དཔྱིད་རླུང་ལྡང་རྗེས་མེ་ཏོག་སྐྱེ་ཡོང་།
ཁ་དོག་འདྲ་མིན་གྱིས།
མེ་ཏོག་ལ་ལ་འདམ་ལས་སྐྱེ་ཡོང་།
དྲི་མ་མ་གོས་པའི་སྐྱེས་མཆོག་བཞིན་དུ།
མེ་ཏོག་འགའ་རེ་རྒྱང་ནས་བཞད་འགྲོ
ཕ་ཡུལ་དང་གྱེས་པའི་ཨ་ཕོ་ལྟར་དུ།
མེ་ཏོག་རྐང་གཅིག མེ་ཏོག་རྐང་གཅིག་ཨང་།
ལྷགས་རླུང་ཁྲོད་ནས་བཞད་ཡོང་།
བུ་ཆུང་སྒུག་པའི་ཨ་མ་བཞིན་དུ།
དཔྱིད་རླུང་ལྡང་རྗེས་མེ་ཏོག་སྐྱེ་ཡོང་།
རྫ་མགོ་ནས། སྤང་གཞུང་ནས། བྱེ་ཐང་ནས།
རྒྱང་ལ་ཅེར་ཏེ། སྤྲིན་པར་འཆིབ་ནས། མགོ་བོ་དགྱེ་སྟེ།
གཅིག་རྗེས་གཉིས་མཐུད་དུ།
ཁ་བ་བབས་སོང་།
ཨ་ཆེ་སོང་རྗེས། ཕ་ཡུལ་ནི།
ཚིག་སྣེ་མཐུད་མི་ཐུབ་པའི་ཐ་སྙད་རྐྱང་པར་གྱུར།
དེ་སྔར། ཨ་ཆེ་ཡོད་དུས།
ཕ་ཡུལ་གྱི་ལུང་པའི་ནང་དུ་འོད་ཅིག་ཡོད།
ཨ་ཆེ་སོང་རྗེས་འོད་དེ་གཞི་ནས་ཡལ་སོང་།
ཁོ་བོར་མཚོན་ན། ས་སྐྱ་ཐང་གི་མཁར་ཤུལ་སྐྱ་བོ།
ཕྱིར་དྲན་ཡིན་ལ་སོས་མི་ཐུབ་པའི་རྨ་ཁའང་ཡིན།
རེད་ལགས། ཤི་གསོན་གཉིས་ཀྱི་དབྱེ་མཚམས་ཤིག་ནས།
བརྡོལ་མ་ཐུབ་པའི་གསང་བ་མང་པོས།
ད་བར་ང་ལ་ན་ཟུག་སྟེར་གྱིན་འདུག
རྒྱ་ཟླ་གསུམ་པ་ལ་སླེབས་སོང་།
མེ་ཏོག་རྐང་གཅིག་བཞད་མ་ཐུབ་པའི་རྒྱ་ཟླ་གསུམ་པ།
གལ་ཏེ་ཨ་ཆེ་ཡོད་ན།
ཁོ་མོ་ནི་མེ་ཏོག་ཤིག་ཡིན་ཤ་སྟག་རེད།
དཔྱིད་རླུང་ལྡང་སོང་།
རྔམས་ཤིང་མཐུག་པའི་མདོ་དབུས་མཐོ་སྒང་དུ།
ཁ་བ་བབས་སོང་།
ཨ་ཆེ་མེད་པའི་རབ་རིབ་ཀྱི་ནམ་ཟླའི་ནང་དུ།
ད་ནས་བཟུང་།
—— སྙན་ངག་པ་མེ་སྟག་ལ་ཕུལ།
ད་ནས་བཟུང་།
ངས་སྙན་ངག་ཡིན་པའི་ཚིག་རྐང་ཞིག་གཡར་ཐབས་བྲལ།
སྤྲིན་པའི་བང་རིམ་དུ་འགྱིང་བའི་གངས་རི་དང་།
རྩིག་ཟུར་ཞིག་ནས་གཞོན་ནུ་མའི་གཟུགས་རིས་ལྟ་བུའི་སྙན་ངག་ཅིག
ད་ནས་བཟུང་།
ཕྱིར་དྲན་ནི་ཆུ་འཛིན་ཞིག་ལ་བཅོལ་དགོས་ཏེ།
རྨ་ཆེན་གངས་རི་ནས་བསྐྱོད་པའི་ཆུ་འཛིན་ཞིག་ལ་བཅོལ་དགོས་བྱུང་།
ངས་ཤེས་ཀྱི་ཡོད། དེ་ནི་ལྷོ་བཞུད་ཀྱི་ཆུ་འཛིན་ཞིག་སྟེ།
སྙན་ངག་པའི་ཚེ་གང་བོའི་གཟི་བརྗིད་ཁྱེར་བའི་ཆུ་འཛིན་ཞིག་ཡིན།
རེད་ལགས།
དེ་ལྟར་ཡིད་དུ་མི་འོང་པའི་སྟོན་ཟླ་འདི་ལ།
ལྷོ་ཕྱོགས་ནས་ལྡིར་བའི་འབྲུག་སྒྲའི་ཁྲོད་དང་།
ཟམ་ཟིམ་དུ་འབབ་པའི་སྟོན་ཀའི་ཆར་ཆུ་མཉམ་དུ།
སྙན་ངག་པ་ནི་ང་ཚོ་དང་ཁ་གྱེས་སོང་།
རེད་ལགས།
དེ་ལྟར་ཡིད་དུ་མི་འོང་པའི་སྟོན་ཟླ་ཞིག་ཡིན་རུང་།
ངས་བས་མཐའི་མཚམས་ཤིག་ནས།
ཆ་རྒྱུས་ཡོད་པའི་རླུང་རྟ་ཞིག་མཁའ་རུ་བསྐྱོད་པ་མཐོང་།
དེ་ནི་ཉི་ཟླ་རི་བོ་ནས་་མཁའ་རུ་ལྡིང་བའི་རླུང་རྟ་ཞིག་སྟེ།
རྟ་ཕྱག་ཁྱུང་གསུམ་ལྡན་པའི་རླུང་རྟ་ཞིག་ཡིན།
རླུང་རྟ་དེའི་ང་ལ་གསུང་དོན།
སྤྲིན་པ་ལྷོ་རུ་ཕེབས་ཀྱང་སྙན་ངག་པ་ད་དུང་གངས་ཅན་དུ་འདུག་ཟེར།
ཁོ་ནི་རྨ་ཆེན་གངས་རིའི་རྩེ་ལྷ་བཅུ་གསུམ་དང་མཉམ་དུ་འདུག་ཟེར།
སྙན་ངག་པ་ལགས།
ཁྱེད་ནི་ལྷོ་བཞུད་ཀྱི་ཆུ་འཛིན་ཞིག་སྟེ།
ཆུ་འཛིན་དེ་ལས་འཐོར་བའི་སྦྲང་ཆར་ནི་ང་ཡི་ཐམས་ཅད་ཡིན།
སྙན་ངག་པ་ལགས། གང་ལྟར།
གངས་རིས་ཁྱེད་རང་བརྗེད་མི་སྲིད།
དེེ་ནི་རི་རྩེའི་ཀི་སྒྲ་དང་།
ལག་ནས་འཐོར་བའི་རླུང་རྟ་ཇི་བཞིན་ཡིན།
ལྷ་བབས་དུས་ཆེན།
དེ་རིང་ངས་སྤྱི་བོ་ལ་བླངས་པའི་ལག་ཟུང་གིས།
མེ་ཏོག་གི་མཆོད་པ་དེ་གང་མཐོར་བཏེག་ནས།
པུས་མོ་གཡས་གཡོན་ས་ལ་བཙུགས་ནས།
འཇིག་རྟེན་འདིར་སྣང་བྱེད་བཞིན་བགྲོད་མྱོང་བའི་
ཟས་གཙང་ཚང་གི་སྲས་པོ་ལ་ཕུལ།
ནད་ཡམས་ཀྱིས་མནར་བའི་ལོ་ཟླ་འདི་མཐོང་དུས།
ངས་རིགས་མཐུན་གྱི་བུ་དང་བུ་མོ་དང་མཉམ་དུ།
ཁྱེད་རང་ལྷག་ཏུ་དྲན། དཀོན་མཆོག་ལགས།
དེ་སྔོན། ངས་ས་སྐྱ་ནད་གྲོལ་མ་བཏོན་ནས།
ནད་ཡམས་འདི་བཟློག་པའི་གསོལ་བ་བཏབ།
དེ་རིང་། ངས་ཁྱེད་རང་ཕེབས་པའི་ཉིན་མོ་འདི་བསུས་ནས།
ནད་ཡམས་འདི་རྩད་ནས་ཞི་བའི་སྨོན་ལམ་ལྷག་ཏུ་བཏབ།