དགུན་ཁ་འདིར།
ཕ་ཡུལ་སྐྱ་ཐིང་ཐིང་གི་དགུན་ཁའི་པང་ན་ཡོད།
ང་རང་ཆ་རྒྱུས་ཡོད་པའི་སྲང་འདིའི་ཁ་དོག་ཡང་གྱུར་སོང་།
ཡིན་ནའང་། འུ་གཉིས་ཀྱི་གཏམ་རྒྱུད་རིང་མོ་ད་དུང་འཇུག་རྫོགས་མེད་ལ།
སྐྱ་མདོག་གིས་མ་བྱུགས་ཤིང་དར་ཚོན་སྣ་ལྔ་ལྟར་གནས་ཡོད།
༢
དགུན་ཁ་འདིར།
མཚན་མོའི་སྐར་ཚོགས་རབ་རིབ་ཁྲོད།
ངས་རྒྱང་རིང་གི་ཁྱོད་རང་རྨི་ལམ་དུ་རྨིས་སོང་།
དགུན་ཁའི་མཚན་མོའི་དུས་ཚོད་ཀྱི་སྤྲོ་སྐྱིད་ཀྱི་སྒྲོན་མེ་འབར་སོང་།
༣
དགུན་ཁ་འདིར།
དགུན་ཁ། རེ་སྒུག་གིས་སླེབས་ཤིང་སྤྲོ་སྐྱིད་ཀྱིས་འཛུམ།
ད་ནི་སྒྲུང་རིང་ཞིག་གི་དབུ་འཁྱུད་འབྲི་བའི་དུས་ལ་བབ་ཡོད་པ་འདྲ།
དགུན་ཁ་འདི་དྭངས་གཙང་ལྷད་མེད་པའི་བརྩེ་དུང་དེ་རེད་སྙམ།
དེ་བས་དགུན་ཁ་འདི་ཅི་འདྲའི་མཛེས་པ་ལ་ཨང་།
༤
དགུན་ཁ་འདིར།
ནམ་ཟླ་ཅི་ལྟར་གྲང་ནའང་།
ཁྱོད་ལ་བཅངས་པའི་དུངས་པ་དྲོད་ཁོལ་དེ།
ཉིན་རེ་ནས་ཉིན་རེར་ཇེ་ཆེར་གྱུར།
དེ་བས། ནམ་ཟླ་ཇི་ལྟར་གྲང་ནའང་།
ཁྱོད་ལ་བཅངས་པའི།
དུངས་པའི་དྲོད་ཁོལ་དེ་འཁྱག་མི་སྲིད། ནམ་ཡང་འཁྱག་མི་སྲིད།
༥
དགུན་ཁ་འདིར།
ཁྱོད་ཀྱི་སྙན་ངག་དྲོན་མོ་དེ་ཁྱེར་ཡོད་ལ།
ངའི་སྐྱེ་བ་འདི་ལ།
ཁྱོད་ཡོད་པས།
ངའི་མི་ཚེར་དགུན་ཁར་འཁྱག་མི་སྲིད་ལ།
ཁྱེད་ཡང་ངའི་དགུན་ཁའི་སྙན་ངག་དྲོན་མོ་དེ་ཡིན།