ཨ་ཕའི་ཆེས་མཛེས་པའི་རྨི་ལམ་དག
སྦྲ་ནག་གི་ཐུ་འོད་ཏུ་བསྒྲུགས་ཡོད་སྲིད།
——ཐོག་མའི་གཏམ།
ཉིན་མོ་རེ་རེར།
སྦྲ་ནག་གི་བསིལ་གྲིབ་ཏུ་འབོལ་གདན་བཏིང་སྟེ།
འབོལ་གདན་གྱི་སྟེང་དུ་ཨ་ཕ་སྐྱིལ་ཀྲུང་དུ་བཞུགས་ཏེ།
དཀར་ཡོལ་འབྲུག་རིས་མའི་ནང་དུ་ཞིམ་མངར་གྱི་འོ་ཇ་དལ་གྱིས་བཞེས་མྱོང་ཡོད།
ཕ་ཡུལ་གྱི་ནམ་མཁའ་དང་རི་ཆུ་ལ་ཅིས་ཀྱང་སེམས་པ་གླན་མྱོང་ཡོད།
མཚན་མོ་རེ་རེར།
སྦྲ་ནག་གི་ཁ་ཚུབ་ལས་ནམ་མཁའི་མཐོངས་ཀྱི།
དགུ་ཚིགས་སྐྱ་མོ་དང་སྨིན་དྲུག་ཁྲ་མོ།
ཐོ་རེངས་སྐར་ཆེན་དང་བེའུ་རྫི་དམར་ཞར།
ད་དུང་དཀར་གསལ་ཟླ་བ་སོགས་ལ་ཅིས་ཀྱང་བལྟས་མྱོང་ཡོད།
དེ་དག་ནི་ཨ་ཕས་མྱངས་ཟིན་པའི་བདེ་སྐྱིད་ཅིག་གམ།
ཨ་ཕའི་དྲན་ཡུལ་དུ་འཛུམ་པའི་ཕར་རྒྱབ་ཀྱི་ལོ་ཟླ་མཛེས་པོ་དེ་ཡིན་ཨང་།
ཨ་ཕ། རྩྭ་ཐང་ནི་ཁྱེད་ཀྱི་མི་ཚེའི་ས་བོན་འབུས་ས་ཡིན་པ་མ་ཟད།
དཀའ་སྡུག་གི་རྔུལ་ཆུ་འཐོར་ས་དང་།
གཞིས་ཀ་ཡི་བདེ་སྐྱིད་འཁྱིལ་སའང་ཡིན།
སྦྲ་ནག་ནི་ཁྱེད་ཀྱི་བརྩེ་དྲོད་ཀྱིས་ཕྱུགས་པའི་བསྟི་གནས་ཡིན་པར་མ་ཟད།
རྨི་ལམ་གྱི་གཤོག་པ་བརྐྱང་སའི་ནམ་མཁའ་ཡང་ཡིན།