྲོས་དལ་བའི་སྨན་ཐིགས་རེ་རེ་ག་ལེར་ཁོང་ཅག་གི་རྩ་ལམ་བརྒྱུད་དེ་རུས་རྐང་དུ་འཐིམས་དུས། ནད་པ་ལ་ལ་ནི་གཞི་ནས་རྨི་ལམ་ལ་ཕྱོགས་ཤིང་། ཡང་ནད་པ་ལ་ལ་ནི་དུས་གཏན་དུ་འཆི་བ་ལ་སྒུག་ཡོད།

ཧྲང་ཧེ་གྲོང་ཁྱེར་གྱི་གུ་དོག་པའི་སྲང་ལམ་དེ་དག་ནི་ནམ་རྒྱུན་དང་འདྲ་བར་འུར་ཟིང་གིས་ཁེངས་ཤིང་། ཚ་ཚོད་དང་ཤ་རིགས་སྣ་ཚོགས་བསྲེགས་པའི་བསུར་དྲིས་སྲང་ལམ་གྱི་ཁོར་ཡུག་ཀུན་ཏུ་རུས་ལ་རྐང་ཐིམ་པ་བཞིན་ཁྱབ་ཡོད། གྲོག་ཚང་བརྡོལ་བ་ལྟ་བུའི་ཕར་འགྲོ་ཚུར་འོང་གི་ལམ་འགྲོ་བ་རྣམས་ཐང་བཤམས་ཚོང་རའི་ཕྱོགས་སུ་ཆས་ཀྱིན་གདའ། ཐང་བཤམས་ཚོང་རའི་ཚོང་བ་མང་ཆེ་ཤོས་ནི་ནུ་ཟུང་རབ་ཏུ་རྒྱས་ཤིང་གདོང་ལ་སྐག་ཚོས་སྣ་ལྔ་བྱུགས་པའི་གཞོན་ནུ་མས་གྲུབ་ཅིང་། ཁོ་མོ་ཚོའི་མཆུ་སྒྲོས་དང་སོར་མོ། སྐྲ་ལོ་དང་སྨིན་མ་ཡོད་ཚད་ཚོས་གཞི་སྣ་ཚོགས་ཀྱིས་སྤྲས་ཏེ་རང་གཟུགས་མི་མཐོང་བར་བྱས་འདུག ཡང་ཁ་ཤས་ནི་ལུས་ཀྱི་གོན་པའི་སྤུས་ངན་ལ་ལག་ཟུང་སྐྱི་མོས་བཏུམས་པ། ངོ་གདོང་ཧྲིལ་བོར་སྐྱོ་ཉམས་དང་གཉེར་མས་ཁེངས་པ་མ་ཟད། སྒལ་བ་དང་པུས་མོའི་རྣམ་པ་འཆོལ་བའི་རྒས་ཁོག་ཁ་ཅིག་རེད། དེའི་ཁྲོད་དུ་རྐང་བའི་སྟེང་དུ་རྐང་བ་བརྩེགས་ཏེ་ཐ་མག་རྔམ་འཐེན་བྱེད་བཞིན་པའི་སྐྱེས་པ་རྣམས་ནི་གཞོན་ནུ་མ་ཚོའི་རྐུབ་ཚོས་དང་མྱོས་བུམ་ལ་ཧད་དེ་སྣབས་ཁ་ནང་དུ་དྲུད་པའང་ཚོར་གྱིན་མེད་ན་ཡང་། ཁའི་ནང་ལ་ཐུག་པའི་སྣབས་འོག་གི་སོ་སྒོ་སེར་པོ་གཉིས་བར་མེད་དུ་འགུལ་ཙམ་འགུལ་ཙམ་བྱེད།

འགྲོས་དལ་བའི་ཉི་དགའ་མེ་ཏོག་སྔ་མོ་ནས་ཡོམ་ཡོམ་དུ་སྐྱོམས་པའི་མི་ཚོགས་དང་རིང་དུ་གྱེས་ཏེ་ག་ལེར་རེ་བའི་སྤྱི་གླིང་གི་ཕྱོགས་སུ་ཆས། ཁོས་ཁ་རས་བརྒྱབ་ཡོད་ལ་མིག་མཐའ་བརླན་གྱིས་ཟིན་ཏེ་ཅུང་དམར་ཤ་དོད་ཡོད་པ་མ་ཟད། ཟུར་མིག་རེ་རེའི་ནང་དུ་ཨུ་ཚུགས་ཀྱིས་བསྲན་པའི་ཟུག་གཟེར་གྱི་འཁུན་སྒྲ་རེ་རེ་སྐུང་པ་འདྲ་སྟེ། གོམ་པ་གང་རེ་གང་རེ་བྱས་ཏེ་མདུན་དུ་བསྐྱོད་ཅིང་། རྒྱབ་ཕྱོགས་ནས་བལྟས་ན་ལྭ་བ་གྱོན་པའི་སྨྱུག་ཐུར་ཞིག་དང་ཡང་མདུན་ཕྱོགས་ནས་བལྟས་ཚེ་དུད་ཁྲོད་ཀྱི་ཀེང་རུས་ཤིག་དང་གཉིས་སུ་མ་མཆིས་པས། སྲང་ལམ་གྱི་མི་རྣམས་ནི་དེ་མ་ཐག་ཁོ་དང་རིང་དུ་གྱེས་འགྲོ།

སྤྱི་གླིང་དུ་སླེབས་མ་ཐག དུས་ཆད་བྱས་པའི་མི་ལ་ཐག་རིང་ནས་ལག་བརྡ་ཞིག་བསྟན་ཏེ་ཕན་ཚུན་ངོ་ཤེས་བྱས། ཁོང་གཉིས་ཀྱིས་རང་རང་སོ་སོས་ཁ་རས་བརྒྱབ་འདུག་ལ། ཁ་རས་འོག་གི་མཆུ་སྒྲོས་ནི་འགུལ་ཙམ་འགུལ་ཙམ་བྱེད་པ་ལས་སྐད་ཆ་ཚིག་གཅིག་ཀྱང་མི་བཤད། དེ་ལྟར་ཡུན་རིང་ལ་ཕན་ཚུན་གྱི་གདོང་པར་བལྟས་ནས་ལུས། ཕྱིས་སུ་ཉི་དགའ་མེ་ཏོག་གྱ་གྱུའི་སྲང་ལམ་དག་བརྒྱུད་ནས་ཕྱིར་སྨན་ཁང་དུ་ལོག་སོང་། དེ་ནས་བཟུང་། ཁོས་བརྩེ་དུང་ཡིད་གར་འོང་བ་ཞིག་ལ་རྒྱུ་བྱས་ཏེ་འགན་ཁུར་ཡིད་སྐྱོ་བ་ཞིག་ཕྲག་ཏུ་ལེན་འགོ་ཚུགས།

ལོ་དེའི་ས་སྲོད་ཅིག་ལ། པད་སྒྲོན་གྱི་ལུས་པོ་ཉོབ་ཅིང་དུབ་ལ་ཁ་ལག་ཡང་ཟ་མི་ཐུབ་པ་བྱུང་། ཐ་ན་གོམ་པ་སྤོ་དུས་མགོ་ཡུ་འཁོར་བྱུང་བས་ཧྲང་ཧེ་ནོར་སྲིད་སློབ་གླིང་གི་ཡན་ལག་སྨན་ཁང་དུ་བརྟག་དཔྱད་བྱས། མ་བསམ་ས་ནས་ཁོ་མོར་གཅིན་པ་དུག་འགྱུར་གྱི་དུས་ཕྱི་མའི་ནད་རྟགས་ངོས་འཛིན་བྱས། “ཁྱེད་ཀྱིས་འབྲས་སྐྲན་ཚོགས་པའི་ཁྲོད་ནས་སྐྱེས་པ་ནད་རོགས་ཤིག་བཙལ་རྗེས། ཆང་ས་བརྒྱབ་སྟེ་ཁོང་ཚེ་ལས་འདས་ཚེ། ཁོའི་ཆུང་མའི་ཐོབ་ཐང་གཡར་ནས་མཁལ་མ་བརྗེ་སྤོར་བྱས་ཆོག་ལ། དེ་ནི་ནད་པའི་མཁལ་མ་ལ་ནད་རྟགས་མེད་པ་དང་ཁྲག་རིགས་མཐུན་སྡེབ་བྱུང་ཚེ། སྤྱིར་བཏང་མཁལ་མ་བརྗེ་སྤོར་གྱི་ཆ་རྐྱེན་འཛོམ་གྱི་རེད”ཅེས་བཤད། ཟ་མ་སྐྱེལ་མཁན་གྱི་ཁ་ལོ་བ་ཞིག་གིས་པད་སྒྲོན་འགྲོས་གཞི་དེ་འདྲ་ཞིག་བཏོན། ཕྱིས་སུ་པད་སྒྲོན་བློ་ཐག་རྦད་ཆོད་ཀྱིས“གསོན་ཐུབ་ན་ཅི་མ་རུང་ཨང”ཞེས་པའི་འབྲས་སྐྲན་ནད་པའིQQཚོགས་པ་དེར་ཞུགས་ཤིང་ཐིག་ཕྲེང་བདུན་ཅན་གྱི་གཉེན་སྒྲིག་གི་འཚོལ་ཡིག་ཅིག་ཀྱང་བཀྲམས། འཚོལ་ཡིག་དེའི་ནང་དུ་མོས་ཐེ་ཚོམ་དང་བདེན་དྲང་གིས་བྲིས་དོན།“ཆང་ས་བརྒྱབ་རྗེས། ངས་ཟླ་བོར་བདག་སྐྱོང་ལེགས་པོ་བྱ་ངེས་ཡིན། གསོན་པའི་ཆེད་དུ་ངའི་ཅོལ་ཆུང་དང་མི་ལེགས་པའི་བྱ་སྤྱོད་ལ་གཟོད་གསོལ་གནང་རོགས།” ཡིག་ཆུང་གྱ་མ་གྱུ་འགའི་རྗེས་སུ་སྙིང་དམར་ཡིད་གར་འོང་བ་འགའ་བསྟར་ཕྲེང་བྱས་ཏེ་བསྐུར། དུས་ཚོད་སྐད་ཅིག་མའི་རིང་ལ། རྡེབ་གྲངས་དུང་ཕྱུར་ལྷག་ལས་བརྒལ་ཅིང་། བརྒྱུད་བསྐུར་དང་སྙིང་དམར་བར་མེད་དུ་གནོན་མཁན་གྱི་ནད་པའི་ཚོགས་ཀྱི་གླེང་གཞི་ཚ་ཤོས་ཤིག་ཏུ་ཆགས། འཆི་བའི་གཡང་གཟར་ཁྲོད་དུ་ཡོད་ཚད་ཐེ་ཚོམ་གྱི་གནས་སུ་ལུས་པའི་ནད་པ་རྣམས་ཀྱིས་མོ་ལ་ལེ་བདའ་དང་འཁང་ར་ཅི་ཡང་མེད་པར་ཤུགས་རིང་ནར་ནར་དུ་འབྱིན།

ཉིན་གསུམ་པའི་དགོང་མོར། དྲ་མིང་ལ“ཡིད་གར་འོང་བའི་ཉི་དགའ་མེ་ཏོག”ཅེས་པའི་ཚོགས་མི་ཞིག་གིས་འདྲི་རྒྱུར། “ཁྱེད་ཀྱིས་གང་འདོད་དུ་སྐུར་བ་ཡིན་ནམ།” མོས་རང་ཉིད་ཀྱི་ནད་ཐོ་དང་ཐོབ་ཐང་དཔང་ཡིག་གི་པར་བསྐུར་ཏེ་དོན་དངོས་དེ་ར་སྤྲོད་བྱས།

“ང་གཉེན་སྒྲིག་བྱ་རྒྱུར་མོས་མཐུན་ཡོད།”

“ངའི་མིང་ལ་པཱ་གོར་ཟེར།”

“ངའི་མིང་ཆ་ཚང་ལ”གློ་ལུ་ཞིག་བརྒྱབ་རྗེས”

“ཨིན། ཕ་ཡུལ་ནེ་པ་ལ་ནས་ཡིན། ”

“ལོ་ན་ཉེར་བརྒྱད་ལ་སོན་ཡོད།”

“ཧུ། ནད་རྟགས་རུས་པ་སྙི་གཟུགས་ཀྱི་འབྲས་སྐྲན་རེད།”

“ཁྲག་རིགསBཅན་ཡིན།”

XXXXལོར་རུས་པ་བརྗེ་སྤོར་གྱི་གཤགས་བཅོས་ཐེངས་གསུམ་པ་བྱས་ཏེ་ད་ལྟ་སླར་ཡང་ཇེ་སྡུག་ཏུ་སོང་བས། རང་ངོས་ནས་རེ་བའི་རྨི་ལམ་དེ་ཡོངས་སུ་མཇུག་རྫོགས་པ་ཡིན། མཁལ་མ་བརྗེ་སྤོར་དང་རུས་པ་བརྗེ་སྤོར་གཉིས་གཏན་ནས་མི་འདྲ་སྟེ། མཁལ་མ་བརྗེ་སྤོར་ནི་ཁྲག་རིགས་མཐུན་པས་ཆོག འོན་ཀྱང་རུས་པ་བརྗེ་སྤོར་ནི་དེ་ལས་ལྡོག་སྟེ། རླངས་འཁོར་གྱི་ལྷུ་ལག་རེ་རེ་བརྗེ་སྐབས་ཀྱི་བརྒྱུད་རིམ་རྙོག་འཛིང་ཅན་དེ་དང་གཅིག་པ་རང་རེད།

“ཨིན། ང་ཡང་ཁྲག་རིགས་Bརིགས་ཅན་ཡིན།”

“ལོ་ན་ཉེར་ལྔ་ལ་སོན་ཡོད།”

“ཕ་ཡུལ་བོད་ལྗོངས་ལྷ་ས་ནས་ཡིན།”

“འཆི་བ་ལ་རེམ་པའི་ངའི་ཚེ་སྲོག་གིས་ང་ལ་ཀུ་རེ་ཡང་ཡང་རྩེ་བས་ད་ལྟ་སྨན་ཁང་དུ་ཉལ་ཡོད”ཅེས་རང་ཕབ་བརྙན་ཐུང་ཞིག་དང་ལྷན་དུ་བསྐུར། བརྙན་ཐུང་དུ་པད་སྒྲོན་བརྗེ་སྤོར་འཕྲུལ་ཆས་ཀྱི་གམ་དུ་ཉལ་ཡོད་ཅིང་། ཁབ་རྒྱུའི་ཁྲོད་དུ་དམར་ལམ་མེར་ཡོད་པའི་ཁྲག་ཁབ་དེ་མཐོང་ཡོང་ལ། མོའི་ངོ་མདོག་སྐྱ་བོར་གྱུར་ཅིང་ལུས་པོ་འདར་ལྕུག་ལྕུག་བྱེད། “མཐོང་སོང་ངམ། ཡུད་ཙམ་གྱི་རྗེས་སུ། སྲས་མོ་སྨན་ཁང་ནས་བུད་ཆོག་གི་རེད།”

  ལོ་དེའི་ཟླ6པའི་ཟླ་སྨད་ཅིག་ལ། པད་སྒྲོན་གནས་སྐབས་སུ་སྨན་ཁང་ནས་ཕྱིར་བུད། ཉི་འོད་ཀྱི་འོད་ཟེར་གང་སར་འཕྲོས་འདུག་ལ། རང་སེམས་ཀྱི་དད་འདུན་དང་ཡུན་ཐུང་གི་ཁ་བརྡའི་ཁྲོད་ནས་པད་སྒྲོན་གྱིས་པཱ་གོར་གྱི་ཐོབ་ཐང་ངེས་གཏན་བྱས་པ་མ་ཟད། ཁོ་གཉིས་རང་དབང་སྤྱི་གླིང་ནས་དུས་བཅད་བྱ་རྒྱུའི་ཁ་དན་བྱས། དང་ཐོག་འཕྲད་དུས་སོ་སོས་ཁ་རས་བརྒྱབ་འདུག་ཅིང་། ལག་ཤུབ་དང་སྨན་ལྭ་ཡང་གྱོན་འདུག་པས་རྔུལ་ཆུའི་ཐིགས་པ་རེ་རེ་དཔྲལ་གཞོངས་ནས་མགྲིན་པའི་སྟེང་དུ་རེས་མོས་སྒོས་ལྷུང་། ཐག་རིང་ཐག་རིང་ནས་ཕན་ཚུན་ལ་ཅིག་བལྟས་རྗེས། ངོ་ཤེས་སོང་། “ཡོད་ཚད་བདེ་བར་སྨོན”ཞེས་རང་རང་སར་ཆས་གྲབས་བྱེད་དུས། པཱ་གོར་གྱིས། “ཤོག ང་ལ་ཅིག་ལྟོས་དང་། ཁྱེད་ལ་གསོན་པོའི་རེ་བ་ཡོད་རེད”ཅེས་མོ་ལ་ཀུ་རེ་རྩེད་མཚར་བྱེད།

པཱ་གོར་གྱིས་ཤེལ་མིག་ཕུད་པ་ན། ཁོའི་མིག་མདངས་ཤིན་ཏུ་ཉམ་ཐག་ལ། ཆ་མི་སྙོམས་པའི་མིག་ཟུང་གིས་པད་སྒྲོན་ལ་ཡ་ང་བའི་ཚོར་སྣང་ཞིག་ཡང་ཡང་སྟེར། པད་སྒྲོན་ཧ་སངས་ཏེ“དེ་འགྲིག་གི་མ་རེད། ཁྱེད་སྒེར་སེམས་ཆེ་བ་ལ་ཨང་། རང་ཉིད་ཀྱི་ཟུག་གཟེར་ཙམ་ལ་རྐྱེན་བྱས་ཏེ་ཚེ་སྲོག་གི་རྒྱུན་མ་བསྲིང་ཚེ། ཁྱོད་དང་གྲིབ་མ་བཞིན་འགྲོགས་པའི་ཕྲ་ཕུང་གི་ཚོགས་ནི་ཇི་ལྟར་འཚོ་ཨང་།” པུ་རེ་ཡ་ཧཱས་ཉམ་ཆུང་སྒོས“སྲིན་འབུའི་རིགས་ལ་ངས་སྔ་མོ་ནས་ཀུ་ཡངས་གནང་རོགས་ཞེས་ཞུས་ཡོད། ཡང་ཅིག་བཤད་ན། ཁྱེད་ཀྱིས་ངའི་མཁལ་མ་ལ་སྒུག་ཡོད་པ་མིན་ནམ།”

སྐད་ཆ་དེ་ཐོས་མ་ཐག་པད་སྒྲོན་ཡང་ཧད་དེ་ལུས། ཡང་པཱ་གོར་གྱིས“ང་ལ་རེ་བ་ཉག་གཅིག་ཡོད་པ་ནི། ཁྱེད་ཀྱིས་རང་གིས་རང་ལ་བདག་སྐྱོང་བྱས་ཏེ་ངའི་མཁལ་མ་རག་རྗེས། ངའི་ཚབ་ཏུ་པཱ་ལགས་ལ་བདག་སྐྱོང་གནང་བས་ཆོག རེ་བ་འདིས་མི་རེ་རེ་ལ་ཞེ་མི་སྐྱིད་པའི་ཚོར་བ་རེ་སྟེར་སྲིད། ཡིན་ཡང་ང་ཚོས་ཅིས་ཀྱང་དང་ལེན་བྱ་དགོས། དཀྱེལ་ཡངས་གནང་རོགས”ཞེས་བཤད། པད་སྒྲོན་གྱིས་དེ་མ་ཐག་ཏུ་མགོ་བོ་ནང་དུ་བཀུག་ཙམ་བྱས་ཏེ་ཁས་ལེན་བྱས། པཱ་གོར་གྱིས་ཞིབ་ཏུ་བསམ་བློ་ཞིག་བཏང་སྟེ། འཆི་བ་ཡི་གམ་དུ་ཚེ་སྲོག་རེ་རེ་འདྲ་མཉམ་ཡིན་མདོག་བྱས་མོད། མཐའ་མཇུག་གྲངས་ཀ་དང་བོངས་ཚད་ཀྱི་དབང་གིས་འདྲ་མཉམ་ཞིག་ཡོང་ཐབས་རང་མི་འདུག་ཨང་། ཅིག་བྱས་ན་འབུ་སྲིན་དེ་དག་གིས་ཀྱང་ང་ལ་སྔ་མོ་ནས་དཀྱེལ་ཡངས་དང་བཟོད་གསོལ་གནང་ཡོད་ཤས་ཆེ། ཁྱེད་ཀྱིས་བསམ་ན་དེ་འདྲ་རེད་དམ་ཞེས་ཀུ་རེ་རྩེ་བཞིན་ཕྱིར་སྨན་ཁང་དུ་ཆས།

པད་སྒྲོན་གྱི་སེམས་སུ་པཱ་གོར་གྱིས་བསམ་གཟས་ནས་འཆི་བའི་ཚད་ཇེ་མགྱོགས་སུ་བཏང་བ་རེད་སྙམ། “གླེན་པ་འདི། སྨྱོན་པ་འདི།” པད་སྒྲོན་དེ་མ་ཐག་ཏུ་སྨན་ཁང་དུ་བསྐྱོད་ཅིང་། ལམ་བར་ནས་ཁོ་མོ་ངུ་ཞོར་དུ་པཱ་གོར་ལ་ལེ་བདའ་ཡང་ཡང་བྱས། གལ་ཏེ་པཱ་གོར་གྱི་ལག་པར་འཇུས་ཏེ་མཐའ་ཡས་པའི་སྤང་ཐང་དང་ཉི་མར་ཆེས་ཉེ་བའི་མཐོ་སྒང་དུ་ལོག་ཐུབ་པར་སྨོན་ལམ་བརྒྱབ། པད་སྒྲོན་སྨན་ཁང་དུ་སླེབས་པ་ན། པཱ་གོར་གྱིས་སྨན་ཁང་ནས་འབུད་རྒྱུའི་འགྲོ་ལུགས་བསྒྲུབས་ཏེ་ལམ་ལ་ཆས་ཀྱིན་འདུག ཁོས་པད་སྒྲོན་མཐོང་མ་ཐག་ཉམ་ཐག་པའི་ལག་པས་གདོང་གི་རྔུལ་ཆུ་འབྱིད་བཞིན“དཀྱེལ་ཡངས་གནང་རོགས། ང་ཀ་ཏི་མན་ཏུར་ཆས་འགྲོ། ངའི་པཱ་ལགས་ཀྱིས་ང་ལ་སྒུག་ཡོད། ཡིན་ཡང་ངའི་མཁལ་མ་དེ་ནམ་ཡང་ཁྱེད་ལ་དབང་། ངས་དངོས་གནས་ཁྱེད་ཀྱི་ཆེད་དུ་སྨན་བཅོས་བྱེད་མཚམས་བཞག་པ་མིན། དུས་རྒྱུན་ང་བཤགས་བཅོས་ཁང་ནས་ཐོན་དུས་ངའི་ལུས་ཀྱི་བ་སྤུ་སོ་སོའི་མགོ་རྟིང་སློག་ཅིང་། རུས་པ་དང་སྐྱི་པགས་ཀྱི་རང་གཟུགས་ཉམས་སྟེ་ལུས་ཀྱི་ཟུང་ཞན། དབང་པོ་དང་ཡན་ལག་རེ་རེ་རང་བཞིན་དུ་མི་གནས་པའི་ཁར་ལུས་སྟེང་གི་ཕྲ་ཕུང་མཐའ་དག་ཀྱང་འཁྲུག་ཆ་ལངས། ཐ་ན་སྐྲ་ལོ་དང་སྨིན་མ། ཨག་ཚོམ་སོགས་ཀྱང་བར་མེད་དུ་ལྷུང་སྟེ་རླུང་གིས་ཁུར་འགྲོ། སྐབས་དེར་ངས་འཆི་བ་ཁོ་ནར་སྒུག་པ་ཡིན། ནམ་ཞིག་གི་ཚེ། ངའི་རྣམ་ཤེས་ལ་རང་དབང་ཐོབ་སྟེ་ཟུག་གཟེར་ལས་ཡོངས་སུ་བྲལ་ཚེ་འུ་གཉིས་ཀྱིས་ཆང་ས་བརྒྱབ་ཆོག་མོད། དེ་དུས་ཅིག་བྱས་ན་ཁྱེད་ནི་ཁྱེའུ་ཆུང་སོ་དཀར་ཞིག་དང་ང་ནི་བགྲེས་སོང་མགོ་དཀར་ཞིག་ཡིན་ཀྱང་སྲིད། ཡིན་ཡང་ངས་ཁྱེད་ལ་བསྐལ་བའི་བར་དུ་སྒུག་ཆོག དེ་དུས་ང་ནི་རང་དབང་གི་ཁྲུང་ཁྲུང་ཞིག་དང་ཁྱོད་ནི་འབྱམས་ཀླས་ཀྱི་ཨ་སྔོན་དེ་ཡིན་ཀྱང་སྲིད། ཡིན་ཡང་ངས་ཁྱེད་ལ་སྐོར་བ་ལན་མང་བརྒྱབ་ཆོག དེ་དུས་ཅིག་བྱས་ན་ང་ནི་མི་འདོད་ནད་ལས་ཐར་བའི་གཞོན་ནུ་སྟོབས་པོ་ཆེ་ཞིག་དང་ཁྱོད་ནི་ལུས་མཛེས་ཡིད་འོང་མ་ཞིག་ཡིན་ཀྱང་སྲིད། ཡིན་ཡང་ངས་ཁྱེད་ལ་སེམས་ཀྱི་འཕྲིན་པ་བཏང་ཆོག”

   ཧྲང་ཧེ་ནས་ཀ་ཏི་མན་ཏུར་བསྐྱོད་པའི་གྲུ་ཆེས་རྗེས་མ་དེ་ནམ་གུང་གི་ཆུ་ཚོད་གསུམ་པའི་སྟེང་རེད། དེར་བརྟེན་པད་སྒྲོན་དང་པཱ་གོར་གཉིས་ས་འོག་ལྕགས་ལམ་དང་བར་ཐག་ཤིན་ཏུ་ཉེ་ས་ཞིག་ཏུ་གནས་སྡོད་མི་བྱེད་ཀ་མེད་བྱུང་། སྐབས་དེར་པཱ་གོར་གྱིས་དབུགས་ཀྱི་རྒྱུ་བ་འཇམ་དུ་ཕྱིན་ཅིང་དབང་རྩ་ཐམས་ཅད་ལྷོད་པོར་གནས། ལུས་པོའི་དྲོད་ཚད་ཀྱང་རིམ་མར་ཆགས་ནས་ཅུང་བདེ་སྣང་ཞིག་ཤར་མོད། ས་འོག་ལྕགས་ལམ་སྟེང་གི་འཁོར་བགྲོད་ཀྱི་སྒྲ་ཡིས་ཁོ་གཉིད་ལས་ཡང་ཡང་སད་པར་བྱས། མཚན་གུང་གི་ཆུ་ཚོད་གཉིས་པ་མ་སླེབས་གོང་། ཁང་ཆུང་གི་སྒོ་རུ་མི་ཞིག་འགྲེང་འདུག མི་དེས་ཀྱང་པད་སྒྲོན་དང་པཱ་གོར་ཇི་བཞིན་ཁ་རས་བརྒྱབ་ཅིང་ལག་ཤུབ་གྱོན་པའི་ཁར། གདོང་ལ་མདོག་ཤེལ་ནག་ཅིག་གོན་འདུག་པས་དཔྲལ་གཞོངས་ཀྱི་སྨེ་བའི་སྟེང་གི་སྤུ་ཚོམས་མ་གཏོགས་གང་ཡང་མི་མཐོང་། གཟུགས་པོ་ཕྲ་ཞིང་མགྲིན་པ་ཤིན་ཏུ་རིང་། ལག་པ་ཡ་གཅིག་ཕྱུ་བའི་ཕུ་ཐུང་དུ་བཅུག་ཡོད་ལ། ཡང་ཅིག་ཤོས་ཀྱིས་ཁུག་མ་ཆེན་པོ་ཞིག་བཟུང་འདུག རྐང་པ་གཉིས་སྣོལ་མའི་ཚུལ་གྱིས་ཡོད་ན་ཡང་གོ་ལྷམ་རྟིང་མཐོ་དེའི་དབང་གིས་སྐད་ཅིག་མའི་རྗེས་སུ་རང་སོར་བཞག་འགྲོ མཚམས་མཚམས་སུ་གོ་ལྷམ་གྱི་ཕྱི་རྟིང་དང་རྡོ་གཅལ་གྱི་འཕྲད་སྦྱོར་ལས་རྐག་སྒྲ་ཞིག་བར་མེད་དུ་གྲག་ཡོང་། རྐག་སྒྲ་དེ་ནི་ཕྱིས་སུ་ས་འོག་ལྕགས་ལམ་གྱི་འཕྲུལ་འཁོར་སྣ་ཚོགས་ཀྱི་དུང་སྒྲས་མནན་ཏེ་ཡོངས་སུ་ཐོས་མི་ཐུབ་པར་གྱུར།

དེ་ནས་ཅང་མ་འགོར། མི་དེས་ནུས་ཤུགས་ཅི་ཡོད་ཀྱིས་དྲ་མའི་ནང་དུ་ལག་པ་བསྲིངས་ཤིང་། པཱ་གོར་གྱི་མགོ་བོར་རེག་རེག་ལན་འགའ་བྱས། ཕྱིས་སུ་མི་དེ་འཛེམ་དོགས་སྤུ་ཙམ་ཡང་མེད་པར་ཁང་ཆུང་དེ་འཛུལ་ཡོང་། པཱ་གོར་གྱི་གདོང་པ་དང་སྐྲ་ལོར་ཡང་ཡང་རེག ཡིན་ཡང་། པཱ་གོར་གྱིས་མགོ་བོ་པད་སྒྲོན་གྱི་ཕྲག་པར་ཁེན་ནས་ངལ་གསོ་ཨེན་ཙམ་བྱས། བལྟས་ཚོད་ཀྱིས་ན་ཟུག་ལས་ཐར་སྟེ་རང་དབང་གི་འཇིག་རྟེན་ཞིག་ཏུ་མྱུལ་བཞིན་པ་དང་འདྲ་བར་འཇམ་ཅག་གེར་འདུག

གཟུགས་གཞི་སྐྱེས་པ་དང་འདྲ་ཞིང་གྱོན་པ་ནི་བུད་མེད་ཀྱི་ཆས་སུ་བྱས་པའི་མི་དེས་སྐད་ཆ་ཚིག་གཅིག་མི་བཤད་པར་དབང་མོའི་གམ་གྱི་པཱ་གོར་ལ་ཅེར་ནས་འདུག ཕྱིས་སུ་མི་དེས་ལག་ཤུབས་ཕུད་ཅིང་། སྐྱི་མོས་གཡོགས་པའི་དཀྱིལ་མཛུབ་ལ་གཡའ་ཆགས་པའི་ཟངས་ཀྱི་མཛུབ་དཀྲིས་ཤིག་གྱོན་ཡོད་ལ། སོར་རྩི་དམར་པོ་བྱུགས་པའི་མཛུབ་ཆེན་གྱི་མཁྲིས་སུ་མཛུབ་ཆུང་ཞིག་ཀྱང་སྐྱེས་ཡོད། བལྟས་ཚོད་ཀྱིས་སྐམ་པའི་དབྱིབས་དང་འདྲ། དེ་ནི་བུད་མེད་ཅིག་ཡིན་ཏེ། མོས་པཱ་གོར་གྱི་མིག་ཟུང་ལ་གཟས་ནས་ཚད་ལེན་ཐེངས་མང་པོ་བྱེད་པ་ལས། སྐད་ཆ་རྡོག་གཅིག་ཀྱང་མི་བཤད། ཕྱིས་སུ་བུད་མེད་དེ་ཡང་པད་སྒྲོན་དང་པཱ་གོར་ནང་བཞིན་རྔུལ་ཆུ་ཧྲིག་ཧྲིག་བྱེད།

ནམ་གུང་གི་ཆུ་ཚོད་གཉིས་པ་ཡོལ་ལ་ཉེ། མོས་ད་དུང་མཚམས་མི་འཇོག་པར་པཱ་གོར་གྱི་དཔྲལ་གཞོངས་ཀྱི་མིག་ཟུང་ལ་འབྱར་ཅི་ཐུབ་བྱེད། པད་སྒྲོན་གྱིས་སྐད་ཤུགས་ཆེན་པོས་ཁོ་ནད་པ་ཞིག་ཡིན། ནད་པ་ལྕི་མོ་ཞིག་ཡིན། སྐབས་དེར་པཱ་གོར་ཡང་རིམ་གྱིས་གཉིད་ལས་སད་མོད། ལུས་པོའི་དྲོད་ཚད་མཐོ་ནས་མཐོ་རུ་ཕྱིན་ཏེ་ཏུའུ་གྲངས་བཞི་བཅུའི་གོང་དུ་ཕྱིན་པས་ལུས་ཧྲིལ་བོར་རྔུལ་ཆུས་ཁེངས་ཤིང་། མཆུ་སྒྲོས་སྐམ་ཐག་ཆོད་པ་དང་ལག་ཟུང་འདར་སིག་སིག་བྱེད།

གནམ་གྲུར་བསྡད་རྗེས་པཱ་གོར་གྱི་ལུས་ཀྱི་ཚ་བ་རིམ་གྱིས་དམའ་རུ་ཕྱིན་ཏེ་སླར་ཡང་བདེ་སྣང་ཞིག་ཤར། གོ་སྐབས་དེ་དང་བསྟུན་ནས་པད་སྒྲོན་གྱིས་གཉིད་ལྕོག་བརྒྱབ་ཅིང་། མོའི་རྨི་ལམ་དུ་མེ་ཏོག་སྣ་བརྒྱའི་བཀྲག་མདངས་རྣམ་པར་རྒོད་པའི་བག་ཡངས་ཀྱི་གྲོང་ཁྱེར་ཞིག་ཏུ་སླེབས་ཤིང་། སྨྲ་ར་རབ་ཏུ་སྟུག་པའི་བགྲེས་སོང་ཞིག་གིས་འོད་ཟེར་ལམ་ལམ་བྱེད་པའི་གདུ་བུ་དཀར་དམར་སྔོ་ལྗང་མང་པོ་མོའི་མཁྲིག་མར་བརྒྱུས་རྗེས་ཚོས་གཞི་མཛེས་ཤིང་བཟོ་བཀོད་ཤིན་ཏུ་ཁྲིགས་པའི་སྨད་གཡོག་ཅིག་མོའི་ལུས་སྨད་དུ་བསྐོན། མཁུར་ཚོས་སུ་ཚོན་དམར་བྱུགས་ཤིང་སོར་མོ་དང་སྨིན་མ། རྫི་མར་ནག་འཁྱིག་གེར་ཡོད་པའི་སྣུམ་ནག་བྱུགས་རྗེས་མཛེས་ཤིང་སྡུག་པའི་ཁང་བ་ཆེན་པོ་ཞིག་ཏུ་ཁྲིད། ཁང་བ་དེར་ས་ལྡིང་གནམ་ལྡིང་བྱེད་བཞིན་པའི་མི་ཚོགས་ཀྱིས་ཁེངས་ཡོད་ལ། མི་ཚོགས་ཀྱི་གཡས་ཕྱོགས་སུ་འཛུམ་མདངས་ལྷུག་པོར་གྲོལ་ལ། མགོ་བོར་དར་མཚོན་ཐོགས་པའི་གཞོན་ནུ་ལང་ཚོ་དར་ལ་བབས་པའི་པཱ་གོར་མཐོང་བྱུང་། སྐྲ་ལོ་འཇི་ལིར་བབས་ཤིང་གཟུགས་གཞི་ཕྲ་ལ་རིང་བ། སྣའི་གཟེངས་མཐོ་ཞིང་སྨིན་མ་སྟུག་པའི་ཁར་ཨོག་ཚོམ་སྙིང་ཉེ་བའི་གོང་ཕྱོགས་མཆུ་སྒྲོས་འཛུམ་གྱི་ལེར་ཡོད་པ། དེའི་གསེང་དུ་དཀར་ཐར་རེ་བསྟར་ལ་བརྒྱུས་པའི་སོ་ཡི་ཕྲེང་བ། གཞོན་ནུ་པཱ་གོར་གྱིས་ཞབས་བྲོ་འཁྲབ་ཅིང་གླུ་དབྱངས་ལེན་བཞིན་མོའི་ཉེ་སར་བཅར། སྐབས་དེར་མོ་ནི་མཐོ་རིས་དང་ཐར་བ་ཐམས་ཅད་ཐོབ་པའི་གང་ཟག་ཁྱད་པར་བ་ཞིག་དང་འདྲ་བར་ལུས་སེམས་ཧྲིལ་བོར་བདེ་སྣང་གིས་ཁྱབ། གཞོན་ནུ་པཱ་གོར་གྱིས་འཛུམ་དཀར་ལྷུན་གྱིས་གྲུབ་པའི་གདོང་པ་མོའི་མཆུ་སྒྲོས་ཀྱི་ཕྱོགས་སུ་ཉེ་བར་བཅར་དུས། མོས་མངོན་ཆུང་གིས་ཕར་གཏད་པ་དང་མཉམ་དུ་རྨི་ལམ་ནས་སད་ཅིང་། པཱ་གོར་གྱི་མགོ་བོ་རྐུབ་སྟེགས་སུ་སྣར་ནས་ཡོད།

པད་སྒྲོན་གྱིས་ཁོའི་མགོ་བོ་རང་གི་པང་དུ་བཞག་སྟེ། གདོང་ལ་བྱིལ་བྱིལ་ཐེངས་འགར་བྱས་པ་ན་མིག་ཟུང་ལས་མཆི་མ་རྡོག་ཅིག་ག་ལེར་མོའི་པང་དུ་ལྷུང་། དེ་ལྟར་དུས་ཚོད་སྐད་ཅིག་མའི་ནང་ལ་ཁོའི་ལུས་པོ་འཁྱགས་པ་ཆགས་ཤིང་། ཐར་བ་ཐོབ་པ་དང་འདྲ་བར་ཁོའི་ལུས་པོ་རང་དབང་གིས་པད་སྒྲོན་གྱི་པང་དུ་དཔྱངས། ཇེ་ལྕི་ནས་ཇི་ལྕི། ལུས་ཀྱི་བ་སྤུ་རེ་རེ་ནས་མགོ་བོའི་སྐྲ་རྐང་རེ་རེ། ཐ་ན་ལུས་ཀྱི་ཕྲ་ཕུང་གི་ཚོགས་ཀྱང་ནད་ཀྱི་ཟུག་གཟེར་ལས་ཡོངས་སུ་གྲོལ་ཡོད་ཨང་། པད་སྒྲོན་གྱིས་ཁོའི་གདོང་གི་ཁ་རས་རིམ་གྱིས་མར་དེད་དེ་གདོང་ཧྲིལ་བོར་ཡིད་ཚིམ་པ་ཞིག་བལྟས་རྗེས། མགོ་བོ་པཱ་གོར་གྱི་བྲང་གཞོངས་སུ་གླན་ནས་ཤུམ་ཤུམ་དུ་ངུས། དེ་ནི་མོས་ཐེངས་དང་པོ་ཁོའི་གདོང་ཧྲིལ་བོར་བལྟས་པ་ཡིན་ལ། ཡང་ཆེས་མཐའ་མཇུག་ཁོའི་གདོང་ཧྲིལ་བོར་བལྟས་པའང་རེད། མོའི་མིག་གིས་ལྟ་ཕྱོགས་ཤིག་ལ་པཱ་གོར་གྱི་ལྭ་བའི་ཁུག་མའི་ནང་དུ་ཡི་གེ་ཞིག་བཅུག་འདུག མོས་ཡི་གེ་ལེན་གྲབས་བྱེད་དུས། གནམ་གྲུའི་ཞབས་ཞུ་བས“སྙིང་ཉེ་བའི་ལྕམ་དང་སྐུ་ཞབས་རྣམ་པ། གནམ་གྲུ་མི་འགྱང་བར་ཀ་ཏི་མཱན་ཏུ་རུ་སླེབས་ལ་ཉེ”ཞེས་བརྡ་བརྒྱབ་བྱུང་།

པད་སྒྲོན་གྱིས་པཱ་གོར་ཁུར་ནས་གནམ་གྲུ་ལས་བབ་རྗེས། པད་སྒྲོན་གྱི་སྙིང་གི་འཕར་ལྡིང་ཡང་མགྱོགས་སུ་ཕྱིན་ཏེ་དབང་པོ་རེ་རེ་རང་ཚུགས་མི་ཐུབ་པ་དང་། ལུས་ཀྱི་དྲོད་ཚད་ཀྱང་པཱ་གོར་དང་འདྲ་བར་མཐོ་ནས་མཐོ་རུ་ཕྱིན། མོས་གནམ་གྲུ་འབབ་ཚུགས་ཀྱི་རྐུབ་སྟེགས་ལ་ཁེན་ནས་པཱ་གོར་གྱི་ལག་གི་ཡི་གེ་དེར་ཨུ་ཚུགས་ཀྱིས་བལྟས། སྣུམ་ཞགས་དང་ཚིལ་དྲེགས་ཀྱིས་ཟིན་པའི་ཤོག་བུ་ཕྱེད་ཙམ་གྱི་སྟེང་དུ། སྨྱུག་རྩལ་དོད་པའི་འཕྲིན་ཡིག་སྐྱི་གཡའ་བ་ཞིག་བྲིས་འདུག་སྟེ།

ཨ་མ་ངའི་དཔྲལ་གཞོངས་ཀྱི་མིག་དང་ཡ་ཁོག་གི་སྙིང་དང་འདྲ་བའི་བུ་ཆུང་ལགས།

ཉེ་ལམ་ལུས་ཀྱི་ཟུག་གཟེར་ལྷོད་དུ་ཕྱིན་ནས་དོན་ལྔ་སྣོད་དྲུག་མཐའ་དག་ཅུང་ཟད་བདེ་ལ་བབས་ཡོད་དམ། འདི་གར་ཨ་མར་སྨན་ཁང་དུ་ལས་ཚེགས་ཆེ་ཡང་ལུས་བདེ་མོ་ཐུགས་བསོར་མོར་གནས་ཡོད།ད་ཐེངས་ཀྱང་ཨ་མ་ང་ཐབས་ཟད་དེ་མཐའ་མཇུག་གི་འཕྲིན་ཡིག་འདི་མི་འབྲི་ཀ་མེད་བྱུང་། ཨ་མ་ནི་སྨན་པ་ཞིག་ཡིན་ན་ཡང་། ཁྱེད་ཀྱི་ནད་དེ་ཨ་མས་རྩལ་ཅི་ཡོད་བཏོན་ཀྱང་དྲག་བསྐྱེད་ཡོང་ཐབས་བྲལ་བས། ད་ནི་སྔོན་མ་ནང་བཞིན་ཁྱེད་ཀྱི་མིག་ཡ་གཅིག་པུ་དེ་ཡང་ཨ་མ་ངའི་ཁྱོ་ག་སྟེ་ཁྱོད་ཀྱི་ཕ་ཡར་ལ་སྟེར་རྒྱུ་བྱུང་ཚེ། ཨ་མས་ཚེ་རབས་གཞུག་མར་ཁྱེད་ལ་འོས་མེད་བྱེད་མི་སྲིད། གལ་སྲིད་ཁྱེད་ཀྱི་སྲོག་གི་དབང་བོར་འཐམས་པའི་ཚེ་ཡི་སྐུད་པ་མི་འགྱང་བར་ཆད་སོང་ན། ཁྱེད་ཀྱིས་ཅིས་ཀྱང་ཁ་ཆེམས་ཡི་གེ་ཞིག་འབྲི་རོགས། ཁྱེད་ཀྱིས་ཨ་མའི་རེ་འབྲས་དོན་སྨིན་དུ་ཡོང་བ་དང་ཡིད་ཀྱི་འདུན་པ་དུས་ཐོག་བསྐང་ཐུབ་པ་བྱུང་ཚེ། ཨ་མས་ནི་ཚེ་རབས་འདིར་ཁྱེད་ཀྱི་ཆུང་མ་པད་སྒྲོན་དང་ཁྱེད་ཀྱི་ཡབ་ཆེན་ཝེ་ཆི་པཱ་ས་ཧཱ། ཡང་ན་ངའི་ཁྱོ་ག་སྔུན་མ་སྟེ་ཝེ་ཆི་པཱ་ས་ཧཱའི་ཚེ་མཇུག་གི་འགྲོ་གྲོན་ཡོད་ཚད་འགན་དུ་ལེན་ངེས་ཡིན། ཁྱེད་ཀྱིས་ངེས་པར་དུ་ཤེས་དགོས་པ་ཞིག་ལ། ཁྱེད་ཀྱི་འདས་ཟིན་པའི་ཨ་མ་དེ་ནི་ཁྱོད་འུ་གཉིས་ཀྱི་ཐུན་མོང་གི་གཉེན་ཉེ་ཡིན། རྒྱུ་མཚན་དེའི་དབང་གིས་ཨ་མས་ཀྱང་མིང་བརྗེ་ནས་གཞན་གྱི་བུ་ཕྲུག་བྱེད་དུ་འཇུག་དོན་ཡང་འདི་ཡིན། ཁྱེད་ཀྱིས་བློ་ཞིབ་མོས་བསམས་གཞིག་གཏོང་བར་ཡིད་ཆེས་ཡོད།

ཞེས་ཁྱེད་ཀྱི་སྙིང་ཉེ་བའི་ཨ་མས།  

XXXXལོའི་གསར་ཚེས་ཀྱི་ཟླXཔའི་ཚེསXཉིན་རྐང་ཐང་སྲང་ལམ་ནས་བྲིས།

པད་སྒྲོན་གྱིས་འཕྲིན་ཡིག་ཀློག་བཞིན་མིག་ནས་མཆུ་མ་ཁྲོམ་ཁྲོམ་དུ་བཞུར་ལ་ཁྲག་གི་འཁོར་རྒྱུགས་ཀྱང་ཇེ་མགྱོགས་སུ་ཕྱིན། དེ་མ་ཐག་དབུགས་འཚང་ཞིང་ཡན་ལག་རེ་རེ་རང་དབང་དུ་མི་གནས་པར་ཁྲེག་པོར་གྱུར་མོད། པཱ་གོར་ནི་དེ་ལས་ལྡོག་སྟེ་དག་ཞིང་དུ་སླེབས་པ་དང་འདྲ་བར་རང་དབང་གིས་སྣར་ནས་སྡོད། མི་ཚོགས་ནི་རྒྱ་མཚོའི་རླབས་རིས་ཇི་བཞིན་ཆེ་ནས་ཆེ་རུ་སོང་རྗེས། སླར་ཡང་ཆུང་ནས་ཆུང་དུ་གྱུར། ལམ་འགྲོ་རྣམས་ཀྱིས་སྔར་བཞིན་ཕྲག་པས་ཕྲག་པ་བརྡར་བཞིན་མདུན་དུ་བསྐྱོད་ཅིང་། ཡང་མི་ཁ་ཤས་ནི་རང་དབང་གིས་མི་ཚོགས་དང་གྱེས་ཏེ་རྒྱབ་ཕྱོགས་སུ་ཆས་འགྲོ མང་ཤོས་ནི་རྟག་པར་འཚང་ཁ་དང་བཅས་ཏེ་གློག་སྐས་སུ་སྡོད་རྒྱུར་གོམས་ཤིང་། འགའ་ཞིག་གིས་ཁོད་ཡངས་པའི་རྡོ་བའི་ཐེམ་སྐས་བདམས་ནས་རང་དབང་གི་ལམ་ཁ་དེར་ཕྱོགས་འགྲོ། པད་སྒྲོན་གྱི་དོར་མའི་འདབས་ཀ་དང་ལག་གི་འཕྲིན་ཡིག་གཉིས་དུས་མཉམ་དུ་དབྱར་རླུང་གིས་སྒུལ་ཙམ་སྒུལ་ཙམ་བྱེད་ན་ཡང་། མི་རྣམས་ཀྱིས་སྣང་དོགས་སྤུ་ཙམ་ཡང་མེད་པར་མདུན་ནས་མདུན་དུ་སྐྱོད་ཀྱིན་གདའ།

ལོ་ངོ་བཞིའི་སྔོན་གྱི་ཚ་བ་ཆེ་བའི་དབྱར་གཞུང་ཞིག་ལ། ཐོག་དང་པོར་མེ་འཁོར་དུ་སྡོད་མཁན་གྱི་གཞོན་ནུ་ཕོ་མོ་གཉིས་སྐད་འཕྲིན་གྱི་འཕྲིན་ལམ་བརྒྱུད་ནས་ཆ་ཡོད་དུ་གྱུར་ཅིང་། ཕྱིས་སུ་ཁོ་རང་གཉིས་སློབ་གྲྭ་གཅིག་གི་སློབ་གྲོགས་ཡིན་པ་ཡང་དུས་ཚོད་ཀྱིས་ར་སྤྲོད་བྱས། མེ་འཁོར་ནི་དབུགས་མཐུད་བརྒྱབ་པའི་ས་འབུ་ཞིག་དང་འདྲ་བར་ན་རེ་ནུར་རེར་མདུན་ནས་མདུན་དུ་བསྐྱོད་ཅིང་། དེར་སྡོད་མཁན་གྱི་འགྲུལ་བ་མང་ཆེ་ཤས་ནི་གྲོང་གསེབ་ཀྱི་ཞོར་ལས་པ་དག་ཡིན་ལ། གཞན་དག་ནི་ཕལ་ཆེར་སློབ་ཆེན་སློབ་མ་རྐྱང་རྐྱང་རེད། པད་སྒྲོན་ནི་དེའི་ཁྲོད་ཀྱི་གཅིག་ཡིན་ཏེ། མོས་དངོས་ཟོག་གི་སྒམ་ཆུང་ལས་ལག་ཁུག་ཅིག་བླངས་ཏེ། དེའི་ནང་གི“སློབ་བསྡུའི་དཔང་ཡིག”ལ་ཡང་ལྟ་བསྐྱར་ལྟ་བྱེད། ངག་ནས“ཧྲང་ཧེ་མཐོ་རིམ་ཟློས་གར་སློབ་གླིང”ཞེས་ཡང་ཡང་ཟློས་མོད། མོའི་འཁྲིས་སུ་སྡོད་མཁན་གྱི་གཞོན་ནུ་དེས་སྣང་དོགས་གཏན་ནས་མི་བྱེད། ཕྱིས་སུ་མོ་རང་ཐབས་ཟད་དེ་མགོ་བོ་མེ་འཁོར་གྱི་དྲ་མར་ཁེན་ནས་གཉིད་ཡོལ་ཅུང་ཙམ་བྱེད། མེ་འཁོར་གྱི་འདར་འགུལ་བར་ནས་མོར་གཉིད་སྐྱིད་པོ་ཞིག་ཅི་ལ་ཁུགས། མོས་མེ་འཁོར་གྱི་རྐན་སྒྲའི་དབུས་སུ་འུར་གྱིས་ཁེངས་པའི་ཞོར་ལས་མཁན་ཚོའི་ལབ་གླེང་ལ་རྣ་བ་བླགས་བཞིན་འབབ་ཚུགས་མཐའ་མར་སླེབས་པའི་རེ་བ་བྱེད་བཞིན་མཆིས།

མོའི་དངོས་མིང་ལ་བདེ་སྐྱིད་པད་སྒྲོན་ཟེར་ཞིང་། དྲ་མིང་ལ་རྒྱ་ཡིག་གི་ཞིན་ཧྥུའུ་ཞེས་བྲིས་འདུག གཞོན་ནུ་མ་དེས་གླང་རྫིའི་དོར་མ་དོག་མོ་ཞིག་གི་སྟེང་དུ་སྟོད་ལྭ་ཕུར་ལོ་རིང་པོ་ཞིག་ཤམ་ཤམ་བྱས་ནས་གྱོན་ལ། རྐང་ལ་ཆེ་ཆུང་རན་པའི་རས་ལྷམ་དམར་པོ་ལྷམ་སྒྲོག་མེད་པ་ཞིག་གྱོན་འདུག མོའི་ངོ་གདོང་ནི་དཀར་ལ་དམར་མདངས་ཆགས་པ་ཞིག་ཡིན་ཏེ། ཞིབ་ཏུ་བལྟས་ཚེ་མིག་གཉིས་ཀར་ཆེ་ཆུང་ཅུང་མཆིས་མོད། དེ་ནི་དེ་འདྲའི་མངོན་གསལ་དོད་པོ་ཞིག་མིན།

“གསུང་ལ་གཞས་ཚིག་བསྐྱོན་པ་གནང་དང་།། གསུང་ལ་གཞས་ཚིག་མི་བསྐྱོན་ཟེར་ན།། མིང་ལ་སེང་ལྕམ་འབྲུག་མོ་བཏགས་ནས།། བཀགས་རོགས་གནང་རྒྱུ་འབད་དང་།།”

མི་ཚོགས་ཀྱི་ཁྲོད་ནས་མཚམས་རེར་ཀོང་པོའི་ཆང་གཞས་ཤིག་ཆད་མ་མཐུད་ཀྱིས་ལེན། ཕལ་ཆེར་མོས་སྐད་འཕྲིན་གྱི་འཕྲིན་ལམ་ནས་དོན་བཟང་ཞིག་གོ་སོང་བ་འདྲ།

“ཏུའུ། ཏུའུ།” སྐད་འཕྲིན་ཞིག་འབྱོར་བྱུང་།

མེ་ཏོག་མཚོས། “སྙིང་ཉེ། དྲ་ལམ་ན་ཨེ་ཡོད། བདེ་ལེགས། ཁ་ཁྱོགས།”

དུང་རིས། “བདེ་མོ། ཐུགས་བརྒྱལ་མ་བཞེངས།

ཡི་གེ་སྐུར། སྐད་བསྐུར་ཚེ་ཉན་བདེ་པོ་ཡོད་མ་རེད།”

མེ་ཏོག་མཚོས།“དེར་ཅང་མེད་ཀི སུན་པ་ལ་ཨང་། ནམ་ཚོད་ལ་ང་ལ་བལྟ་ཀི་ཡོང་རྒྱུ།”

དུང་རིས། “ང་སློབ་གྲྭར་འགྲོ་རན་སོང་། ཕལ་ཆེར་ལྟ་ཀི་ཡོང་ཐུབ་རྒྱུ་མ་རེད། དེ་བྱོས། མེ་འཁོར་དུ་དྲ་མི་བཟང་ཀི”

མེ་ཏོག་མཚོས། “ཕུན་ཚོགས། སྙིང་ཉེ། ཁྱོད་ཀྱི་འདྲ་པར་ཞིག་སྐུར་ཤོག་ཨ།”

སྐད་འཕྲིན་གྱི་མིང་བྱང་ལ་དུང་རིར་འབོད་པའི་གཞོན་ནུ་དེའི་དངོས་མིང་ལ་བདེ་ལེགས་སུ་འབོད་ཅིང་། ཁོས་ཁ་པར་གྱི་སྐུད་སྣེ་ཞིག་ན་དྲ་གྲོགས་གཞན་ཞིག་གི་ཁ་བརྡར་ཉན་བཞིན་ཡོད་དམ། ཡང་ན་གམ་གྱི་གཞོན་ནུ་མ་བདེ་སྐྱིད་པད་སྒྲོན་གྱི་འཛུམ་མདངས་ཀྱི་བཟི་ཁ་མངར་བས་ཡིན་ནམ། གང་ལྟར་མེ་ཏོག་མཚོ་རུ་འབོད་པའི་སྐད་འཕྲིན་ནང་གི་བུ་མོ་དེ་མ་ཐག་ཏུ་སྐད་འཕྲིན་ནས་ཕངས་མེད་དུ་བསུབས། ཁོས་སུ་ཞིག་གིས་བསྐུར་ཡོང་བའི་བརྡ་འཕྲིན་ཞིག་ལ་རྐྱེན་བྱས་ཏེ་ལྷུག་ལྷུག་ཏུ་དགོད་ཅིང་། ཡང་མཚམས་རེར་གདོང་གི་སྨིན་མ་སྡུད་བཞིན་སུ་ཞིག་ལ་སུན་སྣང་སྐྱེས་བཞིན་པའི་རྣམ་འགྱུར་བསྟན། བདེ་སྐྱིད་པད་སྒྲོན་གྱིས་ཆང་གཞས་ཤིག་གི་དབྱངས་སྙན་དང་འགྲོགས་ནས་ཕ་ཡུལ་གྱི་རི་ཆུ་ནགས་གསུམ་དང་། ཕ་ཡུལ་གྱི་ནམ་ཟླ། ཕ་ཡུལ་གྱི་སྒོ་ཕྱུགས། ཕ་ཡུལ་གྱི་ཡུལ་མི་ཚོ། ད་དུང་མང་པོ་མང་པོ་ཞིག་མིག་གིས་འཚོས་ཤིང་ཡིད་ཀྱིས་སྒོམ་ནས་མེ་འཁོར་གྱི་འགྲུལ་བ་ཚོའི་གདོང་གི་རྣམ་འགྱུར་ལ་ཟབ་པའི་བསམ་གཞིགས་མཛད། འཁོར་སྒམ་ཨང་རྟགས་སོ་བརྒྱད་པར་སྡོད་མཁན་གྱི་འགྲུལ་བ་ཚོས་ཉི་མ་ལྷ་ས་ནས་ཧྲང་ཧེ་ལ་བསྐྱོད་པའི་མེ་འཁོར་ལས་ལབ་གླེང་གི་རྔ་མ་སྐྱོང་བཞིན་ཡོད། དུང་རིས་དེ་དག་ལ་སྣང་འཇོག་གཏན་ནས་མི་བྱེད་པར་སྐད་འཕྲིན་གྱི་ཚོགས་གཙོར་བསྡད་བྱུང་། ཁོས“ཕ་སྐད་ཚོགས་པ་ཟེར་ན་གལ་ཆེན་ནང་གི་དོན་ཆེན་ཞིག་ཡིན། འུ་ཅག་ན་གཞོན་དག་གིས་དོན་དག་མང་པོ་ཞིག་ཤེས་དགོས། ན་གཞོན་དག་གི་ཕྲག་སྟེང་ན་ཕ་སྐད་སྲུང་སྐྱོབ་བྱས་པའི་འགན་ཁུར་ལྕི་མོ་ཞིག་ཡོད། དཀར་པོ་དགེ་བ། ཚང་མས་ཧུར་བརྩོན་བྱོས་ཡ། སྐད་ཚོམས་ཀྱི་མིང་ལ་བསྐལ་བ་ཡར་འགྲོ་ཕ་སྐད་གླིང་། བཏགས་པ་ཡིན། ཚང་མ་འཐད་པ་ཡིན་ནམ།” མཚམས་རེར་གཞོན་ནུ་དེས་ཚོད་ཚོད་ལ་ངར་ཤུགས་ཤིག་བསྐྱེད་ཅིང་། མཚམས་ལན་རེར་གདོང་ལ་ཅུང་མ་རུང་བའི་ཚུལ་གྱིས“སྙིང་ཉེ། ངའི་གློག་གཡུས་ཟད་སོང་བས། སྐད་ལན་སྟེར་མ་ཐུབ་ཡ། དགོངས་དག་ཞུ།” སྐད་ཤུགས་ཆུང་ངུས་སྐད་ཆ་གཞུག་མ་དེ་ལབ་ཡོང་དུས་སུ་ཞིག་ལ་རེ་སྒུག་གི་འདུན་མ་ག་ཙམ་སྟེར་གྱིན་ཡོད་ཨང་། ཁོས་མེ་འཁོར་གྱི་མི་ཚོགས་ཀྱི་དབུས་ནས་སྣ་གླུ་ཐན་ཐུན་ཞིག་དབྱངས་ལ་འགུགས་བཞིན་སླར་ཡང་སྐད་འཕྲིན་གྱི་འཕྲིན་ལམ་ནས་སོར་མཛུབ་ཀྱི་རྩལ་མང་དུ་སྤྲུགས། དེ་ནི་སྐད་འཕྲིན་གྱི་ཚོགས་གཙོར་བསྡད་རྗེས་ཀྱི་དུང་རིའི་སྣང་བརྙན་རེད།

དབྱར་ཟླ་མཐའ་མའི་ཚ་གདུག་གིས་འཁོར་སྒམ་ནང་གི་འགྲུལ་བ་ཚོར་བཟོད་དུ་མེད་པའི་ཚ་བ་སྐྱེད་ཅིང་། ས་འོག་ལྕགས་ལམ་གྱི་འདུ་འཛུ་དང་། ཁྲ་ཁྲ་རིག་རིག་གི་མི་ཚོགས་ཀྱི་འཚང་ཁ། རྒྱང་རིང་རྒྱང་གི་རི་བོ་དང་། ཐག་རིང་ཐག་རིང་གི་གཙང་བོ། ད་དུང་ཨ་མའི་འོ་ཟོའི་ནང་གི་དྲན་པ། ལ་ཁའི་ལབ་ཙེ། རླུང་གིས་སྐྱོད་ཀྱིན་པའི་དར་ལྕོག རླུང་རྟ་ལ་བཅོལ་བའི་ཕུ་ནུའི་སེམས་སྒྲ་དང་ཀི་འབོད། ད་དུང་རྟ་མཆོག་གི་རྨིག་སྒྲ མང་པོ་མང་པོ་ཞིག་གི་ཁྲོད་ནས་དུང་རིས་ཅི་ཡང་དྲན་བྱུང་། ཐ་མར་ཁོས་ཅི་ཡང་བརྗེད་སོང་བ་ནང་བཞིན་མེ་འཁོར་ནང་གི་བྱ་དངོས་དག་ལ་ཁ་གཡེང་མིག་གཡེང་བྱེད། ཁོས《ཡབ་ཆེན་གྱི་སྤང་ཐང་། ཡུམ་ཆེན་གྱི་གཙང་བོ》གླུ་དབྱངས་དེར་ཉན་བཞིན་ཉན་བཞིན་མིག་མཐའ་མཆུ་མས་བཀང་། “ང་ཚོ་ནི་མཐོ་སྒང་གི་བྱིས་པ་ཡིན། བཞུད་ཀྱིན་པའི་བྱིས་པ་ཚོར་མགོན་སྐྱབས་གནང་སྟེ། རང་ཉིད་ཀྱི་གནས་མལ་གྱི་ལམ་ཆེན་དེ་རྙེད་པར་སྨོན།”ཞེས་པའི་གཞས་ཚིག་ཚན་པ་དེ་རྒྱ་སྐད་ཀྱིས་ངག་ནས་ཡང་ཡང་ཟློས།

པད་སྒྲོན་གྱིས་ཕར་བལྟ་དུས་འཁྲིས་ཀྱི་གཞོན་ནུ་དེས་རྐང་ལ་ཆ་འགྲིག་པའི་ནཱེ་ཁེ་རྟགས་ཅན་གྱི་རས་ལྷམ་དམར་ནག་ཅིག་གྱོན་ཞིང་། གླང་རྫིའི་དོར་མ་ཞིག་ཅུང་ཡར་བརྫེས་ནས་གྱོན་པ་དེ་ཡང་ཚད་ཚད་དུ་སྣང་། ཅིན་པཱ་རྟགས་ཅན་གྱི་སྟོད་ལྭ་ཕུར་ལོ་ཞིག་གྱོན་པ། གཟུགས་པོ་རིང་ཞིང་གསར་མདངས་རྒོད་པས་པད་སྒྲོན་གྱི་ཡིད་ཀྱི་དུངས་ཤ་དྲངས། མོས་ངག་འཇམ་པོས“གྲོགས་པོ་རྐུབ་སྟེགས་འདི་ལྟག་རྒྱབ་ལ་བསྙེས་ཆོག”ཅེས་ལབ། སྐབས་དེར་བདེ་ལེགས་ནི་གློ་བུར་དུ་གང་ཞིག་ནས་སད་སོང་བ་བཞིན་མགོ་བོ་སྤྲུགས་སྤྲུགས་ལན་འགའ་བྱས་རྗེས། སླར་ཡང་སྐད་འཕྲིན་དུ“སྙིང་ཉེ། ངས་སྒུག་ཡོད”ཅེས་ལབ་བྱུང་།

པད་སྒྲོན་གྱི་སེམས་སུ་ལམ་ཐག་རིང་བོ་གཏམ་གྱིས་ཆོད་པའི་བསྐལ་བ་མི་ལྡན་སྙམ་སྟེ་བལྟ་འཕྲོར་ལུས་པའི་ཧྥ་རན་སིའི་རྩོམ་པ་པོ་ཡུས་གོས་བརྩམས་པའི《ཕ་རི་སིའི་འཕགས་མའི་ཆོས་གྲྭ》ཞེས་པའི་སྒྲུང་གཏམ་དེར་བལྟ་འགོ་བརྩམས། ཁ་གཏད་དུ་སྡོད་པའི་ཞོར་ལས་པ་བཟའ་ཟླ་གཉིས་ཀྱིས་སྐད་དམའ་མོས“ཤེས་ཡོན་པ”ཞེས་མིག་རིག་རིག་གིས་མོར་བལྟས། ཅུང་ཙམ་འགོར་རྗེས། མོས་མེ་འཁོར་གྱི་སྒེའུ་ཁུང་གི་ངོས་སུ་ལྕེབས་འདུག་པའི་འབུ་སྦྲང་དག་ཡར་བདའ་མར་བདའ་བྱས་ནས་དེབ་དུང་རུའི་པང་དུ་ལྷུང་། དུང་རིས་འབྲོག་མཚོའི་ཕྲག་པའི་སྟེང་དུ་རེག་ཙམ་རེག་ཙམ་བྱེད་བཞིན་ངག་འཇམ་པོས་གྲོགས་མོ་དཔེ་ཆ་གཞན་པ་ཡོད་དམ་ཞེས་དྲིས། པད་སྒྲོན་གྱིས་གོ་སྐབས་དེ་དང་བསྟུན་ནས་སྐད་ཆ་མང་པོ་ཞིག་ལབ་འདོད་མོད། མོས་སྐྱེངས་པའི་ཚུལ་གྱིས་བཀྲ་ཤིས་ཚེ་རིང་ལགས་ཀྱི《ཕ་ཡུལ་གྱི་ཕན་བདེའི་ཆེད་དུ》ཞེས་པའི་དེབ་བསྟན་ཏེ“འདི་ཡག་པོ་ཞེ་དྲག་འདུག”ཅེས་དེབ་དེ་ཁོར་ངོ་སྤྲོད་བྱས། མེ་འཁོར་ནང་གི་འགྲུལ་བ་ཚོའི་བཟའ་བཏུང་གི་དྲི་མས་པད་སྒྲོན་གྱི་སྒྲུང་གཏམ་ལ་བལྟ་མཚམས་བཅད་ཅིང་། མོས་ཁ་པར་ནས་དུས་ཚོད་ལ་ཅིག་བལྟས་རྗེས་གམ་གྱི་གཞོན་ནུ་དེར་དགོང་ཟས་རོལ་བའི་དུས་ལ་སླེབས་པའི་བརྡ་ཞིག་བཏང་མོད། གཞོན་ནུ་དེས་སྔ་མོ་ནས་དཔེ་དེབ་མཆན་ལ་བཙིར་ནས་ཅི་ཞིག་ལ་བསམ་བློ་གཏོང་གིན་འདུག་པས་མོས་བར་ཆད་བཟོ་བར་དོགས་ནས་ཡང་བསྐྱར་ལབ་རྒྱུའི་སྤོབས་པ་མ་བྱུང་། མོ་ཐབས་ཟད་དེ་སྐད་འཕྲིན་ནང་གི་གསར་འགྱུར་དང་འདྲ་པར་དག་ཡར་སློག་མར་སློག་བྱེད། ཕྱིས་སུ་གཞོན་ནུ་ཕོ་མོ་གཉིས་ཀྱིས་ཕན་ཚུན་ནང་འཇུག་བྱས་ཏེ་འཕྲིན་ལམ་ནས་ཡུན་རིང་ལ་ཁ་བརྡ་བྱེད།

“སྐུ་མགྲོན་རྣམ་པ། སྐུ་མགྲོན་རྣམ་པ། མཉམ་ཞོགས། ཧྲང་ཧྲེ་མེ་འཁོར་འབབ་ཚུགས་སུ་སླེབས་སོང་།”ཞེས་པའི་བརྡ་བརྒྱབ་བྱུང་།

མེ་འཁོར་གྱི་འགྲུལ་བ་ཚོ་ལུག་ཁྱུ་འདྲོགས་པ་ནང་བཞིན་རང་རང་ས་ནས་རྡོག་འཁྲེས་རེ་འཁུར་ནས་མེ་འཁོར་ནས་བབ་མ་ཐག་གང་ཞིག་ཏུ་ཞོགས་སོང་། ཡིན་ནའང་། ན་གཞོན་ཕོ་མོ་དེ་གཉིས་གནམ་ནས་ལྷུང་སོང་བ་ནང་བཞིན་ཡར་བལྟ་མར་བལྟ་ཞིག་བྱེད་བཞིན་གནས་དེ་རུ་ཧད་དེ་བསྡད།

གྲོག་ཚང་སློག་འདྲའི་ཧྲང་ཧེ་གྲོང་ཁྱེར་གྱི་མི་ཚོགས། གནམ་ལ་ཟུག་པའི་ཁང་བརྩེགས། གྲལ་འགྲིག་འགྲིམ་འགྲུལ་གྱི་འཚང་ཁ། ཕྲག་པས་ཕྲག་པ་བརྡར་གྱིན་པའི་སྲང་གི་ལམ་འགྲོ་བ། གློ་བུར་མི་ཚོགས་ཀྱི་དབུས་ནས་གཞོན་ནུ་མ་པད་སྒྲོན་གྱི་གདོང་ཧྲིལ་བོ་དམར་པོ་གྱུར་ཞིང་། ལག་གི་ཁུག་མ་དེ་བདེ་ལེགས་ལ་གཏོད་ཞོར“ངའི་སྨན་ཐོ་བོར་བརླག་བྱུང་སོང་། ངའི་སྨན་ཐོ་མེ་འཁོར་ནས་བོར་བརླག་བྱུང་སོང་།”ཞེས་མེ་འཁོར་འབབ་ཚུགས་ཀྱི་ཕྱོགས་སུ་རྒྱུགས་སོང་། བདེ་ལེགས་ཀྱི་སེམས་སུ་རང་ཉིད་མེ་འཁོར་ནས་འབབ་ཁར་ཨམ་ཕྲག་ཏུ་བཅུག་པའི་ཤོག་ལེ་དེ་ཡིད་ལ་དྲན། ཁོས་དང་ཐོག་ཤོག་ལྷེ་དེ་གད་སྙིགས་འཕེན་སའི་སྒམ་ཆུང་དུ་འཕེན་རྩིས་བྱས་མོད། མེ་འཁོར་གྱི་འགྲུལ་བའི་བྲེལ་ཟིང་གི་བར་ནས་གད་སྙིགས་ཀྱི་སྒམ་ཆུང་ནི་མིག་གིས་མ་ཟིན། ཁོ་མེ་འཁོར་ནས་བབ་མ་ཐག་གད་སྙིགས་འཕེན་སའི་སྒམ་ཆུང་ནང་དུ་ས་གཤགས་རྡོ་གཤགས་བྱས་ནས་འཕངས། ཡིན་ན་འང་། དོན་དག་འདི་ནི་པད་སྒྲོན་ལ་ཤོད་ཐུབ་མ་སོང་།

ཉིན་གུང་ལ་སླེབས་ན་ཡང་འབྲོག་མཚོ་ནི་ད་དུང་ཕྱིར་སླེབས་རྒྱུ་མ་བྱུང་། ཁོས་སྲང་ལམ་གྱི་གྲུ་ཟུར་ཞིག་ནས་འབྲོག་མཚོར་སྒུག་ནས་སྡོད་ཅིང་། གམ་གྱི་མི་ཚོགས་ཀྱིས་འགུལ་སྐྱོད་མྱུར་བས་རང་ཉིད་ཀྱང་གང་ཞིག་ཏུ་ཆས་ཀྱིན་པའི་སྣང་བ་ཞིག་སྟེར། ཁོས་ཕར་འགྲོ་ཚུར་འོང་གི་མི་ཚོགས་ལ་མིག་སྐྱེལ་གྲངས་མེད་ཅིག་བྱེད་མོད། མི་རྣམས་ཀྱིས་རང་རང་གི་ལས་དོན་ཞིག་ལ་བྲེལ་ནས་མིག་གི་ཟུར་མདའ་ཙམ་ཡང་མི་འཕེན། ཐ་ན་ཟས་ཐུན་གྱ་ནོམ་པ་ཞིག་ཀྱང་ཟ་ཁོམ་མེད་པར་མདུན་ནས་མདུན་དུ་སྐྱོད་ཀྱིན་གདའ། གྲོང་ཁྱེར་གྱི་མི་རྣམས་ཀྱིས་ཟ་མ་ཟ་ཞོར་དང་སྐད་ཆ་ལབ་ཞོར། ཁ་པར་གཏོང་ཞོར་དང་དཔེ་ཆ་ལྟ་ཞོར་དུ་མདུན་ནས་མདུན་དུ་གོམ་ཁ་སྒྱུར་བཞིན་ཡོད། རེ་བ་དང་ཡིད་ཆེས་ཀྱིས་ཁེངས་པའི་མིག་ཟུང་གིས་རྡོག་པ་མནན་ཞིང་། རྡོག་པས་ལམ་པ་མནན་ནས་གང་ཞིག་ཏུ་འདུར་གྱིན་པ་མཐོང་རྗེས། བདེ་ལེགས་ཀྱིས་ཡ་མཚན་པའི་སྒོ་ནས་ཁ་པར་ཕྱོགས་བཞིར་བར་མེད་དུ་གཏད་དེ། འགོ་བརྗོད་ལ་རྒྱ་གྲོང་ཞེས་པའི་བརྙན་ཐུང་ཁ་ཤས་འཕྲོ་རིམ་ཁྲོད་སྐད་འཕྲིན་གྱི་བར་སྟོངས་སུ་བཀྲམས། ཕྱིས་སུ་ཁོས་ཡིད་ཚིམ་པའི་ངང་བར་སྟོངས་སུ་བཏབས་པའི་དྲ་གྲོགས་ཚོའི་ཞབས་མཆན་དང་མེ་ཏོག འཛུམ་རིས་སོགས་ཀྱི་གྲངས་ཀ་བླངས་རྗེས་ཁེར་དགོད་ཡིད་ཚིམ་པ་ཞིག་བྱས།

ཉིན་གུང་གི་ཉི་མ་མཁའ་མཐར་འཕགས་ཤིང་གྲོང་ཁྱེར་གྱི་གྲིབ་གཟུགས་རེ་རེ་ཇེ་ཆེ་ནས་ཇེ་ཆེར་གྱུར། བདེ་ལེགས་ཀྱིས་སྔར་བཞིན་པད་སྒྲོན་ལ་མི་སྒུག་ཐུ་མེད་བྱུང་། ས་སྲོད་ལ་རྒྱང་ལྟ་བྱེད་ཐེངས་རེར་མཐོང་ལམ་ཁང་བརྩེགས་ཀྱིས་བཀག་ཅིང་། སེམས་པར་བྲེལ་ཤ་ཞིག་གིས་སྐུལ་ཡོང་། ཅུང་ཙམ་གྱི་རྗེས་སུ། དབུགས་འཚང་འཚང་ངང་རྒྱུགས་ནས་ཡོང་བའི་གཞོན་ནུ་མས་ལག་ཏུ་ཤོག་ལྷེ་ཐེད་པོ་ཞིག་བཟུང་ནས་སླེབས་བྱུང་། མོ་བདེ་ལེགས་ཀྱི་སར་ཐོན་མ་ཐག་གང་མགྱོགས་ཅི་མྱུར་གྱིས་ལག་གི་ཤོག་ལྷེ་དེ་ཁུག་མའི་ནང་དུ་བཅུག མོས་གདོང་གི་རྔུལ་ཆུ་འབྱིད་བཞིན་བཙལ་བཙལ་རྗེས་རྙེད་སོང་ཞེས་ཉམ་ཆུང་སྒོས་བཤད། མོའི་མིག་མདངས་ཀྱི་ཁྲོད་ན་ད་དུང་སུ་ཞིག་ལ་ལེ་བདའ་བྱེད་པ་ལྟ་བུའི་ཉམས་ཤིག་མངོན་ཆུང་གིས་སྐུང་ཡོད།

“བདེ་ལེགས། ཐུགས་རྗེ་ཆེ།”མོས་སྐད་ཤུགས་ཆུང་ངུས་དེ་ལྟར་ལབ།

པད་སྒྲོན་གྱིས་བདེ་མོའི་ལག་བརྡ་ཞིག་སྟོན་བཞིན་བུད་སོང་། བདེ་ལེགས་སུ་འབོད་པའི་གཞོན་ནུ་དེས་གདོང་ལ་ལག་པ་འགེབས་བཞིན་པད་སྒྲོན་གྱི་རྒྱབ་གཟུགས་ལ་ཅེར་ནས་ཡུད་ཙམ་ལ་ལུས། འུར་གྱིས་ཁེངས་པའི་འགྲིམ་འགྲུལ་གྱི་དུང་སྒྲའི་བར་ནས་རྒྱབ་གཟུགས་དེ་རབ་རིབ་ནས་མག་མོག་ཅིག་ཏུ་གྱུར་ཏེ་ཕྱིས་སུ་མིག་ཀོང་གི་ཀློང་ནས་མཐོང་རྒྱུ་མ་བྱུང་། བོར་སོང་བའི་རྒྱབ་གཟུགས་དེ་ས་སྲོད་དེར་ཅི་ལྟར་བཙལ་ཡང་རྙེད་རྒྱུ་ཞིག་མ་བྱུང་། སྐར་འོད་མེད་པའི་གྲོང་ཁྱེར་གྱི་མཚན་མོ་ཞིག་དེ་ལྟར་ཕར་ལ་བསྐྱལ།

སློབ་འགོ་བརྩམས་པའི་ཉིན་གཉིས་པར། སློབ་གྲོགས་ཚོས་མིང་ཐོ་བཀོད། དཔེ་དེབ་གསར་བ་ཉོས། སློབ་ཆེན་གྱི་སྒོ་ཐེམ་ནས་འཚོ་བ་གསར་བ་ཞིག་གི་སྒོ་གླེགས་དལ་གྱིས་ཕྱེས་བྱུང་། པད་སྒྲོན་གྱིས་མིང་ཐོ་བཀོད་མ་ཉིད་དུ་མལ་ཁང་དུ་ལོག་སྟེ་ཤོག་ལྷེ་ཐེད་པོ་དེ་སྔས་འགྲམ་གྱི《སླར་གསོན》ཞེས་པའི་དཔེ་དེབ་དེའི་ཁུད་དུ་གཅུད་ནས་བཞག དེ་ནས་མོས་ངལ་ཞིང་དུབ་པའི་མཚན་གྱི་རྨི་ལམ་ལ་ཕྱིར་དྲན་བྱེད། བསྡད་ཀྱིན་བསྡད་ཀྱིན་མོས་འཕྲིན་ལམ་ནས་གཞོན་ནུ་དེའི་སྐད་འཕྲིན་དུ་རྒྱ་སེ་མེ་ཏོག་དང་། མཆུ་རིས་དང་འཁྱུད་རིས་བཅས་སྡེབས་ཀྱིས་བསྐུར་རྗེས། དོན་ཆེན་ཞིག་འགྲུབ་སོང་བ་བཞིན་ཧ་ཅང་ཡིད་ཚིམ་པའི་ངང་སྐད་ལན་ལ་སྒུག དུང་རིས་སྐད་འཕྲིན་གྱི་འཕྲིན་ལམ་བརྒྱུད་ནས་སེམས་རིས་ཤིག་དང་རྒྱ་སེ་མེ་ཏོག་རྐང་གསུམ་བཅས་བསྐུར་བྱུང་། དེ་ནི་པད་སྒྲོན་ལ་མཚོན་ན་ཆེས་ཡིད་དུ་འོང་བའི་ཞོགས་པ་ཞིག་ཡིན་ངེས། མོས《རྨི་ལམ་ནང་གི་བྱམས་པ》ཞེས་པའི་གླུ་གཞས་ཤིག་བསྐུར། དེ་ལྟར་ཆུ་ཚོད་སྐར་ཆ་རེ་རེ་དང་སྐར་མ་རེ་རེ་གཞོན་ནུ་ཕོ་མོ་གཉིས་ཀྱིས་སོ་སོའི་འདྲ་པར་དང་། སེམས་གཏམ། རེ་བ་དང་ཕུགས་བསམ། དགའ་ཕྱོགས་སོགས་སྦ་གསང་མེད་པར་ཕར་སྐུར་ཚུར་སྐུར་བྱེད།

སློབ་གྲྭས་སློབ་མ་གསར་བའི་དམག་སྦྱོང་བྱེད་པའི་འགོ་བརྩམས་བྱུང་། དགེ་རྒན་གྱིས་དམག་སྦྱོང་གི་སྐབས་སུ་སྐད་འཕྲིན་རྩེད་མི་ཆོག་པའི་སྒྲིག་ལམ་ནན་མོ་བཞག་མོད། དབྱར་ཚ་བ་ཆེ་བས་ངལ་གསོ་ཅུང་ཙམ་བྱས་ཚེ་གཞོན་ནུ་ཕོ་མོ་ཚོས་མྱུར་དུ་སྐད་འཕྲིན་ཁོ་ན་རྩེད། ཕན་ཚུན་ལ་ཁ་བརྡ་མེད་ལ་རྩེད་དགོད་ཀྱང་མེད། ཐ་ན་འཁྲིས་སུ་སྡོད་མཁན་གྱི་དགེ་རྒན་ལ་སྣང་དོགས་གཏན་ནས་མེད་པར་སོ་སོའི་སོར་མཛུབ་ཀྱི་བར་ན་འཛུམ་དམུལ་ལེར་ཡོད། ཉིན་གཅིག ཉིན་གཉིས། ཉིན་གསུམ། ཉིན་མང་པོ་མང་པོ་ཞིག་འགོར་རྗེས་ཀྱི་ཕྱི་དྲོ་ཞིག་ལ། སློབ་མ་གསར་བའི་དམག་སྦྱོང་ཡོངས་སུ་མཇུག་རྗོགས་ཤིང་། སློབ་གྲོགས་ཚོས་རང་རང་གི་མཛའ་གྲོགས་དང་འགྲོགས་ནས་གླིང་ག་གཏོང་བ་དང་། འཆམ་འཆམ་དུ་འགྲོ་བ། སྡོང་གསིལ་དང་ལམ་འགྲམ་སོགས་སུ་དུས་ཆད་ཀྱི་ལས་ལ་བྲེལ་བཞིན་མཆིས།

“ཏུའུ། ཏུའུ།” ཞེས་སྐད་འཕྲིན་གྱི་བརྡ་ཞིག་སླེབས་ཡོང་།

བདེ་ལེགས་ཀྱིས། “པད་སྒྲོན། དགོངས་དག ངས་དུས་ལྟར་སྐད་འཕྲིན་དུ་ལན་འཇོག་མི་ཐུབ།”

པད་སྒྲོན་གྱིས།“ལགས། སྐྱོན་མི་འདུག ”

བདེ་ལེགས་ཀྱིས། “སྙིང་ཉེ་མ། དོ་ནུབ་ངེད་གཉིས་འཆམ་འཆམ་དུ་འགྲོ་ཐུབ་མ་སོང་།”

པད་སྒྲོན་གྱིས། “ཅི་བྱུང་སོང་།”

ས་རུབ་ལ་ཉེ་མོད། སྐད་ལན་ལ་རེ་བ་ཅི་ཙམ་བྱས་ཀྱང་ཨ་ལན་ཞིག་མ་བྱུང་། སློབ་གྲྭའི་གང་ས་གང་དུ་གློག་འོད་ཀྱིས་ཁྱབ་ཅིང་། སྲང་ལམ་གྱི་འགྲིམ་འགྲུལ་གྱི་གློག་འོད་མཚམས་རེར་སློབ་གྲྭའི་གྱང་ངོས་སུ་འཕྲོས་ཏེ་འོད་ལམ་ལམ་བྱེད། པད་སྒྲོན་གྱིས་དཔེ་ཆ་འགའ་མཆན་འོག་ཏུ་བཙིར་ནས་སློབ་ཁང་དུ་དགོང་ཚོགས་འཚོགས་པར་ཕྱིན་པ་ན། སྐད་འཕྲིན་ནང་གི་བྱམས་པ་བདེ་ལེགས་ནི་ཏག་ཏག་བུ་མོ་ཞིག་གི་སྐེ་ལ་འབྱར་ནས་སྡོང་གསེང་དུ་ཆས་སོང་། དགོང་མོའི་ཆུ་ཚོད་བཅུ་པ་ཡས་མས་ཤིག་ལ་སླེབས་བྱུང་། བདེ་ལེགས་ཀྱིས་སྐད་འཕྲིན་གྱི་བར་སྟོངས་སུ་སེམས་སོང་བུ་མོ་ཞེས་པའི་ཡིག་འབྲུ་ཁ་ཤས་དང་ལྷན་དུ་འདྲ་པར་གྱི་ཚོམ་ཞིག་བསྐུར་ཡོད་དེ། དེ་ནི་ཏག་ཏག་སྲོད་དུས་ཀྱི་བུ་མོ་དེ་ཡིན་པ་འདྲ། ཁོས་བུ་མོའི་རྒྱབ་ཁུག་དང་བསིལ་གདུགས་བཟུང་བའི་འདྲ་པར་དེར་མཛེས་བཟོ་ལེགས་པོ་བྱས་ཡོད། སྐབས་དེར། དྲ་གྲོགས་ཚོའི་ཞབས་མཆན་དང་སེམས་རྟགས་ནི་ཆར་འབབ་འབབ་བྱེད་ཀྱིན་གདའ། མང་ཆེ་ཤོས་ནི་མཛེས་བཟོ་བྱེད་པའི་འདྲ་པར་དེའི་ཆེད་དུ་ཡིན་པ་འདྲ། ཟླ་ངོ་ཁ་ཤས་ཀྱི་རྗེས་སུ་ཁོའི་གཟུགས་པོ་སྐམ་ཞིང་ཤ་རིད་པ་དང་། གདོང་མདོག་ཀྱང་ཇེ་དཀར་ནས་ཇེ་དཀར་དུ་གྱུར། སྒྱིད་པ་ཇེ་རིང་དང་དོར་མ་ཇེ་ཐུང་དུ་སོང་། ལུས་པོ་སྐམ་ཞིང་མགོ་སྐྲའི་ཁ་དོག་མཛེས་པ། འཇའ་ཚོན་སྣ་ལྔ་ལྟ་བུའི་མིག་གི་དབང་བོ་འཕྲོག་འདྲའི་གོན་པ་སྣ་ཚོགས་བརྗེ་སྤོར་མང་པོ་རྒྱག ཆེ་ཆུང་དང་སྦོམ་ཕྲ་མི་འདྲ་བའི་ཁུང་བུ་དག་ལས་ཁོའི་པུས་མོ་དང་བརླ་ཤ་སོགས་གསལ་བོར་མཐོང་ཐུབ། གཞན་ཁོར་དམིགས་བསལ་གྱིས་འགྱུར་ལྡོག་ཅིག་ཡོད་པ་ནི་སྐྲ་ཚུགས་འཇོག་སྟངས་དེ་རེད། ཁོས་མཚམས་རེར་བྱ་དེའི་ཅོད་པན་དང་འདྲ་བའི་སྐྲ་ཚིགས་འཇོག་ལ། མཚམས་རེར་ནི་ལྕོང་མོའི་དབྱིབས་ཅན། མཚམས་རེར་ཁེམ་བུའི་དབྱིབས་ལྟ་བུ་འཇོག

སྟོན་རླུང་དང་འགྲོགས་པའི་རྒྱ་མཚོའི་རླབས་རིས་ཤིག་ཀྱང་གནས་འདིའི་ཡུལ་མི་ཚོ་དང་འདྲ་བར་དགའ་སྤྲོས་བརྟས་ཤིང་སྐྱོམས་འགུལ་དྲག བདེ་ལེགས་ཀྱིས་གཟའ་མཇུག་གི་དུས་ཚོད་སྤྱད་ནས་མཛའ་གྲོགས་དང་མཉམ་དུ་མཚོ་འགྲམ་དུ་སྤྲོ་གསེང་ལ་བཞུད་སོང་། ཞོགས་པའི་ཉི་འོད་ཀྱི་ཀློང་ན་གསེར་མདོག་གི་སྐྲ་ལོ་དེ་ཇེ་སེར་ནས་ཇེ་སེར་དུ་གྱུར་ཏེ་རིམ་གྱིས་ཉི་འོད་ཀྱི་འོག་ཏུ་དམར་པོ་མེ་དང་གཉིས་སུ་མ་མཆིས། རླུང་གིས་བདས་པའི་མཚོ་འགྲམ་གྱི་བྱེ་མའི་ཚོགས་ནི་འཚབ་བེ་འཚུབ་བེ་རླབས་རིས་ལ་འཐིམས་ནས་ཐུར་ནས་ཐུར་དུ་བཞུར་གྱིན་གདའ། བདེ་ལེགས་ཀྱི་མཛའ་མོས་རྒྱ་མཚོར་ཁ་གཏད་དེ“མཚོ་མོ་ཞི་ཞིང་འཇམ་ལ། ཟེགས་མ་འཕྱོ་ཞིང་རླབས་རིས་འཇགས།”ཞེས་རྒྱའི་སྙན་ཚིག་ཅིག་བློ་ལ་གྱེར། རྒྱ་མཚོ་དང་ཉ་རྒྱ། ཉི་འོད་དང་རླབས་རིས། བྱེ་རྡུལ་དང་རྐང་རྗེས་མང་པོ་ཞིག་འགུལ་བཅས་དང་འགུལ་མེད་ཀྱི་བྱ་དངོས་དག་སྐྱོམས་སེ་སྐྱོམས། དང་ཐོག་མེ་འཁོར་ལ་བསྡད་དེ་ཧྲང་ཧེ་ལ་ཡོང་མཁན་གྱི་གཞོན་ནུ་དེས་གངས་རི་དང་སྤང་ཐང་བོར་ནས། གཙང་ཚབ་དང་ལུག་ཁྱུ་བརྗེད་ནས་ཉ་ཤ་ཟ་རྒྱུར་བྲེལ་བ་འདྲ། དེ་མ་ཐག་མཚོ་རླབས་ཤིག་གིས་གཞོན་ནུ་དེའི་ལྷམ་ཡ་གཅིག་སྟབས་མ་ལེགས་པར་རླབས་ཀྱིས་བཏེགས་པའི་རྒྱ་མཚོས་སྐྱོམས་ནས་མཚོ་ནང་དུ་ནུབ་པས་གོ་སྐབས་དེ་ཤོར། ཡུན་རིང་ཞིག་ལ་མཉན་རྒྱུར་སྤྲོ་བའི《ཡབ་ཆེན་གྱི་སྤང་ཐང་དང་། ཡུམ་ཆེན་གྱི་གཙང་བོ》ཞེས་པའི་གླུ་དབྱངས་དེ་ཉན་རྒྱུ་མ་བྱུང་། ཁོས་སྐད་འཕྲིན་གྱི་བར་སྟོངས་སུ་གཟའ་མཇུག་དང་མཛའ་མོ་ཟེར་བའི་བརྙན་ཐུང་ཁ་ཤས་གཅིག་རྗེས་གཉིས་མཐུད་དུ་སྤེལ་ལོ།།

དེ་ནི་ཕལ་ཆེར་དགུན་འགོའི་གཟའ་མཇུག་ཅིག་ཡིན་པ་འདྲ། དགུན་རླུང་གྲང་མོ་ཞིག་གིས་མོའི་གནག་སྣུམ་གྱི་སྐྲ་ལོར་རྡེག་བཞིན་རང་ཉིད་དགའ་བའི་གཞོན་ནུ་མ་ཞིག་ལ་ཀུ་རེ་བྱས་པ་དང་འདྲ། ལོ་ཟླ་གཙང་བོ་བཞིན་རྒྱུགས་པའི་ངོགས་སུ་རང་ཉིད་བོར་མ་མྱོང་བའི་འབྲོག་མཚོས་དཔེ་དེབ་ཅིག་མཆན་ལ་བཙིར་ནས་དཔེ་ཁང་དུ་ཆས། “ཨ་ཙི། སྨྱུ་གུ་བརྗེད་སོང་།” མོས་དེ་ལྟར་ཆིག་ལབ་བརྒྱབ། མགོ་བོ་བཀྱགས་ནས་ཕར་བལྟ་ཚུར་བལྟ་བྱེད་དུས་གམ་གྱི་གཞོན་ནུ་དེས་ཚུར་བལྟས་འདུག གཞོན་ནུ་དེས་ཅུང་སྐྱེངས་པའི་ཚུལ་གྱིས“ཁྱོད་བདེ་མོ”ཞེས་ལབ། དེ་དུས་པད་སྒྲོན་གྱི་སེམས་སུ་དགའ་སྣང་དང་མཚར་སྣང་འདྲེས་མས“སྨྱུ་གུ་ཞིག་གཡར་རོགས”ཞེས་བཤད། སྐད་ཆ་ཚིག་གསུམ་མ་བཤད་གོང་གཞོན་ནུ་དེས“གྲོགས་མོ་གསར་བ་ཞིག་ངོ་ཤེས་པར་དགའ་བསུ་ཞུ། རྗེས་མ་འབྲེལ་བ་བྱེད་ཡོང”ཞེས་མོའི་སྐད་འཕྲིན་ཨང་གྲངས་དྲིས་ནས་ནང་འཇུག་བྱེད། གཞོན་ནུ་དེས་སྐད་འཕྲིན་གྱི་འཕྲིན་ལམ་བརྒྱུད་ནས་རང་ཉིད་ངོ་སྤྲོད་བྱེད། ད་དུང་བློ་ཡུལ་ལས་འདས་པའི་འཛུམ་རིས་མང་པོ་ཞིག་བསྐུར་བ་དེས་པད་སྒྲོན་ལ་ཅུང་དོགས་མི་བདེ་བ་ཞིག་ཏུ་བཟོས། མོས་པཱ་གོར་ཞེས་པའི་འཕྲིན་ལམ་གྱི་གཞོན་ནུ་དེར་སྨྱུ་གུ་ཞིག་གཡར་རྗེས་དེབ་ཀྱི་ནང་དོན་གཙོ་བོ་དག་ཟིན་བྲིས་སུ་བཏབ། གཞོན་ནུ་དེའི་སྨིན་མ་སྟུག་ཅིང་མིག་མདངས་ནག་པ། གདོང་མདོག་དཀར་ཞིང་སྣའི་གཟེངས་མཐོ་བ། སྐྲ་ལོ་ནག་ཅིང་སྐྲ་མཚམས་རེ་ན་སྐྲ་དཀར་གྱི་ཉག་མ་རེའི་མགོ་བོ་འབུས་འདུག དེ་ནི་ཕལ་ཆེར་རྒས་རྟགས་མིན་པ་འདྲ། ཁོས་སྟོད་ལྭ་སྔོན་ནག་སྲིང་བལ་གྱི་བར་ཚགས་ཅན་ཞིག་གྱོན་ཞིང་། རྐང་ལ་གོ་ལྷམ་ཡུ་རིང་ཞིག་གྱོན་པ་དེ་ཡང་ཁོའི་གཟུགས་པོ་དང་ཚོད་ཚོད་ཅིག་ཏུ་སྣང་། ཁོའི་འགྲམ་པ་གཡས་པའི་ཟུར་ཞིག་ན་སྨེ་བ་ཆུང་ཆུང་ཞིག་ཡོད་དེ། དེའི་སྟེང་དུ་སྤུ་ཚོམ་ཞིག་ཀྱང་སྐྱེས་འདུག

འདྲིས་ཀྱིན་འདྲིས་ཀྱིན་དུ་པད་སྒྲོན་དང་པཱ་གོར་གཉིས་ཀྱིས་འཕྲིན་ལམ་ནས་ལབ་གླེང་མང་པོ་བྱེད་ཅིང་། པཱ་གོར་ནི་རྒྱ་སྐད་དང་དབྱིན་སྐད་གཉིས་ལ་ཐོགས་པ་མེད་པའི་སློབ་ཆེན་སློབ་མ་ཞིག་ཡིན་པ་མ་ཟད། སྤྱོད་པ་ལེགས་ཤིང་བརྩོན་འགྲུས་ཆེ་བའི་གཞོན་ནུ་ཕུགས་བསམ་ཅན་ཞིག་ཡིན། ཁོས་དུས་རྒྱུན་འབྲོག་མཚོར་ཀུ་རེའི་ཚུལ་དུ་ཁོ་རང་བོད་ཡུལ་ནས་མག་པ་འདུག་རབས་སོགས་ལབ་ཡོང་དུས་འབྲོག་མཚོའི་སེམས་པ་དགའ་ལྷང་ལྷང་བྱེད། པཱ་གོར་གྱིས་དུས་རྒྱུན་འབྲོག་མཚོར་ཁོ་བྱིས་པ་ལས་ངན་ཞིག་ཡིན་རབས་དང་། ཕ་མ་གཉིས་ཆུང་དུས་གཉེན་འཐོར་བྱུང་ནས་ཁོ་རང་ཨ་མ་གཅིག་པུས་བསྐྱངས་ནས་ནར་སོན་ཚུལ། ཕྱིས་སུ་ཨ་མས་ཀྱང་རང་གི་བུ་ཆུང་སློབ་གྲྭར་བསྐྱལ་ནས་སློབ་གསོ་ཡག་པོ་མྱོང་དུ་འཇུག་ཆེད་སྐྱེས་པ་གཞན་གྱི་ངོར་མ་བལྟས་པར་མི་ཚེ་ཧྲིལ་བོ་སྡུག་གིས་བསྐྱངས་རབས། བུད་མེད་ཁེར་ཧྲེང་མ་ཞིག་གིས་སྐབས་དེར་ཁོ་མ་བུ་གཉིས་བསྡད་ཡོད་སའི་གྲོང་ཁྱེར་དེ་ནས་གཞན་གྱིས་བརྙས་བཅོས་གྲངས་མེད་མྱངས་རབས། དེང་ཐོག་པཱ་གོར་གྱི་ཨ་མས་གྲོང་ཁྱེར་ཆུ་གློག་ཅུའུ་ནས་བྱ་བ་བསྒྲུབས་པ་དང་། སྟབས་མ་ལེགས་པ་ཞིག་ལ་རྗེས་སུ་ལས་ཁུངས་དེར་གནད་དོན་ཞིག་བྱུང་བ་དང་ལས་ཁུངས་ཀྱི་སྡོད་གནས་སྤར་དགོས་བྱུང་བས་པཱ་གོར་གྱི་ཨ་མས་ལོ་ན་ཆུང་བའི་བྱིས་པ་ཞིག་ཁུར་ནས་ལས་ཚོགས་ཟླ་བ་ཁ་ཤས་ཀྱི་རིང་སོང་མོད། མཐར་ལས་ཁུངས་ནང་གི་འགོ་བས་བྱིས་པ་ཁུར་བའི་བུད་མེད་ཅིག་ལས་ཚོགས་སུ་ཞུགས་མི་ཆོག་པའི་བཀའ་ནན་གྱིས་བབ་རབས། འདི་ལྟར་པཱ་གོར་ལོ་ན་དྲུག་ལ་སླེབས་དུས་ཨ་མས་ཁོ་རང་རང་ཁྱིམ་དང་ཐག་མི་རིང་བའི་གྲོང་ཁྱེར་གྱི་སློབ་ཆུང་དུ་མངགས་པ་དང་། ལོ་ན་ཆུང་བའི་བྱིས་པ་ཞིག་ཡར་སྐྱེལ་མར་ལེན་བྱས་ཞོར་སློབ་གྲྭའི་རྒྱ་སྒོ་ནས་ཚགས་པར་དང་བག་ལེབ་སྲེག་མ་བཙོངས་ནས་མ་བུ་གཉིས་ཀྱི་ཁ་གསོས། ཕྱིས་སུ་པཱ་གོར་གྱིས་སློབ་འབྲིང་དུ་རྒྱུགས་འཕྲོད་པ་དང་། པཱ་གོར་སློབ་འབྲིང་དུ་རྒྱུགས་སྤྲོད་སྐབས་ཏག་ཏག་ལོ་བཅུ་གཉིས་ལ་སོན་ཡོད་ཚུལ། ཁྱིམ་ནས་ཚོད་མ་བཀྲུ་བ་དང་ཕྱེ་བརྫི་བ་སོགས་ཁྱིམ་ལས་ཙག་ཙིག་ལས་ཤེས། གཞུག་ནས་པཱ་གོར་གྱི་ཨ་མས་གྲོང་ཁྱེར་ནས་རྐང་གསུམ་འཁོར་ལོ་ཞིག་ཉོས་ཏེ་གཞན་གྱི་དངོས་པོ་ཡར་སྐྱེལ་མར་ལེན་བྱས་ནས་ཉིན་གང་པོར་ངལ་གསོ་ཞིག་བྱ་ཁོམ་མེད་རབས། དེ་ནས་ལོ་ངོ་གསུམ་གྱི་རྗེས་པཱ་གོར་གྱིས་མཐོ་འབྲིང་ལ་རྒྱུགས་འཕྲོད་དེ་སློབ་གྲྭའི་སྒྲིག་ལམ་ལྟར་སློབ་གྲྭ་ནས་ཞག་སྡོད་བྱེད་ཚུལ། ཨ་མ་དང་ཁ་གྱེས་པའི་གནས་ཚུལ་དེ་ལབ་དུས་པཱ་གོར་མིག་ཆུ་ཤམ་ཤུམ་དུ་བཞུར་ཞིང་ལོ་གཉིས་ཀྱི་རྗེས་སུ་གྲོང་ཁྱེར་གྱི་འགྲིམ་འགྲུལ་དོན་རྐྱེན་ཞིག་བྱུང་ནས་རྐང་གསུམ་འཁོར་ལོ་སྐོར་མཁན་གྱི་ཨ་ཡེ་དེ་དུས་དེ་ནས་བཟུང་འཇིག་རྟེན་དང་གཏན་དུ་ཁ་བྲལ་སོང་རབས་སོགས་འཕྲིན་ལམ་བརྒྱུད་ནས་སེམས་གཏམ་ཡོད་ཚད་ཤར་མར་བཤད།

ཟླ་བཅུ་གཉིས་པའི་ཚེས་ཉེར་བཞི་ཉིན་གྱི་མཚན་མོར། གྲོང་ཁྱེར་དུ་ཆར་བ་ཟམ་མེ་ཟིམ་མེ་ཞིག་ཀྱང་འབབ་ཀྱིན་ཡོད། སློབ་གྲྭའི་ཁ་ར་ཁོར་ཡུག་ཀུན་ཏུ་ཡེ་ཤུའི་འཁྲུངས་སྐར་བསུ་བའི་སྟ་གོན་ལ་བྲེལ་བཞིན་ཡོད། པད་སྒྲོན་གྱིས་དཔེ་དེབ་འགའ་བཟུང་ནས་སློབ་ཁང་གི་གྲུ་ཟུར་ཞིག་ནས་དཔེ་ཀློག་གི་འགོ་རྩོམ་དུས་པཱ་གོར་ཡང་མ་གྲོས་གཅིག་མཐུན་གྱིས་སློབ་ཁང་དེར་སླེབས་བྱུང་། ཁོས་པད་སྒྲོན་རིག་མ་ཐག་རྒྱུགས་ཡོང་སྟེ་མོའི་གམ་དུ་ཙོག་ཅིང་། སྒེའུ་ཁུང་གི་ཕྱི་ནས་རླུང་བུ་ལྡོམ་པོ་ཞིག་ག་ལེར་སློབ་ཁང་དུ་འཚངས་བྱུང་། པད་སྒྲོན་གྲང་འདར་ཞིག་རྒྱག་ཞོར་པཱ་གོར་ལ་མགོ་བོ་བསྔས་ཏེ་ཡུད་ཙམ་ལ་བསྡད་པ་ན། པཱ་གོར་གྱིས་པད་སྒྲོན་གྱི་སྐྲ་ལོར་བྱིལ་བྱིལ་ལན་འགའ་བྱས་རྗེས་འགྲམ་པའི་སྟེང་དུ་འོ་ཞིག་བྱེད། དུས་ཚོད་སྐད་ཅིག་སྐད་ཅིག་གིས་འདས་ཤིང་པད་སྒྲོན་ནི་པཱ་གོར་ལ་འབྲལ་དུ་མེད་པའི་བརྩེ་དུངས་ཤིག་ཆགས་པ་མ་ཟད། དུས་རྒྱུན་དུ་པཱ་གོར་གྱི་སྐད་འཕྲིན་ལ་སྒུག་བཞིན་ཡོད། པཱ་གོར་ཡང་གཞོན་ནུ་མ་དེར་ཞེ་ཆགས། མཉམ་དུ་ཧུར་ཐག་འབད་ཐག་གིས་སློབ་སྦྱོང་བྱས་མཐར་འབྲོག་མཚོ་སྔར་ལས་ལྷག་པར་སློབ་སྦྱོང་ལ་དགའ་ཞིང་སྦྱང་འབྲས་ཀྱང་ཉིན་རེ་ནས་ཉིན་རེར་བཞིན་ཇེ་ལེགས་ཇེ་རྒྱས་སུ་ཕྱིན། མོས་ཆེད་ལས་དང་བསྟུན་ནས་ཕ་ཡུལ་གྱི་འདས་མ་ད་གསུམ་ལ་བློས་བསླངས་བྱས་ཏེ“གནམ་འོག་གི་བོད་ལྗོངས།”ཞེས་པའི་འཁྲབ་གཞུང་གི་རྒྱུ་ཆ་ཞིག་པཱ་གོར་ལ་གླེང་ཡོང་དུས། པཱ་གོར་ཡང་ཤིན་ཏུ་སྤྲོ་སྣང་སྐྱེས་ཏེ་དགུན་གནང་གི་འཚོ་བ་དེ་འབྲོག་མཚོ་དང་མཉམ་དུ་སྐྱེལ་རྒྱུའི་ཁ་དན་བྱས་ལ། ཁོ་རང་གཉིས་ཀྱིས་སློབ་གླིང་གློག་བརྙན་ལས་རིགས་ཀྱི་བརྩམས་ཆོས་དང་པོ་དེ་བཟོ་རྒྱུ་ཐག་གིས་བཅད་དེ་འབད་འབུངས་ཀྱི་དབུ་ཁྱུད་བྲིས།

ཐོག་དང་པོར་མེ་འཁོར་ལ་འདུག་མཁན་གྱི་བུ་མོ་གཞོན་ནུ་མ་དེ་སླར་ཡང་མེ་འཁོར་ལ་བསྡད་ནས་ཕ་ཡུལ་དུ་ཆས་ཀྱིན་ཡོད། དགུན་གཞུང་གི་བ་མོས་ས་གཞི་རྒྱན་ཞིང་། སེར་ལམ་ལམ་གྱི་ཉི་འོད་ནི་རྩེ་པོ་ཏཱ་ལའི་དབུ་རྩེ་བརྒྱུད་ནས་གཟི་བྱིན་གྱིས་འཆར་བའི་དགུན་དུས་དེར། རི་རྩེ་གངས་ཀྱིས་བསྐོར་ཞིང་། རི་སྐེད་ནགས་ཀྱིས་བརྒྱན་པ། རི་འདབས་སྤང་གིས་བརྟས་པའི་བོད་ཀྱི་ཡུལ་གྲུ་རིག་ཐེངས་རེ་རེར་པཱ་གོར་གྱི་སེམས་སྤྲོ་བས་བརྟས་ཤིང་མིག་ནས་མཆུ་མ་འཐོར། པད་སྒྲོན་གྱིས་མེ་འཁོར་གྱི་དྲ་མའི་ནང་ནས་ཕ་ཡུལ་གྱི་ནམ་མཁའ་དང་སྐྱ་ཐང་ཐིང་གི་ཕ་ཡུལ་གྱི་ས་གཞི། དེ་མིན་ཡུལ་མི་ཚོས་ར་ལུག་རི་ལ་འདེད་པའི་རྣམ་པ། ལྕགས་ཁེམ་དང་སླེ་བོ་ཐོགས་པའི་གྲོང་གི་ཨ་ཅེ་ཚོའི་འཛུམ་མདངས་དང་དགོད་སྒྲ་ཐོས་མ་ཉིད་རང་དབང་མེད་པར་འདས་དོན་མང་པོ་ཞིག་གློག་བརྙན་ཇི་བཞིན་སེམས་ཀྱི་བརྙན་རིས་ངོས་སུ་གསལ་བོར་འཆར།

“སྐུ་མགྲོན་རྣམ་པ། ལྷ་སའི་མེ་འཁོར་འབབ་ཚུགས་སུ་སླེབས་སོང་།” པཱ་གོར་དང་པད་སྒྲོན་གཉིས་སྟོད་ཉི་མ་ལྷ་སར་སླེབས་བྱུང་། ལྷ་སའི་གྲོང་གི་མཇལ་བ་ཚོ། མཇལ་བ་ཚོས་དབྱངས་སུ་གྱེར་བའི་མ་ཎིའི་དབྱངས་རྟ། དད་པའི་སྟོབས་ཀྱིས་འཚལ་བའི་བརྐྱངས་ཕྱག འདུ་ཁང་དང་ལྷ་ཁང་ནས་རྒྱུ་ཡོང་བའི་སྤོས་དུད་ཀྱི་དྲི་མ། ཆུང་ཆུང་བྱིས་པ་ནས་ཆེ་ཆེ་ལོ་ལོན་བར་གྱི་རེ་སྒུག་གི་འདུན་པ། པར་སྐོར་ལམ་གྱི་སློང་མོ་བ། གྲལ་འགྲིག་པའི་སྐོར་རྒྱག་པ། ད་དུང་མང་པོ་མང་པོ་ཞིག་གནས་འདིར་འཛོམས་ནས་ཐ་མར་གནས་འདིའི་ཆེད་དུ་ཁོམ་གྱིན་མེད་པ་ཡང་སྙིང་ཅི། པཱ་གོར་གྱི་སེམས་ནས་བོད་པ་ཞེས་པའི་མཐོ་སྒང་གི་མི་རིགས་ཤིག་གནས་འདིར་གཞིས་ཆགས་ཏེ་འཛོམས་ནས་ཡང་སྙིང་ཅི་ཞིག་ལ་སྐྱབས་འཇུག་ཞུ་བཞིན་ཡོད་དམ། ལྷ་སའི་བར་སྐོར་ནས་མཇལ་བའི་ལོ་ལོན་མགོ་དཀར་དེ་དག་མིག་ཟུང་བཙུམ་ནས་ཅི་ཞིག་བྱེད་ཀྱིན་ཡོད་དམ། མཐོ་སྒང་ནས་ཕྱུགས་འཚོས་ཤིང་མཐོ་སྒང་ནས་རུ་བ་སྤོར། མི་ལ་མི་གཤིས་ཡག་པ། ས་ལ་ས་གཤིས་བཟང་བའི་མི་རིགས་ཤིག་གི་སེམས་ཀྱི་དད་ས་དེ་དོན་དམ་དུ་གང་ཡིན་ནམ། པཱ་གོར་གྱིས་རང་གིས་རང་ལ་དྲི་བ་ཁྲི་སྟོང་གི་རྒྱ་རུ་ཚུད་པར་བྱས།

“ཏུའུ། ཏུའུ།” སྐད་འཕྲིན་ནས་སྐད་ལན་ཞིག་འབྱོར་བྱུང་།

པཱ་གོར་གྱིས། “སྙིང་ཉེ། ཡར་ཀླུང་གཙང་བོ་དང་ཁྱེད་རང་གི་དྲ་མིང་ལ་འབྲེལ་བ་ཡོད་དམ།”

འབྲོག་མཚོས། “དགའ་ལོ། དེར་འབྲེལ་བ་དམ་པོ་ཡོད་དེ། ལྷག་དོན་ངའི་ཚེ་འདས་ཀྱི་ཨ་མ་ལགས་དང་འབྲེལ་བ་ཡོད།”

འབྲོག་མཚོས། “འོ། 《 གནམ་འོག་གི་བོད་ལྗོངས》ཞེས་པའི་ངེད་གཉིས་ཀྱིས་མཉམ་ལས་ཀྱིས་བཞེངས་པའི་གློག་བརྙན་དེ་ངའི་ཨ་མ་ལགས་ཀྱིས་འཁྲབ་རྒྱུ་བྱུང་ན་དེ་ལས་ཀྱང་གསོན་ཉམས་ལྡན་སྲིད། ཡིན་ཡང་། པཱ་གོར་ཁྱེད་ཀྱིས... ...”

པཱ་གོར་གྱིས། “སྙིང་ཉེ་མ། སེམས་ཁུར་མ་བྱེད། ཇོ་མ་གླང་མ་དང་ཡར་འབྲོག་གཡུ་མཚོ། ད་དུང་རུ་གྲོང་གི་ཨ་ཅག་ཚོ། དེ་དག་གི་མགོ་རས་འོག་གི་འཛུམ་མདངས། ལྷང་ལྷང་གི་དགོད་སྒྲ། བོང་བུ་ཞོན་པའི་བགྲེས་སོང་སོགས་ཇི་འདྲའི་ཡིད་དུ་འོང་བ་ཞིག་རེད་ཨང་།”

པད་སྒྲོན་གྱིས། “སྐྱིད་པ་ལ། པཱ་གོར་ཁྱེད་ཀྱིས་ངེས་པར་གཟབ་དགོས། ཕོ་བྲང་པོ་ཏཱ་ལ། ལྷ་སའི་གླིང་གི་མཇལ་བ་ཚོ། ད་དུང... ...”

ཡང་པད་སྒྲོན་གྱིས། “ཕ་ཡུལ་གྱི་ཨ་ཅག་ཚོས་ལབ་པའི་སྐད་ཆ་དེ་དག འཁྲབ་སྟོན་པ་ཨ་ཅག་དེའི་མགོ་རས་ཀྱི་ཁ་མདོག་ནི་བརྙན་མིག་ནས་འབོར་མི་ཉན། ངས་མ་འོངས་པ་ངེས་པར་བརྒྱུད་དགོས་པའི་ལམ་བུ་ཏག་ཏག་ཡིན།”

པཱ་གོར་གྱིས། “བདེ་སྒྲོན། ངས་འདྲི་རྒྱུ་ཞིག་ལ། ཁྱེད་ཀྱི་ཡུལ་མི་ཚོས་གངས་ཁྲོད་ནས་ཅི་ཞིག་འཚོལ་ཀྱིན་ཡོད།”

པད་སྒྲོན་གྱིས། “ཁོ་རང་ཚོས་བྱིན་རླབས་འཚོལ་གྱིན་ཡོད།”

པཱ་གོར་གྱིས། “འོ་ན། ལྷ་སའི་གླིང་གི་མཇལ་བ་དེ་དག་གིས་མིག་བཙུམ་ནས་དོན་དངོས་སུ་ཅི་ཞིག་ལ་བསམ་བློ་གཏོང་བཞིན་ཡོད།”

པད་སྒྲོན་གྱིས། “པཱ་གོར། དོན་དག་ལ་ལ་ཞིག་ང་སྐྱེས་དུས་ནས་ནོར་འཁྲུལ་གྱི་འགོ་བརྩམས་ཡོད། དེར་བརྟེན་་་་་”

པད་སྒྲོན་གྱིས། “འོ། ཡུལ་མི་གནས་མཇའ་བ་ཚོས་ཚེ་འདི་ཕྱི་སྒོམ་གྱིན་ཡོད་ས་རེད། དེ་ནི་ང་ཆུང་ངུའི་དུས་སུ་རྨོ་མོ་ལགས་ཀྱི་ངག་ནས་ཐོས་པ་ཡིན།”

པད་སྒྲོན་གྱིས། “པཱ་གོར། གཉིད་སྐྱིད། ཉལ་ཁང་གི་གློག་གཟིམ་སོང་། སང་ཉིན་གློག་བརྙན་སྒྲིག་སྦྱོང་ཁང་ནས་མཇལ་ཡོང་། གཉིད་སྐྱིད།”

པཱ་གོར་གྱིས། “གཉིད་སྐྱིད།”

པད་སྒྲོན་གྱིས་སྐད་འཕྲིན་གྱི་སྒོ་གཏན་རྗེས་ཡར་མར་ལ་འདང་རྒྱབ་ནས་ཡེ་ནས་གཉིད་མ་ཁུགས། མོས་པཱ་གོར་གྱིས་དྲིས་པའི་བློས་མི་དཔོག་པའི་དྲི་བ་དེ་དག་ལ་ཞིབ་འདང་རེ་བརྒྱབ་རྗེས་བྱིས་དུས་ཀྱི་ཡུལ་མི་ཚོ་དྲན་ལ། འགྱུར་བཞིན་པའི་ཕ་ཡུལ་དང་ཆུང་དུས་ཀྱི་ཞིང་རྣང་མའི་བར་གྱི་རྩེད་གྲོགས་དགོད་གྲོགས་ཚོ། ད་དུང་བཟའ་ཚང་སྐྱིད་ལ་འཛོམས་པའི་དུས་ཀྱི་ནོར་བུ་གླིང་གའི་སྤྲོ་འཆམ། དེ་ལས་ཆེས་བརྗེད་དུ་མེད་པ་ནི་ཨ་མས་ཞིང་ཚིགས་ཀྱི་བར་ནས་བཏོག་པའི་རི་སྐྱེས་མེ་ཏོག་དང་དེ་དག་བསླེས་པའི་མགོ་རྒྱན་དེ་དག་རེད། མོས་ད་དུང་ནམ་རྒྱུན་རྨོ་མོས་ལབ་པའི་ལྷ་སྒྲུང་དང་ཨ་ཕའི་ཆང་གཞས། བྱིས་དུས་ཟེར་བའི་ཡིད་གར་འོང་བའི་ལོ་ཟླ་དེ་དག་དྲན་པའི་རྩིག་ལྡེབས་ཀྱི་ངོས་སུ་ཡང་ཡང་འཆར།

ཉི་མ་དེར་ཕྱི་རུ་ཆར་བ་ཟམ་ཟིམ་ཞིག་འབབ་ཀྱིན་འདུག གྲོང་ཁྱེར་གྱི་མཁའ་དབུགས་འཁྱགས་པས་པད་སྒྲོན་གྱི་ལུས་ལ་འཁྱགས་སིབ་སིབ་ཀྱི་སྣང་བ་ཞིག་སྟེར། འཕྲིན་ལམ་ནས་དུས་ཆད་བྱས་པའི་པཱ་གོར་གྱིས་པད་སྒྲོན་གྱི་སྐད་འཕྲིན་ལ་སྒུག་ཡོད། ཕལ་ཆེར་ཁོས་སྒུག་ནས་ཡུན་རིང་འགོར་སོང་བ་འདྲ། པཱ་གོར་གྱི་སྟོད་ལྭ་ཅུང་བརླན་ནས་ཡོད་ན་ཡང་ཁོས་འཛེམ་དོགས་སྤུ་ཙམ་ཡང་མེད་པར་པད་སྒྲོན་གྱི་ཕྱོགས་སུ་མིག་ཅེར་རེར་བལྟས་འདུག ནམ་རྒྱུན་ཡིན་ན་ཁོས་མཛའ་མོར་དགའ་བའི་དགོད་གཏམ་འཆད་ཅིང་མ་འོངས་འཚོ་བའི་ལམ་ཀ་ལ་འཆར་གཞི་བཟོ་བ། ཡང་མཚམས་རེར་བྱིས་པ་བསམ་མེད་ཅིག་དང་འདྲ་བར་ཁ་རྩེད་ལག་རྩེད་བྱས་ནས་མོ་རང་ལྷོད་ཀྱིས་སྡོད་པར་བར་ཆད་བྱེད། ཁོའི་ནར་མ་སོན་པའི་བྱ་སྤྱོད་དེས་པད་སྒྲོན་ལ་བྱིས་དུས་ཀྱི་འཚོ་བ་དྲན་དུ་འཇུག་ངེས། རྩེད་དགའ་ཆེ་བའི་གཞོན་ནུ་པཱ་གོར་ནི་ཆར་ཀློང་ན་བླ་འཁྱམས་པའི་རི་དྭགས་ཤིག་རྙི་ལ་ཐོགས་པ་དང་འདྲ་བར་བསམ་རྒྱུ་དྲན་རྒྱུ་མེད་པར་སྐད་འཕྲིན་གྱི་ལམ་ནས་འབྲོག་མཚོ་ཁོ་ནར་སྒུག

“པཱ་གོར། ཅི་རེད། ཁྱོད་ཀྱིས་གློ་ལུ་རྒྱག་བཞིན་པ་ངས་ཐོས་བྱུང་། ངའི་སྙིང་གི་མི། དོན་དག་ཅི་བྱུང་སོང་།”ཞེས་འབྲོག་མཚོ་ཧད་སོང་།

“བུ་མོ་སྙིང་ལ་རྗེ་བོ། ལས་དབང་ལ་མཚམས་ལན་རེར་གཏན་ནས་ཨུ་ཚུགས་བྱ་ཐབས་མེད། འོ་རེད། ད་མི་འགྱང་བར་དབྱར་གནང་གཏོང་ལ་ཉེ། ང་ཐེངས་གཉིས་པར་བོད་ལྗོངས་ལ་འགྲོ་རྒྱུའི་གོ་སྐབས་ཕལ་ཆེར་མེད་སོང་། ངས་ངེས་པར་དུ་དུས་ཚོད་འདི་དག་དམ་འཛིན་བྱས་ཏེ་དོན་དག་ཅིག་བསྒྲུབ་ཏུ་འགྲོ་དགོས”པཱ་གོར་གྱིས་ལག་པ་འདར་བཞིན་དུ་དེ་ལྟར་ལབ་བྱུང་།

“ནད་འདི་ངའི་ཨ་མའི་འདས་རྐྱེན་དང་ཅི་འདྲའི་མཚུངས་ཨང་། དཔེ་མི་སྲིད། དཀོན་མཆོག་གསུམ་པོ་མཁྱེན། མིན། དཔེ་མི་སྲིད།” འབྲོག་མཚོས་ཚོད་ཚོད་ལ་དེ་ལྟར་ཁེར་ལབ་བརྒྱབ།

“པད་སྒྲོན། མིག་ཆུ་མ་འདོན། མིག་ཆུ་དེ་གང་འདོད་དུ་གདོན་མི་རུང་། མིག་ཆུའི་ནང་དུ་ཆུང་ནས་ད་བར་འུ་ཅག་གི་ཕ་མ་དང་ཕ་ཡུལ་གྱི་ཡུལ་མི་ཚོའི་འཛུམ་མདངས་རུམ་ནས་ཡོད། ངས་ད་དུང་མང་པོ་ཞིག་བཤད་འདོད་ཆེ། ཡིན་རུང་དུས་ཚོད་ཐུང་། མི་ཚེ་ཐུང་། མིག་ཆུས་ཞེ་སྡང་གསོད་ཐུབ་པ་མ་རེད། མི་ཚེ་ཐུང་ངུ་འདིར་ངས་གངས་རིན་པོ་ཆེ། སེ་འབྲས་དགེ་གསུམ། རི་བོ་གྲུ་འཛིན། གནས་མཆོག་ཡིད་དུ་འོང་བ་མང་པོར་མཇལ་ཡོད།” པཱ་གོར་གྱིས་སེམས་དུང་དུང་གིས་དེ་ལྟར་ལབ།

“པཱ་གོར། མི་ཚེ་ཐུང་ཐུང་ཡིན་རུང་། གནམ་རྒན་མས་ཚེ་སྲོག་གི་རྩེད་ཆས་བསྒྲིགས་པ་འདྲ། ངས་ལས་དབང་ལ་གཏན་ནས་ལེ་བདའ་མི་བྱེད། གནམ་རྒན་མ་མིག་ཡོད་ན་ང་ལ་མགོན་སྐྱབས་གནང་རོགས།”འབྲོག་མཚོས་སྤོབས་པ་ཆེན་པོས་དེ་ལྟར་བཤད།

པཱ་གོར་གྱིས། “པད་སྒྲོན། དེ་རིང་ང་ངོ་མ་ཅིག་མི་བདེ་ཀི ནམ་ཉིན་མ་ཞིག་ལ་བདག་གིས་ཉི་འོད་ཀྱི་ཀློང་ནས་ཆར་ཆུས་སྦངས་པའི་སྐད་ཆ་ཡིད་དུ་འོངས་པ་དག་ལ་ཁྲུས་གསོལ་ཐེངས་ཤིག་བྱ་ཁོ་ཐག་ཡིན།”

པད་སྒྲོན་གྱིས། “པཱ་གོར། ཁྱོད་ལ་དབང་བ་དེ་དོན་དངོས་སུ་གང་རེད། ཁྱེད་ཀྱིས་ཅི་ཞིག་འཚོལ་གྱིན་ཡོད།”

པཱ་གོར་གྱིས། “འབྲོག་མཚོ། བུ་མོ་མེ་ཏོག་འདྲ་བོ། དུང་རི་བོད་ཀྱི་གཞོན་ནུ་ཞིག་ཡིན། ཁོ་ཡང་ཁྱེད་ལ་དགའ་ནས་ཡུན་རིང་འགོར་ཡོད་པ་ངས་སྔུན་ན་ཤེས་ཡོད། རྩ་བ་རྒྱས་ནས་རྩེ་མོ་རྒས་མེད་ན་ཡང་ནད་འབུས་ཟོས་ནས་ཡུན་རིང་འགོར་བའི་མེ་ཏོག་དང་སྡོང་ལོ་དེ་དག་ལ་ཁྱེད་རང་ཇི་འདྲའི་ཞེ་འདང་ཆེ་ན་ཡང་ཐ་མ་རང་རང་སར་འགྲོ་དགོས། དེ་ཡང་ཆོས་ཉིད་ཅིག་སྟེ་སུ་དང་གང་གིས་ལྡོག་ཐབས་མི་འདུག སྲོག་རྩ་ཆད་ལ་ཉེ་བའི་མེ་ཏོག་དེའི་རིགས་ལ་ཉི་འོད་དང་ཆར་ཆུ་འཛོམས་ན་ཡང་ཅང་མི་འགོར་བར་ཤི་འགྲོ”

པད་སྒྲོན་གྱིས། “པཱ་གོར། ངས་འཇིག་རྟེན་ནས་འཇིག་རྟེན་གཞན་ཞིག་སྨོན་པ་འཆོར་དགོས་དོན་མེད་སྙམ། འུ་ཅག་གིས་རྨི་ལམ་ནས་མཇལ་བའི་འཇིག་རྟེན་དེ་དེང་ཐོག་ཅི་འདྲའི་མཛེས་སྡུག་ལྡན་ན་ཡང་། རྨི་ལམ་ལས་སད་དུས་སྔར་བཞིན་མཇུག་འབྲས་སྔར་བཞིན་སྐྱི་གཡའ་བ་ཏག་ཏག་རེད།”

པཱ་གོར་གྱིས། “པད་སྒྲོན། ཉི་མ་དེར་མི་ཞིག་གིས་ང་ལ་རེ་བ་ཆུང་ཆུང་བཅོལ་ཡོད། བོད་ཀྱི་བུ་མོ་ཞིག་ཡིན། མོ་ཡར་འབྲོག་གཡུ་མཚོའི་ཁ་ནས་སྐྱེས་པ་རེད། གངས་རི་དང་སྤང་ཐང་ནི་བུ་མོ་འདིས་ཆེ་མཐའ་མཇུག་གི་ལོག་མལ་ཡིན། རྒྱུ་མཚན་དེའི་དབང་གིས་མོས་མི་རབས་འདིའི་བདེ་སྡུག་ཁུར་དགོས། པཱ་གོར་ཁྱེད་ཀྱིས་ཀྱང་དེའི་ཕྱོགས་སུ་དོ་སྣང་ཡོད་པར་ཞུ་ཞེས་ཡང་ཡང་སྐུལ་སོང་།”

པད་སྒྲོན་གྱིས། “པཱ་གོར། ཁྱེད་ཀྱིས་དོན་དག་ཅིག་ངེས་པར་དུ་ང་ལ་ཁས་ལེན་དགོས། དེ་མཐར་ཕྱིན་ཉིན་མོ་དེར་ལབ་ཡོང་།” ཞེས་མིག་ཆུ་འབྱིད་བཞིན་མོས་སྐད་ཆ་ཆེས་རྗེས་མ་ལབ་ཡོང་།

པཱ་གོར་གྱིས། “པད་སྒྲོན། ཆར་བ་ཇེ་འབབ་ནས་ཇེ་འབབ་རེད། ཨ་མའི་དུར་ས་དང་ངའི་རང་ཁྱིམ་དུ་ལུས་པའི་དཔེ་རྙིང་དེ་དག བྱིས་དུས་པར་རིས་སྙིང་ཉེ་བ་དག ཕལ་ཆེར་ཆར་ཆུས་བརླན་ནས་རུལ་སོང་ན་ཐང་། གཟའ་འཁོར་རྗེས་མར་ང་ཕ་ཡུལ་དུ་བུད་འགྲོ ནམ་ཡོང་རང་ཉིད་ལ་ཡང་མི་གསལ། མཐར་ཕྱིན་གྱི་ཉིན་མོ་ཡིན་ན་ཐང་།” ཞེས་པཱ་གོར་གྱིས་སྐད་ཆའི་མཇུག་མ་བསྐྱངས་གོང་གློ་ལུ་ཞིག་བཅས་དྲ་ཡང་ཆད་སོང་། གནམ་ངོ་གནག་ཅིང་ཆར་བ་ཤག་ཤག་ཏུ་བབ་བྱུང་། ཆར་བ་འབབ་ཀྱིན་འབབ་ཀྱིན་ཇེ་འབབ་ནས་ཇེ་འབབ་ཏུ་གྱུར།

“ཏུའུ། ཏུའུ།” སྐད་འཕྲིན་ཞིག་འབྱོར་བྱུང་།

དུང་རིས། “གཟའ་མཇུག་རེད་མོད། སྡོང་གསེང་ལ་དཔེ་ཀློག་བྱེད་དུ་འགྲོ”ཞེས་བྲིས་འདུག

པད་སྒྲོན་གྱིས། “དགོངས་པ་མ་ཚོམ། དུང་རི། ང་ལ་གཟའ་མཇུག་མེད། ང་གཅིག་པུ་ལྷིང་འཇགས་ཀྱི་གནས་ཤིག་ཏུ་བུད་སོང་།” ཞེས་པའི་སྐད་ཞིག་བསྐུར།

དུང་རིས། “འོ། པཱ་གོར་སློབ་གྲྭར་སླེབས་སོང་ངམ།” ཞེས་ནན་འདྲི་ཞིག་བྱས་ཡོང་།

པད་སྒྲོན་གྱིས། “ཁོས་ང་ལ་འབྲེལ་བ་བྱས་མ་སོང་།”

དུང་རིས། “འབྲོག་མཚོ། ལོ་ངོ་འདི་གཉིས་ཀྱི་ནང་འགྲོ་འདུག་གོམ་པའི་བར་ནས་ཁྱེད་རང་དྲན་པ་མང་ཀི ཉལ་བའི་རྨི་ལམ་ནང་ནས་ཁྱེད་རང་མཇལ་ཐེངས་མང་ཀི” ཞེས་སྐད་འཕྲིན་དུ་བསྐུར་ཡོང་།

པད་སྒྲོན་གྱིས། “མི་ཚང་མ་འགྱུར་གྱིན་ཡོད། ཐ་ན་རྒྱ་མཚོ་དང་བྱེ་ཐང་། རྐང་རྗེས་དང་བསིལ་རླུང་། ཨ་ཡ་མཚན། འཇིག་རྟེན་གྱི་བྱ་དངོས་ཡོད་ཚད་ཀྱི་ཆེས་མཇུག་མཐའི་གདམ་ཀ་ནི་རྨི་ལམ་དང་འགྲོགས་ནས་འཇིག་རྟེན་གཞིན་ཞིག་ཏུ་འགྲོ་རྒྱུ་དེ་རང་རེད་འདུག ཨ་ཙི། མིའི་རིགས་ཀྱང་ངོ་།།”

“ཨ་ཡ་ཡ། རླུང་གཡུགས་བྱུང་། བརྡ་རྟགས་མི་བཟང་ཀི ཕེ་ཕེ། མཚོ་རླུང་།” འབྲོག་མཚོའི་རྩི་ཏོག་གིས་བསླེས་པའི་ཞྭ་མོ་དེ་ཡང་བསིལ་རླུང་གིས་བདས་ཏེ་བར་སྣང་ཞིག་ནས་ཕྱིར་འོང་ཞིག་མ་བྱུང་། ཉི་མ་ནུབ་ལ་ཉེ་མོད། མོས་མཚོ་འགྲམ་ནས་རྩི་ཏོག་གི་ཞྭ་མོ་དེར་སྒུག་ནས་བསྡད།

གློ་བུར་དུང་རིའི་སེམས་སུ་དེང་ཐོག་ཁོས་གད་སྙིགས་འཕངས་པའི་ཤོག་ལྷེ་དེ་ཡིད་ལ་དྲན། “རྒྱུད་འདེད་ནད།”ཅེས་ལན་འགར་ཟློས། ལོ་དེ་ནི་སྐད་འཕྲིན་གྱི་འཕྲིན་ལས་དར་བའི་ལོ་ཡིན། སློབ་མཐར་ཕྱིན་ལ་ཉེ་བའི་སློབ་གྲོགས་ཚོས་ཚོགས་པ་དང་ཚོགས་པ་བྱས་ཏེ་མཉམ་པར་བསྐྱོན་གྱིན་ཡོད།

“ཏུའུ། ཏུའུ།” འདར་སྒྲ་ཞིག་དང་བཅས་ཏེ་སྐད་འཕྲིན་གྱི་བརྡ་ཞིག་སླེབས་བྱུང་།

འབྲོག་མཚོ། “དུང་རི། པཱ་གོར་སློབ་གྲྭར་འབྱོར་འདུག་གམ།”

ཚེས་དགུ་ཉིན་གྱི་མཚན་མོར།སློབ་གྲྭའི་ཁོར་ཡུག་ཀུན་ཏུ་ཟང་ཟིང་ཞིག་ཏུ་གྱུར་འདུག སློབ་གྲྭའི་གསར་འགྱུར་གླིང་ན་པཱ་གོར་གྱི་མཐར་ཕྱིན་གློག་བརྙན་བརྩམས་ཆོས《བོད་པའི་བུ་མོ་བདེ་སྐྱིད་པད་སྒྲོན》ཞེས་པ་སྟོན་གྱིན་པའི་གསར་འགྱུར་ཞིག་གང་ས་གང་དུ་སྒྲོག་གིན་འདུག པཱ་གོར་དང་དུང་རི་གཉིས་ཀྱང་འཚོགས་ཁང་གི་ལྟག་རྒྱབ་ཀྱི་གྲལ་ཤར་ཆེས་མཇུག་མ་དེར་བསྡད་ནས་ཅི་ཞིག་འཆད་ཀྱིན་ཡོད། པཱ་གོར་གྱིས་ལག་པས་དུང་རིའི་ལག་པར་འཇུ་བཞིན་ནན་གྱིས་སྐད་ཆ་འགའ་ལབ་རྗེས་སྒོར་བུད། དེར་མཐུད་ནས་དུང་རི་ཡང་པཱ་གོར་གྱི་རྗེས་འབྲང་ནས་མུན་ནག་ཀློང་ནས་ཕྱིར་ཡོང་ཞིག་མེད་སོང་།

པཱ་གོར་གྱིས། “འབྲོག་མཚོ། གློག་བརྙན་ལ་བལྟ་ཀི་མ་ཡོང་ངམ། ང་བུད་སོང་། དུས་གཏན་དུ་ང་འགྲོ་སའི་ལམ་བུ་དེ་དེད་ནས་བུད་སོང་། ང་སོང་རྗེས་སེམས་སྡུག་གཏན་ནས་བྱེད་མི་ཉན། ང་མི་སྒེར་སེམས་ཅན་ཞིག་རེད་གཏན་ནས་འདོད་མི་ཉན། དུང་རི་མི་བཟང་ཞིག་ཡིན། བདེ་བར་སྨོན། སྙིང་ཉེ་མ།” ཞེས་སྐད་འཕྲིན་དུ་སྐད་ལན་དེ་ལྟར་བཞག་འདུག

པཱ་གོར། “དུང་རི། ང་བུད་སོང་། གསོན་ནས་བསྡད་ཀྱང་ང་ཉིན་གཉིས་ཀྱི་དུས་ཚོད་ཡིན། ངས་ཆེས་མཐའ་མཇུག་ཁྱེད་ཀྱི་དྲོད་ལམ་ལམ་གྱི་ལག་པ་ཀློད་རྒྱུ་དེ་ཡང་ཤིན་ཏུ་ཁག་པོ་རེད། དུང་རི། ད་དུང་ངས་དོན་དག་མང་པོ་ཞིག་སྐྱེ་བ་ཕྱི་མར་ལབ་རྩིས་ཡོད། བདེ་སྐྱིད་པད་སྒྲོན། བུ་མོ་གཤིས་བཟང་མ་ཞིག་ཡིན། སྐྱ་མོའི་ལམ་གྱི་སྐྱོ་རོགས་ཉན་དགོས། རེ་བ་འདི་སྟོང་ཟད་དུ་མི་གཏོང་བར་མཁྱེན། ང་བུད་སོང་།” ཞེས་པཱ་གོར་གྱིས་དུང་རིའི་སྐད་འཕྲིན་དུ་སྐད་དེ་ལྟ་བུ་ཞིག་བཞག་འདུག

མཚོ་ཆུང་ནོར་བུ་ཟེར་བའི་སློབ་ཆེན་པའི་ཁམས་གཡེང་བྱ་སའི་མཚོ་འགྲམ་དེའི་གློག་སྒྲོན་དག་མཚན་གང་བོར་གཟིམ་རྒྱུ་ཞིག་མ་བྱུང་། སྐད་འཕྲིན་གྱི་མིང་བྱང་ལ་དུང་རིར་འབོད་པའི་བོད་པ་གཞོན་ནུ་དེས《འཆི་བ》ཞེས་པའི་དཔེ་རྙིང་ཞིག་མཆན་ལ་བཙིར་ནས་གནས་དེར་བསྡད་འདུག ཁོ་གནས་དེ་རུ་ཡུན་རིང་ཞིག་ལ་ངུས་མཐར་དཔེ་རྙིང་དེ་མཚོ་རུ་བསྐུར།

ཟླ་དྲུག་པའི་ཚེས་བཅུ་ཉིན།་གློ་བུར་གནམ་ངོ་རུབ་ཅིང་དྲག་ཆར་བབ་བྱུང་། ཧྲང་ཧེ་གྲོང་ཁྱེར་གྱི་སྲང་ལམ་ཀུན་ཏུ་གློག་བརྙན《བོད་པའི་བུ་མོ་བདེ་སྐྱིད་པད་སྒྲོན》ཟེར་བ་དེ་སྟོན་གྱི་འདུག མི་ཚོགས་ཀྱིས་ཁ་གདངས་ནས་བོད་པ་ཞེས་པའི་གོ་དོན་དང་། བདེ་སྐྱིད་པད་སྒྲོན་ཟེར་བའི་མིང་མཚར་བོ་དེའི་ཡང་སྙིང་ཅི་ཞིག་མཚོན་གྱིན་ཡོད་དམ། ས་རུབ་ལ་ཉེ་དུས། གྲོང་མི་ཚོས་ད་དུང་བྲེལ་འཚབ་ཀྱི་ཀློང་ན་པཱ་གོར་གྱི་གློག་བརྙན་ལ་བལྟ་བ་ལས་པཱ་གོར་གླེང་མཁན་ཉུང་། འབྲོག་མཚོ་ཞེས་པའི་བུ་མོ་དེས་མཐར་ཕྱིན་དཔྱད་རྩོམ《ཞིང་གྲོང་གི་མ་ཡུམ》ཟེར་བའི་གློག་བརྙན་འཁྲབ་གཞུང་དེ་ཁྱེར་ནས་ཕ་རི་སིར་བསྐྱོད་པའི་གནམ་གྲུའི་པཱ་སེ་ཆེས་མཇུག་མ་དེ་ཉོ་རྒྱུ་ཐག་གིས་བཅད།

པད་སྒྲོན་གྱིས། “དུང་རི། མཆོད་རྟེན་ལྟར་ཀེར་གྱིས་འགྱིང་བའི་གངས་རི་དང་། མཚོ་མོ་ལྟར་ལྟེམ་ལྟེམ་གཡོ་བའི་སྤང་ཐང་། མེ་ཏོག་ལྟར་ཡིད་དུ་འོང་བའི་ཁྱིམ་གཞིས། ད་དུང་མང་པོ་ཞིག་སེམས་ལ་ཟུངས།”

པད་སྒྲོན་གྱིས། “དུང་རི། ངའི་ཁ་པར་གྱི་གློག་གཡུས་ཟད་ལ་ཉེ། ངས་ཁྱོད་ལྟ་བུའི་སྐྱེས་པ་ཡ་རབས་ཤིག་བསྐྱུར་རྒྱུ་དེ་དཀའ་ལས་ཁག་མོད། ཡིན་ཡང་། ལམ་འདི་ངེས་པར་དུ་གདམས་དགོས་པ་དེ་ཡིན་འདུག”

དུང་རིས། “ད་ང་ལ་ཅི་ཡང་མེད། ཚང་མ་ང་ལད་ནི་ཡིན། ང་རང་གིས་བལྟས་ན་ཡང་ངའི་མི་ཚེ་འདིར་དོན་སྙིང་ཅུང་ཙམ་ཡང་མེད་ཀི”

པད་སྒྲོན་གྱིས། “དུང་རི། ང་བུད་འགྲོ ང་ཐག་རིང་ཐག་རིང་གི་ཡུལ་གྲུ་ཞིག་ལ་ལྟད་མོར་ཆས་འགྲོ། དེ་ནས་རྨི་ལམ་དང་འགྲོགས་ནས་འཇིག་རྟེན་གཞན་ལ་བུད་འགྲོ།”

ཟླ་དྲུག་པའི་ཚེས་བཅུ་གཅིག་ཉིན། གྲོང་ཁྱེར་ཧྲིལ་བོ་དུད་སྨུག་གིས་བསྒྲིབས་ཤིང་། ལམ་འགྲོ་བའི་མིག་ལམ་རབ་བེ་རིབ་བེ་ཞིག་ཏུ་ཆགས་ཡོད། རྒྱ་མཚོ་དང་ཐག་མི་རིང་བའི་གྲོང་ཁྱེར་གྱི་ནམ་མཁའ་ནི་གཞི་ནས་ཁང་བརྩེགས་ཀྱིས་བཅད་དེ་ཇེ་དོག་ནས་ཇེ་དོག་ཏུ་གྱུར། ཕྱིས་སུ་ཁོ་ཚོའི་མཐོང་ལམ་ནས་སྣེ་ཚེག་ཅིག་ཏུ་གྱུར། “དུང་རི། ང་བུད་སོང། རྒྱང་རིང་རྒྱང་རིང་གི་གནས་དེར་བུད་སོང་།” ཞེས་པའི་ཆེས་མཇུག་མཐའི་སྐད་ཆ་དེ་དུང་རིའི་རྣ་ལམ་དུ་གསལ་ལྷིང་ངེར་གྲག་གིན་འདུག ཁོས་མི་ཚོགས་ཀྱི་འཚང་ཀའི་བར་ནས་ཧྲང་ཧེ་ནས་ཕ་ཡུལ་དུ་བསྐྱོད་པའི་མེ་འཁོར་གྱི་པཱ་སེ་ཆེས་འགོ་མ་དེ་ཉོས་བྱུང་། ཨང་རྟགས་སོ་བརྒྱད་པ་རེད། ཁོ་ཕ་ཡུལ་ལ་བསྐྱོད་པའི་མེ་འཁོར་ལ་བསྡད་མ་ཐག་ཏུ་དེང་ཐོག་གི་གླུ་གཞས“ང་ཚོ་ནི་མཐོ་སྒང་གི་བྱིས་པ་ཡིན། བཞུད་ཀྱིན་པའི་བྱིས་པ་ཚོར་མགོན་སྐྱབས་གནང་སྟེ། རང་ཉིད་ཀྱི་གནས་མལ་གྱི་ལམ་ཆེན་དེ་རྙེད་པར་སྨོན།” ཐེངས་འགར་ཟློས།

“པད་སྒྲོན། ངས་ཕ་ཡུལ་དུ་བསྐྱོད་པའི་པཱ་སེ་འགོ་མ་དེ་ཉོ་རྒྱུ་རེག་སོང་། ཉི་མ་ལྷ་སའི་ཞིང་ནས་མཇལ་ན། ཡར་འབྲོག་གཡུ་མཚོ་ཟེར་བའི་གཡུ་ཡི་མཚོ་མོ་ཞིག་ཡོད་པ་ངས་བརྗེད་མི་སྲིད། དགའ་ལྡན་གནས་མཆོག་གླིང་ནས་སྐྱེས་ན། ཤར་དུང་རི་ཟེར་བའི་རི་བོ་ཞིག་ཡོད་པ་ཁྱོད་ཀྱིས་བརྗེད་པ་མ་གནང་།” ཅེས་དུང་རིས་འགྲོ་ཞོར་ལམ་བུའི་སྙིང་ཐུབ་ཅེས་པའི་སྐད་ལན་ཞིག་པད་སྒྲོན་གྱི་སྐད་འཕྲིན་དུ་བསྐུར་དང་མི་བསྐུར་ངང་ཐེ་ཚོམ་གྱིས་ལུས་འདུག

པཱ་གོར་གྱིས། “གནམ་འོག་གི་བདེ་སྐྱིད་པད་སྒྲོན། པཱ་གོར་ཞེས་པའི་གཞོན་ནུ་དེའི་ཚེ་སྲོག་གཉོམ་ན་ཡང་། པད་སྒྲོན། བུ་མོ་མེ་ཏོག་འདྲ་བོ། བདེ་ལྡན་གངས་རིའི་ཞིང་ལ་ལོག་རོགས།”

མ་བསམ་ས་ནས། ལོ་དེའི་དབྱར་ཁར་པད་སྒྲོན་དང་མཉམ་པོར་འཁོར་སྒམ་ཨང་རྟགས་སོ་བརྒྱད་པར་སྡོད་མཁན་གྱི་གཞོན་ནུ་དེའི་དངོས་མིང་ལ་པཱ་གོར་ཟེར་ཞིང་། ཁོ་གཉོར་མཁན་གྱི་ཨ་མས་ཁོ་ལ་བདེ་ལེགས་ཞེས་མིང་ཡིད་དུ་འོང་བ་ཞིག་བཏགས། ཁོའི་ཉིན་ཐོ་ཞིག་ཏུ་ཆུང་དུས་མིང་ལ་ཆུ་ཆེན་ཞེས་འབོད་མཁན་ཡང་ཡོད་རབས་བྲིས་འདུག རྒྱུ་མཚན་སྐྱེས་ཁོངས་མི་གསལ་བའི་གཞོན་ནུ་འདི་གཉོར་མཁན་གྱི་བུད་མེད་དེ་འདས་རྗེས། རྟག་པར་ཁོའི་ཨ་མ་ཡིན་ཟེར་མཁན་གྱི་བུད་མེད་བགྲེས་སོང་ཞིག་གིས་རྗེས་འདེད་ཅིང་། སྐབས་ཐོག་དེར་པད་སྒྲོན་སྨན་བཅོས་བྱེད་བཞིན་པའི་སྒང་ཡིན། ངས་བསམ་ན་དུང་རི་ནི་གཞོན་ནུ་དེས་རང་གིས་རང་ལ་བཏགས་པའི་དྲྭ་མིང་ཞིག་ཡིན་པ་འདྲ། ལོ་དེའི་སྟོན་ཟླ་འབྲིང་བོར་གཞོན་ནུ་དེས་རྟག་པར་ཤེལ་མིག་ནག་པོ་ཞིག་གྱོན་ཞིང་། སྐབས་ཐོག་དེར་ཀུན་གྱིས་སྐྱེས་ཁོངས་མི་གསལ་བའི་གཞོན་ནུ་དེར་པཱ་གོར་ཞེས་འབོད་ཀྱིན་གདའ། དུས་དེ་ནས་བཟུང་མི་རྣམས་ཀྱིས་བདེ་ལེགས་ཞེས་པའི་མིང་དེ་ཧ་ལམ་བེད་སྤྱོད་མ་བཏང་པ་འདྲ། ཐ་ན་ཐོག་དང་པོར་མེ་འཁོར་དུ་བསྡད་དེ་སློབ་ཆེན་དུ་ཡོང་རོགས་ཀྱི་བུ་མོ་པད་སྒྲོན་གྱིས་ཀྱང་པཱ་གོར་ཞེས་པའི་མིང་དེ་བེད་སྤྱོད་གཏོང་ཀིན་འདུག སྨན་ཐོའི་སྟེང་གི་སྡོད་གནས་དེ་ཡང་ཇི་འདྲའི་ཁྱད་མཚར་པོ་ཞིག་རེད་ཨང་།

གྱ་གྱུའི་སྲང་ལམ་རེ་རེ་བརྒྱུད་ནས་གྲོང་ཚོའི་ནང་དུ་སླེབས་ཚེ། ཆེ་ཆུང་དང་རྒྱ་ཁྱོན་མཉམ་པའི་ས་ཁང་གྲུ་བཞི་རེ་རེ་སོ་ཡི་ཕྲེང་སྟར་ནང་གཞིན་གཤིབ་ཡོད། དེ་དག་ཐུན་མོང་དུ་ཡོད་པ་ནི་རྙིང་ཞིང་སྣུམ་དྲེག་ཆགས་པའི་ཤིང་སྒོ་རེ་རེ་ཡིན་ལ། གྲལ་འགྲིག་ཅིང་ཆེ་ཆུང་རན་པའི་ཤིང་སྒོའི་མཐོངས་ཀྱི་སྒོ་ཁྱམ་སྟེང་དུ། ཕ་མེས་ཀྱི་གོམས་སྲོལ་ལྟར་ལྟོ་བ་ལྡིར་ཞིང་ཞབས་ཞུམ་པའི་བསང་ཁྲི་ཆུང་ཆུང་རེ་བཞེངས་ཡོད། བསང་ཁྲིའི་མདུན་ངོས་སུ་གདུགས་དང་། འཁོར་ལོ། བུམ་པ། རྒྱལ་མཚན། དཔལ་བེའུ། དུང་དཀར། གསེར་ཉ། པད་མ་བཅས་བཀྲ་ཤིས་རྟགས་བརྒྱད་ཀྱི་རི་མོས་ཕུན་སུམ་ཚོགས་པར་བརྒྱན་ཞིང་། གཞོགས་ངོས་གཉིས་སུ་ཉི་ཟླ་ཁ་སྤྲོད་དང་། གཡུང་དྲུང་གི་རི་མོ་ཡིད་ཀར་འོང་པ་རེ་བྲིས་ཡོད། སྙིང་དུ་སྡུག་པའི་རི་མོ་རེ་རེ་དང་ཆ་འགྲིག་པའི་ཤིང་སྒོ་རེ་རེ་མཐོང་མ་ཉིད་དུ། གོམ་པའི་འདེགས་འཇོག་ལ་རང་དབང་མེད་པར་མདུན་ནས་མདུན་དུ་ཕྱོགས་འགྲོ གསོམ་ཤིང་དང་སྟག་པ། ཤུག་པ་སོགས་ཤིང་སྣ་མི་འདྲ་བས་བཟོས་པའི་ཤིང་སྒོ་རེ་རེའི་སྟེང་དུ་རྣམ་བཅུ་དབང་ལྡན་དང་། རྒྱལ་མཚན་རྩེ་མོ། ཤུག་པའི་ཤིང་ཐུར་འཛུགས་པ་སོགས་ནི་གྲོང་ཚོའི་ནང་གི་དུད་ཁྱིམ་རེ་རེས་ཐུན་མོང་བཀུར་བའི་གོམས་སྲོལ་ཞིག་ཏུ་ཆགས་འདུག དུད་ཁྱིམ་རེ་རེའི་ཤིང་སྒོར་ཟྭ་བརྒྱབ་མེད་པར་མ་ཟད། གཅིག་ལས་གཅིག་གིས་ཆེས་ཆེར་ཕྱེས་ཡོད་པར་མ་ཟད། ཕྱི་གསལ་ནང་གསལ་གྱི་དུད་ཁྱིམ་རེ་རེ་ནི་གཅིག་གིས་གཅིག་ལ་ཁེན་ནས་གཞིས་ཆགས་ཤིང་། རྙིང་རལ་དུ་གྱུར་པའི་ཤིང་སྒོ་རེ་རེའི་སྟེང་དུ་མ་ཎི་ཡིག་དྲུག་གི་སྡེབ་གྱིས་བཅད་པའི་སྒོ་དར་སྙིང་རྗེ་པོ་རེ་བཏགས་ཡོད། ཁ་དོག་སྣ་ཚོགས་འཛིན་པའི་སྒོ་དར་སྣེ་མོར་རས་ཤུར་རེ་བསྣར་ཡོད། དེ་དག་ནི་སྲོད་དུས་ཀྱི་དཔྱིད་རླུང་གིས་སྒུལ་ཏེ་གཡོ་ཙམ་གཡོ་ཙམ་བྱེད།

སྣུམ་རིགས་སྣ་ཚོགས་འགོས་པའི་ཤིང་སྒོ་བརྒྱུད་ནས་མདུན་དུ་ཕྱིན་ཙ་ན། ཤིང་གི་ནང་སྒོ་ཆུང་ཆུང་རེ་ཡོད་ཅིང་། ནང་སྒོ་ནི་ཕྱི་སྒོ་ལས་བོངས་ཆུང་ཞིང་། དཔངས་ལ་ཐོ་གཅིག་གཉིས་ཙམ་ལས་མེད་པའི་གྲུ་བཞི་ནར་གཟུགས་ཀྱི་དབྱིབས་སུ་བྱས་ཡོད། ནང་སྒོ་དང་ཕྱི་སྒོ་གཉིས་ཀྱི་ཐུན་མོང་གི་ཆ་ནི་ཤིང་སྣ་དུ་མས་གྲུབ་པ་དེ་རེད། ནང་སྒོ་ལས་ཆེས་ཐོག་མར་མིག་ལམ་དུ་མངོན་པ་ནི་ཡིད་དུ་འོང་བའི་ཆ་སྒམ་དང་དེའི་སྟེང་དུ་བསྒྲིགས་པའི་དཀར་ཡོལ་འབྲུག་རིས་མ་རེ་རེ་རེད། སྲོད་ལ་ཤར་བའི་ཟླ་འོད་ནི་ཤིང་གིས་བཟོས་པའི་ནང་སྒོ་ལས་ཐད་ཀར་ཡར་སྒྱེད་ཀྱི་ཆ་སྒམ་སྟེང་དུ་འཕྲོས་ཏེ། ཆ་སྒམ་སྟེང་གི་དཀར་ཡོལ་དང་སྡེར་མ་རེ་རེ། སྡེར་མའི་ནང་གི་ནས་ཕྱེའི་བག་ལེབ། དེ་མིན་བག་ལེབ་ཀྱི་སྟེང་བཀད་པའི་མྱེ་ཐིག་རེ་རེའི་སྟེང་ནས་ཁྲ་ལམ་ལམ་བྱེད། འོད་ལམ་ལམ་གྱི་ཆ་སྒམ་གྱི་གྲུ་ཟུར་རེ་རེ་ནས། ཟླ་འོད་ནི་འཁྱག་སིབ་སིབ་ཀྱི་སྣང་བ་ཞིག་དང་འགྲོགས་ཏེ་མཆོད་ཁྲིའི་སྒང་གི་སྡེ་བརྒྱད་མཆོད་པ་དང་ཛམ་ལྷའི་ཐོག་ཏུ་འཕྲོས་ཤིང་། དལ་བ་དལ་བུར་མར་མེའི་འོད་སྣང་དང་ཟླ་འོད་རིམ་གྱིས་སྣོལ་ཐིག་གཅིག་གི་སྟེང་དུ་བབས་ཏེ་གསལ་ལམ་མེར། མཆོད་ཁྲིའི་ནང་ངོས་སུ་བཤམས་པའི་འདྲ་སྐུ་རེ་རེའི་ཞལ་རས་སུ་འཕྲོས་ཡོང་དུས། འབུ་མེ་ལྕེབས་ཁ་ཤས་ཀྱང་འཕུར་མ་འདུར་གྱིས་གནས་དེར་འཚང་བྱུང་། གཤོག་སྒྲ་བྱུགས་བྱུགས་བྱེད། གྱང་ངོས་སུ་བཀལ་བའི་བསང་ཁུག་དང་བསུར་ཁུག དེ་མིན་བྱིས་པ་ཚོའི་ཐེ་ཀེ་བླུགས་སའི་ཁུག་མ་སོགས་ནི་གོ་རིམ་ལྟར་ཟླ་འོད་ཀྱི་དྭངས་ཆ་ལ་རེ་བ་ནང་བཞིན་ཁ་ཁུ་སིམ་མེར། ལྷིང་འཇགས་གེར་གྲག་འགུལ་ཅི་ཡང་མ་མཆིས། རག་ཤའི་ཕྲེང་བ་དང་། གདུང་ལྕམ་གྱི་བར་དུ་གསེབ་པའི་རྔ་སྡུད་དང་། གདུང་གསེང་ནས་ཆད་མ་མཐུད་ཀྱིས་བསྣར་བའི་སྡོམ་རྒྱ་སོགས་བྱ་དངོས་ཕྲ་ལ་རགས་པ་ཐམས་ཅད་ཀྱིས་རང་གཟུགས་ནི་མངོན་ལྐོག་མེད་པར་ཟླ་འོད་ཀྱི་མངའ་ཐང་ནས་ལྷང་ལ་བུད་བྱུང་། ཟླ་བའི་གནས་ཡུལ་ལ་འགྱུར་ལྡོག་བྱུང་བ་དང་བསྟུན་ནས་ཟླ་འོད་ཀྱི་འོད་སྣང་ལ་ཡང་རིམ་གྱིས་འགྱུར་ལྡོག་ཕྲན་ཙམ་བྱུང་སྟེ། མར་སྒྱེད་ཀྱི་རྩམ་གཞོང་དང་ནས་སྒམ། སྒྱོ་དང་སྒྱེ་མོ། པང་གདན་དང་། ཕྱིང་སྟན། རིམ་གྱིས་ཐབ་ཀའི་སྟེང་གི་ཟངས་པ་དང་ཇ་དེམ། བ་མ་ནག་རིལ། གོད་ཁུང་ནང་གི་མེ་ཡོག་སོགས་ཁྱིམ་གྱི་སྣོད་ཅ་ལག་རེ་རེའི་སྟེང་དུ་འཕྲོས་ཏེ་གསལ་ལྷིང་ངེར། སོ་སོའི་གནས་ཡུལ་དུ་འགུལ་བཅས་དང་འགུལ་མེད་ཀྱི་གྲིབ་གཟུགས་ཤིག་ཆེ་ནས་ཆེ་རུ་གྱུར་ཞིང་། མཐའ་མཇུག་ཆུང་ནས་ཆུང་དུ་གྱུར་ཏེ་ཡལ་སོང་།

ས་རུབ་ལ་ཉེ་ཁར། གྱང་ཆག་དང་མཁར་ཤུལ་གྱི་བྲ་ཁུང་རེ་རེར་སྐྱི་བསེར་གྱིས་རྡེག་ཅིང་། གཞིས་རྙིང་ཁུལ་གྱི་ཤིང་སྒོ་རྙིང་བ་གཉིས་པོའང་རླུང་ཁ་ནས་འགུལ་ཙམ་འགུལ་ཙམ་བྱེད། རླུང་ཁར་འགྲེང་བའི་ལོ་ལོན་གཉིས་མ་ཎི་ཁང་གི་ཕྱོགས་སུ་ཆས་སོང་། བགྲེས་སོང་དེ་གཉིས་ཀྱིས་རྐང་ལམ་དེ་དེད་ནས་བུད་སོང་མོད། ངའི་མིག་ལམ་དུ་མདུན་ཕྱོགས་ནས་མདུན་ཕྱོགས་སུ་ཡོང་གིན་འདུག

ཆུ་ཚོད་འཁོར་ལོའི་ཅོང་བརྡ་ཐོལ་གྱིས་གྲགས་ཏེ། རྫོགས་རྒྱུ་མེད་པའི་མཚན་ལམ་རིང་མོ་ཞིག་ཞེད་སྣང་གིས་ཕར་བསྐྱལ་སོང་། ཁྱོ་གས་སྐད་འཕྲིན་དུ་འཕྲིན་པ་ཞིག་བཏང་འདུག་སྟེ། “བདག་གི་དྲྭ་གྲོགས་པུ་རེ་ཡཱ་ཧའི་ནད་གཞི་དེ་དྲག་སྐྱེད་བྱུང་མི་འདུག མཆོད་མེ་རྐང་གཅིག་སྒྲོན་རོགས”ཞེས་བྲིས་འདུག ངས་མིག་སྐྱག་འབྱིད་བཞིན། “ཨ་ཙི། ཕངས་པ་ལ”ཞེས་ངག་ནས་བརྡོལ་སོང་ངོ་།།