ཚེ་རིང་དང་ཨ་བོ། ལེགས་སེ།

མི་དང་མིའི་བར་གྱི་འབྲེལ་བ་ནི་མ་གཞི་ནས་རྩ་དོན་ཞིག་རེད། དེ་ནི་ཡིད་ཆེས་དང་སྙིང་ཉེ་བ་དེ་རེད། ཚེ་རིང་དང་ཨ་བོ། ལེགས་སེ་གསུམ་གྱི་མིང་ཚིག་འདི་མཐོང་དུས་ཚང་མས་ཕལ་ཆེར་མི་གསུམ་གྱི་མིང་ཞིག་ཡིན་པར་སེམས། འདི་གསུམ་ནི་མི་གསུམ་གྱི་མིང་མ་ཡིན་པར་ས་གནས་གསུམ་གྱི་གུས་ཚིག་གསུམ་ཡིན། ཚེ་རིང་ནི་ཁམས་ཀྱི་ཡུལ་སྐད་ཅིག་ཡིན་ལ་བསམ་རྒྱུ་དང་ཉན་རྒྱུ་ཡོད་པའི་གུས་ཚིག་ཅིག་རེད། ང་རང་ཕ་ཡུལ་ཨ་མདོ་ནས་ཡིན་པས་ཁམས་སྐད་ལ་དེ་འདྲའི་གསལ་ཆ་མེད། སློབ་ཆེན་གྱི་སྒོ་ཐེམ་སྙེག་རྗེས་ཐོག་མར་ངོ་ཤེས་པ་ནི་ཕ་ཡུལ་རྫ་སྟོད་ནས་ཡིན་པའི་གྲོགས་པོ་ཀུན་དགའ་ཚེ་དབང་དང་ཕ་ཡུལ་ནང་ཆེན་ནས་ཡིན་པའི་གྲོགས་པོ་ཁམས་པ་གདོང་ནག་གཉིས་ཡིན། ང་ཚོས་ཁ་བརྡ་ཐོག་མར་བྱེད་དུས་ཡུལ་སྐད་ཀྱི་དབང་གིས་སྐད་ཆ་གསལ་བོ་ཞིག་མི་གོ་ཡང་མཇུག་མཐའི་ཚེ་རིང་ཟེར་བའི་སྐད་ཆ་དེས་ངའི་ཡིད་སེམས་དབང་མེད་དུ་ཤོར་འགྲོ། ཚེ་རིང་ཟེར་བའི་གུས་ཚིག་འདི་དྲན་ཐེངས་རེར་ཕན་ཚུན་བར་སྙིང་ཉེ་བའི་ཚོར་བ་ཞིག་དང་ཐག་ཉེ་བའི་སེམས་འདུན་ཞིག་ངང་གིས་སྐྱེས་ཡོང་། གནས་ཡུལ་མ་གཏོགས་རུས་པ་གཅིག་པའི་ང་ཚོ། ཡུལ་སྐད་མ་གཏོགས་གོམས་སྲོལ་གཅིག་པའི་ང་ཚོ། ཕན་ཚུན་བར་སྙིང་ཉེ་ལ་སེམས་ཀྱང་མཐུན། ལོས་ཡིན། གནའ་ནས་ད་ལྟའི་བར་དུ་ང་ཚོའི་དཔུང་རྡང་འཐོར་མ་མྱོང་ལ་སྙིང་གཏམ་ཆད་མ་མྱོང་། སློབ་གྲྭའི་ཁོར་ཡུག་ཀུན་དུ་ཚེ་རིང་ཟེར་བའི་གུས་ཚིག་དེ་ཐོས་ཐེངས་རེར་ངའི་གློ་སྙིང་མཆིན་གསུམ་ལ་དྲོད་ཁོལ་ཞིག་དང་ཆེས་ཉེ་བའི་སེམས་ཚོར་ཞིག་གིས་རྨང་ནས་བཟི་འགྲོ། ཞལ་རས་སྨུག་པོའི་ཕོ་རྒོད་དག བཞིན་མདངས་དམར་བའི་མཛངས་མ་དག སྒ་སྟོད་ཇོ་བོའི་རྒྱང་གཟིགས་ཀྱི་རྨི་ལམ་དུ་འཁྲུངས། རྫ་ཆུ་སྔོན་མོའི་དྭངས་གཙང་གི་རྣམ་ཤེས་ལ་འཐིམས། ཚེ་རིང་ཟེར་བའི་གུས་ཚིག་དེས་ཤ་དང་ཁྲག་གི་འདང་བརྩེ་ཟབ་པའི་ངའི་རྒྱང་རིང་གི་རུ་སྡེ། ཆུ་བོ་གསུམ་གྱི་ཤེས་རིག་གི་འབྱུང་ཡུལ། ངས་དུས་གཏན་དུ་ཁྱེད་ལ་ཁམས་པ་དང་ཡུལ་ཤུལ་ཟེར་གྱིན་མེད། ཁྱེད་ནི་ངའི་རྒྱང་རིང་གི་སྤུན་ཟླ་ཡིན་ལ་ངའི་སྙིང་གི་ཚི་ལུ་ཡིན་ནོ། །

ཨ་བོ། འདི་ནི་རྨ་ཆེན་གངས་རིའི་འདབས་རོལ་ནས་ཡོང་བའི་བུ་མོ་ཞིག་གིས་ང་ལ་ཐེངས་མང་བོས་མྱོང་། ཨ་བོ་ནི་ཨ་མདོའི་མགོ་ལོག་གི་ཡུལ་སྐད་ཅིག་སྟེ་ཕུ་བོའི་དོན་ཡིན། ཨ་བོ་ཟེར་བའི་སྐད་ཆ་དེ་རུ་བྱིན་རླབས་འཚེར་བའི་སྙིང་གཏམ་ཞིག་བསྡུས་ཡོད། སྙིང་གཏམ་དེ་རུ་ཆེས་ཉེ་བའི་བར་ཐག་ཅིག་གི་རྣམ་ཤེས་ལུས་ཡོད། རྣམ་ཤེས་དེ་ལ་འཐིམས་པའི་གངས་འདབས་ཀྱི་ཨ་མདོ་བ་དེ་ཚོ་དབུས་གཙང་དང་ཁམས་པར་འཁྲེན། སྲིད་པའི་ཡུལ་ལྷ་ཆེན་མོ་རྨ་ཆེན་སྤོམ་རའི་འདབས་རོལ་གྱི་རུ་བ་ཞིག རྨ་ཆུ་སྔོན་མོ་ལ་མཆོད་ཁ་འཕེན་བཞིན་གཉན་པོ་གཡུ་རྩེ་ལ་བརྐྱངས་ཕྱག་འཚལ། འབྲོག་སྡེ་དེ་རུ་ཆ་ལུགས་གཙང་མ་ཞིག་ཡོད། ལྟོས་དང་། མགོ་སྐྲ་རིང་བོའི་ཕོ་གསར་དག བཞོ་གཟུང་བཏགས་པའི་མོ་སྨན་དག ཅི་འདྲའི་མཛེས་སྡུག་ལྡན་པ་ལའང་། ཡིད་འོང་དྭངས་གཙང་གི་ཁྲི་ཤོར་རྒྱལ་མོའི་རླབས་སྒྲ་དང་ལྷན་དུ་རྒྱལ་རོང་རྒྱལ་མོ་རྔུལ་ཆུའི་བར་དུ་སྙིང་གཏམ་གྱི་ཁ་བཏགས་འཐེན། ཨ་བོ། ཁྱེད་རང་རྒྱང་ཐག་ཅི་འདྲ་རིང་བོ་ཞིག་ལ་ཕེབས་ཀྱང་ང་ཚོ་དུས་གཏན་དུ་བརྗེད་མི་རུང་། མགོ་ལོག་ཟེར་བའི་ཨ་མདོའི་ཡུལ་ལུང་འདིའི་མི་རྒྱུད་དག་ནི་ཅི་འདྲའི་གཞུང་དྲང་བ་ལའང་། ཨ་བོ། ཁྱེད་ཀྱིས་ནམ་ཡང་ཕུ་ནུ་ཚོ་བརྗེད་མི་རུང་། ཁམས་ཀྱི་ཕོ་གསར་དག དབུས་ཀྱི་མོ་གསར་དག འུ་ཅག་ཕ་མ་གཅིག་གི་མིང་སྲིང་ཡིན། ཨ་བོ། ཁྱེད་ཀྱིས་རྒྱང་རིང་གི་ཕ་ཡུལ་བརྗེད་མི་རུང་ལ་ང་ཚོར་དབུས་པ་དང་ཁམས་པ་ཟེར་བའི་ཤ་ཉེ་ཞིག་ཡོད་པའང་དུས་གཏན་དུ་བརྗེད་མི་རུང་ངོ་། །

ལེགས་སེ། འདི་ནི་གྲོགས་མོ་ཚེ་བརྟན་གཡུ་སྒྲོན་ལགས་ཀྱི་རྒྱུན་སྤྱོད་ཀྱི་སྐད་ཆ་ཞིག་ཡིན། ངས་དབུས་གཙང་བ་ཞིག་ལ་སེམས་ཞིབ་མོས་ཁ་བརྡ་བྱས་པ་ཐོག་མ་ནི་གྲོགས་མོ་ཚེ་བརྟན་གཡུ་སྒྲོལ་ལགས་ཡིན། མོ་ནི་ངའི་སློབ་ཆེན་གྱི་སློབ་གྲོགས་ཡིན་ལ་གྲོགས་པོ་འདང་ཆེན་ཞིག་ཀྱང་ཡིན། ཐོག་མར་མོའི་སྐད་ཆ་དེ་ངས་དེ་འདྲ་མི་གོ་ཡང་གོ་ཐུབ་པ་ནི་ལེགས་སེ་ཟེར་བ་དེ་ཡིན། ཆེས་ཡིད་འོང་གི་སྐད་ཆ་ཞིག འདང་ཆེ་ལ་བཅུད་ཆེ་བའི་གུས་ཚིག་ཅིག ཁོ་མོས་ལེགས་སེ་ནི་སོ་སོ་ལུང་པར་ཡ་ཡ་ཟེར་བ་དང་གཅིག་འདྲ་རེད་ཟེར། ལྷ་སའི་ལུང་པའི་ཡུལ་སྐད་དེ་ཧ་ཅང་མགྱོགས་ལ་ཞི་འཇམ་གྱི་སྣང་བ་ཞིག་ཀྱང་འགོག་མེད་དུ་སྐྱེས་ཡོང་། ཚེ་བརྟན་གཡུ་སྒྲོན་ལགས་ཀྱི་སྐད་ཆ་དེ་ཧ་ཅང་མགྱོགས་པས་ངེད་གཉིས་ཀྱི་སྤྱི་མཐུན་གྲོགས་པོ་རྡོ་རྗེ་སྒྲོལ་མའི་མིང་འབོད་དུས་རྡོར་སྒྲོལ་མ་འམ་རྡོར་མ་འདྲ་བོ་ཞིག་གོ་གི་འདུག རྐྱེན་དེ་ལས་ངས་རྡོ་རྗེ་སྒྲོལ་མའི་མིང་ལ་གཏོར་མ་ཞེས་མིང་བཏགས་པ་ཡིན། ཧུ་ཧུ། ལྷ་སའི་སྐད་དེ་སྐྱེས་མ་ཚོས་བརྗོད་ན་ཧ་ཅང་ཡག་པར་སྙམ། བོད་ཀྱི་མཛངས་མ་དག་གི་གཤིས་ཀ་དང་མཐུན་པའི་སྐད་ཆ་ནི་དབུས་སྐད་ཡིན་པའི་ཚོར་བ་ཞིག་ཀྱང་ངང་ངམ་ཤུགས་ཀྱིས་སྐྱེས་ཡོང་། གང་ལྟར་ལེགས་སེ་ཟེར་བའི་ཡིད་འོང་གི་སྐད་ཆ་འདི་ངའི་སེམས་སུ་ཚེ་སྲོག་འདིའི་ཆེས་ཐོག་མའི་སྐད་གཤིས་དྭངས་མོ་དེ་ཡིན་པར་འདོད། ཡར་ཀླུང་གཙང་པོའི་རྨུ་ཐག། ས་སྐྱའི་གཙུག་ལག་གི་རིག་གནས་ཕོ་བྲང་། བསམ་ཡས་གཏེར་གྱི་རང་བྱུང་གི་བཀོད་པ། ལྕགས་པོ་རིའི་རྩེ་ནས་མཐོང་བའི་པོ་ཏ་ལ། མདོ་སྨད་དང་མདོ་སྟོད་ནས་ཕེབས་པའི་གདོང་བ་སྨུག་པོ་ཅན་གྱི་ཤ་ཉེ་དག་གིས་ཁྱེད་ཚོར་མཇལ་འཕྲད་ཡང་ཡང་གནང་། ཚེ་སྲོག་གི་གཟུངས་ལ་འཐིམས་པའི་ང་ཡི་སྤུན་ཟླ་ཚོ། ང་རང་ཁྱེད་ཅག་ལ་སྙིང་ནས་དགའ། དུས་གཏན་ཏུ་ཁྱེད་ཅག་ལ་དགའ། ལེགས་སེ་ཟེར་བའི་གུས་ཚིག་འདིས་ངའི་བླ་ལ་འཐིམས་པའི་བརྩེ་འདང་ཞིག་བསྣན་པའོ། །

ཚེ་རིང་། ཨ་བོ། ལེགས་སེ། ཁྱེད་ཅག་གིས་ང་ཚོ་རུས་རྒྱུད་གཅིག་ཡིན་པ་བརྗེད་མི་རུང་། ང་དང་ཁྱེད། ཁྱེད་དང་ང་། ང་ཚོ་ལ་བར་ཐག་མེད། ཉེ་རིང་མེད། མདོར་བསྡུས་ན་ང་ཟེར་བ་ཞིག་མེད་ལ་ཁྱེད་ཟེར་བ་ཞིག་ཀྱང་མེད་དོ། །