ངན་ཁྲག་འཕེལ་བའི་ནད་ཅེས་པ་ནི་ལུས་ཟུངས་བདུན་གྱི་ཡ་གྱལ་དུ་གྱུར་པ་ཁ་ཟས་ཀྱི་དྭངས་མ་ལས་བྱུང་ཞིང་ཁྲག་ཅེས་ཁ་དོག་དམར་ལ་བརླན་གཤེར་དང་དྲོད་ཀྱི་རྟེན་དུ་གྱུར་པ་འགྲོ་བའི་སྲོག་འཚོ་བར་བྱེད་པ་དེ་ཉིད་ངོ་བོ་འགྱུར་ཏེ་རང་གི་ལྡང་ཚད་སྙིམ་པ་བདུན་ལས་བསྒལ་ནས་ལུས་སྲོག་ལ་འཚེ་བར་བྱེད་པའི་ནད་ཅིག་ཏེ་ནད་འདི་གངས་ལྗོངས་ས་མཐོའི་ཁུལ་དུ་རྒྱུན་མཐོང་གི་ནད་ཅིག་ཡིན་ལ། ལྷག་པར་དུ་མཚོ་འཕགས་སྨི་4500ཡན་ལ་ཡུན་རིང་འཚོ་བ་སྐྱེལ་མཁན་གྱི་ཁྲོད་དུ་ནད་མང་ཞིང་དེ་དག་གི་ནང་ནས་ཀྱང་ནད་འདི་བུ་མོ་ལས་བུ་ན་མང་བ་དང་ལོ་ཚོད་དབང་དུ་བྱས་ན་ལོ་30ཡན་ལ་ཆེས་ན་མང་བའི་ནད་གཞི་ཞིག་ཡིན་ལ་བཅོས་དཀའ་ཞིང་ཚེ་སྲོག་ལ་མྱུར་དུ་རྒོལ་བའི་ནད་རིགས་ཤིག་ཀྱང་ཡིན།
དང་པོ། རྒྱུ་རྐྱེན།
ངན་ཁྲག་འཕེལ་བའི་ནད་ཀྱི་གཙོ་བོའི་རྒྱུ་རྐྱེན་ས་བབས་མཐོ་ཞིང་ངད་ཅན་གྲང་བའི་ཡུལ་ལ་ཡུན་རིང་སྡོད་དགོས་པ་དང་ལྕི་སྣུམ་རིགས་ཀྱི་ཟས་སྐོམ་བསྟེན་དྲགས་པས་ཕོ་བའི་མེ་དྲོད་ཀྱིས་འཇུ་མ་ཐུབ་པས་མ་ཞུ་བ་ལས་བྱུང་བ་སྟེ་རྒྱུན་ཟས་ཤ་དང་ཚིལ་མར་རུས་ཁུ་ཟ་སྣུམ། ལན་ཚྭ་ཆང་རག་སོགས་ཚྭ་སྐྱུར་རིགས། ཐ་མ། མ་གོམས་པའི་ཟས་དང་མི་འཕྲོད་པའི་ཟས། དུས་མིན་གྱི་ཟས། ལྷག་པར་དུ་སྣུམ་ཚིལ་ཅན་གྱི་བཟའ་བཏུང་གྲང་མོའི་རིགས་དང་རྙིང་པ། དེང་དུས་ཀྱི་བཏུང་བྱ་མངར་བསིལ་གྲང་མོ་རྒྱུན་དུ་འཐུང་རྒྱུར་དགའ་བ་ལས་ཆུ་སྐོལ་དང་སྐོམ་ཚ་པོའི་རིགས་འཐུང་རྒྱུར་དགའ་པོ་མེད་པ། སྤྱོད་ལམ་རྒྱུན་དུ་ལྟོ་འབྲངས་པར་ཟ་བ་ལས་ལུས་འགུལ་སྐྱོད་ཆེར་མི་བྱེད་ཅིང་བསིལ་བའི་གནས་སམ་ངད་ཅན་གྲང་བའི་ཡུལ་དུ་ཡུན་རིང་འདུག་དགོས་པ་སོགས་ཀྱིས་ཕོ་བའི་མེ་དྲོད་རྣམ་གསུམ་དང་། ལུས་ཟུངས་རང་རང་ལ་གནས་པའི་ཆ་ཤས་ཀྱི་མེ་དྲོད(བཤད་རྒྱུད་ལུས་ཀྱི་མཚན་ཉིད་ལས། དྭངས་མ་ལུས་ཟུངས་རང་རང་མེ་དྲོད་ཀྱིས། སྨིན་པར་འགྱུར་ཏེ་དྭངས་མ་ཕོ་བ་ནས། དྭངས་མ་ལེན་པའི་རྩ་དགུ་མཆིན་ལམ་བརྒྱུད། མཆིན་པའི་གནས་འགྱུར་ཁྲག་འགྱུར་ཁྲག་ལས་ཤ།།ཤ་ལས་ཚིལ་འགྱུར་ཚིལ་ལས་རུས་པར་འགྱུར)རྣམས་ཀྱིས་བྱེད་ལས་ཉམས་ཏེ་མྱགས་བཞུ་དྭངས་སྙིགས་ཚུལ་བཞིན་ཕྱེ་མ་ཐུབ་པ་ལས་ངན་ཁྲག་འཕེལ་བའི་ནད་འདི་འབྱུང་བ་ནི་མན་རྒྱུད་མ་ཞུའི་ལེའུ་ལས། བད་མཁྲིས་རླུང་གིས་འཇུ་བའི་མཐུ་ཉམས་ཏེ། མྱགས་བྱེད་བད་ཀན་དག་གིས་མྱགས་མ་ནུས། འཇུ་བར་བྱེད་པའི་མཁྲིས་པས་འཇུ་མ་ནུས། མེ་མཉམ་རླུང་གིས་དྭངས་སྙིགས་འབྱེད་མ་ནུས། དེ་ལས་མ་ཞུ་ཞེས་སུ་བཤད་པ་ཡིན། ཞེས་དང་ཡང་དེ་ཉིད་ལས། མེ་མཉམ་རླུང་གིས་དྭངས་སྙིགས་མ་ཕྱེད་པའི། སྙིགས་མ་དྭངས་མའི་རྩ་མིག་ཤོར་བ་ཡིས། ཡུན་རིང་མཆིན་གནས་དྭངས་མ་མ་ཞུ་ཡིན། ཞེས་དང་ཡང་སྟག་ཚང་ལོ་ཙཱ་བས། མཆིན་གནས་དྭངས་མ་མ་ཞུ་བས། དྭངས་སྙིགས་འདྲེས་པས་ཁྲག་མང་འཕེལ། ཁྲག་ངན་ཞེས་སུ་བཤད་པ་ཡིན། ཞེས་དང་མན་རྒྱུད་སྨུག་ལེར། ཕོ་བར་མ་ཞུ་དེ་ཡིས་བད་ཀན་འཕེལ། མེ་མཉམ་རླུང་དང་འཇུ་བྱེད་མཐུ་ཉམས་པས། དྭངས་སྙིགས་མ་ཕྱེད་མཆིན་པའི་གནས་སུ་ཤོར། ཟུངས་སུ་མ་གྱུར་ཁྲག་ངན་མཆིན་པར་རྒྱས། ཞེས་གསུངས་པ་བཞིན་ཁ་ཟས་གང་ཟོས་པ་དེ་དག་ཕོ་བའི་མེ་དྲོད་སོགས་ཀྱིས་མྱག་བཞུ་དྭངས་སྙིགས་ཚུལ་བཞིན་ཕྱེ་མ་ཐུབ་པས་དྭངས་མ་སྐྱོན་ཅན་དེ་ཉིད་མཆིན་པའི་གནས་སུ་ཤོར་ཏེ་ཡུན་རིང་གནས་དེར་ལུས་པ་ལས་ངན་ཁྲག་འཕེལ་བའི་ནད་འདི་བྱུང་བ་ཡིན།
གཉིས་པ། ངན་ཁྲག་འཕེལ་བའི་རྟགས།
ངན་ཁྲག་འཕེལ་བའི་རྟགས་སུ་མིག་སྤྲིན་དམར་ཞིང་། མཁུར་ཚོས་དང་། སེན་མོ། ལྕེ་མཆུ། སོ་རྙིལ་བཅས་ཐོག་མར་མདོག་དམར་བ་ལས་རིམ་བཞིན་སྨུག་ནག་ཏུ་འགྱུར་འགྲོ་བ། ལུས་ཉོབ་པའམ་ལུས་ཅུང་ཟད་འགུལ་ཚེ་ངལ་བས་དུབ་པ། རྔུལ་མང་ཞིང་མཐིལ་བཞི་ལ་ཚ་འཁྱུག་འབྱུང་བ། སྐད་འགག་པ། ཟས་ལ་དང་ག་མེད་ཅིང་གཉིད་ཡེར་བ། སྣ་ཁྲག་དོན་པ། རོ་སྟོད་དང་མཇིང་པ་མགོ་བོར་ན་ཟུག་ཡོད་པའམ་མི་བདེ་བ། སྙིང་མི་བདེ་བ། རྒྱབ་མདུན་སྦྲགས་ནས་ན་བ། རྐང་ལག་སྦྲིད་པ། དམར་འཐོམས་ལང་བ། ས་བབ་མཐོ་བའི་གནས་སུ་ཕྱིན་ན་མགོ་དང་ལྟག་པ་ན་ཞིང་དབུགས་ཧལ་ལ་འགྱེལ་གྲབས་བྱེད་པ། ནད་འདི་གསར་པའི་དུས་སུ་རྩ་འབུར་ལ་འདྲིལ་བར་འཕར་བ། དྲི་ཆུའི་མདོག་སེར་ལ་དམར་ཉམས་ཡོད་པ། རླངས་པ་ཆེ་ལ་ལྦུ་བ་ཡལ་མགྱོགས་པ་ཀུ་ཡ་འཐུག་པ། ལྷག་པར་ན་ཚོད་དར་མ་རྣམས་ཀྱི་མཆིན་མཁྲིས་རྩ་དྲག་རྒྱས་འཕར་བ་དང་ལོ་རྒན་པ་ཁ་ཅིག་གི་སྙིང་རྩར་སྡོད་འཐེན་ཡང་ཡོང་གི་འདུག །རྙིང་ནས་རྩ་གཏིང་དུ་བྱིང་ཡང་གྲིམས་པ། དྲི་ཆུའི་མདོག་དམར་སྨུག་ལ་ལྦུ་བ་སོབ་པ།
གསུམ་པ། བཅོས་ཐབས།
ངན་ཁྲག་གཅོག་རྒྱུ་དང་། ཕོ་མཆིན་གྱི་ནུས་པ་གསོ་རྒྱུ། བླ་གཉན་གྱི་ནད་བཅོས་རྒྱུ།
༡ སྨན།
སྤྱིར་ཞོགས་པ་ཕོ་མཆིན་སྨན་ཟླ་བདུད། ཟླ་བདུད་ཁ་ཚར་ཅན། ཟླ་ཤེལ། ཞི་དྲུག །མན་བསིལ། སྨུག་གཡུལ། ལྟ་བུ། ཉིན་གུང་དང་དགོང་མོར། ཁྲག་གི་སྨན་སྐྱུ་རུའི་ཆིག་ཐང་དང་། སྐྱུ་རུ་༢༥ ཙན་དན་༡༨ སྟར་བྱང་། རྒ་ལོ་སྨན་དམར། མཛོ་ཐང་ཁ་ཚར། སྐྱུ་རུའི་འཕྲུལ་འཁོར། ལྟ་བུའི་ཁྲག་སྨན་རྣམས་སྲོ་ལོ་དམར་པོའི་ཐང་གི་སྨན་རྟ་བྱས་ན་ཡག་པོ་ཡོད་ཚུལ་གསུངས་པ་བཞིན་བྱས་ན་ནུས་པ་མྱུར་ཞིང་ཕན་ཐོགས་ཆེ། མགོ་དང་ལྟག་པ་ན་ཞིང་མགོ་ཡུ་འཁོར་ལ་རྐང་ལག་སྦྲིད་སྐབས། བྱུར་དམར་༢༥ བྱུར་དམར་༧༠ ཁྲ་མན་མང་སྦྱོར། རཏྣ་བསམ་འཕེལ། ལོ་ན་ཆེ་བར་ཨ་གར་༡༧དང་བླ་མེད་ཨ་གར་༢༠ བར་མཚམས་བསམ་འཕེལ་ནོར་བུ། བསམ་འཕེལ་༨ མཚན་གཉིད་ཡེར་བར་འཆི་མེད་ཨར་༨ དྲང་སྲོང་ཨར་༨ ཁྲག་འཁོར་རྒྱུག་མ་ཐུབ་པས་མགོ་དང་མཇིང་པ་ན་བར། རིལ་པད། བདུད་རྩི་༡༡ ལུག་ཀླད་རིལ་བུ། དྲེག་གིས་ལག་པའི་གྲུ་མོ་དང་རྐང་པའི་མཐེབ་མོ་ན་བ་སོགས་བྱུང་ཚེ་དྲེག་ཐང་དང་མགྲིན་མཚལ་༢༥སོགས་མདོར་ན་ནད་པའི་གནས་བབས་དང་བསྟུན་ནས་སྨན་བཅོས་བྱེད་དགོས། ཁྲག་སྨན་ཡུན་རིང་བཏང་བས་མཁལ་མ་དང་རྐེད་པ་ན་ཞིང་དྲོད་མི་ཁུག་པ་གཅིན་ཁ་སྙི་བ་སོགས་བྱུང་ན་མཁལ་མའི་སྨན་ལྷ་ལུང་དང་ཨ་བྲག་༡༩ གོ་ཡུ་༢༨བཏང་ན་ཕན་ནུས་ཆེ། མ་གཞི་ཁྲག་གི་ནད་གཞི་ཅུང་བདེ་རུ་ཕྱིན་དུས་དྲོད་སྨན་སེ་འབྲུ་༥དང་དྭངས་གནས་ལྟ་བུ་ཞོགས་དགོང་བར་མཚམས་སུ་བཏང་ན་ཁྲག་ནད་སླར་མི་འཕར་བ་དང་ཕོ་བའི་མེ་དྲོད་སྲུང་བར་ཕན་པ་ཡོད་པར་མ་ཟད་མཁལ་རྐེད་གྲང་གཞིའི་ནད་མི་འབྱུང་བར་ཕན། འོན་ཀྱང་སེ་འབྲུ་ཉི་དཀྱིལ་ལྟ་བུ་དྲོད་སྨན་ཤུགས་ཆེན་པོ་བཏང་ན་སྐེ་བསྡམས་ཤིང་སྐད་འགགས་པ། སྙིང་གཡུགས་པ། མགོ་ན་བ་སྟོད་བརྒྱངས་ཤིང་གཟེར་བ་སོགས་ཀྱི་མངོན་རྟགས་ཡོང་གི་ཡོད་པས་དྲོད་སྨན་ཐལ་མ་དྲགས་པ་གལ་ཆེ། ཁྲག་གར་པོ་ཆགས་ཏེ་ཁྲག་གི་འཁོར་རྒྱུགས་ཞན་པས་ནད་པ་མང་ཆེ་བ་གློ་སྙིང་མི་བདེ་ཞིང་སྐྱ་རྦབ་ཀྱི་ནད་གཞི་ཡོང་གི་འདུག་པར་ཨར་༨ ཆུ་བརྒྱུར་བཏང་ན་ཕན་ནུས་ལེགས།
༢ དཔྱད།
ཕྱི་རྒྱུད་མཇུག་དོན་ལས། ཁྲག་ནད་དཔྱད་མཆོག་ཀུན་ལ་གཏར་ག་མཆོག །ཅེས་དང་ཇི་སྐད་དུ། ཁྲག་ཚད་ཆུ་ལྟར་ཁོལ་བ་ལ། ག་བུར་ཟས་སུ་ཟ་བ་ལས། ལྗི་བ་ཙམ་ཞིག་གཏར་བ་བསྔགས། ཞེས་དང་བྱེ་བ་རིང་བསྲེལ་ལས། ནད་ཁྲག་དྭངས་མའི་གནས་སུ་ཤོར་བས་ན། ལུས་ཟུངས་གནོད་ཅིང་ནད་ཀྱི་སྟོབས་སྐྱེད་ཕྱིར། གང་ཉེའི་རྩ་ནས་ཁྲག་ངན་ཤེད་སྨད་པས། མི་ངན་རྟེན་བྲལ་གནོད་མི་ནུས་དང་མཚུངས། ཞེས་གསུངས་པ་བཞིན་ནད་འདིར་ཁྲག་གཏར་ན་སྲོག་ལ་ཉེན་ཁ་མི་འཕྲད་པར་ཕན་ཐོག་ཧ་ཅང་ཆེ་ལ་སྟོན་དཔྱིད་གཉིས་ལྟ་བུ་ཁྲག་གཏར་བའི་དུས་ཡིན་རུང་ནད་འདིར་ཁྲག་སྔ་ཙམ་གཏར་ཐུབ་ན་ལེགས་པས་རུ་ཐུང་གཡས་པ་གཏར་བའམ་མགོ་མི་བདེ་བ་ཡོད་དུས་དཔྲལ་རྩ་དང་གསེར་དངུལ་མདུང་ལྟ་བུ་ན་སའི་གནས་དང་གང་ཉེ་གང་འཚམས་གཏར་ན་ལེགས་པ་སྟེ་ཆ་ལག་བཅོ་བརྒྱད་ལས། རྒྱབ་ཏུ་གཟེར་བ་དྲུག་མགོ་སྒང་རྩ་གཏར། བྲང་དུ་གཟེར་ན་སྣོད་ཁ་གཏར། ཕོ་མཆིན་གཟེར་བ་དྲུག་མགོ་སྒང་རྩ་གཏར། བྲང་དུ་གཟེར་ན་སྣོད་ཁ་གཏར། ཕོ་མཆིན་གཟེར་ན་རུ་ཐུང་གཏར། མཁལ་རྐེད་གཟེར་ན་བྱིན་གཞུག་གཏར། རྒྱུ་ལོང་གཟེར་ན་ལོང་རྩ་གཏར། མགོ་བོ་གཟེར་ན་དཔྲལ་རྩ་གཏར། ཚ་སྟོབས་ཆེ་ན་རྩེ་ཆུང་གཏར)ཞེས་གསུངས་པ་བཞིན་གཏར་དགོས་པ་དང་ཁྲག་སྟོབས་ཤིན་ཏུ་རྒྱས་སྐབས་གཏར་ན་ཕན་ཆེ་བ་མངོན་ཡང་ཁྲག་ཆོད་དཀའ་བའི་ཉེན་ཁ་ཡོད་པའང་ཤེས་དགོས། སྤྱིར་ཁྲག་གི་དབྱུང་ཚད་ཀྱང་ན་ཚོད་ལུས་ཟུངས་ནད་ཁམས་ཁྲག་པྲ་བཅས་ལ་བརྟག་ནས་འདོན་དགོས་པ་དང་དབྱུང་ཚུལ་ཐད་རྙོག་མ་དྲུང་འབྱིན་ལས། འབྱུང་དཀའ་ཐིགས་པར་བསགས་པའི་དྲེ་གང་བས། དྲག་འབབ་ཤར་གྱིས་བྱུང་བའི་ཕུལ་གང་དགའ། ཞེས་གསུངས་ལྟར་གལ་ཆེ་ཞིང་ནད་པ་ཕལ་མོ་ཆེར་མང་གཏར་ཉུང་དབྱུང་བྱས་ན་ཕན་པ་ཆེ་བ་ལས་ཐེངས་གཅིག་ལ་ཁྲག་དབྱུང་དྲགས་པས་ལུས་ལ་དྲོད་མི་ཁུག་པ་འབྱུང་བའམ་ཅུང་ཟད་ལས་མ་ཐོན་ཚེ་ཕན་པའང་ཆུང་བ་མངོན། དེ་ལྟར་ཁྲག་གཏར་བའི་ཕན་ཡོན་ལ་གཙང་སྟོད་ཟིན་ཐིག་ལས། ཕན་ཡོན་ཁྲག་ནད་ཀུན་ལས་གྲོལ། མདོག་དང་དབང་པོ་གསལ་ཞིང་དབང་པོའི་ཡུལ། འདོད་ཅིང་ཟས་འཇུ་ཤུགས་ཀྱང་བདེ་བར་འགྱུར། བདེ་དང་ལྡན་ཞིང་སྟོབས་རྒྱས་ཕུན་སུམ་ཚོགས། མིའི་ནད་ཁྲག་དག་ཅིང་འཕྲལ་གྱི་ནད་སེལ་བྱེད། ཅེས་གསུངས་པ་ལྟར་ཁྲག་ཡག་པོ་གཏར་ཐུབ་ཚེ་ལུས་ཁམས་ཀྱི་ན་ཟུག་ཆོག་ཅིང་ཁམས་དྭངས་ལ་གདོང་དང་མཆུ་ཏོ་སོགས་ཀྱི་པགས་མདོག་ཡག་ཏུ་འགྲོ་བ་དང་ཀླད་ཁྲག་འཁར་འགག་སོགས་མི་ཡོང་བའི་སྔོན་འགོག་གི་བཅོས་ཐབས་ཡག་ཤོས་ལྟ་བུར་རིང་ན་ལོ་གསུམ་ཐུང་ན་ལོ་གཅིག་ཕན་པ་ཡོད་པ་མཐོང་། རོ་སྟོད་རྒྱང་ཡོང་བའམ་གཟེར་ཟུག་ཡོད་སར་མེ་བུམ་རྒྱབ་ན་སྟབས་བདེ་ཞིང་འཕྲལ་ཟུག་གཅོག་པར་མ་ཟད་ཟླ་དྲུག་བདུན་ལ་ཕན་པ་འབྱུང་།
ཁྲག་གར་པོ་ཆགས་ཏེ་འཁོར་རྒྱུགས་ཞན་པར་བདུད་རྩི་ལྔ་ལུམས་སྟེང་གསོ་བྱའི་ནད་གཞི་སོགས་དང་བསྟུན་པས་ཁ་ཚར་ཅན་གྱིས་ལུམས་རྒྱབ་ནའང་ཕན་པ་ཆེ། ཁྲག་གར་པོ་ཆགས་ཏེ་འཁོར་རྒྱུགས་ཞན་པ་དང་།ལུས་ལ་དྲོད་མི་ཁུག་ཅིང་རུས་ཚིགས་ན་ཞིང་གཅིན་ཁ་སྙི་བའི་ནད་པར་ཆུ་ཚན་བརྒྱབ་ན་ཕན་པ་ཡོད་ཀྱང་རྒྱག་སྟངས་དང་དུས་ཡུན་ཚོད་འཛིན་ཡག་པོ་མ་བྱུང་ཚེ་ཉེན་ཁ་ཆེ་ལ་ལྷག་པར་སྙིང་གི་ནད་གཞི་ཡོད་ན་དེ་ལས་ཀྱང་ཉེན་ཁ་ཆེ་བ་ཡོད་པས་ལུམས་དང་ཆུ་ཚན་རྒྱག་དུས་གཟབ་གཟབ་གནང་རྒྱུ་གལ་ཆེ། ནད་འདིར་དབྱང་རླུང་རྔུབས་ན་སྐབས་ཕྲལ་ཕན་ཐོགས་ཆེ།
༣ ཟས་སྤྱོད།
ཟས་དང་སྐོམ་ཚ་སྐྱུར་བསྟེན་དྲགས་པའམ་མ་གོམས་པའི་ཟས་དང་མི་འཕྲོད་པའི་ཟས་དུས་མིན་གྱི་ཟས། ཤ་ཚིལ་ཅན་དང་། ཤ་སྐམ། གྲང་ཟས་ཟ་རྒྱུ་རྣམས་སྤང་སྟེ། དུས་རྒྱུན་ཆུ་སྐོལ་མང་ཙམ་བཏུང་བ་དང་།སྣུམ་མེད་ཀྱི་སྐྱ་ཟས་དང་ཚལ་རིགས། ཤིང་ཏོག་མང་ཙམ་ཟ་དགོས། སྤྱོད་ལམ་རྒྱུན་དུ་ཞོགས་དགོང་ངམ་ལྗོན་ཤིང་གི་བསིལ་གྲིབ་འོག་ལྟ་བུར་ལུས་མ་རྔུལ་ཙམ་འགུལ་སྐྱོད་བྱ་རྒྱུ་གལ་ཆེ། ཉི་མ་དྲོ་སྐབས་ཤེལ་ཁང་ནང་ཡུན་རིང་སྡོད་རྒྱུ་མེད་ལ་ཉི་ཚན་ནང་འགུལ་སྐྱོད་ཐལ་དྲགས་པ་དང་དྲག་ཤུལ་གྱི་ལས་དེ་ལས་ཀྱང་བྱ་རྒྱུ་མེད། ཉིན་གུང་གཉིད་ཉལ་བ་དང་ངད་ཅན་གྲང་བའི་ཡུལ་དུ་ཡུན་རིང་སྡོད་དྲགས་པ་སོགས་སྤང་དགོས། ལྷག་པར་དགོང་ཟས་ལ་ཤ་རིགས་ལྟ་བུ་བཅུད་ཅན་རིགས་དང་སྣུམ་ཅན་རིགས་ཆེར་ཟ་མང་མི་རུང་ལ་དགོང་ཟས་ཕྱི་མ་དྲགས་པར་སྔ་ཙམ་ཟོས་ཏེ་ཆུ་ཚོད་ཕྱེད་ཙམ་སོང་རྗེས་ལུས་སྦྱོང་དང་འགུལ་སྐྱོད་བྱ་རྒྱུ་ཧ་ཅང་གལ་ཆེ། ངན་ཁྲག་འཕེལ་བའི་ནད་འདི་ཡོད་པའི་ནད་པ་ས་བབས་ཇི་ཙམ་དམའ་སར་སླེབས་ན་གཟུགས་གཞི་དེ་ཙམ་བདེ་རུ་འགྲོ་བ་དང་ཡུན་རིང་གནས་དེར་བསྡད་ན་ནད་འདི་ཡང་རང་བཞིན་གྱིས་བདེ་རུ་འགྲོ་བའི་མངོན་རྟགས་ཡོང་བཞིན་ཡོད། །
（ཚེ་རིང་ཕུན་ཚོགས། བོད་ལྗོངས་ལྷ་ས་གྲོང་ཁྱེར་ཁྲེན་ཀོང་ཆུས་རིམས་འགོག་ཚོད་འཛིན་ལྟེ་གནས། འཇིགས་མེད་རྡོ་རྗེ། བོད་ཁམས་གསོ་རིག་སྨན་ཁང་།）