ཀྲུང་གོའི་ནུབ་རྒྱུད་རྒྱལ་སྤྱིའི་འགྲེམ་སྟོན་འདུ་ཚོགས་སྐབས་བཅུ་དགུ་པ་ཟླ་6པའི་ཚེས་29ཉིན་ཁྲེང་ཏུའུ་རུ་འཚོགས་འགོ་ཚུགས། “ཀྲུང་གོའི་དུས་རབས་གསར་པ། ནུབ་རྒྱུད་ཀྱི་རྒྱང་སྐྱོད་གསར་པ”ཞེས་པ་བརྗོད་དོན་ཡིན་པའི་ཐེངས་འདིའི་འདུ་ཚོགས་ཀྱི་ཚོགས་ཡུན་ཉིན་ལྔ་ཡིན་ཞིང་། རྒྱལ་ཁབ（ས་གནས）མི་འདྲ་བ་56གི་ཁེ་ལས་སྡེ་ཁག་ 3500ལྷག་དང་། རྒྱལ་ཁབ་ཕྱི་ནང་གི་སྐུ་མགྲོན་དང་ཚོང་པ་ཁྲི་6ལྷག་ཟབ་ཞུགས་བྱས།
ཀྲུང་གོའི་ནུབ་རྒྱུད་རྒྱལ་སྤྱིའི་འགྲེམ་སྟོན་འདུ་ཚོགས་ཀྱི་འགྲེམ་སྟོན་ཁང་གཙོ་བོ་ནི་ཀྲུང་གོའི་ནུབ་རྒྱུད་རྒྱལ་སྤྱིའི་འགྲེམ་སྟོན་ཚོགས་ར་ཡིན་ཞིང་། དེའི་སྤྱིའི་རྒྱ་ཁྱོན་ལ་སྨི་གྲུ་བཞི་མ་ཁྲི་20ཡོད་པ་དང་། དེར་ནུབ་རྒྱུད་ས་ཁུལ་གྱི་འཕེལ་རྒྱས་འགྲེམ་སྟོན་བྱས་ཤིང་། བསྡོམས་པས“རྒྱུད་གཅིག་ལམ་གཅིག”རྒྱལ་སྤྱིའི་མཉམ་ལས་ཁང་དང་། དུས་རབས་གསར་པའི་ནུབ་རྒྱུད་གསར་སྤེལ་ཆེན་པོའི་འགྲེམ་ཁང་། ཁྲེང་ཏུའུ་དང་ཁྲུང་ཆིང་ས་ཁུལ་གྱི་གྲོང་ཁྱེར་གཉིས་ཀྱི་དཔལ་འབྱོར་ཁུལ་འཛུགས་སྐྲུན་འགྲེམ་སྟོན་ཁང་སོགས་འགྲེམ་སྟོན་ཁང་དྲུག་དང་། ཨང་ཀའི་དཔལ་འབྱོར་དང་ཆིང་ནུས་ཐོན་ལས་སོགས་ཆེད་ལས་འགྲེམ་སྟོན་ཁང་བཞི་བཀོད་སྒྲིག་བྱས་ཡོད་པ་རེད།
ད་ལོའི་ཀྲུང་གོའི་ནུབ་རྒྱུད་རྒྱལ་སྤྱིའི་འགྲེམ་སྟོན་འདུ་ཚོགས་ཀྱི་སྐུ་མགྲོན་གཙོ་བོ་ནི་ཐེ་ལན་དི་རྒྱལ་ཁབ་ཡིན་ཞིང་། རེས་མོས་ཀྲུའུ་ཞིའི་ལས་ཁུངས་ནི་ཀན་སུའུ་ཞིང་ཆེན་ཡིན། ཆེས་ཐོག་མར་བརྗོད་དོན་གཙོ་བོའི་གྲོང་ཁྱེར་གཉིས་བཀོད་སྒྲིག་བྱས་པ་སྟེ། སི་ཁྲོན་ཞིང་ཆེན་མེན་དབྱང་གྲོང་ཁྱེར་དང་ཙི་དབྱང་གྲོང་ཁྱེར་གཉིས་ཡིན། ཐེ་ལན་དི་དང་ཨོ་སི་ཁྲི་ལི་ཡ། ཕ་ཀི་སི་ལན་སོགས་རྒྱལ་ཁབ་17ལ་རྒྱལ་ཁབ་འགྲེམ་སྟོན་ཁང་བཀོད་སྒྲིག་བྱས་ཤིང་། རྒྱལ་ནང་གི་ཞིང་ཆེན（ཆུས་དང་གྲོང་ཁྱེར）27དང་ཞིན་ཅང་ཐོན་སྐྱེད་འཛུགས་སྐྲུན་དཔུང་ཚོགས་འགྲེམ་ཚོགས་ལ་ཞུགས།
ཀྲུང་གོའི་ནུབ་རྒྱུད་མ་འཇོག་གསལ་བཤད་ཚོགས་འདུ་དང་དཔལ་འབྱོར་མཉམ་ལས་ལས་གཞིའི་གན་རྒྱ་འཇོག་པའི་མཛད་སྒོའང་ཉིན་དེར་འཚོགས་ཤིང་། ནུབ་རྒྱུད་ཀྱི་ཞིང་ཆེན（ཆུས་དང་གྲོང་ཁྱེར）བཅུ་གཉིས་དང་ཞིན་ཅང་ཐོན་སྐྱེད་འཛུགས་སྐྲུན་དཔུང་ཚོགས་ཀྱིས་རྒྱལ་ཁབ་ཕྱི་ནང་གི་མ་དངུལ་འཇོག་མཁན་དང་གློག་རྡུལ་ཆ་འཕྲིན་དང་ནུས་ཁུངས་གསར་པ། རྒྱུ་ཆ་གསར་པ་སོགས་ཀྱི་ཁྱབ་ཁོངས་དང་འབྲེལ་བའི་མཉམ་ལས་ལས་གཞི་492ལ་གན་རྒྱ་བཞག་ཅིང་། གན་རྒྱ་བཞག་པའི་ལས་གཞིའི་ཆ་སྙོམས་མ་འཇོག་རྒྱ་ཁྱོན་སྒོར་དུར་ཕྱུར་13བརྒལ་བ་དང་། སྐབས་སྔོན་མ་དང་བསྡུར་ན་འཕར་ཚད་50%བརྒལ་བ་རེད།
ཐེངས་འདིའི་འགྲེམ་སྟོན་འདུ་ཚོགས་སྟེང་བྱེད་སྒོ་མི་འདྲ་བ་50སྤེལ་བ་དང་། དེའི་ཁྲོད་མ་དངུལ་འཇོག་པའི་བྱེད་སྒོ་30ལྷག་ཡོད་པ་རེད། སི་ཁྲོན་ཞིང་ཆེན་དཔལ་འབྱོར་མཉམ་ལས་ཅུས་ཀྱི་འབྲེལ་ཡོད་འགན་ཁུར་པས་ངོ་སྤྲོད་བྱས་པ་ལྟར་ན། ཐེངས་འདིའི་འགྲེམ་སྟོན་འདུ་ཚོགས་ཀྱིས་རིམ་པ་དང་ཟུར་མི་འདྲ་བ་ནས་ཀྲུང་གོའི་ནུབ་རྒྱུད་རྒྱལ་སྤྱིའི་འགྲེམ་སྟོན་འདུ་ཚོགས་ནི“ནུབ་རྒྱུད་མཉམ་འབྲེལ་དང་། ཤར་ནུབ་མཉམ་འབྲེལ། རྒྱལ་ཁབ་ཕྱི་ནང་མཉམ་འབྲེལ”གྱི་འདེགས་གཞི་གསུམ་གྱི་ནུས་པ་མངོན་ཡོད་པ་རེད། །