སིང་གྷ་ལ། ཧིན་རྡུ་རྒྱ་མཚོ་སྟེང་གི་མུ་ཏིག

སིང་གྷ་ལ་དམངས་གཙོ་སྤྱི་ཚོགས་རིང་ལུགས་སྤྱི་མཐུན་རྒྱལ་ཁབ་སྟེ་བསྡུས་མིང་ལ་སིངྒ་ལ་ཞེས་འབོད་པ་ནི་ཧིན་རྡུ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཅིག་ཡིན། ནུབ་བྱང་གི་མཚམས་ཕེལ་ཁི་མཚོ་འགག་དང་རྒྱ་གར་དང་ཉེ་བར་བཅར་ཞིང་ལྷོ་རྒྱུད་སའི་གོ་ལའི་དམར་ཐིག་དང་ཉེ། སིང་གྷ་ལའི་གནམ་གཤིས་ནི་ཚ་ཁུལ་དུས་རླུང་གནམ་གཤིས་ཀྱི་ཁོངས་སུ་གཏོགས་ཤིང་། དམར་ཐིག་དང་ཉེ་བས་དབྱར་དགུན་སྟོན་དཔྱིད་ལ་ཁྱད་པར་མེད། སིང་གྷ་ལའི་ས་དབྱིབས་ལ་དཀྱིལ་དབུས་མཐོ་ཞིང་ཕྱོགས་བཞིའི་མཚོ་མཐའ་དམའ་བའི་ཁྱད་ཆོས་ལྡན། རྒྱལ་ཁབ་ཡོངས་སུ་ཞིང་ལས་དང་ཉ་ལས་ཀྱི་འཕེལ་རྒྱས་མགྱོགས་ཤིང་ཆུའི་ཐོན་ཁོངས་ཕུན་སུམ་ཚོགས། སིང་གྷ་ལ་ནི་ཧིན་རྡུ་རྒྱ་མཚོའི་བྱང་རྒྱུད་ཀྱི་ཤར་ནུབ་ཀྱི་མཚོ་ལམ་གལ་ཆེན་དུ་གནས་པས། ཧིན་རྡུ་རྒྱ་མཚོའི་བཞི་མདོ་དང་ཤར་ཕྱོགས་ཀྱི་བཞི་མདོ་ཞེས་པའི་མཚན་སྙན་བསྩལ་ཡོད།

སིང་གྷ་ལའི་ཞིང་ལས་ནི་གཙོ་བོ་དཔལ་འབྱོར་ལོ་ཏོག་ལ་བརྟེན་ཡོད་པ་དང་། ཇ་ལོ་དང་འགྱིག་ཤིང་།བེ་ཏ་གསུམ་ནི་སིང་གྷ་ལའི་ནོར་བུ་གསུམ་ལ་ངོས་འཛིན། སྐྱེ་དངོས་དེ་གསུམ་གྱིས་རྒྱལ་ཁབ་ཀྱི་དཔལ་འབྱོར་འཕེལ་རྒྱས་ཁྲོད་གདུང་འདེགས་ཀྱི་ཀ་བ་ལྟ་བུའི་ནུས་པ་ཐོན་ཡོད་པ་དང་། འདེབས་འཛུགས་རྒྱ་ཁྱོན་གྱིས་རྒྱལ་ཡོངས་ཀྱི་ཞིང་སའི་60%ཡན་ཟིན། གཞན་ཆུ་འབྲས་ཀྱི་ཐོན་ཚད་ཤིན་ཏུ་མཐོ་བས། ཤར་ཕྱོགས་ཀྱི་འབྲུ་མཛོད་ཅེས་པའི་མཚན་སྙན་ཡོད།

སིང་གྷ་ལའི་ཕྱི་སྣོད་ཀྱི་བཀོད་པ་མཛེས་ཤིང་ནང་བཅུད་ཀྱི་བསོད་ནམས་ལེགས་པས་ཧིན་རྡུ་རྒྱ་མཚོའི་སྟེང་གི་མུ་ཏིག་རྡོག་གཅིག་དང་ཨེ་ཤ་ཡའི་མེ་ཏོག་ལྡུམ་ར་སོགས་ཀྱི་མཚན་སྙན་ཡོད་ཅིང་། ས་དགེ་བཅུད་འཛོམས་ཀྱི་གནས་མཆོག་འདིར་འབྱམས་ཀླས་པའི་རྒྱ་མཚོ་དང་ཕུན་སུམ་ཚོགས་པའི་རང་བྱུང་ཤུལ་བཞག །ཚ་ཁུལ་གནམ་གཤིས་ས་ཁུལ་ལ་ཡོད་པའི་ཐུན་མོང་མ་ཡིན་པའི་ཟས་སྤྱོད་ཀྱི་རིག་གནས་དང་། གནའ་མཁར་དང་ལྷ་ཁང་། དགོན་པ། གླང་ཆེན་གྱི་ཁྱུ་ཚོགས། མཁའ་དབྱིངས་སུ་རང་དབང་ངང་རྩེན་པའི་བྱ་བྱེའུ། མེ་ཏོག་གི་ཚལ་དུ་སྦྲང་རྩིའི་བཅུད་ལ་རོལ་བའི་ཕྱེ་མ་ལེབ། གྲ་མ་ཉམས་ཤིང་ཟུར་མ་ཆགས་པའི་གནའ་བོའི་ཆོས་ལུགས་རིག་གནས་དང་ཡུལ་སྲོལ་སོགས་དཔལ་ཡོན་རྫོགས་ལྡན་གྱི་རྗེས་ཤུལ་མང་པོ་ད་ལྟ་ད་དུང་མཐོང་དུ་ཡོད་པས། སྔོན་མར་མཱ་ཁོ·ཕོ་ལོས་ཀྱང་གནས་འདིར་འཛམ་གླིང་གི་ཆེས་མཛེས་པའི་གླིང་ཕྲན་ཞེས་བསྔགས་བརྗོད་ཀྱི་མེ་ཏོག་གཏོར་མྱོང་ངོ་། །

འབྲེལ་ཡོད་དཔྱད་གཞི་ལྟར་ན། སྤྱི་ལོ་སྔོན་གྱི་ལོ་2500སྔོན་དུ་རྒྱ་གར་བྱང་ཕྱོགས་ཀྱི་ཨཱརྱའི་མི་ཞི་ལན་གླིང་ཕྲན་（ད་ལྟའི་སིང་གྷ་ལའི་ཡོད་སའི་གནས）སྟེང་གནས་སྤོས་རྗེས་སིང་གྷ་ལའི་རྒྱལ་རབས་བཙུགས་ཤིང་། སྤྱི་ལོ་སྔོན་གྱི་ལོ་247ལོར་རྒྱ་གར་གྱི་རྨ་བྱའི་རྒྱལ་རབས་སྐབས་ཀྱི་ཆོས་རྒྱལ་མྱ་ངན་མེད་ཀྱིས་བུ་ད་ལྟའི་སིང་གྷ་ལ་གླིང་ཕྲན་དུ་མངགས་ནས་ནང་ཆོས་དར་སྤེལ་མཛད། དུས་དེ་ནས་བཟུང་སིང་གྷ་ལའི་ཆོས་ལུགས་དད་མོས་བྲམ་ཟེ་ཆོས་ལུགས་ནས་སངས་རྒྱས་ཆོས་ལུགས་ལ་འགྱུར་མགོ་ཚུགས་ཤིང་། སྤྱི་ལོ་སྔོན་གྱི་དུས་རབས་གཉིས་པར་རྒྱ་གར་ལྷོ་རྒྱུད་ཀྱི་ཐེ་སྨི་ཨེར་མིའང་ཞི་ལན་གླིང་ཕྲན་དུ་གནས་སྤོས་ནས་གཏན་སྡོད་བྱས།

སིང་གྷ་ལའི་མི་ལ་མཚོན་ན། འཚོ་བའི་ཁྱབ་ཁོངས་སོ་སོར་སངས་རྒྱས་ཆོས་ལུགས་ཀྱིས་གོ་གནས་ཆེན་པོ་བཟུང་ཡོད་པ་དང་། ཡུལ་སྲོལ་མང་པོ་ཞིག་ཀྱང་སངས་རྒྱས་ཆོས་ལུགས་དང་འབྲེལ་བ་དམ་པོ་ཡོད། སྤྱི་ཚོགས་སྟེང་གྲྭ་བཙུན་ལ་བརྩི་བཀུར་བླ་ལྷག་བྱེད་དེ། གྲྭ་བཙུན་དང་ཁ་བརྡ་བྱེད་སྐབས་སྐྱ་བོའི་འདུག་གནས་གྲྭ་བཙུན་ལས་དམའ་དགོས་ཤིང་། ལག་པ་གཡོན་པས་གྲྭ་བཙུན་དང་དད་ལྡན་པར་དངོས་པོ་སྟེར་མི་རུང། སངས་རྒྱས་ཆོས་ལུགས་ཀྱི་དགོན་པར་མཇལ་སྐོར་བྱེད་སྐབས་ལྷ་སྐུར་རྡོག་པས་བརྫིས་པ་དང་ལྷ་སྐུའི་ཐོག་ནས་བགོམས་ཏེ་འགྲོ་བ། ལྷ་སྐུའི་སྟེང་ཞོན་པ་སོགས་ཀྱི་ལས་བྱེད་མི་རུང་། གཞན་ལྷ་ཁང་དང་དགོན་པའི་ནང་འགྲོ་སྐབས་ལྷམ་དང་རྐང་འབོབ་འཕུད་དགོས་པར་མ་ཟད། ཞྭ་མོའང་གྱོན་མི་རུང་ངོ་། །སངས་རྒྱས་ཆོས་ལུགས་ཀྱི་གཞན་གྱི་སྲོག་མི་གཅོད་པའི་ལྟ་དགོངས་ཀྱིས་ཤུགས་རྐྱེན་ཐེབས་མུར། སྐྱེ་ཁམས་སྲུང་སྐྱོབ་ཀྱི་འདུ་ཤེས་དུས་ད་ལྟའང་མ་ཉམས་པར་ཡོད་ཅིང་།

དམངས་ཡོངས་ཀྱིས་ཁོར་ཡུག་དང་སྲོག་ཆགས་སྲུང་སྐྱོབ་ཀྱི་ལས་ལ་དང་དོད་ཆེན་པོ་བྱེད།

སིང་གྷ་ལའི་རྒྱལ་ཁོངས་སུ་གཙང་པོ་ཆེན་པོ་བཅུ་དྲུག་ཡོད་པ་དང་། གཙང་པོ་ཕལ་མོ་ཆེའི་མགོ་ཁུངས་དབུས་རྒྱུད་ཀྱི་རི་སྒང་ཡིན། དེ་དག་ལས་བཞུར་རྒྱུན་ཆེས་རིང་བ་ནི་མཱ་ཧ་ཝེ་ལི་གཙང་བོ་ཡིན་པ་དང་། སྤྱིའི་རིང་ཚད་ལ་སྨི་སྟོང་335ཡོད། སིང་གྷ་ལའི་ཤར་རྒྱུད་ཀྱི་བདེ་ཐང་དུ་སྐར་ཚོགས་ཐང་ལ་ལྷུང་འདྲའི་མཚེའུ་མང་པོ་ཡོད་པ་དང་། དེ་ལས་བྷ་ཐྀ་ཁ་རོ་མཚེའུའི་རྒྱ་ཁྱོན་ཆེས་ཆེ་སྟེ་སྤྱིའི་རྒྱ་ཁྱོན་ལ་སྨི་གྲུ་བཞི་མ་སྟོང་120ཡོད།

ཁང་ངྷི་གནའ་མཁར་ལ་ལོ་ངོ་སྟོང་གཉིས་ལྷག་གི་ལོ་རྒྱུས་ལྡན་ཞིང་སིང་གྷ་ལའི་དབུས་རྒྱུད་དུ་གནས། གནའ་མཁར་དེ་གནའ་བོའི་སིང་གྷ་ལའི་སྲིད་འཛིན་དང་ཆོས་ལུགས་ཀྱི་ལྟེ་གནས་ཡིན་ཞིང་། དེར་ལོ་རྒྱུས་ཀྱི་རྒྱུན་རིང་ཞིང་བཟོ་རྩལ་ཁྱད་དུ་འཕགས་པའི་གནའ་བོའི་བཟོ་བཀོད་མང་པོ་ཡོད།

སིང་གྷ་ལའི་ནུབ་བྱང་རྒྱུད་དུ་ཡོད་པའི་ཨ་ནོ་ར་ངྷི་ཕུ་ལི་ནི་གནས་མཇལ་དང་ཡུལ་སྐོར་ལྟེ་གནས་ཡིན་ཞིང་། ལོ་རྒྱུས་སྟེང་དུས་ཡུན་རིང་པོར་སིང་གྷ་ལའི་ཆབ་སྲིད་ཀྱི་ལྟེ་གནས་ཡིན་པར་མ་ཟད། སིང་གྷ་ལའི་ཆེས་སྔ་བའི་སངས་རྒྱས་ཆོས་ལུགས་ཀྱི་གདན་ས་དང་ཨེ་ཤ་ཡ་ཤར་ལྷོའི་ས་ཁུལ་དུ་སངས་རྒྱས་ཆོས་ལུགས་དར་སྤེལ་གཏོང་བའི་གནས་གལ་ཆེན་ཞིག་ཡིན། ཨ་ནོ་ར་ངྷི་ཕུ་ལི་རུ་གནའ་ཤུལ་དང་དགོན་པ། མཆོད་རྟེན། བྲག་ཕུག །བྲག་བརྐོས་སོགས་མང་ཞིང་། གཞི་རྒྱ་ཆེ་བའི་གནའ་བོའི་བཟོ་བཀོད་དེ་དག་ལ་ལོ་རྒྱུས་དང་ཆོས་ལུགས་རིག་གནས་ཀྱི་ཁྱད་ཆོས་ལྡན། གནའ་གྲོང་འདིའི་གནའ་བོའི་ཆུ་བེད་འཛུགས་སྐྲུན་གྱི་ལོ་རྒྱུས་རིང་སྟེ། གནའ་བོའི་ཆུ་མཛོད་ཀྱི་རྗེས་ཤུལ་ད་ལྟ་ད་དུང་མཐོང་ཐུབ་པར་མ་ཟད། འབྲེལ་ཡོད་དཔྱད་གཞི་ལྟར་ན། སྤྱི་ལོ་སྔོན་གྱི་ལོ་505ལོ་ནས་བཟུང་ཆུ་བེད་འཛུགས་སྐྲུན་གྱི་ལས་དར་བར་བཞེད།

ཕོ་ལོན་ནཱ་རུ་ཨོ་ནི་སིང་གྷ་ལའི་བྱང་ཤར་རྒྱུད་ཀྱི་བདེ་ཐང་དུ་ཡོད་པའི་གནའ་གྲོང་མིང་གྲགས་ཅན་ཞིག་ཡིན། དེ་ནི་དུས་རབས་བཅུ་གཉིས་ཡས་མས་སུ་བསྐྲུན་པར་བཞེད་ཅིང་། གནའ་གྲོང་གི་བཀོད་པ་དང་བཞེངས་ལུགས་ལ་ཐུན་མོང་མ་ཡིན་པའི་ཁྱད་ཆོས་ལྡན་ཞིང་། སིང་གྷ་ལའི་ལོ་རྒྱུས་སྟེང་གི་ཆོས་ལུགས་བཟོ་བཀོད་མང་པོའང་གནའ་གྲོང་ལས་རིམ་བཞིན་མཆེད་པར་བཞེད་དོ། །

སིན་ཧརྱ་ནགས་ཚལ་ནི་སིང་གྷ་ལའི་ལྷོ་ནུབ་རྒྱུད་དུ་ཡོད་པ་དང་། དེ་ནི་སིང་གྷ་ལའི་གདོད་མའི་ཚ་ཁུལ་གྱི་ཆར་ཆུ་མང་བའི་ནགས་ཚལ་གཅིག་པུ་དེ་ཡིན། ནགས་ཚལ་ལས་60%ཡན་གྱི་ལྗོན་ཤིང་ནི་ས་གནས་དེ་གར་མ་གཏོགས་མེད་པའི་ལྗོན་ཤིང་དཀོན་པའི་རིགས་ཡིན་ཞིང་། ནགས་ཚལ་དེ་ནི་སིང་གྷ་ལའི་50%ཡན་གྱི་འོ་གསོའི་སྲོག་ཆགས་དང་ཕྱེ་མ་ལེབ་ཀྱི་གཞིས་ཁྱིམ་ཡིན་པར་མ་ཟད། འབུ་སྲིན་དང་ལྟོ་འགྲོའི་སྲོག་ཆགས། སྐམ་ཆུ་གཉིས་འཚོའི་སྲོག་ཆགས་ཀྱི་རྒྱུད་སྤེལ་སའི་གནས་ཀྱང་ལགས།

ཨ་ནུ་ར་ངྷ་ཕུ་ར་ལྷ་ལྡན་གྲོང་ནི་སིང་གྷ་ལའི་གནའ་བོའི་རྒྱལ་དང་སངས་རྒྱས་ཆོས་ལུགས་ཀྱི་ལྟེ་གནས་ཡིན་ཞིང་། དེ་ནི་སྤྱི་ལོ་སྔོན་གྱི་དུས་རབས་ལྔ་པར་བསྐྲུན་པར་བཞེད། སྤྱི་ལོ་སྔོན་གྱི་དུས་རབས་གསུམ་པ་ནས་དུས་རབས་བཅུ་པའི་བར་སིང་གྷ་ལའི་རྒྱལ་རབས་ཀྱི་རྒྱལ་ས་ཡིན། ཨ་ནུ་ར་ངྷ་ཕུ་ར་ལྷ་ལྡན་གྲོང་གི་ཆེས་ཁྱད་དུ་འཕགས་པའི་ལྗོངས་རྣམ་ནི་བྱང་ཆུབ་ལྗོན་ཤིང་ཡིན་ལ། དེ་ལ་ལོ་ངོ་2600ལྷག་གི་ལོ་རྒྱུས་ལྡན་པར་བཞེད་ཅིང་། རྒྱལ་ཁབ་ཀྱི་གཅེར་ནོར་དུ་ངོས་འཛིན་ནོ། །

ཏམ་བྷུ་ལ་ལྷ་ཁང་ནི་སིང་གྷ་ལའི་སངས་རྒྱས་ཆོས་ལུགས་ཀྱི་བྲག་ཕུག་ལྷ་ཁང་ཞིག་ཡིན་ཞིང་། དེ་སིང་གྷ་ལ་གླིང་ཕྲན་གྱི་དཀྱིལ་དབུས་སུ་ཡོད། འབྲེལ་ཡོད་དཔྱད་གཞི་ལྟར་ན། ལྷ་ཁང་དེ་སྤྱི་ལོ་སྔོན་གྱི་དུས་རབས་དང་པོར་བསྐྲུན་ཞིང་། སིང་གྷ་ལའི་སངས་རྒྱས་ཆོས་ལུགས་ཀྱི་གདན་ས་གལ་ཆེན་ཞིག་ཏུ་བརྩི། ཏམ་བྷུ་ལ་ལྷ་ཁང་ནི་བྲག་རི་ཞིག་གི་སྐེད་པར་ཆགས་ཤིང་།

ལྷ་ཁང་ལ་ཁྱོན་བསྡོམས་བྲག་ཕུག་ཆེན་པོ་ལྔ་ཡོད་པ་དང་། བྲག་ཕུག་རེ་རེར་རྡོ་བརྐོས་སྐུ་བརྙན་དང་ལྡེབས་རིས་མང་པོ་ཡོད། སིང་གྷ་ལའི་གཞི་རྒྱ་ཆེས་ཆེ་ཞིང་སྲུང་སྐྱོབ་བྱས་པ་ཆེས་ལེགས་པའི་བྲག་ཕུག་ཅིག་ཡིན་ནོ། །ལྷ་ཁང་དུ་རྒྱ་ཁྱོན་ལ་སྨི་གྲུ་བཞི་མ་2100ཡོད་པའི་ལྡེབས་རིས་དང་ལྷ་སྐུ་157ཉར་ཚགས་བྱས་ཡོད་པས་འཛམ་གླིང་ཡུལ་གྲུ་སོ་སོའི་དད་ལྡན་པ་དང་ཡུལ་སྐོར་བ་མང་པོའི་ཡིད་ཀྱི་དང་བ་དབང་མེད་དུ་བཀུག་ཡོད་པར་མ་ཟད། ལོ་རྒྱུས་དང་རིག་གནས། སྒྱུ་རྩལ་ཞིབ་འཇུག་སོགས་ཀྱི་རིན་ཐང་ཡང་ཆེན་པོ་ལྡན་ནོ། །

（བསོད་ནམས་རྡོ་རྗེ། ཀྲུང་གོའི་བོད་རིག་པ་ཞིབ་འཇུག་ལྟེ་གནས།）