དང་པོ། སྔོན་འགྲོའི་ཞུ་མཆིད།
གསར་སྐྱེས་དག་ལ་མཚོན་ན་སྒྲ་སྡུད་འཕྲུལ་འཁོར་དང་རྒྱང་བསྒྲགས་སོགས་ནི་ཆ་རྒྱུས་མེད་ཅིང་། དོ་སྣང་བྱ་རིན་དབེན་པའི་ཐ་སྙད་དུ་འདོད་ཀྱང་། དེ་དག་གིས་མི་རབས་གཅིག་གི་ལང་ཚོ་ལ་འོད་སྣང་བསྐྲུན་པར་མ་ཟད། མི་རིགས་ཤིག་གི་སྐད་ཡིག་གི་དབུགས་རྒྱུན་སྐྱོང་ཞིང་། གསོན་ཤུགས་བརྗོད་ཀྱིས་མི་ལང་བར་སྣོན་ཡོད། འོན་ཀྱང་། ང་ཚོས་ནམ་ཡང་སྣང་མེད་དུ་གཏོང་མི་རུང་བ་ནི་ལྷག་བསམ་ཆེ་ཞིང་བློ་གྲོས་ལྡན་ལ། རྡོ་རིང་ལྟར་བརྟན་པའི་རྒྱབ་བརྟེན་གྱི་ལས་སྒྲུབ་པ་དེ་དག་ཡིན་པ་དང་། ལྷག་པར་དུ་བརྗེད་མི་རུང་བ་ནི་གྲོག་རོང་མང་ཞིང་ཐན་ཤས་ཆེ་བའི་ས་ཞིང་དུ་དཔའ་ངར་ཞུམ་མེད་ཀྱིས་ས་བོན་བཏབ་སྟེ་ཆུ་ལུད་གཏོར་བཞིན་པའི་སོ་ནམ་པ་དེ་དག་ཅི་ལ་མིན། གལ་སྲིད་དེ་དག་མེད་ཚེ། གོང་རིམ་གྱི་ཇུས་བཟང་དུང་གི་སྒྲ་དབྱངས་ཇི་ལྟར་བསྒྲག །གཞི་རིམ་གྱི་བདེ་སྐྱིད་འཚོ་བའི་སྣང་བརྙན་ཇི་ལྟར་མངོན། ཕ་མེས་ཀྱི་སྲོལ་རྒྱུན་བཟང་པོའི་གསེར་ཐག་ཇི་ལྟར་སྦྲེལ། རང་ཡུལ་གྱི་མཛེས་སྡུག་ལྡན་པའི་རི་ཀླུང་ཇི་ལྟར་ངོམ།
གཉིས་པ། དྲི་བ་དྲིས་ལན།
གསར་འགོད་པ། དགེ་རྒན་གྱི་ལས་གནས་ནས་རྒྱང་བསྒྲགས་བརྙན་འཕྲིན་གྱི་ལས་གནས་སུ་བརྗེ་དགོས་པའི་རྒྱུ་མཚན་གང་ཡིན།
བཀྲ་ཤིས་དོན་འགྲུབ། གཅིག་ནི། ང་རང་འབའ་ཐང་དགེ་འོས་སློབ་གྲྭ་རུ་དགེ་རྒན་བྱེད་སྐབས། སློབ་གྲྭའི་རྒྱང་བསྒྲགས་ཁང་ལ་འགན་ཁུར་བས། རྒྱང་བསྒྲགས་ཐད་སྔར་ལས་ལྷག་པའི་དང་འདོད་བྱས། གཉིས་ནི། སློབ་གྲྭ་དེ་ཉིད་མཐོ་རིམ་སློབ་འབྲིང་དུ་ཁ་བསྒྱུར་ཏེ་རྒྱུག་སྤྲད་རྒྱུ་གཙོ་བོ་འཛིན་ནས་རྒྱང་བསྒྲགས་སོགས་ལ་མཐོང་ཆེན་དེ་ཙམ་མ་བྱས་པས། དེའི་ཐད་ཀྱི་མི་སྣ་འཇོན་ཐང་ཅན་གསོ་སྐྱོང་བྱ་ཐབས་བྲལ། གསུམ་ནི། རྒྱང་བསྒྲགས་བརྙན་འཕྲིན་དུ་ལས་ཀ་ཁ་བསྒྱུར་ན། སྔར་ལས་ལྷག་པའི་སྒོ་ནས་བོད་ཀྱི་རིག་གནས་དར་སྤེལ་གཏོང་ཐུབ་པར་འདོད། བཞི་ནི། བདེ་ཆེན་བོད་རིགས་རང་སྐྱོང་ཁུལ་ལ་མཚོན་ན། བོད་ཀྱི་རིག་གནས་ཀྱི་རྩ་བ་བརྟན་པོ་དེ་ཙམ་མེད་པས། གནས་དེ་རུ་སྡུག་རུས་དང་ཧུར་བརྩོན་བྱ་འདོད་ཆེ།
གསར་འགོད་པ། བོད་སྐད་རྒྱང་བསྒྲགས་བརྙན་འཕྲིན་གྱི་ལས་དོན་བསྒྲུབས་རིང་བྱུང་བའི་ཆེས་བརྗེད་པ་དཀའ་བའི་གཏམ་རྒྱུད་ཅིག་ངོ་སྤྲོད་གནང་རོགས།
བཀྲ་ཤིས་དོན་འགྲུབ། ཐེངས་ཤིག་ང་རང་མུ་ཟུར་ཟེར་བའི་གྲོང་གསེབ་ཅིག་ཏུ་བཅར་འདྲི་འགྲོ་སྐབས་རྒད་པོ་ཞིག་གིས་སྒྲ་སྡུད་འཕྲུལ་ཆས་ནས་ང་ཚོའི་བོད་སྐད་རྒྱང་བསྒྲགས་ལེ་ཚན་ལ་ཉན་བཞིན་འདུག །རྒྱུས་ལོན་བྱས་རྗེས། སྤྱིར་རྒད་པོ་དེས་རྒྱང་བསྒྲགས་ནང་དོན་ཚིག་རེ་གཉིས་ལས་གོ་བཞིན་མི་འདུག་ཀྱང་། ཁོང་གིས་བོད་སྐད་རྒྱང་བསྒྲགས་འདི་འདྲ་སྔོན་མ་ཡོད་མ་མྱོང་བས། ད་ལྟ་ཡོད་དུས་ཨུ་ཚུགས་རྒྱག་ནས་ཉན་བཞིན་ཡོད། དེ་ལྟར་བྱས་ན་ཉིན་གཅིག་ཧ་གོ་འོང་རྒྱུ་རེད་ཅེས་ལབ་བྱུང་བས། ངས་བསམ་མནོ་ཡང་ཡང་གཏོང་རྗེས། བོད་སྐད་རྒྱང་བསྒྲགས་འདི་མི་སེར་ཚོས་མ་གོ་ན་བེད་མེད་དུ་གྱུར་ཚར་འདུག་སྙམ་ནས་རིམ་བཞིན་མི་སེར་ཚོས་གོ་བདེ་བའི་ཡུལ་སྐད་ལེ་ཚན་ཁྱད་ཆོས་ལྡན་པ་གང་མང་ཞིག་བསྐྲུན་པ་ཡིན། དེ་རང་གིས་ཆེས་བརྗེད་པ་དཀའ་བའི་གཏམ་རྒྱུད་ཅིག་ལ་ངོས་འཛིན་བཞིན་ཡོད་ལ། དེས་རང་གི་ལས་དོན་ལ་མཛུབ་ཁྲིད་དང་སློབ་གསོ་ཡག་མོ་ཞིག་བཏང་བྱུང་།
གསར་འགོད་པ། བདེ་ཆེན་བོད་སྐད་རྒྱང་བསྒྲགས་བརྙན་འཕྲིན་གྱི་འཐུས་ཚབ་རང་བཞིན་གྱི་ལེ་ཚན་ཞིག་ངོ་སྤྲོད་གནང་རོགས།
བཀྲ་ཤིས་དོན་འགྲུབ། ངེད་བོད་སྐད་རྒྱང་བསྒྲགས་བརྙན་འཕྲིན་ཁང་ལ་ལེ་ཚན་ཁྱད་ཆོས་ལྡན་པ་མང་པོ་ཡོད་ཀྱང་། དེ་དག་ལས་ཆེས་དམིགས་བསལ་ཅན་ནི་བརྙན་འཕྲིན་གྱི་ལེ་ཚན་སེམས་ཀྱི་ཉི་ཟླའི་དམངས་ཁྲོད་ཅེས་པ་དེ་ཡིན་པར་འདོད། འདི་ནི་བདེ་ཆེན་ཡུལ་སྐད་ཀྱི་ལེ་ཚན་ཞིག་ཡིན་ལ། བདེ་ཆེན་ཡང་བོད་ཀྱི་ལུང་པ་གཞན་དག་དང་འདྲ་བ། གླུ་གར་སོགས་གཙོར་བྱས་པའི་དམངས་ཁྲོད་རིག་གནས་དར་ཁྱབ་ཤིན་ཏུ་ཆེ། ཡིན་ནའང་། དམངས་ཁྲོད་རིག་གནས་དེ་དག་གི་ཞལ་ངོ་རུ་ལོ་མང་པོའི་རིང་ཐལ་རྡུལ་ཆགས་ནས་གཞན་གྱིས་མཛེས་སྡུག་མཐོང་དཀའ་བའི་གནས་སུ་གྱུར་འདུག་པས། ཁོ་བོས་རིན་བྲལ་ནོར་དུ་དེ་དག་བརྙན་འཕྲིན་བརྒྱུད་ནས་མི་དམངས་རྣམས་ལ་ངོ་སྤྲོད་བྱས་ཙ་ན། དེ་ལ་ཕན་པ་རྒྱ་ཆེན་པོ་ཡོད་པར་མཐོང་ནས། བརྙན་འཕྲིན་གྱི་མུ་འབྲེལ་ལེ་ཚན་དེའི་དབུ་སྒྲོན་པ་ཡིན། ཐོག་མར་རྟེན་འབྲེལ་གྱི་ཚུལ་དུ་རོང་བཙན་ཁ་བ་དཀར་པོའི་འདབས་སུ་གེ་སར་རིག་གནས་སྐོར་གྱི་ལེ་ཚན་ཕབ་སྟེ། ད་ལྟའི་བར་གླིང་སྒྲུང་དང་གླུ་གཞས་ཀྱི་ལེ་ཚན་ཕབ་ཅིང་། མ་འོངས་པར་བོད་ཀྱི་གཏམ་བཤད་སྐོར་སོགས་ཕབ་བསྐྲུན་བྱ་རྒྱུའི་འཆར་གཞི་ཡོད།
གསར་འགོད་པ། བོད་འབྲེལ་ས་ཁུལ་གྱི་རྒྱང་བསྒྲགས་བརྙན་འཕྲིན་ལ་གཞན་དང་མི་འདྲ་བའི་ཁྱད་ཆོས་དང་དཀའ་ཁག་གང་འདྲ་ཡོད།
བཀྲ་ཤིས་དོན་འགྲུབ། ཁྱད་ཆོས་གསུམ་འདུག་སྙམ། གཅིག་ནི། ཏང་དང་རྒྱལ་ཁབ་ཀྱི་སྲིད་ཇུས་དང་དེང་སྐབས་ཀྱི་གནས་ཚུལ་གལ་ཆེན་རྣམས་རྒྱ་ཆེ་བའི་བོད་རིགས་མི་སེར་ཚོ་ལ་དུས་ལྟར་ཁྱབ་བསྒྲགས་བྱ་རྒྱུའི་འོས་འགན་འདུག །གཉིས་ནི། རང་མི་རིགས་ཀྱི་རིག་གནས་སྲུང་སྐྱོང་དང་སྔོག་འདོན། དར་ཁྱབ་གཏང་རྒྱུའི་འོས་འགན་འདུག །གསུམ་ནི། རང་མི་རིགས་ཀྱི་སྐད་དང་ཡི་གེ་ཁྱབ་གདལ་དང་གཅིག་གྱུར་གཏང་རྒྱུའི་འོས་འགན་འདུག་སྙམ། ངའི་བསམ་པར་དཀའ་ཁག་གསུམ་འདུག་ཏེ། གཅིག་ནི། བོད་འབྲེལ་ས་ཁུལ་གྱི་རྒྱང་བསྒྲགས་བརྙན་འཕྲིན་ནི་རྒྱལ་ཁབ་ནང་ལོགས་ཀྱི་དཔལ་འབྱོར་དར་རྒྱས་ཆེ་བའི་ས་ཁུལ་གྱི་རྒྱང་བསྒྲགས་བརྙན་འཕྲིན་དང་བསྡུར་ཐབས་མེད་པས། དེ་ལ་སྲིད་ཇུས་ཐད་གུ་ཡངས་ཅུང་ཙམ་དགོས་འདུག །གཉིས་ནི། ལས་སྒྲུབ་མི་སྣའི་ཁྲོད་ཆེད་ལས་ཅན་ཤིན་ཏུ་དཀོན་ཏེ། མང་ཤོས་བོད་ཡིག་ཆེད་སྦྱོང་བྱས་ནས་ལས་ཞུགས་བྱས་པ་ལས། གསར་འགྱུར་ཆེད་སྦྱོང་དང་རྒྱང་བསྒྲགས་བརྙན་འཕྲིན་ཆེད་སྦྱོང་བྱས་ནས་ལས་ཞུགས་བྱེད་མཁན་ཧ་ལམ་མི་འདུག །གསུམ་ནི། དེང་སྐབས་འཕྲིན་སྦྱོར་མང་འབྲེལ་གྱི་དུས་སྐབས་ཤིག་ལ་ཁེལ་ཡང་། བོད་འབྲེལ་ས་ཁུལ་གྱི་རྒྱང་བསྒྲགས་བརྙན་འཕྲིན་གྱི་ལས་སྒྲུབ་མི་སྣ་ཚོ་སེམས་ལྷོད་ལ་ཕབ་ནས། རང་འགུལ་གྱིས་འཕྲིན་སྦྱོར་གྱི་བཅོས་བསྒྱུར་རླབས་པོ་ཆེའི་ནང་དུ་ཞུགས་མཁན་ཉིན་མོའི་སྐར་མ་ཙམ་རེད་ལ། འཕྲིན་སྦྱོར་མང་འབྲེལ་ལ་གོ་བ་གསལ་པོ་ལོན་མི་འདུག
གསར་འགོད་པ། བདེ་ཆེན་བོད་རིགས་རང་སྐྱོང་ཁུལ་གྱི་བོད་སྐད་རྒྱང་བསྒྲགས་བརྙན་འཕྲིན་གྱི་འཕེལ་འགྱུར་སྐོར་ངོ་སྤྲོད་རགས་ཙམ་གནང་རོགས།
བཀྲ་ཤིས་དོན་འགྲུབ། གཅིག །མི་སྣའི་འགྱུར་ལྡོག་ཐད། 2001ལོར་ང་རང་དང་པོར་གནས་འདིར་འབྱོར་སྐབས། བོད་སྐད་རྒྱང་བསྒྲགས་ཀྱི་ལས་གནས་ལ་མི་གཉིས་ལས་མེད་མོད། ད་ལྟ་ལས་སྒྲུབ་མི་སྣ་ཉི་ཤུ་ཡོད་པའི་དཔུང་ཁག་ཅིག་གྲུབ་ཟིན། གཉིས། གཏོང་ཡུན་དུས་ཚོད་ཐད། ཐོག་མར་རྒྱང་བསྒྲགས་ལས་བརྙན་འཕྲིན་མེད་ལ། གཏོང་ཡུན་ཉིན་གསུམ་གྱི་ནང་དུ་གསར་འགྱུར་སྐར་མ་ལྔ་ལས་མེད། དེང་སང་ཉིན་རེར་རྒྱང་བསྒྲགས་ཆུ་ཚོད་དགུ་དང་ཕྱེད་ཀ་གཏོང་བཞིན་ཡོད་ལ། བརྙན་འཕྲིན་ཐོག་གཟའ་འཁོར་རེ་ལ་སྐར་མ་ལྔའི་གསར་འགྱུར་ལས་མེད་མོད། དེང་སང་ཉིན་རེར་རང་སྒྲུབ་ལེ་ཚན་ཆུ་ཚོད་གཅིག་དང་སྐར་མ་ཉི་ཤུ་ལྷག་གཏོང་བཞིན་ཡོད། གསུམ། ལེ་ཚན་འཕེལ་རྒྱས་ཐད། སྔོན་མར་གསར་འགྱུར་ལེ་ཚན་གཅིག་ལས་མེད་མོད། དེང་སང་རྒྱང་བསྒྲགས་སུ་གསར་འགྱུར་དང་། གླིང་སྒྲུང་དགའ་ཚལ། གཞས་ར་ཕྲ་མོ། 99.8ཐད་གཏོང་ཁང་། དྲི་ཟའི་སྙན་དབྱངས། ན་ཆུང་བྱིས་པའི་དགའ་ཚལ་སོགས་དང་། བརྙན་འཕྲིན་དུ་སེམས་ཀྱི་ཉི་ཟླའི་དམངས་ཁྲོད་དང་དྲི་ཟའི་གླུ་གར་གླིང་། བོད་ཡིག་སློབ་ཁྲིད། ཚོན་སྣ་ལྔ་ལྡན་གྱི་བདེ་ཆེན་སོགས་དང། གཞན་ཡང་བོད་སྐད་ཀྱི་བརྙན་འཕྲིན་ཟློས་གར་དང་གློག་བརྙན། འཕྲིན་སྦྱོར་མང་འབྲེལ་གྱི་སྟེགས་བུ་དང་རང་ལ་དབང་བའི་དྲ་རྒྱལ་ཚོགས་པ་སོགས་ཤིན་ཏུ་མང་ངོ་། །
གསར་འགོད་པ། བོད་སྐད་ཀྱི་རྒྱང་བསྒྲགས་བརྙན་འཕྲིན་ལས་གནས་སུ་ཞུགས་པའི་ལས་དང་པོ་པ་ཞིག་ལ་མ་མཐའ་ཡང་ཆ་རྐྱེན་གང་དག་ཚང་དགོས།
བཀྲ་ཤིས་དོན་འགྲུབ། དང་པོ། བོད་མི་རིགས་དང་བོད་ཀྱི་རིག་གནས་ལ་བརྩེ་བ་ཟབ་མོ་ཡོད་དགོས་པར་མ་ཟད། དེའི་ཐད་འབད་བརྩོན་ལྷོད་མེད་བྱ་རྒྱུའི་སེམས་ཐག་ཆོད་དགོས། གཉིས། བོད་ཡིག་གི་རྨང་གཞི་ཡག་པོ་ཡོད་པའི་ཐོག་ཏུ་རྒྱ་ཡིག་གི་རྨང་གཞི་ཡང་ཡག་པོ་ཡོད་དགོས་འདུག་ལ། འཕྲིན་སྦྱོར་ལས་ཀའི་གཞི་རྩའི་འཇོན་ཐང་ལྡན་དགོས་འདུག །
གསུམ། སྒེར་དོན་ལ་བསམ་བློ་ཉུང་ཙམ་གཏོང་བ་དང་སྤྱི་ཇུས་ལ་བསམ་བློ་མང་ཙམ་གཏོང་ཐུབ་དགོས་འདུག་སྙམ།
གསར་འགོད་པ། དེང་དུས་བོད་འབྲེལ་ས་ཁུལ་ཁག་ཏུ་སྒེར་གྱི་འཕྲིན་སྦྱོར་ཐོག་ཐད་གཏོང་བྱེད་མཁན་ཤིན་ཏུ་མང་བས། སྣང་ཚུལ་དེ་ལ་དགོངས་ཚུལ་དང་རེ་བ་གང་འདྲ་ཡོད།
བཀྲ་ཤིས་དོན་འགྲུབ། གཅིག་ནི། གནས་ཚུལ་འདི་ནི་ཡག་པོ་ཞིག་རེད་ལ། བོད་འབྲེལ་ས་ཁུལ་འདི་ཉིད་འཕྲིན་སྦྱོར་ལ་བརྟེན་ནས་ཕྱི་ཕྱོགས་དང་བར་ཐག་ཇེ་ཐུང་སོང་བར་མཚོན་པ་དང་། བོད་མི་དམངས་ཀྱིས་དུས་རབས་གསར་པའི་གསར་དར་ཁྱུག་དབྱིངས་སོགས་ལ་ཁས་ལེན་བྱེད་བཞིན་ཡོད་པ་མཚོན་པས། དེ་དགའ་འོས་པའི་དོན་ཞིག་ཅི་ལ་མིན། ཡིན་ནའང་། ང་ཚོས་ཐད་གཏོང་བྱེད་སྐབས་དེ་ལ་ཁ་ལོ་བསྒྱུར་མཁན་ཡག་མོ་ཞིག་མེད་སྟབས། ཐད་གཏོང་བྱེད་སྐབས་རང་རེའི་བོད་མི་རིགས་ཀྱི་ཡང་དག་པའི་རིག་གནས་ཁྱབ་བསྒྲགས་མ་གཏོང་བར་དེ་ལས་ལྡོག་སྟེ་ལ་བཤད་ལུང་བཤད་དང་འཁྱོག་བཤད་ལོག་བཤད་བྱས་པས། བོད་ཀྱི་རིག་གནས་ལ་གཏོར་བཤིག་ཚབས་ཆེན་ཐེབས་ཀྱི་འདུག །དེ་བས་ཁོ་བོའི་རེ་བ་ལ། རིན་ཐང་ལྟ་བ་ཡང་དག་ཅིག་ཡོད་པའི་ཆ་རྐྱེན་འོག་ཐད་གཏོང་ཡོ་བྱད་བེད་སྤྱོད་ཡག་པོ་གཏོང་ནས། རང་གི་མི་རིགས་དང་རིག་གནས་སྐོར་ངོ་སྤྲོད་གང་ལེགས་དགོས་ལ། ཐད་གཏོང་བྱེད་མཁན་གྱི་བྱང་ཚད་ཇེ་མཐོ་གཏོང་ནས། སྤྱིར་མི་རིགས་ལ་ཕན་པ་དང་སྒོས་སུ་རང་ལ་ཕན་ཐོགས་པ་བྱུང་ན་ཡག་པོ་རེད་སྙམ།
གསར་འགོད་པ། 《རྒྱང་བསྒྲགས་བརྙན་འཕྲིན་གྱི་གསར་འགྱུར་བྱ་བའི་འཇུག་སྒོ》ཞེས་པའི་དཔེ་དེབ་ལ་ཁྱད་ཆོས་གང་དག་ཡོད།
བཀྲ་ཤིས་དོན་འགྲུབ། འདི་ནི་ངས་2017ལོར་བྲིས་པ་ཡིན། བོད་སྐད་རྒྱང་བསྒྲགས་བརྙན་འཕྲིན་ལས་ཁུངས་ཁག་ཏུ་ལས་དོན་སྒྲུབ་བཞིན་པའི་ལས་བྱེད་པ་ཁག་ལས་མང་ཤོས་རྒྱལ་ཁབ་ནང་ལོགས་ཀྱི་མི་རིགས་སློབ་གྲྭ་ཁག་གི་བོད་ཡིག་ཆེད་སྦྱོང་དང་ལོ་ཙཱ་ཆེད་སྦྱོང་ལས་འོང་བ་རེད་མ་གཏོགས། རྒྱང་བསྒྲགས་བརྙན་འཕྲིན་ཆེད་ལས་ཀྱི་སློབ་གྲྭ་དང་གསར་འགྱུར་ཆེད་ལས་སློབ་གྲྭ་ནས་ཐོན་མཁན་ཧ་ལམ་མེད་པ་དང་ཧ་ཅང་དཀོན་པའི་གནས་ཚུལ་གཞིར་བཟུང་ནས། ང་རང་ལོ་བཅོ་ལྔའི་རིང་གསར་འགྱུར་ལས་དོན་ལ་ཞུགས་པའི་ཉམས་མྱོང་ཕྱོགས་བསྡོམས་བྱས་པ་ཡིན། དེ་ལ་ཁྱད་ཆོས་ཆེན་པོ་གསུམ་ལྡན་པར་འདོད་དེ། གཅིག་ནི་རིག་པའི་གཞུང་ལུགས་ཁུངས་བཙན་པོར་གཏུག་ཡོད། གཉིས་ནི་བོད་འབྲེལ་ས་ཁུལ་གྱི་དངོས་ཡོད་གནས་ཚུལ་དང་བསྟུན་ཡོད། གསུམ་ནི་བཀོལ་འོས་པའི་དཔེ་མང་པོ་ཞིག་དྲངས་ནས་གནད་དོན་དེ་དག་དང་འཕྲད་དུས་ཐག་གཅོད་ག་འདྲ་བྱེད་དགོས་པ་གསལ་བཤད་བྱས་ཡོད། དེ་བས་གཅིག་ནི་བོད་འབྲེལ་ས་ཁུལ་གྱི་གསར་འགྱུར་ལས་རིགས་ཁག་གི་མི་སྣས་མན་ངག་ལྟ་བུ་བརྩི་ཆོག་ལ། གཉིས་ནི་གསར་འགྱུར་ལས་དོན་ལ་སློབ་སྦྱོང་བྱེད་བཞིན་པའི་སློབ་མ་ཚོའི་སློབ་དེབ་བྱ་ཆོག་པར་འདོད།
གསར་འགོད་པ། མ་འོངས་པར་བོད་སྐད་རྒྱང་བསྒྲགས་དང་བརྙན་འཕྲིན་དར་སྤེལ་ཐད་ལ་དགོངས་འཆར་གང་འདྲ་ཡོད།
བཀྲ་ཤིས་དོན་འགྲུབ། གཅིག་ནི། བོད་སྐད་རྒྱང་བསྒྲགས་བརྙན་འཕྲིན་གྱི་རིག་པའི་གཞུང་ལུགས་ཐད་ལ་དོ་སྣང་བྱ་དགོས། གཉིས་ནི། བོད་ཡིག་གི་ཐོག་ནས་གསར་འགྱུར་འབྲི་བའི་གསར་འགོད་པ་གསོ་སྐྱོང་དང་། བོད་ཡིག་གསར་འགྱུར་ཡིན་ན་ཡིག་བསྒྱུར་བྱས་པ་ཡིན་པས་ཁྱབ་ཟེར་བའི་གནས་ཚུལ་འུ་ཐུག་དེ་འདྲ་ཁ་བསྒྱུར་དགོས། །གསུམ་ནི། རང་རིགས་བོད་ཀྱི་འདུ་ཤེས་མཚོན་པའི་བརྙན་འཕྲིན་ཟློས་གར་དང་རྒྱང་བསྒྲགས་ཟློས་གར་གསར་བཟོ་བྱེད་དགོས། བཞི་ནི། བོད་སྐད་རྒྱང་བསྒྲགས་བརྙན་འཕྲིན་འདི་གཞི་དམངས་ཅན་ལ་གཏོང་བའི་ཐད་བསམ་བློ་མང་ཙམ་གཏོང་དགོས། ལྔ་ནི། སློབ་གྲྭ་ཁག་ཏུ་བོད་སྐད་རྒྱང་བསྒྲགས་བརྙན་འཕྲིན་གྱི་ཆེད་སྦྱོང་སོགས་བཙུགས་དགོས། དྲུག་ནི། བོད་སྐད་རྒྱང་བསྒྲགས་བརྙན་འཕྲིན་དེ་འཛམ་གླིང་ལ་ཁ་ཕྱོགས་ནས་འབད་བརྩོན་བྱེད་པར་ལས། ཡིད་ཚིམ་ནས་འདུག་མི་རུང་ངོ་། །
གསུམ་པ། གནས་ཚུལ་རགས་བཀོད།
བཀྲ་ཤིས་དོན་འགྲུབ་ནི་1973ལོར་དཀར་མཛེས་ཁུལ་འབའ་ཐང་རྫོང་བྱ་ཁྱུང་གྲོང་རྡལ་དུ་སྐྱེས་ཤིང་། 1994ལོར་རང་ཡུལ་འབའ་ཐང་རྫོང་དུ་དགེ་རྒན་གྱི་ལས་ལ་ཞུགས་པ་དང་། 2001ལོར་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་དུ་ཕེབས་ནས་ད་བར་བོད་སྐད་རྒྱང་བསྒྲགས་བརྙན་འཕྲིན་གྱི་ཕྱག་ལས་མཛད། དེ་ཡང་། རྟག་གུས་བརྩོན་པ་མ་བཏང་ན། །མི་འགྲུབ་བྱ་བ་ཅི་ཡང་མེད། །ཅེས་པ་ལྟར། སྔར་རྗེས་སུ《གནས་ཆེན་ཁ་བ་དཀར་པོའི་གསང་སྙིང་》དང་《ཁམས་ཀྱི་གནས་ཆེན་ཁ་བ་དཀར་པོའི་གནས་ཡིག་དྲང་སྲོང་ལུང་གི་ཉིན་བྱེད་ཅེས་བྱ་བ་བཞུགས་སོ། །》《གནས་ཆེན་ཁ་བ་དཀར་པོའི་གསང་སྙིང་།（༢）》《ཡུལ་གླུ་རྣ་བའི་བདུད་རྩི—བདེ་ཆེན་བོད་རིགས་ཀྱི་གླུ་གཞས་གཅེས་བསྡུས》《གཤོག་རྩལ་ངོམ་པའི་གངས་རི—བདེ་ཆེན་གྱི་གཞས་ཚིག་གཅེས་བསྡུས》《མུ་ཟུར་གྱི་བྲོ》《རྒྱང་བསྒྲགས་བརྙན་འཕྲིན་གྱི་གསར་འགྱུར་བྱ་བའི་འཇུག་སྒོ》སོགས་དཔེ་དེབ་མི་ཉུང་བ་པར་དུ་བསྐྲུན། མི་འགྱངས་བར་ཁོང་གིས་རྩོམ་སྒྲིག་མཛད་ཅིང་རྒྱལ་ཁབ་ཀྱི་ལོ་ལྔ་ཚན་བཅུ་བཞི་པའི་གཙོ་གནད་དཔེ་དེབ་དཔེ་བསྐྲུན་གྱི་འཆར་འགོད་དུ་ཚུད་པའི《ཡུན་ནན་དུ་གནས་བཅའ་བའི་བོད་རིགས་ཀྱི་བྲོ་གཞས་གཏམ་བཤད་སོགས་ངག་རྒྱུན་སྙིང་བསྡུས།》ཞེས་པ་དང་《ཤམ་བྷ་ལ་རུ་སྐྱོད་པ—བདེ་ཆེན་གྱི་སྒྲུང་མཁན་ལ་གླེང་མོལ་བྱེད་པའི་ཟིན་བྲིས》《མཚོ་ནུབ་ཀྱི་ལ་གཞས་རྒྱ་བསྒྱུར་མ》《སྡེ་རོང་གི་ལོ་རྒྱུས་མདོར་བསྡུས》སོགས་དཔེ་དེབ་ཁག་ཅིག་པར་བསྐྲུན་བྱ་རྒྱུ་རེད། །