བུད་མེད་ཅིག་ལ་སྤྲིངས་པ། (ཞར་བཀོད་གཅིག)

བརྟན་གཡོའི་རླུང་གིས་བཏེགས་པ་ཡི།།

གནམ་གྱི་གོ་ལའི་ཤར་རྒྱུད་དམ།།

རྒྱུ་སྐར་ཉེར་བདུན་འཚེར་བའི་དབུས།།

ང་ཡི་སྙིང་སྡུག་སེར་ཆེན་བཞུགས།།

ང་ནི་སྤྲིན་ཆུང་ཆུ་ཁུར་གྱི།།

གནམ་སྐས་བཙུགས་ཏེ་དེར་བསླེབ་ན།།

སྙིང་ཆུང་འཇའ་ཡི་གཟུགས་རིས་ཉིད།།

དམ་པོར་འཁྱུད་ན་ཆོག་གམ་ཅི།།

དྲ་ལམ་གློག་གི་འོད་རིས་ལས།།

འགྱུར་བའི་སྡུག་བསྔལ་མེ་སྟག་འཚུབ།།

ཁ་ཆད་དང་ནི་མནའ་ཚིག་དག།

རྡུལ་དུ་བརླགས་པའི་ཉམ་ང་མཐོང་།།

ནད་ཀྱིས་སེམས་ཅན་བསྣད་གྱུར་ཀྱང་།།

སེམས་ཉིད་ཁོ་ཐག་མི་ཆད་པར།།

དུས་མཐའི་མེ་ཡི་འོད་ཀོར་ལས།།

ཕན་ཚུན་སོར་རྩེ་འཕྲད་པར་ཤོག།

ཁང་བརྩེགས་གྲིབ་ཆེན་ཐང་ལ་ལྷུང་།།

ཕོ་རོག་སྟོང་སྐད་རླུང་གིས་ཁྱེར།།

ལས་སྨོན་ཁ་ཆར་འདྲེས་མ་དེས།།

ཁྱེད་ཀྱི་སྡུག་ཡུས་བརྗོད་པ་འདྲ།།

མུན་པའི་ནུ་འབུར་དོད་པ་ཡི།།

བར་གྱང་ངོས་ཀྱི་གྲིབ་མ་དེ།།

ཁྱེད་ཉིད་ཡིན་པར་སྒྲོ་བཏགས་ཏེ།།

ལག་པས་དལ་བུར་རེག་རེག་བྱས།།

བློ་ཡི་གུད་ནས་འཛུམ་པ་ཡི།།

སྙིང་སྡུག་ལགས་ཀྱི་ཞལ་རས་དེ།།

ཐག་ཁྲ་སྦྲུལ་དུ་འཁྲུལ་བ་བཞིན།།

བུམ་ནང་མེ་ཏོག་ཡིན་པར་རློམ།།

ཡིད་ཀྱི་བྱེའུ་ཆུང་དངངས་པའི་ཚེ།།

སེམས་གསོའི་སྦྲང་རྩི་འདྲེན་པ་ཡི།།

སྙིང་སྡུག་དེ་ནི་ཐག་རིང་གི།

གྲིབ་མ་བཞིན་དུ་ཟིན་ཐབས་མེད།།