སྤྱི་ཟླ་6པའི་ཚེས་26ཉིན། དཀར་མཛེས་ཁུལ་དུ་ནུས་ཁུངས་གཙང་མའི་འཕེལ་རྒྱས་ཚོགས་ཆེན་འཚོགས་པ་དང་། ཀྲུང་གོའི་བཟོ་སྐྲུན་གླིང་དང་འཇར་མན་རྒྱལ་ཁབ་བཟོ་སྐྲུན་གླིང་གི་ཆེད་མཁས་ཡོན་ཧྲི། ཞིང་ཆེན་རིམ་པའི་འབྲེལ་ཡོད་སྡེ་ཁག །ལས་རིགས་ཀྱི་ལག་རྩལ་སྡེ་ཁག །ལས་རིགས་ཀྱི་མཐུན་ཚོགས་རྩ་འཛུགས། ནུས་ཁུངས་ཁེ་ལས། དངུལ་རྩ་སྡེ་ཁག་ལ་སོགས་པའི་ཕྱོགས་སོ་སོའི་འཐུས་ཚབ་པ་ཚོགས་ཆེན་དུ་ཞུགས་ཡོད།
ཚོགས་ཆེན་མ་འཚོག་པའི་ཉིན་གཅིག་གི་སྔོན་དུ། འཛམ་གླིང་གི་མཚོ་འཕགས་ཆེས་མཐོ་བ་དང་གཞི་ཁྱོན་ཆེས་ཆེ་བའི་ཆུ་འོད་གསབ་རེས་རྣམ་གྲངས་ཏེ། ཉག་ཆུའི་ཁོ་ལའི་འོད་ཤུགས་གློག་ཁང་དུས་ཐེངས་དང་པོ་དངོས་སུ་རྩིས་ལེན་བེད་སྤྱོད་བྱེད་འགོ་ཚུགས། གནས་ཚུལ་དེ་ཁྱབ་བསྒྲགས་བྱས་མ་ཐག ཚོགས་ཞུགས་འཐུས་ཚབ་པ་རྣམས་ཀྱིས་དོ་སྣང་ཆེན་པོ་བྱས་ནས། དུས་ཡུན་ཉིན་གཉིས་ཀྱི་ཚོགས་ཆེན་ཁྲོད་དུ། ཕྱོགས་སོ་སོའི་འཐུས་ཚབ་པས་དཀར་མཛེས་ཀྱི་ནུས་ཁུངས་སྤུས་ཚད་ལ་གཞིགས་ནས། ནུས་ཁུངས་གཙང་མའི་མཉམ་ལས་གཏིང་ཟབ་དང་། ནུས་ཁུངས་ལྗང་མདོག་འཕེལ་རྒྱས་སྐུལ་འདེད་གཏོང་པ་སོགས་ལ་མཉམ་དུ་གྲོས་མོལ་བྱས་པས། དཀར་མཛེས་ཁུལ་གྱི་ནུས་ཁུངས་གཙང་མའི་འཕེལ་རྒྱས་ལ་འགུལ་ནུས་གསར་པ་བསྣན་ཡོད།
ཚོགས་ཆེན་གྱི་སྐབས་སུ། དཀར་མཛེས་ཁུལ་གྱིས《དཀར་མཛེས་ཁུལ་གྱིས་ནུས་ཁུངས་གཙང་མའི་སྤུས་ཚད་མཐོན་པོའི་འཕེལ་རྒྱས་ལ་ཁྱོན་ཡོངས་ནས་སྐུལ་འདེད་གཏང་རྒྱུའི་སྐོར་གྱི་བསམ་འཆར》ཞེས་པ་འགྲེམས་སྤེལ་བྱས་པ་དང་། 《བསམ་འཆར》དུ་2025ལོར་སླེབས་སྐབས་ཁུལ་ཡོངས་ཀྱི་ནུས་ཁུངས་གཙང་མའི་སྒྲིག་སྦྱོར་འཕྲུལ་འཁོར་གྱི་བསྡོམས་འབོར་སྟོང་ཝ་ཁྲི་3000ལས་བརྒལ་རྒྱུ་དང་། གློག་དྲ་འཛུགས་སྐྲུན་སྔར་བས་སྲ་བརྟན་དང་བློས་འགེལ་ཆོག་པ། གློག་གཏོང་ནུས་སྟོང་ཝ་ཁྲི་2200ལས་བརྒལ་རྒྱུ། ཆུ་འོད་གློག་ཕན་ཚུན་གསབ་རེས་འཕེལ་རྒྱས་དང་དྲ་བའི་འབྱུང་ཁུངས་མཐུན་སྦྱོར་འཕེལ་རྒྱས་གཏང་རྒྱུ། ནུས་ཁུངས་གཙང་མའི་མཁོ་སྤྲོད་འགན་ལེན་ནུས་པ་མངོན་གསལ་དོད་པོས་ཆེ་རུ་གཏང་རྒྱུ་རེད།
གོང་གསལ་གྱི་དམིགས་ཚད་མངོན་འགྱུར་ཡོང་ཆེད། དཀར་མཛེས་ཁུལ་གྱིས་ས་ཁོངས་ཆེ་གྲས་ལྔའི་ནུས་ཁུངས་གཙང་མའི་རྟེན་གཞི་བཀོད་སྒྲིག་བྱས་ཡོད། །