དྲན་པར་མ་ཤོང་བའི་ལོ་དང་ཟླ་བ་དེ་དག

དྲན་པར་མ་ཤོང་བའི་ལོ་དང་ཟླ་བ་དེ་དག

གླེང་གཞི།

སྤྱི་ལོ1970ལོར། མཚོ་ལྷོ་དམར་སྲུང་མི་རིགས་དགེ་ཐོན་སློབ་གྲྭ་ཞེས་པའི་མིང་དེ་སླར་ཡང་མཚོ་ལྷོ་མི་རིགས་དགེ་ཐོན་སློབ་གྲྭ་རུ་བསྒྱུར་པ་དང་། དེ་ནས་ལོ་འགའ་འགོར་བའི་རྗེས་སུ། བདག་གི་ཨ་ཕ་དང་བཅས་པའི་སྡེ་བ་ཡར་ཁ་མར་ཀའི་ལོ་ན་བཅོ་ལྔར་བུད་ཡོད་མེད་ཀྱི་གཞོན་ནུ་ལོ་ཆུང་འགའ་མང་རྫོང་བོད་ཡིག་སློབ་འབྲིང་ནས་སློབ་མཐར་ཕྱིན་ཏེ་མཚོ་ལྷོ་མི་རིགས་དགེ་ཐོན་སློབ་གྲྭར་ཞུགས་པའི་གོ་སྐབས་ལྡན་པར་གྱུར།

དུས་ཚོད་ཀྱི་མདའ་རྩེ་ནི་དལ་སྡོད་མེད་པར་ཐག་ཐག་གིས་མུ་ནས་མུ་རུ་འཁོར་ཞིང་། ལང་ཚོའི་འདབ་མ་ཡང་དལ་སྡོད་མེད་པར་ཡུན་དང་ཡུན་གྱིས་རྩ་བ་ཚུགས་ཤིང་རྩེ་མོ་རྒྱས་རན་པའི་གཞོན་ནུ་དེ་དག་ལོ་ངོ་གཅིག་གམ་གཉིས་ཀྱི་རྗེས་སུ་སྔ་གཞུག་ཏུ་ཡུལ་ལ་བྲོས་ཡོང་བ་ན། བདག་གི་ཨ་ཕ་ཡང་སྨྱུ་གུ་འཛིན་པའི་སློབ་མ་ཞིག་ནས་འུར་ལྕག་གཡུག་པའི་རྫི་བོ་ཞིག་ཏུ་གྱུར་པ་རེད། དེ་ནི་སྐབས་དེའི་མི་རྣམས་ཀྱི་འདུ་ཤེས་ཀྱི་ཁྲོད་དུ། མུ་མཐུད་དུ་སློབ་གྲྭར་སོང་ནས་ཤེས་བྱ་ཡོན་ཏན་སྦྱོང་རྒྱུའི་ཕུགས་འདུན་བརྟན་པོར་མེད་པ་དང་། སྐབས་དེའི་སློབ་གྲྭའི་ནང་དུའང་ཤེས་བྱ་ཡོན་ཏན་གྱི་སློབ་ཁྲིད་ལས་ཆབ་སྲིད་བྱེད་སྒོ་མང་བོས་ཉི་མ་གཏོང་དགོས་པ་ལྟ་བུ་ཞིག་ཏུ་གྱུར་ཡོད་པས་ཨེ་ཡིན་ནམ། ལས་དབང་ནི་དེ་ལྟར་སུས་ཀྱང་ཚོད་དཔག་ཐུབ་པ་ཞིག་མིན་ནའང་། སྐབས་དེར། བུ་ཕྲུག་སློབ་གྲྭར་སྐྱོལ་ཟེར་བ་ལས། ཕ་མ་བཙོན་ཁང་དུ་འཁྲིད་ཟེར་ན་ཡ་ཡའི་སྟེང་ཡོ་ཡོ་ཡོད་པའི་བདག་གི་ཨ་མྱེས་ཀྱིས་དགའ་བ་ཁོག་ལ་མ་ཆུད་པར་ཡོད་སྐད།

བདག་གི་ཚོད་དཔག་ཁྲོད་དུ། ཨ་ཕ་དང་ཨ་མ་གཉིས་ནི་ནོར་རྫི་དང་ལུག་རྫི་ནས་ཁ་ཐུག་པ་མ་ཡིན་ལ། ན་གཞུང་དང་ཆུ་འགྲམ་ནས་ལ་གཞས་བླངས་ཏེ་ཞེ་མཐུན་པའང་ཡིན་མི་སྲིད། བརྩེ་དུང་ནི་མ་གཞི་ནས་དེ་ལྟར་འཆར་ཡན་དང་ཡིད་འོངས་ཀྱིས་འཁྲུངས་འོས་པ་ཞིག་ཡིན་ནའང་། བརྩེ་དུང་ནི་ནམ་ཡང་འཆར་ཡན་དང་ཡིད་འོངས་ཀྱིས་འཁྲུངས་ངེས་པ་ཞིག་ཀྱང་ག་ལ་ཡིན། སྐབས་དེའི་འབྲོག་པའི་གོམས་སྲོལ་ལ་བུ་ཆེ་བར་མནའ་མ་བླངས་ནས་གཞིས་ཁྱིམ་འཛིན་པ་དང་། བུ་ཆུང་བ་དགོན་པར་བསྐྱལ་ནས་གྲྭ་བ་བཅའ་བའམ་མག་པར་སྟེར་བ་སོགས་བྱེད་སྲོལ་ཡོད་འདུག དེ་བཞིན་དུ་མི་ཞིག་གི་མི་ཚེ་གཅིག་རིང་གི་བྱ་བ་གལ་འགངས་ཆེ་ཤོས་ཏེ། གཞོན་ནུ་ཕོ་མོའི་གཉེན་སྒྲིག་གི་བྱ་བ་དེ་ཡང་སོ་སོའི་ཕ་མའམ་གཉེན་ཉེ་རིང་ཁྲོད་ཁ་དབང་མཐོ་བའི་ལོ་ལོན་དག་གིས་ཁྱིམ་ཚང་དང་ཤ་རུས། སྲུང་མ་སོགས་བརྟག་དཔྱད་ཞིབ་མོའི་སྒོ་ནས་རང་གི་བུ་དང་ཕ་རོལ་བའི་བུ་མོ་གཉིས་ཀྱི་ལོ་ཁམས་སྤར་ཁ་མཐུན་མིན་གྱི་མོ་རྩིས་ལུང་བསྟན་བྱེད་པ་དང་། དེ་ལ་ཁྱིམ་ཚང་སོ་སོའི་བུ་བུ་མོའི་གཟུགས་སྐྱེས་ལུས་བཟང་མིན་དང་ལག་ལས་ཀ་འཇོན་མིན། མི་གཤིས་སྤྱོད་ལམ་བཟང་མིན་སོགས་བརྟག་མཁན་ཀྱང་ཡོད་མོད། ཕལ་ཆེ་བ་ནི་ཀུན་གྱིས་བཀུར་ཞིང་ངོ་སོ་ཆེ་བ། ཁ་ལྕེ་བདེ་བའི་བར་བ་ཚོ་རི་སྤྱང་འདུར་འདུར་དང་རྒད་པོ་ཚོ་རྒོད་པོ་འཚོགས་འཚོགས་ཡིན་པའི་གོ་རིམ་ངེས་ཅན་ཞིག་གི་རྗེས་སུ། བོད་པའི་སྲོལ་རྒྱུན་གྱི་སྟོན་མོ་སྟབས་བདེ་ཞིག་གིས་ཆ་མེད་ཀྱི་གཞོན་ནུ་གཉིས་ཆ་ཡོད་དུ་བསྒྱུར་ཅིང་། རྒྱུས་མེད་ཀྱི་སེམས་པ་གཉིས་རྒྱུས་ཡོད་དུ་འདྲེས་པ་ནི་དུས་སྐབས་ཤིག་གི་བརྩེ་དུང་གི་གཏམ་རྒྱུད་ཡིན་དགོས། བརྩེ་དུང་གི་གཏམ་རྒྱུད་དེ་ནི་འབྲོག་པའི་ཕོ་ལས་མོ་ལས་ཀྱི་ཁྲོད་ནས་དལ་བ་དལ་བུར་མྱུ་གུ་འབུས་ཤིང་། རིམ་གྱིས་འཚོ་བའི་རྒྱུན་ཤེས་གཞན་དག་དང་འདྲ་བར་གོམས་ཤིང་ལོབས་པར་གྱུར་པ་ན། ད་ནི་བརྩེ་དུང་ནི་འཚོ་བ་ཡིན་ལ་འཚོ་བ་ནི་བརྩེ་དུང་ཡིན་འདྲའི་དུས་ཚོད་ཀྱི་གཙང་བོ་མུ་ནས་མུ་རུ་བཞུར་སོང་།

སྤྱིར་འབྲོག་པའི་འཚོ་བའི་ཁྲོད་དུ། ཕོ་ལས་དང་མོ་ལས་ནི་སོ་སོར་དབྱེ་བ་གསལ་བོ་ཡིན་ཏེ། སྐྱེས་པ་ཞིག་ཡིན་ན་ངེས་པར་ཁྱིམ་གྱི་དབང་འཛིན་གཙོ་བོ་ཡིན་དགོས་ལ། ཁྱོ་ཀའི་འཇོན་ཐང་གིས་ཁྱིམ་ཚང་དེ་བ་ཚང་གི་འཚོ་བའི་བཟང་ངན་དང་ནང་མིའི་མཛའ་མཐུན། དབང་འབྱོར་སྙན་གྲགས་ལ་སོགས་གང་ཅིའི་ཐད་མཚོན་པར་བྱེད་པ་ཡིན་པས། ཁྱིམ་ཚང་གི་མེད་མུག་དང་བུ་ཕྲུག་གི་སྐྱེ་འཕེལ་ཁྲོད་དུ་བདག་གི་ཨ་ཕ་ནི་ནམ་ཡང་དམག་སྤྱི་ཆེན་མོ་ཞིག་དང་འདྲ་བར། སྒོ་ཕྱི་ནང་གི་ལས་ཀ་ཡོད་ཚད་ཚགས་སུ་ཆུད་པར་བྱས་རྗེས། ད་གཟོད་འུར་ལྕག་བཟུང་ནས་ལུག་རྫིར་འགྲོ་བ་ཡིན་ལ། ལུག་རྫི་ནས་ཀྱང་སླར་ཡང་ཁྱིམ་གྱི་དོན་དག་ཆེ་མ་ཆུང་གསུམ་ལ་འདང་རྒྱག་ལྷོད་མ་མྱོང་བ་ཞིག་ཡིན་སྐད། འགན་ཁུར་གྱི་འདུ་ཤེས་དྲག་པའི་གཤིས་ཀ་དེ་ནི་སློབ་གྲྭ་ནས་རྒྱུད་ལ་གོམས་པ་ཡིན་ངེས་ཏེ། འབྲོག་པའི་བུ་ཕྲུག་གཞན་དང་མི་འདྲ་བའི་གོམས་གཤིས་དེའི་དབང་གིས། ངེད་ཚང་གི་ཁྱིམ་གྱི་འབྱོར་བ་རིམ་གྱིས་རྒྱས་ཤིང་བུ་ཕྲུག་གི་སློབ་གསོ་ཡང་ཞ་དང་ཞོར་ནས་གྲུབ་སྟེ། ད་ནི་རུ་ཁ་ཁྱིམ་མཚེས་གཡས་གཡོན་གྱིས་ཁ་མིག་ཡར་ལྟ་བྱེད་ས་ཞིག་ཏུ་གྱུར་ཡོད་པས་ན། ང་རང་ནར་སོན་གྱི་ཁོར་ཡུག་འདི་འདྲ་ཞིག་ནས་བྱིས་དུས་ཀྱི་ད་དུང་མ་སྨིན་པའི་བསམ་བློར་སྐུལ་མ་དང་ཤུགས་རྐྱེན་གང་མང་ཐེབས་ཡོད་པ་སྨྲོས་ཅི་དགོས།

རྗེས་ཀྱི་ལོ་ཟླ་ནི་ལོ་བཅུའི་རིག་གནས་གསར་བརྗེ་ཆེན་མོའི་འུར་ཟིང་དང་མུ་གེ དངངས་འཇིགས་ཀྱི་ཁྲོད་ནས་བསྐྱལ་བ་རེད་མོད། ཨ་ཕ་ནི་ལུག་རྫི་དཔེ་མེད་ཅིག་ནས་བཟའ་དཔོན་དཔེ་མེད་ཅིག་དང་། དེ་ནས་རིམ་བཞིན་བུ་བུ་མོ་དྲུག་གི་ཨ་ཕ་དཔེ་མེད་ཅིག་ཏུ་གྱུར་པའི་བར་དུ་མི་ལོ་ཉི་ཤུ་ལྷག་འགོར་སོང་། མི་ལོ་ཉི་ཤུ་ལྷག་འགོར་བའི་རྗེས་སུ། བདག་ཀྱང་མཚོ་ལྷོ་མི་རིགས་དགེ་ཐོན་སློབ་གྲྭ་ནས་སློབ་མཐར་ཕྱིན་ཞིང་། ཁྱིམ་མཚེས་གཡས་གཡོན་གྱི་ན་མཉམ་བྱིས་པའི་ཁྲོད་ནས་ཆེས་ཐོག་མར་ཟླ་ཕོགས་ལེན་མཁན་དུ་གྱུར། དེ་ནི་དོན་དག་གཙོ་བོ་མ་ཡིན་ནའང་། ཨ་ཕའི་ཆུང་དུས་ཀྱི་དམིགས་པའི་ཕུགས་འདུན་མངོན་དུ་བསྒྱུར་བ་དེས་བདག་ལའང་བུ་ཞིག་ཏུ་སྐྱེས་པའི་བསམ་དོན་ཡིད་བཞིན་འགྲུབ་པ་ལྟ་བུའི་ང་རྒྱལ་ཞིག་ད་ལྟ་ད་དུང་ཡང་ཡལ་བ་མེད་པར་ཁོག་ཏུ་མ་ཆུད་པར་འདུག

ངེད་ཚང་གི་དགུན་ས།

བསམ་ཤེས་དུས། ངེད་ཚང་དགུན་ས་ཏག་ཏག་ཏུ་ཡོད་ཅིང་། དགུན་ས་ནི་འབའ་ཚང་ཞིང་ར་དང་འདབ་འབྲེལ་ཡོད། དུས་རབས་གོང་མའི་ལོ་རབས་དྲུག་བཅུ་བའི་དུས་སྐབས་གང་རུང་ཞིག་ལ། གཙོ་འཛིན་མའོ་ཙེ་ཏུང་གིས“གྲོང་གསེབ་ནི་གནམ་ས་ཡངས་ཤིང་རྒྱ་ཆེ་བ་ཞིག་ཡིན་པས་དེ་གར་བྱས་རྗེས་ཆེན་པོ་འཇོག་ཐུབ”ཅེས་ལོ་ན་གཞོན་ཞིང་མ་འོངས་པར་རེ་བ་དང་ཡིད་ཆེས་ཀྱིས་ཁེངས་པའི་ཤེས་ཡོན་ཅན་མང་བོ་གྲོང་གསེབ་ཏུ་བསྐྱོད་དེ་སློབ་གསོ་མྱོང་དུ་བཅུག་པ་རེད།

ཏག་ཏག འབའ་ཚང་ཞིང་ར་ནི་ཤེས་ཡོན་ཅན་དེ་དག་གིས་ས་རྒོལ་སློག་ནས་ཞིང་སར་བསྒྱུར་བ་ཨེ་ཡིན་སྙམ་ལ། རྗེས་སུ་ས་གནས་ཀྱི་འབྲོག་དམངས་ཚོས་ཀྱང་གནས་སྐབས་ཀྱི་ཡོང་སྒོ་བསམ་ནས་དམིགས་མེད་དུ་རྩྭ་ས་ཞིང་སར་བཏུལ་བའང་བགྲང་གིས་མི་ལངས། སྟོན་མཇུག་དང་དགུན་གཞུང་དུ་རླུང་དམར་གྱིས་ཞིང་སའི་ས་རྡུལ་ཁུར་ཡོང་བ་ན། ཕྱོགས་བཞི་མཚམས་བརྒྱད་ཀྱི་ཁ་ཕྱོགས་མི་མཐོང་བར་མ་ཟད་མིག་ཀྱང་འབྱེད་མི་ཐུབ་པའི་ཚོད་དུ་ཡོད་ནའང་། ཨ་ཕ་ནི་ནམ་ཡང་སྤྲོ་སྣང་གིས་ཁེངས་པའི་ཞལ་མདངས་དེ་ད་དུང་ཡིད་ལ་ཝ་ལེར་འདུག དེ་དུས་ཀྱི་དགུན་སའི་མི་ཕྱུགས་གཉིས་ཀ་འདུག་ས་ནི་རྩི་རིང་གིས་བསྐོར་བའི་ར་སྐོར་ཆུང་ངུ་རེ་ཡིན་པ་འདྲ་སྟེ། ངེད་ཚང་གི་སྦྲེའུ་ཁྲའི་མཐའ་སྐོར་རྩི་རིང་གི་ར་བས་སྐོར་ཞིང་། སྤོ་ཐོས་བསྐོར་བའི་ལུག་རའི་མཐའ་སྐོར་དུའང་རྩི་རིང་གིས་སྐྱོར་མ་བརྒྱབ་ཡོད། རྩི་རིང་གི་སྤྱོད་སྒོ་གཞན་ཅི་ཞིག་ཡིན་པ་དང་ནོར་ལུག་གིས་རྩི་རིང་བཟའ་མིན་ལ་མཉམ་ཆེན་པོ་བཞག་མ་མྱོང་ནའང་། བདག་གི་དྲན་ཡུལ་ན། ཐེངས་ཤིག་ང་རང་ལུག་རྫི་ལ་སོང་བར་རྩི་རིང་གི་གསེང་ནས་མགོ་འཁོར་ཏེ་ཕྱིར་ཡུལ་ལ་ལོག་པའི་ལམ་མ་རྙེད་པ་ཞིག་ཡོད། དེས་ནི་སྐབས་དེའི་འབའ་ལུ་གུ་ཐང་གི་རྩྭ་དང་རྩི་ཤིང་གི་སྐྱེས་རྒྱ་མཚོན་ཐུབ། དུས་ཡུན་ཐུང་ཐུང་ལོ་ངོ་བཞི་བཅུ་ཙམ་གྱིས་རྗེས་སུ། འབའ་ལུ་གུ་ཐང་ནི་ཕྱི་ཤུན་མེད་པའི་ས་སྐྱ་ཤོག་ལེབ་ལྟ་བུ་ཞིག་ཏུ་གྱུར་འགྲོ་བ་སུ་ཡིས་ཤེས།

ལོ་ཞིག་གི་དགུན་ཁར། ས་མཐར་མྱུལ་བའི་ཨ་སྐྱོ་བ་ལོ་ལོན་སྐྲ་དང་སྨྲ་ར་དཀར་པོར་གྱུར་ཟིན་པ་ཞིག་གིས་ངེད་ཚང་ལ་གནས་ཚང་གཡར་མྱོང་། དེ་དུས་བདག་ཀྱང་ལོ་བཞི་ལྔ་ཙམ་ལ་སླེབས་ཡོད་ཚོད་འདུག ཨ་སྐྱོ་བ་དེས་ཁྱི་གུ་ཆུང་ཆུང་དཀར་པོ་ནག་ཐིག་མེད་པ་ཞིག་ཁྲིད་ཡོད་ཅིང་། ཁྱིམ་ལ་འཛུལ་མ་ཐག་ཐོག་མར་ཐབ་ཀའི་མར་སྒྱེད་ལ་རང་གི་ཐོད་པ་གཏུགས་པ་དང་དེ་ནས་ཁྱི་གུའི་ཐོད་པ་གཏུགས་པར་བྱེད། སྐབས་དེའི་བདག་གི་ན་ཚོད་ཀྱིས་དེ་དག་ལ་གོ་བ་ཆེན་པོ་ཞིག་ལེན་ཐུབ་མ་སོང་། རྗེས་སུ་རིམ་གྱིས་ནར་སོན་པ་དང་འབྲོག་པའི་ཐབ་ཀ་དང་ཐབ་ལྷའི་དད་མོས་སྐོར་གྱི་ཤེས་བྱ་མང་བོ་ཞིག་རྒྱུད་ལ་འབྱོར་ཞིང་། ལྷ་མོ་གཡུ་རལ་ཅན་ལན་བུ་ཕྲག་ངོས་སུ་ཁེབས་པའི་ཐབ་ལྷ་ཡུ་མོ་གཙོས་ཤར་ལྷོ་ནུབ་བྱང་གི་ཐབ་ལྷ་རིགས་ལྔ་མཆོད་སྲོལ་ཡོད་པ་ཞར་དུ་ཤེས། མི་ལོ་མང་བོ་འགོར་བའི་རྗེས་སུ། རང་གི་དྲན་པར་གསལ་ལ་མི་གསལ་བར་ཡོད་པའི་ཨ་སྐྱོ་བ་དེ་དང་ཁྱི་གུ་དེ་དྲན་ཐེངས་རེ་རེར། སྐབས་དེའི་མི་རྣམས་ཀྱི་ལྷད་མ་གོས་པའི་དྭངས་གཙང་གི་དད་མོས་ལ་ཡི་རང་དང་གོང་བཀུར་མི་བྱ་ཐུ་མེད་རེད། ཨ་སྐྱོ་བས་ཐབ་ཀར་ཐབ་ལྷ་ཡོད་ཟེར། ཁྱིམ་ཚང་ལ་ཁྱིམ་ལྷ་ཡོད་ཟེར། ད་དུང་ནོར་ལྷ་དང་གཡང་ལྷ་མང་བོ་ཞིག་བརྩིས་སོང་། མེས་པོ་དམ་པ་གོང་མ་དག་གི་རིང་ནས་བཟུང་རང་གི་ཚེ་སྲོག་ལ་བར་ཆད་མི་ཡོང་བ་དང་འཚོ་བ་ལ་ཆག་སྒོ་མི་འབྱུང་ཆེད་ལྷ་ཀླུ་གཉན་གསུམ་ལ་མཆོད་པའི་དད་མོས་མང་དུ་དར་ཡོད་ཅིང་། དེ་ལ་དམར་མཆོད་དང་དཀར་མཆོད། གཡང་འགུག་ལྟ་བུའི་དགེ་སྐྱོན་ཅི་རིགས་ཀྱི་དམངས་སྲོལ་མང་དུ་ཡོད་པ་དག་ཀྱང་ད་ནི་དུས་ཀྱི་འཕེལ་རིམ་དང་འཚོ་གནས་ཀྱི་འགྱུར་ལྡོག མི་རྣམས་ཀྱི་བསམ་བློའི་གོ་རྟོགས་བཅས་ཀྱི་དབང་གིས་རིམ་གྱིས་ཉམས་རྒུད་དུ་འགྲོ་ཉེན་འདུག ཨ་སྐྱོ་བ་དེ་ངེད་ཚང་ལ་ཉིན་ག་ཚོད་ལ་བསྡད་པ་མི་དྲན་མོད། ཁོ་འགྲོ་ཁར་ཁྱི་གུ་ཆུང་ཆུང་དེར་ས་མཐའི་འཁྱམ་སྐྱོད་ཀྱི་སྡུག་བསྔལ་མྱོང་དུ་འཇུག་མི་འདོད་ཟེར་ནས་ངེད་ཚང་དུ་བཞག་སོང་། རྗེས་ཀྱི་ལོ་ཟླའི་ཁྲོད་དུ། ཁྱི་གུ་དེ་དང་ངེད་གཉིས་མཉམ་དུ་ངེད་ཚང་གི་ལུག་རྫི་རུ་གྱུར་སོང་། དྲང་མོར་བཤད་ན། ཁྱི་གུ་རྒྱུག་ན་བདག་ལས་མགྱོགས་ཤིང་ཟོག་ཁ་བླངས་ནའང་བདག་ལས་འཇོན་པོ་ཡོད་པས། ཁྱི་ཞིག་ཡོད་ན་མི་ཞིག་གི་ཡན་ཡིན་ཞེས་པའི་གཏམ་དཔེ་དེ་ཡང་སྲིད་པ་རྒད་པོ་སུ་ཞིག་ཁོམ་དྲགས་ཏེ་ལས་དོན་མེད་ལ་གཏམ་མདོ་མེད་དུ་བཤད་པ་ག་ལ་ཡིན།

ངེད་ཚང་དགུན་སར་ཡོད་པའི་སྐབས་དེ་དག་ཏུ། བདག་གིས་ཨ་ཕ་ལ་ཨ་ཕ་ཨ་པང་ཞེས་འབོད་ཀྱིན་འདུག དེ་ནི་གཅེས་མིང་ཞིག་གམ་མཚང་མིང་ཞིག་ཡིན་མིན་ད་ལྟ་ད་དུང་གསལ་ཆ་མི་ཤེས་མོད། ནར་སོན་གྱི་ལོ་ཟླའི་ཁྲོད་དུ། རང་གི་ཨ་ཕར་མཚང་ཞིག་ལྟ་ཅི་གཅེས་མིང་ཞིག་ཀྱང་བོས་པ་མི་དྲན་པར་འདུག སྐབས་ལན་རེར། ཕ་བུའི་བར་གྱི་བརྩེ་བ་ནི་དེ་ལྟར་ཅིས་ཀྱང་འབོད་སྒྲ་ཞིག་གིས་མཚོན་དགོས་པ་མིན་ལ། ཅིས་ཀྱང་འབོད་སྒྲ་ཞིག་གིས་མཚོན་ཐུབ་པའང་མ་ཡིན་ཏེ། ཨ་ཕ་རྒྱུན་པར་སྦྲ་ཡི་གྲུ་འོག་གང་རུང་ཞིག་ཏུ་སྦས་རྗེས། བདག་གིས་ཨ་ཕ་ཨ་པང་ཞེས་འབོད་ཞོར་བཙལ་ཐེངས་རེ་རེར། ཨ་མ་ནི་དལ་བ་དལ་བུར་སྦྲ་སྒོ་རུ་ཙོག་ཅིང་ངག་ཁོམ་མེད་དུ་སྒྲོལ་མ་འདོན་ཞིང་ལག་དལ་མེད་དུ་འཕང་འཁེལ་བར་བྱེད། དེ་ནི་འབྲོག་པའི་འཚོ་བའི་གོམས་གཤིས་དང་འབྲེལ་བ་དམ་དུ་ཡོད་པ་ཞིག་སྟེ། འབྲོག་པའི་སྒོ་ཕྱི་ཁྱིམ་གྱི་རྫོགས་རྒྱུ་མེད་པའི་ལས་ཀ་ཡོད་ཚད་ནི་མོ་ལས་ཡིན་པས། ནམ་རྒྱུན་འོ་དཀྲུག་མར་ལེན་དང་ལྕི་འཕུད་ཐང་ལས། ཡོས་བརྔོ་རྩམ་འཐག ཟས་གཡོ་ཇ་འདྲེན། བལ་རྩིད་འཁེལ་འཐག ཡོད་བྱད་གད་བརྡར་ལ་སོགས་ལས་ཀའི་ཁྲོད་དུ། ཨ་མ་ནི་སོས་དལ་ལ་བབས་ནས་ངལ་གསོ་བ་དང་ཇ་འཐུང་བའི་སྐབས་ཤིག་མཐོང་མ་མྱོང་བ་འདྲ། དེ་ནི་ཕལ་ཆེར་ཁ་ཁོམ་ན་ལག་མི་དལ་བ་དང་ལག་ཁོམ་ན་སེམས་མི་དལ་བ་ལྟ་བུ་ཞིག་གོ། དེ་ལྟར་འབྲོག་པའི་འཚོ་བའི་ཉིན་གཅིག་གི་དུས་ཚོད་དེ། ཐོ་རེངས་སྐར་ཆེན་རབ་རིབ་མག་མོག་ཏུ་གྱུར་བའི་ཞོགས་པ་ནས་ཟླ་འོད་གསལ་བོ་སྐར་ཚོགས་ཀྱིས་བསྐོར་བའི་མཚན་མོའི་བར་ནི། འབྲོག་མོ་ཞིག་གི་བྲེལ་ཟིང་གི་ཕྱི་ལས་ནང་ལས་ཀྱི་ལས་ཀའི་མགོ་རྩོམ་པ་ནས་མཇུག་བསྡུ་བའི་བར་ཡིན། ཡང་ན་ཉི་ཤར་གྱི་ཐོག་མ་དང་ཉི་ནུབ་ཀྱི་གཞུག་མ་བྱེད་དགོས་པའི་བདག་གི་ཨ་མའི་ཉིན་གཅིག་ནི་དེ་ལྟ་ལག་པའི་སེར་ཀ་དང་ཐོད་པའི་རྒས་གཉེར་ཁྲོད་འཐིམ་ནས་ཁ་སང་དེ་རིང་ལ་གཏུགས་པ་ཡིན་ངེས།

བདག་གི་དྲན་པའི་ཁྲོད་དུ། ཨ་མ་ནི་སྨྲ་བ་ཉུང་བའི་བུད་མེད་ཁྱད་པར་བ་ཞིག་སྟེ། བདག་གི་མི་ཚེའི་ཁྲོད་དུ་ཨ་མས་དགའ་སྡུག་གི་སྐད་ཆ་མང་དུ་བཤད་པ་ཐོས་མ་མྱོང་། ཐ་ན། ཨ་ཕ་ལུག་རྫི་ནས་ཕྱིར་ཐོན་དུས་མོས་ད་དུང་ཇ་བསྐོལ་མེད་ཚེ། ཁོང་ཁྲོ་དང་བཅས་པས་ཐབ་འགྲམ་གྱི་ཟངས་དེམ་གཡས་སྐོར་དང་གཡོན་སྐོར་གང་རུང་གི་སྦྲ་སྒོར་གཡུག་པའི་སྐབས་དག་ཏུའང་། ཨ་མ་སྨྲ་བ་མེད་པར་སྒོར་སོང་ནས་ཟངས་དེམ་ཁྱེར་ནས་ཡོང་ནས་ཇ་གསར་སྐོལ་བྱེད་པ་ལས་ཚིག་གཅིག་ཀྱང་མི་སྨྲ། དེང་གི་སྐད་ཆས་བཤད་ན་དེ་ནི་བུད་མེད་ཀྱི་ཁེ་དབང་ལོངས་སུ་སྤྱོད་མ་ཐུབ་པ་ཡིན་ཡང་སྲིད་མོད། བུད་མེད་ཀྱི་མཛངས་པའི་ཆ་དང་མཛེས་པའི་ཆ་དེ་འདྲ་མང་བོ་ཞིག་འབོར་གྱིན་པའི་ཁ་སང་དེ་རིང་བདག་གིས་ནམ་ཡང་ཨ་མ་དང་ཨ་མའི་ན་ཚོད་ཀྱི་ཨ་མ་མང་བོ་ཞིག་དྲན་ཡོང་། ཨ་མ་དེ་དག་གིས་དགུན་གྱི་ཆེས་འཁྱག་པའི་ནམ་ཟླའི་ཁྲོད་དུ་ང་ཚོར་ཆེས་དྲོད་པའི་བརྩེ་བ་སྦྱིན་པ་ནི་དུས་དང་སྐལ་བ་གང་ཞིག་ཏུའང་བརྗེད་དུ་ནུས་པ་ཞིག་ག་ལ་ཡིན།

སྐྱས་ལམ་གྱི་གཏམ་རྒྱུད།

ངེད་ཚང་གི་དབྱར་ས་ནི་བཅུད་པར་མཐོན་པོ་བཅུ་གསུམ་གྱིས་ལག་པའི་ནང་ལ་ལག་པ་བཞག་འདྲའི་དཔུང་བའི་ནང་དུ་དཔུང་བ་སྦྲེལ་འདྲའི་རི་ཕྲེང་ཕྲེད་དུ་བསྟར་བའི་ནང་ལུང་དུ་ཡོད། དེ་ལ་ལོ་རྒྱུས་དང་ས་ཁམས་གང་གི་ཆ་ནས་ཀྱང་ངག་རྒྱུན་དང་མཚར་སྒྲུང་ལྟ་བུའི་ལོ་རྒྱུས་ཤོད་རྒྱུ་མང་དུ་འདུག་མོད། གལ་ཆེ་བོ་ནི་རི་མཐོ་ས་དང་འཕྲེང་དོག་ས། འགག་བཙན་ས་ཡིན་པའི་བཅུད་པར་གྱི་རི་དང་ལུང་བ། ནགས་ཚལ་དང་གཙང་བོ་དག་གིས་ང་རང་ནར་སོན་གྱི་ལོ་ཟླའི་ཁྲོད་དུ་མིག་གིས་ལྟ་ས་དང་རྣ་བས་ཉན་ས། སེམས་ཀྱིས་དྲན་ས་ཡིན་པའི་འདམ་བག་ཤར་བར་མ་ཞེས་པའི་ལུང་བ་དེ་ད་ལྟ་ད་དུང་ཡང་དྲན་པར་ཝ་ལེར་འཁོར་བར་བྱེད། ཞེ་ལ་ཐོགས་པའི་ཕ་ཡུལ་དང་དྲན་པར་འཁོར་བའི་ཕ་ས་ནི་མི་ཞིག་ནར་སོན་གྱི་གོ་རིམ་ཁྲོད་དུ་དེ་འདྲའི་བརྗེད་དཀའ་ཞིང་དྲན་སླ་བ་ལ་ཨང་།

དུས་རབས་གོང་མའི་ལོ་རབས་བརྒྱད་ཅུ་བའི་སྐབས་སུ། འབྲོག་པའི་རྩྭ་ས་ནི་སྡེ་བ་དང་སྡེ་བར་ས་མཚམས་ཆུ་མཚམས་ཡོད་པ་ལས་དེང་སྐབས་ནང་བཞིན་ཁྱིམ་ཚང་སོ་སོར་བགོས་ཏེ་འགན་གཙང་ལེན་བྱས་མེད་མོད། དབྱར་ས་དང་དགུན་ས་སོགས་ངེས་གཏན་དུ་ཡོད་པ་འདྲ་སྟེ། ངེད་ཚང་གི་དབྱར་ས་ནི་འདམ་བག་ཤར་བར་མ་ཞེས་པ་དེ་ཡིན། དེ་ནི་ནང་རྫ་རུ་ཡོད་པ་དང་ལྟོས་བཅས་ཀྱི་སྟོན་ས་དང་དཔྱིད་སར་བསྡུར་ན་ས་བབ་མཐོ་ཞིང་རི་རྒྱུད་མང་བ། གྲང་ངར་ཆེ་ཞིང་ཆར་ཆུ་མང་བ་ཡིན་པས་དབྱར་ཀྱི་ཚད་པར་རན་ཞིང་མི་ཕྱུགས་གཉིས་ཀར་འཕྲོད་པ་ཞིག་ཡིན། སྟོན་ས་དང་དཔྱིད་ས་ནི་ས་བབ་ཅུང་དམའ་ཞིང་གྲང་ངར་ཆུང་ལ་བསིལ་བའི་རྫ་རྒྱའི་རི་འདབས་སམ་ལམ་ལུང་དང་ཁུ་ལུང་མདོ། ཆུ་བཟང་ཁའི་ཝ་དཀར་ཐང་བཅས་སུ་བྱེད་པ་ཡིན། དེ་བས། བཅུད་པར་མཐོན་པོ་བཅུ་གསུམ་ཐེ་བའི་རི་རྒྱུད་དག་གིས་བཅད་དེ་རིའི་ཕ་རོལ་ནི་དབྱར་ས་དང་ཚུར་རོལ་ནི་སྟོན་དཔྱིད་ས། སྨད་ཀྱི་འབའ་ལུ་གུ་ཐང་ཆེན་པོ་ནི་དགུན་སར་བྱེད་པ་ཡིན། དེ་བཞིན་དུ་རུ་དབྱར་སར་འགེལ་རན་དུས་དགུན་སར་འདུག་མི་རུང་བ་དང་། སྟོན་སར་འབབ་རན་དུས་དབྱར་སར་འདུག་མི་རུང་བ་བཅས་ནི་རྩྭ་ཁྱིག་ཅེས་པའི་སྡེ་ཁྲིམས་ཀྱིས་ཐག་གཅོད་བྱེད་པ་ཡིན་པས། དེ་ལ་ཆེད་དུ་རྩྭ་སྲུང་ཡང་བཀོད་སྒྲིག་བྱེད་པ་ཡིན།

དབྱར་ས་གླེང་དགོས་ཚེ་མི་གླེང་ཐུ་མེད་དུ་ཡོད་པ་གཞན་ཞིག་ནི་འབྲོག་པའི་རུ་འགེལ་སྐྱས་འདེད་ཀྱི་ལས་ཀ་དེ་རེད། བདག་གི་དྲན་པར་ཟིན་དུས་ནས་བཟུང་། ངེད་ཚང་ལ་རྟ་རེག་ཕྲུག་ཅེས་སྤུ་མདོག་སེར་སྐྱ་གཟུགས་ཐུང་ཞིག་ཡོད། བདག་དང་ནུ་བོ་ཆེ་བ་གཉིས་ཀྱིས་རྟ་རེག་ཕྲུག་འཕོང་བརྒྱབ་ནས་ལུག་འདེད་པ་དང་། ནུ་བོ་ཆུང་བ་དང་སྲིང་མོ་གཉིས་ནི་ཁལ་མ་གཡུང་མོ་ཞིག་གི་རྒྱབ་ལ་གཡས་གཡོན་དུ་བཀལ་བའི་སླེ་བོ་རུ་བཞག་སྟེ་སྐྱས་རྗེས་སུ་འབྲངས་ཡོད། ཨ་ཕ་དང་ཨ་མ་ནི་རྐང་ཐང་དུ་སྐྱས་དང་འདྲེས་པའི་ནོར་ཁྱུ་འདེད་མཁན་ཡིན། ཉིན་ལམ་ཡིན་པའི་སྐྱས་ལམ་རིང་མོ་དེས་ཉི་ཤར་གྱི་སྔ་གཞུག་རྩད་དེ་འབའ་ལུ་གུ་ཐང་ཞེས་པའི་ཁོད་ཡངས་པའི་ཐང་ཆེན་དེ་ནས་ལམ་ལ་ཆས་ན། ངག་རྒྱུན་དུ་ང་ཚོའི་སྡེ་མིང་ལ་རྟ་མང་ཞེས་སུ་ཐོགས་རྐྱེན་དུ་བཤད་པའི་རྟ་ཁྱུ་ཆུ་ལ་བཤར་སའི་རྐང་ལམ་རིང་མོ་དེར་ཞུགས་དགོས། ཁུ་ལུང་གཡག་སྙིང་ཞེས་པའི་གནས་རི་འགང་ཆེན་ཞིག་གི་ཁེས་ན་ཡོད་པའི་ཉག་ལམ་ཕྲ་མོ་ཞིག་བརྒལ་དགོས། བཅུད་པར་གསེར་སྨུག་རྫོང་དུ་སྦྲེལ་བའི་འབྲི་གོང་བར་མའི་བྲག་འཕྲང་བཙན་པོ་ཞིག་བརྒྱུད་དགོས། ལམ་བར་དུ་ཁལ་མ་རྒོད་པོ་རེས་རྒྱབ་ཀྱི་ཁུར་བོ་ལྕི་མོ་ལ་མི་འདོད་པའི་རྣམ་འགྱུར་དང་བཅས་ས་ལྡིང་གནམ་ལྡིང་གིས་ཁལ་དུ་བཀལ་བའི་ཅ་ལག་དག་བཅོམ་ཆག་སྐྱ་ཉིལ་དུ་གཏོང་དུས་ཀྱང་ཡོད་དེ། ཐེངས་ཤིག་ལ། ལུག་ཁྱུ་ལམ་འགྲམ་གྱི་རྩི་སྤུངས་ནས་སད་པའི་རི་བོང་ཞིག་ལ་འདྲོགས་པ་དང་རྟ་རེག་ཕྲུག་ལུག་ཁྱུར་འདྲོགས་ནས་ངེད་ཕུ་ནུ་གཉིས་རྟ་གོང་ནས་ཐང་ལ་གཡུག་སོང་། གླིང་སྒྲུང་དུ་གན་རྐྱལ་ལ་ནམ་ལངས་འདྲ་གཅིག་བརྡབས་པ་དང་ཁ་སྦུབ་ཏུ་ས་རུབ་འདྲ་ཞིག་བརྡབས་སུ་བཤད་པའི་ཤི་གསོན་གྱི་བར་གླགས་དེར། བདག་ནི་ལུས་ཀྱི་ན་ཟུག་དང་སེམས་ཀྱི་ཕམ་གདུང་གིས་མིག་ཆུ་དབང་མེད་དུ་ཤོར་ནའང་། ནུ་བོ་ནི་དེ་མུར་ཐང་ནས་ཡར་ལངས་ཤིང་གྱོལ་མ་ལྡིང་གིས་རྒྱུག་སོང་ནས་ཐག་རིང་ན་སྣ་འདྲོག་བྱེད་ཀྱིན་རྟ་རེག་ཕྲུག་གི་མཐུར་མདས་བཟུང་སོང་། རྗེས་ཀྱི་ལོ་ཟླའི་ཁྲོད་དུ་ནུ་བོ་ནི་ཕྱུགས་རྫི་དཔེ་མེད་ཅིག་ཏུ་གྱུར་པའི་རྟགས་དང་རྟེན་འབྲེལ་ཀྱང་དེ་ལྟར་འགྲིག་པ་ཡིན་མིན་ཅི་ཆ། ལམ་ཚེགས་དང་ལུས་ཚེགས་ཀྱི་མནར་བའི་འགྲུལ་བཞུད་རིང་མོ་དེ་ཕྱི་དྲོའི་ཉི་མ་ནུབ་ཁ་ཙམ་ལ་མཇུག་རྫོགས་ཤིང་། མཚེར་ས་གསར་བར་སྦྲ་ཕུབ་དང་ཐབ་ཀ་ལས་ནས་འོ་ཇ་གསར་སྐོལ་འགྲུབ་དུས་སུ། ཉི་མ་ནི་ནུབ་ཕྱོགས་ཀྱི་བཅུད་པར་མཐོན་པོ་བཅུ་གསུམ་གྱི་རི་རྩེ་གང་རུང་ཞིག་ནས་ནུབ་འགྲོ་ལ། དབྱར་གཞུང་གི་གཡའ་དག་པའི་ནམ་མཁའ་རུ་སྐར་མའི་ཚོགས་ཀྱིས་ཞལ་འཛུམ་མིག་ལ་མཛེས་ཤིང་ཡིད་ལ་སིམ་པ་ཞིག་ཡོད།

བདག་གིས་ངེས་པར་གླེང་དགོས་པ་ཞིག་ནི། འབྲོག་པའི་རུ་འགེལ་བ་ནི་དུས་ཚོད་ངེས་ཅན་དང་ས་གནས་ངེས་ཅན་དུ་བྱེད་པ་ལས་རང་འདོད་ཅི་འདོད་ལྟར་ཡོང་བ་ཞིག་མིན་པར། དེ་ནི་དུས་ཚིགས་བཞིའི་རྩྭ་ཆུའི་དགོས་མཁོ་ལྟར་ཐག་གིས་གཅོད་པ་ཞིག་ཡིན་པ་གོང་དུ་གླེང་ཟིན་པ་ལྟར་རོ།། དཔྱིད་ཀྱི་ཆར་བ་དང་དབྱར་གྱི་ཚད་པ། སྟོན་གྱི་རླུང་བུ་དང་དགུན་གྱི་ཁ་བ་གང་དང་ཅི་ལ་འཛེམ་ཆོག་པ་ཞིག་ཀྱང་མིན་ཚོད་འདུག བདག་གི་དྲན་པའི་ཁྲོད་དུ་ཆུ་དང་ཆར་བ། བཙག་དང་ཁ་བའི་ཁྲོད་དུ་རུ་འགེལ་བ་དང་སྐྱས་དེད་པའི་ལོ་རྒྱུས་མང་དུ་ཡོད། བདག་གི་དྲན་པའི་ཁྲོད་དུ་རུ་འགེལ་བའི་བར་གླགས་ནས་ལུས་པོ་ཆར་གྱིས་བངས་པ་དང་རྐང་ལག་བཙག་གིས་ཕྱིད་པའི་ལོ་རྒྱུས་མང་དུ་ཡོད་མོད། དེ་ནི་བདག་གཅིག་པུ་མ་ཡིན་པའི་འབྲོག་གི་བུ་དང་བུ་མོ་ཡིན་ཡིན་པོ་ཚང་མ་བརྒྱུད་དགོས་པའི་ཉམས་སད་ཐེངས་ཤིག་ཡིན་པས། འབྲོག་པའི་བུ་ལ་ལྕགས་ཀྱི་སྲོག་ཐོགས་དོན་ཀྱང་དེ་ལ་འབྲེལ་བ་ཨེན་ཙམ་ལོས་ཡོད་བསམ་ཡོང་། སྐབས་ལན་རེར། རུ་བཀལ་ནས་མཚེར་སར་ཐོན་དུས་སུ་དུས་ཚོད་འཕྱི་པོ་ཆགས་ནས་ས་རུབ་ལ་ཉེ་ནའང་། ཁྱིམ་མཚེས་གཡས་གཡོན་གྱི་ཁྱིམ་བདག་མ་དག་གིས་འོ་ཇ་གསལ་སྐོར་ཁྱེར་ཡོང་ནས་སྐོམ་པ་གསོད་ཅིང་། སྦྲ་དང་ཐབ་ཀ་ཕུབ་རོགས་སོགས་ཀྱིས་ཚེགས་ཆེ་ཞིང་ཡུན་རིང་བའི་ལས་ཀ་དེ་དུས་ཡུན་ཐུང་ངུ་ཞིག་གིས་ནང་དུ་ཚེགས་མེད་ཀྱིས་འགྲུབ་པས་ན། འབྲོག་པའི་ལས་ཀ་ནི་ཕན་ཚུན་རོགས་རམ་གྱི་ཁྲོད་ནས་མགོ་རྩོམ་ཞིང་ཕན་ཚུན་མཉམ་ལས་ཀྱི་ཁྲོད་ནས་ཡོངས་སུ་འགྲུབ་པ་ཞིག་ཀྱང་ཡིན་འདུག

འབྲོག་པའི་བལ་སྟོན།

བདག་གི་དྲན་པའི་ཁྲོད་དུ་ཞག་ལྟར་སྐག་ཅིང་མར་བཞིན་སིམ་འདུག་པ་ཞིག་ལ། ལོ་རེ་རེའི་ཟླ་ལྔ་བའི་ཟླ་མཇུག་གམ་ཟླ་དྲུག་པའི་ཟླ་མགོ་གང་རུང་དུ་འབྲོག་པའི་བལ་སྟོན་བྱེད་པ་ཡིན། འབྲོག་པའི་བལ་སྟོན་ནི་དབྱར་ཁའི་ལུག་བལ་འབྲེག་རན་དུས་སུ། རུ་ཁ་ཁྱིམ་མཚེས་གཡས་གཡོན་གྱི་ལོ་གཞོན་ཕོ་མོ་དག་ཁྱིམ་གཅིག་ཏུ་འདུས་ནས་དེ་ཚང་གི་ལུག་བལ་འབྲེག་རོགས་བྱེད་པ་དང་། ལུག་བལ་འབྲེག་པའི་གོ་རིམ་ཁྲོད་དུ་ཁྱིམ་ཚང་དེ་ཚང་གིས་འཛོམས་ཚད་ཀྱི་ལུག་བཤས་ནས་སྟོན་མོ་བྱེད་པ་དེ་ལ་ཟེར།

ཁྱིམ་ཚང་སུ་ཞིག་གིས་ལུག་བལ་འབྲེག་རན་དུས་སུ། རུ་ཁ་ཁྱིམ་མཚེས་ཀྱི་ལོ་གཞོན་ཕོ་མོ་དག་མ་སྐུལ་དང་བླངས་ཀྱིས་མཉམ་དུ་འཛོམས་ཤིང་། རྒན་པ་བསམ་ཤེས་དག་གི་བཀའ་བཀོད་བཞིན་ཐོག་མར་བྱིས་པ་དག་གིས་ལུག་ར་བར་སྐྱིལ་བ་དང་གསར་བུ་དག་ལུག་ཁྱུར་རྒྱུག་ནས་བལ་གང་ཡོད་གང་འཛོམས་ཀྱི་ལུག་འཛིན་པར་བྱེད། ལུག་བཟུང་ཡོང་ནས་འབྲེང་བས་ཕྲེང་ལ་བསྟར་ནས་བཀྱིག་རྗེས་བལ་འབྲེག་མགོ་རྩོམ་པ་ཡིན། བལ་འབྲེག་མཁན་ནི་ལོ་ན་གཞོན་པའི་གསར་བུ་དང་བལ་འབྲེག་ལ་བྱང་བའི་དར་མ་དག་ཡིན་པ་དང་། ཁོ་ཚོས་སྟར་ལ་བཀྱིག་པའི་ལུག་བཅུ་ཁ་བོ་དེ་སུས་སྔོན་ལ་བྲེག་ཚར་མིན་གྱི་སྔ་གཞུག་ལ་འགྲན་བསྡུར་བྱེད་པ་ཡིན་ལ། བུད་མེད་དང་བྱིས་པ་དག་གིས་བྲེགས་ཟིན་པའི་ལུག་བལ་ཕྱོགས་གཅིག་ཏུ་སྤུངས་ནས་བལ་དོས་རྒྱག་པར་གྲ་སྒྲིག་བྱེད། སྤྱིར་བཏང་དུ་ལུག་བལ་ནི་དྲོས་ཇའི་བར་དུ་བྲེག་ཚར་བར་བྱེད་པ་དང་། ཁྱིམ་བདག་གིས་ཀྱང་ལུག་བཤས་ཏེ་ནང་ལྡུག་པ་དང་ཤ་བཙོ་བའི་ལས་ཀ་བྱས་ནས་དྲོས་ཇར་གྲ་སྒྲིག་བྱེད། ཨ་ཕ་ནི་ལུག་བཤའ་བ་དང་ནང་ལྡུག་པ་ལ་དེ་འདྲ་འཇོན་པོ་ཞིག་མིན་ནའང་། ཨ་མ་ལག་རོགས་སུ་ཡོད་ན་འབྲོག་པའི་ཁ་དཔེ་བཞིན་ཇ་དཀར་ཡོལ་གང་འཐུང་ཡུན་དུ་ཡོད་ཚད་ཚགས་སུ་ཆུད་ཐུབ་པ་ཞིག་ཡོང་། སྤྱིར་འབྲོག་ཁུལ་དུ་ལུག་བཤའ་བའི་ལས་ཀ་དེ་ནི་སྐྱེས་པ་དག་གིས་མ་ཎི་འདོན་པ་དང་ཁོག་ཕྱེས་རྒྱུ་དང་། བུད་མེད་དག་གིས་ནང་ལྡུག་རྒྱུ་དང་ཤ་བཙོ་བར་བྱེད་པ་དེ་ཡིན། དྲོས་ཇ་འཐུང་རྗེས་བལ་དོས་རྒྱག་པ་ཡིན་ཏེ། དེ་ལ་བྱིས་པ་དག་གིས་འབྲུག་བཙོ་བ་དང་བུད་མེད་རྣམས་ཀྱིས་ཡུས་ཐག་འཁེལ་ཞིང་གསར་བུ་ཚོས་བལ་དོས་རྒྱག་པར་བྱེད།

དུས་རབས་སྔོན་མའི་ལོ་རབས་བརྒྱད་ཅུ་དང་དགུ་བཅུ་བའི་དུས་སྐབས་དེར། བལ་སྟོན་ཞེས་ཆེ་ཆེ་གྲགས་གྲགས་ཤིག་བཤམས་རྒྱུ་མེད་ནའང་། བལ་འབྲེག་དུས་དང་བལ་དོས་རྒྱག་དུས། དྲོས་ཇ་འཐུང་དུས་གང་ཡིན་ཡང་མི་རྣམས་ཀྱི་གཏམ་དང་ཀུ་རེ་རྒྱུན་ཆད་མེད་པར་ལས་ཀ་ནི་རྩེད་མོ་ཞིག་གི་རྣམ་པར་བསྒྱུར་བ་དེས་ནི་བས་མཐའི་རི་ལུང་རྫ་ཀླུང་དུ་ནོར་ལུག་གི་རྨིག་རྗེས་དང་ལྕི་འདམ་གྱི་ངད་ཁའི་ཁྲོད་མི་ཚེ་སྐྱེལ་བའི་འབྲོག་པའི་འཚོ་བ་ལ་སྔར་མེད་ཀྱི་སྤྲོ་སྣང་ཞིག་ཁྱེར་ཡོང་གིན་ཡོད། ལྷག་པར་དུ་ལུག་བལ་བྲེགས་ཚར་རྗེས། ཁྱིམ་མཚེས་དུ་མས་ཚེགས་བརྒྱབ་སྟེ་མཉམ་དུ་ལུག་བལ་ཁལ་མར་བཀལ་ནས་འཚོང་དུ་སོང་བ་ན། ང་ཚོ་བེའུ་རྫི་བྱིས་པ་རྣམས་དང་ནོར་རྫི་བུ་མོ་ཚོས་རེ་སྒུག་གི་ཉི་མ་མཛུབ་བར་གནས་གསོག་མགོ་རྩོམ། ང་ཚོ་བེའུ་རྫི་རྣམས་ཀྱིས་ཨ་ཕས་ཟས་ཞིམ་པོ་དང་གོས་སོ་མ་ཉོས་ཡོང་བར་རེ་བ་བྱེད་པ་ཡིན་ཏེ། ལོ་གཅིག་གི་ནང་དུ་ལོ་སར་གྱི་འཕྲོ་ནས་ཟས་ཞིམ་པོ་བཟའ་བ་དང་གོས་སོ་མ་གྱོན་པའི་བསོད་ནམས་ནི་དུས་ཚོད་འདི་ཁོ་ན་ཉིད་དོ།། ཡིན་ནའང་། ནོར་རྫི་བུ་མོ་ཚོས་ཅི་ཞིག་ལ་རེ་སྒུག་བྱེད་པ་ནི་ལོ་ནར་མ་སོན་ཞིང་བསམ་མི་ཤེས་པའི་ང་ཚོ་བེའུ་རྫི་དག་ལ་འབྲེལ་བ་ཆེར་མེད་པས། དེ་ལ་བསམ་བློ་བཞི་གསུམ་བཅུ་གཉིས་དང་བློ་རྩེ་ཉི་ཤུ་རྩ་ལྔ་དགོས་པའི་དགོས་པ་མི་འདུག་སྙམ་མོད། ཕྱི་ཉིན་མགོ་དཀྲིས་མདོག་ཆེན་དང་མཛུབ་དཀྲིས་གོང་ཆེན་གོན་པའི་ནོར་རྫི་བུ་མོ་ཚོའི་དགའ་སྣང་དེས་གསང་བ་ཅི་ཞིག་བརྟོལ་འདོད་ཀྱི་འདུན་པ་མེ་རུ་འབར་ནས་འདུག་བཟོད་མེད་པ་ཞིག་སྐྱེས་ཡོང་།

ལུག་བལ་བཙོང་དུ་འགྲོ་བ་དེ་ལ་གཏམ་རྒྱུད་གསོན་ཉམས་ལྡན་པ་འགའ་རེ་གླེང་རྒྱུ་ཡོད་པ་སྟེ། འབྲོག་པའི་ལུག་བལ་འབྲེག་རན་དུས་སུ། འབྲོག་ལས་ཐོན་རྫས་བསྡུ་ལེན་ས་ཚིགས་ཀྱིས་སྡེ་བ་སོ་སོའི་དཀྱིལ་སྙིང་དུ་གྱུར་པའི་དབྱར་ས་གང་རུང་ཞིག་ཏུ་གནས་སྐབས་ཀྱི་ལུག་བལ་ཉོ་སྡུད་ས་ཚིགས་བྱེད་པ་ཡིན། དེ་ལ་ཁོ་ཚོས་རས་གུར་ཕུབ་སྟེ་གཞི་བཅའ་བ་དང་། སྡེ་བ་ཡར་མར་ནས་ཡོང་བའི་ལུག་བལ་བཙོང་མཁན་དག་གིས་ཁལ་གཡག་ལ་བལ་དོས་བཀལ་ནས་ཡོང་བ་ཡིན་པས། རེ་ཞིག་རས་གུར་གྱི་ལྷས་འདབས་ཁལ་གཡག་དང་བལ་དོས་ཁེངས་པར་བྱེད། དེ་ནི་ཁལ་མའི་གྲོག་ཚང་བརྡོལ་བ་དང་བལ་དོས་ཀྱི་རི་བོ་བརྩིགས་ཡོད་ཅེ་ནའང་ཚད་ལས་བརྒལ་མེད་སྙམ་པ་ཞིག་ཏུ་ཡོད་ནའང་། བལ་དོས་འདྲུད་མཁན་གྱི་རླངས་འཁོར་ཡོང་ཐེངས་རེར་རི་བོ་རེ་རེ་བཞིན་དྲུད་འགྲོ་བ་དང་ཕྱི་ཉིན་སླར་ཡང་དྲུད་སོང་བའི་རི་བོའི་ཤུལ་དུ་རི་བོ་གསར་བ་ཞིག་བརྩིགས་ཡོང་། སྐབས་ཤིག་ནས་བཟུང་། འབྲོག་པ་རྣམས་ཀྱིས་བལ་དོས་ཀྱི་རྒྱ་གྲངས་ཇེ་མཐོར་གཏོང་ཆེད་བལ་གྱི་ནང་དུ་ཆུ་གཏོར་བ་དང་ས་བསྲེས་པ་ལྟ་བུའི་བསྣོག་ལས་བྱེད་མཁན་མང་དུ་བྱུང་བ་ན། བལ་སྡུད་མི་སྣས་ཀྱང་གཡོ་སྒྱུ་དེའི་མཐིལ་བརྟོལ་བར་བལ་དོས་རེ་རེའི་དཀྲུས་བཤིག་ནས་ལག་པ་གསེང་དུ་བཏང་ནས་རློན་པ་ཡིན་མིན་དང་ས་ཡོད་མེད་ལ་ལྟ་བར་བྱེད། ཐེངས་ཤིག ཨ་ཕ་བལ་བཙོང་དུ་སོང་ནས་ས་རུབ་ནས་མ་གཏོགས་ཕྱིར་ཡུལ་ལ་སླེབས་མ་བྱུང་བ་དང་ཡུལ་ལ་སླེབས་དུས་ཀྱང་ནམ་རྒྱུན་ལྟར་གདོང་ན་འཛུམ་མདངས་མི་འདུག་པས། ངས་རེ་ཞིག་ཀ་ར་ཉོས་ཡོད་མེད་ཀྱང་འདྲི་མ་ཕོད་མོད། རེ་ཞིག་འགོར་རྗེས་ཁོས་བརྔན་པ་ཞིག་བཏོན་རྗེས། ད་ཐེངས་བལ་དོས་ནང་དུ་བསྣོག་མ་བརྒྱབ་པ་འགྲིག་མི་འདུག བལ་སྡུད་ཉོ་བྱེད་མཁན་ནི་ཁོའི་སྔོན་ཆད་ཀྱི་སློབ་གྲོགས་ཞིག་ཡིན་པས་ཁོ་ལ་ཁ་ངོ་སྟེར་ངེས་རེད་ཟེར། ཨ་མས་ཁོ་ལ་ཡིན་མིན་གྱི་ལན་ཅི་ཡང་བྱིན་མ་སོང་ནའང་། མོའི་སེམས་སུ་ཨ་ཕར་བསྣོག་ལས་བྱེད་པའི་གོམས་གཤིས་མེད་པ་དེ་ལ་ཡི་རངས་དང་བཀུར་བསྟི་བྱེད་ཀྱིན་པ་ཤེས་ཐུབ། རྗེས་སུ། ཨ་ཕ་སྡེ་བའི་སྤྱི་བ་ཞེས་པའི་སྔགས་ཚོགས་སུ་ཞུགས་པ་ནས་ལས་དགེ་སྡུག་དང་ལས་རྒྱུ་འབྲས་གླེང་མཁན་འབའ་ཞིག་ཏུ་གྱུར་པ་ན། དེ་དུས་ཀྱི་ལུག་བལ་བཙོང་དུ་སོང་བའི་དོན་དག་དེ་གླེང་ནས་རང་ཉིད་ལ་བསྣོག་ལས་མེད་པ་དེ་ང་རྒྱལ་ཅིག་ཏུ་བརྩི་བར་བྱེད།

མཇུག་གི་སྐད་ཆ།

སྤྱིར་བཏང་དུ་འབྲོག་པའི་རྩྭ་ས་ནི་དུས་ཚིགས་དང་ནམ་ཟླའི་འགྱུར་བ་དང་བསྟུན་ནས་དབྱར་ལ་མཐོ་ཞིང་བསིལ་ཆེ་བའི་རྫ་ལུང་རི་ལུང་དུ་རུ་སྤོར་བ་དང་དགུན་ལ་དམའ་ཞིང་དྲོད་ཆེ་བའི་ཐང་གཤོང་དུ་རུ་སྤོར་བ་ཡིན། དཔྱིད་དང་སྟོན་ནི་དབྱར་ས་དང་དགུན་སའི་བར་གྱི་ལུང་མདོ་རུ་བྱེད་པ་ཡིན་ལ། སྡོད་ཡུན་ཆེས་རིང་བོ་ཡང་དཔྱིད་ས་དང་སྟོན་ས་ཡིན་པས་གནས་དེ་རུ་འབྲོག་པའི་གཏན་སྡོད་ཁང་བ་ལས་ནས་ལོ་ལོན་དང་བྱིས་པ་དག་རྒྱུན་ཆགས་སུ་ཡོད།

བདག་ཀྱང་སློབ་ཆུང་ལོ་རིམ་དང་བོར་ཞུགས་པ་ནས་བཟུང་དབྱར་སར་སོང་བའི་ལོ་རྒྱུས་མང་བོ་མི་འདུག་སྟེ། ངའི་དྲན་ཡིད་ཀྱི་དབྱར་ས་ཡང་ལོ་བརྒྱད་ལ་བུད་པ་ནས་བཟུང་གློག་ཆད་པ་ནང་བཞིན་དྲན་པར་མུན་འཐིབས་སེ་སོང་། ཡིན་ནའང་། བདག་ནི་ཁ་མལ་གཅིག་ནས་སྡོད་ཐུབ་པའི་རིགས་སུ་མི་གཏོགས་པས་ཨ་ཕ་དང་མཉམ་དུ་ལུག་རྫིར་འགྲོ་དགའ་ཆེ་ཞིང་ཨ་མ་དང་ལྷན་ཅིག་ཆུ་ལེན་དུ་འགྲོ་བར་ཡང་དགའ་བོ་ཡོད། དེ་མིན་ཁ་ཡ་ན་ཟླ་ཚོར་འགྲོག་ནས་རྩེད་འཇོར་རོལ་རྒྱུར་ཡང་མི་དགའ་བ་ག་ལ་སྲིད། ང་ཚོས་བེའུ་ཁྱུ་དབྱར་སའི་ན་ཁུགས་དང་ཆུ་འགྲམ་དུ་བཀྲམ་རྗེས། རྐང་རྗེན་དུ་སྔོ་རྩྭའི་གསེང་དུ་རྒྱུག་ཅིང་ཆུ་ཕྲན་དཀྱིལ་དུ་བརྒལ་བ་བགྲང་གིས་མི་ལང་། དེ་བཞིན་དུ་ན་མཉམ་གྱི་བེའུ་རྫི་གཞན་དང་ལྷན་ཅིག་གད་འོག་ཏུ་ཆར་ལྭས་མགོ་སྦྲ་ཕུབ་ཅིང་སྤོ་ཐོས་ཐབ་ཀ་ལས་པ་དང་། རྡོ་གཡའ་མས་དོ་ཆ་བརྩིགས་ཤིང་རྡེའུ་དཀར་ནག་གིས་ནོར་ལུག་འཚོས་པའི་ལོ་ཟླ་དེ་དག་ནི་ཁ་སང་གི་དོན་དག་ཅིག་དང་འདྲ་ལ། རྗེས་མར་ནོར་རྫི་ནས་ཨ་ཅེ་དང་ཕུ་བོ་དག་གི་ཚབ་ཏུ་ནོར་ཁ་ལེན་དུ་འགྲོ་བ་དང་ཡི་གེ་སྐྱེལ་རོགས་བྱས་པའི་དུས་ཚོད་ཀྱི་གཙང་བོ་དེ་ནི་ད་དུང་ཡང་བདག་གི་ནང་སེམས་སུ་དྭངས་གཙང་གིས་བཞུར་བཞིན་ཡོད། མཛེས་སྡུག་དང་བདེ་སྐྱིད་ནི་དེ་འདྲ་རྙེད་སླ་ཞིང་རྒྱུན་བསྲིང་དཀའ་བ་ཞིག་ཀྱང་ཡིན་པ་སུ་ཡིས་ཤེས།

ནར་སོན་གྱི་གོ་རིམ་ཁྲོད་དུ་སློབ་གྲྭ་ཆུང་འབྲིང་ཆེ་གསུམ་བརྒྱུད་ནས་སླར་ཡང་སྤྱི་ཚོགས་འཚོ་བའི་འུར་ཟིང་ལ་ཞུགས་རྗེས། བདག་གིས་ཆེས་བརྗེད་པར་དཀའ་ཞིང་རྙེད་པར་འདོད་པའང་ཕྱིར་འོང་མེད་པའི་ཆུང་དུས་ཀྱི་ལོ་ཟླ་དེ་དག་སྟེ། ཆར་ནང་དང་རླུང་ནང་། ཁངས་ནང་དུ་བེའུ་རྫི་ནས་ནོར་རྫི། ནོར་རྫི་ནས་ལུག་རྫི་བྱས་མྱོང་བའི་བརྒྱུད་རིམ་ཁྲོད་དུ། ལུས་པོ་ནི་ཆར་བས་བངས་ཤིང་སེམས་པ་ནི་བརྩེ་བས་བངས་པའི་འབྲོག་པའི་བུ་ཕྲུག་སྤྱི་དང་འདྲ་བར། བདག་གི་ཕྱིར་དྲན་གྱི་མེ་ལོང་ངོས་སུ་ཤར་བའི་རི་མོ་དེ་དག་ཀྱང་སྙན་ངག་བཞིན་ཚིག་གི་མཛེས་པ་དང་དམངས་གླུ་ལྟར་དབྱངས་ཀྱི་འགྱུར་ཁུག་ཅི་དང་གང་ཡང་ཡོད་མི་སྲིད་མོད། བྱིས་དུས་ཀྱི་དྭངས་གཙང་ལྷད་མེད་ཀྱི་ལོ་ཟླ་དེ་དག་ནི་དེ་ལྟར་རྨ་མེད་དུག་མེད་དུ་དལ་བ་དལ་བུར་བཞུད་པའི་གོ་རིམ་ཁྲོད་དུ། འཇིག་རྟེན་གྱི་རིན་པོ་ཆེ་ཅི་དང་གང་གིས་ཀྱང་ཚབ་བྱེད་ཐབས་མེད་པའི་ཡུལ་དུངས་དང་ཞེན་ཆགས་ཀྱི་བརྩེ་བ་མཐུག་པོ་ཞིག་ད་ལྟ་ད་རུང་ཡང་སྙིང་ཁོང་རུས་གསེང་དུ་ལུས་ཡོད།

དེང་གི་སྤྱི་ལོ་ལྟར་རྩིས་ན། 1985ལོའི་ཟླ9བར་བདག་ལོ་བརྒྱད་ལ་སོན་ཡོད། ཕ་ཡུལ་བདའ་ཚང་དུ་བརྒྱད་པ་སོ་ཆག་ནོར་རྫི་ཟེར་བའི་ན་ཚོད་དེའི་ནང་དུ། ཨ་ཕས་བདག་ཆུ་བཟང་ཁ་ཞེས་པའི་སློབ་ཆུང་དེར་བསྐྱལ་སོང་། ཞོགས་པ་དེར། ཨ་ཕ་ངེད་གཉིས་ཀྱིས་རྟ་རེག་ཕྲུག་ལ་འཕོང་རྒྱབ་ནས་ལམ་ལ་ཆས་དུས་སུ། ངའི་ཞེན་ཆགས་ཀྱི་ངོགས་སུ་ཅི་ཞིག་ལུས་སོང་བའི་སྨྲེང་སྐྱོ་བན་བུན་ཞིག་ག་ལེར་འཐིབ་ཡོང་ཞིང་། བདག་གི་ན་ཚོད་ལ་མི་རན་པའི་ཞེན་ཆགས་དེ་ཡང་མི་ལོ་མང་བོའི་རྗེས་སུ་སྨུག་པ་བཞིན་ཡལ་སོང་མོད། ཕྱི་མིག་ཏུ་ལུས་པའི་ཨ་མའི་རྒྱང་སྐྱེལ་ལ་གྱེས་བྲལ་གྱི་སྡུག་ཡུས་ག་ཙམ་ཡོད་མེད་ཚོད་ཀྱིས་མི་ཐུག་པ་ཞིག་འདུག བདག་གི་ཕྱིར་དྲན་ཡོད་ཚད་དུས་དེ་ནས་བཟུང་མཚམས་བཞག་པ་མ་ཡིན་ནའང་། བདག་གི་རྩོམ་ཡིག་འདིའི་མཇུག་འདི་ནས་བསྡུ་དགོས་བྱུང་སོང་།

བདག་གི་སྙིང་ཉེ་བའི་ཀློག་མཁན་ལགས། བར་སྐབས་ཤིག་གི་ཕྱིར་དྲན་ལ་འཁོར་བའི་བརྩེ་བ་ནི་དེ་ལྟར་རྒྱུན་ཐག་གཅོད་ཐུབ་པ་ཞིག་མིན་ནའང་། འུར་ལྕག་གཡུག་པའི་ནོར་རྫི་ཞིག་ཞ་སྨྱུག་འཛིན་པའི་སློབ་མ་ཞིག་ཏུ་གྱུར་པའི་གཏམ་རྒྱུད་ནི་རྩོམ་ཡིག་གཞན་ཞིག་ཏུ་བཀླག་ཐུབ་པར་ཡིད་ཆེས་བརྟན་པོར་ཡོད།