ཚངས་མགུར་བླ་རུ་བརྒྱུས་པ།

གངས་དཀར་ཏེ་སེའི་ཕྱོགས་ནས་འབབ་པའི་དག་པ་ཤེལ་རའི་གཙང་ཆུ་དང་། །

ཆང་མ་ཡེ་ཤེས་མཁའ་འགྲོས་ཕབ་པའི་ལོ་ཆང་བདུད་རྩི་མངར་མོ་འདི། །

དམ་ཚིག་གཙང་མས་ཁོ་བོས་འཐུང་ན་བརྩེ་དུང་དམྱལ་བའི་ཁྲིམས་ར་ནས། །

མྱུར་དུ་ཐར་ནས་ཡིད་ཀྱི་རྨ་ཁ་སོས་པའི་ཐབས་ཤེས་རྙེད་ངེས་འདུག །

ཁ་ལས་རླུང་རྟ་ཡར་ལ་དར་སྐབས་ལྷ་བསང་ཡང་ཡང་བཏང་བས་ན། །

ལས་དང་ལམ་འགྲོ་ཁོ་བོར་བྱུང་ནས་ཆང་འཐུང་སྐུ་མགྲོན་བརྒྱ་སྟོང་ཁྲོད། །

མཛངས་མ་མ་བཟང་བུ་མོ་གང་དེས་ཟུར་མིག་བདག་ལ་འཕེན་བཞིན་དུ། །

མགྲོན་གྱི་གཙོ་དང་འཁོར་གྱི་ཐོག་མ་ང་རང་ངོས་འཛིན་བྱས་ལ་སོང་། །

མཛེས་ཤིང་སྡུག་ལ་བློ་ཡིད་སྒུལ་བའི་སོ་དཀར་པགས་པའི་འཛུམ་མདངས་དེ། །

ཆང་འཐུང་སྐུ་མགྲོན་སྤྱི་ལ་སྟོན་བཞིན་ཆང་འདྲེས་ཚུར་ལ་བྱེད་པའི་སྐབས། །

བཅོས་མིན་མིག་ཟུང་ཁྲ་མོའི་སྒྲིམ་མཚམས་བདག་གི་ཕྱོགས་ལ་འཁོར་བའི་སྐབས། །

བླ་ཚེ་སྲོག་གསུམ་རང་དབང་མེད་པ་ཡང་ཡང་སྒུལ་འདི་ཅི་ཞིག་ལགས། །

བརྩེ་བའི་བྱ་ཁྱུ་ཁྱོད་སར་རྒྱུ་ནས་འགྲོ་འདུག་བར་ནས་གཏན་དྲན་པས། །

འགྲོག་འདྲིས་དབུ་ཁྱུད་ཕན་ཚུན་བྲིས་ན་ཨེ་ཆོག་ཐེངས་གཅིག་ཞུས་པའི་སྐབས། །

ཚེ་ཡི་འདུ་བྱེད་་སྟོང་བར་གྱུར་ནས་གྱེས་བྲལ་རྫོགས་ཚིག་མ་བཀོད་ན། །

གསོན་པོ་མི་ཡུལ་འཇིག་རྟེན་འདི་ནས་གཏན་བྲལ་མི་བྱེད་གསུངས་ལ་བྱུང་། །

ཆང་མ་ཁྱེད་ཀྱི་ཐུགས་བློ་བཞིན་དུ་འཁོར་བའི་གནས་ལ་ཐོན་ཡོང་ན། །

ཚེ་རབས་འདི་ཡི་ཆོས་སྐལ་ཆད་ནས་ཕྱི་མར་དམྱལ་བར་ལྷུང་ངེས་འདུག །

དབེན་པའི་རི་ཁྲོད་གཅིག་པུར་འཚོས་ནས་དམ་པའི་ཆོས་ལ་འབད་ན་ཡང་། །

བུ་མོའི་ཐུགས་དང་འགལ་བཞིན་འདུག་པས་ད་ནི་ཅི་ཞིག་བྱེད་ལ་དགའ། །

སྦྲང་ཆུང་ང་རང་སྡོམ་ལ་ཚུད་ནས་ཞག་གསུམ་མཉམ་ཉལ་བྱས་པའི་རྗེས། །

ཕྱིར་དྲན་ཚོར་བའི་སྒོ་གླེགས་རྡུང་སྐབས་རྫབ་ཆེན་བྱ་བ་དེ་ཉིད་ཀྱིས། །

སྐྱོ་བའི་ཁ་བ་དྲག་པོ་བབས་ནས་ཡིད་ཀྱི་འཇིག་རྟེན་ཁེངས་བའི་སྐབས། །

མིག་ཆུ་ཤག་ཤག་གདོང་ནས་འཐོར་བཞིན་སླར་ཡང་ཆང་ལ་སྐྱོ་བ་བཅོལ། །

ཡིད་ཀྱི་དབང་པོ་ཁྱོད་ལ་འཁོར་བས་བླ་ཚེ་སྲོག་གསུམ་ཁྱོད་ཀྱི་ཡིན། །

ཁྲེལ་དང་ངོ་ཚ་ལས་དང་རྒྱུ་འབྲས་ཁྱོད་ཀྱིས་གཏན་དུ་བསྲུངས་ནས་ནི། །

ཚུར་ལ་ཡིད་ཆེས་གཤོག་པ་བརྐྱངས་ནས་ང་རང་ཚེ་གཅིག་མ་བསྲུངས་ན། །

གཙུག་གཡུ་གང་དེ་ཤེས་པས་སྟོངས་བས་དཔང་པོ་བྱེད་ས་གཞན་ནི་མེད། །

ཟུར་མིག་མདའ་མོ་ང་ལ་འཕངས་ནས་མཛེས་འཛུམ་སོ་དཀར་བསྟན་པ་དེ། །

སྟག་ཤར་གཞོན་ནུ་བསླུ་བྲིད་བྱེད་སའི་ཐབས་ཤིག་ཡིན་མིན་མ་ངེས་པས། །

སེམས་དང་བསམ་བའི་བར་གསེང་དེ་ནས་ཞེ་འདང་ངོ་མ་ཡོད་གྱུར་ན། །

དཀོན་མཆོག་གསུམ་པོ་དཔང་བཙུགས་བྱས་ནས་དབུ་མནའ་བཞེས་ན་ཨེ་ཆོག་ལགས། །

སྙིང་ནས་སྡུག་པའི་བུ་མོ་དེ་ཉིད་བྱ་རྡོ་ལམ་འཕྲད་ཨེ་ཡིན་ན ། །

ཨ་མ་ཆང་མས་འོས་སྦྱོར་བྱས་རྗེས་བདག་གི་འཚོ་བའི་མེ་ཏོག་གྱུར། །

བདེ་སྐྱིད་མལ་ཁྲི་མཉམ་དུ་ཉོས་ནས་ཤ་འདྲེས་ལྤགས་འདྲེས་བྱས་ཚར་བས། །

ལན་ཆགས་བུ་ལོན་འཁོར་བ་བྱུང་ན་འཚོ་སྐྱོང་གནང་རོགས་དགེ་བ་ཡོད། །

དམར་ཆུང་སེམས་ཀྱི་གསང་བའི་ཨང་གྲངས་དྲིན་ཆེན་ཕ་མར་མ་བཤད་ནས། །

དམར་པོའི་སྙིང་ཆུང་བཙན་གྱིས་འཕྲོག་པའི་ལས་ཀྱི་ཆུང་མར་བཤད་ན་ཡང་། །

འདྲིས་པའི་གྲོགས་དང་དགའ་བའི་མི་དག་བྱམས་པ་འདི་ལ་མང་ཆེ་བས། །

གསང་བའི་ཨང་གྲངས་དགྲ་བོས་ཤེས་པས་སེམས་ཁྲལ་ཁ་བ་ཐོར་ནས་སོང་། །

སྣང་བའི་རི་དྭགས་མཉམ་དུ་རྒྱུ་ནས་བརྩེ་བའི་རྩྭ་ཐང་འགྲིམ་ན་ཡང་། །

དབང་ཤུགས་བཙན་པོའི་རྔོན་པ་བྱུང་ནས་སེམས་ཀྱི་རི་དག་རྨས་ལ་སོང་། །

ཤ་དང་མཆིན་པ་གཉིས་པོའི་བར་ནས་སྡུག་གི་དམྱལ་བ་ཚེས་པ་འདི། །

སྐྱེ་བ་དུ་མའི་ལན་ཆགས་གང་ཞིག་ད་ལྟ་འཁོར་བ་ཨེ་ཡིན་ནམ། །

སེམས་ཀྱི་ནོར་དང་ཚེ་ཡི་རོགས་དེ་རང་ཉིད་ཁོ་ནར་དབང་བའི་སྐབས། །

ཐེ་ཚོམ་དྲྭ་བའི་ནང་དུ་ཚོད་ནས་ནོར་ཉམས་ཆོད་པའི་དུས་མ་བྱུང་། །

ནོར་དང་རྒྱུ་ཡི་ཚབ་མཚོན་བྲལ་བའི་འཚོ་བའི་ཞིང་གི་ལྷ་མོ་དེ། །

གཞན་དབང་བཙན་པོས་བཙན་འཕྲོག་བྱེད་དུས་སྙིང་རླུང་སྟོད་ལ་འཚངས་ནས་སོང་། །

རང་ལ་དགའ་བའི་མཛངས་མ་དེ་ཉིད་གཞན་གྱིས་འདུན་མར་བླངས་པའི་རྗེས། །

ཁོག་པའི་ནང་ལ་ཞེན་འཁོན་ལྕི་བས་ལུས་པོའི་ཤ་ཡང་སྐམ་ནས་སོང་། །

མཚན་མོ་གཉིད་དང་ཉིན་མོའི་ཟས་ལ་བྲོ་བ་ཡེ་ནས་བོར་བ་འདི། །

མི་འགྱུར་དམ་བཅའི་རྡོ་མཁར་བཞེངས་ནས་བརྩེ་བའི་བག་ཆགས་མཐུག་རྟགས་རེད། །

བརྩེ་བའི་ལུག་ཁྱུ་ལྷན་དུ་འཚོས་ནས་འཚོ་བའི་སྐྱིད་སྡུག་གླེང་ས་དེ། །

གནས་ཡུལ་གང་དུ་འཚོས་ཡོད་མི་ཤེས་སྡུག་གི་ན་ཟུག་ང་ལ་ལྕི། །

ཉིན་མོ་དྲན་པའི་ཁ་བ་འཐོར་ནས་ཐུག་འཕྲད་རེ་བ་ཆེ་བས་ན། །

མཚན་མོ་རྨི་ལམ་ནང་དུ་འཁོར་ནས་གཉིད་ཀྱང་དུ་མ་སད་ལ་སོང་། །

བུ་མོའི་སྐུ་ཚེ་བར་ཆད་མེད་ན་ཆང་ལ་འཛད་པ་ཡོད་མི་འདུག །

ན་ཟུག་དྲག་པོ་ཆང་ལ་བཅོལ་ནས་རེ་སྒུག་ལོ་ཟླ་ངས་བགྲོད་ན། །

ནམ་ཞིག་ཞལ་མཇལ་གསུང་ཐོས་ཡོང་བའི་དུས་ཚིགས་བཟང་པོ་མེད་གྱུར་ན། །

དམར་ཆུང་སེམས་ཀྱི་སྡུག་བསྔལ་འདི་ཉིད་ཇི་ལྟར་བཟོད་ནུས་དཀོན་མཆོག་ཀྱེ། །

རེ་སྒུག་ལོ་ཟླ་སོར་རྩེར་བགྲང་བཞིན་ཞོལ་ཆང་ཁང་ནས་སྒུག་ན་ཡང་། །

གོ་ཐོས་བྱུང་བའི་དུས་ཤིག་མེད་པ་ཨ་གསར་ཆེ་བའི་བུ་མོ་འདིས། །

བརྩེ་བའི་ཐ་ཚིག་ཡོངས་སུ་བརྗེད་ནས་འགྱུར་ལྡོག་བྱུང་བ་རེད་དམ་ལགས། །

ཡང་ན་སྡེ་སྲིད་དབང་ཡོད་གང་དེ་བཙན་པོ་དབང་ཤེད་ཆེ་བས་རེད། །

ཞལ་རས་པདྨའི་འདབ་སྟོང་ངོགས་ལ་བརྩེ་བའི་བུང་ལ་རབ་འཁོར་བའི། །

ན་ཆུང་སེམས་ཀྱི་བུ་མོ་དེ་ཉིད་སྤྱང་ཀའི་རིགས་རྒྱུད་ཨེ་ཡིན་ནམ། །

ཤ་འདྲེས་ལྤགས་འདྲེས་བྱུང་བའི་རྗེས་སུ་ཁོ་བོ་རྒྱང་ལ་དོར་ནས་ནི། །

རི་དང་ལུང་པ་རིམ་གྱིས་བརྒལ་ནས་རྒྱང་ལ་ཆས་གྲབས་བྱེད་ཀྱིན་འདུག །

འདོ་བ་རྟ་ཕོ་རི་ལ་ཤོར་ནས་རི་བོའི་ལ་ལུང་བརྒལ་ན་ཡང་། །

རྙི་དང་ཞགས་པ་གང་བདེ་བྱས་ནས་ཟིན་པའི་ཐབས་ཤེས་ང་ལ་ཡོད། །

ཆུང་འདྲིས་བྱམས་པས་ངོ་ལོག་བརྒྱབ་ནས་གཞན་ཡུལ་ས་མཐར་ཆས་སོང་ན། །

མཐུ་ངོ་ཟིན་པའི་ཐབས་དང་ཤེས་རབ་བདག་ལ་ཡེ་ནས་མི་འདུག་གོ །

བྲག་དང་རླུང་བུ་ཕན་ཚུན་བསྡེབས་ནས་ཐང་དཀར་རྒོད་ལ་གཟན་པོ་བྱས། །

བདེ་སྐྱིད་གཤོག་སྒྲོ་ཕྱོགས་བཞིར་བརྐྱངས་ནས་འཕུར་བའི་འདོད་པ་ཡེ་ནས་བོར། །

སྡེ་སྲིད་ལྷ་བཟང་གཡོ་སྒྱུ་ཆེ་བས་ཚངས་དབྱངས་ཐུགས་ལ་སུན་པོ་བྱས། །

བླ་ཆེན་ཞིག་གི་ཚུགས་ཀ་བཟུང་ནས་ལྷག་ཏུ་འཚོ་འདོད་མེད་པར་བྱས། །

མཐའ་མེད་དགུང་སྔོན་མཐོན་པོའི་དབྱིངས་ཀྱི་སྤྲིན་པ་ཁ་སེར་གཏིང་ནག་འདི། །

མེ་ཏོག་པདྨའི་མཛེས་སྡུག་བཅོམ་པའི་སད་དང་སེར་བའི་སྣ་འདྲེན་རེད། །

ཕྱི་ཚུལ་རྟུལ་ཞུགས་ལེགས་པོ་འཛིན་པའི་བན་དེ་སྐྱ་མིན་སེར་མིན་དག །

རྒྱལ་བའི་བསྟན་པ་རྨང་ནས་བཤིག་པའི་དེང་དུས་རྡུལ་འཕྲན་མཚོན་ཆ་རེད། །

ས་གཞི་ཁ་བས་ཡོངས་སུ་གཡོགས་ནས་ཁ་བ་འཁྱག་ལ་གྱུར་བའི་གཏིང་། །

རྟ་ཁྱུ་ཚོགས་དག་རྒྱུག་ཤར་གློད་ན་མགོ་བོ་རྡོ་ལ་རྒྱག་རོགས་རེད། །

གསར་དུ་འགྲོགས་པའི་མོ་གཞོན་གན་ལ་སྙིང་གི་གསང་གཏམ་བཤད་གྱུར་ན། །

འགྱོད་པའི་རི་ཚོགས་ཡང་ཡང་འགུལ་ནས་མིག་ཆུ་ཁྲག་ལ་འགྱུར་རོགས་རེད། །

སྲིད་པའི་སྨག་རུམ་ཡོངས་སུ་བཅོམ་པའི་དྲི་བྲལ་དུང་ཟླ་དཀར་ཆུང་དེ། །

ལང་ཚོའི་འཕེལ་ཁ་དར་ལུགས་བསམ་ན་ཡིན་པའི་བཟོ་འདྲ་ཡོད་ན་ཡང་། །

ཟླ་བའི་དཀྱིལ་གྱི་རི་བོང་ནང་བཞིན་དོན་གྱི་གནས་ལུགས་དེད་ཡོང་ན། །

མི་ཚེའི་སྒྲུང་ལ་བཞི་ཤད་འཐེན་པའི་དུས་ཚིགས་མྱུར་དུ་ཐོན་ཉེ་འདུག །

མི་འགྱུར་དམ་བཅའི་བླ་མཁར་བསྲུངས་ནས་རི་རྒྱལ་ནང་བཞིན་བཞུགས་མཛོད་དང་། །

མི་རིང་དུས་ཀྱི་ལྷན་འཛོམ་དེ་ཉིད་དཀོན་མཆོག་ལྷ་ཡིས་གནང་ཡོངས་སྐབས། །

བརྩེ་དུང་ཉི་ཟླའི་གུར་ཁྱིམ་ནང་དུ་མི་ཚེའི་ཕུགས་འདུན་ཉར་ནས་ནི། །

འཁོར་བའི་ཞིང་གི་དགའ་སྐྱོའི་ལམ་བུ་སྔར་བཞིན་མཉམ་དུ་བགྲོད་ལ་ཆོག །

རྒྱུ་སྐར་སྟོང་གི་བར་གསེང་དེ་ནས་དུང་ཟླ་གཞོན་ནུ་འཆར་བའི་སྐབས། །

ནམ་ཡང་མི་ནུབ་གནས་པའི་རེ་སྨོན་མགྲིན་པའི་གདངས་ནས་ཤོར་ལ་སོང་། །

བཅོ་ལྔའི་ཟླ་བའི་འོད་མདངས་འོག་ནས་དུང་བའི་ལག་ཟུང་སྦྲེལ་བཞིན་དུ། །

གཙང་པོའི་འགྲམ་དུ་མཉམ་འཁྱམ་ཡོང་བའི་དུས་ཤིག་བསྒུགས་པ་ཉུང་ཉུང་མིན། །

ལྷ་བྱ་ཁུ་བྱུག་མོན་ནས་བསླེབས་ཏེ་གསུང་སྐད་སྙན་མོ་སྒྲོག་པའི་སྐབས། །

ནམ་ཟླ་དཔྱིད་ཀྱི་ས་བཅུད་འཕེལ་ནས་དཀར་དམར་མེ་ཏོག་བཞད་ལ་སོང་། །

སྐྱེ་བ་གཅིག་གི་དྲན་ཤིང་གྱུར་པའི་ཆུང་འདྲིས་བྱམས་པ་འཕྲད་པས་ན། །

ལུས་སེམས་གཉིས་པོ་ལྷོད་པོར་བྱུང་ནས་མི་ཚེའི་མཛེས་སྡུག་མཐོང་གིན་འདུག །

ཐོག་མར་ཕན་ཚུན་ཐུག་འཕྲད་བྱུང་སྐབས་འཚང་ཀ་བྱེད་ཀྱིན་བདག་ལ་བརྩེ། །

ལོ་ཟླའི་བཞུར་རྒྱུན་རིམ་བཞིན་ཆས་ཀྱང་རྒྱུ་ནོར་གཉིས་ཀྱི་བསླུ་བྲིད་འོག །

འདྲིས་པའི་ལོ་དང་འགྲོགས་པའི་ཟླ་བ་སེམས་ཀྱི་གྲོང་ནས་གཏན་དོར་ཏེ། །

དགྲ་བོ་ཞིག་གི་ཚད་དུ་བཟུང་ནས་ད་ལྟ་དགྲ་རུ་ལྟ་བཞིན་འདུག །

ཕྱི་ཡི་ཤ་ལྤགས་གཅིག་ཏུ་འདྲེས་ནས་དམ་བཅའི་བླ་མཁར་བཞེངས་ན་ཡང་། །

ནང་གི་སེམས་ཀྱི་བརྩེ་བའི་ཟབ་ཚད་ནམ་ཡང་ལོན་ཐབས་མི་འདུག་ལགས། །

ས་གཞིའི་ངོགས་ལ་རི་མོ་བྲིས་ནས་གནམ་གྱི་སྐར་ཚོད་ཐུག་ན་ཡང་། །

འཇིག་རྟེན་མི་ཡི་སེམས་ཀྱི་ངོ་བོ་གཏན་དུ་རྟོགས་ས་མ་རེད་ཀོ །

ནང་སེམས་སྒུལ་བའི་མི་ཡིན། །