ཀྲུང་གོ་གུང་ཁྲན་ཏང་གི་སི་ཁྲོན་ཞིང་ཆེན་གྱི་སྐབས་བཅུ་གཉིས་པའི་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐེངས་གསུམ་པའི་སྤྱི་བསྒྲགས་གནད་བསྡུས།
2023ལོའི་ཟླ་6པའི་ཚེས་19ཉིན། ཀྲུང་གོ་གུང་ཁྲན་ཏང་སི་ཁྲོན་ཞིང་ཆེན་གྱི་སྐབས་བཅུ་གསུམ་པའི་རྒྱུན་ལས་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གསུམ་པ་ཁྲེང་ཏུའུ་ནས་འཚོགས། སི་ཁྲོན་ཞིང་ཆེན་གྱི་སྐབས་བཅུ་གཉིས་པའི་རྒྱུན་ལས་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གསུམ་པའི་སྤྱི་བསྒྲགས་གནད་བསྡུས་འདི་ལྟར་ཏེ།
ཚང་འཛོམས་གྲོས་ཚོགས་ནི་སི་ཁྲོན་ཞིང་ཆེན་ཏང་ཨུའི་རྒྱུན་ལས་ཨུ་ལྷན་གྱིས་གཙོ་སྐྱོང་དང་། སི་ཁྲོན་ཞིང་ཆེན་གྱི་ཏང་ཨུའི་ཧྲུའུ་ཅི་ཝང་ཞའོ་ཧུའེ་ཡིས་གསུང་བཤད་གནང་། ཚང་འཛོམས་གྲོས་ཚོགས་ཐོག །ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་རྒྱུར་མཐའ་འཁྱོངས་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སི་ཁྲོན་གྱི་ལས་དོན་ཐད་གནང་བའི་མཛུབ་སྟོན་གལ་ཆེན་གྱི་དགོངས་པ་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་རབ་དང་རིམ་པ་དོན་འཁྱོལ་ཟབ་མོ་བྱས་པར་མ་ཟད། ཝང་ཞའོ་ཧུའེ་ཡིས་སི་ཁྲོན་ཞིང་ཆེན་ཏང་ཨུའི་རྒྱུན་ལས་ཨུ་ལྷན་གྱི་ཚབ་བྱས་ཏེ་གནང་བའི་ལས་ཀའི་སྙན་ཞུ་ལ་ཉན་པ་དང་གྲོས་བསྡུར་བྱས། ཀྲུང་གུང་སི་ཁྲོན་ཞིང་ཆེན་ཏང་ཨུའི་བཟོ་ལས་ཅན་གསར་པར་སྐུལ་བ་དང་། དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་ཇེ་མགྱོགས་གཏོང་བར་ཤུགས་འདོན་པའི་སྐོར་གྱི་ཆོད་དོན་ལ་གྲོས་ཞིབ་བྱས་ཏེ་གྲོས་འཆམ་བྱུང་། ཝང་ཞའོ་ཧུའེ་ཡིས་ཆོད་དོན་གྱི་གྲོས་བསྡུར་མ་ཟིན་ལ་དམིགས་ནས་ཚང་འཛོམས་གྲོས་ཚོགས་ལ་གསལ་བཤད་གནང་།
ཚང་འཛོམས་གྲོས་ཚོགས་ཐོག །འཕེལ་རྒྱས་ཀྱི་འདུ་ཤེས་གསར་པ་ཆ་ཚང་དང་ཡང་དག །ཁྱོན་ཡོངས་བཅས་ཀྱི་སྒོ་ནས་དོན་འཁྱོལ་བྱས་ཏེ། འཕེལ་རྒྱས་ཀྱི་བཀོད་པ་གསར་པ་ལ་ཞབས་ཞུ་དང་དེའི་ནང་ཞུགས་པ། སྤུས་མཐོའི་འཕེལ་རྒྱས་གཏོང་བའི་ལས་འགན་གཙོ་བོ་ཁོང་དུ་ཡང་དག་ཆུད་ནས། ཁྲེང་ཏུའུ་དང་ཁྲུང་ཆིང་གྲོང་ཁྱེར་གཉིས་ཀྱི་དཔལ་འབྱོར་སྤེལ་ཁུལ་འཛུགས་སྐྲུན་བྱ་རྒྱུ་སྤྱིའི་ཁ་ཕྱོགས་སུ་འཛིན་པ། ཅན་བཞི་མཉམ་སྤེལ་དང་། གྲོང་ཁྱེར་དང་གྲོང་གསེབ་མཉམ་འདྲེས། ཁོངས་ལྔ་མཉམ་དར་བཅས་ཀྱི་འཕེལ་རྒྱས་འཐབ་ཇུས་ལག་བསྟར་ཟབ་མོ་བྱེད་པ། བཟོ་ལས་ཅན་གསར་པའི་གཙོ་ཁྲིད་ཀྱི་ནུས་པ་ཡག་པོ་བཏོན་ནས། ཐོན་ལས་རིག་ནུས་ཅན་དང་། འབག་མེད་ཅན། མཉམ་འདྲེན་ཅན་བཅས་སུ་འཕེལ་རྒྱས་གཏོང་བ། ལེགས་ཆ་དར་སྤེལ་དང་། འཇོན་ནུས་སྦྱོང་བརྡར། གསར་གཏོད་སྐུལ་འདེད། སྒུལ་ཤུགས་སྐུལ་སྤེལ། ཚོགས་པ་འཛུགས་པ། ཚོང་གཉེར་པ་ཇེ་དྲག་གཏོང་བ་བཅས་བྱས་པར་མ་ཟད། དེང་རབས་ཅན་གྱི་བཟོ་ལས་དང་། ཞིང་ལས། ཞབས་ཞུའི་ལས་རིགས་དང་རྨང་གཞིའི་སྒྲིག་ཆས་བཅས་འཛུགས་སྐྲུན་བྱས་ནས། དངོས་གཉེར་དཔལ་འབྱོར་གྱིས་རྒྱབ་རྟེན་བྱས་པའི་དེང་རབས་ཅན་གྱི་ཐོན་ལས་མ་ལག་འཛུགས་པ་དང་། མགྱོགས་མྱུར་དུ་དེང་རབས་ཅན་གྱི་དཔལ་འབྱོར་སྟོབས་ལྡན་ཞིང་ཆེན་འཛུགས་པའི་ཐད་འབད་དགོས་ཞེས་ནན་གྱིས་བསྟན།
ཚང་འཛོམས་གྲོས་ཚོགས་ཐོག །ཁྱད་ལྡན་ཐོན་ལས་དང་འཐབ་ཇུས་རང་བཞིན་གྱི་གསར་དར་ཐོན་ལས་འཕེལ་རྒྱས་གཏོང་བའི་ཁ་ཕྱོགས་གཙོ་བོ་ལ་དམིགས་ཏེ། སྟོབས་ཤུགས་གཅིག་སྡུད་ཀྱིས་དངོས་གཉེར་དཔལ་འབྱོར་ཐད་འགག་སྒྲོལ་བྱས་ནས། དེང་རབས་ཅན་གྱི་ཐོན་ལས་མ་ལག་གི་རྒྱབ་རྟེན་གཙོ་བོ་མགྱོགས་སུ་ཆགས་པ་བྱེད་དགོས། སྤུས་མཐོའི་འཕེལ་རྒྱས་ཀྱི་བརྗོད་དོན་དམིགས་སུ་འཛིན་པ་དང་། ཐོན་ལས་འཕེལ་རྒྱས་ཀྱི་སྤུས་ཚད་དང་། གཞི་ཁྱོན། ཕན་ནུས་བཅས་ལ་གཅིག་གྱུར་འཆར་འགོད་བྱས་ནས། སྤུས་ཚད་མཐོར་འདེགས་དང་། འཕར་སྣོན་ལུགས་མཐུན་ཡོང་བ་བྱེད་དགོས། བཟོ་ལས་དམིགས་སུ་འཛིན་པ་དང་། བཟོ་སྐྲུན་གཙོ་བོར་བཟུང་ནས། བཟོ་སྐྲུན་སྟོབས་ལྡན་ཞིང་ཆེན་ཀྱི་འཐབ་ཇུས་ལག་བསྟར་ཤུགས་ཆེན་དང་། དེང་རབས་ཅན་གྱི་བཟོ་ལས་འཕེལ་རྒྱས་ཀྱི་བཀོད་པ་གསར་པ་མགྱོགས་སུ་ཆགས་དགོས། གསར་གཏོད་ལ་བརྟེན་ནས་ཁྲིད་སྟོན་བྱ་རྒྱུར་དམིགས་སུ་འཛིན་པ་དང་། ཐོན་ལས་མ་ལག་དང་མཁོ་འདོན་མ་ལག་གི་འཕེལ་ཤུགས་དང་བདེ་འཇགས་ཆུ་ཚད་མཐོར་འདེགས་བཏང་ནས། ཐོན་ལས་གྲབས་གསོག་རྟེན་གཞི་འཛུགས་དགོས། ནུས་ཁུངས་དང་གཏེར་ཁ་སོགས་འཐབ་ཇུས་རང་བཞིན་གྱི་ཐོན་ཁུངས་ཚན་རིག་དང་མཐུན་པའི་སྒོ་ནས་གསར་གཏོད་དང་བཀོལ་སྤྱོད་བྱས་ནས། ཐོན་ཁུངས་ཀྱི་དགེ་མཚན་ནི་འཕེལ་རྒྱས་ཀྱི་དགེ་མཚན་དུ་བསྒྱུར་དགོས། ཐོན་ལས་སྒོ་འབྱེད་མཉམ་ལས་དམིགས་སུ་འཛིན་པ་དང་། རྒྱལ་ནང་དང་རྒྱལ་སྤྱིའི་འཁོར་རྒྱུག་གཉིས་ཀྱི་ནང་ཞུགས་ཏེ། རྒྱལ་ཁབ་འཛུགས་སྐྲུན་ཐད་ཞབས་ཞུ་སྒྲུབ་ཆེད་དེང་རབས་ཅན་གྱི་ཐོན་ལས་མ་ལག་ཆ་ཚང་ཅན་དང་སྔོན་ཐོན་ཅན། བདེ་འཇགས་ཅན་བསྐྲུན་དགོས་ཞེས་གསལ་པོ་བསྟན།
ཚང་འཛོམས་གྲོས་ཚོགས་ཐོག་དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་ཇེ་མགྱོགས་གཏོང་བའི་འཕེལ་རྒྱས་དམིགས་འབེན་བཏོན་པ་སྟེ། 2027ལོར་སླེབས་དུས། བཟོ་སྐྲུན་སྟོབས་ལྡན་ཞིང་ཆེན་འཛུགས་སྐྲུན་ཐད་ཕན་འབྲས་གསར་པ་ཐོབ་པ་དང་། བཟོ་སྐྲུན་ལས་རིགས་ཀྱི་རིན་ཐང་འཕར་མའི་བསྡུར་ཚད་མངོན་གསལ་དུ་མཐོར་འདེགས་གཏོང་བ། གློག་རྡུལ་ཆ་འཕྲིན་དང་། སྒྲིག་ཆས་བཟོ་སྐྲུན། ཁྱད་ལྡན་འཛད་སྤྱོད་ཐོན་རྫས་སོགས་འཛམ་གླིང་རིམ་པའི་ཐོན་ལས་ཚོགས་པ་གསོ་སྐྱོང་བྱས་པར་ཕན་འབྲས་མངོན་གསལ་ཐོབ་དགོས། གསར་གཏོད་དང་འཕེལ་རྒྱས་ཐད་ཐོད་བརྒལ་གསར་པ་བྱུང་བ་དང་། ལག་རྩལ་རྩེ་གྲས་ཐོན་ལས་ཀྱི་ཚོང་གཉེར་ཡོང་འབབ་ཀྱིས་གཞི་ཁྱོན་ཡན་གྱི་བཟོ་ལས་ལ་ཟིན་པའི་བསྡུར་ཚད་བརྒྱ་ཆའི་བཞི་བཅུ་ལས་བརྒལ་བ། ལུགས་བསྒྱུར་རིམ་སྤར་ཐད་གྲུབ་འབྲས་གསར་པ་ཐོབ་པ། ཐོན་ལས་ཀྱི་གསར་གཏོད་ནུས་པ་དང་། འགྲན་རྩོད་ནུས་པ་མངོན་གསལ་དུ་མཐོར་འདེགས་གཏོང་བ། ཟུང་འབྲེལ་འཕེལ་རྒྱས་ཀྱི་གོམ་སྟབས་གསར་པ་སྤོ་པ། དེང་རབས་ཞབས་ཞུ་ལས་རིགས་དང་སྔོན་ཐོན་གྱི་བཟོ་སྐྲུན་ལས་རིགས། དེང་རབས་ཞིང་ལས་ཟུང་འབྲེལ་ཚད་མངོན་གསལ་དུ་མཐོར་འདེགས་གཏོང་དགོས། 2035ལོར་སླེབས་དུས། བཟོ་སྐྲུན་སྟོབས་ལྡན་གྱི་ཞིང་ཆེན་དང་། ཞིང་ལས་སྟོབས་ལྡན་གྱི་ཞིང་ཆེན། ཞབས་ཞུའི་ལས་རིགས་ཀྱི་སྟོབས་ལྡན་གྱི་ཞིང་ཆེན་ཕར་ཆེར་གྲུབ་པ། ཐོན་ལས་གསུམ་པོའི་འཕེལ་རྒྱས་རིམ་པ་དང་ཕྱོགས་བསྡུས་དངོས་ཤུགས་ཁྱོན་ཡོངས་ནས་མཐོར་འདེགས་གཏོང་བ། དེང་རབས་ཅན་གྱི་ཐོན་ལས་མ་ལག་སྤྱིའི་ཆ་ནས་གྲུབ་པ། རྒྱལ་ཡོངས་དང་མཉམ་དུ་རྣམ་པ་གསར་པའི་བཟོ་ལས་ཅན་ཕལ་ཆེར་འགྲུབ་པར་བྱེད་དགོས།
ཚང་འཛོམས་གྲོས་ཚོགས་ཐོག །བཟོ་ལས་ལ་བརྟེན་ནས་ཞིང་ཆེན་དར་བ་དང་བཟོ་སྐྲུན་ལས་རིགས་སྟོབས་ལྡན་ཞིང་ཆེན་འཛུགས་སྐྱོང་བརྟན་པོ་བྱེད་པ་དང་། ཐོན་ལས་གསུམ་པོ་སྤུས་ཀ་མཐོ་བའི་མཉམ་འབྲེལ་འཕེལ་རྒྱས་གཏོང་བ། ཚོང་གཉེར་བྱེད་མཁན་དེ་དེང་རབས་ཅན་གྱི་ཐོན་ལས་མ་ལག་འཛུགས་སྐྱོང་གི་སྟོབས་ཤུགས་གཙོ་བོར་འཛིན་པ། གསོ་སྐྱོང་དང་ནང་འདྲེན་མཉམ་འཛིན་རྒྱུན་འཁྱོངས། ཚོང་གཉེར་བྱེད་མཁན་སྟོབས་ལྡན་གཏོང་བར་རྒྱབ་སྐྱོར་བྱེད་པ། གསར་གཏོད་ལ་བརྟེན་ནས་ཐོན་ལས་འཕེལ་རྒྱས་ལ་སྐུལ་ཁྲིད་རྒྱ་ཇེ་ཆེ་དང་གཏིང་ཇེ་ཟབ་བྱེད་པ། དེང་རབས་ཅན་གྱི་རྨང་གཞི་སྒྲིག་ཆས་མ་ལག་འཛུགས་སྐྱོང་བྱེད་པ། བཅོས་བསྒྱུར་སྒོ་འབྱེད་ཀྱི་སྒུལ་ཤུགས་དང་གསོན་ཤུགས་ཇེ་ཆེར་གཏོང་བ། ཐོན་ལས་འཕེལ་རྒྱས་ལ་རྒྱབ་སྐྱོར་བྱེད་པའི་སྲིད་ཇུས་འཐུས་ཚང་གཏོང་བ་བཅས་བྱས་ནས། ཐོན་ལས་འཕེལ་རྒྱས་ཀྱི་རྩ་འཛུགས་འགོ་ཁྲིད་ཇེ་དྲག་གཏོང་དགོས་ཞེས་ནན་གྱིས་བསྟན།
ཚང་འཛོམས་གྲོས་ཚོགས་ཐོག །ཞིང་ཆེན་ཏང་ཨུའི་སྐབས་བཅུ་གཉིས་པའི་ཚང་འཛོམས་གྲོས་ཚོགས་ཐེངས་གསུམ་པའི་སྙིང་དོན་སློབ་སྦྱོང་དང་དྲིལ་བསྒྲགས་ལག་བསྟར་བྱ་རྒྱུ་དེ་དེང་སང་དང་ཕྱིན་ཆད་དུས་རིམ་ཞིག་ནང་ཞིང་ཆེན་ཡོངས་ཀྱི་ཆབ་སྲིད་ལས་འགན་གཙོ་བོར་འཛིན་པ། རིམ་པ་ཁག་གི་ཏང་ཨུ་དང་ཏང་ཙུའུ་ཡིས་དུས་ཐོག་ཏུ་ཚང་འཛོམས་གྲོས་ཚོགས་ཀྱི་སྙིང་དོན་བརྒྱུད་བསྒྲགས་དང་སློབ་སྦྱོང་བྱེད་པ། དྲིལ་བསྒྲགས་སྒྲོག་འགྲེལ་དང་སློབ་གསོ་གསོ་སྦྱོང་བྱེད་ཤུགས་ཇེ་དྲག་བཏང་ནས། རྒྱ་ཆེའི་ཏང་ཡོན་ལས་བྱེད་ཀྱིས་བསམ་བློ་དང་བྱ་སྤྱོད་གཉིས་ཀ་ཞིང་ཆེན་ཏང་ཨུའི་བཀོད་སྒྲིག་ཐོག་གཅིག་གྱུར་ཡོང་བ་བྱེད་དགོས། དོན་དངོས་ལ་དམིགས་པ་དང་ཤུགས་འདོན་ས་ཐིག་པོ་བཙལ་བ། གསར་གཏོད་ཅན་གྱིས་ལས་ཀ་བསྒྲུབ་པ། སྒུལ་ཤུགས་གསར་པ་སྣོན་པ་དང་། ཚོང་གཉེར་བྱེད་མཁན་གསར་པ་གསོ་སྐྱོང་བྱེད་པ། རྒྱུ་ཆ་གསར་པར་དམིགས་པ། ལས་སྟངས་གསར་པ་འཕེལ་རྒྱས་ཐད་འབད་པ་བཅས་བྱས་ནས། སི་ཁྲོན་སྤུས་ཀ་མཐོ་བའི་འཕེལ་རྒྱས་ཀྱི་ལེགས་ཆ་གཏོད་དགོས། ཏང་གི་ཕྱོགས་ཡོངས་འགོ་ཁྲིད་རྒྱུན་འཁྱོངས་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་བྱ་གཙོ་བོའི་སློབ་གསོ་ཟབ་མོ་སྤེལ་བ། ཕྱོགས་ཡོངས་ནས་ཏང་ནན་གྱིས་སྐྱོང་བ་དང་། སྤྱི་ཚོགས་རིང་ལུགས་དེང་རབས་ཅན་གྱི་སི་ཁྲོན་ཕྱོགས་ཡོངས་ནས་འཛུགས་སྐྱོང་བྱེད་པའི་རྩ་བའི་འགན་སྲུང་མཁོ་འདོན་བྱེད་དགོས་ཞེས་ནན་གྱིས་བསྟན་པ་རེད།
ཚང་འཛོམས་གྲོས་ཐོག །ཀྲུང་གོ་གུང་ཁྲན་ཏང་གི་སྒྲིག་ཡིག་དང་ཀྲུང་གོ་གུང་ཁྲན་ཏང་ས་གནས་ཨུ་ལྷན་ལས་ཀའི་སྲོལ་ཡིག་གི་འབྲེལ་ཡོད་གཏན་འབེབས་ལྟར། བློ་མཐུན་ཝང་ཉིང་དང་། ཧྥོང་ཅན། ཧྲེང་ཅན། ཧྥན་པོ་བཅས་ལས་འཁྱུལ་ངལ་གསོ་དང་ལས་གནས་སྤོས་པའི་དབང་གིས་ཞིང་ཆེན་ཏང་ཨུའི་ཨུ་ཡོན་གྱི་གོ་གནས་མེད་པར་བཟོ་བར་ཆོག་མཆན་གནང་བ་རེད།
ཚང་འཛོམས་གྲོས་ཚོགས་ཐོག །ཞིང་ཆེན་ཡོངས་ཀྱི་རིམ་པ་ཁག་གི་ཏང་རྩ་འཛུགས་དང་རྒྱ་ཆེ་བའི་ཏང་ཡོན་ལས་བྱེད་ཀྱིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་དམ་པོ་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སི་ཁྲོན་ལས་ཀར་གནང་བའི་མཛུབ་སྟོན་གལ་ཆེན་གྱི་སྙིང་དོན་རབ་དང་རིམ་པ་དང་། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དོན་འཁྱོལ་བྱས་ནས། རྒྱལ་ཁབ་ཁྱོན་ཡོངས་ལ་ཞབས་ཞུ་དང་། སི་ཁྲོན་གྱི་ཁྱད་ཆོས་ལྡན་པའི་དེང་རབས་ཅན་གྱི་ཐོན་ལས་མ་ལག་འཛུགས་སྐྱོང་མགྱོགས་པོ་བྱེད་པ། ཀྲུང་གོའི་ལུགས་ཀྱི་དེང་རབས་ཅན་གྱི་སི་ཁྲོན་གྱི་གྲུབ་འབྲས་གཏོད་གང་ཐུབ་བྱས་ནས། སྟོབས་ལྡན་རྒྱལ་ཁབ་འཛུགས་སྐྱོང་དང་། མི་རིགས་བསྐྱར་དར་ཡོང་བར་བྱས་རྗེས་ཆེན་པོ་འཇོག་པའི་འབོད་སྐུལ་བཏང་བ་རེད། །
2023ལོའི་ཟླ་6པའི་ཚེས་19ཉིན། ཀྲུང་གོའི་གུང་ཁྲན་ཏང་སི་ཁྲོན་ཞིང་ཆེན་གྱི་སྐབས་བཅུ་གསུམ་པའི་རྒྱུན་ལས་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་གསུམ་པ་ཁྲེང་ཏུའུ་རུ་འཚོགས།