དེ་རིང་ང་ཚོ་འདི་རུ་གཟབ་རྒྱས་ངང་འཚོགས་ཏེ་ཀྲུང་དབྱང་ཏང་གི་སློབ་གྲྭ་བཙུགས་ནས་ལོ་ངོ་90འཁོར་བར་རྟེན་འབྲེལ་ཞུ་རྒྱུ་དང་། དེ་དང་སྦྲགས་ནས་ཀྲུང་དབྱང་ཏང་གི་སློབ་གྲྭ་2023ལོའི་དཔྱིད་ཀའི་སློབ་དུས་འགོ་ཚུགས་མཛད་སྒོ་ཡང་འཚོག་རྒྱུ་ཡིན། ཐོག་མར་ངས་ཏང་ཀྲུང་དབྱང་གི་ཚབ་ཞུས་ནས་ཀྲུང་དབྱང་ཏང་གི་སློབ་གྲྭ་（རྒྱལ་ཁབ་སྲིད་འཛིན་སློབ་གླིང་）ཡི་དགེ་རྒན་དང་ལས་བཟོ་པ་དང་སློབ་མ་ཡོངས་དང་། རྒྱལ་ཡོངས་ཏང་གི་སློབ་གྲྭ་（སྲིད་འཛིན་སློབ་གླིང་）ཁོངས་གཏོགས་ཀྱི་བློ་མཐུན་ཚོར་སྤྲོ་སེམས་འཁོལ་བའི་ངང་ནས་རྟེན་འབྲེལ་ཞུ་རྒྱུ་དང་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན།
1933ལོར་ཀྲུང་དབྱང་ཏང་གི་སློབ་གྲྭ་བཙུགས་པ་ནས་ད་བར་ལོ་ངོ་90ཡི་འོད་སྟོང་འཕྲོ་བའི་ལོ་རྒྱུས་བརྒྱུད་མྱོང་ཡོད། ལོ་ངོ་90ཡི་རིང་། ཀྲུང་དབྱང་ཏང་གི་སློབ་གྲྭས་ཏང་གི་ལས་བྱེད་པ་གསོ་སྐྱོང་དང་། ཏང་གི་བསམ་བློ་དང་རིགས་པའི་གཞུང་ལུགས་འཛུགས་སྐྱོང་ལ་སྐུལ་འདེད། ཏང་དང་མི་དམངས་ཀྱི་བྱ་གཞག་ལ་ཞབས་ཞུ་བཅས་ཀྱི་ཆེད་དུ་ལེགས་སྐྱེས་གལ་ཆེན་ཕུལ་བ་དང་། ཉམས་མྱོང་རྩ་ཆེན་མང་པོ་བསགས་ཡོད། ལོ་རྒྱུས་ལ་ཕྱིར་མིག་བལྟས་ན། ཏང་གི་སློབ་གྲྭས་ཐོག་མཐའ་བར་གསུམ་དུ་འགྱུར་བ་མི་གཏོང་བའི་ཐོག་མའི་བསམ་འདུན་ནི་ཏང་ལ་ཤེས་ལྡན་པ་གསོ་སྐྱོང་དང་ཏང་ལ་ཐབས་ཇུས་འདོན་རྒྱུ་དེ་རེད། དུས་རབས་གསར་པ་དང་འཐབ་ལམ་གསར་པར་རིམ་པ་ཁག་གི་ཏང་གི་སློབ་གྲྭས་ཐོག་མའི་བསམ་འདུན་འདི་བརྟན་སྲུང་དང་། བློ་རྩ་བརྟན་པོས་ཡར་རྒྱས་བརྩོན་ལེན། འབད་འབུངས་ཡར་བརྩོན་བཅས་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་། ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་སྤེལ་གཏོང་ཆེད་ལེགས་སྐྱེས་གསར་པ་འབུལ་དགོས།
གཅིག །ཏང་གི་སློབ་གྲྭའི་ཐོག་མའི་བསམ་འདུན་བརྟན་སྲུང་བྱེད་དགོས་ན་ངེས་པར་དུ་དུས་ནམ་ཡིན་ཡང་ཏང་དང་རྒྱལ་ཁབ་ཀྱི་ལས་དོན་གྱི་སྤྱི་ཡོངས་ལ་རང་རྟོགས་ངང་ཞབས་ཞུ་ཡག་པོ་བསྒྲུབ་དགོས།
ལྟེ་བར་དམིགས་པ་དང་ཁྱོན་ཡོངས་ལ་ཞབས་འདེགས་ཞུ་རྒྱུ་ནི་ཏང་གི་སློབ་གྲྭའི་བྱ་གཞག་གིས་ངེས་པར་ཐོག་མཐའ་བར་གསུམ་དུ་རྒྱུན་འཁྱོངས་བྱེད་དགོས་པའི་ཆབ་སྲིད་ཀྱི་ལངས་གནས་ཡིན་པ་དང་། ཏང་གི་སློབ་གྲྭའི་ཐོག་མའི་བསམ་འདུན་ལག་ལེན་བསྟར་བའི་ལྡོག་མེད་ཀྱི་བླང་བྱ་ཡིན། ཏང་གི་སློབ་གྲྭ་ནི་སྤྱིར་བཏང་གི་སློབ་གྲྭ་ཞིག་མ་ཡིན་པར་ཏང་གི་སློབ་གྲྭ་ཞིག་དང་ཏང་གི་འགན་ནུས་སྡེ་ཚན་གལ་ཆེན་ཞིག་ཡིན་པས། ངེས་པར་དུ་ཏང་གི་དར་ཆ་དེ་དར་ཆ་དང་། ཏང་གི་འདོད་བློ་དེ་འདོད་བློ། ཏང་གི་འགན་འཁྲི་དེ་འགན་འཁྲི་བཅས་སུ་བརྩི་རྒྱུ་ཐོག་མཐའ་བར་གསུམ་དུ་རྒྱུན་འཁྱོངས་བྱས་ཏེ། རང་རྟོགས་ངང་ཏང་གི་བྱ་གཞག་རླབས་པོ་ཆེ་གསར་པ་དང་ཏང་འཛུགས་སྐྲུན་གྱི་ལས་གྲྭ་རླབས་པོ་ཆེ་གསར་པའི་ནང་གནས་ངེས་གནད་ལ་འཕིགས་པ་བྱེད་དགོས་པ་དང་། རང་རྟོགས་ངང་ཏང་དང་རྒྱལ་ཁབ་ཀྱི་ལས་ཀའི་སྤྱི་ཡོངས་ལ་ཞབས་འདེགས་ཞུ་དགོས།
ལོ་རྒྱུས་ཀྱི་དུས་སྐབས་མི་འདྲ་བའི་ནང་གི་ཏང་གི་སློབ་གྲྭར་ཐོབ་པའི་གྲུབ་འབྲས་གལ་ཆེན་དང་འོད་སྟོང་འབར་བའི་གྲུབ་འབྲས་དག་ནི་ཏང་གི་ལྟེ་བའི་ལས་དོན་དང་དུ་བླངས་ཤིང་དེར་ཞབས་འདེགས་ཞུས་པ་ལས་བྱུང་བ་རེད། ཡན་ཨན་དུས་སྐབས་སུ། ཀྲུང་དབྱང་ཏང་གི་སློབ་གྲྭ་ནི་ཏང་ཡོངས་ཀྱི་ཀུན་སྤྱོད་དག་ཐེར་ལས་འགུལ་གྱི་“དཔུང་སྒར་ཆེན་པོ་”རུ་གྱུར་ཏེ། གནས་གཞིའི་ས་ཁུལ་ཁག་དང་ཕྱོགས་སོ་སོའི་འགོ་ཁྲིད་རྐང་འཛིན་པ་འབོར་ཆེན་གཅིག་ཏུ་བསྡུས་ཤིང་། ཀུན་སྤྱོད་དག་ཐེར་གྱི་ཡིག་ཆ་སྒྲིག་འཛུགས་སློབ་སྦྱོང་དང་། ལོ་རྒྱུས་ཀྱི་ཉམས་མྱོང་ཕྱོགས་བསྡོམས། བསམ་བློའི་ངོས་འཛིན་མཐོར་འདེགས་བཅས་བྱས་ཏེ། ཏང་ཡོངས་ལ་སྔར་བྱུང་མ་མྱོང་བའི་མཐུན་སྒྲིལ་དང་གཅིག་གྱུར་ཡོང་བར་སྐུལ་འདེད་བཏང་། བློ་མཐུན་མའོ་ཙེ་ཏུང་གིས་ཏང་གི་ཚོགས་ཆེན་ཐེངས་བདུན་པའི་ཐོག་བསྡོམས་ཚིག་སྙན་ཞུ་གནང་སྐབས། “ཀྲུང་དབྱང་འདི་རུ་ཡོད་པ་དང་། ཏང་གི་སློབ་གྲྭ་འདི་རུ་ཡོད་པ། ཚོགས་ཆེན་ཐེངས་བདུན་པ་འདི་རུ་འཚོགས་ཡོད་པ་བཅས་ཀྱི་གནད་དོན་འདི་ཐག་གཅོད་བྱས་ན་ཀྲུང་ཧྭ་མི་རིགས་ལ་རྒྱལ་ཁ་འཐོབ་ངེས་རེད་”ཅེས་གསུངས་པ་དེའི་ཐོག་ནས། ཀྲུང་དབྱང་ཏང་གི་སློབ་གྲྭས་ཀྲུང་གོའི་གསར་བརྗེའི་ཁྲོད་དུ་བཟུང་བའི་གོ་གནས་དང་ནུས་པ་གལ་ཆེན་ལ་ཁས་ལེན་གང་ལེགས་གནང་བ་རེད། ཀྲུང་གོ་གསར་པ་དབུ་བརྙེས་རྗེས། ཏང་གི་སློབ་གྲྭས་ཏང་གི་ལྟེ་བའི་ལས་དོན་གྲོང་གསེབ་ནས་གྲོང་ཁྱེར་དང་། གསར་བརྗེ་ནས་འཛུགས་སྐྲུན་གྱི་ཕྱོགས་སུ་བསྒྱུར་བ་དང་། མཐོ་རིམ་ཏང་གི་སློབ་གྲྭ་དང་། འབྲིང་རིམ་ཏང་གི་སློབ་གྲྭ། དམའ་རིམ་ཏང་གི་སློབ་གྲྭ་བཅས་ལས་གྲུབ་ཅིང་རྒྱལ་ཡོངས་ལ་ཁྱབ་པའི་ཏང་གི་སློབ་གྲྭའི་སློབ་གསོའི་མ་ལག་ཆགས་པ་དང་། མར་ཁེ་སིའི་རིང་ལུགས་ཀྱི་གཞི་རྩའི་རིགས་པའི་གཞུང་ལུགས་དང་རིག་གནས་ཤེས་བྱའི་སྐོར་གྱི་གསོ་སྦྱོང་རྒྱ་ཁྱབ་ཏུ་སྤེལ་བས། སྤྱི་ཚོགས་རིང་ལུགས་ཀྱི་གསར་བརྗེ་དང་འཛུགས་སྐྲུན་ལ་ཤེས་ལྡན་པ་འབོར་ཆེན་གསོ་སྐྱོང་བྱས་པ་རེད། སྒྱུར་བཅོས་སྒོ་འབྱེད་ཀྱི་དུས་འགོར། ཀྲུང་དབྱང་ཏང་གི་སློབ་གྲྭས་དར་སྲོལ་གྱི་སྒོ་མོ་ཕྱེ་ནས་བདེན་དོན་ཚད་གཞིའི་གནད་དོན་གྲོས་བསྡུར་བྱེད་པའི་འབྱུང་གནས་གལ་ཆེན་དང་གཡུལ་ས་གལ་ཆེན་ཞིག་ཏུ་གྱུར་ཏེ། ཏང་ཡོངས་ཀྱིས་བསམ་བློ་བཅིངས་འགྲོལ་གཏོང་བར་སྐུལ་འདེད་དང་། ཏང་གི་དངོས་ཐོག་བདེན་འཚོལ་གྱི་བསམ་བློའི་ལམ་ཕྱོགས་བསྐྱར་དུ་གཏན་འཁེལ། སློབ་སྟོན་བསམ་བློའི་ཐད་ཟིང་བཅོས་ཡོ་བསྲང་བཅས་བྱེད་པར་ཐུན་མོང་མ་ཡིན་པའི་ནུས་པ་འདོན་སྤེལ་བྱས་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་པ་དང་ཏང་གི་སློབ་གྲྭའི་བྱ་གཞག་ལའང་འཕེལ་རྒྱས་ཆེན་པོ་བྱུང་ཡོད། ཏང་གི་སློབ་གྲྭས་ཏང་གི་བྱ་གཞག་འཕེལ་རྒྱས་གཏོང་རྒྱུའི་བླང་བྱ་གསར་པར་གཞིགས་ནས་སློབ་ཁྲིད་ཀྱི་བཀོད་པ་ལེགས་སུ་གཏོང་བ་དང་། སློབ་གསོ་དང་གསོ་སྦྱོང་གི་དམིགས་བྱའི་རང་བཞིན་དང་དངོས་ཕན་རང་བཞིན་ཆེ་རུ་བཏང་ནས་ཏང་ཡོན་ལས་བྱེད་པའི་ཆབ་སྲིད་ཀྱི་བྱང་ཚད་དང་། རིགས་པའི་གཞུང་ལུགས་ཀྱི་བྱང་ཚད། ཏང་གཤིས་བློ་སྦྱོང་། འགན་འཁྲི་སྒྲུབ་པའི་འཇོན་ཐང་བཅས་ཆེ་རུ་འགྲོ་བར་སྐུལ་འདེད་ནུས་ལྡན་བཏང་ཡོད་པ་དང་། དུས་རབས་གསར་པར་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བའི་ཐད་ཕུལ་བྱུང་ལས་བྱེད་པ་འབོར་ཆེན་གསོ་སྐྱོང་བྱས་ཡོད་ཅིང་། ཏང་གི་ཆབ་སྲིད་ལམ་ཕྱོགས་དང་། བསམ་བློའི་ལམ་ཕྱོགས། རྩ་འཛུགས་ལམ་ཕྱོགས། མང་ཚོགས་ལམ་ཕྱོགས་བཅས་ལག་ལེན་མཐར་ཕྱིན་བྱེད་པར་སྐུལ་འདེད་གཏོང་བ་དང་། ཏང་གི་བྱ་གཞག་དང་ཏང་འཛུགས་སྐྲུན་སྐུལ་འདེད་གཏོང་བར་ནུས་པ་གལ་ཆེན་འདོན་སྤེལ་བྱས་ཡོད།
ཏང་གི་ཚོགས་ཆེན་ཉི་ཤུ་པའི་ཐོག་དུས་རབས་གསར་པ་དང་འཐབ་ལམ་གསར་པའི་ཏང་གི་ལྟེ་བའི་ལས་འགན་གསལ་པོར་བཏོན་པ་སྟེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་དང་། ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་རྒྱུ་དེ་རེད། འདི་ནི་རླབས་ཆེ་ཞིང་དཀའ་ཚེགས་ཆེ་བའི་བྱ་གཞག་ཅིག་ཡིན་པས། ཏང་གི་སློབ་གྲྭའི་བྱ་གཞག་ལ་སྔར་ལས་མཐོ་བའི་བླང་བྱ་གསར་པ་བཏོན་ཡོད་པ་དང་། སྔར་ལས་རྒྱ་ཆེ་བའི་མདུན་ལམ་བཏོད་ཡོད་པ་རེད། རིམ་པ་ཁག་གི་ཏང་གི་སློབ་གྲྭས་“རྒྱལ་ཁབ་ཀྱི་དོན་ཆེན་”དང་ཏང་གི་ཇུས་ཆེན་བློ་ལ་བཅངས་ནས་ཆབ་སྲིད་བརྡར་ཤ་གཅོད་ནུས་དང་། ཆབ་སྲིད་ངེས་ཤེས་འདྲོངས་ནུས། ཆབ་སྲིད་ལག་བསྟར་བྱེད་ནུས་བཅས་ཟམ་མི་ཆད་པར་ཆེ་རུ་བཏང་སྟེ། ཏང་གི་སློབ་གྲྭའི་ལས་དོན་དེ་ཏང་དང་རྒྱལ་ཁབ་ཀྱི་ལས་དོན་གྱི་སྤྱི་ཡོངས་དང་ཏང་འཛུགས་སྐྲུན་གྱི་ཁྱོན་ཡོངས་ནང་རང་རྟོགས་ངང་བཞག་ནས་གནས་ངེས་གནས་ལ་འཕིགས་པ་དང་ཇུས་འགོད་ཚན་རིག་དང་མཐུན་པ་བྱེད་དགོས་པ་དང་། དུས་རབས་གསར་པ་དང་འཐབ་ལམ་གསར་པའི་ཏང་གི་ལྟེ་བའི་ལས་འགན་མངོན་འགྱུར་བྱེད་པར་རྩེ་གཅིག་ཏུ་དམིགས་ནས་ལས་འགན་ཡག་པོར་སྒྲུབ་པ་དང་དགེ་མཚན་འདོན་སྤེལ་བྱེད་དགོས། ངེས་པར་དུ་སློབ་གཉེར་ཁ་ཕྱོགས་ཡང་དག་པ་རྒྱུན་འཁྱོངས་དང་། ཐོག་མཐའ་བར་གསུམ་དུ་ཏང་གི་སློབ་གྲྭའི་རུས་མིང་ལ་ཏང་ཟེར་བ་རྒྱུན་འཁྱོངས། ཏང་གཤིས་ཀྱི་རྩ་དོན་རྒྱུན་འཁྱོངས། རང་རྟོགས་ངང་ཏང་ལ་ཞབས་འདེགས་ཞུ་བའི་ཆབ་སྲིད་ལམ་ཕྱོགས་ལ་བརྩི་བཀུར། ཏང་གི་ཆབ་སྲིད་སྒྲིག་ཁྲིམས་དང་ཆབ་སྲིད་སྒྲིག་ལམ་ནན་སྲུང་། ཏང་ཡོན་ཡིན་ན་ཏང་ལ་དགའ་ཞེན་ཆེ་བ་དང་། ཏང་གི་སྐད་ཆ་བཤད་པ། ཏང་གི་ལས་དོན་སྒྲུབ་པ་བཅས་རྒྱུན་འཁྱོངས། “འདུ་ཤེས་བཞི་”ཆེ་རུ་སྐྱེད་པ་དང་། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”བྱེད་ཐུབ་པ་བཅས་བྱས་ཏེ། བསམ་བློ་དང་། ཆབ་སྲིད། བྱ་སྤྱོད་བཅས་ཀྱི་ཐད་རང་རྟོགས་ངང་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ་རྒྱུན་འཁྱོངས་བྱེད་དགོས། ངེས་པར་དུ་ཏང་གི་ལྟེ་བའི་ལས་འགན་ལ་རྩེ་གཅིག་ཏུ་དམིགས་ཏེ། ཏང་གི་སློབ་གྲྭའི་ལས་དོན་དང་ཏང་གི་ལྟེ་བའི་ལས་འགན་གཉིས་ཀྱི་སྦྲེལ་གནས་དང་། འཇུག་གནས། ཤུགས་རྒྱག་ས་བཅས་གནད་ལ་འཁེལ་བར་འཚོལ་བ་དང་། ཏང་གི་དགོས་མཁོ་དང་ཉེ་བར་བསྟུན་པ། རང་ངོས་ཀྱི་དགེ་མཚན་འདོན་སྤེལ་བཅས་བྱས་ཏེ། ཏང་ལ་ལས་བྱེད་པ་གང་འདྲ་ཞིག་མཁོ་ན་ཏང་གི་སློབ་གྲྭས་ལས་བྱེད་པ་དེ་འདྲ་གསོ་སྐྱོང་བྱེད་དགོས་པ་དང་། ཏང་གིས་གནད་དོན་ཆེན་པོ་གང་འདྲ་ཞིག་ཞིབ་འཇུག་དང་ཐག་གཅོད་བྱེད་དགོས་ན་ཏང་གི་སློབ་གྲྭས་ཕྱོགས་དེའི་ཐད་ནས་ཐབས་འདོན་ཇུས་འབུལ་བྱེད་པར་འབད་བརྩོན་བྱེད་དགོས། ངེས་པར་དུ་སློབ་ཞིབ་དང་ལག་ལེན་ཕན་ཚུན་སྦྲེལ་མཐུད་བྱ་རྒྱུ་རྒྱུན་འཁྱོངས་བྱས་ཏེ། སློབ་ཁྲིད་ཚན་ཞིབ་ཀྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལག་ལེན་དང་སྣ་སྦྲེལ་བྱེད་པའི་ཐབས་ལམ་ཐོགས་མེད་བདེ་བགྲོད་ཡོང་བ་དང་། ཏང་གི་སློབ་གྲྭའི་སློབ་ཞིབ་མི་སྣ་མདུན་གནས་སྐྱོད་དེ་ལག་ལེན་བྱེད་པར་སྐུལ་འདེད། དོན་དངོས་དང་འབྲེལ་གཏུག་དང་ལག་ལེན་ནང་ཟབ་ཞུགས་བྱེད་པའི་ཁྲོད་མཐོང་རྒྱ་ཆེ་རུ་སྐྱེད་པ་དང་། བསམ་བློ་རྒྱ་ཆེན་པོར་གཏོང་བ། ཉམས་མྱོང་ཕུན་ཚོགས་སུ་གཏོང་བ་བཅས་བྱས་པའི་ཐོག་ནས། བྱང་ཚད་མཐོ་བའི་ལས་བྱེད་པ་གསོ་སྐྱོང་དང་སྤུས་ཚད་མཐོ་བའི་ཞིབ་འཇུག་གྲུབ་འབྲས་འདོན་རྒྱུར་འདེགས་སྐྱོར་ནུས་ལྡན་བྱེད་དགོས།
གཉིས། ཏང་གི་སློབ་གྲྭའི་ཐོག་མའི་བསམ་འདུན་བརྟན་སྲུང་བྱེད་དགོས་ན་ངེས་པར་དུ་མི་རིགས་བསྐྱར་དར་གྱི་འགན་ལྗིད་ཐེག་ཐུབ་པའི་སྲིད་སྐྱོང་རྐང་འཛིན་དཔུང་སྡེ་སྐྱེད་སྲིང་བྱེད་པའི་ཐད་ཧུར་ཐག་བྱེད་དགོས།
ཏང་གི་སློབ་གྲྭ་ནི་ལས་བྱེད་པར་སློབ་གསོ་དང་གསོ་སྦྱོང་བྱེད་པའི་གཡུལ་ས་གཙོ་བོ་ཞིག་ཡིན། ང་ཚོའི་ཏང་གིས་དང་ཐོག་ཀྲུང་དབྱང་ཏང་གི་སློབ་གྲྭ་འཛུགས་དགོས་དོན་ཅི་ཡིན་ཞེ་ན། མི་དམངས་བཅིངས་འགྲོལ་བྱ་གཞག་ལ་རྐང་འཛིན་སྟོབས་ཤུགས་སྐྱེད་སྲིང་བྱེད་ཆེད་དུ་ཡིན། ལོ་ངོ་90ཡི་རིང་། རིམ་པ་ཁག་གི་ཏང་གི་སློབ་གྲྭ་སྤྱི་དང་ལྷག་པར་དུ་ཀྲུང་དབྱང་ཏང་གི་སློབ་གྲྭས་ཏང་གི་བྱ་གཞག་དང་མཉམ་གཅིག་ཏུ་སྒྲ་འདོན་པ་དང་། དགོས་མཁོ་ལྟར་གསོ་སྦྱོང་སྤེལ་ཏེ། འགོ་ཁྲིད་ལས་བྱེད་པ་སྐོར་ཁག་བཞིན་སློབ་གསོ་དང་གསོ་སྦྱོང་བྱས་ཡོད་པ་དང་། ཏང་ལ་འཇོན་མི་གསོ་སྐྱོང་བྱེད་པའི་བླ་མེད་ལས་འགན་ཕྲག་ཏུ་བླངས་ཏེ། ཏང་གི་བྱ་གཞག་རྒྱལ་ཁ་ནས་རྒྱལ་ཁ་གསར་པའི་ཕྱོགས་སུ་སྐྱོད་པར་སྐུལ་འདེད་བཏང་ཡོད། དཔེར་ན། ཏང་གི་སློབ་གྲྭ་བཙུགས་མ་ཐག་པའི་དུས་སུ། མར་ཁེ་སི་གུང་ཁྲན་རིང་ལུགས་སློབ་གྲྭས་ལོ་གཅིག་ལྷག་ཙམ་གྱི་རིང་ལ་ལས་བྱེད་པ་1000ལྷག་ཙམ་གསོ་སྦྱོང་བྱས་པ་དང་། ཡན་ཨན་དུས་སྐབས་སུ། ཀྲུང་དབྱང་ཏང་གི་སློབ་གྲྭའི་རྒྱུན་སྲོལ་འཛིན་གྲྭས་རིགས་མི་འདྲ་བའི་རྐང་འཛིན་པ་ཁྲི་ལྷག་སྐྱེད་སྲིང་བྱས་ཡོད་པ་དང་། དེའི་ནང་གི་65%ཡི་ཏང་གི་ཚོགས་ཆེན་ཐེངས་བདུན་པའི་འཐུས་མིས་ཀྲུང་དབྱང་ཏང་གི་སློབ་གྲྭ་ནས་སློབ་སྦྱོང་དང་ལས་ཀ་བྱས་མྱོང་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཀྲུང་དབྱང་ཏང་གི་སློབ་གྲྭས་གཉེར་བའི་འཛིན་གྲྭ་གཙོ་བོས་ཁྱོན་བསྡོམས་ལས་བྱེད་པ་ཁྲི་8.8གསོ་སྦྱོང་དང་རེས་སྐོར་སྦྱོང་བརྡར་བྱས་ཡོད་པ་དང་། དེའི་ནང་ཞིང་ཆེན་དང་པུའུ་རིམ་པའི་ལས་བྱེད་པ་ཁྲི་1.3ལྷག་ཡོད། ཏང་ལ་འཇོན་མི་གསོ་སྐྱོང་བྱ་རྒྱུ་ནི་ཏང་གི་སློབ་གྲྭའི་དམིགས་བསལ་གྱི་རིན་ཐང་གནས་ས་ཡིན།
དུས་རབས་གསར་པ་དང་འཐབ་ལམ་གསར་པའི་ཐོག་ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་བྱ་གཞག་འཕེལ་རྒྱས་ཀྱི་རྣམ་པ་གསར་པ་གཏོད་དགོས་ན་ངེས་པར་དུ་མི་རིགས་བསྐྱར་དར་གྱི་འགན་ལྗིད་ཐེག་ཐུབ་པའི་བྱང་ཚད་མཐོ་བའི་ལས་བྱེད་པའི་དཔུང་སྡེ་ཞིག་སྐྱེད་སྲིང་བྱེད་དགོས། དེའི་ཐད་དུ་ཏང་གི་སློབ་གྲྭའི་ལས་འགན་ལྕི་ལ་འཁུར་དགོས་ངེས་ཀྱི་འགན་འཁྲི་ཡོད། ཏང་ལ་འཇོན་མི་གསོ་སྐྱོང་བྱེད་དགོས་ན། དུས་རབས་གསར་པའི་གནས་ལུགས་འབོགས་པ་དང་། ཤེས་ཡོན་ཁྲིད་པ། དོགས་པ་གཅོད་པ་གསུམ་གྱི་ལས་ཀ་ཡག་པོར་བསྒྲུབ་དགོས་པ་སྟེ། མར་ཁེ་སིའི་རིང་ལུགས་ཀྱི་བདེན་དོན་གྱི་གནས་ལུགས་ཡག་པོར་འབོགས་པ་དང་། སྒྱུར་བཅོས་འཕེལ་རྒྱས་བརྟན་བརླིང་གསུམ་ལ་སྐུལ་འདེད་གཏོང་བའི་སྐོར་གྱི་ཤེས་ཡོན་ཡག་པོར་ཁྲིད་པ། རང་སྣང་གི་འཇིག་རྟེན་དང་དོན་གནས་ཀྱི་འཇིག་རྟེན་བསྒྱུར་བཀོད་བྱེད་སྐབས་འཕྲད་པའི་དོགས་པ་ཡག་པོར་གཅོད་པ་བཅས་བྱེད་དགོས།
རིགས་པའི་གཞུང་ལུགས་ཀྱི་བློ་སྦྱོང་ནི་འགོ་ཁྲིད་ལས་བྱེད་པའི་ཕྱོགས་བསྡུས་བྱང་ཚད་ཀྱི་སྲོག་ཤིང་ལྟ་བུ་ཡིན་ལ། རིགས་པའི་གཞུང་ལུགས་སྟེང་གནད་སྨིན་བྱུང་བ་ནི་ཆབ་སྲིད་སྟེང་གནད་སྨིན་ཡོང་བའི་རྨང་གཞི་ཡིན་པ་དང་། ཆབ་སྲིད་སྟེང་གི་བློ་རྩ་བརྟན་པོ་དེ་རིགས་པའི་གཞུང་ལུགས་སྟེང་གི་རིག་པ་གསལ་པོ་ལས་བྱུང་བ་ཡིན། འགོ་ཁྲིད་ལས་བྱེད་པའི་ངོས་ནས་བཤད་ན། མར་ཁེ་སི་རིང་ལུགས་ཞེས་པའི་ཉེར་མཁོའི་འཇོན་ཐང་ཁོང་དུ་ཇི་ཙམ་བརྟན་པོར་ཆུད་ན། ཆབ་སྲིད་ཀྱི་ལངས་གནས་དེ་ཙམ་གྱིས་མཐོ་བ་དང་། ཆབ་སྲིད་བརྡར་ཤ་གཅོད་ནུས་དང་། ཆབ་སྲིད་ངེས་ཤེས་འདྲོངས་ནུས། ཆབ་སྲིད་ལག་བསྟར་བྱེད་ནུས་བཅས་དེ་ཙམ་གྱིས་ཆེ་བ། དུས་བབ་ལ་ལྟ་ཞིབ་དང་། འཕེལ་རྒྱས་ཇུས་འགོད། ཉེན་ཁ་འགོག་སེལ་བཅས་བྱེད་པའི་རང་དབང་དེ་ཙམ་གྱིས་ཆེ་བ་བཅས་ཡིན། ཏང་གི་སློབ་གྲྭ་ནི་ཏང་ཡོན་དང་ལས་བྱེད་པས་མར་ཁེ་སིའི་རིང་ལུགས་ཀྱི་རིགས་པའི་གཞུང་ལུགས་སློབ་སྦྱོང་དང་། རིགས་པའི་གཞུང་ལུགས་ཀྱི་ཆུ་ཚད་མཐོ་རུ་གཏོང་བའི་གནས་ཤིག་ཡིན། བློ་མཐུན་མའོ་ཙེ་ཏུང་གིས་བསྟན་དོན། “ང་ཚོས་ཏང་གི་སློབ་གྲྭ་འཛུགས་གཉེར་བྱེད་དོན་ནི་ང་ཚོའི་བློ་མཐུན་རྣམས་ཀྱི་ཆབ་སྲིད་ཀྱི་ཆུ་ཚད་དང་རིགས་པའི་གཞུང་ལུགས་ཀྱི་ཆུ་ཚད་སྔར་ལས་མཐོ་རུ་གཏོང་རྒྱུ་དང་། ང་ཚོའི་ཏང་སྔར་ལས་གཅིག་གྱུར་ཡོང་བར་བྱ་རྒྱུ་དེ་ཡིན།” སྐད་ཆ་འདི་ད་ལྟ་དང་ཕྱིན་ཆད་གང་ཡིན་ལ་སྤྱད་འཐུས་པ་དང་། ཏང་གི་སློབ་གྲྭས་བསམ་བློའི་ཐོག་ནས་ཏང་འཛུགས་སྐྲུན་བྱེད་པའི་ཐད་གཞན་གྱིས་ཚབ་བྱེད་ཐབས་བྲལ་བའི་ནུས་པ་གལ་ཆེན་འདོན་སྤེལ་བྱེད་དགོས། ཏང་གི་སློབ་གྲྭས་མར་ཁེ་སིའི་རིང་ལུགས་ཀྱི་རིགས་པའི་གཞུང་ལུགས་ཀྱི་སློབ་གསོ་དང་གསོ་སྦྱོང་བྱེད་ཤུགས་སྔར་ལས་ཆེ་རུ་གཏོང་དགོས་པ་དང་། སློབ་མར་ཁྲིད་སྟོན་བྱས་ཏེ་མར་ཁེ་སིའི་རིང་ལུགས་ཀྱི་ཚད་ལྡན་གསུང་རྩོམ་ཞིབ་ཀློག་མང་ཙམ་བྱེད་པ་དང་། དེ་ལས་མར་ཁེ་སིའི་རིང་ལུགས་ཀྱི་རྩ་བའི་གནས་ལུགས་དངོས་གནས་རྟོགས་པ་དང་། མར་ཁེ་སིའི་རིང་ལུགས་ཀྱི་གཞི་རྩའི་རྩ་བའི་རིགས་པ་སྤྱད་དེ་དེང་རབས་ཀྱི་ཀྲུང་གོའི་དངོས་ཡོད་གནད་དོན་ཐག་གཅོད་བྱེད་པའི་ནུས་པ་ཏན་ཏིག་ཆེ་རུ་གཏོང་དགོས། མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་གྱི་གྲུབ་འབྲས་གསར་ཤོས་ལ་བརྟེན་ནས་བསམ་བློ་གཅིག་གྱུར་དང་། འདོད་བློ་གཅིག་གྱུར། བྱ་སྤྱོད་གཅིག་གྱུར་བཅས་བྱ་རྒྱུ་གཙོ་གནད་དུ་བཟུང་ནས་དམ་འཛིན་ཡག་པོ་བྱེད་དགོས་པ་དང་། རྒྱུན་འཁྱོངས་ལྷོད་མེད་ཀྱིས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་བློ་སྒྲིལ་སེམས་སྐྱེད་བྱེད་དགོས། རིམ་ཁག་ཏང་གི་སློབ་གྲྭས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དེ་སློབ་གསོ་དང་གསོ་སྦྱོང་གི་ལྟེ་བའི་ནང་དོན་དུ་བརྩི་རྒྱུ་རྒྱུན་འཁྱོངས་བྱས་ཐོག །སློབ་མ་ཚོར་ཁྲིད་སྟོན་བྱས་ནས་ཕྱོགས་ཡོངས་དང་མ་ལག་ཚང་བ་དང་གཏིང་ཟབ་མོའི་སྒོ་ནས་སློབ་སྦྱོང་བྱེད་པ་དང་། དགོངས་པ་དེའི་འཇིག་རྟེན་ལྟ་བ་དང་བརྟག་ཐབས་སྨྲ་བ་དང་དེ་བཞིན་དེའི་ནང་ཁྱབ་པའི་ལངས་ཕྱོགས་ལྟ་བ་བྱེད་ཐབས་གསུམ་དང་། རྒྱལ་སྲིད་སྐྱོང་ལུགས་སྐོར་གྱི་འདུ་ཤེས་གསར་པ་བསམ་བློ་གསར་པ་འཐབ་ཇུས་གསར་པ་གསུམ། ཏང་དོ་དམ་དང་ཏང་བཅོས་སྐྱོང་བྱེད་པའི་རྩ་བའི་བླང་བྱ་བཅས་ལ་གོ་བ་ཟབ་མོ་ལེན་པ། རིགས་པའི་གཞུང་ལུགས་སྟེང་གི་རིག་པ་གསལ་པོའི་ཐོག་ནས་ཆབ་སྲིད་སྟེང་དུ་བློ་རྩ་བརྟན་པོ་ཡོང་བ་དང་། བསམ་བློའི་སྟེང་གི་རང་རྟོགས་ཐོག་ནས་བྱ་སྤྱོད་སྟེང་དུ་རང་རྟོགས་ཡོང་བར་ཁྲིད་སྟོན་བྱེད་དགོས། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གསོ་སྦྱོང་དེ་ཏང་གི་ཚོགས་ཆེན་ཉི་ཤུ་པའི་དགོངས་དོན་གསོ་སྦྱོང་དང་ཟུང་འབྲེལ་བྱས་ཏེ། ཏང་ཡོན་ལས་བྱེད་པས་གཏིང་ཟབ་མོ་དང་ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ཁོང་དུ་ཆུད་པ་དང་། ཏང་གི་ཚོགས་ཆེན་ཉི་ཤུ་པའི་ཐོག་བཏོན་པའི་དམིགས་འབེན་དང་ལས་འགན་དོན་ཐོག་ཏུ་འཁྱོལ་བར་སྐུལ་འདེད་གཏོང་དགོས། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་སྤེལ་གྲབས་ཡོད་པ་དང་། རིམ་པ་ཁག་གི་ཏང་གི་སློབ་གྲྭས་ཏང་ཡོན་དང་ལས་བྱེད་པར་གསོ་སྦྱོང་བྱེད་པ་དང་། ཏང་གི་གསར་གཏོད་རིགས་པའི་གཞུང་ལུགས་ལ་འགྲེལ་པ་རྒྱག་པ་སོགས་ཀྱི་ཐད་ལ་ནུས་པ་འདོན་སྤེལ་ཡག་པོ་བྱེད་དགོས།
ཏང་གི་སློབ་གྲྭ་ནི་འགོ་ཁྲིད་ལས་བྱེད་པས་ཏང་གཤིས་སྦྱོང་བརྡར་བྱེད་པའི་“བཞུ་ཐབ་ཆེན་པོ་”ལྟ་བུ་ཡིན། རིམ་ཁག་ཏང་གི་སློབ་གྲྭས་ཏང་གཤིས་སློབ་གསོ་དེ་སློབ་ཁྲིད་ཀྱི་ནང་དོན་གཙོ་བོར་བྱས་ནས་ཕུགས་བསམ་དང་དད་སེམས་དང་། ཏང་གི་དགོངས་དོན། “ལོ་རྒྱུས་བཞི།” གསར་བརྗེའི་སྲོལ་རྒྱུན། ཀྲུང་ཧྭ་མི་རིགས་ཀྱི་སྲོལ་རྒྱུན་བཟང་པོ། ཏང་སྲོལ་སྲིད་གཙང་སོགས་ཀྱི་སློབ་གསོ་གཏིང་ཟབ་ཏུ་སྤེལ་དགོས་པ་དང་། ཏང་གི་སྒྲིག་ཡིག་དང་སྒྲིག་ལམ་དང་སྒྲིག་ཁྲིམས་ཀྱི་སློབ་སྦྱོང་སློབ་གསོ་དེ་ཏང་གཤིས་སློབ་གསོའི་ནང་དོན་གལ་ཆེན་དུ་བརྩིས་ནས། འགོ་ཁྲིད་ལས་བྱེད་པར་ཁྲིད་སྟོན་དང་སྐུལ་འདེད་བྱས་ཏེ་བསམ་བློའི་གོ་རྟོགས་དང་། བསམ་པའི་གོ་འཕང་། ཀུན་སྤྱོད་བློ་སྦྱོང་བཅས་རྒྱུན་ཆད་མེད་པར་མཐོ་རུ་གཏོང་དགོས་པ་དང་། ཡང་དག་པའི་དབང་ཆའི་ལྟ་བ་དང་། སྲིད་འབྲས་ཀྱི་ལྟ་བ། བྱ་གཞག་གི་ལྟ་བ་བཅས་འཛིན་དགོས་ལ། གུང་ཁྲན་ཏང་མིའི་ཆབ་སྲིད་ཀྱི་རང་བཞིན་རྒྱུན་འཁྱོངས་བྱེད་དགོས། ཉེན་ཟོན་སློབ་གསོ་ལ་ཤུགས་སྣོན་རྒྱག་དགོས་པ་དང་། སྒྲིག་འགལ་ཁྲིམས་འགལ་གྱི་གྱོད་དོན་དཔེ་མཚོན་ཅན་ལ་དབྱེ་ཞིབ་ཟབ་མོ་བྱས་ཏེ། སློབ་མར་ཁྲིད་སྟོན་བྱས་ཏེ་གཅིག་ཤེས་ཀུན་གྲོལ་དང་བསླབ་བྱར་འཛིན་དགོས། ཏང་གཤིས་སློབ་གསོའི་དམིགས་གཏད་རང་བཞིན་དང་དངོས་ཕན་རང་བཞིན་ཆེ་རུ་གཏོང་བ་དང་། སློབ་ཁྲིད་བྱེད་སྟངས་ལེགས་སུ་གཏོང་བ། སློབ་གསོའི་ཐོན་ཁུངས་མཉམ་འདྲེས་བཅས་བྱས་ནས་ཏང་གཤིས་སློབ་གསོ་སྔར་བས་གསོན་ཉམས་ལྡན་པ་དང་། གཏིང་ཟབ་པ། ཤ་ཁྲག་ལྡན་པ་བཅས་སུ་བྱེད་དགོས། ཏང་གཤིས་སློབ་གསོའི་ནང་གནས་ཆོས་ཉིད་ལ་ཞིབ་འཇུག་གཏིང་ཟབ་མོ་དང་། དུས་འཁོར་ཀུན་དང་མུ་ཕྲེང་ཡོངས་ཀྱི་སློབ་གསོའི་རྣམ་པ་འཚོལ་ཞིབ། ཏང་གཤིས་སློབ་གསོ་དེ་སློབ་ཁྲིད་དང་དོ་དམ་གྱི་བརྒྱུད་རིམ་ཧྲིལ་པོར་ཁྱབ་པ་བཅས་བྱས་ཏེ། ཏང་གཤིས་སློབ་གསོ་དེ་རྡོ་ལ་རི་མོ་བརྐོས་པ་ཇི་བཞིན་སེམས་གཏིང་ལ་འཇགས་པ་དང་། སློབ་མས་ཚེ་གང་བློ་ལ་ངེས་ཐུབ་པ་བྱེད་དགོས།
བྱ་བ་སྒྲུབ་པ་དང་ལས་ཀ་གསར་གཏོད་བྱེད་པར་ཆབ་སྲིད་ལ་བྱང་བ་བྱེད་དགོས་ལ་འཇོན་ཐང་ཡང་ཆེན་པོ་ལྡན་དགོས། ད་ལྟའི་འགོ་ཁྲིད་ལས་བྱེད་པའི་སྦྱངས་རབས་ཅུང་མཐོ་བ་དང་། མི་མང་པོ་ཞིག་ལ་འབུམ་རམས་པ་དང་རབ་འབྱམས་པའི་སློབ་གནས་ཡོད་མོད། འོན་ཀྱང་སྔར་བཞིན་“འཇོན་ཐང་གི་འཇིགས་སྣང་”དང་ནུས་པས་མི་འདང་བའི་གནད་དོན་གནས་ཡོད། ཏང་དང་མི་དམངས་ཀྱིས་སྤྲད་པའི་དུས་རབས་གསར་པའི་ལས་འགན་དང་འགན་འཁྲི་ཡག་པོར་བསྒྲུབ་དགོས་ན། འགོ་ཁྲིད་ལས་བྱེད་པས་ངེས་པར་དུ་ཕྱོགས་ཡོངས་ནས་ཕྱོགས་གང་ཅིའི་ཐད་ཀྱི་འཇོན་ཐང་ཆེ་རུ་བཏང་སྟེ་རང་འཁྲིའི་ལས་འགན་སྒྲུབ་མཁན་གོམས་བྱང་ཅན་ཆགས་པ་བྱེད་དགོས། རིམ་པ་ཁག་གི་ཏང་གི་སློབ་གྲྭས་ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་གལ་ཆེན་ལ་དམ་པོར་དམིགས་པ་དང་། རྒྱལ་ཁབ་ཀྱི་གནད་ཆེའི་འཐབ་ཇུས་དགོས་མཁོ་དང་ཟུང་འབྲེལ་དམ་པོ་བྱས་ཏེ། དངོས་གཉེར་གོ་ཆོད་ཀྱི་ཆེད་ལས་ཅན་གྱི་ནུས་པའི་གསོ་སྦྱོང་སྤེལ་དགོས། ཏང་གི་ཚོགས་ཆེན་ཉི་ཤུ་པའི་བླང་བྱ་ལྟར། འགོ་ཁྲིད་ལས་བྱེད་པའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འཇོན་ཐང་དང་། མང་ཚོགས་ལ་ཞབས་འདེགས་ཞུ་བའི་འཇོན་ཐང་། ཉེན་ཁ་འགོག་སེལ་བྱེད་པའི་འཇོན་ཐང་བཅས་གཙོ་གནད་དུ་བཟུང་ནས་ཆེ་རུ་གཏོང་བ་དང་། དུས་མཚུངས་སུ་འཐབ་རྩོད་ཀྱི་སྙིང་སྟོབས་དང་འཐབ་རྩོད་ཀྱི་འཇོན་ཐང་ཆགས་པར་ཤུགས་སྣོན་བརྒྱབ་སྟེ། ཉེན་ཁ་འགོག་པ་དང་། དཀའ་གནད་སེལ་བ། འགྲན་སློང་ལ་གདོང་གཏོད། བཙན་གནོན་འགོག་རྒོལ་བཅས་ཀྱི་ནུས་པ་ཆེ་རུ་ཤུགས་ཆེན་གཏོང་དགོས། ཏང་གི་སློབ་གྲྭས་ཚན་རིག་དང་མཐུན་པའི་སྒོ་ནས་ཆེད་ལས་སློབ་ཚན་བཀོད་སྒྲིག་བྱེད་དགོས་པ་དང་། དཔེ་མཚོན་ཅན་གྱི་སློབ་ཁྲིད་དང་། གནས་ཚུལ་ལད་ཟློས། གྲུབ་ཚུལ་ཅན་གྱི་ཞིབ་གྲོས། སློབ་མའི་གླེང་སྟེགས། ཉམས་མྱོང་སྤེལ་རེས། ཡུལ་དངོས་རྟོག་ཞིབ་སོགས་ཀྱི་བྱེད་ཐབས་སྣ་ཚོགས་ཕྱོགས་བསྡུས་ཀྱིས་སྤྱད་དེ། སློབ་མར་རོགས་རམ་བྱས་ཏེ་ཤེས་བྱའི་ཞན་ཆ་དང་། ནུས་པའི་ཆད་སྐྱོད། ཉམས་ཞན་ཉམས་མྱོང་བཅས་ཁ་གསབ་དང་། ཆེད་ལས་ཅན་གྱི་ཆུ་ཚད་རྒྱུན་ཆད་མེད་པར་མཐོར་འདེགས། འགོ་ཁྲིད་ཀྱི་ལས་འགན་སྔར་ལས་ལྷག་པར་ཁྱོག་ཐུབ་པ་བཅས་བྱེད་དགོས། ཏང་གི་སློབ་གྲྭར་སློབ་སྦྱོང་བྱེད་རིང་སློབ་མ་ཕན་ཚུན་བར་ལས་ཀའི་ཉམས་མྱོང་སྤེལ་རེས་དཔྱིས་ཕྱིན་པ་བྱས་ཏེ། ལས་གནས་མི་འདྲ་བ་དང་། ས་ཁོངས་མི་འདྲ་བ། མྱོང་བ་མི་འདྲ་བ་བཅས་ཀྱི་ལས་བྱེད་པས་དགེ་མཚན་གསབ་རེས་དང་ཐུན་མོང་ཐོག་འཕེལ་རྒྱས་ཡོང་བ་བྱེད་དགོས། འདི་ནི་ཏང་གི་སློབ་གྲྭའི་འགན་ནུས་གལ་ཆེན་ཞིག་ཡིན།
རིགས་པའི་གཞུང་ལུགས་ཀྱི་སློབ་གསོ་དང་། ཏང་གཤིས་ཀྱི་སློབ་གསོ། ནུས་པའི་གསོ་སྦྱོང་བཅས་ནི་འབྲལ་ཐབས་མེད་པའི་གཞི་མཐུན་པའི་ཆ་ཅན་ཞིག་ཡིན། རིམ་པ་ཁག་གི་ཏང་གི་སློབ་གྲྭས་མ་ལག་གི་འདུ་ཤེས་རྒྱུན་འཁྱོངས་དང་། གཅིག་འདོམས་ཀྱིས་འཆར་འགོད་དང་། སྟོབས་ཤུགས་མཉམ་འདོན་ལ་གཙིགས་སུ་བཟུང་སྟེ། ཧུར་ཐག་གིས་རིགས་པའི་གཞུང་ལུགས་ཀྱི་སློབ་གསོ་དེ་སྔར་ལས་ཆ་ཚང་ཞིང་གཏིང་ཟབ་པ་དང་། ཏང་གཤིས་ཀྱི་སློབ་གསོ་དེ་སྔར་ལས་བླ་སྲོག་དང་ལྡན་པ། ནུས་པའི་གསོ་སྦྱོང་དེ་སྔར་ལས་གནད་འཕིགས་ཆོད་ཆེ་བཅས་སུ་འགྱུར་བར་བྱེད་པ་དང་། ཏང་གི་སློབ་གྲྭ་ཉིད་འགོ་ཁྲིད་ལས་བྱེད་པས་ཉེར་མཁོའི་འཇོན་ཐང་རྒྱུད་ལ་འབྱོར་བ་དང་། ཏང་གཤིས་བློ་སྦྱོང་མཐོ་རུ་གཏོང་བ། སྤྱོད་ཚུལ་བཟང་པོ་དར་སྤེལ་གཏོང་བ། རང་འགན་ལྷུར་ལེན་གྱི་འཇོན་ཐང་ཆེ་རུ་གཏོང་བ་བཅས་ཀྱི་རྟེན་གཞི་གལ་ཆེན་ཞིག་ཏུ་འགྱུར་བ་བྱེད་དགོས།
གསུམ། ཏང་གི་སློབ་གྲྭའི་ཐོག་མའི་བསམ་འདུན་བརྟན་སྲུང་བྱེད་དགོས་ན་ངེས་པར་དུ་ཏང་གི་བསམ་བློ་དང་རིགས་པའི་གཞུང་ལུགས་འཛུགས་སྐྲུན་བྱེད་པའི་གསར་སྐྱེས་དམག་དཔུང་འཇོན་པོ་ཞིག་བྱེད་དགོས།
ཏང་གི་སློབ་གྲྭ་ནི་ཏང་གི་བསམ་བློ་དང་རིགས་པའི་གཞུང་ལུགས་ཀྱི་འཐབ་ཕྱོགས་ཀྱི་དམག་དཔུང་གལ་ཆེན་ཞིག་ཡིན་པ་དང་། དེས་ཏང་ལ་ཐབས་ཇུས་འདོན་པའི་ལས་འགན་གལ་ཆེན་ཐེག་ཡོད། ལོ་ངོ་90ཡི་རིང་། ཀྲུང་དབྱང་ཏང་གི་སློབ་གྲྭ་ནི་ཐོག་མཐའ་བར་གསུམ་དུ་ཏང་གི་བསམ་བློ་དང་རིགས་པའི་གཞུང་ལུགས་ཀྱི་མདུན་སར་ལངས་པ་དང་། ཏང་ཀྲུང་དབྱང་གི་གནད་ཆེའི་རིགས་པའི་གཞུང་ལུགས་གསར་གཏོད་དང་། གནད་ཆེའི་སྲིད་ཇུས་གང་བཏོན་དང་འབྲེལ་བ་དམ་པོ་ཡོད་ཅིང་། མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་དུ་འགྱུར་བར་སྐུལ་སྤེལ་གཏོང་བའི་ལོ་རྒྱུས་ཀྱི་འཕེལ་རིམ་ནང་ནུས་པ་གལ་ཆེན་ཐོན་ཡོད། མ་འོངས་པར་ཁ་ཕྱོགས་ཏེ། ཏང་གི་སློབ་གྲྭས་རིགས་པའི་གཞུང་ལུགས་ཀྱི་ཞིབ་འཇུག་དང་། ཁ་གཏད་འཇལ་ཐབས་ཀྱི་ཞིབ་འཇུག་ཅེས་པའི་ཆོས་ཉིད་འཚོལ་ཞིབ་བྱེད་པ་དང་ཡུན་རིང་སྤྱོད་གོ་ཆོད་པའི་རིག་གཞུང་ཆེན་པོ་འདི་ཡག་པོར་བསྒྲུབ་དགོས་པ་དང་། ཏང་གི་གསར་གཏོད་རིགས་པའི་གཞུང་ལུགས་ལ་ཞིབ་འཇུག་དང་འགྲེལ་པ་རྒྱག་པ་དང་། ཏང་གི་རིགས་པའི་གཞུང་ལུགས་གསར་གཏོད་ལ་སྐུལ་འདེད་གཏོང་བ། ཏང་དང་སྲིད་གཞུང་ལ་ཐབས་འདོན་ཇུས་འབུལ་བྱེད་པ་སོགས་ཀྱི་ཐད་སྤུས་ཚད་མཐོ་བའི་གྲུབ་འབྲས་འདོན་དགོས། འདི་ཡང་ཏང་གི་སློབ་གྲྭ་ནི་སྤྱིར་བཏང་གི་སློབ་གྲྭ་དང་མི་འདྲ་བའི་ཐུན་མིན་གྱི་རིན་ཐང་གནས་ས་ཞིག་ཡིན།
རིམ་པ་ཁག་གི་ཏང་གི་སློབ་གྲྭས་ཏང་གི་གསར་གཏོད་རིགས་པའི་གཞུང་ལུགས་དྲིལ་བསྒྲགས་དང་འགྲེལ་པ་རྒྱག་པའི་རང་འཁྲིའི་ལས་འགན་གཙང་སྒྲུབ་བྱེད་དགོས། ད་ལྟ་རིགས་པའི་གཞུང་ལུགས་དྲིལ་བསྒྲགས་བྱེད་སྐབས་དོ་སྣང་བྱེད་དགོས་པའི་སྣང་ཚུལ་ཞིག་ཡོད་པ་ནི་ཁ་ཆོས་འདོན་འདོན་བྱེད་པ་དང་། གོ་མ་རྣལ་མ་མི་ལེན་པ། ཚུལ་འཆོས་བྱེད་པ་བཅས་ཀྱི་གནས་ཚུལ་མང་བ་དང་། གནས་ལུགས་ཀྱིས་ཕྱུག་སྟེ་གཞན་གྱི་ཁས་ལེན་ཐོབ་ཐུབ་པ་དང་། བརྩེ་དུང་གིས་ཕྱུག་སྟེ་མི་སེམས་འགུག་ཐུབ་པ། མིའི་སེམས་གཏིང་དུ་འཇགས་ཐུབ་པ་བཅས་ཀྱི་གནས་ཚུལ་ཉུང་བ་དེ་ཡིན། རིགས་པའི་གཞུང་ལུགས་ལ་འགྲེལ་པ་རྒྱག་པར་ཞིབ་འཇུག་ཟབ་མོ་བྱ་རྒྱུ་རྨང་གཞིར་འཛིན་དགོས་པ་དང་། གཏིང་ཟབ་མོར་ཞིབ་འཇུག་བྱས་ན་ད་གཟོད་འགྲེལ་པ་དཔྱིས་ཕྱིན་པ་ཞིག་རྒྱག་ཐུབ། རིམ་པ་ཁག་གི་ཏང་གི་སློབ་གྲྭ་དང་ལྷག་པར་དུ་ཀྲུང་དབྱང་ཏང་གི་སློབ་གྲྭས་ཞིབ་འཇུག་དང་འགྲེལ་པ་རྒྱག་པའི་གཏིང་ཟབ་ཚད་དང་རྒྱ་ཆེ་ཚད་སྔར་བས་རྒྱ་སྐྱེད་དང་། རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱེད་པའི་སློབ་སྲོལ་བཟང་པོ་སྒོ་ཀུན་ནས་དར་སྤེལ། རང་ངོས་ཀྱི་རིག་ཚན་གྱི་དགེ་མཚན་དང་། རིག་གཞུང་གི་དགེ་མཚན། སྐད་ཆའི་དགེ་མཚན་བཅས་སྒོ་ཀུན་ནས་འདོན་སྤེལ། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པར་ཞིབ་འཇུག་དང་འགྲེལ་པ་རྒྱག་པའི་ལས་ཀར་ཤུགས་སྣོན། མ་ལག་ཅན་དང་རིགས་ལམ་ཅན་དུ་འགྱུར་བར་འབད་་བརྩོན་བཅས་བྱས་ནས། ཏང་གི་གསར་གཏོད་རིགས་པའི་གཞུང་ལུགས་ཀྱི་དུས་རབས་ཀྱི་རྒྱབ་ལྗོངས་དང་། ཚན་རིག་གི་མ་ལག །དགོངས་དོན་གྱི་ངོ་བོ། ལག་ལེན་གྱི་བླང་བྱ། རང་རྟེན་གསར་གཏོད་རང་བཞིན་གྱི་བྱས་རྗེས་བཅས་ལ་ཞིབ་འཇུག་གཏིང་ཟབ་མོ་དང་འགྲེལ་པ་མཐར་ཕྱིན་པ་བྱེད་དགོས་པ་དང་། གོ་བདེ་ཞིང་ཤེས་སླ་བའི་སྐད་ཆའི་ཐོག་ནས་དེའི་ནང་གི་རྒྱུ་མཚན་དང་རིགས་ལམ་དང་གནས་ལུགས་བཤད་ནས་མི་རྣམས་ཀྱི་ཁས་ལེན་ཐོབ་པ་བྱེད་དགོས་ལ། གསོན་ཉམས་དོད་པའི་བསམ་བློ་གསོན་ཉམས་ལྡན་པར་བཤད་པ་དང་། དཔྱིས་ཕྱིན་པའི་རིགས་པའི་གཞུང་ལུགས་དཔྱིས་ཕྱིན་པར་བཤད་དེ། ཏང་གི་གསར་གཏོད་རིགས་པའི་གཞུང་ལུགས་མི་སེམས་གཏིང་དུ་འཇགས་པར་སྐུལ་འདེད་གཏོང་དགོས།
རིམ་པ་ཁག་གི་ཏང་གི་སློབ་གྲྭ་དང་ལྷག་པར་དུ་ཀྲུང་དབྱང་ཏང་གི་སློབ་གྲྭས་རིགས་པའི་གཞུང་ལུགས་ཀྱི་ཞིབ་འཇུག་ལ་ཤུགས་སྣོན་དང་། “ཟུང་འབྲེལ་གཉིས་”དང་“ངེས་པར་དུ་རྒྱུན་འཁྱོངས་བྱེད་དགོས་པ་དྲུག་”གི་བླང་བྱ་དོན་འཁྱོལ། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་འཇིག་རྟེན་ལྟ་བ་དང་། བརྟག་ཐབས་སྨྲ་བ། དེའི་ནང་དཀྱུས་གཅིག་ཏུ་ཁྱབ་པའི་ལངས་ཕྱོགས་ལྟ་བ་བྱེད་ཐབས་གསུམ་བཀོལ་སྤྱོད་བྱ་རྒྱུ་རྒྱུན་འཁྱོངས་བཅས་བྱས་ཏེ། གནད་ཆེའི་རིགས་པའི་གཞུང་ལུགས་ཀྱི་གནད་དོན་ལ་ཞིབ་འཇུག་གཏིང་ཟབ་བྱེད་དགོས། སྟོབས་ཤུགས་སྒྲིག་འཛུགས་བྱས་ནས་དཔལ་འབྱོར་འཛུགས་སྐྲུན་དང་། ཆབ་སྲིད་འཛུགས་སྐྲུན། རིག་གནས་འཛུགས་སྐྲུན། སྤྱི་ཚོགས་འཛུགས་སྐྲུན། སྐྱེ་ཁམས་དཔལ་ཡོན་འཛུགས་སྐྲུན། ཏང་འཛུགས་སྐྲུན་བཅས་ཀྱི་ནང་ཕུགས་རིང་དང་། སྤྱི་ཡོངས། རྩ་བ་བཅས་དང་འབྲེལ་བ་ཡོད་པའི་གནད་ཆེའི་འཐབ་ཇུས་ཀྱི་ཞིབ་འཇུག་བྱ་གཞི་ལ་ཞིབ་འཇུག་གཏིང་ཟབ་བྱེད་དགོས་པ་དང་། ལྷག་པར་དུ་འཛམ་གླིང་གི་ལོ་བརྒྱའི་རིང་བྱུང་མ་མྱོང་བའི་འཕོ་འགྱུར་ཆེན་པོར་ཁ་གཏད་ཇི་ལྟར་འཇལ་བ་དང་། རྒྱལ་ནང་དང་རྒྱལ་སྤྱིའི་སྤྱི་ཡོངས་གཉིས་གཅིག་གྱུར་གྱིས་འཆར་འགོད། ཀྲུང་གོའི་ལུགས་ཀྱི་དེང་རབས་ཅན་ཟབ་སྤེལ་དང་རྒྱ་སྐྱེད་གཏོང་བ། འཕེལ་རྒྱས་ཀྱི་རྣམ་པ་གསར་པ་གཏོད་པ། སྤུས་ཚད་མཐོ་བའི་འཕེལ་རྒྱས་སྐུལ་སྤེལ། བརྒྱུད་རིམ་ཧྲིལ་པོའི་མི་དམངས་དམངས་གཙོ་གོང་སྤེལ། ཐུན་མོང་ཐོག་ཕྱུག་འགྱུར་ཡོང་བར་སྐུལ་འདེད་ཏན་ཏིག་གཏོང་བ། ཚན་རྩལ་རང་ཚུགས་རང་དར་མགྱོགས་པོར་མངོན་སྒྱུར། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་གསར་སྐྲུན་རང་བཞིན་གྱི་སྤོ་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་གཏོང་བ། རྒྱལ་ཁབ་བདེ་འཇགས་མ་ལག་དང་ནུས་པ་དེང་རབས་ཅན་དུ་འགྱུར་བར་སྐུལ་འདེད། བློ་རྩ་བརྟན་པོས་ཕྱོགས་ཡོངས་ནས་ཏང་ནན་སྐྱོང་བྱེད་པ། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་བ་སོགས་གནད་དོན་ཆེན་པོར་ཞིབ་འཇུག་གཏིང་ཟབ་བྱས་ཏེ། དོན་གྱིས་གོ་འཕེར་ཞིང་མིང་གིས་འབོད་ཆོག་ལ་ལེགས་པར་སྨིན་པའི་ཞིབ་འཇུག་གྲུབ་འབྲས་བཏོན་ཏེ། ང་ཚོའི་ཏང་གིས་གུང་ཁྲན་ཏང་གི་སྲིད་སྐྱོང་ཆོས་ཉིད་དང་། སྤྱི་ཚོགས་རིང་ལུགས་འཛུགས་སྐྲུན་གྱི་ཆོས་ཉིད། མིའི་རིགས་ཀྱི་སྤྱི་ཚོགས་འཕེལ་རྒྱས་ཀྱི་ཆོས་ཉིད་བཅས་ཀྱི་ངོས་ཟིན་མུ་མཐུད་ཇེ་ཟབ་ཏུ་གཏོང་དགོས་པ་དང་། མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་གྱི་ལེའུ་གསར་པ་རྩོམ་པའི་ཐད་བློ་གྲོས་དང་སྟོབས་ཤུགས་སྐྱེས་སུ་འབུལ་དགོས།
གནད་ཆེའི་དངོས་ཡོད་གནད་དོན་སྐོར་གྱི་ཞིབ་འཇུག་ལ་ཤུགས་སྣོན་རྒྱག་རྒྱུ་ནི་ཏང་གི་སློབ་གྲྭས་ཏང་ལ་ཐབས་ཇུས་འདོན་པའི་ནང་དོན་གལ་ཆེན་ཞིག་ཡིན། ཏང་གི་སློབ་གྲྭ་དང་སྲིད་འཛིན་སློབ་གླིང་གཉིས་ཟླ་སྒྲིལ་བསྐྱར་སྒྲིག་བྱས་རྗེས། ཁྱད་ཆོས་ལྡན་པའི་རིག་ཚན་ཇེ་མང་དང་། ཞིབ་འཇུག་ཁྱབ་ཁོངས་རྒྱ་སྐྱེད་བཏང་སྟེ། རིག་མཛོད་ཀྱི་ནུས་པ་འདོན་སྤེལ་བྱེད་པར་ཕན་པའི་དགེ་མཚན་གསར་པ་ཆགས་ཡོད། རིམ་ཁག་གི་ཏང་གི་སློབ་གྲྭས་དགོས་མཁོ་དང་གནད་དོན་ཁྲིད་ཕྱོགས་སུ་འཛིན་རྒྱུ་རྒྱུན་འཁྱོངས་བྱས་ཐོག །ཏང་དང་རྒྱལ་ཁབ་ཀྱི་ཁ་ཚ་དགོས་གལ་ཆེ་བའི་དགོས་མཁོ་དང་འཐབ་ཇུས་ཀྱི་དགོས་མཁོ་ནས་འགོ་བརྩམས་ཏེ། གོང་དང་བསྟུན་ཞིང་འོག་དང་མཐུད་པར་བྱེད་ཅིང་། ཏང་གི་ཚོགས་ཆེན་ཉི་ཤུ་པས་བཏོན་པའི་འཐབ་ཇུས་གལ་ཆེན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་གལ་ཆེན་ལ་དམིགས་པ་དང་། ལག་ལེན་ཁྲོད་ཕྲད་པའི་གནད་དོན་གསར་པ་དང་། སྒྱུར་བཅོས་འཕེལ་རྒྱས་བརྟན་བརླིང་གསུམ་གྱི་ཁྲོད་གནས་པའི་གཏིང་རིམ་གྱི་གནད་དོན། མི་དམངས་མང་ཚོགས་ཀྱི་བྲེལ་དཀའ་སྡུག་སྨོན་བཞིའི་གནད་དོན། རྒྱལ་སྤྱིའི་གནས་བབ་འགྱུར་ལྡོག་ཁྲོད་ཀྱི་གནད་དོན་ཆེན་པོ། ཏང་འཛུགས་སྐྲུན་ལ་ཕྲད་པའི་གནད་དོན་འབུར་ཐོན་ཅན་བཅས་ལ་དམིགས་ནས། སྔོན་དཔག་རང་བཞིན་དང་། སྲིད་ཇུས་རང་བཞིན། ཉེར་སྤྱོད་རང་བཞིན་བཅས་ཀྱི་ཞིབ་འཇུག་ཧུར་ཐག་གིས་སྤེལ་དགོས། ཏང་ཨུ་དང་སྲིད་གཞུང་ལ་འབྲེལ་གཏུག་དང་སྦྲེལ་མཐུད་བྱེད་པར་ཤུགས་སྣོན་དང་། ཧུར་ཐག་གིས་བློ་འདོན་ཞིང་ཁ་ཏ་བྱེད་ལ་ཇུས་འབུལ་བ། གནད་དོན་དངོས་འབྲེལ་ཐག་གཅོད་བྱེད་པའི་འདུ་ཤེས་གསར་པ་དང་བསམ་ཕྱོགས་གསར་པ་དང་བྱེད་ཐབས་གསར་པ་བཅས་བཏོན་ཏེ། ཏང་དང་སྲིད་གཞུང་གིས་ཇུས་ཐག་གཅོད་པར་རིག་སྟོབས་ཀྱི་རམ་འདེགས་དུས་ཐོག་ཏུ་མཁོ་འདོན་བྱེད་དགོས། ཁ་གཏད་འཇལ་ཐབས་ཞིབ་འཇུག་བྱེད་པར་ཟུར་ཚད་ཡག་པོ་འདེམས་པ་དང་། སྲིད་ཇུས་དང་གྲོས་གཞིའི་གོ་ཆོད་ཚད་ཆེ་རུ་གཏོང་བ། གནད་དུ་ཕྱིན་པར་བྱེད་ལ་གཏིང་ཟབ་ཏུ་བྱེད་པ་དང་ཞིབ་ཚགས་སུ་བྱེད་པ་བཅས་བྱས་ཏེ། ཞིབ་འཇུག་“མཐིལ་མཐོང་”ཡོང་བ་དང་གྲུབ་འབྲས་གོ་ཆོད་ནུས་ལྡན་ཡོང་བར་བྱེད་དགོས། རིམ་པ་ཁག་གི་ཏང་ཨུ་དང་སྲིད་གཞུང་གིས་ཏང་གི་སློབ་གྲྭའི་རིག་མཛོད་འཛུགས་སྐྲུན་ལ་རྒྱབ་སྐྱོར་ཧུར་ཐག་བྱས་ནས། རང་འགུལ་ངང་ཏང་གི་སློབ་གྲྭར་ཁ་བྱང་འདོན་པ་དང་ལས་འགན་སྤྲོད་དགོས་པ་དང་། དེ་བཞིན་དགོས་ངེས་ཀྱི་རྒྱབ་སྐྱོར་དང་རོགས་རམ་བྱེད་དགོས།
བརྟག་དཔྱད་ཞིབ་འཇུག་བྱེད་པ་ནི་ཐབས་ཇུས་བློ་འདྲིའི་བྱ་བ་ལེགས་པར་བསྒྲུབ་རྒྱུའི་རྨང་གཞི་ཡིན། ཏང་གི་སློབ་གྲྭའི་སློབ་ཞིབ་མི་སྣ་རྣམས་སློབ་ཁང་སྟེ་“སློབ་ཁང་ཆུང་བ་”ནས་སྤྱི་ཚོགས་ཏེ་“སློབ་ཁང་ཆེ་བ་”ཡི་ཐོག་བསྐྱོད་དགོས་པ་དང་། རྒྱུན་དུ་གཞི་རིམ་དུ་སྐྱོད་ཅིང་འབྲེལ་འདྲིས་ཡག་པོ་བྱས་ཏེ། མདུན་གྲལ་རང་བཞིན་གྱི་གསར་གཏོད་ཀྱི་ལག་ལེན་དང་། དཔལ་འབྱོར་དང་སྤྱི་ཚོགས་ཀྱི་དངོས་ཡོད་འཁོར་སྐྱོད་གནས་ཚུལ། མི་དམངས་ཀྱི་བསམ་ཚུལ་དང་རེ་ལྟོས་དང་སེམས་ཁྲལ་བཅས་དངོས་སུ་ཚོར་ཤེས་ཐུབ་པ་དང་། གཞི་རིམ་གྱི་ལས་བྱེད་པ་དང་མང་ཚོགས་ཀྱིས་གསར་སྐྲུན་བྱས་པའི་ཉམས་མྱོང་གསོན་པོ་དུས་ཐོག་ཏུ་ཤེས་རྟོགས་དང་ཕྱོགས་བསྡོམས་བྱེད་དགོས་པ་དང་། གནད་དོན་དབྱེ་ཞིབ་དང་ཐག་གཅོད་བྱེད་པའི་ཐད་ཕྱི་རོལ་ཡུལ་དང་མཐུན་ཞིང་། ཆ་ཚང་བ། བདེན་པ་དང་ཡིད་རྟོན་ཐུབ་པའི་རྒྱུ་ཆ་དང་པོ་ཐོབ་པར་བྱེད་དགོས་ལ། ཧུར་བརྩོན་གྱིས་སྤུས་ཚད་མཐོ་བའི་ཞིབ་འཇུག་གི་གྲུབ་འབྲས་འདོན་ཐུབ་པ་བྱེད་དགོས།
ཐོན་ཁུངས་སྡེབ་སྒྲིག་ལེགས་སྒྱུར་བྱས་ནས་མཉམ་དུ་འགག་སྒྲོལ་བྱེད་པའི་བསྒྲིལ་ཤུགས་ཆགས་པ་བྱེད་དགོས། ཏང་གི་སློབ་གྲྭའི་ཁོངས་གཏོགས་སུ་བྱང་ཚད་མཐོ་བའི་སློབ་ཁྲིད་དང་ཞིབ་འཇུག་གི་དཔུང་སྡེ་ཞིག་ཡོད་པ་དང་། ལག་ལེན་གྱི་ཉམས་མྱོང་ཕུན་སུམ་ཚོགས་པའི་སློབ་མ་འབོར་ཆེན་ཞིག་ཡོད་པས། དགེ་མཚན་གསབ་རེས་བྱེད་དགོས་པ་དང་། སློབ་ཁྲིད་དང་སློབ་སྦྱོང་སྐུལ་རེས་བྱེད་དགོས་ལ། གནད་ཆེའི་ཞིབ་འཇུག་བྱ་གཞི་སྤྱད་དེ་སྣེ་ཁྲིད་བྱེད་མཁས་པོ་བྱེད་དགོས་པ་དང་། ཕྱོགས་གང་ཅིའི་སྟོབས་ཤུགས་གཅིག་སྒྲིལ་བྱེད་དགོས་ལ། ལྷག་པར་དུ་སློབ་མ་ཞེས་པའི་དམིགས་བསལ་གྱི་ཐོན་ཁུངས་དེ་བེད་སྤྱོད་ཡག་པོ་བྱེད་དགོས་པ་དང་། སློབ་མ་རྣམས་ཐབས་ཇུས་བློ་འདྲིའི་ནང་ཞུགས་པའི་ལམ་སྲོལ་གསར་གཏོད་བྱས་ཏེ། དུས་རྒྱུན་ཇུས་ཐག་གཅོད་མཁན་གང་དེས་ཐབས་ཇུས་ཞིབ་འཇུག་བྱེད་པར་“ཐབས་ཤེས་”དང་“སྨན་སྦྱོར་”འདོན་དུ་འཇུག་དགོས།
ནན་བཤད་བྱ་དགོས་པ་ཞིག་ནི། ད་ལྟ་འདུ་ཤེས་འཛིན་སྟངས་ཁྱབ་ཁོངས་ཀྱི་འཐབ་རྩོད་ནི་སྔར་བཞིན་རྣོ་ངར་ལྡན་ཞིང་རྙོག་འཛིང་ཆེ་བས། ཏང་ཡོངས་ཀྱིས་འཐབ་རྩོད་བྱེད་ཕོད་པའི་སྙིང་སྟོབས་དང་། འཐབ་རྩོད་བྱེད་མཁས་པའི་འཇོན་ཐང་ཐོག་ནས་རང་འགུལ་ངང་ཁ་གཏད་བཅལ་ཏེ། རང་དབང་བདག་ཏུ་ཟིན་དགོས། ཏང་གི་སློབ་གྲྭ་ནི་ཏང་གི་འདུ་ཤེས་འཛིན་སྟངས་ཀྱི་ལས་ཀའི་མདུན་གནས་གལ་ཆེན་ཞིག་ཡིན་ཞིང་། རྒྱལ་ཁབ་ཕྱི་ནང་ཚང་མས་ཏང་གི་སློབ་གྲྭའི་སྐད་སྒྲ་ལ་ཚད་མཐོའི་དོ་ཁུར་བྱེད་ཀྱི་ཡོད། གཡུལ་ས་གལ་ཆེན་དེ་ངེས་པར་དུ་ཏང་ལ་བློ་དཀར་བ་དང་། མར་ཁེ་སིའི་རིང་ལུགས་ལ་བློ་བའི་མིའི་ལག་ཏུ་འཛིན་དགོས། ཏང་གི་སློབ་གྲྭས་ལས་སྟེགས་ཀྱི་དགེ་མཚན་བེད་སྤྱོད་ཡག་པོ་བྱས་ཏེ། ཧུར་ཐག་གིས་སྐད་ཆ་ཤོད་ཅིང་ཡང་དག་པར་སྐད་ཆ་ཤོད་པ་དང་། ཏང་གི་འདོད་ཚུལ་དྲིལ་བསྒྲགས། དམིགས་ས་ཡོད་པའི་སྒོ་ནས་ཁུངས་མེད་ལོག་གཏམ་སྣ་ཚོགས་ལ་དགག་པ་རྒྱག་པ་བཅས་བྱེད་པའི་ཐོག་ནས། ཏང་གི་གསར་གཏོད་རིགས་པའི་གཞུང་ལུགས་སྒྲོག་འགྲེལ་བྱེད་མཁན་དང་། འདུ་ཤེས་འཛིན་སྟངས་ཁྱབ་ཁོངས་ནང་གི་མར་ཁེ་སིའི་རིང་ལུགས་ཀྱི་སློབ་སྟོན་གོ་གནས་བློ་རྩ་བརྟན་པོའི་སྒོ་ནས་སྲུང་སྐྱོང་བྱེད་མཁན། ཏང་གི་འདུ་ཤེས་འཛིན་སྟངས་སྤྱད་དེ་སྤྱི་ཚོགས་ཀྱི་བསམ་པའི་རླབས་རྒྱུན་ལ་ཁྲིད་སྟོན་བྱེད་པའི་བློས་འཁེལ་བའི་མདུན་བདར་པ་བཅས་ཡག་པོ་ཞིག་བྱེད་དགོས།
བཞི། ཏང་གི་སློབ་གྲྭའི་ཐོག་མའི་བསམ་འདུན་བརྟན་སྲུང་བྱེད་དགོས་ན་ངེས་པར་དུ་ཐོག་མཐའ་བར་གསུམ་དུ་སློབ་གྲྭ་ནན་པོར་སྐྱོང་བ་དང་སྤུས་ཚད་ལ་བརྟེན་ནས་སློབ་གྲྭ་འཛུགས་པ་རྒྱུན་འཁྱོངས་བྱེད་དགོས།
ཏང་གི་སློབ་གྲྭ་ནི་ཏང་གི་བསམ་པའི་ཁྲག་རྒྱུན་རྒྱུན་འཛིན་བྱེད་སའི་ཚོམས་ཆེན་ཞིག་ཡིན་ལ། རྒྱ་ཆེའི་ཏང་ཡོན་ལས་བྱེད་པས་ཡིད་སྨོན་ཆེན་པོ་བྱེད་ས་ཞིག་ཀྱང་ཡིན། དེའི་རྐྱེན་གྱིས་སློབ་གྲྭ་ནན་པོར་སྐྱོང་བ་དང་སྤུས་ཚད་ལ་བརྟེན་ནས་སློབ་གྲྭ་འཛུགས་པའི་སྟེང་དུ་ཏང་གི་སློབ་གྲྭ་ནི་ངེས་པར་དུ་སློབ་གྲྭ་དཀྱུས་མ་ལས་བླང་བྱ་མཐོན་པོ་ཡོད་དགོས་པ་དང་། ཆབ་སྲིད་ཀྱི་ཚད་གཞི་དང་། རིག་གཞུང་གི་ཚད་གཞི། སློབ་ཁྲིད་ཀྱི་ཚད་གཞི། དོ་དམ་གྱི་ཚད་གཞི་བཅས་ནན་ཤོས་ལག་བསྟར་བྱས་ཏེ། ཐོག་མཐའ་བར་གསུམ་དུ་ཐོག་མའི་བསམ་འདུན་མ་བརྗེད་པར་འགན་འཁྲི་ལག་ལེན་བསྟར་རྒྱུ་ཁག་ཐེག་བྱེད་དགོས།
སློབ་གྲྭ་ནན་པོར་སྐྱོང་བ་ནི་ཏང་གི་སློབ་གྲྭ་གཉེར་བའི་གཞི་རྩའི་བྱེད་ཕྱོགས་ཡིན་པ་དང་། ཕྱོགས་ཡོངས་ནས་ཏང་ནན་སྐྱོང་བྱ་རྒྱུའི་བླང་བྱ་དེ་ཏང་གི་སློབ་གྲྭའི་ལས་དོན་གྱི་མཚོན་ཚུལ་བྱ་བྲག་པ་ཞིག་ཡིན། ཉེ་བའི་ལོ་ཤས་རིང་། རིམ་པ་ཁག་གི་ཏང་གི་སློབ་གྲྭས་སློབ་གྲྭའི་དར་སྲོལ་དང་སློབ་སྦྱོང་གི་དར་སྲོལ་འཛུགས་སྐྲུན་དེ་ཐོད་བརྒལ་བྱེད་ས་བྱས་ཏེ་སྤྱོད་ཚུལ་འཛུགས་སྐྲུན་དང་སློབ་མའི་དོ་དམ་ནན་འཛིན་བྱས་ནས། སློབ་གྲྭ་ནན་པོར་སྐྱོང་བའི་ཐད་ཚད་གཞི་ནན་པོ་དང་ཕན་འབྲས་ཐོན་ཡོད་པ་དང་། ཏང་གི་སློབ་གྲྭས་ཚུལ་མིན་སྤྱོད་ཡན་གྱི་“གཙང་བཟོ་ཡོ་ཆས་”དང་། ཏང་གཤིས་སྦྱོང་བརྡར་“ཞུན་ཐབ་ཆེན་པོ།” ཕྱོགས་ཡོངས་ནས་ཏང་ནན་སྐྱོང་གི་“ཕྱོགས་སྟོན་”བཅས་ཀྱི་ནུས་པ་གོ་ཆོད་འདོན་སྤེལ་བྱས་ཡོད། དེ་དང་ཆབས་ཅིག་ཏུ་མཐོང་དགོས་པ་ནི། ཏང་གི་སློབ་གྲྭའི་གསོ་སྦྱོང་ནང་རིགས་པའི་གཞུང་ལུགས་ཀྱི་སློབ་གསོ་ཐད་སྦྱོང་སྤྱོད་ཁ་བྲལ་བའི་གནད་དོན་དང་། ཏང་གཤིས་སློབ་གསོའི་དམིགས་གཏད་རང་བཞིན་དང་དངོས་ཕན་རང་བཞིན་དེ་ཙམ་ཆེན་པོ་མེད་པའི་གནད་དོན། སློབ་མའི་ཞབས་འདེགས་ལ་མཐོང་ཆེན་དང་དོ་དམ་ལ་མཐོང་ཆུང་བྱེད་པའི་གནད་དོན་བཅས་ཚད་མི་འདྲ་བར་གནས་ཡོད་པ་དེ་ཡིན། དེ་ལས་སློབ་གྲྭ་ནན་པོར་སྐྱོང་རྒྱུ་དེ་ནམ་ཡང་བྱེད་བཞིན་པའི་ལམ་ན་ཡོད་པ་གསལ་བཤད་བྱས་ཡོད།
སློབ་གཉེར་ནན་སྐྱོང་དང་། སློབ་ཁྲིད་ནན་སྐྱོང་། རིག་གཉེར་ནན་སྐྱོང་བཅས་རྒྱུན་འཁྱོངས་བྱས་ཏེ། སློབ་གྲྭ་ནན་པོར་སྐྱོང་བའི་བླང་བྱ་དེ་ཏང་གི་སློབ་གྲྭའི་ལས་དོན་གྱི་བརྒྱུད་རིམ་ཡོངས་དང་ཕྱོགས་སོ་སོར་དོན་འཁྱོལ་བྱེད་དགོས་པ་དང་། དགེ་རྒན་དང་སློབ་མ་སྟེ་བྱེད་པོ་གཉིས་གཙོ་གནད་དུ་བཟུང་ནས་དམ་འཛིན་ཡག་པོ་བྱེད་དགོས། ཡོན་ཏན་གྱིས་ཕྱུག་པས་ན་དགེ་རྒན་དང་། དྲང་གཞག་ཚུལ་ལྡན་ཡིན་པས་ན་མིག་དཔེ་ཞེས་ཟེར་བ་བཞིན། དགེ་རྒན་གྱི་གཏམ་སྤྱོད་ཀྱིས་ཤེས་མེད་ཚོར་མེད་ངང་སློབ་མ་རྣམས་ལ་བག་ཆགས་ཐེབས་ཀྱིན་ཡོད། ཀྲུང་དབྱང་ཏང་གི་སློབ་གྲྭའི་ལོ་རྒྱུས་ཐོག་གི་དགེ་རྒན་གྲགས་ཅན་དང་མཁས་དབང་གང་ཉིད་མི་རྣམས་ཀྱིས་སེམས་ལ་བརྟན་པོར་བཟུང་ནས་དྲན་གསོ་ཞུ་དོན་ནི། ཁོང་ཚོར་རིག་གཞུང་གི་བློ་སྦྱོང་ཆེན་པོ་ལྡན་པའི་དབང་གིས་རེད་ལ། ཁོང་ཚོར་བླ་ན་མེད་པའི་དགེ་རྒན་གྱི་ཀུན་སྤྱོད་དང་སྤྱོད་ཚུལ་ལྡན་པའི་དབང་གིས་ཀྱང་རེད། རྒྱ་ཆེའི་སློབ་མའི་སེམས་སུ་ཁོང་ཚོས་གུང་ཁྲན་ཏང་མིའི་དཔེ་མཚོན་སྣང་བརྙན་མཚོན་གྱི་ཡོད། ཏང་གི་སློབ་གྲྭའི་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོའི་སྐོར་གྱི་སློབ་གསོ་ལ་ཤུགས་སྣོན་རྒྱག་པ་དང་། ཆབ་སྲིད་ཀྱི་སྒྲིག་ཁྲིམས་དང་ཆབ་སྲིད་ཀྱི་སྒྲིག་ལམ་སྐོར་གྱི་སློབ་གསོ་ལ་ཤུགས་སྣོན་བརྒྱབ་སྟེ། ཏང་གི་སློབ་གྲྭའི་དགེ་རྒན་ལ་ཁྲིད་སྟོན་བྱས་ཏེ་སེམས་རྣལ་དུ་ཕབ་ནས་རིག་གཞུང་ལ་འཇུག་པ་དང་། ཞིབ་འཇུག་ལ་གཞོལ་བ། མི་གསོ་སྐྱོང་ཡག་པོ་བཅས་བྱེད་དགོས། རིམ་པ་ཁག་གི་ཏང་གི་སློབ་གྲྭས་དམ་འཛིན་དང་དོ་དམ་བྱེད་ཕོད་པ་དང་། དམ་འཛིན་དང་དོ་དམ་ནན་པོ་བྱས་ཏེ། སློབ་མ་རྣམས་ཏང་གི་སློབ་གྲྭར་ཞུགས་མ་ཐག་ཏུ་སློབ་སྦྱོང་གི་སྤྱོད་ཚུལ་དང་། བབ་ཆགས་ཀྱི་སྤྱོད་ཚུལ། སྤྱོད་གཙང་གི་སྤྱོད་ཚུལ་བཅས་ཚོར་དུ་འཇུག་དགོས། བློ་མཐུན་ལ་ལའི་ཞུ་དོན་ལས་གོ་ཐོས་ལྟར་ན། ད་ལྟ་ཏང་གི་སློབ་གྲྭའི་སློབ་སྦྱོང་གི་སྣང་ཚུལ་ཧ་ཅང་ཡག་པོ་ཡོད་ལ། སློབ་སྦྱོང་གི་གྲུབ་འབྲས་ཀྱང་ཧ་ཅང་ཡག་པོ་ཡོད། ལྷག་པར་དུ་རིམས་ནད་ཀྱི་དབང་གིས་བཀག་སྡོམ་དོ་དམ་བྱེད་རིང་། སློབ་མ་མི་ཉུང་བ་ཞིག་ལ་དཔེ་ཀློག་དང་སྦྱོང་བརྡར་བྱེད་པའི་གོམས་གཤིས་ཆགས་ཏེ། ལ་ལས་ཡིག་རྫོབ་ཆེ་བའི་གསུང་རབ་བཀའ་རྩོམ་བཀླགས་ཚར་བ་དང་། ལ་ལས་སྦྱོང་བརྡར་བྱས་ནས་སྦི་རག་གྲོད་པ་མེད་པར་གྱུར་པ། མཆིན་པ་ཚིལ་འགྱུར་སེལ་བར་བྱས་ཡོད་ཟེར། དེ་ལས་ནན་པོ་བྱས་ན་ཕན་ཐོགས་ཤིང་འབྲས་བུ་ཐོན་པ་གསལ་བཤད་བྱས་ཡོད།
སྤུས་ཚད་ལ་བརྟེན་ནས་སློབ་གྲྭ་འཛུགས་རྒྱུ་ནི་ཏང་གི་སློབ་གྲྭའི་ལས་དོན་གྱི་བསྲུང་བྱ་གལ་ཆེན་ཞིག་ཡིན་པ་དང་། ཕྱོགས་ཡོངས་ནས་ཏང་གི་སློབ་གྲྭའི་སློབ་གཉེར་ཆུ་ཚད་མཐོ་རུ་གཏོང་བའི་འཛིན་བྱེད་གལ་ཆེན་ཞིག་ཡིན། ཏང་གི་སློབ་གྲྭའི་འཕེལ་རྒྱས་ལོ་རྒྱུས་ལས་སྤུས་ཚད་དར་ན་ཏང་གི་སློབ་གྲྭ་དར་བ་དང་། སྤུས་ཚད་སྟོབས་དང་ལྡན་ན་ཏང་གི་སློབ་གྲྭ་སྟོབས་དང་ལྡན་པ་ར་སྤྲོད་དཔྱིས་ཕྱིན་པ་བྱས་ཡོད། རིམ་པ་ཁག་གི་ཏང་གི་སློབ་གྲྭས་སྤུས་ཚད་ལ་བརྟེན་ནས་སློབ་གྲྭ་འཛུགས་རྒྱུ་དེ་སློབ་གཉེར་སློབ་སྐྱོང་གི་སྲོག་རྩར་གྱུར་པའི་ལས་གྲྭར་བཟུང་ནས་ཚད་གཞི་མཐོན་པོའི་སློབ་གཉེར་རྒྱུན་འཁྱོངས་བྱེད་དགོས། ཏང་གི་སློབ་གྲྭའི་སློབ་གསོའི་ཆོས་ཉིད་དང་ལས་བྱེད་པ་འཚར་ལོངས་ཡོང་བའི་ཆོས་ཉིད་སྐོར་གྱི་ཞིབ་འཇུག་མུ་མཐུད་ཟབ་སྤེལ་དང་། སློབ་ཁྲིད་ཚན་ཞིབ་དང་། ཤེས་ལྡན་མི་སྣའི་དཔུང་སྡེ། དོ་དམ་དང་ཞབས་ཞུ། སྤྱོད་ཚུལ་འཛུགས་སྐྲུན། ལས་ཁུངས་ཀྱི་ཏང་འཛུགས་སྐྲུན་སྒྱུར་བཅོས་གསར་གཏོད་སོགས་ཟབ་སྤེལ། སློབ་གཉེར་སྤུས་ཚད་སྤྱི་ཡོངས་ནས་མཐོར་འདེགས་བཅས་བྱས་ཏེ། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཡོང་བར་སྔར་ལས་ཡག་པའི་ཞབས་ཞུ་བསྒྲུབ་དགོས། སློབ་ཁྲིད་ཀྱི་སྤུས་ཚད་ཅེས་བྱ་བའི་ལྟེ་བ་འདི་དམ་འཛིན་ཡག་པོ་བྱས་ཏེ། ཏང་གི་སློབ་གྲྭའི་སློབ་ཁྲིད་ཀྱི་ཆབ་སྲིད་ཆུ་ཚད་དང་། སྲིད་ཇུས་ཆུ་ཚད། རིག་གཞུང་ཆུ་ཚད། ཆེད་ལས་ཆུ་ཚད་བཅས་ཟམ་མི་འཆད་པར་མཐོ་རུ་བཏང་ནས་སློབ་ཁྲིད་ཀྱི་ཕན་འབྲས་དངོས་ཆེ་རུ་གཏོང་དགོས་པ་དང་། ཚན་ཞིབ་ཀྱི་སྤུས་ཚད་ཅེས་བྱ་བའི་རྨང་གཞི་འདི་དམ་འཛིན་ཡག་པོ་བྱས་ཏེ། དགེ་མཚན་ལྡན་པའི་རིག་ཚན་དང་ཉེ་བར་མཁོ་བའི་རིག་ཚན་འཛུགས་སྐྲུན་ལ་ཤུགས་སྣོན་བརྒྱབ་ནས་རིགས་པའི་གཞུང་ལུགས་ཞིབ་འཇུག་བྱེད་པའི་གསར་སྐྲུན་རང་བཞིན་དང་ཐབས་ཇུས་བློ་འདྲིའི་གོ་ཆོད་རང་བཞིན་རྒྱུན་ཆད་མེད་པར་ཆེ་རུ་གཏོང་དགོས། ཤེས་ལྡན་མི་སྣའི་དཔུང་སྡེ་ཞེས་བྱ་བའི་གནད་འགག་འདི་དམ་འཛིན་ཡག་པོ་བྱས་ཏེ། ཤེས་ལྡན་མི་སྣར་བརྟེན་ནས་སློབ་གྲྭ་སྟོབས་ལྡན་དུ་གཏོང་བའི་འཐབ་ཇུས་ལག་བསྟར་ཤུགས་ཆེན་བྱེད་དགོས། ཏང་གི་སློབ་གྲྭའི་ངོས་ནས་བཤད་ན། ཤེས་ལྡན་མི་སྣ་གསོ་སྐྱོང་བྱ་རྒྱུ་ནི་སྤྱི་ཡོངས་དང་འབྲེལ་བ་ཡོད་པའི་ལྷུ་ཚིགས་གལ་ཆེན་ཞིག་ཡིན། རིམ་པ་ཁག་གི་ཏང་གི་སློབ་གྲྭས་ཏང་གི་ལས་བྱེད་པའི་སློབ་གསོ་བྱ་གཞག་ལ་ཚད་མཐོའི་འགན་འཁྲི་འཁུར་སེམས་བཅངས་ཏེ། ཆབ་སྲིད་བཟང་བ་དང་། དད་སེམས་བརྟན་པ། ལས་སྒོར་བྱང་བ། སྤྱོད་ཚུལ་བཟང་བ་བཅས་ཀྱི་བྱང་ཚད་མཐོ་བའི་ཏང་གི་སློབ་གྲྭའི་ཤེས་ལྡན་མི་སྣའི་དཔུང་སྡེ་གསོ་སྐྱོང་ཤུགས་ཆེན་བྱེད་དགོས། གཞུང་ཞབས་པ་དང་མི་འདྲ་ལ་བྱ་ལས་སྡེ་ཚན་དཀྱུས་མ་དང་ཡང་མི་འདྲ་བའི་ཏང་གི་སློབ་གྲྭའི་དགེ་རྒན་དོ་དམ་མ་ལག་མགྱོགས་པོར་འཛུགས་དགོས་པ་དང་། སྲིད་ཇུས་ཀྱི་རྒྱབ་སྐྱོར་དང་ལམ་སྲོལ་གྱི་འགན་ལེན་ལ་ཤུགས་སྣོན་རྒྱག་དགོས། དགེ་རྒན་གྲགས་ཅན་གྱི་ལས་གྲྭ་ལག་བསྟར་གཏིང་ཟབ་བྱས་ཏེ། ཤུགས་རྐྱེན་ཆེ་ཞིང་སྙན་གྲགས་རྒྱས་པའི་དགེ་རྒན་གྲགས་ཅན་དང་མཁས་དབང་སྐོར་ཞིག་གསོ་སྐྱོང་ཤུགས་ཆེན་བྱེད་དགོས། འདི་ནི་ཏང་གི་སློབ་གྲྭའི་བྱ་གཞག་སྤུས་ཚད་མཐོན་པོའི་ངང་འཕེལ་རྒྱས་ཡོང་བའི་གནད་འགག་ཐུག་ས་ཡིན་ལ། ཏང་ཡོངས་ཀྱིས་ཏང་གི་སློབ་གྲྭར་བཅངས་པའི་ཉེར་མཁོའི་རེ་སྨོན་ཡང་ཡིན་ཏེ། དམིགས་འབེན་དེའི་ཕྱོགས་སུ་མུ་མཐུད་འབད་བརྩོན་བྱེད་དགོས།
ཏང་གིས་ཏང་གི་སློབ་གྲྭའི་ལས་ཀར་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་བྱ་རྒྱུ་ནི་ང་ཚོའི་ཏང་གིས་ཏང་གི་སློབ་གྲྭ་གཉེར་བའི་རྩ་བའི་ཉམས་མྱོང་ཡིན་ལ། ཏང་གི་སློབ་གྲྭའི་བྱ་གཞག་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་གཏོང་བའི་རྩ་བའི་འགན་སྲུང་ཡང་ཡིན། ཏང་གི་སློབ་གྲྭ་ནི་ཏང་གི་རྩ་ཆེའི་ཁྱིམ་གཞི་ཡིན་པས་དེར་ཤུགས་སྣོན་རྒྱག་དགོས་པ་ལས་ཉམས་ཞན་དུ་གཏོང་མི་རུང་། ཏང་གི་སློབ་གྲྭ་ཡག་པོར་གཉེར་རྒྱུ་ནི་ཏང་གི་སློབ་གྲྭ་ཁོ་ནའི་ལས་འགན་མ་ཡིན་པར་ཏང་ཡོངས་ཀྱི་ཐུན་མོང་གི་ལས་འགན་ཡིན། ཏང་ཡོངས་ཀྱིས་ཏང་གི་སློབ་གྲྭ་གཉེར་རྒྱུ་རྒྱུན་འཁྱོངས་བྱེད་དགོས་པ་དང་། རིམ་པ་ཁག་གི་ཏང་ཨུ་དང་སྲིད་གཞུང་དང་འབྲེལ་ཡོད་འགན་ནུས་སྡེ་ཁག་གིས་བྱ་སྤྱོད་དངོས་ཀྱི་ཐོག་ནས་ཏང་གི་སློབ་གྲྭའི་བྱ་གཞག་འཕེལ་རྒྱས་ཡོང་བར་རྒྱབ་སྐྱོར་བྱེད་དགོས། 《ཀྲུང་གོའི་གུང་ཁྲན་ཏང་གི་ཏང་གི་སློབ་གྲྭ་（སྲིད་འཛིན་སློབ་གླིང་）ཡི་ལས་དོན་སྲོལ་ཡིག་》ནང་། ཏང་ནང་ཁུལ་གྱི་ཁྲིམས་སྲོལ་གྱི་རྣམ་པའི་ཐོག་ནས་རིམ་པ་ཁག་གི་ཏང་ཨུས་ཏང་གི་སློབ་གྲྭ་གཉེར་བ་དང་ཏང་གི་སློབ་གྲྭར་དོ་དམ་དང་ཏང་སློབ་གྲྭ་འཛུགས་སྐྲུན་བཅས་བྱེད་པའི་བྱེད་པོའི་འགན་འཁྲི་ཁ་གསལ་བཟོས་ཡོད་པ་དང་། ཏང་ཨུ་ཧྲུའུ་ཅིའི་འགན་འཁུར་པ་དང་པོའི་འགན་འཁྲི་ཁ་གསལ་བཟོས་ཡོད། རིམ་པ་ཁག་གི་ཏང་ཨུ་དང་ལྷག་པར་དུ་“འགོ་ཁྲིད་པ་དང་པོ་”ཡིས་ངེས་པར་དུ་ཏང་གི་སློབ་གྲྭའི་ལས་དོན་ཏེ་“རང་འཁྲིའི་ལས་ཀ་”འདི་སེམས་ནང་དུ་བཞག་ནས་ཏང་གི་སློབ་གྲྭའི་བྱ་གཞག་སྟེ་“འགན་འཁྲིའི་ས་ཞིང་དུམ་བུ་”དེ་ལྷག་བསམ་ཟོལ་མེད་དང་ནུས་ཤུགས་ཡོད་རྒུས་ཡག་པོར་རྨོ་དགོས། ཏང་གི་སློབ་གྲྭའི་སློབ་སྤྱིའི་འགན་གཅིག་ལྕོགས་འཁུར་མཁན་ཏང་ཨུའི་འགན་འཁུར་བློ་མཐུན་གྱིས་དེ་བས་ཀྱང་ནན་ཏན་གྱིས་རང་འགན་ལྷུར་ལེན་བྱེད་དགོས་པ་དང་། དུས་ཚོད་དངོས་སུ་འདང་བ་དང་། ནུས་ཤུགས་དངོས་སུ་འདང་བ། ལས་དོན་དོན་ལ་གནས་པ་བཅས་ཁག་ཐེག་བྱེད་དགོས། རིམ་པ་ཁག་གི་ཏང་ཨུ་དང་སྲིད་གཞུང་ཚང་མས་ཏང་གི་སློབ་གྲྭའི་ལས་དོན་ལ་སེམས་ཁུར་དང་། སློབ་མ་འདེམ་སྐོང་དང་། ཤེས་ལྡན་མི་སྣ་གསོ་སྐྱོང་། སྲིད་ཇུས་གཏན་འབེབས། གྲོན་དངུལ་གཏོང་འཇོག །བརྟག་དཔྱད་ཞིབ་འཇུག །རྨང་གཞིའི་སྒྲིག་བཀོད་འཛུགས་སྐྲུན་སོགས་ཀྱི་ཐད་རྒྱབ་སྐྱོར་ཤུགས་ཆེན། སྟོབས་ཤུགས་གཅིག་སྒྲིལ་གྱིས་ཏང་གི་སློབ་གྲྭའི་བྱ་གཞག་ཡུན་རིང་འཕེལ་རྒྱས་ཡོང་བར་འགོག་རྐྱེན་བཟོ་བའི་གནད་དོན་འབུར་ཐོན་ཅན་གཅོད་བཅས་བྱས་ཏེ། ཐུན་མོང་ཐོག་ཏང་གི་སློབ་གྲྭ་ཡག་པོར་གཉེར་དགོས།
བློ་མཐུན་རྣམ་པ། ཀྲུང་དབྱང་ཏང་གི་སློབ་གྲྭའི་ལོ་ངོ་90ཡི་རིང་གི་འོད་སྟོང་འབར་བའི་མཛད་རྗེས་ལོ་རྒྱུས་དེབ་ཐེར་དུ་བཀོད་ཡོད། ཏང་གི་སློབ་གྲྭའི་ཐོག་མའི་བསམ་འདུན་ནི་ཐོག་མཐའ་བར་གསུམ་དུ་ཏང་གི་སློབ་གྲྭས་རྒྱུན་ཆད་ཆད་མེད་པར་འབད་བརྩོན་བྱེད་པའི་རྩ་བའི་སྒུལ་ཤུགས་ཡིན་ལ། ཏང་གི་སློབ་གྲྭའི་བྱ་གཞག་རྒྱུན་ཆད་མེད་པར་འཕེལ་རྒྱས་འགྲོ་བའི་རྩ་བའི་བསྲུང་བྱའང་ཡིན། རིམ་པ་ཁག་གི་ཏང་གི་སློབ་གྲྭ་རིམ་པས་ཏང་ལ་འཇོན་མི་གསོ་སྐྱོང་དང་ཏང་ལ་ཐབས་ཇུས་འདོན་པའི་ཐོག་མའི་བསམ་འདུན་ཡིད་ལ་བརྟན་པོར་འཆང་དགོས་པ་དང་། ཏང་གི་སློབ་གྲྭའི་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོ་རྒྱུན་འཛིན་བྱེད་དགོས་ལ། མི་རིགས་བསྐྱར་དར་གྱི་བྱ་གཞག་ཆེན་པོར་ཞབས་འདེགས་ཞུ་བའི་ཁྲོད་གཟི་བརྗིད་སྔར་ལས་ཆེ་བ་འཐོབ་པ་བྱེད་དགོས།
བསོད་ནམས་དབང་རྒྱལ་གྱིས་བསྒྱུར།