གནས་མཆོག་གི་ཞིང་ས་ཞིག
ས་ཡི་དགེ་མཚན་རྨད་དུ་བྱུང་བའི་དགའ་ཚལ།
མདོ་ཁམས་སྡེ་དགེའི་བྱང་ཤར་གྱི་འབྲོག་ཐང་གི་ལྗོངས་ཤིག
ནེའུ་གསིང་ལ་གཡུའི་མཎྜལ་བརྒྱན་པའི་དཔྱིད་དཔལ་གྱི་ཕྱག་སོར་ནས།
ཁུ་བྱུག་སྔོན་མོའི་མགྲིན་དབྱངས་ཀྱི་ཀློང་ནས་ཁྱེད་ཀྱིས་ཨ་ཕྱུག་རྩྭ་ཐང་དྲན་མྱོང་སྐད།
རིག་གསུམ་གཅིག་བསྡུས་ཀྱི་རྣམ་སྤྲུལ་དེས་འཁྲུངས་ཡུལ་དྲན་པ་བཞིན།
ངས་འགྲུལ་བཞུད་ཀྱི་རྐང་འགྲོས་གནས་དེར་སྤར་དུས་ཁྱེད་རང་ཅི་ནས་ཀྱང་དྲན་ཡོང་།
འགོག་ཚ་ཇོ་རུ།
སེར་པོ་ཧོར་གྱི་གཉའ་ཤིང་ལ་ལས་ཀྱིས་བསྐོས་པའི་དཔའ་རྟུལ།
ནག་པོ་བདུད་ཀྱི་ཁ་གནོན་ལ་རྟེན་གྱིས་གྲུབ་པའི་སྐྱེས་མཆོག
ཉམ་ཆུང་མཐའ་ནས་སྐྱོང་བའི་བྱམས་བརྩེ་ཡི་ཕ་དང་མ་ཞིག
བཙན་པོ་འབུར་འཇོམས་མཛད་པའི་སྤྱི་ནོར་གྱི་རྒྱལ་པོ་ཆེན་པོ།
ཨ་ཕྱུག་ནས་སེང་འབྲུག་སྟག་རྩེའི་རྒྱ་ཕིབས་རིག་དུས་ཁྱེད་ཉིད་དྲན།
ཁྱེད་ཀྱིས་གདུལ་བྱ་བྱང་ནས་ཕེབས་སོང་མོད།
ཁྱེད་རང་གནས་གཞན་དུ་མ་ཕེབས་པ་འདྲ་སྟེ།
ས་སྐྱིད་སོས་ཡག་གི་མདོ་ནས་ཁྱེད་ཉིད་དྲན།
ཆུ་གཉིས་ཆབ་མ་བརྡབ་འདྲ་ནས་ཁྱེད་ཉིད་དྲན།
བྲག་གཉིས་མདའ་སྒྲོ་གཤིབས་འདྲ་ནས་ཁྱེད་ཉིད་དྲན།
སྤང་གཉིས་བལ་སྟན་བཏིང་འདྲ་ནས་ཁྱེད་ཉིད་དྲན།
བྲག་སྦལ་བ་འདྲ་བའི་རྩ་བ་ནས་ལྷག་ཏུ་ཁྱེད་ཉིད་དྲན།
སྡེ་དགེའི་ཞིང་ཁམས་རྒྱ་ཆེ་ལ་ཨ་ཕྱུག་རྩྭ་ཐང་ཉམས་དགའ་བས།
ཁྱེད་ཀྱི་སྐུ་གསུང་ཐུགས་ཀྱི་འཕྲིན་ལས་བ་དན་སྔར་བས་མཐོ།
རབ་བྱུང་དང་དུས་རབས་བགྲང་གིས་བཞུད་ཀྱང་།
ཁྱེད་རང་ད་དུང་བྱིན་རླབས་ཀྱི་འོད་ཟེར་འཕྲོ་བཞིན་ཨ་ཕྱུག་ལ་བཞུགས་འདུག
ཨ་ཕྱུག་རྩྭ་ཐང་གི་སྨུག་སྤྲིན་དུ་བཞུགས་པའི་ཁྱེད།
ཉིན་མོའི་ཉི་མ་བཞིན་དུ་གསེར་འོད་འཚུབ་སེ།
མཚན་མོའི་ཟླ་བ་བཞིན། དགུང་སྐར་ཚོགས་བཞིན།
ངའི་ལུས་ངག་ཡིད་གསུམ་གྱི་དད་པའི་པདྨོ་ལ་བལྟབས་བྱུང་།
ངའི་སྙན་ངག་གི་སྐྱེད་ཚལ་ལ་དངོས་གནས་ཕེབས་བྱུང་།
གླིང་གི་དཔའ་ཐུལ་སུམ་ཅུ་ཡི་རུ་སྣེ་ལ་ཕེབས་བྱུང་།
ཡང་ཐུལ་དམ་པའི་མི་བདུན་གྱི་སྡོང་གྲོགས་སུ་ཕེབས་བྱུང་།
ཞེ་ཐུལ་ཁྲ་གླག་སྤྱང་གསུམ་གྱི་དགྲ་ལྷ་རུ་ཕེབས་བྱུང་།
ཤར་གྱི་རྨ་རྒྱལ་སྤོམ་ར་དང་ལྷོ་ཡི་ཁ་བ་དཀར་པོར་འགྲོགས་ནས་ཕེབས་བྱུང་།
ནུབ་ཀྱི་གངས་དཀར་ཏི་སེ་དང་བྱང་གི་གཉན་ཆེན་ཐང་ལྷ་བརྒྱུད་དེ་ཕེབས་བྱུང་།
ཁྱེད་ཕེབས་མྱོང་བས་ཡིན་ནམ་ཁྱེད་ཕེབས་ཡོང་བས་ཡིན།
ངས་ཨ་ཕྱུག་གི་འབྲོག་མོ་ཞིག་འབྲུག་མོ་ཡིན་པ་གསལ་ལེར་ཤེས་དུས།
གླིང་དཀར་དཀར་པོའི་ཕྱི་ནང་གསང་གསུམ་གྱི་ལྟེ་བ་དེ་ཨ་ཕྱུག་ནས་མཆེད་པ་ར་སྤྲོད་བྱུང་།
ངའི་དུང་བ་ཟབ་པའི་སྙན་ངག་དེ་ཁྱེད་ཀྱི་བླ་བྱ་དང་བརྩེས་ནས་ཆས་པས།
ཁྱེད་ཨ་ཕྱུག་རྩྭ་ཐང་ནས་དྲན་པའི་ཐོག་མཐའ་བར་གསུམ་ལ་ཕེབས་བྱུང་།
སྐལ་བ་རླུང་གི་བྱེ་མ་ལ་ཟགས་རུང་།
དྲན་པའི་ཨ་ཕྱུག་གི་རྩྭ་ཐང་ནས།
དྲན་ཤིང་གི་འགོག་ཚ་ཇོ་རུ་དྲན་ཨང་།
ཡིད་འོང་གི་ཉི་མ་ལྷ་ས།
ནམ་ཞིག་ལ།
དབུས་ལམ་རིང་མོ་ཞིག་འདེད་དགོས་དུས།
ཉི་མ་ལྷ་ས་ནི། རྒྱང་རིང་ལ་ཡོད་པའི་རྣམ་ཤེས་ཀྱི་ལོག་མལ་ཡིན།
ངའི་སེམས་ཀྱི་ན་ཟུག་ཡོད་ཚད།
གཟུགས་མེད་ཀྱི་རླུང་ལ་བསྐུར་ཏེ།
རྨེག་མེད་དུ་གསུབ་དགོས།
ཁྱེད་ཀྱི།
ཆེས་བརྗིད་པའི་པོ་ཏ་ལ་ཡི།
ཕོ་བྲང་དཀར་དམར་གྱི་རྒྱ་ཕིབས་མཇལ་འོང་།
ནམ་ཞིག་ལ།
དབུས་ལམ་རིང་མོ་ཞིག་འདེད་དགོས་དུས།
ཉི་མ་ལྷ་ས་ནི། བྱེ་ཐང་ལ་འཆར་བའི་སྨིག་རྒྱུ་གྲོང་ཁྱེར་ཞིག་ཡིན།
ངའི་ཡིད་ཀྱི་ཚ་གདུང་ཡོད་ཚད།
མཁའ་རླུང་ཁྲོད་ཀྱི་ཆུའི་རྡུལ་ཕྲན་ལ་བསྐུར་ཏེ།
ཞིམ་མངར་གྱི་སྦྲང་ཆར་དུ་བསྒྱུར་དགོས།
ཁྱེད་ནི།
ཆེས་དྭངས་གཙང་གི་སྐྱིད་ཆུ་རུ།
གསེར་མིག་ཉ་མོའི་གཤོག་རྩལ་འཁྱུག་འོང་།
ནམ་ཞིག་ལ།
དབུས་ལམ་རིང་མོ་ཞིག་འདེད་དགོས་དུས།
ཉི་མ་ལྷ་ས་ནི། གངས་ལ་བཞད་པའི་གངས་ལྷ་མེ་ཏོག་ཅིག་ཡིན།
ངའི་ཡིད་ཀྱི་མཛེས་སྡུག་ཡོད་ཚད།
འོད་ཆེམ་ཆེམ་ཀྱི་གངས་ཆུ་གཙང་མ་ལ་བསྐུར་ཏེ།
ཡིད་འཕྲོག་གི་དན་རྟགས་སུ་བསྒྱུར་དགོས།
ཁྱེད་ནི།
སེར་འབྲས་དགའ་གསུམ་གྱི།
ཆོས་དུང་དཀར་མོའི་སྒྲ་དབྱངས་སྙན་འོང་།
ནམ་ཞིག་ལ།
དབུས་ལམ་རིང་མོ་ཞིག་འདེད་དགོས་དུས།
ཉི་མ་ལྷ་ས་ནི། རྒྱུ་འབྲས་བསླུ་མེད་ཀྱི་གླིང་ག་ཡིན།
ངའི་ལུས་ཀྱི་སྐྱོན་ཡོན་ཡོད་ཚད།
དྲང་སྲོང་གིས་ལྷད་མེད་ཀྱི་ལམ་སྣ་ལ་བསྐུར་ཏེ།
རྒྱུ་དང་འབྲས་བུའི་ལན་ཆགས་སུ་བསྒྱུར་དགོས།
ནམ་ཞིག་ལ།
དབུས་ལམ་རིང་མོ་ཞིག་འདེད་དགོས་དུས།
ཉི་མ་ལྷ་ས་ནི། ངའི་དུས་གསུམ་གྱི་ཚེ་ལོ་འཁོར་སའི་བསོད་ནམས་ཀྱི་རྟེན་ཀའོ། །
ངའི་མདུན་གྱི་དཔལ་གཡང་དེ།
ཁྱེད་ཀྱི་གཡང་ཊའི་བང་མཛོད་དུ་རིན་ཆེན་གྱི་ལོངས་སྤྱོད་དུ་འབུལ་འདོད།