བཤེས་གཉེན་གང་དེ་རྟ་བདུན་དབང་པོ་བཞིན། །
ཤེས་རིག་ཡོན་ཏན་གཏིང་ཟབ་ཆུ་གཏེར་ལྟར། །
ཐུགས་རྒྱུད་ལྷག་བསམ་དཀར་བ་གངས་ཀྱི་རི། །
ཀུན་ལ་སྙོམས་པོར་འཇུག་པས་དྲིན་ཅན་པོ། །
བཤེས་གཉེན་གདམས་ངག་འོ་མའི་ཟས་བཅུད་ཀྱིས། །
གདུལ་བྱའི་བློ་གྲོས་ལུས་སྟོབས་གོ་རྟོགས་འཕེལ། །
བཤེས་གཉེན་གང་དེའི་སློབ་གསོ་བཟང་པོ་ཡིས། །
མི་རིགས་སློབ་གསོའི་འོད་སྣང་ཕྱོགས་བཞིར་མཆེད། །
བཤེས་གཉེན་གང་དེའི་བཀའ་དྲིན་རི་རབ་བཞིན། །
རིགས་ལ་དུང་བ་བཤེས་གཉེན་གང་དེའི་གཤིས། །
བཟོ་སྐྲུན་མཁན་པོའི་མཚན་དང་མཐུན་དཔེ་འོས། །
མི་རིགས་སློབ་གསོའི་དེད་དཔོན་རྣམས་ལ་གུས། །
རྟ་བདུན་དབང་པོའི་འོད་སྣང་འགྱེད་པ་བཞིན། །
བཤེས་གཉེན་གང་དེས་ཤེས་བྱའི་རྨོངས་སེལ་ཞིང་། །
སློབ་གསོའི་བློ་ཡིས་རྨོངས་པ་མཐའ་ནས་སངས། །
མི་རིགས་སློབ་གསོའི་མཚན་ལྡན་བཤེས་ལ་གུས། །
ཁ་བཤད་ལག་ལེན་དངོས་སུ་སྒྲུབ་པ་དེས། །
བཤེས་གཉེན་གང་དེའི་སྙིང་སྟོབས་བླ་ན་འཕགས། །
སློབ་གསོའི་རྩ་བ་སྐད་ཡིག་བླ་དང་སྲོག །
སྐད་ཡིག་སློབ་གསོའི་བསྟན་པ་རྒྱས་གྱུར་ཅིག །