ཁ་མི་གྲག་པའི་ཐ་སྙད།

དུས་ཚོད་ཀྱིས་ཁུ་སིམ་མེར་སྐྱེ་བོ་དག་ཐག་རིང་ཞིག་ལ་འཁྲིད།

ཁུ་སིམ་མེར་ཞེས་པའི་ཐ་སྙད་དེ་འབྲི་དུས།

ཐ་སྙད་དེའི་འཆད་ཁུངས་ནས་རྒྱབ་ལྗོངས་རོལ་མོ་གྲག་སྟེ་

མི་ཐེག་པའི་ཚོར་བ་ལྗིད་པོ་ཞིག་གིས་མནན།

གཙང་བོ་ཞེས་པའི་ཐ་སྙད་དེ་གངས་འདབས་སུ་འགྲོ་ཁར།

བཞུར་སྒྲ་ཞིག་གིས་ང་རང་བརྡར་དེ་ཟད་ལ་ཉེ།

ལག་པ།

མཐོང་མི་ཐུབ་པའི་གློག་དང་འཕྲད་པར་དོགས་ནས།

རྒྱུན་པར་ལག་པར་ལག་ཤུབས་ཤིག་གྱོན་ཡོད།

མཐོང་མི་ཐུབ་པའི་རླུང་ཞིག་ནམ་ཡང་ལག་པའི་ངོས་སུ་འབྱར་འདུག

གནས་གང་ཞིག་ནས་ལག་ཤུབས་དོར་ཆོག

གནས་གང་ཞིག་ནས་རླུང་མེད་པར་བཟོ་དགོས།

ལག་པའི་ནང་དུ་མེ་ཡི་ཚིག་མཛོད་ཅིག་ལས་མེད་པས།

ང་རང་འཁྱགས་རོམ་གྱི་གླུ་ལ་ཉན་པར་གོམས།

ཚེ་གང་བོར།

ཚེ་གང་བོར་སྤྲིན་པ་ཞིག་ལ་བལྟས་ཏེ་བསྡད།

གཅེར་བུར་རྒྱུ་བའི་སྤྲིན་པ་ཞིག་གིས་ང་རང་ཆུ་ཐིགས་ཤིག་ཏུ་བསྒྱུར།

ཚེ་གང་བོར་མེ་ཏོག་ལྡུམ་ར་ཞིག་ལ་བལྟས་ཏེ་བསྡད།

མེ་ཏོག་ལྡུམ་རས་ང་རང་སྦྲང་མ་ཞིག་ཏུ་བསྒྱུར།

སྤྲིན་པ་ལས་ཆུའི་ཐིགས་པ་འགའ་བླངས་སྟེ།

སྲང་ལམ་ཁུར་རྗེས་ཀྱི་རྐང་རྗེས་མང་པོ་ཞིག་གི་སྟེང་དུ་གཏོར།

དེ་ལས་མེ་ཏོག་འགའ་བཞད།

མེ་ཏོག་གི་གསེབ་ནས་ལྷིང་འཇགས་གོས་སུ་གྱོན་ཏེ།

ཚེ་གང་བོར་དཔེ་ཆ་ཞིག་བཀླགས།

མུན་པ་དལ་མོ།

གཞིས་ཁྱིམ་དུ་ཁ་བ་བབས།

ནགས་ཚལ་ནི་འཕྲུལ་སྣང་གི་ཟློས་གར་ཞིག

ཁ་བའི་ཁྲོད་དཔར་བའི་རྐང་རྗེས་ཁྲག་ཐིགས་ཀྱི་ཚོགས་འདུས་ནས་གྲུབ་ཅིང་།

ཡང་སྙིང་ཞུ་བར་གྱུར་བའི་སྒྱུ་འཕྲུལ་ཞིག་གོ།

རྡོ་འཁྱག་མང་པོ་འཁྱགས་རོམ་ལས་འཕགས་ཏེ་ང་ཡི་རུམ་ལ་འཛུལ།

ཡིན་ཡང་། མིག་ལམ་དུ་ནག་ཐིགས་ཙམ་ཡང་མི་འདུག

མུན་པ་དལ་མོ་ཞིག་གིས་ནོར་ནག་དང་ལུག་ཁྱུའི་རྨིག་རྗེས་

ཁྲིད་དེ་ཚུར་འོང་གིན་འདུག

ནམ་མཁའ་བཟོ་བ།

དོ་ནུབ་ཀྱི་དུས་ཚོད་ལ་ཚད་བཀག་མེད་ནའང་།

འཇིག་རྟེན་སྟེང་ཆེས་ཐུང་བའི་སྙན་ངག་ཅིག་ཀྱང་བྲི་མ་ཐུབ།

དོ་ནུབ།

རང་ཉིད་སྐྱེས་པ་ནས་ད་ལྟའི་བར་དུ་རྨིས་པའི་རྨི་ལམ་དག་

ཕྱོགས་གཅིག་ཏུ་བཀྲལ་ཏེ།

གཉིད་ཀྱི་ཞིང་ཁམས་ལ་ནམ་མཁའ་ཞིག་བཟོ།

སྙན་ངག་ཐུང་ངུ་ཞིག་གི་ནང་དུ།

ལོ་མ་གཅིག་གི་ནམ་མཁའ།

མི་ཡུལ་གྱི་ལྗོན་པ་གཅིག་གི་སྟེང་དུ་ལོ་མ་ག་ཚོད་ཡོད་པ་

ཁྱོད་ཀྱིས་བརྩི་མི་དགོས་ཏེ།

ཁྱོད་ཀྱིས་ལོ་མ་གཅིག་གི་གསང་བ་དག་བྲིས་ཏེ་

རླུང་ལ་ཁ་གྲགས་པར་བྱས་ན།

ངག་རྒྱུན་དུ་གྲགས་པའི་ལྗོན་པ་གཅིག་གི་སྟེང་གི་ལོ་མ་

བརྩི་རྒྱུ་ནི་ཇི་འདྲའི་སླ་ཨང་།