འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་པ་དང་འབྱུང་འགྱུར་འཕེལ་རྒྱས་ཀྱི་རང་འགུལ་དབང་ཆ་སྟངས་འཛིན་བྱེད་དགོས།

འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་རྒྱུ་ནི་ཏང་གི་ཚོགས་ཆེན་ཉི་ཤུ་པའི་ཐོག་བཏོན་པའི་འཐབ་ཇུས་ཀྱི་ལས་འགན་ཞིག་ཡིན། དེ་རིང་ཀྲུང་དབྱང་ཆབ་སྲིད་ཅུས་ཀྱིས་ནང་དོན་འདིར་དམིགས་ནས་ཐུན་མོང་སློབ་སྦྱོང་ཐེངས་གཉིས་པ་སྤེལ་བའི་དམིགས་ཡུལ་ནི། ཏང་གི་ཚོགས་ཆེན་ཉི་ཤུ་པའི་དགོངས་དོན་དང་ཀྲུང་དབྱང་གི་དཔལ་འབྱོར་ལས་དོན་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་ལེན་བསྟར་བ་དང་ཟུང་འབྲེལ་བྱས་ཏེ། འཕེལ་རྒྱས་ཀྱི་རྣམ་པ་གསར་པ་གཏོད་རྒྱུའི་དོན་སྙིང་ལ་ངོས་འཛིན་སྔར་ལས་གཏིང་ཟབ་ཏུ་གཏོང་བ་དང་། ལས་ཀའི་ཁྲོད་གནས་པའི་གནད་དོན་ལ་དབྱེ་ཞིབ་བྱེད་པ། འགལ་བ་གཙོ་བོ་སེལ་གང་ཐུབ་བྱེད་པ་དང་། འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་པ་བཅས་ཀྱི་བྱེད་ཐབས་འཚོལ་ཞིབ་བྱ་རྒྱུ་དེ་ཡིན།

རྒྱལ་ནང་གི་འཁོར་རྒྱུག་ཆེན་པོ་གཙོ་བོར་བྱེད་པ་དང་། རྒྱལ་ནང་དང་རྒྱལ་སྤྱིའི་འཁོར་རྒྱུག་གཉིས་ཕན་ཚུན་སྐུལ་འདེད་གཏོང་བའི་འཕེལ་རྒྱས་ཀྱི་རྣམ་པ་གསར་པ་གཏོད་རྒྱུ་ནི། ངས་2020ལོའི་ཟླ་4པར་ཀྲུང་དབྱང་ནོར་དཔལ་ཨུ་ལྷན་གྱི་ཚོགས་འདུའི་ཐོག་ཐོག་མར་བཏོན་པ་ཡིན། ལོ་གཉིས་ལྷག་ཙམ་རིང་ལག་ལེན་བྱས་པ་བརྒྱུད་ང་ཚོས་འཕེལ་རྒྱས་ཀྱི་རྣམ་པ་གསར་པ་གཏོད་རྒྱུའི་འཐབ་ཇུས་ཀྱི་དོན་སྙིང་ལ་ངོས་འཛིན་བྱེད་ཚད་སྔར་བས་གཏིང་ཟབ་ཏུ་ཕྱིན་པ་དང་བསམ་ཕྱོགས་སྔར་བས་གསལ་དུ་ཕྱིན་ཡོད། ད་ལྟ་ནས་བཟུང་། ང་ཚོའི་ཏང་གི་ལྟེ་བའི་ལས་འགན་ནི་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པ་དང་། ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱེད་པ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་རྒྱུ་དེ་ཡིན། རང་རྒྱལ་གྱི་མི་འབོར་དུང་ཕྱུར་14ལྷག་སྤྱི་ཡོངས་ནས་དེང་རབས་ཅན་གྱི་སྤྱི་ཚོགས་སུ་བསྐྱོད་པའི་གཞི་ཁྱོན་ནི་ད་ཡོད་དར་རྒྱས་ཆེ་བའི་རྒྱལ་ཁབ་ཀྱི་མི་འབོར་བསྡོམས་འབོར་ལས་བརྒལ་ཡོད་པས། དེའི་དཀའ་ཚེགས་རང་བཞིན་དང་རྙོག་འཛིང་རང་བཞིན་ནི་སྔར་བྱུང་མྱོང་མེད་པ་ཞིག་ཡིན་ཕྱིན། འཕེལ་རྒྱས་ཀྱི་གཙོ་ཁྲིད་དབང་ཆ་ངེས་པར་དུ་རང་ཉིད་ཀྱི་ལག་ཏུ་དམ་པོར་འཛིན་དགོས། རང་རྒྱལ་ནི་གཞི་ཁྱོན་ཧ་ཅང་ཆེ་བའི་དཔལ་འབྱོར་དངོས་ཚན་ཞིག་ཡིན་ལ། གཞི་ཁྱོན་ཧ་ཅང་ཆེ་བའི་དཔལ་འབྱོར་དངོས་ཚན་གྱི་ནང་ཁུལ་དུ་འཁོར་རྒྱུག་བྱས་ཆོག་ལ་ངེས་པར་ནང་ཁུལ་དུ་འཁོར་རྒྱུག་བྱེད་ཀྱང་དགོས། འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་རྒྱུ་ནི་ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་དང་། འཕེལ་རྒྱས་དང་བདེ་འཇགས་གཉིས་སྤྱི་འདོམས་བྱ་རྒྱུར་གཞི་ཚུགས་ནས་བཏོན་པའི་འཐབ་ཇུས་ཀྱི་བཀོད་པ་ཡིན་ལ། འབྱུང་འགྱུར་འཕེལ་རྒྱས་ཀྱི་རང་འགུལ་དབང་ཆ་སྟངས་འཛིན་བྱེད་པའི་འཐབ་ཇུས་ཀྱི་བཀོད་སྒྲིག་ཅིག་ཡིན་པ་དོན་དངོས་ལས་ར་འཕྲོད་གང་ལེགས་བྱུང་ཡོད། ང་ཚོས་འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་ཚེ། གཞི་ནས་རང་རྒྱལ་གྱི་དཔལ་འབྱོར་འཕེལ་རྒྱས་ཀྱི་རྨང་གཞི་བརྟན་དུ་གཏོང་ཐུབ་པ་དང་། འཕེལ་རྒྱས་ཀྱི་བདེ་འཇགས་རང་བཞིན་དང་བརྟན་པོའི་རང་བཞིན་ཆེ་རུ་ཕྱིན་ཐུབ་ལ། གཞི་ནས་སྔོན་དཔག་བྱེད་ཐུབ་པ་དང་སྔོན་དཔག་བྱེད་དཀའ་བའི་རླུང་འཚུབ་དྲག་ཆར་དང་རྦ་རླབས་འཇིགས་སུ་རུང་བའི་ཁྲོད་རང་རྒྱལ་གྱི་འཚོ་གནས་ནུས་པ་དང་། འགྲན་རྩོད་ནུས་པ། འཕེལ་རྒྱས་ནུས་པ། རྒྱུན་མཐུད་ནུས་པ་བཅས་ཆེ་རུ་ཕྱིན་ཏེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་འཕེལ་རིམ་འགོར་འགྱངས་མི་ཡོང་བ་དང་ཐ་ན་མཚམས་མི་ཆད་པ་འགན་ལེན་བྱེད་པ་དང་། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་སྐྲུན་རྒྱུའི་དམིགས་ཡུལ་རྒྱལ་ཁའི་ངང་མངོན་དུ་སྒྱུར་ཐུབ།

ལོ་གཉིས་ལྷག་ཙམ་གྱི་རིང་། འཕེལ་རྒྱས་ཀྱི་རྣམ་པ་གསར་པ་གཏོད་རྒྱུར་སྐུལ་འདེད་ཏན་ཏིག་བཏང་བས་ཕན་འབྲས་ཁག་ཅིག་ཐོན་ཡོད་དེ། བསམ་བློའི་ཐུན་མོང་ངོས་འཛིན་རྒྱུན་ཆད་མེད་པར་གཅིག་ཏུ་འགྲིལ་བ་དང་། ལས་ཀའི་རྨང་གཞི་རྒྱུན་ཆད་མེད་པར་བརྟན་དུ་ཕྱིན་པ། སྲིད་ཇུས་ལམ་ལུགས་རྒྱུན་ཆད་མེད་པར་འཐུས་ཚང་དུ་ཕྱིན་པ་བཅས་བྱུང་ནས་ས་གནས་ཁག་ཅིག་གི་འཕེལ་རྒྱས་ཀྱི་རྣམ་པ་གསར་པར་ཞབས་འདེགས་དང་མཉམ་འདྲེས་ཐུབ་པའི་རྣམ་པ་གསར་པ་མངོན་ཡོད། འོན་ཀྱང་བརྟག་དཔྱད་ཞིབ་འཇུག་བྱས་པའི་གནས་ཚུལ་ལ་བལྟས་ན། འཕེལ་རྒྱས་ཀྱི་རྣམ་པ་གསར་པ་གཏོད་པའི་ལས་ཀར་ད་དུང་འབུར་དུ་ཐོན་པའི་གནད་དོན་འགའ་ཞིག་གནས་ཡོད་པས་དེར་མཐོང་ཆེན་བྱས་ཏེ་ཞིབ་འཇུག་དང་ཐག་གཅོད་ནན་ཏན་བྱེད་དགོས།

སྤྱི་ཡོངས་ནས་བལྟས་ན། ཕྱོགས་ཡོངས་ནས་འཕེལ་རྒྱས་ཀྱི་རྣམ་པ་གསར་པ་གཏོད་རྒྱུར་ལས་འགན་ལྕི་ལ་ལམ་ཐག་རིང་། འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་པར་ཕྱོགས་གཉིས་ནས་ཞིབ་འཇུག་དང་བཀོད་སྒྲིག་བྱེད་དགོས་པ་སྟེ། གཅིག་ནི་དེ་བས་དམིགས་སའི་རང་བཞིན་ལྡན་པའི་སྒོ་ནས་རང་རྒྱལ་གྱི་ཐོན་ལས་མུ་ཕྲེང་དང་མཁོ་སྤྲོད་མུ་ཕྲེང་གི་ཞན་ཆ་མགྱོགས་མྱུར་གསབ་ནས་རྒྱལ་དམངས་དཔལ་འབྱོར་འཁོར་རྒྱུག་ཤར་གཏོང་ཐུབ་པའི་འགན་ལེན་བྱེད་དགོས། གཉིས་ནི་རྒྱལ་ནང་གི་འཁོར་རྒྱུག་ཆེན་པོའི་ནང་སྐྱེས་སྒུལ་ཤུགས་དང་བློས་འགེལ་རང་བཞིན་ཆེ་རུ་གཏོང་བ་དང་། རྒྱལ་སྤྱིའི་འགྲན་རྩོད་ནུས་པ་ཆེ་རུ་གཏོང་བ། རྒྱལ་སྤྱིའི་འཁོར་རྒྱུག་གི་ཡིད་དབང་འགུག་ནུས་དང་སྐུལ་འདེད་ནུས་པ་ཆེ་རུ་གཏོང་བ་བཅས་བྱེད་དགོས། དེར་བརྟེན། ངེས་པར་དུ་གནད་དོན་ཁྲིད་ཕྱོགས་སུ་འཛིན་རྒྱུ་དང་རྒྱུད་རིམ་ལྡན་པའི་ལྟ་བ་རྒྱུན་འཁྱོངས་བྱས་ཏེ། འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་རྒྱུར་ཚོད་འཛིན་བྱེད་པའི་འགལ་ཟླ་དང་གནད་དོན་གཙོ་བོ་ནུས་ཤུགས་ཡོད་རྒུས་སེལ་དགོས། ཕྱོགས་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་བ་དང་། ལག་ལེན་གསར་གཏོད་དང་ལམ་ལུགས་གསར་གཏོད་ལ་སྐུལ་འདེད་བཏང་ནས། དགེ་མཚན་རྒྱུན་ཆད་མེད་པར་འདོན་སྤེལ་དང་ཞན་ཆ་གསབ་པ། ཉམས་ཞན་སྟོབས་ཆེར་གཏོང་བ་བཅས་བྱེད་དགོས།

དང་པོ། ནང་མཁོ་རྒྱ་སྐྱེད་དང་འདོན་སྤྲོད་ཕྱོགས་གྲུབ་ཚུལ་རང་བཞིན་གྱི་སྒྱུར་བཅོས་གཏིང་ཟབ་ཏུ་བཏང་ནས་རྒྱལ་ནང་གི་འཁོར་རྒྱུག་ཆེན་པོའི་སྒུལ་ཤུགས་དང་བློས་འགེལ་རང་བཞིན་ཆེ་རུ་གཏོང་དགོས། འཕེལ་རྒྱས་ཀྱི་རྣམ་པ་གསར་པ་གཏོད་པའི་འགག་རྩ་ནི་དཔལ་འབྱོར་འཁོར་རྒྱུག་ཤར་གཏོང་ཐུབ་པར་ཐུག་ཡོད། མངོན་འགྱུར་ཐུབ་མིན་དེ་གཙོ་བོ་མཁོ་སྤྲོད་དང་དགོས་མཁོའི་སྣེ་གཉིས་ལ་སྒུལ་ཤུགས་ཆེན་པོ་ལྡན་མིན་དང་སྤྱི་ཡོངས་ཟླ་སྒྲིག །འགུལ་རྣམ་དོ་མཉམ། དགེ་མཚན་ལྡན་པའི་མཉམ་འགུལ་བཅས་ལ་རག་ལས་ཡོད། དེས་ན་ནང་མཁོ་རྒྱ་སྐྱེད་གཏོང་བའི་འཐབ་ཇུས་དེ་འདོན་སྤྲོད་ཕྱོགས་གྲུབ་ཚུལ་རང་བཞིན་གྱི་སྒྱུར་བཅོས་གཏིང་ཟབ་ཏུ་གཏོང་རྒྱུ་དང་ཟུང་འབྲེལ་དམ་ཟབ་བྱས་ཏེ། མཁོ་སྤྲོད་ཕྱོགས་གཉིས་ཀྱིས་དུས་གཅིག་ཏུ་ནུས་ཤུགས་འདོན་པ་དང་མཐུན་སྦྱོར་གཞོགས་འདེགས་བྱས་ནས་དགོས་མཁོས་མཁོ་སྤྲོད་ལ་སྣེ་ཁྲིད་དང་། མཁོ་སྤྲོད་ཀྱིས་དགོས་མཁོ་གསར་སྐྲུན་བྱེད་པའི་སྔར་བས་མཐོ་བའི་ཆུ་ཚད་འགུལ་རྣམ་དོ་མཉམ་ཆགས་པ་བྱས་ཏེ་རྒྱལ་དམངས་དཔལ་འབྱོར་འཁོར་རྒྱུག་ལེགས་པོ་ཡོང་བ་བྱེད་དགོས། ནང་མཁོ་རྒྱ་སྐྱེད་གཏོང་བའི་འཐབ་ཇུས་འཆར་འགོད་ཀྱི་རྩ་གནད་ལག་བསྟར་དོན་འཁྱོལ་མཐའ་གཅིག་ཏུ་བྱེད་པ་དང་ནང་མཁོའི་མ་ལག་ཆ་ཚང་གང་མགྱོགས་ཆགས་པ་བྱེད་ཅིང་། ཡོང་འབབ་ཀྱི་འདེགས་སྐྱོར་ཡོད་པའི་འཛད་སྤྱོད་དགོས་མཁོ་དང་། ལུགས་མཐུན་གྱི་ཐོབ་ཆ་ཡོད་པའི་མ་འཇོག་དགོས་མཁོ། མ་དངུལ་དང་བུ་ལོན་གྱི་ཚོད་འཛིན་ཡོད་པའི་དངུལ་རྩའི་དགོས་མཁོ་བཅས་རྒྱ་སྐྱེད་ཤུགས་ཆེན་གཏོང་དགོས། གྲོང་མིའི་འཛད་སྤྱོད་རྒྱ་ཆེར་གཏོང་བའི་ཕུགས་ཕན་གྱི་ལམ་སྲོལ་འཛུགས་པ་དང་འཐུས་ཚང་དུ་བཏང་ནས་གྲོང་མིར་ཡོང་འབབ་བརྟན་པོ་ཡོད་པས་འཛད་སྤྱོད་བྱེད་ཐུབ་པ་དང་། འབྱུང་འགྱུར་གྱི་སེམས་ཁྲལ་མེད་པས་འཛད་སྤྱོད་བྱེད་ཕོད་པ། འཛད་སྤྱོད་ཀྱི་ཁོར་ཡུག་ལེགས་པ་དང་ཐོབ་སྣང་ཆེ་བས་འཛད་སྤྱོད་བྱེད་འདོད་པ་བཅས་བྱེད་དགོས། མ་འཇོག་རྒྱ་ཆེར་གཏོང་བའི་ལམ་སྲོལ་འཐུས་ཚང་དུ་གཏོང་བ་དང་། ནུས་ལྡན་གྱི་མ་འཇོག་བར་སྟོང་རྒྱ་ཆེར་གཏོང་བ། རྨང་གཞིའི་སྒྲིག་བཀོད་གསར་པ་སྔོན་ཚུད་ནས་བཀོད་སྒྲིག་འོས་འཚམ་བྱེད་པ། ལག་རྩལ་མཐོ་བའི་ཐོན་ལས་དང་འཐབ་ཇུས་རང་བཞིན་གྱི་གསར་དར་ཐོན་ལས་ལ་མ་འཇོག་བྱེད་རྒྱ་ཆེ་རུ་གཏོང་བ། དམངས་ཁྲོད་ཀྱི་མ་འཇོག་གསོན་ཤུགས་རྒྱུན་མཐུད་སྐུལ་སློང་བཅས་བྱེད་དགོས། འདོན་སྤྲོད་ཕྱོགས་གྲུབ་ཚུལ་རང་བཞིན་གྱི་སྒྱུར་བཅོས་མུ་མཐུད་གཏིང་ཟབ་ཏུ་གཏོང་དགོས་ཏེ། ཚན་རྩལ་གསར་གཏོད་དང་ལམ་ལུགས་གསར་གཏོད་ལ་མུ་མཐུད་སྐུལ་འདེད་བཏང་ནས། མཁོ་སྤྲོད་ཚད་བཀག་གི་འཚང་ས་དང་། འགག་ས། ཞན་ས་བཅས་ཚད་བརྒལ་ཡོང་བ་དང་། ཐོན་ལས་མུ་ཕྲེང་དང་མཁོ་སྤྲོད་མུ་ཕྲེང་གི་འགྲན་རྩོད་ནུས་པ་དང་བདེ་འཇགས་རང་བཞིན་ཆེ་རུ་གཏོང་བ་བཅས་བྱས་ཏེ། རང་བརྟེན་ཚོད་འཛིན་ཐུབ་པ་དང་སྤུས་ཚད་མཐོ་བའི་མཁོ་སྤྲོད་ལ་བརྟེན་ནས་ད་ཡོད་ཀྱི་དགོས་མཁོ་སྐོང་བ་དང་དགོས་མཁོ་གསར་པ་གཏོད་པ་དང་དགོས་མཁོ་གསར་པར་སྣེ་ཁྲིད་བྱེད་དགོས། མཁོ་སྤྲོད་དང་དགོས་མཁོའི་དོ་མཉམ་ཤོར་བ་དང་། འཁོར་རྒྱུག་ཡག་པོ་མ་བྱུང་བ་ནི་དཔལ་འབྱོར་དང་དངུལ་རྩའི་ཁྱབ་ཁོངས་ཀྱི་ཉེན་ཁ་ཚབས་ཆེན་བྱུང་བའི་འབྱུང་རྩ་ཞིག་རེད། ནང་མཁོ་རྒྱ་སྐྱེད་གཏོང་རྒྱུ་དང་འདོན་སྤྲོད་ཕྱོགས་གྲུབ་ཚུལ་རང་བཞིན་གྱི་སྒྱུར་བཅོས་གཏིང་ཟབ་ཏུ་གཏོང་རྒྱུར་སྤྱི་འདོམས་ཡག་པོ་བྱས་ཚེ། དཔལ་འབྱོར་དང་དངུལ་རྩའི་ཁྱབ་ཁོངས་ཁྲོད་ཀྱི་ཉེན་ཁ་སྔོན་འགོག་དང་སེལ་བར་ཕན་ཐོགས་ཡོད།

གཉིས་པ། ཚན་རྩལ་རང་ཚུགས་རང་དར་གྱི་གོམ་སྟབས་ཇེ་མགྱོགས་སུ་བཏང་ནས་ཕྱི་རྒྱལ་གྱི་“སྐེ་བཙིར་བའི་”གནད་དོན་ཐག་གཅོད་བྱེད་དགོས། དེང་གི་འཛམ་གླིང་དུ་ཚན་རིག་ལག་རྩལ་ནི་ཐོན་སྐྱེད་ནུས་ཤུགས་ཨང་དང་པོ་དང་འགྲན་རྩོད་ནུས་ཤུགས་ཨང་དང་པོ་ཡིན། ང་ཚོས་ཏང་ཀྲུང་དབྱང་གིས་ཚན་རྩལ་ལས་དོན་ལ་གཅིག་གྱུར་འགོ་ཁྲིད་བྱེད་པའི་སྒྲིག་སྲོལ་འཐུས་ཚང་དུ་གཏོང་བ་དང་། རྒྱལ་ཡོངས་ཀྱི་སྒྲིག་སྲོལ་གསར་པ་འཐུས་ཚང་དུ་གཏོང་བ། རྒྱལ་ཁབ་ཀྱི་འཐབ་ཇུས་ཚན་རྩལ་སྟོབས་ཤུགས་ཆེ་རུ་གཏོང་བ། གསར་གཏོད་ཀྱི་ཐོན་ཁུངས་བགོ་སྒྲིག་ལེགས་སུ་གཏོང་བ་བཅས་བྱས་ནས་གལ་ཆེའི་ཚན་རྩལ་ཁྱབ་ཁོངས་ནང་རང་རྒྱལ་འདི་ཉིད་གོ་ལ་ཧྲིལ་པོའི་སྣེ་ཁྲིད་མཁན་དུ་འགྱུར་བ་དང་། མདུན་ཕྱོགས་ཀྱི་སྣོལ་འདྲེས་ཁྱབ་ཁོངས་ནང་གསར་འབྱེད་མཁན་དུ་འགྱུར་བར་བྱས་ཏེ། གང་མགྱོགས་ངང་འཛམ་གླིང་གི་ཚན་རིག་ལྟེ་གནས་དང་གསར་གཏོད་ཀྱི་མཐོ་ས་གཙོ་བོར་འགྱུར་བ་བྱེད་དགོས། ཚན་སློབ་ལ་བརྟེན་ནས་རྒྱལ་ཁབ་དར་རྒྱས་གཏོང་བའི་འཐབ་ཇུས་དང་། ཤེས་ལྡན་མི་སྣར་བརྟེན་ནས་རྒྱལ་ཁབ་སྟོབས་ཆེར་གཏོང་བའི་འཐབ་ཇུས། གསར་གཏོད་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བའི་འཐབ་ཇུས་བཅས་མཉམ་འགུལ་ནུས་ལྡན་ཡོང་བ་མངོན་འགྱུར་བྱས་ཏེ། སློབ་གསོ་འཕེལ་རྒྱས་དང་ཚན་རྩལ་གསར་གཏོད། ཤེས་ལྡན་མི་སྣ་གསོ་སྐྱོང་བཅས་གཞི་གཅིག་ཏུ་སྐུལ་འདེད་གཏོང་རྒྱུ་རྒྱུན་འཁྱོངས་བྱས་ནས་འཁོར་རྒྱུག་བཟང་པོ་ཞིག་ཆགས་པ་བྱེད་དགོས། རང་རྟེན་གསར་གཏོད་དང་། ཕྱོགས་བསྡུས་གསར་གཏོད། སྒོ་འབྱེད་གསར་གཏོད་བཅས་གཞི་གཅིག་ཏུ་འགྱུར་བའི་ཇུས་འགོད་བྱ་རྒྱུ་རྒྱུན་འཁྱོངས་བྱས་ཏེ་འབྲེལ་མཐུད་ནུས་ལྡན་ཡོང་བ་བྱེད་དགོས། གསར་གཏོད་མུ་ཕྲེང་དང་ཐོན་ལས་མུ་ཕྲེང་། ཤེས་ལྡན་མི་སྣའི་མུ་ཕྲེང་བཅས་གཞི་གཅིག་ཏུ་བཀོད་སྒྲིག་བྱ་རྒྱུ་རྒྱུན་འཁྱོངས་བྱས་ཏེ་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་དགོས།

གསུམ་པ། དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་མགྱོགས་སུ་གཏོང་བ་དང་འཕེལ་རྒྱས་ཀྱི་རྣམ་པ་གསར་པའི་ཐོན་ལས་ཀྱི་རྨང་གཞི་བརྟན་དུ་གཏོང་དགོས། འཕེལ་རྒྱས་ཀྱི་རྣམ་པ་གསར་པ་ནི་དེང་རབས་ཅན་གྱི་ཐོན་ལས་མ་ལག་གིས་རྨང་གཞི་བྱེད་དགོས་པ་དང་། དཔལ་འབྱོར་འཁོར་རྒྱུག་ཤར་གཏོང་བྱེད་པར་ཐོན་ལས་ཁག་རིམ་ལྡན་ངང་སྦྲེལ་མཐུད་དང་ནུས་ཆེའི་ངང་ཤར་གཏོང་བྱེད་དགོས། མིག་སྔར་གོ་ལ་ཧྲིལ་པོའི་ཐོན་ལས་མ་ལག་དང་ཐོན་ལས་མུ་ཕྲེང་དང་མཁོ་སྤྲོད་མུ་ཕྲེང་ཐད་སྣ་མང་ཅན་གྱི་བཀོད་པ་དང་། ས་ཁོངས་ཅན་གྱི་མཉམ་ལས། ལྗང་མདོག་ཅན་གྱི་ཕྱོགས་སྒྱུར། གྲངས་ཀ་ཅན་གྱི་འཕེལ་ཕྱོགས་མགྱོགས་སུ་འགྲོ་བ་བཅས་ཀྱི་རྣམ་པ་མངོན་ཡོད། དེ་ནི་དཔལ་འབྱོར་འཕེལ་རྒྱས་ཀྱི་ཆོས་ཉིད་དང་ལོ་རྒྱུས་ཀྱི་འཕེལ་ཕྱོགས་ཆེན་པོ་ཞིག་ཡིན་པས། མིའི་འདོད་བློ་ལྟར་འགྱུར་ལྡོག་གཏོང་མི་རུང་། ང་ཚོས་མུ་མཐུད་དུ་དཔལ་འབྱོར་འཕེལ་རྒྱས་གཏོང་བའི་ཤུགས་རྒྱག་ས་དེ་དངོས་གཞིའི་དཔལ་འབྱོར་གྱི་སྟེང་དུ་བཞག་སྟེ། བཟོ་ལས་ཅན་གསར་པར་སྐུལ་འདེད་ཏན་ཏིག་གཏོང་དགོས་པ་དང་། བཟོ་སྐྲུན་གྱི་རྒྱལ་ཁབ་སྟོབས་ལྡན་དང་། སྤུས་ཚད་ཀྱི་རྒྱལ་ཁབ་སྟོབས་ལྡན། དྲ་རྒྱའི་རྒྱལ་ཁབ་སྟོབས་ལྡན། གྲངས་ཀའི་ཀྲུང་གོ་བཅས་མགྱོགས་པོར་འཛུགས་སྐྲུན་བྱས་ཏེ། རྒྱལ་སྤྱིའི་འགྲན་རྩོད་ནུས་པ་ལྡན་པའི་གྲངས་ཀའི་ཐོན་ལས་ཁྱུ་ཚོགས་བསྐྲུན་དགོས། ཐོན་ལས་འཕེལ་རྒྱས་ཀྱི་འཕེལ་ཕྱོགས་ཆེན་པོ་དང་བསྟུན་ནས་དུས་དང་བར་སྟོང་ཕྱོགས་གཉིས་ནས་ཐོན་ལས་རིམ་སྤོར་དང་ཐོན་ལས་སྤོ་སྒྱུར་ལ་སྤྱི་འདོམས་དམ་འཛིན་ཡག་པོ་བྱེད་དགོས། ཕྱོགས་གཅིག་ནས་ཞན་ཆའི་ཐོན་ལས་ལ་མུ་ཕྲེང་གསབ་པ་དང་། དགེ་མཚན་ལྡན་པའི་ཐོན་ལས་ལ་མུ་ཕྲེང་སྲིང་བ། སྲོལ་རྒྱུན་གྱི་ཐོན་ལས་ལ་མུ་ཕྲེང་སྤར་བ། གསར་དར་གྱི་ཐོན་ལས་ལ་མུ་ཕྲེང་འཛུགས་པ་བཅས་ལ་སྐུལ་འདེད་བཏང་ནས་ཐོན་ལས་འཕེལ་རྒྱས་ཀྱི་རྒྱུན་མཐུད་རང་བཞིན་དང་འགྲན་རྩོད་ནུས་པ་ཆེ་རུ་གཏོང་དགོས། ཕྱོགས་གཞན་ཞིག་ནས་སྒྱུར་བཅོས་གཏིང་ཟབ་ཏུ་བཏང་ནས་ས་ཁོངས་འཐབ་ཇུས་སྤྱི་འདོམས་དང་ཚོང་ར་གཞི་གཅིག་ཅན་གྱི་འཕེལ་རྒྱས་སོགས་ཀྱི་ལམ་སྲོལ་འཐུས་ཚང་དུ་གཏོང་བ་དང་། ཐོན་སྐྱེད་ནུས་ཤུགས་ཀྱི་བཀོད་པ་ལེགས་སུ་གཏོང་བ། གཙོ་གནད་ཐོན་ལས་རྒྱལ་ཁབ་ཕྱི་ནང་དུ་རིམ་ལྡན་ངང་སྤོ་སྒྱུར་བྱ་རྒྱུར་སྐུལ་འདེད་གཏོང་བ། ཁེ་ལས་གོ་ལ་ཧྲིལ་པོའི་ཐོན་ལས་ལས་བགོས་དང་མཉམ་ལས་ནང་གཏིང་ཟབ་ཞུགས་རྒྱུར་རྒྱབ་སྐྱོར་བྱེད་པ། ཕྱི་ནང་གི་ཐོན་ལས་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་བ་བཅས་བྱས་ནས། རང་བརྟེན་ཚོད་འཛིན་ཐུབ་པ་དང་བདེ་འཇགས་བློས་འགེལ་ཆོག་པ། འགྲན་རྩོད་ནུས་པ་ཆེ་བ་བཅས་ཀྱི་དེང་རབས་ཅན་གྱི་ཐོན་ལས་མ་ལག་བསྐྲུན་དགོས།

བཞི་པ། ཕྱོགས་ཡོངས་ནས་གྲོང་ཁྱེར་དང་གྲོང་གསེབ་བར་དང་། ས་ཁོངས་ཁག་བར་མཐུན་སྦྱོར་ངང་འཕེལ་རྒྱས་ཡོང་བར་སྐུལ་འདེད་གཏོང་བ་དང་རྒྱལ་ནང་གི་འཁོར་རྒྱུག་ཆེན་པོའི་ཁེབས་རྒྱ་ཆེ་རུ་གཏོང་དགོས། གྲོང་ཁྱེར་དང་གྲོང་གསེབ་བར་དང་། ས་ཁོངས་ཁག་བར་མཐུན་སྦྱོར་ངང་འཕེལ་རྒྱས་མངོན་འགྱུར་བྱུང་ན། རྒྱལ་ནང་གི་འཁོར་རྒྱུག་ཆེན་པོའི་བར་སྟོང་ད་གཟོད་སྔར་ལས་རྒྱ་ཆེ་བ་དང་། རྒྱུ་སྤུས་སྔར་ལས་འཛོམས་པོ་ཡོང་ཐུབ། གྲོང་གསེབ་ནི་འཛད་སྤྱོད་ཚོང་ར་ཆེན་པོ་ཞིག་ཡིན་པ་མ་ཟད། རྒྱུ་རྐྱེན་གཙོ་བོའི་ཚོང་ར་ཆེན་པོ་ཞིག་ཀྱང་ཡིན་པས། རྒྱལ་ནང་གི་འཁོར་རྒྱུག་ཆེན་པོའི་གྲུབ་ཆ་གལ་ཆེན་ཞིག་ཡིན། གྲོང་གསེབ་ནི་འཛད་སྤྱོད་ཚོང་ར་དང་རྒྱུ་རྐྱེན་གཙོ་བོའི་ཚོང་ར་ཡིན་པའི་ནུས་པ་གལ་ཆེན་འདོན་སྤེལ་གང་ལེགས་བྱེད་པ་དང་། ཕྱོགས་ཡོངས་ནས་གྲོང་གསེབ་དར་རྒྱས་ལ་སྐུལ་འདེད་གཏོང་བ། རྫོང་མཁར་གཞི་རྟེན་གལ་ཆེན་དུ་བྱས་པའི་གྲོང་ཁྱེར་དང་གྲོང་རྡལ་ཅན་གྱི་འཛུགས་སྐྲུན་ལ་སྐུལ་འདེད་གཏོང་བ། གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། གྲོང་ཁྱེར་དང་གྲོང་གསེབ་ཀྱི་དཔལ་འབྱོར་འབྲེལ་བ་ཟབ་ཏུ་གཏོང་བ། གྲོང་ཁྱེར་དང་གྲོང་གསེབ་ཀྱི་དཔལ་འབྱོར་འཁོར་རྒྱུག་ཤར་གཏོང་ཐུབ་པ་བཅས་བྱེད་དགོས། ས་གནས་ཁག་གིས་རང་ངོས་ཀྱི་འཁོར་རྒྱུག་ཆུང་གྲས་གཉེར་བ་དང་ས་ཁོངས་ཀྱི་བཀག་རྒྱ་མེད་པར་བཟོས་ཏེ་རྒྱལ་ཡོངས་ཀྱི་གཅིག་གྱུར་ཚོང་ར་ཆེན་པོ་དངོས་སུ་ཆགས་པ་བྱེད་དགོས། ས་ཁོངས་མཐུན་སྦྱོར་ངང་འཕེལ་རྒྱས་གཏོང་བའི་འཐབ་ཇུས་དང་ས་ཁོངས་ཀྱི་འཐབ་ཇུས་གལ་ཆེན། གཙོ་ནུས་ཐོན་ཁུལ་གྱི་འཐབ་ཇུས་སོགས་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་བ་དང་། ཐོན་སྐྱེད་ནུས་ཤུགས་ཀྱི་བཀོད་པ་གལ་ཆེན་ལེགས་སུ་གཏོང་བ། རྒྱུ་རྐྱེན་གཙོ་བོ་ཁག་ལུགས་མཐུན་ངང་འཁོར་སྐྱོད་དང་ནུས་ཆེའི་ངང་གཅིག་སྡུད་བྱ་རྒྱུར་སྐུལ་འདེད་གཏོང་བ། རྒྱལ་ནང་གི་འཁོར་རྒྱུག་ཆེན་པོ་ཤར་གཏོང་ཐུབ་པ་བཅས་བྱེད་དགོས།

ལྔ་པ། སྒྱུར་བཅོས་སྒོ་འབྱེད་སྔར་བས་གཏིང་ཟབ་ཏུ་བཏང་ནས་རྒྱལ་ཁབ་ཕྱི་ནང་གི་འཁོར་རྒྱུག་ཆེན་པོའི་སྒུལ་ཤུགས་དང་གསོན་ཤུགས་ཆེ་རུ་གཏོང་དགོས། རྒྱུ་རྐྱེན་གཙོ་བོའི་ཚོང་ར་ཅན་གྱི་སྒྱུར་བཅོས་གཏིང་ཟབ་ཏུ་གཏོང་བ་དང་ཚད་གཞི་མཐོ་བའི་ཚོང་རའི་མ་ལག་བསྐྲུན་ཏེ་རྒྱལ་ཡོངས་ཀྱི་གཅིག་གྱུར་ཚོང་ར་ཆེན་པོ་གང་མགྱོགས་བསྐྲུན་དགོས། རྒྱུ་ནོར་བདག་དབང་སྲུང་སྐྱོབ་དང་། ཚོང་རར་ཞུགས་འཐུས། འགྲན་རྩོད་དྲང་གཞག། སྤྱི་ཚོགས་ཡིད་རྟོན་སོགས་ཚོང་རའི་དཔལ་འབྱོར་གྱི་རྨང་གཞིའི་ལམ་ལུགས་འཐུས་ཚང་དུ་བཏང་ནས། སྒེར་སྡེམ་ལ་རྒོལ་བ་དང་ཚུལ་མིན་འགྲན་རྩོད་ལ་རྒོལ་བར་ཤུགས་སྣོན་རྒྱག་པ་དང་། མ་རྩ་སྐྱོན་བྲལ་ངང་འཕེལ་རྒྱས་ཡོང་རྒྱུ་དེ་ཁྲིམས་ལྟར་ཚད་ལྡན་དུ་གཏོང་བ་དང་ཁྲིད་སྟོན་བཅས་བྱས་ཏེ། གཉེར་སྐྱོང་བྱེད་པོ་སྣ་ཚོགས་ཀྱིས་མ་འཇོག་དང་ལས་གཏོད་ལ་ཁོར་ཡུག་བཟང་པོ་བསྐྲུན་ནས། གཉེར་སྐྱོང་བྱེད་པོ་སྣ་ཚོགས་ཀྱི་གསོན་ཤུགས་སྐུལ་སློང་བྱེད་དགོས། ནོར་སྲིད་དང་དངུལ་རྩའི་སྒྲིག་སྲོལ་སྒྱུར་བཅོས་ཟབ་སྤེལ་དང་། དེང་རབས་ཀྱི་ནོར་ཁྲལ་དང་དངུལ་རྩའི་སྒྲིག་སྲོལ་འཐུས་ཚང་དུ་བཏང་ནས། དེང་རབས་ཀྱི་སྔོན་རྩིས་ལམ་ལུགས་འཐུས་ཚང་དུ་གཏོང་བ་དང་། ཁྲལ་བསྡུའི་ལམ་ལུགས་ཀྱི་གྲུབ་ཚུལ་ལེགས་སུ་གཏོང་བ། ནོར་སྲིད་གཏོང་སྤྲོད་སྤོ་སྒྱུར་བྱེད་པའི་མ་ལག་འཐུས་ཚང་དུ་གཏོང་བ། དེང་རབས་ཀྱི་ཀྲུང་དབྱང་དངུལ་ཁང་ལམ་ལུགས་འཛུགས་པ་དང་། དེང་རབས་ཀྱི་དངུལ་རྩའི་ལྟ་སྐུལ་དོ་དམ་འཐུས་ཚང་དུ་གཏོང་བ། དངུལ་རྩའི་བརྟན་བརླིང་འགན་སྲུང་མ་ལག་འཛུགས་པ། མ་རྩའི་ཚོང་རའི་བྱེད་ནུས་འཐུས་ཚང་དུ་གཏོང་བ། དེང་རབས་ཀྱི་མ་རྩའི་ཚོང་རའི་དགེ་མཚན་ལྡན་པའི་ནུས་པ་འདོན་སྤེལ་བྱེད་པ་བཅས་བྱེད་དགོས། ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་ལ་སྐུལ་འདེད་གཏོང་བ་དང་། ཚད་གཞི་མཐོ་བའི་རྒྱལ་སྤྱིའི་ཉོ་ཚོང་དང་མ་འཇོག་གི་ཀུན་འཕྲོད་སྒྲིག་སྲོལ་དང་བསྡུར་བ་བྱས་ནས། སྒྲིག་སྲོལ་དང་སྒྲིག་ལམ། དོ་དམ། ཚད་གཞི་སོགས་ལམ་ལུགས་ཅན་གྱི་སྒོ་འབྱེད་བརྟན་པོའི་ངང་རྒྱ་ཆེར་བཏང་སྟེ། རྒྱལ་སྤྱིའི་འཁོར་རྒྱུག་ཆེན་མོའི་ཁྲོད་ཀྱི་སྐད་ཆ་ཤོད་དབང་ཆེ་རུ་གཏོང་དགོས། ས་ཁོངས་སྒོ་འབྱེད་ཀྱི་བཀོད་པ་ལེགས་སྒྱུར་བྱས་ཏེ་ནུབ་རྒྱུད་ཀྱི་སྐམ་ས་དང་རྒྱ་མཚོའི་འགྲོ་ལམ་གསར་པ་མགྱོགས་པོར་འཛུགས་སྐྲུན་དང་། ཧའེ་ནན་གྱི་རང་མོས་ཉོ་ཚོང་གྲུ་ཁ་མགྱོགས་པོར་འཛུགས་སྐྲུན་བྱས་ཏེ། རང་མོས་ཉོ་ཚོང་ཚོད་ལྟ་ཁུལ་གྱི་མཐོར་འདེགས་འཐབ་ཇུས་ལག་བསྟར་བྱེད་ཅིང་། རྒྱལ་སྤྱིའི་འཁོར་རྒྱུག་ཆེན་པོའི་ནང་ཐེ་ཞུགས་བྱེད་པའི་འཕར་གཞི་ཆགས་པར་བྱེད་དགོས། མི་དམངས་ཤོག་སྒོར་རྒྱལ་སྤྱི་ཅན་དུ་འགྱུར་བར་རིམ་ལྡན་ངང་སྐུལ་འདེད་གཏོང་བ་དང་། ཕྱི་རྒྱལ་གྱི་ཚོང་པས་མ་དངུལ་འཇོག་པའི་ཁེ་དབང་ཁྲིམས་ལྟར་སྲུང་སྐྱོབ་བྱས་ཏེ་རྒྱལ་སྤྱིའི་དཔལ་འབྱོར་མཉམ་ལས་དང་འགྲན་རྩོད་ནང་ཞུགས་པའི་དགེ་མཚན་གསར་པ་བསྐྲུན་དགོས། “རྒྱུད་གཅིག་ལམ་གཅིག་”མཉམ་སྐྲུན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། རྒྱལ་སྤྱིའི་དཔལ་འབྱོར་གྱི་ཉོ་ཚོང་སྒྲིག་སྲོལ་གྱི་གྲོས་མོལ་ནང་ཧུར་ཐག་ཞུགས་ནས། སྒོ་འབྱེད་དང་། སྣ་མང་། བརྟན་པོ་བཅས་ཀྱི་འཛམ་གླིང་དཔལ་འབྱོར་གྱི་སྒྲིག་ལམ་ཆགས་པར་སྐུལ་འདེད་བཏང་སྟེ། རྒྱལ་ནང་དང་རྒྱལ་སྤྱིའི་ཚོང་ར་གཉིས་དང་ཐོན་ཁུངས་གཉིས་མཉམ་འགུལ་འཁོར་རྒྱུག་མངོན་འགྱུར་ཡོང་ཆེད་ཆ་རྐྱེན་བསྐྲུན་དགོས།

རྡོ་རྗེ་རིན་ཆེན་གྱིས་བསྒྱུར།

※འདི་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་2023ལོའི་ཟླ་དང་པོའི་ཚེས་31ཉིན་ཀྲུང་དབྱང་ཆབ་སྲིད་ཅུས་ཀྱི་སྐབས་ཉི་ཤུ་པའི་ཐུན་མོང་སློབ་སྦྱོང་ཐེངས་གཉིས་པའི་ཐོག་གནང་བའི་གསུང་བཤད་ཀྱི་ཆ་ཤས་གཙོ་བོ་རེད།