ལས་སྐལ་གྱི་གྱེས་ཕྱག

ཁ་གྱའི་སངས་བཀྲ། 1972ལོར་སྐྱེས། 《 ཟླ་ཟེར》 དང《 སྦྲང་ཆར》 《 བོད་ཀྱི་རྩོམ་རིག་སྒྱུ་རྩལ》 《 གངས་ལྗོངས་རིག་གནས》སོགས་སུ་སྙན་ངག་དང་ལྷུག་རྩོམ། སྒྲུང་གཏམ། དཔྱད་རྩོམ། བསྒྱུར་རྩོམ་ཉིས་བརྒྱ་ལྷག་བཀོད། སྔ་ཕྱིར་སྐབས་གཉིས་པའི《 ཟླ་ཟེར》རྩོམ་རིག་བྱ་དགའ་དང་ཀན་སུའུ་ཞིང་ཆེན་སྐབས་ལྔ་བའི་གྲངས་ཉུང་མི་རིགས་རྩོམ་རིག་བྱ་དགའ། མཚོ་སྔོན་ཁྲིམས་ལུགས་ཚགས་པར་གྱི་བྱ་དགའ། གངས་རྒྱན་བུམ་པའི་རྩོམ་རིག་བྱ་དགའ་སོགས་ཐོབ། ཀྲུང་གོའི་གྲངས་ཉུང་མི་རིགས་རྩོམ་རིག་ལྷན་ཚོགས་དང་ཀན་སུའུ་ཞིང་ཆེན་རྩོམ་པ་པོ་མཐུན་ཚོགས་ཀྱི་ཁོངས་མི་དང་། ཀན་ལྷོ་རྩོམ་པ་པོ་མཐུན་ཚོགས་ཀྱི་ཚོགས་མི་བཅས་ཡིན། ད་ལྟ་གཙོས་གྲོང་ཁྱེར་སློབ་གསོ་ཅུས་སུ་སློབ་གསོའི་བྱ་བ་གཉེར་བཞིན་ཡོད།

འདི་ལྟར།

སྨྲ་འདོད་ཀྱི་མགྲིན་པ་ཚིག་གིས་བརྣངས་ཤིང་།

ཕྱིར་མིག་གི་མཐོང་ལམ་མཆི་མས་བསྒྲིབས་ཏེ།

ལག་ཟུང་གཡུགས་གཡུགས་ཙམ་ཡང་མེད་པར།

ཁྱེད་དང་ཁད་ཀྱིས་རྒྱང་དུ་བཀྱེད་པར་དགོངས་དག་ཞུ།

དོན་ངོ་མར།

ཁྱེད་དང་འཕྲད་པ་ནས

ཐོབ་ཤོར་ལ་བློ་ཁ་མ་ཕྱོགས་པར།

རྒྱལ་ཕམ་ལ་སྣང་དོགས་མ་ཤོར་བར།

བྱ་རྒོད་ཅིག་གིས་གནམ་འཕང་གཅོད་པ་བཞིན།

རྟ་མཆོག་ཅིག་གིས་སྤང་ཐང་དཀྱུ་བ་བཞིན།

རང་ལུས་དེ་ཤ་ཟད་རུས་ཟད་དུ་ཁྱེད་ལ་སྦྱར་ཞིང་།

རང་སེམས་དེ་ཕྱི་གསལ་ནང་གསལ་དུ་ཁྱེད་ལ་འཐིམ་སྟེ།

རེ་སྨོན་ཁྲི་ཕྲག་གི་སྒུལ་ཤུགས་སུ་བསྐུངས་ཏེ་མདུན་དུ་སྐྱོད་དུས།

ཕུགས་བསམ་གྲངས་མེད་ཀྱི་རྒྱབ་དཔུང་དུ་འགྲེང་སྟེ་ལམ་ལ་ཆས་དུས།

ང་ནི།

མུན་ནག་གི་གདོང་ལ་གཏད་པའི་འོད་ཀྱི་ཀ་བ་བཞིན།

རེ་སྙེག་གི་གོམ་ཁ་སྒྲུག་པའི་དུས་ཀྱི་ཕོ་ཉ་བཞིན།

འོད་སྣང་གི་ལམ་སྣེར་ཞུགས་པ་གཞར་ཡང་ལྷོད་མ་མྱོང་།

དུས་རབས་ཀྱི་རེ་སྐུལ་འབྲི་བ་གཏན་དུ་འཇགས་མ་མྱོང་།

མི་དམངས་ཀྱི་འདོད་བློ་འགུག་པའི་སྒྲ་དབྱངས་དེ་སུས་སྒྲོག

ཆོས་ཉིད་ཀྱི་བདེན་པ་བདར་བའི་ཀི་སྒྲ་དེ་སུས་བཏབ།

སྒེའུ་ཁུང་ཕྱེ་སྟེ་འོད་སྣང་མཐོང་འདོད་དེ་སུའང་ཡོད་ངེས།

སེམས་རྒྱ་གྲོལ་ཏེ་ཕྱི་ཡུལ་འགྲིམ་འདོད་ཅིག་ཀུན་ལ་མངའ་སྲིད།

དེ་བས།

ལས་སྐལ་གྱི་རྡོག་ཁྲེས་དེ།

ཚེ་སྲོག་གི་གདམ་ག་དེ།

དམིགས་འདུན་གྱི་ཕྲག་ཏུ་བླངས་པ་ནས།

འཚོ་བའི་སྙིང་བོར་སྒོམ་པ་ནས།

སེམས་པ་ལ་ཤེས་བཞིན་གྱི་ལྕགས་རི་བརྩིགས་ཏེ།

ཆགས་ཞེན་དང་བསླུ་བྲིད་ཀྱི་མངར་ཁ་ཟློག་ཅིང་།

རང་བློ་ལ་དཔྱོད་ཤེས་ཀྱི་ཁྲབ་རྨོག་གྱོན་ཏེ།

མུན་སྤྲུལ་དང་ཚུལ་འཆོས་ཀྱི་མཆེ་སྡེར་འགོག་དུས།

ང་ནི།

ལོ་ཟླའི་ཕྲེང་བ་ཐོད་ལ་བརྩེགས་ཤིང་།

དུས་ཀྱི་འགྱུར་བ་གདོང་གིས་བསུ་བའི།

དབྱངས་གསལ་གསེར་གྱི་མྱུ་གུ་སྐྱོར་བའི་སོ་ནམ་པ།

ཤེས་རིག་གཡུ་ཡི་གླིང་ག་སྲུང་བའི་མེལ་ཚེ་བ།

ཡང་ན།

རྨི་ལམ་ལ་ཚོན་མདོག་སྤྲོ་མཁན་དེའམ།

རྡོག་སྒྲ་ལ་འགྱུར་ཁུགས་སྩོལ་མཁན་དེའོ།

རེ་བཞག་གི་གུར་ཁུང་ཆུང་ཆུང་ཞིག་ཕྱེ་སྟེ།

ཁྱེད་ལ་དུངས་པའི་དབུ་ཁྱུད་བྲིས་པ་ནས།

བྱམས་བརྩེའི་ས་བོན་རྔུལ་ཁྲག་གིས་བསྙལ་བའི་གཡར་དམ་ཕུལ་ཞིང་།

རིག་པའི་གཤོག་ཟུང་དཔུང་སྟོབས་ཀྱིས་འདེགས་པའི་མནའ་ཚིག་བོར་ནས།

ནམ་ལངས་ཀྱི་དེ་ཕོ་ལྟ་བུའི་འབོད་སྐུལ་ཁྲོད་ནས།

རྟོགས་སད་ཀྱི་སྐྱ་རེངས་ཡང་དང་བསྐྱར་དུ་བསུས་ཤིང་།

ལྕགས་དབྱུག་ཁབ་ཏུ་བརྡར་བའི་གཏམ་རྒྱུད་ཁྲོད་ནས།

ཡོན་ཏན་མ་ལུས་བརྩོན་འགྲུས་རྗེས་སུ་འགྲོ་བའི་བདེན་པ་བསྙད།

ད་དུང་།

འོད་ལ་འཐིམ་པའི་བརྩེ་བ་དེ་སྒྲོག་གིན།

མུན་པར་འཐབ་པའི་སྤོབས་པ་དེ་སྐྱེད་ཀྱིན།

ལམ་ལ་ཆས་ཤིང་།

རྒྱང་དུ་བསྐྱོད་དུས།

དངོས་སམ་མངོན་དུ་གྱུར་པ་ནི།

གསོན་པོར་གནས་འཆའ་བའི་བཤུལ་རྗེས་དང་།

བདེན་པར་ཚེ་སྲིང་བའི་དན་རྟགས་སུ།

ཉོན་མོངས་ཀྱི་སྙིང་ག་རུ་སྨྱུག་རྩེ་བཙུགས་ཤིང་།

མིག་ཟུང་གི་སྐར་ཚོགས་ལ་འོད་སྣང་སྤྲོས་པ་དེ་ལས།

ང་ལ།

མཚར་སྣང་གི་མིག་སྒོ་གཅོད་བྱེད་ཀྱི།

འདོད་སེམས་ཀྱི་གཏིང་སར་ཉར་ཐུབ་པའི།

མི་རིགས་ལ་བསྟབས་པའི་གཏང་རག་ཅི།

གངས་ལྗོངས་ལ་ཕུལ་བའི་ལེགས་སྐྱེས་གང་།

མི་ཚེ་ཡི་རིན་ཐང་དང་ངོམ་སོ་རུ་བགྲང་ཆོག་པ་དེ་བས་ཀྱང་ངོ་།།

ང་ལ་ཅི་ཡང་མེད་ཨང་།

རྒྱུ་མཚན་དེའི་རྐྱེན་པས།

འདི་ལྟར་རྒྱང་ནས་རྒྱང་དུ་བཞུད་དུས།

ངའི་སྨྲ་བརྗོད་དེ་འདོད་རྔམ་གྱི་མེ་ལྕེ་ཡིན་ཡང་འབར་ཚར།

ངའི་གོམ་ཁ་དེ་ཆགས་ཞེན་གྱི་མཚོ་མོར་སྲིད་ཀྱང་གླུད་ཚར།

ད་ནི་ཡོད་ཚད་ཟད་ཀྱང་འཛད་ཚར་ན།

ང་ལ་ཞི་འཇགས་ཤིག་གནང་རོགས།

ཁོ་བོར་ལྷོད་གཡེང་ཞིག་སྩོལ་རོགས།

ང་རང་མངོན་ཆུང་གིས་ཆུ་མོ་བཞིན་འཁྱིལ་བར་འདོད།