ནམ་དུས་འདིར་མཚམས་མེད་པའི་ནད་དུག་ཁྱེར་ནས།
གཏིང་ཟབ་པའི་འཚོ་བའི་བྲན་གཤིས་ལ་སྐྲག་ནས།
དུས་ཀྱིས་རྙིད་པའི་ལྕང་གླིང་ཁྱོད་ཕ་ཡུལ་བཞིན་དྲན་མོད།
སྡོང་སྐམ་གྱི་གསེང་ནས་སྒྲོག་པའི་བྱ་སྐད་ཐན་ཐུན་གྱིས།
ལྕང་གླིང་གི་ཚལ་དེ་སྟོང་སང་སང་བཏང་སོང་།
དྲན་ཤིང་གཉོམ་པོའི་ལྗང་མདོག་གི་འཇིག་རྟེན།
སྦྲང་ཆར་སིལ་མས་སྙོར་བའི་ལྗོན་ཤིང་སྐྲ་ལོ་ཡོག་ཡོག
པད་མའི་གེ་སར་ལ་འཁྲེང་བའི་ཕྱེ་མ་ལེབ་ཀྱི་འཕུར་ལྡིང་།
ཁུ་བྱུག་སྔོན་མོའི་མགྲིན་དབྱངས་ཀྱི་རྒུན་ཆང་གར་མ།
ཁྱོད་ཀྱི་བྱད་གཟུགས་སྐྱེད་ཚལ་གྱི་མེ་ལོང་ངོས་ན།
ཉིན་སྲིབ་གང་དུའང་ལྷང་ངེར་འདུག
དགུན་ཟླ་འདིར་ངས་ལྕང་གླིང་བསམ་བཞིན།
ལྕང་གླིང་གིས་ང་རང་བསམ་བཞིན།
དུས་ཚིགས་ཀྱི་ཟློས་གར་ཁྲོད་ནས།
ངེད་ཅག་འཚར་ཞིང་ལོངས་ལ།
སྡོང་རྒན་བཞིན་རྒས་ཞིང་འཁོགས་པར་འགྱུར་ངེས།
མྱང་ཆུ་གཙང་པོའི་ཆུ་ངོགས་ཀྱི་ངང་བ་དཀར་པོ་ཨང་།
ངའི་འཆར་ཡན་གྱི་གདུ་བུ་གཤོག་འདབ་ལ་སྤུད་དེ་ལྷོ་མོན་ལ་འཕུར་རོགས།
བདེ་སྐྱིད།
བདེ་སྐྱིད་ནི་ལྷ་སྒྲུང་གི་འཕྲུལ་སྣང་ཞིག་ཡིན་ནམ།
བདེ་སྐྱིད་ནི་མི་ཡུལ་གྱི་རྟོགས་བཏགས་ཤིག་ཡིན་ནམ།
བདེ་སྐྱིད་ནི་གྲོང་ཁྱེར་གྱི་གློག་དམར་ཁྲོད་འཁྱུག་གམ།
བདེ་སྐྱིད་ནི་རི་གྲོང་གི་ཉི་འོད་ན་འཁྱིལ་ལམ།
བདེ་སྐྱིད་ནི་གཞན་ངོ་ནས་འཐུལ་བའི་དྲི་ཞིམ་མེ་ཏོག་དེ་ཡིན་ནམ།
བདེ་སྐྱིད་ནི་དངུལ་ལོར་གྱིས་བཏུམས་པའི་བྲག་ཅ་སྐམ་པོ་དེ་ཡིན་ནམ།
བདེ་སྐྱིད་ནི་གཟུགས་སུ་རུང་བའི་མཐོང་ཆོས་ཙམ་ཡིན་ནམ།
བྱིས་དུས་ཀྱི་རྩེད་ར་དྲོན་མོ་དེ་ཡང་ཡང་ཡིད་ལ་འཆར་དོན་ཅི།
གཞོན་སྐྱེས་ཀྱི་ལྡུམ་ར་དེ་དྲན་ཤིང་ངོས་ནས་ལྷང་ལ་འབུད་དོན་ཅི།
སྐབས་དང་སྐབས་སུ་གཞན་ཕན་གྱི་སྦྲང་ཆར་དབབ་པའང་ཡིད་ལ་ཝ་ལེར་ཤར།
ཀྱེ་མ་ཀྱེ་ཧུད། འཚོ་ཚིས་ཀྱི་གར་སྟེགས་ནས།
འདབ་ཆགས་ཁྲི་སྟོང་ལྷུང་བའི་གཡང་སར་བཅར་མཁན་ནི།
ཁ་སང་གི་ང་དང་དེ་རིང་ཁྱོད།
གྲོགས་པོ་ལགས། བདེ་སྐྱིད་ལ་ཁ་ཚོན་མ་གཅོད་རོགས།
དེ་ནི། གཏིང་ཟབ་པའི་མཚན་མོ་ཟ་མཁན་ནམ།
རང་ལུས་དུམ་བུར་སྲེག་མཁན་གྱི་བུད་ཤིང་།
དཀའ་ཐུབ་ཡོད་ཚད་ལ་གདོང་ཕྱོགས་པའི་གོ་རིམ་ཤིག་ཀྱང་ངོ་།