ངའི་བྱིས་དུས་ཀྱི་འཚོ་བ།

སྔོན་ཆད་རང་ཉིད་བྱིས་པ་ཡིན་དུས་སྡེ་བའི་བྱིས་པ་ཚོ་དང་མཉམ་དུ་སྲང་གི་ས་རྡུལ་ནང་ནས་ཅི་ཞིག་མ་ལོན་པ་ནང་བཞིན། ཉིན་གང་བོར་ཕར་ནུར་ཚུར་ནུར་བྱས་ནས་དགོང་མོ་ཕྱིར་ཁྱིམ་ལ་ཐོན་དུས་ཁ་ངོ་ཡོད་ཚད་འབག་བཙོག་བཟོས་ལ། རྐང་སྣམ་གྱི་པུས་མོའང་རལ་ནས་ལས་ཀ་ལྕི་མོ་ཞིག་ལས་པ་དང་འདྲ། ང་ལ་མཚོན་ན་དེ་ནི་ཉིན་གཅིག་གི་ལས་ཀར་བསམ་ཡོད། བྱམས་ལྡན་གྱི་ཕ་མས་ང་ལ་སྡིགས་མོ་མི་བྱེད་ལ། ད་དུང་མགོ་ལ་བྱིལ་བྱིལ་ཙམ་བྱས་ནས་ངའི་གཅེས་ཕྲུག་ཟེར་བའི་རྣམ་པ་དེ། ངའི་དྲན་འཛིན་གྱི་མེ་ལོང་ངོས་སུ་ནམ་ཡང་ཡལ་ཐབས་བྲལ།

དགུན་ཁར་སྡེ་བའི་སྐྱེས་པ་རྣམས་ཀྱིས་མདའ་འཕེན་པ་ནི་སྲོལ་རྒྱུན་དུ་ཆགས་ཡོད་ལ། དེས་སྡེ་བ་ཕན་ཚུན་བར་གྱི་མཛའ་བརྩེ་ཇེ་ཆེར་འགྲོ། ཡིན་ཡང་ཕན་ཚུན་བར་ཁོག་དཔུང་ཆེན་པོ་ཡོད། མདའ་རྩེད་ནི་དགུན་ཁར་སྐྱེས་ཕོ་མོ་ཚང་མས་ཆེས་རེ་སྒུག་བྱེད་སའི་རྩེད་མོ་ཉག་གཅིག་ཡིན། དེ་ནི་སྤྱིར་བཏང་གི་རྩེད་མོ་ཙམ་མ་ཡིན་པར། དེའི་ཕུགས་ན་ཆོས་ལུགས་ཀྱི་ཆོ་ག་མི་ཉུང་བ་ཞིག་ཡོད། ང་ལ་བག་ཆགས་ཆེས་ཟབ་པ་ནི་ཨ་ཕ་ཁྱིམ་ལ་ཐོན་མ་ཐག་ལག་པ་བཀྲུས་རྗེས་བསང་ཕུལ་ལ། དེ་ནས་ཟ་མ་ཟོས་རྗེས་བསང་རྩི་འཁྱེར་ནས་སྡེ་བའི་མ་ཎི་ཁང་ལ་འགྲོ་བ་ནི་རྒྱུན་ལྡན་གྱི་དོན་དག་ཡིན། ཨ་མས་ཀྱང་སྔ་མོ་ནས་བསང་རྩི་སོགས་གྲ་སྒྲིག་བྱེད་ངེས། བག་ཆགས་དེའི་དབང་གིས་བྱིས་པ་རྣམས་ཀྱང་ཆུང་དུས་ནས་མདའ་རྩེད་བྱེད་རྒྱུར་དགའ་བོ་ཆགས་ཡོད།

དེ་དུས་སྡེ་བའི་སྐྱེས་ཕོ་མོ་རྣམས་རྫ་མགོ་ལ་བུད་ཤིང་གཅོད་དུ་འགྲོ་བ་ནི་རྒྱུན་ལྡན་ཡིན། ནགས་ལས་ཁང་གིས་ཀྱང་དེ་ལ་དེ་འདྲ་དོ་སྣང་མི་བྱེད། ངས་ཨ་ཕ་ལ་གཞུ་ལས་བྱེད་ཀྱི་ཤིང་ཆོད་ཤོག་ཅེས་བཤད་པ་ནི་ད་རུང་ཝ་ལེར་དྲན་ཡོང་། ཨ་ཕས་ཀྱང་དེ་རང་གི་འགན་འཁུར་ཞིག་ཏུ་བསམ་ནས་མང་པོ་བཅད་ཡོང་། སྐྱེར་བ་ནི་མཉེན་འགུག་ལྡན་པས་གཞུ་ལས་བྱེད་བཟང་གྲས་ཡིན་མོད། ལ་ལས་དྲ་མ་ཨ་ལྡན་ནི་དེ་ལས་བཟང་བར་བཤད་ཀྱང་བཀོལ་མ་མྱོང་། མདའ་ཤིང་ནི་སྡེ་བའི་སྡོང་རྭའི་ནང་ན་ཧ་ཅང་མང་ལ། ཆེས་བཟང་བ་ནི་མག་ག་ཐེ་ལེ་ཡིན། རྒན་པ་ཚོས་ཀྱང་རྒྱུན་དུ།“མག་ག་ཐེ་ལེའི་མདའ་དང་དྲ་མ་ཨ་ལྡན་གྱི་གཞུ”ཞེས་ཧ་ཅང་བཟང་བར་བཤད། རང་ཉིད་ལ་བཟང་ཞིག་ཡོད་པ་ནི་མདའ་ལས་རྒྱུར་བྱིས་པ་གཞན་ལས་ཅུང་མཁས་ལ། ལ་ལས་སྒོར་མོ་བྱིན་ནས་ངའི་ལག་ནས་ཉོས་པའང་ཉུང་ཉུང་མིན། དེ་ནི་ཨ་ཕས་ཤུགས་རྐྱེན་ཐེབས་པ་རེད་བསམ།

བྱིས་པ་རྣམས་ཀྱིས་མདའ་གཏོད་བྱེད་ཀྱི་སྒྲོ་ལ་ཆེས་བཟང་བ་འུག་སྒྲོ་དང་ཁྲ་སྒྲོ། རྒོད་སྒྲོ་སོགས་བརྩི་ལ། དེ་དག་ནི་ཧ་ཅང་དཀོན་པས་གསར་བུ་དག་གི་ལག་ལའང་རེག་ཁག་པོ་འདུག ཡིན་ཡང་རྒོད་སྒྲོ་ནི་སྟབས་ལེགས་ན་ལག་ལ་རེག་ངེས་ཀྱང་སྲིད། སྡེ་བའི་ནང་གི་ཕྱུག་ཟོག་འདྲ་ཤི་ཚེ་བྱ་རྒོད་མང་པོ་འབབ་ལ། ཇི་ལྟར་མང་པོ་བབས་ན་ང་ཚོའི་སེམས་པ་དེ་ལྟར་བསོ། རྒྱུ་མཚན་བྱ་རྒོད་འཕུར་ཤུལ་ཏུ་སྒྲོ་རེ་འགའ་ལྷུང་སྲིད་པས་རེ་བ་དེར་བཅངས་པ་ཡིན། ཡིན་ཡང་དེ་འདྲའི་གོ་སྐབས་ཧ་ཅང་ཉུང་། དེ་བས་དེ་ཕོ་ཡི་སྒྲོ་གཏོད། དེ་ཕོ་དང་དེ་མོ་གཉིས་ལས་ཀྱང་དེ་ཕོ་ཡི་སྒྲོ་ནི་ལེགས་པར་བརྩི། སྒྲོ་ནི་ལག་ལ་རེག་དཀའ་བས་ན་མཉམ་གྱི་བྱིས་པ་རྣམས་ཁྲིད་ནས་སྡེ་འདབས་ཀྱི་གྲོག་མོ་དང་སྡོང་གསེང་དུ་འཚོལ་དུ་འགྲོ་བ་ཡིན། སྟབས་ལེགས་ན་ཁྲ་ཡིས་བསད་པའི་དེ་ཕོ་རྙེད་ལ། གཤོག་སྒྲོ་གཉིས་བརླག་མེད་པ་མཐོང་ཚེ་དེ་ནི་ཆེས་དགའ་བའི་དོན་བཟང་ཞིག་ཡིན། ལ་ལ་ཁྲས་ཟོས་ནས་ཚར་མེད་པས་མེ་ཐོག་ཏུ་བསྲེགས་ནས་ཟོས་པའང་ཉུང་ཉུང་མིན། ཕྱིར་ཡུལ་ལ་འབྱོར་མ་ཐག་ལག་ལ་གྲི་ཆུང་ཞིག་བཟུང་ནས་མདའ་ཤིང་གི་ཤུན་པ་ཕྱིས་ལ། དེ་ནས་ལྟོང་ལ་ཕབ་ཀ་བཏོད་པ་ཡིན། མདའ་གཏོད་བྱེད་ཀྱི་སྒྲོ་མེད་ཚེ་ཕུག་རོན་དང་ཁྭ་ཏའི་སྒྲོའང་གཏོད་ལ། དེ་བཟང་བོའི་གྲས་སུ་མི་བརྩི། སྐབས་དེར་ང་ཚོ་ཆེས་སེམས་འཁུར་ཡོང་ས་ནི་སྦྱོར་ཆུ་ཡིན། རང་གི་ཨ་ཕ་ཚོར་ཡོད་ཡོད་ཀྱང་མཚམས་ལན་རེར་མེད་པའི་སྐབས་ཀྱང་ཡོད། དེ་དུས་དངོས་ནས་ཐབས་ཟད་ན། ང་ཚོ་ལའང་ཐབས་བཀོད་ཅུང་སྡུག་ཐུག་ཅིག་ཡོད་པ་ནི་ཡུང་མ་བསྲེགས་ནས་ཚོས་མ་ཚོས་ཀྱི་བར་དུ་ཤུན་པགས་ཕྱིས་ནས་རྡོ་བར་ལ་གཅུར་ནས་དེས་སྦྱོར་བ་ཡིན། དེ་འདྲ་བཟང་རྒྱུ་མེད་ཀྱང་། སྡུག་ལ་ཐུག་ན་ཐབས་བཀོད་དེ་ལས་གཞན་མེད་ལ་མི་བཟང་རྒྱུའང་ཆེར་མེད། ཕལ་ཆེར་འདི་ནི་ང་ཚོའི་སྡེ་བའི་ནང་གི་བྱིས་པ་སྣབས་ལུག་ཚོས་མ་གཏོགས་མི་ཤེས།

དེ་ལྟར་མདའ་གཞུ་རྣམས་གྲ་སྒྲིག་བྱས་རྗེས་སྡེ་བའི་བྱིས་པ་རྣམས་དཔུང་སྒྲིག་ནས་རང་དང་ཉེ་བའི་སྡེ་བ་གཞན་ལ་མདའ་འཕེན་དུ་འགྲོ་ངེས། དེ་ལའང་གསར་བུ་ཚོ་དང་འདྲ་བར་མདའ་དཔོན་མདའ་གཞུག་འདེམ་པ་ཡིན། སྡེ་བ་གཞན་དེའི་བྱིས་པ་ཚོས་ཀྱང་ང་ཚོ་ཡོང་བ་ཤེས་ནས་སྐུགས་རྭའི་ནང་འབེན་ལས་པ་ཡིན། འབེན་ལས་རྒྱུར་ཡང་དང་དོད་བྱེད་རྒྱུ་མང་པོ་ཡོད། དེར་རྒྱ་མ་དང་ཐོ་ལེ། པེ་ཅི་སོགས་ཚང་དགོས། འདི་ནི་གསར་བུ་ཚོ་དང་གཅིག་འདྲ་ཡིན། དེ་ལྟར་མདའ་འཕེན་རེས་བྱས་ནས་རྒྱལ་ཕམ་རྩོད་ལ། ཚང་མས་དེ་ལ་དོ་སྣང་བྱེད་ལ་སྒྲིག་ལམ་ཡང་དམ་པོ་ཡོད། མཚམས་ལེན་རེར་ཕན་ཚུན་བར་འགལ་བ་བྱུང་ཚེ་ཕན་ཚུན་ལ་རྡོས་བརྒྱབ་ནས་ང་ཚོ་ཚུར་བདའ་བའང་ཡོད་ལ་ཁོ་ཚོ་ཕར་བདའ་བའང་ཉུང་ཉུང་མིན། གང་ལྟར་ཀྱང་ཕྱི་ཉིན་སྔར་བཞིན་རྩེད་གྲོགས་ཡིན་པས་ལྷད་མེད་ཀྱི་བྱིས་བློ་དེ་ཅི་འདྲའི་ཡངས་པ་ལའང་།

ད་ནི་རང་ཉིད་ལོ་ན་ཡར་རྒྱས་ནས་བྱིས་དུས་ཀྱི་འཚོ་བ་ལ་ཕྱིར་དྲན་ཙམ་བྱས་ན་སྐབས་དེའི་འཚོ་བ་ཧ་ཅང་སྐྱིད། ནམ་ཡང་སེམས་ལ་དགའ་སྤྲོས་ཁེངས་ནས་ཕ་མ་ལ་འཁང་ར་མི་བྱེད་པར་བག་ཡངས་སྒོས་རང་གི་འཚོ་བ་དེའི་ནང་ལ་མགོ་འཁོར་ནས་བསྡད་ཡོད། འཚོ་བ་ཐབས་ཆག་ཡིན་ཡང་སེམས་པ་ཧ་ཅང་སྐྱིད། སྐབས་དེར་རང་གི་རྩེད་ཆས་རང་གིས་བཟོ་རྒྱུ་ལས་དེང་སྐབས་ནང་བཞིན་ཉོ་རྒྱུ་མང་པོ་མེད་ལ། ཡོད་པའི་དབང་དུ་བཏང་ནའང་མིག་ལྟོས་ཙམ་ལས་རེག་པའི་གོ་སྐབས་ཧ་ཅང་དབེན། ད་ལྟའི་བྱིས་པ་རྣམས་ཀྱིས་ངའི་བྱིས་དུས་ཀྱི་འཚོ་བ་དེ་འདྲ་རོལ་མི་ཐུབ་ལ་དེའི་ནང་གི་སྤྲོ་སྣང་ནམ་ཡང་མྱོང་མི་ཐུབ་བོ། །