གཟན་རྩྭ་ལས་སྣོན་དང་བསྲེས་སྦྱོར་གྱི་ལག་རྩལ།

ས་བཅད་གཉིས་པ། གཟན་རྩྭ་སྔོ་བསྙལ།

（དེབ་སྔོན་མར་མཐུད）གཟན་རྩྭ་སྔོ་བསྙལ་ནི་རྩྭ་སྔོན་ཁ་དམ་པོར་སྦྱར་བའི་སྒྲིག་ཆས་ནང་ཉར་ཚགས་བྱས་ཤིང། དབྱང་བྲལ་རང་བཞིན་གྱི་འོ་སྐྱུར་འབུ་སྲིན་བསྙལ་ནས་འོ་སྐྱུར་བྱུང་བར་བརྟེན། གཞན་པའི་འབུ་སྲིན་གྱི་སྐྱེ་འཕེལ་ལ་དམིགས་ནས་སོ་ཉར་གྱི་དམིགས་ཡུལ་འགྲུབ་པར་བྱེད་པ་ལ་ཟེར།

གཟན་རྩྭ་སྔོ་བསྙལ་ནི་སྲོལ་རྒྱུན་གྱི་ཉར་ཚགས་ལག་རྩལ་ཞིག་ཡིན་ཞིང་། དེར་དགེ་མཚན་མང་པོ་ཡོད་པས་ཡུན་རིང་བཀོལ་ཡང་གོ་ཆོད། ཕྱུགས་ལས་ཐོན་སྐྱེད་ཀྱི་འཕེལ་རྒྱས་དང་བསྟུན། རྩྭ་སྔོན་གྱི་མཁོ་ཚད་ཇེ་ཆེ་དང་སྤུས་ཚད་ཀྱི་རེ་བའང་ཇེ་མཐོར་སོང་ཡོད་པས། རྩྭ་སྔོན་བསྙལ་བའི་ལག་རྩལ་ལའང་དེར་མཐུན་གྱི་འགྱུར་བ་ཆེན་པོ་བྱུང་ཡོད། ཕྱི་རྒྱལ་དུ་ཐོག་མའི་སྔོ་བསྙལ་བྱེད་ཐབས་ལ་རྫས་སྦྱོར་གྱི་སྔོ་བསྙལ་བྱེད་ཐབས་དང་རྩྭ་ཤོག་སྔོ་བསྙལ་བྱེད་ཐབས་སོགས་བྱུང་ཡོད། དེར་བརྟེན། གཟན་རྩྭ་སྔོ་བསྙལ་བྱེད་པའི་ལན་གྲངས་ཇེ་མང་དུ་ཕྱིན་པ་དང་རྒྱུ་སྤུས་མཐོར་འདེགས་བྱུང་སྟེ། གསོ་སྤེལ་ལས་རིགས་ཁྲོད་གཞན་གྱིས་ཚབ་བྱེད་མི་ཐུབ་པའི་གཟན་ཆས་རིགས་ཤིག་ཏུ་གྱུར་ཡོད།

རང་རྒྱལ་གྱིས་དུས་རབས་20པའི་ལོ་རབས་50ནང་སྔོ་བསྙལ་གྱི་ལག་རྩལ་ཁྱབ་གདལ་དུ་བཏང་བ་ནས་བཟུང་། གཟན་རྩྭ་སྔོ་བསྙལ་ལ་འཕེལ་རྒྱས་ཅུང་ཆེན་པོ་བྱུང་། ཡིན་ནའང་དེའི་ཁ་གྲངས་དང་སྤུས་ཚད་ཀྱིས་ད་དུང་རང་རྒྱལ་གྱི་ཕྱུགས་ལས་འཕེལ་རྒྱས་ཀྱི་དགོས་མཁོ་སྐོང་མི་ཐུབ་པ་དང་། དར་རྒྱས་ཆེ་བའི་རྒྱལ་ཁབ་དང་བསྡུར་ན་ཁྱད་པར་ཆེན་པོ་ཡོད།

གཅིག གཟན་རྩྭ་སྔོ་བསྙལ་གྱི་དགེ་མཚན།

གཟན་རྩྭ་སྔོ་བསྙལ་ལ་དགེ་མཚན་མང་པོ་ཡོད་པ་ལས་གཙོ་བོ་གཤམ་གསལ་ལས།

1.གཟན་རྩྭའི་འཚོ་བཅུད་ལ་གྱོང་གུད་ཐེབས་ཚད་ཆུང་བ།

སྔོ་བསྙལ་ནི་སྔོ་ལྗང་ཅན་གྱི་གཟན་རྩྭ་བྲེགས་རྗེས་མྱུར་དུ་ཉར་ཚགས་བྱས་པ་ཡིན་པས་དེར་གྱོང་གུད་ཐེབས་པའི་ཚད་ཤིན་ཏུ་ཆུང་། ཉར་ཚགས་ཀྱི་གོ་རིམ་ཁྲོད། དབྱང་རླུང་མེད་པའི་ཆ་རྐྱེན་འོག་ཉར་ཚགས་ལེགས་པོ་བྱས་པའི་རྐྱེན་གྱིས་དབྱང་འགྱུར་དབྱེ་འབྱེད་ཀྱི་བྱེད་ནུས་ཞན། ཞིབ་འཇུག་དང་ལག་ལེན་ལྟར་ན། ཉར་ཚགས་ལེགས་པོ་བྱས་ཚེ། གཟན་རྩྭའི་འཚོ་བཅུད་ཀྱི་གྱོང་གུད་10%ལས་མི་བརྒལ་ཞིང་། རྩྭ་སྔོན་གྱི་འཚོ་བཅུད་སོར་འཇོག་བྱེད་ཐུབ།

2.རྩྭ་སྐྱའི་སྐབས་སུ་ཕྱུགས་ཟོག་ལ་རྩྭ་སྔོན་མཁོ་འདོན་བྱ་དགོས།

སྔོ་བསྙལ་བྱས་པའི་གཟན་རྩྭ་ལ་རྩྭ་སྔོན་གྱི་འཚོ་བཅུད་ཁྱད་ཆོས་ལྡན་པ་དང་། དུས་ཡུན་རིང་པོར་ཉར་ཚགས་བྱས་ཆོག་པའི་ཁྱད་ཆོས་ལྡན་པས་སྒོ་ཕྱུགས་ཀྱི་རྩྭ་སྔོན་གྱི་དགོས་མཁོ་སྐོང་ཐུབ། དེར་བརྟེན། གཟན་རྩྭ་སྔོ་བསྙལ་ནི་ཕྱུགས་ཟོག་ལ་རྩྭ་སྔོན་གྱི་མཁོ་འདོན་མ་ལག་བསྐྲུན་པའི་ལས་རིམ་གལ་ཆེན་ཞིག་ཡིན།

3.གཟན་རྩྭ་སྔོ་བསྙལ་བྱས་ན་ཟ་བདེ་བ་དང་འཇུ་ཚད་མཐོ།

དེར་འབུ་ཕྲ་རབ་བསྙལ་བ་ལས་དྲི་ཞིམ་འདྲེས་སྦྱོར་དངོས་རྫས་རིགས་མང་པོ་བྱུང་བ་དང་། ཆང་སྐྱུར་གྱི་དྲི་མ་ལྡན་པར་མ་ཟད། མཉེན་ཞིང་ཁུ་བ་མང་པས་ཕྱུགས་ཟོག་གི་གཟན་རྩྭ་བཟང་པོ་ཞིག་ཏུ་ངོས་འཛིན། དུས་མཚུངས་སུ་གཟན་རྩྭའི་ཚི་སྣ་དཀྱུས་མ་དབྱེ་འབྱེད་བྱེད་སླ་བ་དང་འཇུ་ཆོད་ཇེ་མཐོར་གཏོང་ཐུབ།

4.གཟན་རྩྭའི་འབྱུང་ཁུངས་རྒྱ་སྐྱེད་པ།

དུག་མེད་ནའང་དྲི་ངན་བྲོ་བའི་རྩི་ཤིང་འགའི་ཡལ་འདབ་སྔོ་ལྗང་ཡིན་དུས་ཕྱུགས་ཟོག་ཀྱིས་མི་ཟ་བ་དང་། ཡིན་ནའང་སྔོ་བསྙལ་བྱས་རྗེས་དྲི་མ་འགྱུར་སྲིད་པས་ཕྱུགས་ཟོག་གི་གཟན་ཆས་ལེགས་གྲས་ཤིག་ཏུ་འགྱུར་ངེས།

5.ཚད་གཞི་རེའི་ལྗིད་ཚད་ཀྱི་བོངས་ཚད་ཆུང་བ།

སྨི་རྒྱ་དཔངས་གྲུ་བཞི་མ་རེའི་ནང་གཟན་རྩྭ་མ་སྟོང་ཁེ་600 ~ 700སྔོ་བསྙལ་བྱེད་ཐུབ་པ་དང་།དེའི་ནང་མ་མཐའ་ཡང་རྫས་སྐམ་སྟོང་ཁེ་150ཡོད་ཅིང་། རྩྭ་སྐམ་ལས་ལྡབ་གཅིག་གིས་མང་།

6.གནོད་འབུ་དང་རྩྭ་ལྡུམ་གྱི་ས་བོན་རྩ་མེད་དུ་གཏོང་ཐུབ།

སྔོ་བསྙལ་བྱས་རྗེས་ལོ་ཏོག་མང་པོའི་གནོད་འབུའི་ཕྲ་ཕུང་དང་འབུ་སྒོང་། རྩྭ་ལྡུམ་གྱི་ས་བོན་སོགས་གསོན་དཀའ་པས་གཟན་རྩྭའི་རྒྱུ་སྤུས་ལ་ཁག་ཐེག་བྱེད་ཐུབ།

7.གཟན་རྩྭ་སྔོ་བསྙལ་བྱེད་པར་གནམ་གཤིས་ཀྱིས་ཤུགས་རྐྱེན་ཐེབས་ཚད་དམའ།

རྩྭ་སྐམ་བསྲེས་སྦྱོར་བྱེད་པར་གནམ་གཤིས་ཀྱིས་ཤུགས་རྐྱེན་ཆེན་པོ་ཐེབས་པ་ཡིན། ཡིན་ནའང་སྔོ་བསྙལ་གཟན་ཆས་ལ་འོས་འཚམ་གྱིས་བཀོད་སྒྲིག་བྱས་ན། དེའི་རྒྱུ་སྤུས་ལ་གནོད་པ་མི་ཐེབས་པས་ཆར་འབབ་པའི་དུས་སུའང་བསྲེས་སྦྱོར་བྱས།

གཉིས། སྔོ་བསྙལ་གྱི་རྩ་བའི་རིགས་པ།

རང་བྱུང་ཁམས་སུ་འབུ་ཕྲ་རབ་མང་པོ་ཡོད། དེ་ལས་ལ་ལ་ནི་ཕྱུགས་ཟོག་ལ་ཕན་ཆེ་བ་སྟེ། དཔེར་ན་སྐྱུར་འབུ་དང་འོ་སྐྱུར་འབུ་སོགས་ལྟ་བུ། ཡང་ལ་ལ་ནི་ཕྱུགས་ཟོག་ལ་གནོད་ཆེ་བ་སྟེ། དཔེར་ན། རུལ་འབུ་དང་གནོད་འབུ། གཡའ་འབུ་སོགས་ལྟ་བུ། དེ་ན་རྩྭ་སྔོན་བསྙལ་བའི་གོ་རིམ་ནི་འོ་སྐྱུར་འབུ་འགུལ་སྐྱོད་བྱེད་པར་ཕན་པའི་དབྱང་རླུང་མེད་པའི་ཁོར་ཡུག་བསྐྲུན་ནས་རྩྭ་སྔོན་ཞུ་ཐུབ་པའི་མངར་ཆའི་རིགས། འོ་སྐྱུར་དང་བཅུད་ལྡན་སྐྱུར་རྫས་གཞན་དུ་འགྱུར་བར་ཆ་རྐྱེན་བསྐྲུན་པ་ཡིན། རྩྭ་སྔོན་བསྙལ་རྗེས་ཐོག་མར་རྩི་ཤིང་ཕྲ་ཕུང་གིས་ད་དུང་མུ་མཐུད་དུ་དབུགས་འབྱིན་རྔུབ་བྱས་ཏེ་བཅུད་ལྡན་རྫས་ལ་དབྱང་འགྱུར་བྱུང་བ་ལས་དྲོད་རྒྱས་པར་མ་ཟད། དབྱང་རླུང་མེད་པར་གྱུར་བའི་དུས་མཚུངས་སུ་རྩི་ཤིང་གི་ཕྲ་ཕུང་དེ་འཕྲུལ་ཆས་ཀྱིས་བཙིར་གནོན་བྱས་པར་བརྟེན། ཞུ་ཐུབ་པའི་མངར་ཆའི་རིགས་ཀྱི་བཅུད་རྫས་ཕྱིར་བཏོན་པ་དང་། དེས་འབུ་ཕྲ་རབ་ལ་འཚོ་བཅུད་མཁོ་སྤྲོད་བྱེད་ཐུབ། དྲོད་ཚད་འཕར་བ་དང་བསྟུན་ནས་འབུ་ཕྲ་རབ་མྱུར་དུ་སྐྱེ་འཕེལ་བྱུང་བ་དང་། དབྱང་རླུང་ཡང་དེ་མ་ཐག་ཟད་ངེས། དབྱང་རླུང་ལ་བརྟེན་པའི་འབུ་ཕྲ་རབ་འགའ་སྟེ། རུལ་འབུ་དང་གཡའ་འབུ་སོགས་ཀྱི་འགུལ་སྐྱོད་ནུས་པ་ཇེ་ཞན་དུ་འགྱུར་བའམ། ཡང་ན་འགུལ་སྐྱོད་ཀྱི་མཚམས་འཇོག་ཀྱང་སྲིད། ཡིན་ནའང་དབྱང་རླུང་བྲལ་བའི་འབུ་ཕྲ་རབ་ཀྱི་འགུལ་སྐྱོད་ཀྱིས་འོ་སྐྱུར་མང་པོ་བསྐྱེད་ཐུབ། རྩྭ་སྔོན་ཉིན་17 ~ 21ལ་བསྙལ་བ་དང་PHགྲངས་ཚད་4.0ཡས་མས་སུ་ཆག་སྐབས། འོ་སྐྱུར་འབུ་ཡིས་ཀྱང་འགུལ་སྐྱོད་བྱེད་མཚམས་བཞག་ནས་གཟན་རྩྭ་ཉར་ཚགས་བྱེད་པར་ཕན་པའི་འཚོ་བཅུད་བསྐྲུན་ཐུབ།（མུ་འགོད）