རི་མཐོ་ས་གཙང་རྩྭ་ཐང་ཡངས། །མཁར་གསར་མཚོ་མོ་ལྟ་ན་སྡུག །སྤང་རི་ནགས་རི་ཚར་དུ་དངར། །གངས་དཀར་ལྷུན་པོ་བརྗིད་ཉམས་ཆེ།
བྲག་འགོ་རྫོང་ལ་ཁྲོན་ནུབ་ཀྱི་མུ་ཏིག་གམ་ཁམས་བྱང་གི་ལྟེ་གནས་དང་བྱང་ལམ་གྱི་ས་གནས་གཙོ་བོ། ཁམས་བོད་གནའ་བོའི་ཤེས་རིག་གི་འབྱུང་ཁུངས། བང་ཁང་གི་ལྟེ་གནས། ཀྲུང་གོའི་ཐང་ག་སྒྱུ་རྩལ་གྱི་ཕ་ས་སོགས་ཀྱི་མཚན་སྙན་ལྡན། གནའ་ནས་ད་བར་བོད་ལྗོངས་དང་མཚོ་སྔོན་དུ་བགྲོད་ཡུལ་དང་།
ཇ་རྟའི་གནའ་ལམ་གྱི་ས་གནས་གཙོ་ཤོས་སུ་གྲུབ། རྫོང་ཁོངས་ཀྱི་མཁར་གསར་མཚོ་ནི་མིང་དུ་གྲགས་པའི་ལྷ་མཚོ་དང་ཁྲོན་བྱང་ས་ཁུལ་གྱི་འདབ་ཆགས་གནས་ཆགས་ས་ཆེས་ཆེ་བ་དེ་ཡིན་པ་དང་། བྲག་འགོའི་ཤེར་ཆུ་ཡིས་ཁྱད་ཆོས་འབུར་དུ་ཐོན་པའི་མཐོ་སྒང་གི་ཞིང་ས་བསྐྲུན་ཡོད་ལ། གཙང་ཐ་རྩྭ་ཐང་གིས་འཛམ་གླིང་དུ་དཀོན་པའི་ཚོན་མདངས་བདུན་ལྡན་གྱི་མཐོ་སྒང་བསྐྲུན་ཞིང་། བྲག་འགོའི་ཕུན་སུམ་ཚོགས་པའི་ཡུལ་སྐོར་ཐོན་ཁུངས་ཀྱིས་ཕྱོགས་བཞིའི་ཡུལ་སྐོར་པ་མགྲོན་དུ་བསུ་བཞིན་ཡོད།
ཞིང་ཁའི་འགྲམ་ནས་སྙན་པའི་ལ་གཞས་བསྒྲགས།
སྤྱི་ཟླ་7པའི་ཚེས་13ཉིན་གྱི་སྔ་དྲོར། ས་ཆེན་དགྱེས་གླུ་ཞེས་པའི་2023ལོའི་བྲག་འགོའི་འོང་སྐོར་དམངས་སྲོལ་རིག་གནས་བྱེད་སྒོའི་འགོ་ཚུགས་མཛད་སྒོ་དེ་དཀར་མཛེས་བོད་རིགས་རང་སྐྱོང་ཁུལ་བྲག་འགོ་རྫོང་དུ་འཚོགས་པ་རེད། བྲག་འགོའི་མི་དམངས་ཁྲི་ཕྲག་གིས་ལུས་ལ་མཛེས་པའི་རྒྱན་ཆ་སྤྲས་ནས་སྙན་པའི་གླུ་དང་མཛེས་པའི་གར་ལ་རོལ་ཞིང་། རྒྱལ་ཕྱི་ནང་ནས་ཕེབས་པའི་སྐུ་མགྲོན་རྣམས་ལ་ས་གནས་རང་གི་ཁྱད་ཆོས་ལྡན་པའི་རིག་གནས་ཀྱི་རྒྱགས་ཕྱེ་གྱ་ནོམ་པས་སྣེ་ལེན་བྱས།
འོང་སྐོར་དུས་ཆེན་ནི་བོད་ཀྱི་རོང་པའི་ས་ཁུལ་གྱི་གྲོ་ནས་སྲན་གསུམ་སྨིན་ཞིང་ལོ་ལེགས་ཡོང་བར་སྨོན་འདུན་ཞུ་བའི་དུས་ཆེན་ཞིག་ཡིན་ལ། ལྷག་ཏུ་བྲག་འགོའི་རོང་ཁུལ་དུ་གནའ་ནས་དར་བའི་སྲོལ་རྒྱུན་གྱི་དུས་ཆེན་གྲགས་ཅན་ཞིག་ཡིན་པ་དང་།
མིང་གཞན་ལ་ལོ་ལེགས་དུས་ཆེན་ཡང་བརྗོད་སྲོལ་ཡོད། བྲག་འགོ་རྫོང་གི་འོང་སྐོར་དུས་ཆེན་ནི་ཀྲུང་ཧྭའི་ཞིང་ལས་ཤེས་རིག་གི་སྲོལ་རྒྱུན་དུ་མཐོ་སྒང་གི་ཁྱད་ཆོས་ལྡན་པའི་ལོ་ལེགས་དུས་ཆེན་གྱི་རིག་གནས་ཤིག་ཡིན་པ་དང་། དེ་ལ་སྲོལ་རྒྱུན་གྱི་ལོ་རྒྱུས་རིང་ཞིང་། ས་ཁུལ་དང་མི་རིགས་ཀྱི་ཁྱད་ཆོས་འབུར་དུ་ཐོན་པའི་དམངས་སྲོལ་རིག་གནས་ཀྱི་སྣང་ཚུལ་ཞིག་ཡིན།
2023ལོའི་བྲག་འགོའི་འོང་སྐོར་དམངས་སྲོལ་རིག་གནས་བྱེད་སྒོ་ནི་སྲོལ་རྒྱུན་གྱི་དུས་སྟོན་ལ་གཞི་འཛིན་ས་བྱས་ནས་རིག་གནས་ཀྱིས་ཡུལ་སྐོར་སྣེ་ཁྲིད་དང་། ཡུལ་སྐོར་གྱིས་རིག་གནས་མངོན་པའི་འདུ་ཤེས་བཟུང་སྟེ། བྲག་འགོ་རྫོང་གི་རིག་གནས་ཡུལ་སྐོར་ཐོན་ཁུངས་དང་སྐྱེ་ཁམས་ཐོན་ལས། ཚོང་གཉེར་ཁོར་ཡུག་གི་ལེགས་ཆ་བཅས་ལ་བརྟེན་ནས། བྲག་འགོའི་རིག་གནས་ཡུལ་སྐོར་དང་ཞིང་ལས་ཡུལ་སྐོར་མཉམ་འབྲེལ་འཕེལ་རྒྱས་ལ་སྐུལ་འདེད་གཏོང་སྟེ། སྲོལ་རྒྱུན་གྱི་ལོ་ལེགས་དུས་ཆེན་ལ་ནང་དོན་གསར་པ་བསྣན་ཡོད།
ཀྲུང་གུང་བྲག་འགོའི་རྫོང་ཨུ་ཧྲུའུ་ཅི་དགེ་ལེགས་རྡོ་རྗེས། བགྲང་བྱ་བཅོ་ལྔའི་རྗེས་སུ་ཡང་བསྐྱར་འོང་སྐོར་དུས་ཆེན་སྤེལ་ནས། ཤེར་ཆུའི་གནའ་གྲོང་གི་གཏིང་ཟབ་པའི་རིག་གནས་སློག་འདོན་གང་ལེགས་བྱས་པར་བརྒྱུད། རིག་གནས་ཀྱིས་ཡུལ་སྐོར་ལ་སྐུལ་འདེད་དང་། ཕན་ནུས་ཡོད་པའི་སྒོ་ནས་ཕྱི་ཕྱོགས་ཀྱི་མིང་གྲགས་དང་མཚན་སྙན། ནུས་ཤུགས་ཇེ་མཐོ་གཏོང་དགོས་ཞེས་གསུངས།
ཡུལ་སྐོར་བརྒྱུད་ནས་བོད་ཀྱི་རིག་གནས་མྱོང་།
བྲག་འགོའི་འོང་སྐོར་དམངས་སྲོལ་རིག་གནས་བྱེད་སྒོའི་ཐོག །སྲོལ་རྒྱུན་གྱི་བྲོ་བ་མ་ཡལ་བའི་མེས་པོའི་དབྱངས་རྟ་རེ་རེས་ཡུལ་དངོས་ལྟད་མོ་བའི་ཡིད་སེམས་བཀུག་ཅིང་། མི་རིགས་མང་པོ་དང་རྣམ་པ་འདྲ་མིན། ཐུན་མིན་གྱི་ཁྱད་ཆོས་འབུར་དུ་ཐོན་པའི་ལ་གླུ་རེ་རེ་ཀྲུང་གོའི་བོད་ཀྱི་ལ་གླུའི་ཕ་སར་འབོད་པའི་བྲག་འགོ་ནས་བླངས།
ཚོན་མདངས་བདུན་ལྡན་གྱི་མེ་ཏོག་གི་རྒྱ་མཚོ་གཙང་ཐ་དང་གཙང་སྨད་དུ་རྟ་རྒྱུག་དང་གཡག་རྒྱུག་གི་དགའ་སྟོན་དུ་མི་ཚོགས་འདུ་འཛི་ཆེ་ཞིང་།
བརྗིད་རྔམ་ཆེ་བའི་རྟ་པ་རུ་ཁག་དང་གཡག་རྒྱུག་རུ་ཁག་གིས་ཡངས་པའི་རྩྭ་ཐང་འུར་གྱིས་བཀང་ཞིང་ཕོ་སར་ཚོའི་དཔའ་རྩལ་ངོམ།
ཡུལ་སྐོར་པས་འབྲོག་པའི་ཆས་གོས་གྱོན་ཞིང་། འོ་ཇ་དང་བོད་ཟས་རོལ་བཞིན། འབྲོག་གླུ་དང་བོད་བྲོ་འཁྲབ་ཅིང་། རྟ་དང་གཡག་ལ་ཞོན་ཏེ་འབྲོག་པའི་འཚོ་བ་དངོས་ཉམས་སུ་མྱོང་བཞིན། ཡངས་པའི་རྩྭ་ཐང་སྟེང་དུ་ཅི་དགའ་རོལ་བཞིན་འདུག
བྲག་འགོ་རྫོང་གིས་འོང་སྐོར་དུས་ཆེན་དང་བསྟུན་ནས་ཡིད་ཀྱི་དང་བ་འདྲེན་པའི་ལ་གླུ་དང་ཚོན་མདངས་རྣམ་པར་བཀྲ་བའི་ཐང་ག །ཅང་ཤེས་བང་རྩལ་འགྲན་པའི་རྟ་རྒྱུག །མཛེས་པ་གཅིག་ཏུ་བསྡུས་པའི་པར་རིས་འགྲེམས་སྟོན། དེང་རབས་ཀྱི་ཁྱད་ཆོས་ལྡན་པའི་རླངས་འཁོར་འགྲན་སྡུར། ས་གནས་ཀྱི་ཁྱད་ཆོས་ལྡན་པའི་ཁྱད་རྫས་འགྲེམས་སྟོན་སོགས་དང་། མཚོ་བོད་མཐོ་སྒང་གི་སྐབས་དང་པོའི་ནས་འབྲུ་ཐོན་ལས་སྤུས་མཐོའི་འཕེལ་རྒྱས་བགྲོ་གླེང་དང་ང་ཚོའི་དུས་ཆེན་ཞེས་པའི་བྲག་འགོའི་འོང་སྐོར་དམངས་སྲོལ་རིག་གནས་རྟོག་ཞིབ་བྱེད་སྒོ། སྐབས་དང་པོའི་བྲག་འགོའི་ན་གཞོན་ལས་གཏོད་འཕེལ་རྒྱས་བགྲོ་གླེང་སོགས་བྱེད་སྒོ་བདེ་བླག་ངང་སྤེལ་ནས། ཐོན་ལས་འཕེལ་རྒྱས་དང་རིག་གནས་རྒྱུན་འཛིན། གསར་གཏོད་ལས་གཏོད་སོགས་ཕྱོགས་མང་པོ་ནས་བྲག་འགོ་སྤུས་ཚད་མཐོ་བའི་འཕེལ་རྒྱས་ཡོང་བར་སྟོབས་ཤུགས་གཅིག་བསྡུས་བྱས་པ་རེད།
མ་འོངས་པར་བྲག་འགོ་རྫོང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་གཏོང་བར་དམ་དུ་དམིགས་ནས། བརྟན་བརླིང་དང་འཕེལ་རྒྱས། སྐྱེ་ཁམས་ཀྱི་དོན་ཆེན་གསུམ་གཙིགས་སུ་བཟུང་སྟེ། གསར་གཏོད་སྒུལ་ཤུགས་དང་ཟོང་རྟགས་སྣེ་ཁྲིད། ཁོངས་ཡོངས་སྒོ་འབྱེད། ཨང་ཀིའི་ནུས་སྤྲོད་བཅས་སྒུལ་ནུས་ཆེན་པོ་བཞི་གསོ་སྐྱོང་བྱས་ནས། ཁྲིམས་ལྟར་རྫོང་སྐྱོང་བ་དང་། རིག་གནས་ལ་བརྟེན་ནས་རྫོང་དར་རྒྱས་གཏོང་བ། སློབ་གསོ་ལ་བརྟེན་ནས་རྫོང་སྔོན་ཐོན་གཏོང་བ། འགྲིམ་འགྲུལ་གཙིགས་སུ་འཛིན་པ་བཅས་འཐབ་ཇུས་ཆེན་པོ་ལྔ་ལག་ལེན་བསྟར་བར་མ་ཟད། རྫོང་ཁོངས་ཀྱི་དཔལ་འབྱོར་གཙིགས་སུ་འཛིན་པ་དང་། རྒྱལ་ལམ་317འགྲམ་རྒྱུད་ཀྱི་ཡུལ་སྐོར་ལྟེ་བ་དང་། ཁུལ་ཁོངས་ཀྱི་ཨང་ཀིའི་ཚོང་གཉེར་ཟོང་འདྲེན་ལྟེ་བ། ཁམས་བྱང་ན་གཞོན་ལས་གཏོད་གསོ་སྐྱོང་ལྟེ་བ་བཅས་ལྟེ་བ་ཆེན་པོ་གསུམ་བསྐྲུན་ནས། རྒྱལ་ཡོངས་དང་ཞིང་ཆེན་གྱི་ཡུལ་སྐོར་དཔེ་སྟོན་ཁུལ་དང་། རྒྱལ་ཡོངས་དང་ཞིང་ཆེན་གྱི་དེང་རབས་ཁྱད་ཆོས་ལྡན་པའི་ཞིང་ལས་ཁུལ། བདེ་ཐང་གི་ཁྱད་ཆོས་ལྡན་པའི་ཐོན་ལས་ཁུལ་བཅས་ཁུལ་གསུམ་བསྐྲུན་རྒྱུ་ཡིན་པ་རེད། །