དཔལ་དོན་གྲུབ་རྒྱལ་གྱི་སྒྲུང་གཏམ་གྱི་སྐད་ཆའི་སྒྱུ་རྩལ་ཐད་ཀྱི་རང་ཉིད་ཀྱི་དྲན་ཚུལ་ཕྲན་བུ།

དཔལ་དོན་གྲུབ་རྒྱལ་ནི་བོད་ཀྱི་དེང་རབས་རྩོམ་རིག་གསར་བའི་རྨང་འདིང་མཁན་ཡིན་པས་ན་ང་ཚོས་ཁོང་གི་རྩོམ་རིག་གི་གྲུབ་འབྲས་ལ་དཔྱད་འཇོག་བྱེད་རྒྱུ་ནི་ཧ་ཅང་གལ་ཆེ་བའི་བྱ་བ་ཞིག་ཡིན་པར་མ་ཟད། ཁོང་གི་རྩོམ་རིག་གྲུབ་འབྲས་ལ་དཔྱད་འཇོག་བྱེད་དུས་ཁོང་གིས་བརྩམས་པའི་སྒྲུང་གཏམ་གྱི་གྲུབ་འབྲས་གླེང་དགོས་པ་ནི་ཧ་ཅང་སྨོས་མེད་རེད་ལ། ཁོང་གི་སྒྲུང་གཏམ་གྱི་གྲུབ་འབྲས་གླེང་དགོས་ན་སྒྲུང་གཏམ་གྱི་སྐད་ཆའི་སྒྱུ་རྩལ་ཐད་ཀྱི་གྲུབ་འབྲས་གླེང་དགོས་པ་ནི་ངེས་པར་དུ་གཡོལ་ཐབས་མེད་པའི་བྱ་བ་ཞིག་རེད། ངས་བལྟས་ན་ང་ཚོས་དཔལ་དོན་གྲུབ་རྒྱལ་གྱི་སྒྲུང་གཏམ་ལ་ལྟ་རྒྱུར་དགའ་བའི་རྒྱུ་རྐྱེན་འཚོལ་བ་དང་། ཁོང་གི་སྒྲུང་གཏམ་གྱི་གྲུབ་འབྲས་ལ་གདེང་འཇོག་བྱེད་པའི་རྒྱུ་རྐྱེན་འཚོལ་ན་ཡང་སྒྲུང་གཏམ་གྱི་སྐད་ཆའི་སྒྱུ་རྩལ་ནི་དེའི་རྒྱུ་རྐྱེན་གལ་ཆེན་ཞིག་ཏུ་བཟུང་ནས་ཞིབ་འཇུག་བྱེད་འོས་པ་རེད་སྙམ། རྒྱུ་མཚན་ནི་སྐུ་ཞབས་དོན་གྲུབ་རྒྱལ་གྱི་ཐོག་མའི་བསྡུས་དེབ《འབོལ་རྩོམ་ཞོགས་པའི་སྐྱ་རེངས》པར་སྐྲུན་བྱས་པ་དེ་ནི་བོད་ལ་ཕལ་སྐད་རྩོམ་རིག་ཡོངས་ཁྱབ་ཏུ་སྤྱོད་པའི་མགོ་བརྩམས་པའི་མཚོན་རྟགས་རེད་ལ། ང་ཚོ་ཐོག་མར་ཁོང་གི་བསྡུས་དེབ《འབོལ་རྩོམ་ཞོགས་པའི་སྐྱ་རེངས》དང་། བསྒྱུར་དེབ《སྙན་ངག་གི་རྦ་རླབས》དང《འདྲེ་འབོད་རྐང་གླིང》སོགས་ལ་ལྟ་བར་དགའ་དོན་ཡང་ཁོང་གི་སྐད་ཆའི་སྒྱུ་རྩལ་གྱིས་དྲངས་པ་ཡིན་པའི་རྐྱེན་གྱིས་རེད། ད་ལྟའི་སྒྲུང་གཏམ་གསར་རྩོམ་མཁན་འགའ་རེས་ཁོས་སྒྲུང་གཏམ་བཟང་བོ་ག་འདྲ་ག་འདྲ་ཞིག་བྲིས་ཡོད་ཀྱང་ལྟ་མཁན་དག་གིས་ཧ་གོ་གི་མི་འདུག་ཟེར། ངས་བལྟས་ན་སྒྲུང་གཏམ་ནི་བྱིས་པའི་རིག་པ་རྒོད་མིན་ལ་ཚོད་བགམ་བྱེད་སྤྱད་ཀྱི་ཁེད་མ་རེད། ཡང་ལ་ལས་ཁོའི་སྒྲུང་གཏམ་ལས་གང་དག་ཅིག་ལ་བསྟོད་པ་ག་འདྲ་བྱས་ཡོད་ཅིང་གང་དག་ཅིག་ལ་དགག་པ་ཚ་དྲག་བརྒྱབ་ཡོད་ཀྱང་སྤྱི་ཚོགས་སྟེང་དུ་གྲགས་འགུལ་ཅི་ཡང་མི་འདུག་ཟེར། ངས་བལྟས་ན་སྒྲུང་གཏམ་ནི་དགག་རྒྱག་དང་གཟེངས་བསྟོད་ཚོགས་ཆེན་སྟེང་གི་གཏམ་བཤད་མ་རེད། འོ་ན་སྒྲུང་གཏམ་ནི་ཅི་ཞིག་རེད་ཅེ་ན། ངས་བལྟས་ན་སྒྲུང་གཏམ་ནི་ནམ་རྒྱུན་ང་ཚོའི་བྱིས་པ་ཚོས་ལྟ་བཞིན་པའི་སྒུལ་རིས་བརྙན་འཕྲིན་ཁྲོད་ཀྱི་རྫུ་འཕྲུལ་ལྡན་པའི་ངོ་ལྟ་དེ་རེད། མི་ཚོས་ངོ་ལྟའི་ནང་ལ་བལྟས་ཀྱིན་བལྟས་ཀྱིན་དུ་ངོ་ལྟའི་ནང་དུ་དྲངས་འགྲོ་བ་དང་། ང་མཇུག་མཐར་ངོ་ལྟའི་ནང་ལས་མར་ལྷུང་མ་ཐག་ལོ་བཅུ་ཕྲག་གིས་ཇེ་ཆེར་གྱུར་པའམ་ཇེ་ཆུང་དུ་གྱུར་པ་དེ་རེད། རྫུ་འཕྲུལ་ལྡན་པའི་ངོ་ལྟའི་འདྲེན་ཤུགས་དེ་ནི་སྒྲུང་གཏམ་གྱི་སྐད་ཆའི་སྒྱུ་རྩལ་དང་བརྗོད་བྱའི་ནང་དོན་དེ་ཡིན་པ་རེད་ལ། ལྟ་མཁན་གྱི་མི་དག་ལོ་བཅུ་ཕྲག་གིས་ཇེ་ཆེའམ་ཇེ་ཆུང་དུ་འགྲོ་དོན་ཡང་སྒྲུང་གཏམ་གྱི་བསམ་བློའི་ཤན་ཤུགས་དེ་ཡིན་པ་སྨོས་མ་དགོས་པ་རེད། གལ་ཏེ་འདྲེན་ཤུགས་ཅི་ཡང་མེད་པར་གྱུར་ཚེ་དེ་ནི་ངོ་ལྟ་དེ་ལ་རྫུ་འཕྲུལ་མེད་པས་ལན་པ་མ་གཏོགས་ངོ་ལྟའི་ནང་ལ་ལྟ་མཁན་གྱི་མི་ལན་པ་ག་ལ་ཡིན། དེ་བས་ངས་འདིར་སྐད་ཆའི་སྒྱུ་རྩལ་ཐད་ནན་བཤད་བྱེད་དོན་ཡང་དེ་ཡིན། གཤམ་ནས་ངས་རང་ཉིད་ཀྱི་རྨོངས་བློར་ཤར་ཚོད་ལྟར་ཁོང་གི་སྒྲུང་གཏམ་གྱི་སྐད་ཆའི་སྒྱུ་རྩལ་གྱི་ཁྱད་ཆོས་དེ་ཕྱོགས་འགའ་ནས་ཧ་ཅང་མདོར་བསྡུས་སྒོས་ངོ་སྤྲོད་བྱ་བར་འདོད།

གཅིག ཕུན་སུམ་ཚོགས་པའི་མང་ཚོགས་ཀྱི་སྐད་ཆ་དང་བོད་སྔ་རབས་ཀྱི་སྒྱུ་རྩོམ་

གྱི་སྐད་ཆའི་ལེགས་ཆ་ཉིང་བསྡུས་

བྱས་ཡོད་པ།

ངལ་རྩོལ་གྱིས་མི་བསྐྲུན་པ་ཡིན་ལ་སྐད་ཆ་ཡང་བསྐྲུན་པ་ཡིན་པས་ན་ངལ་རྩོལ་མི་དམངས་ནི་སྐད་ཆ་གསར་རྩོམ་གནང་མཁན་གྱི་ཐོག་མའི་རྩོམ་པ་པོ་ཡིན་པ་སྨོས་ཅི་དགོས། དེ་བས་ངལ་རྩོལ་མི་དམངས་ཀྱི་སྐད་ཆ་ནི་ཧ་ཅང་ཕུན་སུམ་ཚོགས་ཤིང་གྱ་ནོམ་པ་ཞིག་ཡིན་ལ། ང་ཚོ་གསར་རྩོམ་པ་དག་གིས་ཐོག་མའི་སྐད་ཆ་སྦྱོང་བའི་བསླབ་དེབ་ལྟ་བུར་ངོས་འཛིན་དགོས་པ་རེད། དཔལ་དོན་གྲུབ་རྒྱལ་གྱིས་ཐོག་མའི་བསླབ་དེབ་འདི་སྣང་མེད་དུ་མ་བྱས་པར་གནད་དུ་བཟུང་ནས་སློབ་སྦྱོང་དང་ཞིབ་འཇུག་ཡང་དག་པ་བྱས་པར་མ་ཟད་བོད་སྔ་རབས་ཀྱི་སྒྱུ་རྩལ་རྩོམ་རིག་གི་སྐད་ཆའི་སྙིང་བཅུད་བསྡུ་ལེན་བྱས་ཏེ་གཅིག་བསྡུས་བྱས་པས། ཚིག་མཛེས་ཤིང་དོན་གསལ་ལ། རྣར་སྙན་ཞིང་དག་ཐོན་པ་དང་། སྐད་ཆ་གཞན་གྱིས་ཚབ་བྱེད་མི་ཐུབ་པའི་སྐད་ཆའི་མཛེས་པ་ཞིག་ཁོང་གིས་གསར་རྩོམ་བྱས་པའི་སྒྲུང་གཏམ་བརྒྱུད་ནས་ཀློག་མཁན་དུ་མའི་མིག་གི་ལོངས་སྤྱོད་དུ་དངོས་སུ་བསྟར་ཡོད་པ་རེད། དཔེར་ན《ཤ་དང་རུས་པའི་བརྩེ་དུང》གི་ནང་དུ“དགུན་བོད་ལོའི་ནང་གི་ལྷགས་ངར། རི་ལ་ཐང་མེད་པའི་ཁ་བ། ཆབ་ཆུ་བོ་རྣམས་ཀྱི་འཁྱག་རོམ། རྒན་གྱའི་སྤང་ཐང་གི་དགུན་དུས་ཀྱི་རྣམ་པ་ནི་ངས་མ་བཤད་ཀྱང་ཁྱོད་ཀྱིས་ལོས་ཤེས།”ཞེས་པ་དང་《 སད་ཀྱིས་བཅོམ་པའི་མེ་ཏོག》ལྷ་སྐྱིད་ཀྱིས“ངའི་ཁ་སྒོ་སྐྱེ་འབྲས་དགྲ་རུ་ལངས་ཏེ་ཡུལ་ཕ་མའི་དྲུང་ནས་སྡོད་དབང་མེད་ཅིང་ཞེ་མཐུན་པའི་གྲོགས་དང་འགྲོགས་དབང་མེད་པར།” ཞེས་པ་སོགས་ཀྱི“རི་ལ་ཐང་མེད་པ”ཞེས་པ་དང“ཁ་སྒོ་སྐྱེ་འབྲས་དགྲ་རུ་ལངས་པ”ཞེས་པའམ“ངས་མ་བཤད་ཀྱང་ཁྱོད་ཀྱིས་ལོས་ཤེས”ཞེས་པའི་ཚིག་འདི་དག་མང་ཚོགས་ཀྱི་ཁྲོད་དུ་ཧ་ཅང་ཁྱབ་གདལ་དུ་སྤྱོད་པ་ཞིག་ཡིན་པར་མ་ཟད་ཚིག་གི་མཛེས་ཉམས་ཁྱད་དུ་འཕགས་ལ་ད་དུང་ཚིག་རིས་གཞན་གྱིས་ཚབ་བྱེད་མི་ནུས་པའི་ཁྱད་ཆོས་སམ་ནུས་བ་ཆེན་པོ་མངའ་བ་སྟེ། གལ་ཏེ་ང་ཚོས་དེ་དག་གི་ཚབ་ཏུ་རི་ཐང་ཐམས་ཅད་ཀྱི་ཁ་བའམ་ངའི་ཁ་སྒོ་སྐྱེ་འབྲས་སྐྱོན་ཆ་རུ་གྱུར་ཏེ་ཞེས་བརྗོད་ཚེ་ཚིག་ལ་སྙན་ཆ་མེད་ཅིང་བཅུད་ཤོར་བའི་སྣང་བ་སྟེར་བ་ལྟ་བུར་གྱུར་པ་མ་ཡིན་ནམ། 《 མི་ལའི་རྣམ་མགུར》དུ“ཨ་ཁུ་དང་ཨ་ནེ་དགྲ་རུ་ལངས་ཏེ”ཞེས་པའི་སྐད་ཆ་བྱུང་མྱོང་ལ《སྣང་སའི་རྣམ་ཐར》དུ་ཡང“ངའི་ཁ་སྒོ་སྐྱེ་འབྲས་དགྲ་རུ་ལངས་ཏེ་འདོད་པ་དམ་པའི་ལྷ་ཆོས་འདོད་ཀྱང་ཡོང་བ་འཇིག་རྟེན་ཁྱིམ་ཐབ་ཞིག་ཡོང་བ་འདྲ”ཞེས་དང་། “མཐོ་བ་གནམ་ལ་འཕུར་སོང་ཟེར་ས་མེད༎ དམའ་བ་ས་ལ་འཛུལ་སོང་ཟེར་ས་མེད༎”ཅེས་སོགས་བྱུང་མྱོང་ན་ཡང་། དཔལ་དོན་གྲུབ་རྒྱལ་གྱིས་རྩོམ་རིག་བརྩམས་ཆོས་འདི་དག་གི་སྐད་ཆའི་མཛེས་པ་དང་ལེན་བྱས་ཡོད་པར་མ་ཟད་ད་དུང་རང་ཉིད་ཀྱི་རྣམ་དཔྱོད་རྩལ་ལ་བརྟེན་ནས་སྐད་ཆའི་ནུས་སྟོབས་མཐོ་རུ་བཏེགས་པ་སྟེ། “ཁོ་མོ་གནམ་ལ་འཕུར་བ་ཡིན་ནམ་ས་རུ་འཛུལ་བ་ཡིན། གནམ་ལ་འཕུར་ན་ཡང་འབབ་སའི་བྲག་ཅིག་དང་ས་རུ་འཛུལ་ན་ཡང་འཛུལ་སའི་ཁུང་ཞིག་ལོས་ཡོད”ཅེས་བྲིས་ཡོད་པ་ལྟ་བུས་ཀྱང་མཚོན་ནུས། ད་དུང“ངས་མ་བཤད་ཀྱང་ཁྱོད་ཀྱིས་ལོས་ཤེས”ལྟ་བུ་ནི་མང་ཚོགས་ཀྱི་ཁྲོད་དུ་ད་ལྟ་ཡང་སྤྱོད་བཞིན་པའི་སྐད་ཆ་དཀྱུས་མ་ཞིག་ཡིན་ན་ཡང་། དེ་ནི་ལྐོག་ཏུ་གྱུར་པའི་བྱ་དངོས་ཀྱི་ཁྱད་ཆོས་གང་ཞིག་གསལ་བཤད་བྱེད་སྐབས། སྐད་ཆ་གཞན་གྱིས་ཚབ་བྱེད་ཐབས་བྲལ་བའི་མཚོན་ཐབས་ཆེས་བླ་ན་མེད་པ་ཞིག་ཡིན་ཏེ། དེ་ལྟར་བརྗོད་པས་ཀློག་མཁན་གྱིས་རང་སེམས་ནས་ཡུལ་ལྗོངས་དེའི་ཁྱད་ཆོས་དེ་སྣ་ཚོགས་པར་ཀུན་རྟོག་བྱེད་ཆོག་པ་མ་གཏོགས། དེ་ལས་གཞན་ཚིག་ཚོགས་ཀྱི་རྒྱ་མཚོ་བསྐྱིལ་ཏེ་རྒན་གྱ་སྤང་ཐང་གི་དགུན་ཁའི་རྣམ་པ་ཇི་ལྟར་ཞིབ་འབྲི་བྱས་ཀྱང་གོང་གསལ་གྱི་ནུས་པ་དེ་འདྲ་ཐོན་མི་ནུས་པ་རེད།

གཉིས། གནད་དུ་འཁེལ་བའི་གཏམ་དཔེ་བཀོལ་སྤྱོད་བྱས་པ་དེ་སྒྲུང་གཏམ་གྱི་

སྐད་ཆའི་ནུས་སྟོབས་དང་ངོ་བོ་

གཅིག་ཏུ་འདྲེས་ཡོད་པ།

བོད་ཀྱི་གཏམ་དཔེ་ནི་ཡུན་རིང་བའི་ལོ་རྒྱུས་ཀྱི་བརྒྱུད་རིམ་ཁྲོད་བོད་རིགས་དམངས་ཁྲོད་ཀྱི་ཤེས་ལྡན་དག་གིས་སྤྱི་ཚོགས་འཚོ་བའི་སྣང་ཚུལ་མང་པོའི་ཉམས་མྱོང་ཕྱོགས་བསྡུས་བྱས་པའི་ཐུན་མོང་མ་ཡིན་པའི་ལེགས་བཤད་ཅིག་ཡིན་ལ། ང་ཚོས་དུས་རྒྱུན་གྱི་འཚོ་བའི་ཁྲོད་གཏམ་དཔེ་བཀོལ་ནས་རང་གཞན་ཀུན་གྱི་ལུས་ཀྱི་སྤྱོད་ལམ་དང་བྱ་བའི་སྤང་བླང་དང་འཇུག་ལྡོག་ལ་ཕྱོགས་སྟོན་དང་ཚོད་འཛིན་བྱེད་ཀྱི་ཡོད་པ་རེད། འོན་ཀྱང་ཧ་ཅང་གྱ་ནོམ་པའི་གཏམ་དཔེ་བཀོལ་སྤྱོད་བྱེད་པའི་བརྒྱུད་རིམ་ཁྲོད་ང་ཚོར་རྒྱུན་དུ་ནོར་འཁྲུལ་སྣ་ཚོགས་འབྱུང་གིན་འདུག་པ་སྟེ། ལ་ལས་གཏམ་དཔེ་སྦྱར་བ་དེས་དོན་དེ་ཇི་བཞིན་མཚོན་མི་ནུས་པ་དང་། འགའ་རེས་སྐབས་བབས་ཀྱི་བརྗོད་དོན་གང་ཡིན་པ་དེ་བསྐྱུར་ནས་གཏམ་དཔེ་ཁོ་ན་སྤྱོད་པའི་ཐད་མགོ་འཁོར་བ། ཡང་སྐོར་ཞིག་གིས་གཏམ་དཔེ་དོན་ལ་འཕྲོད་ཀྱང་དེའི་མཛེས་པ་དེ་རང་ཉིད་ཀྱི་སྐད་ཆའམ་ཚིག་སྦྱོར་གྱོང་བོ་དག་དང་སྦྲེལ་བས་མཛེས་ཉམས་ཕྱིར་མངོན་མི་ནུས་པ་སོགས་སྐྱོན་སྣ་ཚོགས་འབྱུང་གིན་ཡོད་པ་རེད། འོན་ཀྱང་དཔལ་དོན་གྲུབ་རྒྱལ་གྱི་སྒྲུང་གཏམ་ཁྲོད་དུ་གཏམ་དཔེ་བཀོལ་སྤྱོད་བྱས་པ་མང་བར་མ་ཟད་ད་དུང་གཏམ་དཔེ་རེ་རེ་དེ་ཁོང་གི་ཞིབ་བརྗོད་ཀྱི་སྐད་ཆ་སྙན་མོ་དང་ངོ་བོ་གཅིག་ཏུ་འདྲེས་ཡོད་པས་བཀླགས་ན་རྣ་བར་སྙན་པ་དང་དོན་གྱི་རྡོག་པོ་ལག་པའི་ནང་དུ་འཇོག་ཐུབ་པའི་ཁྱད་ཆོས་ཐོན་ཡོད་པས། ངོ་མ་ལ་ལས་དགེ་འདུན་ཆོས་ཀྱི་ཀ་རྩོམ་ལ་གདེང་འཇོག་བྱེད་དུས“གསལ་བཤད་སུམ་ཅུའི་གོ་རིམ་དེ་ནི་དགེ་ཆོས་ཀྱི་ཀ་རྩོམ་འབྲི་བའི་དགོས་མཁོ་ལྟར་གཏན་ལ་ཕབ་པ་འདྲ”ཟེར་གྱིན་པ་ལྟར་སྲིད་པ་རྒན་པོས་གཏམ་དཔེ་འདི་དག་གཏན་ཁེལ་བྱེད་དོན་ཀྱང་དཔལ་དོན་གྲུབ་རྒྱལ་གྱིས་སྒྲུང་གཏམ་དེ་དག་རྩོམ་པའི་ཆེད་དུ་ཡིན་པ་ལྟ་བུའི་ཚོར་སྣང་སྟེར་ནུས་པར་འདུག དཔེར་ཙམ་མཚོན་ནས་བཤད་ན《ཚུལ་ཁྲིམས་རྒྱ་མཚོའི》 ནང་དུ་ཁོང་གིས་ཚུལ་ཁྲིམས་རྒྱ་མཚོའི་གཏམ་རྒྱུད་མུ་མཐུད་དུ་འབྲི་དཀའ་བ་བྱུང་བའི་སྐབས་སུ།“གལ་སྲིད་ང་རང་གཏམ་རྒྱུད་འདི་ལྟ་བུ་རྩོམ་པའི་ལས་དང་པོ་བ་ཞིག་ཡིན་ན་ངོ་ཚ་རྒྱབ་ལ་དོར་ནས་རྣ་ལག་པས་བཀབ་སྟེ་བསྡད་ནའང་མི་ཆོག་རྒྱུ་ཅང་མེད་མོད། འོན་ཀྱང་། འོན་ཀྱང་། འེ། བྲག་ཐེམ་པའི་སྐས་ལ་འགོ་ཁ་སླ་ཡང་འབབ་ཁ་དཀའ་ཟེར་བ་དེ་ངོ་མ་རེད། ད་ཅི་བྱུང་ན་ཡང་བྱུང་། གདོང་ལ་འབག་གོན་ནས་འཆམ་མི་རྟག་ག་མེད་རེད། བོང་སྐྱ་ལིར་ཞོན་ནས་སྟོད་དབུས་ལམ་གཅོད་མཁན་མེད་པ་མིན་ལ། ཁྱི་མེད་ན་བྱི་ལས་ཀྱང་རུས་པ་མུར་ཆོག་ཅིང་བྱ་མེད་སར་བོང་བུས་ཀྱང་ནམ་ཚོད་བཟུང་ཆོག་པ་ཡིན། ཡིན་ན་ཡང་ཀ་མེད་པའི་གདུང་མ་བརྟན་ཚུལ་མེད་ལ་ཁབ་མེད་པའི་ཚེམ་བུ་ནི་ག་ལ་ཡོང་། ངོ་མ། རང་སེམས་རང་གིས་གསོས་ན་དགའ་ཀྲོག་ཀྲོག་དང་། རང་མགོ་རང་གིས་གཡོགས་ན་ཏོབ་ཀྱི་ལི་ལི་ཟེར་བ་དེ་ཅིས་མ་བདེན། ཚུལ་ཁྲིམས་རྒྱ་མཚོ་ཞེས་པའི་གཏམ་རྒྱུད་འདིའི་རྔ་མ་ཡེ་ནས་སྐྱོང་ཐབས་མི་འདུག”ལྟ་བུར་མཚོན་ན་ཡང་གཏམ་དཔེ་དེ་དག་སྤྱིར་བཏང་གི་གཏམ་དཔེ་ཡི་ནུས་པ་ལས་འགོངས་ཏེ་གཏམ་དཔེ་དེ་དག་ནི་དཔལ་དོན་གྲུབ་རྒྱལ་ཁོང་རང་ཉིད་ཀྱི་བརྗོད་འདོད་དེའི་ཆེད་དུ་བརྩམས་པ་ལོས་ཡིན་སྙམ་པའི་ཚོར་བ་སྟེར་བར་མ་ཟད། སྐབས་དོན་གང་ཡིན་པ་དེ་སྟོན་པའི་ཐད་མེད་ན་མི་ཆོག་པའི་ཚིག་གི་གྲུབ་ཆ་གལ་ཆེན་ཞིག་ཏུ་གྱུར་ཡོད་ལ། ཐ་ན་དེ་ནི་གཏམ་དཔེ་ཞིག་མ་ཡིན་པར་ཁོང་རང་ཉིད་ཀྱི་ཚིག་རེད་ཅེས་ནའང་ཐལ་མི་ཆེ་བའི་ཆུ་ཚད་དུ་ཐོན་ཡོད་པ་ལྟ་བུ་རེད།

གསུམ། ཆ་འགྲིག་པའི་གཏམ་གྱི་སྦྱོར་བ་སྤེལ་ནས་སྐད་ཆའི་མཚོན་ཤུགས་དང་

བརྩེ་དུང་ཇེ་དྲག་ཏུ་བཏང་ཡོད་པ།

ཆ་འགྲིག་པའི་གཏམ་གྱི་སྤྱོར་བ་སྤེལ་བའི་ཐབས་ནི་ཕྱི་དང་ནང་དང་། ནངས་དང་དགོང་། སྟོད་དང་སྨད། ཤར་དང་ནུབ་སོགས་ཁ་གཏད་དུ་གྱུར་པའི་བྱ་དངོས་ཀྱི་ཁྱད་ཆོས་བཟུང་ནས་ཚིག་གི་སྦྱོར་བ་སྤེལ་སྟངས་ཤིག་ཡིན་ལ་རང་རེའི་མི་རིགས་ཀྱི་སྐད་ཆའི་ཁྲོད་དུ་སྔོན་ནས་བཟུང་སྤྱོད་ཀྱིན་པ་ཞིག་ཡིན་པ་ནི་དཔེར་ན། 《 སྣང་སའི་རྣམ་ཐར》མཐོ་བ་གནམ་ལ་འཕུར་སོང་ཟེར་ས་མེད༎ དམའ་བ་ས་རུ་འཛུལ་སོང་ཟེར་ས་མེད༎ 《 མི་ལའི་རྣམ་མགུར》དུ་དབྱར་དཀར་ལས་བྱེད་དུས་ཨ་ནེའི་གཡོག། དགུན་བལ་ལས་བྱེད་དུས་ཨ་ཁུའི་གཡོག་སོགས་བྱུང་བ་ལྟ་བུ་རེད། ཡིན་ན་ཡང་དོན་གྲུབ་རྒྱལ་ནི་ཚིག་སྡེབ་འདི་རིགས་སྤྱོད་པར་ཧ་ཅང་ནང་བྱན་ཆུད་ཡོད་པར་མ་ཟད་ཁོང་གི་སྒྲུང་གཏམ་རེ་རེའི་ཁྲོད་དུ་ཤེས་མེད་ཚོར་མེད་ངང་མངོན་ཡོང་ལ། ཁོང་གི་ཚིག་སྦྱོར་དེ་དག་ནི་ཚིག་གི་ཕྱིའི་མཛེས་པ་ཙམ་དང་ཚིག་གི་སྡེབ་སྦྱོར་མཛེས་པ་ཙམ་ཁོ་ནའི་ཆེད་མ་ཡིན་པར་དོན་གྱི་མཚོན་ཤུགས་གཏིང་ཇེ་ཟབ་དང་བརྩེ་དུང་གི་འཕྱོ་རླབས་ཤུགས་ཇེ་དྲག་ཏུ་གཏོང་བར་ནུས་པ་ཆེན་པོ་ཐོན་ཡོད་པར་འདུག་སྟེ། དཔེར་ན། 《 ཚུལ་ཁྲིམས་རྒྱ་མཚོའི》 ནང་དུ་ཚུལ་ཁྲིམས་རྒྱ་མཚོ་ལྷ་ས་ནས་ཕྱིར་ཕེབས་རྗེས་ལྷ་མོ་སྒྲོལ་མ་ཇི་ལྟར་བཙལ་བ་འབྲི་བའི་སྐབས་འདི་ལྟར་བྲིས་ཡོད་དེ། “ཞོགས་པའི་ཉི་འོད་འོག་གཅིག་པུར་བཤད་སྒྲུབ་ཆུ་ཁར་སོང་སྟེ་ཆུ་ལེན་མའི་གྲས་ནས་ཁོ་མོའི་འཛུམ་མདངས་བཙལ་བ་དང་། དགོང་རྒས་ལྷག་ཟེར་ཁྲོད་གཅིག་པུར་བཤད་སྒྲུབ་ཁྲོམ་ལ་སོང་སྟེ་མི་ཚོགས་ཁྲོད་ཁོ་མོའི་གཟུགས་བརྙན་བཙལ་བ་ཡིན”དང་། ཡང“ཁོ་མོ་གནམ་ལ་འཕུར་བ་ཡིན་ནམ་ས་ལ་འཛུལ་བ་ཡིན། གནམ་ལ་འཕུར་ན་ཡང་འབབ་སའི་བྲག་ཅིག་དང་ས་རུ་འཛུལ་ན་ཡང་འཛུལ་སའི་ཁུང་ཞིག་ལོས་ཡོད།”ཞེས་པ་ལྟ་བུར་མཚོན་ན་ཚིག་སྔ་མའི་ཁྲོད་ཞོགས་པའི་ཉི་འོད་འོག་དང་དགོང་རྒས་ལྷག་ཟེར་ཁྲོད་ཆ་རུ་སྦྱར་ནས་གློག་བརྙན་ཁྲོད་ཀྱི་མཚོན་ཐབས་སྤྱད་དེ་ཁོང་གིས་ལྷ་མོ་སྒྲོལ་མ་ཇི་ལྟར་བཙལ་བའི་རེ་བ་དང་བརྩོན་པ་ཤུགས་དྲག་གིས་མཚོན་པ་དང་། ཚིག་རྗེས་མའི་ནང་གནམ་ལ་འཕུར་བ་དང་ས་རུ་འཛུལ་བ་ཆ་རུ་སྡེབ་ནས་ཁོང་གིས་ཁོ་མོ་མ་རྙེད་པའི་དུས་ཀྱི་ཐང་ཆད་དང་སེམས་ངལ། གཏོལ་བྲལ་གྱི་སེམས་པའི་བྲེལ་འཚུབ་དེ་གསལ་ལྷང་ངེར་ཕྱིར་མཚོན་པར་བྱས་པ་ལྟ་བུ་རེད། ད་དུང《ཤ་དང་རུས་པའི་བརྩེ་དུང》ཁྲོད་དུ་ཨ་ཁུ་ལྷ་བཟོའི་ཨ་ཕས་ཨ་ཁུ་ལྷ་བཟོ་ཁོ་རང་ཕྱི་རུ་འཁྱམས་རྗེས་ཕྱིར་ལོག་པར་རེ་སྒུག་བྱས་ཚུལ་འབྲི་དུས། “ཁྱེད་ཀྱིས་ཉི་མ་ཡར་ཤར་གྱི་དུས་ནས་བཟུང་སྒོ་ཁའི་ཡར་འགྲམ་གྱི་དེའུ་འབུར་གྱི་སྟེང་དུ་བུད་ནས་ཡར་རོང་ཕུ་ལ་མིག་ལྟ་དང་། མར་རོང་མདོར་རྒྱང་ལྟ་བྱས་ནས་། སྐྱ་མོ་ལམ་གྱི་མགྲོན་པོ་རྣམས་ལ་ངའི་བུ་འདི་དང་འདི་འདྲ་བ། གྲོགས་དེ་དང་དེ་ལྟ་བུ་ཡོད་པ་ཞིག་ཨེ་མཐོང་། གཏམ་འདྲ་ཨེ་ཐོས་ཞེས་ཡང་འདྲི་བསྐྱར་འདྲི་བྱས་པ་དང་། ལམ་འགྲོ་བ་དེ་ཚོས་མགོ་བོ་འཕྲེད་དུ་གཡུག་སྐབས། ཁྱེད་ཀྱི་གདོང་གི་རྣམ་འགྱུར་དང་སེམས་ཀྱི་མྱ་ངན་ཅི་འདྲ་ཡིན་པ་ངས་གསལ་བོར་ཤེས་ཐུབ།”ཞེས་པའི་ནང་དུ་ཡང་ཡར་དང་མར། འདི་དང་དེ་སོགས་ཁ་གཏད་སྦྱར་བའི་ཐབས་ལ་བརྟེན་ནས་ཨ་ཕ་ཞིག་གིས་ཡུན་རིང་གར་སོང་མི་ཤེས་པར་གྱུར་པའི་བུ་ལ་ཉིན་མཚན་དབྱེར་མེད་དུ་རེ་སྒུག་བྱེད་པའི་སྣང་བརྙན་གཟུགས་ཅན་བཞིན་དུ་མིག་མདུན་དུ་གསལ་བོར་བཀྲམ་པར་མ་ཟད་ཕས་བུ་དྲན་པའི་གདུང་བ་དང་བུ་མ་རྙེད་པའི་སེམས་ཀྱི་མྱ་ངན་གྱི་ཡང་ལྕི་ཡང་ང་ཚོའི་ཕྲག་སྟེང་ནས་མྱོང་ཐུབ་པ་རེད།

བཞི། སྒྲུང་གཏམ་གྱི་སྐད་ཆ་རེ་རེར་སྣང་བརྙན་དང་གཏན་ཚིགས་ཀྱིས་ཕྱུག་པ།

སྤྱིར་སྣང་བརྙན་ལྡན་དགོས་པ་ནི་སྒྱུ་རྩལ་རྩོམ་རིག་གི་རྩ་བའི་རེ་འདུན་ཞིག་ཡིན་ན་ཡང་། འདིར་སྐད་ཆར་སྣང་བརྙན་ལྡན་དགོས་ཞེས་པ་ནི་ཚིག་ཚོགས་དུ་མ་ཞིག་སྤྱད་དེ་མིའམ་བྱ་དངོས་ཀྱི་སྣང་བརྙན་ཞིག་གསར་བཞེངས་བྱེད་པར་གོ་མི་རུང་བར་རྩོམ་ཡིག་ཁྲོད་ཀྱི་སྐད་ཆ་སྣང་བརྙན་ཅན་ཡིན་དགོས་པར་མ་ཟད་ཚིག་ལ་སྣང་བརྙན་ལྡན་དགོས་ལ། ཐ་ན་རྩོམ་ཡིག་གྲུབ་བྱེད་ཀྱི་ཐ་སྙད་རེ་རེར་ཡང་སྣང་བརྙན་ལྡན་དགོས་ཞེས་པའི་དོན་ཡིན། ཐ་སྙད་ཀྱི་སྣང་བརྙན་ཞེས་པ་ནི་ཆེས་དམའ་ས་ནས་བཤད་ན་ཞེ་ཚིག་གི་མིང་དང་སྨད་པའི་མིང་གི་བར་ན་ཡང་ཡོད་པ་སྟེ་ཁྱེད་ཀྱི་ཕྱག་དང་ཁྱེད་ཀྱི་སྤྱན་ཞེས་བརྗོད་ཚེ་སྐུ་ལུས་ཚོ་ཞིང་བརྗིད་པའི་བླ་མའམ་དཔོན་པོ་ཞིག་གི་སྣང་བརྙན་ང་ཚོའི་མིག་ལམ་དུ་གསལ་ལྷང་ངེར་ཤར་ཡོང་བ་དང་། སྣབས་ལུག་ཅེས་བརྗོད་ཚེ་བྱིས་པ་སྣབས་ལུག་པྲ་ཚགས་ཤིག་གི་སྣང་བརྙན་མིག་ལམ་དུ་ཝལ་གྱིས་ཤར་ཡོང་བ་ལྟ་བུ་རེད། དོན་དངོས་ནས་བཤད་ན་ཁྱེད་ཀྱི་ཕྱག་དང་ཁྱེད་ཀྱི་སྤྱན་ཟེར་ས་ཐམས་ཅད་བླ་མ་དང་དཔོན་པོ་ཡིན་པའི་ངེས་པ་མེད་ལ་སྣབས་ལུག་ཅེས་པ་ཐམས་ཅད་བྱིས་པ་ཡིན་པའི་ངེས་པའང་ཡོད་པ་མ་རེད། འོན་ཀྱང་སྐབས་ཐོག་དེར་ང་ཚོའི་མིག་ལམ་དུ་ཤར་བྱུང་བ་དེ་ནི་སྣང་བརྙན་རེད། བསྟོད་ན་བསྟོད་ཐལ་ཆེ་འགྲོ་བ་དང་སྨད་ན་སྨད་ཐལ་ཆེ་འགྲོ་བ་ནི་སྔར་ནས་ཡོད་པའི་རང་རེའི་ནད་ཡམས་དྲག་པོ་ཞིག་ཡིན་པར་མ་ཟད་ད་ལྟ་རྒྱུན་འབྱམས་སུ་གྱུར་ཡོད་པ་ཞིག་ཀྱང་རེད། ཐ་ན་ཐ་སྙད་རེ་འགའ་བཀོལ་སྤྱོད་བྱེད་པའི་ཐད་ནས་ཀྱང“འཐེང་པོ་ལ་ནི་མགྱོགས་འགྲོ་དང་༎ ལོང་བ་ལ་ནི་སྤྱན་སྟོང་ཅན༎”ཟེར་གྱིན་པ་ནི་མིག་མཐོང་ལག་ཟིན་དུ་གྱུར་ཡོད་པ་ལྟ་བུ་རེད་ལ། དེ་ལྟར་སྦྱར་བས་ཐ་སྙད་རང་སྟེང་གི་སྣང་བརྙན་དེ་རང་ཡལ་དུ་གྱུར་ནས་བརྗོད་བྱ་གང་ཡིན་པ་དེ་ཀློག་མཁན་ནམ་ཉན་མཁན་གྱི་སྣང་ངོར་ནམ་ཡང་གབ་ཚིག་ཅིག་ཏུ་གྱུར་འགྲོ་བ་རེད། དཔལ་དོན་གྲུབ་རྒྱལ་གྱི་སྒྲུང་གཏམ་རེ་རེར་གང་ལ་གང་འཚམ་དེ་ལ་དེ་སྟོན་གྱི་ཚུལ་དུ་བརྗོད་པ་དང་ཚིག་དང་ཐ་སྙད་བཀོལ་སྤྱོད་བྱས་ཡོད་ལ། བརྗོད་པ་དང་ཚིག ཐ་ན་ཐ་སྙད་རེ་རེར་ཡང་ང་ཚོའི་མིག་ལམ་དུ་ཤར་རྒྱུ་ཡོད་པའི་སྣང་བརྙན་དེ་ལྡན་པས་ང་ཚོ་ཀློག་མཁན་ཚང་མས་ལྟ་བར་དགའ་ཞིང་བལྟས་ན་སུན་རྒྱུ་མེད་པའི་ཚོར་བ་དེ་བྱུང་བ་རེད། དཔེར་ན། “སྐྱ་མོ་ལམ་གྱི་མགྲོན་པོ་རྣམས་ལ”ཞེས་པའི་སྐྱ་མོ་ལམ་ལའང་སྣང་བརྙན་ངེས་ཅན་ཞིག་ལྡན་པ་སྟེ། ང་ཚོའི་མིག་ལམ་དུ་ས་ལམ་སྐྱ་ཐག་གེ་བ་ཞིག་བྱང་ཕྱོགས་ཀྱི་གནམ་སའི་མཚམས་ནས་རྒྱང་རིང་བའི་ལྷོ་ཕྱོགས་སུ་འཐེན་ཡོད་པའི་སྟེང་དུ་ལན་རེར་སྐྱ་མི་ཞིག་རྡུལ་ལིང་ལིང་དུ་འགྲོ་བཞིན་པའི་སྣང་བརྙན་འཆར་ཐུབ་པ་ལྟ་བུ་རེད། 《 ཚུལ་ཁྲིམས་རྒྱ་མཚོའི》 ཁྲོད་དུ་ངས་ཚུལ་ཁྲིམས་རྒྱ་མཚོའི་གཏམ་རྒྱུད་ཀྱི་འཕྲོ་སྐྱོང་མ་ཐུབ་པར་ཐབས་ཟད་དེ་སྡོད་སྐབས་ཚུལ་ཁྲིམས་རྒྱ་མཚོར་དངོས་སུ་མཇལ་བྱུང་ཞིང་། དེ་ཡང་ཐོག་མར་མི་སུ་ཡིན་ནམ་སྙམ་སྟེ་ཡིད་སུན་པ་དང་དེ་ནས་མི་དེ་ཚུལ་ཁྲིམས་རྒྱ་མཚོར་ཆ་རྒྱུས་འདུག་སྙམ་ནས་དགའ་བ། དེ་མ་ཐག་སླར་ཡང་མི་དེས་ཚུལ་ཁྲིམས་རྒྱ་མཚོར་དམའ་འབེབས་བྱས་སོང་སྙམ་ནས་ཁྲོས་པ། མཇུག་མཐར་ཁོང་ཉིད་ཚུལ་ཁྲིམས་རྒྱ་མཚོ་ཡིན་པ་ཤེས་ཏེ་ཧ་ཅང་དགའ་བར་གྱུར་པ་བཅས་ཀྱི་འགྱུར་ལྡོག་བཞི་བྱུང་ཞིང་། འགྱུར་ལྡོག་དེ་བཞི་བོའི་བརྒྱུད་རིམ་ཁྲོད་ཀྱི་སྐད་ཆར་སྣང་བརྙན་མི་འདྲ་བ་རེ་ཡོད་པར་མ་ཟད་འགྱུར་ལྡོག་བཞི་བོ་བྱུང་བའི་འབྲེལ་བའི་ཐད་ང་ཚོས་ཀྱང་རྒྱུས་ལོན་བྱེད་ཐུབ་པའི་གཏན་ཚིགས་ཀྱི་རང་བཞིན་ཤུགས་དྲག་པོ་ལྡན་པ་ལྟ་བུ་རེད། གཞན་ཡང་དཔལ་དོན་གྲུབ་རྒྱལ་གྱི་སྒྲུང་གཏམ་ཁྲོད་ཀྱི་ཕྱི་རོལ་གྱི་བྱ་དངོས་དང་མི་ཡི་ནང་སེམས་ཀྱི་འགྱུར་བ་སོགས་དཔེར་འགོད་པའི་ཐབས་ཀྱང་སྣ་ཚོགས་པར་སྣང་ཞིང་དེ་དག་ལ་ཡང་བོད་སྔ་རབས་ཀྱི་བརྩམས་ཆོས་དག་དང་བསྡུར་ན་ཐོལ་བརྒལ་རང་བཞིན་གྱི་ཁྱད་ཆོས་ལྡན་འདུག ང་ཚོས་ལག་ལ་གང་ཡོང་གི་དཔེ་ཞིག་དྲངས་ཆོག་སྟེ། དཔེར་ན《ཚུལ་ཁྲིམས་རྒྱ་མཚོའི》 ནང་དུ། “འདས་པའི་བྱ་བ་ཐམས་ཅད་ནི་ལོ་རྒྱུས་ཀྱི་སྒམ་ཆུང་དུ་བཅུག་ནས་བརྗེད་ངས་ཀྱི་ལྕགས་ཟྭ་བརྒྱབ་པས་དགའ། ཁོ་མོ་སྔོན་ཆད་ངའི་སྙིང་གི་གོས་ཆེན་ཞིག་ཡིན་ན་ཡང་ད་ལྟ་རི་མོ་ཉམས་སོང་བ་དང་། གྲ་ཁ་ཉམས་པའི་ཝ་མོ་དང་ཐིག་ལེ་ཡལ་བའི་གཟིག་ལྤགས་ལ་རིན་ཐང་ཅི་ཡོད།”ཅེས་པ་ལྟ་བུར་མཚོན་ན་ཡང་དཔེར་འགོད་པའི་སྐད་ཆ་རེ་རེར་ཧ་ཅང་གཏིང་ཟབ་པའི་མང་ཚོགས་རང་བཞིན་ལྡན་པར་མ་ཟད་ཚིག་མཛེས་ཤིང་བབ་ཆགས་པ་དང་། རྣ་བར་སྙན་ཞིང་རང་བྱུང་གི་ཉམས་དང་ལྡན་པ། གོ་སླ་ཞིང་དོན་ལ་གཞོལ་བ་ཤུགས་ཆེ་བ། བརྗོད་དོན་གང་ཡིན་པ་དེ་གསོན་ཉམས་ལྡན་པའི་ངང་ཀློག་མཁན་གྱི་མིག་གི་མཐོང་ལམ་དུ་གཟུགས་ཅན་བཞིན་དུ་གསལ་བོར་འདྲེན་ནུས་པའི་ཁྱད་ཆོས་ཤིག་གིས་ཁེངས་ཡོད་པ་རེད་ལ། ཧ་ཅང་ཕུན་སུམ་ཚོགས་པའི་དཔེར་འགོད་འདི་འདྲ་བ་ཁོང་གི་བརྩམས་ཆོས་རེ་རེའི་ཁྲོད་དུ་མང་པོ་མངོན་རྒྱུ་འདུག་པ་ཚང་མས་ཀྱང་མཁྱེན་གསལ་ཡིན་པས་འདིར་མང་པོ་སྤྲོ་བར་མི་བྱ།

སྤྱིར་ན་རྩོམ་པ་པོ་ཞིག་ལ་དཔྱད་འཇོག་བྱེད་ན་སྨོས་ཅི་དགོས། ཐ་ན་དེའི་བརྩམས་ཆོས་གང་ཞིག་ལ་དཔྱད་འཇོག་བྱེད་ནའང་རྩོམ་ཡིག་ཁྲོད་ཀྱི་ཚིག་དུམ་རེ་གཉིས་ཤིག་དྲངས་ཡོང་ནས་དེ་ལ་དཔྱད་ཁུལ་བྱེད་པ་ནི་ཤིན་ཏུ་མི་འོས་པའམ་ཧ་ཅང་ནོར་འཁྲུལ་གྱི་གོལ་ལམ་ཞིག་ཡིན་པ་རེད་མོད། ང་ཚོར་མཚོན་ན་དཔལ་དོན་གྲུབ་རྒྱལ་གྱི་སྒྲུང་གཏམ་ལ་ལྟ་བར་དགའ་ཞིང་ཆ་རྒྱུས་གསལ་བོ་ཡོད་པ་ཤ་སྟག་ཡིན་པས་ངས་འདིར་དཔེ་འགའ་རེ་དྲངས་པ་ནི་ཟུར་བསྟན་ལེབ་མཐོང་གི་ཚུལ་དུ་བཤད་པ་ཡིན། འོ་ན་དཔལ་དོན་གྲུབ་རྒྱལ་གྱི་སྒྲུང་གཏམ་གྱི་སྐད་ཆའི་སྒྱུ་རྩལ་གྱི་ཁྱད་ཆོས་འདི་དག་ཇི་ལྟར་བྱུང་བ་རེད་ཟེར་ན། ངས་བལྟས་ན་ཁོང་གིས་ཆུང་ངུའི་དུས་ནས་ཕ་ཡུལ་གྱི་རོང་འབྲོག་མང་ཚོགས་ཀྱི་འཚོ་བའི་ཁྲོད་ཟབ་ཞུགས་བྱས་ཏེ་ཁོ་ཚོའི་སྐད་ཆར་རྒྱུས་ལོན་དང་སློབ་སྦྱོང་། ཞིབ་འཇུག་དཔྱིས་ཕྱིན་པ་ཞིག་བྱས་པའི་རྨང་གཞིའི་སྟེང་བོད་སྔ་རབས་ཀྱི་སྒྱུ་རྩལ་རྩོམ་རིག་ཁྲོད་ཀྱི་སྐད་ཆར་ཞིབ་འཇུག་གཏིང་ཟབ་བྱས་ཏེ་དེའི་ལེགས་ཆ་བསྡུ་ལེན་དང་བཀོལ་སྤྱོད་བྱས་པའི་འབྲས་བུ་ཡིན་པ་སྨོས་མེད་རེད། དེ་བས་ང་ཚོ་གསར་རྩོམ་པ་དག་ལ་མཚོན་ན་ངེས་པར་དུ་ཁོང་གི་མན་ངག་འདིར་སློབ་སྦྱོང་བྱས་ཏེ་དུས་དང་རྣམ་པ་ཀུན་ཏུ་ཆེས་གཞི་རིམ་གྱི་བོད་རིགས་མང་ཚོགས་ཀྱི་སྐད་ཆར་སློབ་སྦྱོང་ཡང་དག་བྱེད་དགོས་པར་མ་ཟད།《མི་རོ་རྩེ་སྒྲུང》དང《གེ་སར་སྒྲུང》གཙོ་བྱས་པའི་བོད་ཀྱི་དམངས་ཁྲོད་ཀྱི་རྩོམ་རིག་ལ་སློབ་སྦྱོང་ཡང་དག་བྱེད་དགོས་ལ། 《 མི་ལ་རས་པའི་རྣམ་མགུར》དང《སྣང་ས་འོད་འབུམ་གྱི་རྣམ་ཐར》གཙོ་བྱས་པའི་བོད་སྔ་རབས་ཀྱི་རྩོམ་རིག་བརྩམས་ཆོས་དག་ལ་སློབ་སྦྱོང་ཡང་དག་པ་བྱེད་རྒྱུ་ནི་ང་ཚོའི་སྐད་ཆའི་རྨང་གཞི་གོང་འཕེལ་དུ་འགྲོ་བ་དང་སྐད་ཆའི་སྒྱུ་རྩལ་གྱ་ནོམ་པར་གཏོང་བའི་བགྲོད་ལམ་ཉག་གཅིག་ཏུ་གྱུར་འདུག་སྙམ།