ཉིན་ཐོའི་སྒྲུང་།

དགེ་རྒན་ཚེ་དཔག་གིས་སེམས་རྣལ་དུ་ཕབ་ནས་སློབ་མ་རྣམས་ཀྱི་ཉིན་ཐོ་ལ་ལྟ་འགོ་ཚུགས་བྱུང་། ཁོས་ཉིན་ཐོ་ལ་ལྟ་བ་ནི་ཉིན་གཅིག་ནང་གི་ཆེས་མཐའ་མའི་བྱ་བ་དེ་ཡིན་ལ། དགེ་རྒན་གཞན་གྱིས་ཁོས་སློབ་མ་རྣམས་ལ་ཉིན་ཐོ་འབྲི་བར་སྐུལ་མ་བྱེད་པར་རིན་ཐང་གང་ཡང་མེད་ཚུལ་ལབ་མོད། ཁོས་ལས་ཀ་དེ་ཉིད་རྒྱུན་འཁྱོངས་བྱས་ནས་ཧ་ཅང་ཡུན་རིང་འགོར། སྐབས་རེར་ཁོ་རང་གིས་ཀྱང་རང་ཉིད་ཀྱིས་ཉིན་ཐོ་ནམ་ཞིག་ལ་དག་བཅོས་བྱེད་འགོ་བརྩམས་པ་དྲན་གྱི་མི་འདུག ཕལ་ཆེར་ལོ་ངོ་ཉི་ཤུ་ཡར་མར་འགོར་གྱི་མེད་འགྲོ།

མ་གཞི་ཁོ་རང་དེ་ལྟར་ཉིན་ཐོ་དག་བཅོས་བྱེད་པར་སྤྲོ་སྣང་འཕེལ་དོན་ནི་ཉིན་གཅིག་གི་བྱ་བའི་ཁྲོད་ངོ་མཚར་བའི་དོན་དག་ཅིག་བྱུང་མ་ཐུབ་པར་སླར་ཡང་རང་གི་ཉིན་གཅིག་གི་འཚོ་བ་ལ་ཚོས་ཁ་གསར་པ་ཞིག་སྣོན་ཨེ་ཐུབ་བསམ་ནས་ནམ་ཡང་རེ་བ་མཐོ་བས་རེད། དེ་མཚུངས་སློབ་གྲོགས་ཁ་ཤས་ཀྱིས་ཁོའི་རེ་བའང་སྟོངས་མ་མྱོང་།

དེ་ནས་འབྲི་དེབ་རྣམས་རིམ་གྱིས་བསེད་དེ་དཀར་པོ་སྟེང་དུ་ནག་ཞེད་ཅུང་བབས་པའི་ཉིན་ཐོ་འབྲི་དེབ་དེ་འབྲི་དེབ་མང་པོ་གསེང་ནས་བཏོན་ཏེ་ཀློག་འགོ་ཚུགས། དེ་ལྟའི་དཀར་པོའི་སྟེང་དུ་ནག་ཞེད་བབས་པའི་འབྲི་དེབ་དེ་ཉིད་ཐོག་མར་ཀློག་རྒྱུར་གོམས་འདུག ཉིན་ཐོ་ཞེས་པའི་ལས་བྱ་ཉིད་མདུན་དུ་བཞག་མ་ཐག་ནས་ཉིན་ཐོ་གཞན་ལ་རྩ་བ་ནས་ལྟ་འདོད་མེད་པར་ཡིག་ནོར་ཅུང་མོད་པའི་ཉིན་ཐོ་དཀར་པོའི་སྟེང་དུ་ནག་ཞེད་བབས་པའི་ཉིན་ཐོ་དེ་མི་ཀློག་ཐུ་མེད་ཀྱི་ཚོར་བ་རྣོན་པོ་ཞིག་གིས་ཤེད་ཀྱིས་བཙིར་ཡོང་། དེ་ནི་ཅི་ཞིག་གི་ཡིན་པ་ཁོས་གསལ་བོར་ཤེས་ཤིང་། ཤེས་པ་དེ་རིམ་གྱིས་ནང་གི་སེམས་ཀྱི་གསང་བ་ཞིག་ཏུའང་གྱུར་འདུག ང་རང་ཡང་དེའི་ཁྲོད་ཀྱི་ཉིན་ཐོ་འབྲི་མཁན་གྲལ་གྱི་སློབ་མ་ཉམ་ཆུང་ཞིག་ཀྱང་ཡིན།

ཉིན་ཐོ།

གཟའ་ཟླ་བ། ཟླ་བ༡པའི་ཚེས༢༠ཉིན། གནམ་གཤིས་རུབ།

ངས་དེ་རིང་གནམ་གཤིས་རུབ་དོན་ནི་དངོས་ཡོད་ཀྱི་གནམ་གཤིས་རུབ་བམ་ཡང་ན་ངའི་སེམས་ཁམ་རུབ་པ་ཤེས་ཀྱི་མི་འདུག ད་ནངས་ཞོགས་པ་སྔར་མོ་ནས་སེམས་ཤུགས་བསྐྱེད་དེ་མལ་ལས་ལངས་ཤིང་རིམ་གྱིས་སློབ་གྲོགས་གཞན་དག་དང་འདྲ་བར་སློབ་ཁང་དུ་སོང་བ་ཡིན། འོན་ཀྱང་ཞོགས་རྩལ་སྐབས་ལས་རེས་དགེ་རྒན་གྱིས་སེམས་ཁམས་ཀྱིས་དྲོད་ཞེད་ལྟ་བུའི་སྤྲོ་སྣང་ཉུང་ངུར་དེ་ཡང་ཡོངས་སུ་གཏོར་སོང་། ཁོས་སློབ་གྲོགས་ཐམས་ཅད་སྔོན་ནས་ངའི་མིང་བོས་ཏེ“ཁྱོད་རང་ནམ་རྒྱུན་འུར་ཆེ་ཡི། ཁྱོད་ཀྱིས་ནམ་ཡང་གཏོར་བཤིག་གཏོང་དོན་ཅི་ཡིན། ཚོད་བཟུང་ཐུབ་ཀྱི་འདུག་གམ། ནམ་ཡིན་ན་ཁྱོད་རེད། ཁ་སང་རྒྱག་རེས་བགོས། དེ་རིང་ལུས་རྩལ་སྐབས་འུར་ཟིང་སློང་། སང་ཉིན་སློབ་གྲྭ་གཏོར་རྒྱུ་ཡིན་ནམ།”ཞེས་སྡིགས་མོ་མང་པོ་བཏང་བྱུང་། དེ་རིང་སློབ་སྦྱོང་བྱེད་པའི་སྤྲོ་བ་ལ་ནས་མི་འདུག རྒྱུ་མཚན་ངས་ལུས་རྩལ་ཡག་པོ་བརྩེས་ཡོད། འུར་རྒྱག་མཁན་ཡང་ང་མིན། ནམ་ཡང་ང་ནི་སྐྱོན་གྱི་ཕུང་པོར་ལྟ་བ་ལས་ངའི་ཡོན་ཏན་གང་ཡང་ཁོ་ཚོས་མཐོང་གི་མི་འདུག ཁ་སང་ཉིན་གུང་སློབ་གཙོས་ཀྱང་ཅི་ཡིན་མི་སྙམ་པར“ཡང་སློབ་གླིང་གང་བོར་སྔོན་ནས་ང་ལ་སྡིགས་མོ་ཚབ་ཆེན་བཏང་བྱུང་།”“ང་རང་སློབ་གྲྭ་འདིར་སྡོད་རྒྱུ་དགེ་མཚན་གང་ཡང་མེད་པ་འདྲ། དགེ་རྒན་ཐམས་ཅད་ང་ལ་མི་དགའ། རྒྱུ་མཚན་སློབ་གླིང་དུ་གནས་ཚུལ་ཞིག་ཡོད་ཕྱིན་ཐད་ཀར་ང་ལ་འབྲེལ་བ་ཡོད་པར་ཐག་གཅོད་དེ་ངའི་མི་གཞི་སོགས་ཡོད་ཚད་ལ་དམན་ལྟ་དང་མཐོང་ཆུང་བྱེད་ཡོང་། ང་རང་དངོས་གནས་ཁོག་ཆད་བྱུང་། མ་ཟད་ད་ལྟ་འཛིན་གྲྭ་ནང་ནས་སློབ་མ་གཅིག་གིས་ཀྱང་ང་ལ་གྲོགས་པོ་མི་བྱེད། ཕ་ཡུལ་གཅིག་པའི་སློབ་གྲོགས་འགའ་རེ་ཡོད་མོད། འོན་ཀྱང་ཁོང་ཅག་གིས་ང་ལ་མཐོང་ཆུང་བྱེད་ནས་ང་དང་ལྷན་དུ་མི་འགྲོ་བ་དང་། ཟ་མ་ཟ་སྐབས་ཁོ་ཚོ་ཚོགས་བྱས་ཏེ་ང་རང་དེའི་གྲལ་དུ་ཚུད་ཤོར་དོགས་བྱེད། དོ་ནུབ་ཀྱང་སློབ་གྲོགས་བདེ་བཟང་ངེད་གཉིས་འཛིང་མོ་ཐུག་སོང་། དེ་ནི་སུ་གཅིག་གི་ཡང་སྐྱོན་མིན་པར་ཁོ་རང་གི་སྐྱོན་ཆ་རེད། རྒྱུ་མཚན་ཁོས་ང་ལ་དོན་མེད་པར་མཚང་འདྲུ་བྱེད་ཅིང་། མཚམས་མེད་པར་སྐད་ཆ་སྣ་ཚོགས་དང་། ཚིག་རྒྱགས་པོ་དག་དག་གིས་ང་ལ་ཚོད་འགོམ་བྱེད། མ་ཟད་ཁོས་ཁྱོད་འདྲ་འདྲ་ཟོས་བཞག་ཀྱང་ལྟོ་མི་རྒྱགས་ཟེར། ང་ལ་དེ་ལྟའི་མཐོང་ཆུང་བྱེད་དོན་ངས་རྩ་བ་ནས་རྟོགས་ཀྱི་མི་འདུག དགེ་རྒན་ལགས། ཁྱེད་ཀྱིས་ང་ལ་དེ་ལྟར་མཐོང་ཆུང་བྱས་མྱོང་ངམ་ལགས།

ཉིན་ཐོ་བཀླགས་ཏེ་མཚམས་འདིར་ཐོན་པའི་དགེ་རྒན་ཚེ་དཔག་ལགས་ནི་དབུགས་ཉུང་ཙམ་འཚང་སྟེ་འབོལ་ཁྲིའི་ཐོག་ཏུ་དལ་གྱིས་བསྙེ་བར་བརྩམས། སྐད་ཆ་དྲང་མོ་བཤད་ན་དེ་ནི་ཁོ་ལ་དགོས་པའི་བྲོ་བ་དེ་རེད། མ་ཟད་དེ་རིང་ཁོ་རང་ཁྱེད་ཀྱིས་ང་ལ་མཐོང་ཆུང་བྱས་མྱོང་ངམ་ཞེས་པའི་ཚིག་གྲུབ་དེ་ལ་ཡིད་སྨོན་ཤོར་ཞིང་། ཁོ་དང་སློབ་མ་དེའི་བར་གྱི་འབྲེལ་ལམ་ཀྱི་འཕེལ་འགྱུར་རེ་རེ་ལ་དོ་དན་གྱིས་བསམ་གཞིག་གཏོང་། ཁོ་ནི་ནམ་རྒྱུན་དེ་ལྟར་བསམ་གཞིག་བྱེད་རྒྱུར་བྱང་ཡོད། ཁོས་ནམ་རྒྱུན་ཉིན་ཐོ་ཀློག་སྐབས་འདི་ལྟར་བརྒྱུད་རིམ་ཞིག་བརྒྱུད་པའི་གོམས་གཤིས་ཆགས་ཡོད་དེ། དབུགས་ཉུང་ངུར་ཙམ་འཚང་། དབུགས་ཕྱི་ལ་མི་ཡོང་སྐབས་དབུགས་དེ་དུ་བ་ཁམ་གང་དང་ལྷན་དུ་རྔུབ་པར་བྱེད། དེ་ནས་འབོལ་ཁྲི་སྟེང་ཡར་སྟོད་བཙུགས་བྱེད་ཀྱིན་ལག་པ་གཅིག་གིས་དུ་མེ་སྒྲུག་པ་དང་། ལག་པ་གཞན་པས་དུ་གཞོང་མདུན་ཅོག་སྟེང་དུ་འཇོག དེ་ནི་ཁོས་ཉིན་ཐོ་དམིགས་བསལ་བ་ཞིག་བལྟས་ཚར་རྗེས་སྟོན་དགོས་པའི་རྣམ་འགྱུར་གཅིག་པུར་དེ་རེད། དེ་ནི་པར་ལེན་སྒྱུ་རྩལ་བ་ཞིག་གིས་པར་བླངས་པ་དང་ཁྱད་མེད་པར་ཧ་ཅང་གསོན་ཉམས་དོད་པོ་ཞིག་ཡིན། ཁོ་རང་དེ་ལྟར་སྐར་འགའ་ཤས་ལ་བསྡད་ཚར་རྗེས་དབུགས་རིང་མོ་ཞིག་ཕྱི་ལ་ཕུད་ཅིང་། དེ་དང་ལྷན་དུ་མིག་ཆུ་ཞིག་མཁུར་བ་སྟེང་དུ་འགྲིལ་ཡོང་། མིག་ཆུ་དེ་དུ་བས་བརྣངས་ནས་ཤོར་བའམ་ཉིན་ཐོས་སེམས་བསྒུལ་ཏེ་ཤོར་བ་ཁོ་རང་ལའང་གསལ་ཆ་གང་ཡང་མེད། རེད་དེ་མིག་ཆུ་དེས་ཁོ་རང་སེམས་ཅུང་བདེ་ལ་ཕབ་ཐུབ། སློབ་མའི་དེའི་གདོང་བྱེད་ནི་འབུར་བརྐོས་རི་མོ་ཞིག་ལྟར་སྐྱ་འཐིབ་བེར་དྲན་ལམ་དུ་འཆར་ཡོང་། ཁོས་ནམ་རྒྱུན་སློབ་མ་དེ་ལ་འཕྲད་སྐབས་འདི་ལྟར་ལབ་གླེང་བྱེད་དེ། དབྱངས་མོ། དོ་ཞག་ཁྱོད་ན་ཡི་འདུག་གམ། ཁྱོད་ལ་དཀའ་ངལ་འདྲ་མེད་དམ། ཡོད་ན་དགེ་རྒན་ལ་ཤོད། དེ་མིན་ན་ཉིན་ཐོ་རུ་བྲིས། ངས་ཧ་གོ་ན་ཁྱོད་ལ་རོགས་རམ་གང་ཐུབ་བྱེད་ངེས། ཁྱོད་ཀྱིས་སེམས་ཕམ་མ་གནང་། ནམ་ཡང་རང་གིས་རང་ལ་ཡིད་ཆེས་བྱོས། སྐད་ཆ་དེ་བཤད་རྗེས་དགེ་རྒན་ཚེ་དཔག་གི་དྲན་པ་སྨག་རུབ་པ་ལྟར་མག་མོག་ཏུ་འགྱུར་འགྲོ་མོད། ནམ་ཡིན་ཡང་དེ་ལྟར་བརྗོད་ཀྱི་ཡོད། དེ་ལྟར་བརྗོད་པ་ལའང་ཁོ་རང་ཧ་ཅང་བྱང་ཆ་ལྡན་ན་ཡང་དེ་བཤད་ཚར་རྗེས་སྐད་ཆ་གསར་པ་གང་ཞིག་ནམ་ཡང་ཤོད་ཀྱི་མི་འདུག དེ་ནི་དགེ་རྒན་ཚེ་དཔག་གི་སེམས་སུ་སློབ་མ་འདིའི་སེམས་ཁམས་དེ་ཇི་ལྟ་བུ་ཞིག་ལ་འགྲེལ་བཤད་བྱ་དགོས་པ་མ་ཤེས་པས་ལོས་ཡིན། གང་ལྟར་དགེ་རྒན་ཁོང་གིས་སློབ་མ་འདིའི་ཉིན་ཐོ་བཀླགས་ནས་ཟླ་བ་འགའ་ཤས་ལས་མིན་མོད། ཧ་ཅང་འབྲེལ་འདྲིས་དམིགས་བསལ་བ་ཞིག་བྱུང་བ་དང་ཁྱད་པར་ཆེན་པོ་མི་འདུག ནམ་རྒྱུན་ཁོའི་སེམས་ཚོར་ཐམས་ཅད་ལ་དགེ་རྒན་ཁོང་གིས་བསམ་ཤེས་དང་མནོ་བསམ་གཏོང་ཤེས་ཀྱི་ཡོད། རེད་དེ་འགྲེལ་བཤད་རྩ་བ་ནས་བརྒྱག་ཤེས་མ་སོང་། དེ་ནི་དཔེར་ན་དགེ་རྒན་ཁོང་གི་ཐ་སྙད་ཀྱིས་མ་འདང་བ་དང་ཧ་ཅང་འདྲ། རྒན་ཁོང་གིས་མ་མཐའ་རང་ཉིད་ལ་ལན་དེ་ལྟར་སྤྲད་ཀྱི་འདུག ལན་དེས་ཁོ་རང་ཉིད་དེ་ཙམ་ཡིད་ཚིམས་ཀྱི་མེད་མོད། གནས་སྐབས་བསམ་གཞིག་དང་རྒྱུས་ལོན་བྱེད་རྒྱུ་ལས་ཐབས་མི་འདུག་སྙམ་པ་བྱུང་།

དེ་རིང་སློབ་ཁྲིད་སྐབས་དགེ་རྒན་ཚེ་དཔག་གིས་ཡང་དང་བསྐྱར་དུ་དྲན་གསོ་བྱེད་ཀྱིན་པ་ནི་ཁྱོད་ཀྱིས་ང་ལ་མཐོང་ཆུང་བྱེད་མྱོང་ངམ་ཞེས་པའི་སྐད་ཆ་དེ་རེད། ཁོས་སྐད་ཆ་དེ་སེམས་ནས་དྲན་གྱིན་སློབ་གྲོགས་དབྱངས་མོ་ཡི་གདོང་ལ་གཟིགས་ཐེངས་རེར་སེམས་ཅུང་བརྣངས་པ་ལྟ་བུའི་སྣང་བ་འཁོར། མ་ཟད་རང་ཉིད་དང་ལས་ཀ་ཆ་མཐུན་པའི་དགེ་རྒན་ཞེས་པའི་ཆོ་ལོ་ཁུར་མཁན་དག་ལ་ཁོང་ཁྲོ་བསྐྱེད། ད་རུང་ཁོང་གིས་སློབ་གྲོགས་དབྱངས་མོ་ལ་ཆེད་དུ་རྣམ་འགྱུར་དམིགས་བསལ་བ་ཞིག་འཛིན་དགོས་པར་འདོད་མོད། འགོ་ཇི་ལྟར་བརྩམ་དགོས་པ་ཤེས་ཀྱི་མེད་པའི་ཚོད་དུ་འདུག ཐུག་ཐེངས་རེ་ལ་འཛུམ་མདངས་རེ་དབྱུང་པར་བྱེད་ལ། སེམས་ནས་དྲན་མྱོང་བའི་དོན་དག་མང་པོ་ཞིག་ཀྱང་བརྗེད་པར་གྱུར། མ་ཟད་སློབ་གྲོགས་དབྱངས་མོ་ལ་སྙིང་ཉེ་བའི་འཛུམ་མདངས་དབྱུངས་པ་ཡང་དོན་དག་དགའ་འོས་པ་ཞིག་ཏུ་གྱུར་ཡོད་དེ། མོ་རང་ཆུང་དུས་ནས་སྡིགས་མོད་མེད་རབས་མེད་ཚུལ་དག་དག་གིས་མོའི་གཞོན་ནུའི་མི་ཚེ་མང་ཤོས་རྫོགས་པ་རེད། མ་ཟད་ཁྱིམ་ཚང་ནི་དབུལ་པོ་ཞིག་ཡིན་པ་དང་ནམ་རྒྱུན་མོ་རང་ཡང་སྡོད་ཚུགས་དེ་ཙམ་མེད། ཡར་མར་མང་པོ་འཁྱམས་རྒྱུ་དགའ་ཞིང་། དུ་བ་འཐེན་པ། ཆང་འཐུང་བ་སོགས་རྒྱུ་མཚན་འགའ་ལ་ཁ་གཡར་ཏེ་ཡུལ་ལུང་ཀུན་ཀྱིས་མོ་ལ་མཐོང་ཆུང་བྱས་མྱོང་། འོན་ཀྱང་མོ་རང་པདྨ་འཛུམ་བཞད་སློབ་གྲྭར་བསླེབས་རྗེས་ནམ་རྒྱུན་ངལ་གསོ་བའི་སྐལ་ཐོབ་ཀྱི་ཡོད། འོན་ཀྱང་དགེ་རྒན་ཕལ་ཆེ་བས་མོ་རང་རིམ་གྱིས་མིག་ལམ་ནས་བོར་ཞིང་། མོའི་གཤིས་ཀའི་སྟེང་གི་དོན་དག་མང་པོ་ཞིག་ལ་མིག་དང་ཁ་གཡར་ནས་མོ་ནི་སློབ་མའི་གྲལ་ནས་རྒྱང་ཕུད་ལྟ་བུ་བྱས་པའི་སྣང་བ་དེ་མོ་ལ་ནམ་ཡང་འགོག་མེད་དུ་ཡོང་གི་ཡོད། སྔོན་ཆད་མོ་རང་སློབ་མ་ཁ་སྒོ་ཡང་ཞིང་དགེ་རྒན་དག་ལ་ཧ་ཅང་ཁ་བརྡ་བྱེད་རྒྱུར་དགའ་མཁན་ཞིག་ཡིན་མོད། འོན་ཀྱང་རིམ་གྱིས་དཀའ་སྡུག་དང་གནོན་ཤུགས་དག་གིས་མོའི་གདོང་ནི་གནམ་མཐའ་བཞིན་རུབ་སྟེ་སེམས་སུ་ཡང་བརྗོད་པ་བྲལ་བའི་མུན་པ་ཚོགས། དེ་ནས་བཟུང་མོས་དགེ་རྒན་དག་མཐོང་ཐེངས་རེ་རེ་ལ་སེམས་ཀྱི་གསེང་དང་གཏིང་ནས་ན་ཟུག་དང་ཞེ་སྡང་འདྲེས་མ་ཞིག་ལངས་ཏེ་སྙིང་གི་གཟེར་ལ་ཐོགས་ཡོང་ཞིང་། ངོ་གདོང་སྟེང་གི་གཉེར་མ་རེ་རེ་ཡང་དེས་བསྡུས་པ་ཇི་བཞིན་ཧ་ཅང་གཟབ་ནན་གྱིས་མངོན་འདུག

ཕལ་བའི་མི་ལ་ཕལ་བའི་སེམས་ལས་མེད་ཅེས་པ་ཅིས་མ་བདེན། མོ་ལྟ་བུ་ཉམ་ཆུང་ནུས་ཞེན་གྱིས་དེ་ལྟའི་སྐྱོ་བ་བརྩེགས་པའི་ཁུར་པོ་ལར་ནས་ཁྱོག་ཐབས་མི་འདུག་སྟེ། གུ་ཡངས་པའི་སྣང་བ་བསོར་མོ་དེ་དག་ཀྱང་རིམ་གྱིས་མོའི་འཇིག་རྟེན་གྱི་སྒོ་གཏན་པའི་ཀླད་ཁམས་ལྟར་གཏན་མེད་དུ་གྱུར་འགོ་ཚུགས། དེ་བས་མོ་ལ་མཚོན་ན་རིམ་གྱིས་སློབ་གྲྭ་དང་ཕ་ཡུལ་གཉིས་ལ་མི་འདྲ་ས་མེད་པར་གྱུར་ཞིང་། ཅུང་ཟད་ཁྱད་ཅིག་ཡོད་པ་ནི་སྐད་ཆ་བཤད་སྐབས་ཀྱི་བརྡ་ཆད་མི་འདྲ་བ་ཙམ་རེད།

ང་རང་སློབ་གྲྭར་འདུག་འདོད་མི་འདུག དགེ་རྒན་གཅིག་གཉིས་ལས་གཞན་རྣམས་ཀྱིས་ང་རང་སྐྱོན་གྱི་ཕུང་པོ་ཞིག་ལ་བལྟས་འདུག ང་རང་འདི་ལྟར་སློབ་གྲྭ་འདིར་བསྡད་ན་དོན་སྙིང་ག་རེ་ཡོད་པ་དངོས་གནས་ཤེས་མ་བྱུང་། དེ་རིང་གཟའ་སྤེན་པ་རེད། དེ་བས་གནང་བ་རྫུན་མ་ཞིག་ཞུས་ནས་ཕ་ཡུལ་དུ་བྲོས་འགྲོ་ཞེས་ངས་འདང་རྒྱག་སྐབས་སློབ་གྲོགས་མཚོ་མོས། ཧེ། ཁྱོད་ཀྱིས་ཅི་ཞིག་འདང་བརྒྱག་གི་ཡོད་ཟེར་གྱིན་ངའི་ཟུར་དུ་བསྡད་ནས་ངའི་འདང་རྒྱག་ཕྱོགས་ཡོངས་སུ་དཀྲུགས་སོང་། ང་རང་ད་སྐབས་འདང་རྒྱག་ཁྲོད་དུ་ལྷུང་པ་ལས་ཕ་ཡུལ་དུ་ཐོན་ཐབས་མེད་པ་ཤེས་བྱུང་། སྐབས་དེར་ནམ་ཞིག་བརླན་སོང་བ་མ་ཚོར་བར་ངའི་མཁུར་བ་ཡོངས་སུ་བརླན་པར་བཏང་འདུག་ལ། སྐབས་དེར་ཕྱི་དྲོ་ཞིག་རེད། ཆར་པ་རགས་མོ་འབབ་པའི་ཕྱི་དྲོ་ཞིག་རེད། ཡང་ན་ཕ་ཡུལ་དང་ཡུལ་མི་དྲན་པའི་ཕྱི་དྲོ་ཞིག་རེད།