ད་ནི་ཡུལ་ལ་ལོག་བསམ་བྱུང་། (ཞར་བཀོད་གཉིས)

ཟླ་བརྒྱད་པར་ཕ་ཡུལ་གྱི་ཉི་འོད་གོས་སུ་གྱོན་ཙམ་བྱས།

ཟླ་བརྒྱད་པར་ཕ་ཡུལ་གྱི་རི་ཆུ་ལ་ཞལ་མཇལ་ཞུ་ཙམ་བྱས།

ཟླ་བརྒྱད་པར་སྙིང་ཉེ་བའི་མི་དག་དང་གྱེས་ཕྱག་ཕུལ།

ཟླ་བརྒྱད་པར་ལུག་ཁྱུ་དང་སྐར་ཚོགས་འཚོ་བའི་མགོ་དཀྲི་གློ་ཁ་ཤེའུ་སྤང་ཐང་དུ་ལུས།

ཟླ་བརྒྱད་པར་འཚོ་ཚིས་ཀྱི་ཐག་སྣེར་འཐམ་སྟེ་མི་ཡུལ་སྙེག

ཟླ་བརྒྱད་པར་ངའི་འཁྲེངས་སེམས་དང་ཕྱི་མིག་ཕ་ཡུལ་དུ་ལྷག

ཉིང་སྐྱུར་བརྟག་དཔྱད་དང་ལོག་བཀར་ཁོ་ནས་ཟླ་ངོ་བཞི་ལྷག་ཕྱིན།

ནད་ཡམས་ལ་གདོང་གཏུག་འགྱེད་ཞོར་དྲ་ལམ་སློབ་ཁྲིད་བྱས།

ཁ་སྟོད་ཀྱི་འབྲོག་པ་ཚོར་དྲ་དང་གློག་གི་མཐུན་རྐྱེན་ཞན་ཡང་།

ཁྱོད་ཚོས་རྒྱབ་སྐྱོར་བྱེད་ཀྱིན་མི་འདུག་ཅེས་གཤེེ་གཤེ་བཏང་།

སྔོ་ཚོད་དང་ཕག་ཤ་ལྡང་ཚོད་ཅིག་ཉོས་ཏེ་དགུན་ཁའི་དྲེད་མོང་ཉལ་ཉལ་བྱས།

བྱང་ཆུབ་ལམ་རིམ་ཆེན་མོར་མཇལ་ཏེ་ཨ་བྲས་བྲག་ཁུང་རྐོ་རྐོ་བྱས།

ཀུན་བཟང་བླ་མའི་ཞལ་ལུང་ལ་མཇལ་ཏེ་བྱིའུ་ཐེ་རྒྱས་ནམ་འཕང་བསྟོད་བསྟོད་བྱས།

སྡེར་མོ་རྣོན་པོ་ཞིག་དང་གཤོག་རྩལ་བདེ་མོ་ཞིག་ཀྱང་ཡོད་ན་འདོད།

བརྩེ་བས་བརླན་པའི་མགོ་དཀྲི་གློ་ཁ་ཞིག་ཆུ་དཀར་གཙང་པོས་ཁུར་སོང་།

སྨྲེང་བས་གཏམས་པའི་ལ་གཞས་གཉོམ་པོ་ཞིག་ཤེའུ་རི་ལུང་ལ་འཐིམ་སོང་།

སྙིང་གཏམ་མར་དཀར་གྱི་སྤུ་ལུ་འདྲ་བ་ཞིག་སྐད་འཕྲིན་ལས་དཀག་སོང་།

ཕོ་ལོ་བཞི་བཅུའི་གཏམ་རྒྱུད་ཅིག་མགོ་བརྩམས་སོང་བ་འདྲ་ལ།

མཇུག་བསྡུས་སོང་བ་ཡང་འདྲ་བས།

སྐྱོ་ལྷང་ལྷང་རྔ་མོས་བུ་སྟོར་ལྟ་བུ་བྱུང་།

ཆང་དང་སྙན་ངག་གི་ཡི་ག་འགག མིག་མཐའི་མཆི་མ་ཡང་ཞོར་ལ་སྐམ།

གསར་ལམ་ཁག་ཏུ་བཀག་རྒྱ་གློད་པའི་གནས་ཚུལ་མང་དག་ཐོས།

སེམས་འཚབ་འཚུབ་ཏུ་གྱུར་ཏེ་སྨུག་ཀློང་གསེབ་ཀྱི་སྤྱང་ཀི་འདྲ་པོ་ཞིག་ཆགས།

མིད་པ་ན་བ་འདྲ་ལ་ཚ་བ་ཡང་ཨེན་ཙམ་རྒྱས་འདྲའི་ཚོར་བ་སྐྱེས།

ཉིང་སྐྱུར་བརྟག་དཔྱད་རེ་བྱས་ཤིང་ཉི་མ་འགའ་རེ་ལོག་བཀར་བྱས་ན་ཡང་བསམས།

ད་ནི་ཡུལ་ལ་ལོག་ན་བསམ་བྱུང་།

ཕ་ཡུལ་གྱི་རི་ཆུ་དང་ཕ་མར་སྐེ་འཇུ་ཡིད་ཚིམ་པ་ཞིག་བྱ་འདོད།

ཕ་ཡུལ་གྱི་ལུག་ཁྱུ་དང་ཕུ་ནུ་ཚོར་སྙིང་གཏམ་མགུ་གང་བ་ཞིག་བཤད་འདོད།

ཆེས་དྭངས་གཙང་གི ཆེས་ལྷིང་འཇགས་ཀྱི་དུར་ཁྲོད་ཅིག་ནས།

སྔོ་སངས་པའི་ནམ་མཁའ་གོས་སུ་གྱོན་ཏེ།

ཁོད་ཡངས་པའི་ས་ཆེན་གདན་དུ་བཏིང་ནས།

ཁ་སྦུབ་དང་གན་རྐྱལ་གང་རུང་གིས་སྐད་ལ་བརྒྱབ་སྟེ་ངུ་སྙིང་ཞེ་དྲག་འདོད།

མཁོ་སོད་པ་ཞིག་ངུ་སྙིང་འདོད།

2022ལོའི་སྤྱི་ཟླ12པའི་ཚེས8ལ།

ཕ་ཡུལ།

གཅིག

ང་རང་ཁེར་རྐྱང་གི་དུས་སུ།

ཁུ་སིམ་མེར་གངས་རིའི་ཟེ་བར་འཕགས་པའི་ཉི་འོད་ལ་ལྟ་དོན།

ང་རང་ར་བཟི་བའི་སྐབས་སུ།

སྐྱོ་ལྷང་ངེར་གཡག་རྒྱབ་ཀྱི་ལོ་ཟླར་ཚང་རྩིས་བྱེད་དོན།

ཞོགས་པ་རེ་རེར།

ངས་སྦྲ་འདབས་སུ་འཐོར་བའི་ནོར་ལུག་གི་སྐྱུག་ལྡོད་ལ་སེམས་ཀྱིས་མཉན་དོན།

མཚན་མོ་རེ་རེར།

ངས་སྐར་ཚོགས་ཀྱིས་ཁུར་པའི་རི་ཆུའི་ཚང་མལ་ལ་རྣ་བ་བླགས་དོན།

གཉིས།

གསེར་གྱི་ཉི་མ་དང་དུང་གི་ཟླ་བ།

མེས་པོའི་ཐོད་པའི་སྣུམ་ཐིག

དབྱར་ཟླའི་མེ་ཏོག་དང་སྟོན་མཚན་གྱི་ཁུ་འཕང་།

སྐྱེད་ཡུམ་གྱི་ནུ་ཞོ།

རྟ་ནག་སྒྲོག་འགྲོས་དང་འབྲུག་མོའི་བཞོ་དབྱངས།

རི་ཐང་གི་བླ་སྲོག་འཚོ་བའི་ཕོ་གཞོན་མོ་གཞོན་དག་གི་སྣང་བ།

སྡོང་མགོའི་བྱིའུ་ཚང་དང་རྩྭ་རྩེའི་ཟིལ་བ།

བྱིས་པ་རྐང་རྗེན་མ་དག་གི་རལ་པ་དང་སྲུང་འཁོར།

རི་རྩེའི་རྡེའུ་འབུམ་དང་སྐྱས་ལམ་ཕྲ་མོ།

ཡུལ་གྱར་པའི་འཁྲེང་སེམས་རྨས་མ།

གསུམ།

ས་སྒང་རིལ་མོའི་ཟེ་བ་རུ་སྲིད་པ་ཁྱུང་གི་ཚང་དང་སྒོ་ང་ཡོད།

དེ་རུ་ངའི་ཕ་མ་དང་མིང་སྲིང་ཡོད།

དེ་རུ་དུར་ཁྲོད་དང་བྱ་རྒོད་ཀྱི་ཚོགས་ཀྱང་ཡོད།

དར་ལྕོག་དང་མ་ཎི་རྡོ་རྩིག་ཀྱང་མང་པོ་མང་པོ་ཞིག་ཡོད།

ངས་དེ་ལ་ཕ་ཡུལ་ཞེས་བོས་ཤིང་སྲུང་འཁོར་བཞིན་སྐེ་ལ་བཏགས་ཡོད།

བཞི།

རུས་པའི་དེད་ན་དཀར་ས་བོ་ཕ་ས་ཕ་ལོའི་ཐོད་པ་འདྲ་བོ།

ཤ་ཡིས་དེད་ན་དམར་ས་བོ་མ་ས་མ་མོའི་བྲང་མགོ་འདྲ་བོ།

གསེར་གྱི་རི་བདུན་ཆགས་པའི་རྟེན་ཡིན།

དུང་གི་མཚོ་མོ་འཕྱུར་བའི་རུ་མ་ཡིན།

ལྔ།

རྒོད་པོ་འཕུར་བའི་གཤོག་ངལ་ཁེན་སའི་བྲག་ཐེམ།

རྟ་ཕོ་བརྒྱུགས་པའི་རྔུལ་རག་འཕྱིད་སའི་སྤང་སྟན།

གཡག་རྒོད་ཁྲོས་པའི་ཧུར་སྒྲ་འཁྱིལ་སའི་གཙང་པོ།

རི་སྤྱང་གི་ཟུག་སྐད་སིམས་སའི་རི་སྒང་སྐྱ་བོ།

ལོ་ཟླ་དང་ཉིན་མཚན་འདྲེས་བྱེད་ཀྱི་མིང་དང་ཚིག

ཆང་དང་སྙན་ངག་ནོར་བྱེད་ཀྱི་གཟུགས་དང་གཟུགས་ཅན།

མེས་པོའི་ཡིག་ཚང་མེད་ཀྱང་གཤིན་རྗེའི་མེ་ལོང་ཡོད་པའི་སྒྲུང་ཡིག་ཚི་དྲེག་མ།

དྲུག

ཆེས་བརྗིད་ས་ནས་བཤད་ན་ཁྱེད་ནི་རི་རྒྱལ་ལྷུན་པོ་ཡིན།

ཆེས་མཐོ་ས་ནས་བཤད་ན་ཁྱེད་ནི་ཧི་མ་ལ་ཡ་ཡིན།

ཆེས་ཟབ་ས་ནས་བཤད་ན་ཁྱེད་ནི་མ་ཕམ་གཡུ་མཚོ་ཡིན།

ཆེས་དྭངས་ས་ནས་བཤད་ན་ཁྱེད་ནི་ཁྲི་ཤོར་རྒྱལ་མོ་ཡིན།

ཆེས་གཙང་ས་ནས་བཤད་ན་ཁྱེད་ནི་ཤེལ་དཀར་གྱི་མེ་ལོང་ཡིན།

ཆེས་དྲོ་ས་ནས་བཤད་ན་ཁྱེད་ནི་ཨ་མའི་རུམ་ཡིན།

ཆེས་བརྩན་ས་ནས་བཤད་ན་ཁྱེད་ནི་ཨ་ཕའི་པང་ཡིན།

ཆེས་ཞིམ་ས་ནས་བཤད་ན་ཁྱེད་ནི་འབྲུ་འོ་དཀར་པོ་ཡིན།

ཆེས་སྣུམ་ས་ནས་བཤད་ན་ཁྱེད་ནི་འབྲི་མར་སེར་པོ་ཡིན།

ཆེས་འཇམ་ས་ནས་བཤད་ན་ཁྱེད་ནི་བལ་དཀར་གྱི་ཁ་ཆུ་ཡིན།

ཆེས་སྣག་ས་ནས་བཤད་ན་ཁྱེད་ནི་ལུ་གུའི་བྲང་མགོ་ཡིན།

བདུན།

ཁྱོད་ནི་དུ་བ་གཡུ་འབྲུག་སྔོན་མོ་མཁའ་ལ་འཁྱིགས་སའི་སྲིད་པའི་སྦྲ་རྒན་ཡིན།

ཁྱོད་ནི་སྟོད་ལྷ་རབས་ནས་ཆད་པའི་སྐྱ་མི་བདུན་གྱིས་བཙུགས་པའི་དངུལ་གྱི་སྒྱིད་པུ་ཡིན།

ཁྱོད་ནི་འོག་ཀླུ་རབས་ནས་བསུས་པའི་མ་སྲུ་བདུན་གྱིས་བསྐྱོན་པའི་གསེར་གྱི་སླ་ང་ཡིན།

ཕུག་བུ་རྒྱུད་ཀྱི་ཚེ་སྲོག་རྟག་ཕྱིར།

སྒོ་རྟ་ནོར་གྱི་འཕེལ་ཁ་ཕྱུག་ཆེད།

རྟེན་འབྲེལ་ལ་དགའ་བའི་མེས་པོ་བློ་ཁོག་ཅན་དེས།

ཁྱོད་ལ་སྟག་པའི་ཕུག་ཀ་དང་ཤུག་པའི་སྒོ་ཀ་བསླངས།

བརྒྱད།

དབྱར་ལ་གཡུ་དང་མར་གྱི་མཚོ་མོ་འཁྱིལ་ཡོང་བའི།

དགུན་ལ་དུང་དང་ཕྱུར་བའི་ཆར་པ་འཇོ་ཡོང་བའི།

ཉིན་མོར་རླུང་དང་སྤྲིན་གྱི་རྒྱུ་བས་དེད་ཡོང་བའི།

མཚན་མོར་ཆང་ཕོར་དང་རྨི་ལམ་དུ་ཤར་ཡོང་བའི།

ཕ་ཡུལ། སྲིད་པ་རྒད་པོའི་སྨ་ར་ལ་བཏགས་པའི་དངུལ་གྱི་མེ་ལོང་།

སྲིད་པ་རྒད་པོས་དོག་མོ་ཁ་ཞེང་ཆེ་རུང་མི་རྙེད་པ་ཕ་ས་ཡིན་ཟེར།

སྲིད་པ་རྒད་པོས་མགོ་ནག་རྐང་གྲངས་མང་ཡང་མི་རྙེད་པ་ཕུ་ནུ་ཡིན་ཟེར།

དགུ།

དྲིན་ཕ་ལོས་ང་ལ་སྒྲུང་ཞིག་བསླབས།

མེས་པོ་དང་གངས་རི་ན་ཟླ་ཡིན།

གངས་དཀར་པོ་མཐོང་ན་ཕྱག་གསུམ་འཚོལ་ཟེར།

དྲིན་མ་ལོས་ང་ལ་གླུ་ཞིག་བསླབས།

མེས་མོ་དང་མཚོ་མོ་སྤུན་ཡིན།

མཚོ་སྔོན་པོ་མཐོང་ན་མཆོད་གསུམ་འཕོངས་ཟེར།

ཕ་ཡུལ།

གངས་རི་དང་མཚོ་མོའི་སྲུང་མདུད་དཀར་པོ།

ཕ་ལོ་དང་མ་ལོའི་ངག་ལ་འཁྱིལ་བའི་མར་ལོ་སེར་པོ།

རླུང་གིས་འཁུར་མི་ཆོག་ལ་ཉི་མས་བཞུ་མི་ཆོག་པའི།

སྲིད་པའི་མནའ་ཚིག་རྡོ་ལོག་འདྲ་བོ།

2022ལོའི་ཟླ12པའི་ཚེས17ལ།

བོད་ཟས་ཁང་ཞིག་ཏུ་ཨ་མ་དྲན་པ།

རྫོང་མཁར་འདིའི་བོད་པའི་ཟ་ཁང་ཞིག་ཏུ།

བློ་སེམས་མཐུན་པའི་གྲོགས་པོ་རེ་གཉིས་དང་ལྷན་དུ།

ལྷ་སའི་གཞས་ལ་ཉན་ཞོར།

སེམས་ལྷོད་ལ་བབས་ཏེ་ཆང་འཐུང་བ་ནི་བདེ་སྐྱིད་ཅིག་རེད།

ཆང་རག་གིས་ཨེན་ཙམ་བད་པ་ཡང་བདེ་སྐྱིད་ཅིག་རེད།

གྲོགས་པོ་ཡང་ཨེན་ཙམ་བད་ན།

ཞིང་གྲོང་དུ་གནས་པའི་ཨ་མར་ཁ་པར་བཏང་སྟེ།

ཨ་མའི་སྙུན་གཞི་ལ་སེམས་ཁུར་གནང་བ་མཐོང་ན།

ང་ལ་ཡང་འབྲོག་ཁུལ་དུ་ཨ་མ་ལག་ངར་ཙམ་ཞིག་ཡོད་པ་དྲན་ལ།

ཏག་ཏག་ཉིན་འདི་གར་ཨ་མ་ལགས་ལ་སྐུ་སྙུན་ཐེབས་པ་དྲན།

ནད་ཡམས་ཀྱི་དབང་གིས་མཐོ་གོམ་པ་གང་ལ་སྤོ་མི་ཐུབ་པས།

ཁ་རོག་གེར་ཆང་བཏུང་བ་ལས་ཐབས་ཅི།

བོད་ཟས་ཁང་འདིའི་མིང་ལ་ནས་འབྲུ་སྔོན་མོར་འབོད།

ནས་འབྲུ་ནི་རྩམ་པའི་ཉེར་ལེན་གྱི་རྒྱུ་ཡིན་པས།

ཨ་མ་ལགས་དྲན་བྱེད་ཀྱི་ལྷན་ཅིག་བྱེད་རྐྱེན་གྱི་རྒྱུ་ཉག་ཅིག་ག་ལ་མིན།

རྫོང་མཁར་འདིའི་བོད་པའི་ཟ་ཁང་འདིར།

མགྲོན་པོ་ཧ་ཅང་ཉུང་ན་ཡང་།

ཞབས་ཕྱི་པས་བོད་སྐད་དག་མོ་སྨྲས་ཡོང་ན།

རྒྱང་རིང་གི་རི་ཁུགས་ཅིག་ནས།

ཕར་འགྲོ་དུས་འོ་མའི་ལམ་དཀར་བྱེད་ཅིང་།

ཚུར་ཡོང་དུས་འཛུམ་གྱིས་བསུ་མ་བྱེད་པའི།

ཨ་མའི་འཛུམ་དང་སོ་དཀར་ཇི་འདྲའི་དྲན་ཨང་།