འདི་ནས་མི་ལོ་དུ་མའི་ཡར་ནང་ན། །
ཚེ་རབས་སེམས་ཀྱི་བྱམས་པ་བཙལ་ཕྱིར་དུ། །
དཀའ་སྡུག་དཀྱོག་ལམ་རིང་མོ་བརྒལ་ནས་ནི། །
འཁོར་བ་པང་གི་དབུས་ནས་ལན་བརྒྱར་བརྒྱུགས། །
ཆུ་སྟག་རབ་བྱུང་ལོ་ཡི་ནང་ཚེས་ཀྱི། །
ལོ་སྟོད་ཟླ་བ་དང་པོའི་ཟླ་མཇུག་ལ། །
བསགས་པའི་སེམས་ཀྱི་དགའ་ཚོར་བརྗོད་པ་ལས། །
འཛུམ་པའི་ཟུར་ཐིགས་ཙམ་གྱིས་འུ་གཉིས་འདྲིས། །
འགྲོ་ལམ་ཕྱོགས་ཞེན་སོ་སོར་ཡུལ་གྱིས་ཁྱད། །
ནང་སེམས་དྲན་པ་ཉག་གཅིག་ལྷན་དུ་རྩེན། །
སྟབས་ལེགས་ཁ་པར་འདི་ཡི་དྲ་ངོས་སུ། །
གསང་ཚིག་ཡིད་ཀྱི་འཆར་སྣང་མཉམ་དུ་སྦྲེལ། །
འདྲིས་ནས་ནམ་ཟླ་མང་ཡང་གསེར་ཞལ་ཞིག །
འཕྲད་ནས་འཛུམ་པའི་ལང་ཚོ་མ་རེག་ཀྱང་། །
འུ་གཉིས་བརྩེ་དུང་རྣལ་མའི་རང་གཤིས་ལ། །
འགྱུར་མེད་དམ་ཚིག་མདུད་པ་བོར་མྱོང་མེད། །
དབྱར་གྱི་མེ་ཏོག་མཛེས་པས་ཁྱོད་གཅིག་དྲན། །
སྟོན་འདབ་ས་ལ་ལྷུང་དུས་ཁྱོད་གཅིག་དྲན། །
དགུན་ཟླའི་གྲང་ངར་ཀློང་ནས་ཁྱོད་གཅིག་དྲན། །
དཔྱིད་ཀྱི་ཁུ་བྱུག་གྲག་དུས་ཁྱོད་གཅིག་དྲན། །
ཉིན་དཀར་ཁྲི་གདུགས་འོག་ནས་གླུ་ཟིག་མཆོད། །
སྨྱུག་རྩེ་ཕྱག་ཟུང་ཁ་ནས་དབྱངས་ཟིག་འཐེན། །
དྲན་པའི་བདག་ཡིད་དབུས་ནས་མྱི་ཟིག་སྒོམ། །
ཚོར་བའི་དགའ་སྐྱོ་མྱོས་པའི་མགུར་ཟིག་ལེན། །
ཞོགས་པའི་སྐྱ་རེངས་ཁྲོད་ཀྱི་མཛའ་མོ་ཁྱེད། །
སྦྲང་དཀར་རྩམ་པའི་ཟས་ཤིག་མིན་ཡང་རུང་། །
བདག་ཡིད་བཀྲེས་སྐོམ་སེལ་བའི་ཞོགས་ཇ་སྟེ། །
ཉལ་ཁྲིའི་མལ་ས་འདི་ནས་དྲན་པས་ཚིམ། །
ཁྲི་གདུགས་ཉི་མའི་འོག་ན་གོམ་གྱིས་བགྲོད། །
བཞུད་ལམ་སྣེ་མོའི་གསེབ་ན་རོགས་ཤིག་འཕྲད། །
གྲོགས་མཐུན་ཕྱི་ཡུལ་མེད་ཀྱང་ནང་གི་སྟེ། །
ཨ་ཅེ་ཚེ་རིང་མཚོ་མོ་དྲན་པས་ཡིན། །
ནམ་ཟླའི་དུས་ཚོད་ཀློང་གི་མེ་ཏོག་ཁྱོད། །
སད་སེར་ཁ་བའི་བཙན་གྱིས་མ་བསུབ་ན། །
རྐང་དྲུག་བུང་བ་ང་དང་ཚེ་གཅིག་འདིར། །
རབ་མཛེས་སྐྱེད་ཚལ་འདི་རུ་ལྷན་དུ་འཚོ། །