སྐུ་རྒྱབ་ཚུལ་ཁྲིམས་སྙིང་པོ། ཧི་མ་ལ་ཡའི་དབྱངས་རོལ་འཚོལ་བ།

སྐུ་རྒྱབ་ཚུལ་ཁྲིམས་སྙིང་པོ་ལགས་ནི་སྤྱི་ལོ་1966ལོར་གསེར་རྟ་རུ་སྐྱེས་ཤིང་། རང་ལོ་བཞི་ནས་བཅུ་བདུན་བར་ཕ་སྐུ་རྒྱབ་ཐོ་ལོ་གཙོ་བོ་བྱས་པའི་ཕ་ཡུལ་གྱི་དགེ་རྒན་དག་གི་དྲུང་ནས་གནའ་བོའི་བོད་ཀྱི་རོལ་ཆ་དག་གི་འབུད་རྡུང་དཀྲོལ་གསུམ་དང་། མགུར་གླུ། དབྱངས་ཡིག །ཆོས་ལུགས་ཀྱི་དབྱངས་རྟ། རོལ་དབྱངས་སེམས་ཁམས་རིག་པ་དང་འབྲེལ་བའི་རོལ་མོའི་གཞུང་ལུགས་ཀྱི་སྐོར་སོགས་ཞིབ་པར་སྦྱངས། 1984ལོ་ནས་ཀན་སུའུ་ཞིང་ཆེན་གྱི་བླ་བྲང་དགོན་དང་། ཀན་ལྷོ་ཁུལ་བོད་སྨན་ཁང་། བོད་ལྗོངས་གསོ་རིག་སློབ་ཆེན་སོགས་སུ་དགེ་རྒན་ཆེན་མོ་དམུ་དགེ་བསམ་གཏན་ཚང་དང་། ཁྲོ་རུ་མཁན་པོ་ཚེ་རྣམ། པཎ་ཆེན་སྐུ་ཕྲེང་བཅུ་གཅིག་པའི་ཡོངས་འཛིན་དགེ་བཤེས་འཇམ་དབྱངས་རྒྱ་མཚོ་ཚང་སོགས་དགེ་རྒན་བཅུ་ལྷག་གི་དྲུང་ནས་བོད་ཀྱི་ཆོས་དང་རིག་གཞུང་ལ་སྦྱངས་བ་ལེགས་པར་བགྱིས། དུས་ཕྱིས་བླ་མ་རིན་པོ་ཆེ་པདྨ་དབང་ཕྱུག་གི་དྲུང་ནས་རྫོགས་ཆེན་དང་། བདུད་ཁྲོས་མའི་ཆོས་སྐོར་སོགས་དང་། བླ་མ་ཀརྨ་བཤད་སྒྲུབ་ཀྱི་དྲུང་ནས་ཕྱག་ཆེན་གྱི་ཆོས་སྐོར་སོགས་ཞུས། 1993ལོར་སྐྱ་སར་བབས་རྗེས་ལྷ་ས་དང་། མཚོ་སྔོན། ཁྲེང་ཏུའུ་སོགས་སུ་ཁེ་ལས་གཉེར་ནས་2005ལོར་གཉན་པོ་གཡུ་རྩེ་སྐྱེ་ཁམས་ཁོར་ཡུག་སྲུང་སྐྱོབ་ཚོགས་པ་དང་། ཕ་ཡུལ་གསེར་རྟ་རུ་མཐོ་སྒང་ཉི་འོད་ལག་རྩལ་སློབ་གྲྭ་གསར་འཛུགས་བྱས་པ་སོགས་སྤྱི་ཕན་དགེ་ལས་ཀྱི་བྱ་བའང་མི་ཉུང་བ་ཞིག་བསྒྲུབས། 2016ལོར་བདུད་འཇོམས་གཅོད་ཀྱི་དབྱངས་རྟ་ལ་ཞིང་ཆེན་རིམ་པའི་དངོས་མིན་ཤུལ་བཞག་རིག་གནས་རྒྱུན་འཛིན་གྱི་དཔང་ཡིག་ཐོབ། 2019ལོར་ཧྥ་རན་སིར་རྒྱལ་སྤྱིའི་བོད་རིག་པའི་ཚོགས་འདུར་ཞུགས་པའི་གོ་སྐབས་དང་བསྟུན་ནས་བོད་ཀྱི་དབྱངས་དང་། དབྱངས་ཡིག་གི་སྐོར་ངོ་སྤྲོད་དང་བརྒྱུད་བསྒྲགས་བྱས། མདོར་ན་སྤྱི་ལོ་1993ལོ་ནས་ད་ལྟའི་བར་དབུས་གཙང་དང་། མདོ་སྨད། ཁམས་ཀྱི་ཡུལ་ལུང་སོ་སོ་དང་། བལ་ཡུལ། འབྲུག་ཡུལ་སོགས་ཧི་མ་ལ་ཡའི་རི་རྒྱུད་ཕྱི་ནང་དུ་དངོས་སུ་ཕྱིན་ནས་དབྱངས་རོལ་དང་འབྲེལ་བའི་རིག་གཞུང་ཞིབ་འཇུག་དང་། དམངས་གླུ། ལ་གཞས། གེ་སར་གྱི་སྒྲུང་གླུ། དམངས་ཁྲོད་དང་དགོན་པའི་རོལ་ཆས་སོགས་ལ་སློབ་སྦྱོང་དང་རྒྱུས་ལོན་མི་ཉུང་བ་ཞིག་བགྱིས་ཤིང་། མི་འགྱངས་པར《ཧི་མ་ལ་ཡའི་དབྱངས་རོལ་གྱི་བསྟན་བཅོས》ཞེས་པའི་རོལ་མོའི་གཞུང་ལུགས་ཀྱི་དཔེ་ཆ་ཞིག་ཀྱང་དཔར་སྐྲུན་བྱེད་འཆར་ཡོད།

དྲི་བ།

༡ ཐོག་མར་རྒན་ལགས་ཀྱིས་ཧི་མ་ལ་ཡའི་དབྱངས་རོལ་འཚོལ་ཞིབ་ཀྱི་བརྒྱུད་རིམ་མདོར་བསྡུས་ཤིག་གསུང་རོགས།

འདས་པའི་མི་ལོ་མང་པོ་ཞིག་གི་རིང་ལ་ངས་བཀའ་བསྟན་གཙོ་བོ་བྱས་པའི་དཔེ་ཆ་མང་པོ་ཞིག་ལ་མིག་ཞར་རག་བར་དུ་བལྟས་པ་ཡིན། ཡིན་ན་ཡང་ཞིབ་འཇུག་ངོ་མ་ཞིག་བྱེད་འདོད་ཚེ། དོན་དག་མང་པོ་ཞིག་དཔེ་ཆ་གཅིག་པུའི་ནང་ནས་ཤེས་ཐུབ་པ་དང་། ཐག་གཅོད་ཐུབ་པ་དེ་འདྲ་རེད་མི་འདུག །དེའི་ཕྱིར་ང་ཧི་མ་ལ་ཡའི་དབྱངས་རོལ་འཚོལ་ཞིབ་ཀྱི་ཆེད་དུ་མདོ་དབུས་ཁམས་གསུམ་གཙོར་བྱས་ཐོག །འབྲུག་དང་བལ་ཡུལ་སོགས་ཀྱི་དམངས་ཁྲོད་དང་དགོན་སྡེ་སོ་སོར་སྔ་ཕྱི་རིམ་པ་དུ་མར་སོང་བ་ཡིན། ད་དུང་ཡང་མུ་མཐུད་དུ་འགྲོ་དགོས་རྒྱུ་རེད།

2019ལོར་འབྲུག་གི་མཁས་དབང་ཀུན་བཟང་འཕྲིན་ལས་ལགས་དང་མཉམ་དུ་འབྲུག་རྒྱལ་ཁབ་ཀྱི་དཔེ་མཛོད་ཁང་དུ་དབྱངས་ཡིག་སྐོར་གྱི་དཔེ་རྙིང་ལ་མཇལ་བཞིན་པ།

༢ ཁྱེད་ལ་མགུར་དང་རོལ་མོའི་ཤུགས་རྐྱེན་དུས་ནམ་ཞིིག་ནས་ཐེབས་པ་རེད།

སྤྱིར་ངས་ལོ་བཞི་ནས་བཅུ་གསུམ་བར་ཕ་རྒན་ལགས་ཀྱི་དྲུང་ནས་མགུར་རྟ་དང་དབྱངས་རྟ་དེ་དང་འབྲེལ་བའི་རིགས་པའི་གཞུང་ལུགས་ཀྱི་སྐོར་དང་། སྒྲ་དབྱངས་ཉམས་སུ་ལེན་པའི་རིམ་པ་སོགས་སློབ་སྦྱོང་མི་ཉུང་བ་ཞིག་བྱས་པ་ཡིན་ལ། ལོ་བཅུ་གསུམ་ནས་བཅུ་བདུན་བར་དགོན་སྡེའི་འབུད་རྡུང་དཀྲོལ་གསུམ་གྱི་རོལ་མོའི་ལག་ལེན་དངོས་ལ་སློབ་སྦྱོང་བྱས་པ་དང་། དུས་དེ་ཙམ་ཞིག་ནས་བཟུང་སྲོལ་རྒྱུན་དབྱངས་རོལ་གྱི་ཤུགས་རྐྱེན་དངོས་ཤུགས་བརྒྱུད་གསུམ་ནས་ཐེབས་པ་ཡིན་རྒྱུ་རེད།

སྐུ་རྒྱབ་ཚུལ་ཁྲིམས་ལགས་ཀྱིས་ཧི་མ་ལ་ཡའི་དབྱངས་རོལ་སྐོར་གྱི་འཆད་ཁྲིད་གནང་བཞིན་པ།

༣ ཁྱེད་ཀྱིས་ལོ་ངོ་དུ་མའི་ནང་རྒྱུན་བསྐྱངས་ཡོང་བའི་རོལ་དབྱངས་འཚོལ་ཞིབ་ཀྱི་ཐོག་མའི་བསམ་བློ་དེ་གང་ནས་རྙེད་པ་ཡིན།

དེ་ནི་ངའི་མི་ཚེའི་དཀྱོག་མཚམས་ཤིག་རེད། སྤྱིར་ང་རང་ལོ་ཉེར་ལྔའི་ཐོག་དགོན་སྡེ་ནས་བུད་དེ་སྤྱི་ཚོགས་ལ་ཞུགས་ནས་མི་ལོ་མང་པོ་ཞིག་ལ་ཚོང་ལས་གཉེར་བ་ཡིན། ད་དུང་ཡང་མུ་མཐུད་དུ་ཚོང་ལས་ཀྱི་ལམ་ཁ་འདི་གཉེར་ན། འཚོ་བ་རྒྱས་སྤྲོས་ཤིག་རོལ་ཆོག་མོད། ཡིན་ན་ཡང་ང་ལོ་བཞི་བཅུ་ཐམ་པ་ཡིན་དུས་བསམ་བློ་ཞིག་བཏང་བ་ཡིན། ངས་ལོ་བཞི་ནས་བཅུ་བདུན་བར་བསླབས་ཡོང་བའི་དབྱངས་དང་རོལ་མོའི་སྐོར་དེ་དག་ནི་ཡབ་མེས་ཚོས་གཅེས་པའི་སྲོག་དང་འདྲ་བའི་རིན་པོ་ཆེ་ཤ་སྟག་ཡིན་ནའང། ད་ལྟའི་ཆར་འདི་ལ་དོ་སྣང་བྱེད་མཁན་དཀོན་པར་མ་ཟད་མི་རིང་བར་མིང་ཙམ་ལས་མི་ལྷག་པའི་ཉེན་ཁ་ཡང་འབྱུང་སྲིད་པས། ངས་དུས་དེ་ནས་བཟུང་ཚོང་ལས་བསྐྱུར་ཏེ་ཧི་མ་ལའི་དབྱངས་རོལ་འཚོལ་ཞིབ་ཀྱི་ལས་ཀ་འདི་ད་ལྟའི་བར་རྒྱུན་བསྐྱངས་ནས་ཡོང་བ་ཡིན་ལ། མ་འོངས་པར་མུ་མཐུད་དུ་རྒྱུན་བསྐྱང་ངེས་ཡིན།

2019ལོའི་ཟླ་7པར། ཕེ་རིས་ཀྱི་2019ལོའི་རྒྱལ་སྤྱིའི་བོད་རིག་པའི་བགྲོ་གླེང་ཚོགས་འདུར་ཞུགས་པ་དང། འདི་ནི་ཡུལ་དངོས་ནས་དབྱངས་ཡིག་འབྲི་བཞིན་པའི་རྣམ་པ་རེད།

༤ བོད་ལ་དབྱངས་ཡིག་དར་ནས་ལོ་ག་ཚོད་སོང་བ་དང་འདིའི་བེད་སྤྱོད་ཁྱབ་ཁོངས་དགོན་སྡེ་ཁོ་ན་ཙམ་ཡིན་ནམ།

ཡིག་ཚང་གི་ངོས་ནས་བཤད་ན། གུ་གེ་པཎྜི་ཏ་གྲགས་པ་རྒྱལ་མཚན་གྱིས་མཛད་པའི་ལྷ་བླ་མ་ཡེ་ཤེས་འོད་ཀྱི་རྣམ་ཐར་ནང་། ལོ་ཆེན་རིན་ཆེན་བཟང་པོས་དགུང་ལོ་སོ་གྲངས་ཀྱི་སྐབས་སུ་ཡོ་གའི་གར་དབྱངས་མང་དུ་བརྩམས་ཞེས་བཀོད་ཡོད་ཅིང་། བོད་ལ་དབྱངས་ཡིག་གི་སྲོལ་དར་ནས་ད་ལྟའི་བར་མ་མཐའ་ཡང་ལོ་ངོ་དགུ་བརྒྱ་ལྷག་གི་ལོ་རྒྱུས་ཡོད་པ་ཤེས་ཐུབ། གཞན་དབྱངས་འདི་མང་ཆེ་བ་དགོན་སྡེའི་ཁྲོད་ནས་རྒྱུན་འཛིན་དང་བེད་སྤྱོད་གནང་ཡོང་བ་བདེན་ཡང་། འདིའི་བེད་སྤྱོད་ཀྱི་ཁྱབ་ཁོངས་དགོན་སྡེ་ཁོ་ན་ཙམ་རེད་མི་འདུག །དེ་ནི་དམངས་ཁྲོད་ཀྱི་གླུ་དང་གེ་སར་གྱི་སྒྲུང་རྟ་སོགས་ཀྱང་དབྱངས་ཡིག་གི་ཐོག་ནས་བྲིས་ཡོད་པ་མང་པོ་མཐོང་རྒྱུ་ཡོད།

༥ ཁྱེད་ཀྱིས་བལྟས་ན་ད་ལྟ་བོད་ཀྱི་སྲོལ་རྒྱུན་རོལ་མོའི་གནས་བབ་དེ་ཅི་འདྲ་ཞིག་རེད།

ཧ་ཅང་ཉག་ཕྲ་བའི་སྒང་རེད། དཔེར་ན་ཆོས་ལུགས་པའི་ཁྲོད་ལ་མཚོན་ན་སྔོན་ཆད་བཀའ་བརྒྱུད་མགུར་མཚོའི་དབྱངས་རྣམས་ལ་ཀརྨ་པ་དབང་ཕྱུག་རྡོ་རྗེ་དང་། ཞྭ་དམར་མཁའ་སྤྱོད་དབང་པོ། སི་ཏུ་པཎ་ཆེན་སོགས་ཀྱིས་བྲིས་པའི་དབྱངས་ཡིག་མི་འདྲ་བ་བརྒྱ་དང་བཞི་བཅུ་ལྷག་ཡོད་ཀྱང་། དེང་སང་རྒྱལ་ཕྱི་ནང་གི་བཀའ་བརྒྱུད་པའི་དགོན་པ་ཆེ་ཆུང་ཀུན་ཏུ་མགུར་རྟ་དེ་དག་ཆ་ཚང་གྱེར་ཤེས་པའི་མི་གཅིག་ཀྱང་རྙེད་མ་སོང་ལ། ཧ་ལམ་ཡོད་ས་མ་རེད་ཅེས་བཤད་ཆོག་ས་རེད།

དེ་བཞིན་དུ་དམངས་ཁྲོད་ལ་ཆགས་བཞག་ནའང་། མཚོ་སྔོན་གཅན་ཚའི་ས་ཁུལ་དུ་མི་ལོ་བཞི་བཅུ་ལྷག་གི་ཡར་སྔོན་དུ་སྐྱེས་པ་ཡོད་ཚད་ཀྱིས་བྱ་རྒོད་ཀྱི་དིང་གླིང་དང་གཞུང་གླིང་འབུད་མི་ཤེས་མཁན་ཞིག་ཕལ་ཆེར་མེད་པར་བཤད་ཅིང་། དེར་ཡང་རྟ་ནག་སྒྲོག་འགྲོས་དང་། ངང་པ་མཚོ་འཁོར། དགའ་ལྡན་རྩེ་སྐོར། ཕོ་རོགས་གདུང་འབོད་སོགས་ལོ་རྒྱུས་རྒྱབ་ལྗོངས་ལྡན་པའི་འབུད་སྲོལ་མང་པོ་ཡོད་ཀྱང་། དེང་སང་དེ་དག་འབུད་ཤེས་མཁན་རེ་ཟུང་ཙམ་ལས་མི་འདུག་པའི་གནས་སྟངས་དེ་འདྲ་རེད།

༦ ཁྱེད་རང་གིས་རོལ་དབྱངས་ལ་གོ་བ་ཇི་ལྟར་ལེན་བཞིན་ཡོད།

ངས་ནམ་རྒྱུན་རང་རེའི་དབྱངས་རོལ་ཉམས་ལེན་གྱི་སྐོར་རམ། དབྱངས་རོལ་སེམས་ཁམས་རིག་པའི་སྐོར་ལ་དོ་སྣང་དང་ཉམས་ལེན་བྱེད་བཞིན་ཡོད། ང་ལ་མཚོན་ན་ཕན་ཐོགས་ཀྱང་ཆེན་པོ་འདུག །དེའི་ཕྱིར་ངས་ནམ་རྒྱུན་དབྱངས་དང་རོལ་མོ་ནི་འགྲོ་བ་མི་ཙམ་དུ་མ་ཟད། སྐྱེ་ཁམས་ཡོད་དོ་ཅོག་དང་ཁ་འབྲལ་ཐབས་མེད་པ་ཞིག་དང་། འབྲལ་མི་རུང་བ་ཞིག་རེད་སྙམ།

སྤྱིར་འགྲོ་བ་མིའི་རིགས་ལ་མཚོན་ནས་བཤད་ནའང་། སྒྲ་དང་དབྱངས་རོལ་ནི་མི་རྣམས་ཀྱིས་འཚོ་བའི་ཁྲོད་དུ་མེད་ཐབས་མེད་པ་ཞིག་ལ་ངོས་འཛིན་བྱས་ཡོད། དཔེར་ན། དེང་སང་རྒྱལ་ཁབ་དང་། མི་རིགས། ས་ཁུལ་བཅས་ཀྱི་དབྱེ་བ་མེད་པར་ཚད་ཅུང་ཟད་མཐོ་བའི་ཚོང་ར་དང་། ཟ་ཁང་དང་ཇ་ཁང་ལ་སོགས་དཔལ་འབྱོར་ཁྲོམ་ར་ཆེན་པོ་དག་ནའང་གླུ་དང་རོལ་མོ་སོགས་སྙན་པའི་སྒྲ་དབྱངས་རྣ་བར་སྙན་པ་ཞིག་རྒྱུན་ཆད་མེད་པར་སྒྲོག་བཞིན་འདུག་པ་དེའི་དམིགས་ཡུལ་ནི། གནས་དེར་འགྲོ་འོང་བྱེད་པའི་མི་དེ་དག་ལ་ལུས་ལྷོད་ཅིང་སེམས་སྐྱིད་པོ་ཡོང་བའི་ཆེད་དུ་ཡིན་པས། གནའ་སྔ་མོ་ནས་གླུ་དང་རོལ་མོས་མིའི་རིགས་ལ་བདེ་སྐྱིད་ངེས་ཅན་ཞིག་སྐྲུན་བཞིན་ཡོད་པ་ཤེས་རྟོགས་བྱུང་ཡོད་ཀྱང་། དེ་དག་ཆེད་ལས་དང་འབྲེལ་ནས་མིའི་འཚོ་བའི་ཁྲོད་ཐད་ཀར་བེད་སྤྱོད་གཏོང་བར་འབད་མཁན་ཞིག་ད་ལྟའི་བར་ཧ་ལམ་བྱུང་མེད་པའི་ཚོད་དུ་སྣང་།

༧ བོད་ཀྱི་དབྱངས་རོལ་ལ་རྒྱལ་ནང་དང་རྒྱལ་སྤྱིའི་སྒང་ནས་དོ་སྣང་དང་གདེང་འཇོག་གི་ཚད་གཞི་ཅི་འདྲ་རེད།

དེང་སང་མི་མང་པོོ་ཞིག་གིས་བོད་ཡིག་གཅིག་པུས་བོད་ཀྱི་རིག་གནས་ཤིག་བཤད་རྒྱུ་ཟེར་ན་དེ་ལ་ཚོང་ར་ཆེན་པོ་དང་། ཁྱབ་རྒྱ་ཆེན་པོ་ཞིག་མེད་པར་འདོད་ཅིང་། མ་འོངས་པར་དེ་ལས་ཀྱང་ཡོད་མི་སྲིད་པར་འདོད་མོད། འོན་ཀྱང་དོན་ངོ་མར་དེ་འདྲ་ཞིག་རེད་མི་འདུག་སྙམ། འདི་གཙོ་བོ་མི་སྒེར་དང་རིག་གནས་ཤིག་ལ་རག་ལས་པ་ཞིག་རེད། དཔེར་ན་ངས་བོད་ཡིག་མ་གཏོགས་ཡིག་རིགས་གཞན་གཅིག་ཀྱང་མི་ཤེས་མོད། ངས་བཤད་བཞིན་པ་དེ་བོད་ཀྱི་དབྱངས་རོལ་གྱི་སྐོར་ཡིན། རིག་གནས་འདི་ལ་དེ་སྔོན་དོ་སྣང་བྱེད་མཁན་ཞིག་མེད་སོང་བ་མ་གཏོགས་འདི་ནི་རྒྱ་ཆེ་ཞིང་གཏིང་ཟབ་པའི་རིག་གནས་ཤིག་རེད། ལྷག་པར་དུ་དབྱངས་རོལ་ཉམས་ལེན་གྱི་རིམ་པ་ལྟ་བུར་མཚོན་ན་འདི་ཚད་ཧ་ཅང་མཐོ་བའི་སྒྱུ་རྩལ་ཞིག་དང་། འགྲོ་བ་མིའི་རིགས་ཀྱི་འཚོ་བ་དང་ཐད་ཀར་འབྲེལ་ཡོད་པ་ཞིག་ཡིན་པས། འདི་ལ་དོ་སྣང་འདོད་མཁན་དང་དགའ་མཁན་ཤིན་ཏུ་མང་པོ་རེད་འདུག །དཔེར་ན། ན་ནིང་ངས་ཆ་རུའི་ནང་ནས་དབྱངས་རོལ་དང་འབྲེལ་བའི་གཏམ་བཤད་ཉུང་ངུ་ཞིག་སྤེལ་བ་ཡིན། སྐབས་དེ་དུས་ཉན་མཁན་མང་ཆེ་བ་པེ་ཅིན་དང་། ཧྲང་ཧེ་སོགས་ནས་ཆེད་དུ་ཡོང་བ་རྐྱང་རྐྱང་རེད། འདི་ལས་ཀྱང་ངས་བཤད་པ་མིན་པར་སྣང་ཚུལ་གསལ་པོ་མང་པོ་ཞིག་གིས་ང་ཚོ་དོན་དག་མི་ཉུང་བ་ཞིག་གིས་ངོས་ནས་གསལ་བཤད་བྱས་ཡོད།

ཡང་ལོ་ཁ་ཤས་ཀྱི་སྔོན་ང་ཧྥ་རན་སིར་རྒྱལ་སྤྱིའི་བོད་རིག་པའི་ཚོགས་འདུ་ཞིག་ལ་ཞུགས་པ་ཡིན། སྐབས་དེ་དུས་ངས་བོད་ཀྱི་དབྱངས་ཡིག་དང་འབྲེལ་ནས་འདོན་དབྱངས་དང་མགུར་དབྱངས་ཁ་ཤས་དབྱངས་ལ་གྱེར་ནས་ངོ་སྤྲོད་མདོར་བསྡུས་རེ་བྱེད་སྐབས། དེར་ཞུགས་ཀྱི་ཕྱི་གླིང་བ་དག་གིས་དགའ་བསུ་ཧ་ཅང་ཆེན་པོ་ཐོབ་སོང་།

གཞན་ད་དུང་སྔོན་ཆད་ང་ལ་ཨ་རིའི་ཧ་བིར་སློབ་ཆེན་ལྷ་སྒྲུང་རིག་པའི་སློབ་གླིང་གི་གདན་འདྲེན་ཞུ་ཡིག་ཅིག་འབྱོར་བྱུང་། དེ་ནི་ངས་ཧ་བིར་སློབ་ཆེན་ལྷ་སྒྲུང་རིག་པའི་སློབ་གླིང་དུ་ཧི་མ་ལ་ཡིའི་ཆོས་ལུགས་དབྱངས་རོལ་གྱི་སྐོར་གྱེར་དབྱངས་དང་སྦྲགས་ནས་སློབ་ཁྲིད་ཅིག་བྱ་རྒྱུ་དེ་རེད། ཡིན་ན་ཡང་དེའི་ནང་དུ། ང་ཚོའི་རེ་བར་འདི་གའི་དགེ་སློབ་རྣམས་ཀྱིས་ཐེངས་འདིར་ཁྱེད་ཀྱི་སློབ་ཁྲིད་བརྒྱུད་དེ། ད་ལྟའི་བར་ནུབ་ཕྱོགས་སུ་ཆ་རྒྱུས་ཧ་ཅང་ཉུང་བའི་གོམས་སྲོལ་དེར་རྒྱུས་ལོན་ཐེངས་ཤིག་བྱ་ཐུབ་ན་བསམས་ཡོད་ལ། བོད་དང་བོད་བརྒྱུད་ནང་བསྟན། དེ་བཞིན་མིའི་རིགས་ཀྱི་རོལ་དབྱངས་རིག་པ་དང་འབྲེལ་བའི་རིག་ཚན་ཁག་གི་དགེ་སློབ་རྣམས་ཀྱིས་ཀྱང་མོས་གུས་ཐོབ་པར་ཡིད་ཆེས་ཡོད་པར་མ་ཟད། གང་གི་དེའི་སྐོར་གྱི་ཆེད་ལས་ཤེས་བྱ་དང་གྱེར་རྩལ་སོགས་ཀྱིས་ང་ཚོར་བོད་ཀྱི་སྲོལ་རྒྱུན་རིག་གནས་ཐད་བག་ཆགས་མི་དམན་པ་ཞིག་འཇོག་ངེས་ཡིན་ཞེས་ཚིག་ཁ་ཤས་ཤིག་བྲིས་འདུག །འདི་དག་ང་སྒེར་ལ་བརྩི་བཀུར་བྱས་པ་ཞིག་མ་ཡིན་པར་འདིས་རིག་གནས་འདིའི་རིན་ཐང་ལ་བརྩི་མཐོང་བྱས་པ་ཞིག་རེད། དེ་འདྲ་བྱས་དུས་ངས་བཤད་འདོད་པ་གཙོ་བོ་དེ་གང་ཡིན་ཟེར་ན། གོང་དུ་བཤད་པ་བཞིན་མི་རིགས་གཞན་དང་། རྒྱལ་ཁབ་མི་འདྲ་བའི་མི་མང་བོ་ཞིག་གིས་འདི་ལ་གདེང་འཇོག་དེ་ཙམ་ཞིག་བྱེད་པའི་རྒྱུ་མཚན་གཙོ་བོ་དེ། གཅིག་ནས་མི་རིགས་གང་ཡིན་ཡང་སོ་སོའི་ས་གནས་ཀྱི་ཐུན་མོང་མ་ཡིན་པའི་རིག་གནས་དེ་དག་མི་རིགས་རང་གི་སྐད་ཡིག་དང་འབྲེལ་ནས་ཞིབ་འཇུག་བྱས་པ་ཡིན་ན། དེ་ལ་ཁྱད་ཆོས་དམིགས་བསལ་མང་པོ་ཡོད་པ་དང་། དེ་དག་མིའི་འཚོ་བའི་ཁྲོད་དགོས་གལ་ཆེ་བ་དང་། ད་དུང་བརྗོད་བྱའི་ཐད་རིན་ཐང་ཡོད་ན་སྐད་དང་ཡིག་རིགས་གང་ཞིག་ལའང་འབྲེལ་བ་ཡོད་མིན་ཙམ་གཙོ་བོ་མ་ཡིན་པ་གསལ་བོར་ཤེས་ཐུབ། ཐུགས་རྗེ་ཆེ། །