ཞེ་འཁྱག་པའི་སྐད་ཆ་འདི་དག (ཞར་བཀོད་ལྔ)
—— ན་གཞོན་སྙན་ངག་པ་རྩེ་སྲས་ཨ་རྡོ་མི་འདོད་རྐྱེན་ལམ་དུ་ཤོར་བར་བྲིས།
འདྲིས་མ་ཐག་ནས་རྒྱང་རིང་ཕྱིན་པ་དེ་ཁྱོད་ཡིན་ནམ།
ཞག་གསུམ་ཆར་ཆུས་ཡང་ཡང་བྲན་རུང་མུ་གེ་བ་དེ་ཁྱོད་ཡིན་ནམ།
སྤང་ཐང་དུ་ལུས་པའི་འཁྱག་རེངས་ཀྱི་སྐད་ཆ་དེ་དག་ཁྱོད་ཡིན་ནམ།
བྱེ་ཐང་དཀྱིལ་གྱི་ཆང་ཁང་དུ་བཟི་འཐོམ་མེ་བ་དེ་ཁྱོད་ཡིན་ནམ།
ཡི་གེའི་གཟུགས་སུ་བཏབ་པའི་ཨེ་ཤ་ཡའི་སྐར་མ་དེ་ཁྱོད་ཡིན་ནམ།
ཁ་བའི་གསེབ་ཏུ་འབར་བའི་མེ་ལྕེ་ནག་པོ་དེ་ཁྱོད་ཡིན་ནམ།
ཁེར་རྐྱང་གི་གཙང་བོ་བྲུག་སྟེ་རང་ཉིད་བསྣུབས་མཁན་དེ་ཁྱོད་ཡིན་ནམ།
ངལ་དུབ་དང་འདྲེས་པའི་མདངས་ཉམས་པའི་གླུ་དེ་ཁྱོད་ཡིན་ནམ།
ལག་མཐིལ་གྱི་གངས་རིར་ལྕེབས་པའི་འབུ་མེ་ལྕེབས་དེ་ཁྱོད་ཡིན་ནམ།
གཞིས་རྙིང་དུ་ལུས་པའི་བཤད་ཡམས་དང་སེམས་ཁམས་ནད་པ་དེ་ཁྱོད་ཡིན་ནམ།
ཡི་གེའི་སྟག་མོ་ཤེབ་རབ་ཀྱི་ནགས་སུ་མཆོངས་པའི་ངར་ཞགས་དེ་ཁྱོད་ཡིན་ནམ།
ཕྱི་རོལ་གྱི་འུར་ཟིང་དང་དུས་ཚོད་རེ་ཞིག་འཇགས་ནའང་།
བསྐལ་བའི་དཔའ་གདེང་རུམ་པའི་ནགས་ཚལ་དེ་ཁྱོད་ཡིན།
ནང་རོལ་གྱི་ཆོས་ཉིད་དང་ཁྲག་རྒྱུན་རྩད་ནས་འགགས་ནའང་།
རྨི་ལམ་དུ་སེང་གེ་རྨི་མཁན་དེ་ཡང་ཁྱོད་ཡིན།
བྲིས་མ་ཚར་བའི་སྙན་ངག
དཔེ་ཆའི་ནང་རོལ་ལས་ཕྱིར་བུད་དེ།
རང་བྱུང་ཁམས་དང་སྨ་ར་ཁོ་ན་མ་ཡིན་པར།
མུན་ནག་དང་ཉེན་ཁ་དག་ཀྱང་པང་དུ་ལེན་པར་བྱ།
དྭངས་གཙང་ངམ་མཐར་ཐུག་ཟེར་བ་ཞིག
འཇིག་རྟེན་འདིར་གཏན་ནས་མེད་ཚོད།
བློར་བཟུང་མྱོང་བའི་མངོན་བརྗོད་དང་བརྡ་རྙིང་དག
རིམ་གྱིས་བརྗེད་ཀྱིན་འདུག
དུངས་བརྗོད་ལ་མཐའ་གཅིག་ཏུ་ངོ་རྒོལ་བྱེད།
གཟུགས་རྒྱན་དང་མཚོན་དོན་ཟེར་བ་དེ་ལའང་།
བློ་ཐག་རྦད་ཆོད་ཀྱིས་རྒྱབ་ཀྱིས་ཕྱོགས་པར་བྱ།
ངས་ཁ་ཕྱོགས་རྙེད་ཀྱི་མེད་ནའང་།
ཞིང་གྲོང་དང་ཉམ་ཉེས་པ་དེ་དག
འཇིག་ཉེན་དང་ཕམ་ཁ།
མ་འོངས་པར།
རྨི་ལམ་དང་ཉོ་འཚོང་མི་བྱ།
སྒྱུ་འཕྲུལ་ལ་གྲོགས་དན་མི་འཚོལ།
དུས་ཚོད་ཁོ་ན་རྟག་པར་ཡལ་འགྲོ་ནའང་།
ཁྱོད་རང་ད་དུང་ཐག་རིང་ཐག་རིང་ཞིག་ལ་འགྲོ་དགོས་རེད།
ང་ནི་ནམ་ཡང་རང་ཉིད་ཀྱི་དཀྱིལ་སྙིང་དུ་ཙོག་པུར་སྡོད་འོས་ཏེ།
རྣང་ཞིང་ཁྲོད་ཀྱི་རྒྱ་སྟག་ནང་བཞིན།
ཕ་ཡུལ་བོར་བའི་བྱིས་པ་ནང་བཞིན།
རྨི་ལམ་རིང་ལུགས།
ས་སྲོས་ཀྱི་ཐང་སྟོང་དུ་ངུ་བཞིན་པའི་ཀེ་ཐཱར།
མི་རྟག་པའི་རླུང་བུའི་ཁྲོད།
རྨི་ལམ་གྱི་རྔོག་མ་གཟེངས་མཐོར་ཤད་པའི་ལོར་ཁཱ།
ཞིང་གྲོང་བརྒྱུད་ནས་འཐོན་པའི།
ང་ཡི་མཚན་མཐུན་སྙན་ངག་པ།
གར་སྟེགས་སྟེང་གི་འཁྲབ་ཡོལ་རེ་ཞིག་བརྒྱབ་ཟིན་ནའང་།
གླུ་ཟབ་མོ་དག་ནི་འཆི་བ་བཞིན་ཁྱོད་ཀྱི་རྣ་ལམ་དུ་ཡང་ཡང་གྲག་པར་བྱེད།
འཁོར་བའི་སྲང་ལམ་དུ་རྟ་ཕོ་འཁྲིད་དེ་ཕ་ཡུལ་ལ་ཆས་པའི་ནིས་ཆ།
རྫ་ར་ཁྲོ་ཟི་ཁྲི་ར་ཡིས་ང་ལ་ཆང་དམ་ཞིག་སྤྲད་རྗེས།
རྟ་ལྕག་ཐོགས་པའི་རྒྱང་རིང་ཡོ་རོབ་ཀྱི་འབྲོག་པ་དེས།
ལྕག་ཚན་ནི་ཆེད་དོན་བུད་མེད་ལ་གྲ་སྒྲིག་བྱས་ཟེར།
མུན་ནག་ཁྲོད།
རྣམ་ཤེས་བཞིན་ཟངས་ཐལ་རྒྱུ་བའི་ཁཱབ་ཁཱ།
གྱང་ལྡེབས་སུ་བཀལ་བའི་རྟེན་པར་དང་འདྲ་ཡི་མི་འདུག
མཚན་མོ་ནི་ཁྱོད་ཀྱི་ཕྱི་གོས་གཅིག་པུ་ཡིན།
སྙིང་ལགས། ངས་ཁོ་འུན་གྱི་སྐྱོ་གདུང་གི་གཞས་ཤིག་ལ་ཉན་ཞོར།
གཅིག་པུར་ཁེར་རྐྱང་གི་རྫོང་མཁར་འདི་བརྒལ་ཚར།
ཨ་ཕ།
ཨ་ཕ་ནི་སྟོན་མཇུག་ཅིག་ལ་གར་སོང་ཆ་མེད་དུ་གྱུར་བ་ཡིན།
དེ་དུས་ཀྱི་ནུ་བོ་ད་དུང་ལོ་ན་ཆུང་།
དགུན་ཁ་མ་སླེབས་པའི་སྔ་རོལ་ཏུ།
ངས་ཨ་ཕའི་ཚབ་བྱས་ཏེ་ཐ་མག་འཐེན་འགོ་བརྩམས།
ཞིང་གྲོང་ནི་འགྱུར་བ་མེད་པའི་རྟག་བརྟན་གྱི་ཞིང་གྲོང་།
དེ་དུས་ཀྱི་ཨ་མ་ད་དུང་ལོ་ན་གཞོན།
རྒྱུན་རིང་བའི་དགུན་ཁ་ནི་སྦྲུལ་གྱི་མཇུག་མ་བཞིན།
ལྗང་བུ་དག་ནི་དཔྱིད་ཀའི་ཁྲོད་དུ་འདར་སིག་སིག་ངང་གནས།
རྨོ་མོས་རྒྱུན་རིང་བའི་དགུན་ཁ་བརྒལ་ཐུབ་མ་སོང་།
ཡུན་རིང་བྲལ་བའི་ཨ་ཕ་ཕྱིར་ལོག་བྱུང་ནའང་།
ངེད་གཉིས་ཁྱིམ་འདིར་ཁ་གཏད་ཀྱིས་ཁུ་སིམ་ངང་བསྡད་དེ།
སྐྱེས་ཕོ་ཞིག་གི་ཚུལ་གྱིས་ཐ་མག་རྔམ་འཐེན་བྱེད་པ་ལས།
སུས་ཀྱང་ཕ་རོལ་གྱི་ཁེར་རྐྱང་ཚོར་ཐབས་མ་བྱུང་།
ཆེས་ཐུང་བའི་བརྩེ་གཞས།
ཉི་འོད་འོག་ཏུ།
རླུང་བུ།
ང་ཡི་ཕྲག་གོང་ནས།
ཁྱོད་ཀྱི་ཕྲག་གོང་བརྒྱུད་ཅིང་།
སྲོད་ཀྱི་ཆར་བས།
ཤིང་གི་སྤྱིལ་བུར།
སྨུག་པ་རབ་རིབ་འཁྲིད་འོང་།
ཉིན་གང་གི
ཚ་ཁུ་བཟོ་བའི་གོ་རིམ།
ཡོངས་སུ་ཚགས་ཆུད་རྗེས།
ཟླ་འོད་འོག་ངལ་ལས་སུ་བསྐྱོད་དེ།
རང་གི་རྣང་ཞིང་ཁྲོད།
སྐར་ཚོགས་ཕོན་པོར་བཏབ་ནས།
སྙིང་ཉེ་བའི་ཁྱོད་ལ།
ཚེ་གཅིག་གི་མགུལ་རྒྱན་བསླེ་ཆོག
ལྭ་བ་དམར་པོ་གྱོན་པའི་བུ་ཆུང་།
—— བུ་ཆུང་ལྷ་སྲས་དོན་གྲུབ་ལ།
ཞོགས་པར་ལྷ་ཚོགས་དང་ལྷན་དུ་བསྡད་དེ་ཉི་ཟེར་ལ་སྒུག་ཆོག་པའི།
ཞིང་གྲོང་གི་ཟླ་དྲུག་པ།
ཕྱོགས་བཞི་མཚམས་བརྒྱད་བརྒྱུད་ནས་ཐོན་པའི།
ཁེར་རྐྱང་གི་འགྲུལ་ལམ་དང་འཆར་ཡན་མཐའ་དག
རྟག་བརྟན་གྱི་ཞིང་གྲོང་དུ་གཞིས་ཆགས་ཤིང་།
རང་ལ་དབང་བའི་ཤིང་ཁང་ཆུང་ཆུང་ཞིག་ཏུ།
སྙིང་ཉེ་བའི་དཔེ་དེབ་དང་ཐ་སྙད་དག་གིས་གནས་མལ་བཅས།
ང་ཡིས་བུ་ཆུང་གི་ལྭ་བ་འཁྲུད།
དམར་པོ་མེ་དང་འདྲ་བའི།
ཀུ་ཤུ་སྒོར་སྒོར་ཞིག་དང་འདྲ་བའི།
ལྭ་བ་དམར་པོ་དེ།
ཇི་ལྟར་བཀྲུས་ན་དེ་ལྟར་དམར་པོར་འགྱུར་ཅིང་།
ངས་རེ་ཞིག་མཐའ་ཡས་པའི་རྒྱ་མཚོ་མཐོང་བྱུང་།
བུ་ཆུང་ལགས། ནམ་ཞིག
ཁྱོད་རང་ཞིང་གྲོང་འདིའི་རྟག་བརྟན་གྱི་བྱིས་པར་འགྱུར་ངེས་ཤིང་།
ཧར་གྱིས་སད་པའི་གངས་ཀྱི་རྟ་ཕོར་བཅིབས་ཏེ།
འགྲུལ་སྐྱོད་ཀྱི་ལམ་ལ་ཞུགས་ཤིང་།
རྨི་ལམ་ནང་གི་སེང་གེ་ཁམ་སེར་དང་ལྷན་དུ།
འཇིག་རྟེན་གྱི་གྲུ་ཁ་རེ་རེ་དོན་སྙིང་གིས་བརྒལ་ངེས།