ཁྲི་ཀ

གློག་འོད་ཟམ་ཟིམ།

རླུང་བུ་ཤུར་ཤུར།

རྒྱུ་ལམ་ན་མི་ཚོགས་ཀྱི་རླབས་རྒྱུན་གཡོ།

བཞི་ཚུགས་ན་རླངས་འཁོར་གྱི་འགྲུལ་བཞུད་བྲིན།

ལག་འཇུ་ཐེངས་གཅིག་གིས་རྨ་ཆུའི་འགྲམ་དར་ཞུ།

ཁྲི་ཀའི་རྒྱ་ལྕང་ལའང་མྱུ་གུ་འབུས།

དྭངས་ཤིང་གཙང་བའི་རྨ་ཆུ།

ཁྱེད་ཀྱི་དུང་སེམས་དང་ཞེ་འདང་འདྲ་ལེ།

འཁང་ར་དང་ལས་བདའ་མེད་པའི་ཁྲི་ཀ

ཕྱིར་མིག་འཕངས་རྗེས་ཀྱི་མིག་ཆུར་འཐིམས།

ཞེན་ཆགས་ཀྱིས་རུམ་པའི་ཁྲི་ཀའི་མཚན་མོ།

ཡིད་དུ་གདུང་བའི་མིག་ཆུ་དང་བསྡོངས་ཏེ་ཡལ།

རྨ་ཆུའི་ཟམ་ཁ་རུ་བཞག་པའི་ཞེ་བརྩེ།

དགུན་མཇུག་གི་ཁ་བ་རེད།

དཔྱིད་མགོ་མའི་སྔོ་དམར་རེད།

ཁྲི་ཀ  འཁྲེང་ཞེན་ཀྱིས་འཚོས་པའི་ཁྲི་ཀ

ཡིད་སེམས་ཀྱི་གཏིང་ལ་སུག་མྱོང་བའི་ཁྲི་ཀ

གྱེས་གདུང་གིས་མནར་བའི་ཁྲི་ཀ

གཏམ་རྒྱུད་ཀྱིས་མ་བོར་བའི་ཁྲི་ཀ

མིག་ཆུའི་རབ་ཁ་ནས་སྐྱེལ་མ་ཡང་ཡང་བྱས་མྱོང་བའི་ཁྲི་ཀ

སྙིང་གཏམ་གྱི་བདུད་རྩི་ལུད་པའི་ཁྲི་ཀ

མཛེས་སྡུག་གིས་བཟི་བའི་ཡུན་ཐུང་གི་དག་ཞིང་།

འཆར་ཡན་གྱི་སྦུབས་སུ་ངང་གིས་ཚུད།

ཟླ་འོད་ལ་འཇམ་ཤ་གླན་ནས།

རྨ་ཀླུང་ལ་འཁྲེང་སེམས་སྐུར་དུས།

ལྷིང་འཇགས་ཀྱི་སྦྲང་རྩི་སྦྱིན་མཁན་ཁྱེད་ཡིན།

མངར་ཁ་ལྡན་པའི་ཡིད་ཀྱི་དྲན་པ།

ལན་བུའི་གསེང་ལ་ཤོར་བའི་སྐད་ཆ་ཤབ་ཤུབ་དག

ཕྱིར་དྲན་གྱི་རྣ་ཆས་བཏེགས་པའི་ཤེལ་གྱི་ཕྲ་རྒྱན་ཡིན།

ཐོ་རངས་ཀྱི་སྐར་ཆེན་ལྟ་བུའི་མིག་ཟུང་ལས།

ཡི་གར་འོང་བའི་མཆི་མའི་འོད་གོར་གྱི་བཀྲག་མདངས་འཚེར།

འཁྲུལ་སྣང་གིས་སྐད་ཅིག་སད་རྗེས་མི་ཚེ་ཞིག་བཟི་ལ་ཡལ།

ལས་ཀྱི་སྟབས་ཁ་མ་འགྲིག་པའི་ངང་ཆུང་།

མཚོ་མཐའི་དྲན་པ་ཉར་ནས་རྒྱང་ལ་ཆས།

སྨྲེང་བ་སྨུག་དང་འདྲེས་སོང་།

སྨུག་པ་རླུང་གིས་ཁུར་སོང་།