མཐའ་མེད་འཇིག་རྟེན་གྱི་སྲིད་མཚོའི་ངོགས་ལ།།
འདོད་པའི་ཞེན་སྣང་གིས་རི་མོ་བྲིས་ཀྱང་།།
རྨི་ལམ་གཙང་ངོགས་ནས་བཞད་རྒྱུ་མེད་པས།།
འཁོར་བའི་བྱེ་ཐང་ནས་ཨ་ཐང་ཆད་སོང་།།
དར་རྩེའི་ཆང་གླུ་ཡི་འགྱུར་ཁུགས་བསམ་ན།།
སྙན་མོའི་ཚངས་མགུར་ཀྱང་བློ་ནས་བོར་འགྲོ།།
མ་བྲིས་ལྷ་སྲས་ཀྱི་བཞིན་རས་གསལ་བོ།།
ཚོར་འདུའི་སྟངས་ཀ་རུ་ཁྱུག་ཁྱུག་རྩེན་པ།།
ཡར་ལུང་གཙང་འགྲམ་ནས་ལམ་ལ་ཆས་རུང་།།
རྩེད་ཐང་མི་ཕོ་ཡི་རུས་པ་བསམ་ནས།།
གོམ་ཆུང་ལེབ་མོ་ཡི་སྤོ་མཚམས་བཞག་སྟེ།།
བསམ་གཞིག་ཁོར་མོ་ཡི་ཀློང་དུ་ཚུད་སོང་།།
ལས་དབང་ཡི་གེ་ལ་གདངས་སུ་བཏགས་ནས།།
བདེ་འཛོམས་སྐྱིད་ཤོད་དང་གྲོང་མཁར་བརྒལ་དུས།།
ཨ་ཇོས་ཞབས་བཅག་གི་རི་མོ་བསམ་ན།།
བར་སྐོར་གླིང་མཐའ་ནས་མིག་གཉིས་བརླན་འགྲོ།།
ས་སྲོད་མཚམས་སྤྲིན་ལ་འཁྱུད་པའི་ཁྲུང་ཁྲུང་།།
བརྩེ་བའི་གཤོག་འཕྲེང་གིས་རི་རྩེ་བརླན་དུས།།
རྒྱ་མཚོའི་བུ་མོ་ཡི་འཛུམ་ཆུང་ནང་ནས།།
ལྷ་སྲས་ཚངས་རྒྱམ་གྱི་མགུར་མ་བཞད་སོང་།།
གཙང་བོ་ལྡེམ་ལྡེམ་གྱིས་མར་ལ་བཞུར་ཀྱང་།།
ཟླ་བའི་ཤིང་གྲུ་དེ་ཡར་ཡར་འཕགས་པས།།
ལྷ་མོའི་སྒྱུ་འཕྲུལ་གྱི་རོལ་དབྱངས་ཁུགས་ནས།།
ལང་ཚོའི་ངག་རིག་གི་སེམས་གཞས་འཐོར་སོང་།།
ཕོ་བྲང་སྒེའུ་ཁུང་ནས་འཕྲོས་པའི་ཉི་ཐིགས།།
གླེགས་བུ་སེར་བོ་ཡི་ངོས་ལ་ལྷུང་བས།།
དཔེ་ཀློག་ཐུན་མཚམས་ཀྱི་སྤྱན་ཟུང་མདའ་མོ།།
རྫོང་རྒྱབ་ཀླུ་ཁང་གི་རྫིང་བུར་གཡེང་སོང་།།
མི་ཆེན་དཔོན་ཐང་གི་སྲས་དང་སྲས་མོ།།
ཀླུ་སྒུག་སྤྲང་ཚང་ལ་ཞེན་ཆགས་ལོས་ཆེ།།
འདྲིས་འདྲིས་ཆུང་གྲོགས་ཀྱི་ལས་དབང་སྐྱ་བོ།།
གཡུ་ཐོག་ཟམ་ཁ་རུ་ད་དུང་ལུས་ཡོད།།
སོ་དཀར་འཛུམ་ཆུང་གི་བསུ་མའི་མེ་ཏོག།
གཞོན་པའི་རྨི་ལམ་གྱི་ཞིང་དུ་བཞད་པས།།
དྲན་འཛིན་སྙིང་ཆུང་གི་ལོ་མའི་ལྟེང་ཀ།
མཛའ་བརྩེའི་སྦྲང་ཆར་གྱི་ཟེགས་མས་བཀྲུས་པ།།
ཁྲོམ་གཟིགས་ཚོང་ལམ་ནས་རྙེད་པའི་གཡུ་ཆུང་།།
ཁྲེལ་གཞུང་བྱམས་པ་ལ་སྐྱེས་སུ་ཨེ་སྒྲོན།།
ཨ་ཅག་པ་སངས་ལ་འཚེར་དོག་ཡོད་ན།།
གཙང་བོའི་གླུ་སྐད་ཀྱི་རུམ་ཁར་བསྐུང་ཆོག།
དར་གོས་སྲབ་འཇམ་གྱི་ཚལ་བུ་སྣ་ལྔ།།
ལན་གཅིག་སྐུ་ལུས་སུ་མནབ་རྒྱུ་བྱུང་ན།།
ལྷ་སའི་ཁྲོམ་གསེང་ནས་འཁོར་འཁོར་བྱས་ཏེ།།
ཆུང་འདྲིས་བྱམས་པ་ལ་ཐུག་འཕྲད་གནང་ཆོག།
2022ལོའི་ཧོར་ཟླ11པའི་ཚེས11ལ།