ཁྱེད་ཞལ་སྙིང་ལ་ཚེས་ནས། །
ཐུགས་ཁྲལ་བག་ཆགས་འཐོར་བས། །
ཚོར་ཤེས་གཉུག་མའི་སྣང་བ། །
ཁྱེད་ལ་ཉེ་ཉེ་བྱུང་སོང་། །
མོ་གཞོན་ཁྱེད་ལ་སྨིན་པའི། །
ལང་ཚོའི་གཟི་བྱིན་ཚ་པོ། །
འཇམ་པའི་ངང་གཤིས་བཟང་པོ། །
འདང་ལ་བབས་པ་གནང་བྱུང་། །
ཞལ་རས་འཁོར་ཙམ་གནང་བས། །
སྤྱན་གྱི་མཚར་སྡུག་ཕྱེས་བྱུང་། །
མཛེས་འཛུམ་ཉམས་བརྒྱ་ཁུར་ནས། །
མིག་མཐའ་དེ་ནས་བྱོན་སོང་། །
ཡིད་འཕྲོག་ཁྱེད་རང་མཇལ་བས། །
སེམས་གཞུང་རྒྱ་མཚོ་ལྟ་བུ། །
ཁྱོད་རང་ཤོང་བའི་ཚད་དུ། །
རང་དབང་མེད་པར་བསྐུམས་བཞག །
ཞལ་འཛུམ་འདབ་མའི་སྟེང་ལ། །
སྒྲོལ་མ་སྟོང་སྐུ་འཁྲུངས་ཡོད། །
དད་པའི་ཕྱག་རྒྱ་གཡོས་ཏེ། །
བྱིན་རླབས་གཟིགས་པར་རེ་བཞག །
བདག་ལ་སེམས་ངོ་བསྟན་ནས། །
ཚིག་འཇམ་ངག་གི་སྦྲང་ཆང་། །
ང་ཡི་སེམས་སུ་བླུད་ན། །
ལུས་སེམས་བདེ་བས་ཁྱབ་ཡོང་། །
རྣམ་དག་སེམས་ཀྱི་དར་དཀར། །
ཁྱེད་ཀྱི་མགུལ་དུ་ཕུལ་ན། །
ནང་སེམས་མེ་ལོང་ངོས་སུ། །
ང་རང་ལན་གཅིག་འཆར་རམ། །
ཨ་ལན་དཀོན་པའི་ལོ་ཟླར། །
སྙན་ཚིག་དོན་གྱི་ཕྲེང་བ། །
ཁྱེད་ཀྱི་སྤྱན་ལ་བརྒྱུས་དུས། །
ཞེ་ལ་དྲོད་ཐིགས་བྱུང་ངམ། །
སྐྱེ་བ་འདི་ལ་འཕྲད་དེ། །
ཚིག་གི་ཟིལ་བ་གཙང་མ། །
བརྩེ་བའི་ངག་རིག་མེ་ཏོག །
འདང་གི་དོན་དུ་ཕུལ་ཡོད། །
མི་ལུས་ཐོབ་པའི་དུས་སུ། །
སེམས་པ་སེམས་ལ་གླན་དེ། །
འདྲིས་འདྲིས་བྱུང་ན་མ་གཏོགས། །
མི་ལུས་ཐོབ་ཐབས་དཀའ་ཨང་། །
མ་གཞི་སྒྱུ་མའི་ཁམས་སུ། །
སྟོང་བའི་རང་བཞིན་སྣང་ཡང་། །
ཁྱེད་སྐུ་མེ་ཏོག་མཐོང་བས། །
རྟག་པའི་ཉམས་སྣང་མག་མོག །
འཁོར་བའི་དལ་མགྱོགས་ནང་གི །
བུ་མོའི་གཤིས་ཀྱི་ངང་ཚུལ། །
སེམས་ཀྱི་སྤྱན་རས་ནང་ནས། །
ནམ་ཡང་ཟིམ་པ་མ་བྱུང་། །
སྣང་བའི་ཁམས་ཆེན་གསོ་བའི། །
རྨི་ལམ་རིང་མོ་ཁྱེད་ཡིན། །
ཚོར་སྣང་རླུང་བུ་འཇམ་པོས། །
ལྡིང་སྐོར་རྒྱག་ས་ཁྱེད་ཡིན། །
ཁྱེད་རང་མུ་ནས་བྲིས་ན། །
མི་ལའི་མགུར་འབུམ་ཡིན་འདྲ། །
ཚོར་བའི་ཤུགས་གླུ་ཡིན་འདྲ། །
ཟླ་བའི་བསིལ་ཟེར་ཡིན་ཆོག །
གཡར་མའི་སྐྱེ་བ་འདི་ཡིས། །
ཁྱེད་རང་ལན་གཅིག་མཇལ་བས། །
མཐུན་དེ་འགྲོགས་ཐབས་དཀའ་ཡང་། །
འཛུམ་ཆུང་མཇལ་བས་ཆོག་བྱ། །
སེམས་དང་སྣང་བའི་སྲུབས་སུ། །
དགའ་བའི་ལས་འབྲས་འཐོར་ན། །
སྐྱེ་བ་ད་ཐེངས་དཀའ་མོད། །
ལུས་རྟེན་གཞན་ལ་སྒུག་ཆོག །
ཡིད་ཀྱི་དད་འདུན་འགུག་པའི། །
ཞི་བ་དབྱངས་ཀྱི་ལྷ་མོ། །
བུ་མོ་ཀུན་དགའ་མཚོ་མོ། །
ནང་སེམས་སྒུལ་བའི་མི་ཡིན། །