ཤར་ཀོང་པོ་རོང་གི་མཐོང་ཐོས།

བདག་གི་རྩོམ་ཡིག་འདི་ནི་དེང་གི་ས་ཁོངས་ཀྱི་དབང་དུ་བྱས་ན་བོད་ལྗོངས་ཉིང་ཁྲི་ས་ཁུལ་ཏེ། བོད་དབུས་སྐྱིད་ཤོད་ལྷ་ས་ལྟེ་བ་བྱས་ཤིང་ལོ་རྒྱུས་ཁྲོད་སྐད་གྲགས་ཡོད་པའི་བོད་རོང་ཆེན་བཞི་ཞེས་བཤད་པའི་ནང་གི་ཤར་ཀོང་པོ་རོང་ཞེས་འབོད་པའི་ཡུལ་ཁམས་སམ། ཀོང་པོ་ཉིང་ཁྲི་གྲོང་ཁྱེར་དང་། ཀོང་པོ་རྒྱ་མདའ་དང་། སྨན་གླིང་རྫོང་རྣམས་སོགས་སུ་རིག་གནས་ཡུལ་སྐོར་དུ་བསྐྱོད་པའི་སྟབས་བདེའི་ཟིན་ཐོ་ཞིག་ཡིན། དེང་གི་སྲིད་འཛིན་ལྟེ་བ་ཀོང་པོ་ཉིང་ཁྲི་གྲོང་ཁྱེར་ནི་ལྷ་སའི་ཤར་ལྷོའི་ཕྱོགས་ཡར་ཀླུང་གཙང་པོའི་དཀྱིལ་སྨད་རྒྱུག་ཁུལ་དུ་ཆགས་ཤིང་། མཚོ་འཕགས་སྤྱི་སྙོམས་སྨི་3000ཙམ་ཡིན་ལ། ཉིང་ཁྲི་ཞེས་པ་ཡང་སྔོན་མ་གྲོང་ཚོ་ཆུང་ངུ་ཞིག་གི་མིང་ནས་རིམ་པར་གྲོང་ཁྱེར་དང་ས་ཁུལ་སྤྱི་མིང་དུ་གྱུར་པ་རེད། ལྷ་ས་གྲོང་ནས་བར་ཐག་སྤྱི་ལེ་400ཙམ་ཡོད། ཉིང་ཁྲིའི་གྲོང་ཁྱེར་གྱི་མངའ་ཁོངས་སུ་བྲག་ཡིབ་ཁུལ་དང་། སྨན་གླིང་། ཀོང་པོ་རྒྱ་མདའ། སྣང་རྫོང་། སྤོ་བོ། མེ་ཏོག རྫ་ཡུལ་རྫོང་བཅས་རྫོང་ཁག་བདུན་དང་གྲོང་ཁྱེར་གཅིག་འདུས་ཡོད། ཡུལ་ལུང་འདིར་དེང་སྐབས་བོད་རིགས་ལས་གཞན་པའི་མོན་པ་རིགས་དང་ལྷོ་པ་རིགས་སོགས་ནང་གསེས་མི་རིགས་འགའ་རེར་ཕྱེས་ཀྱང་བཤད་རྒྱུན་དུ་ཡོད་པའི་ལྷོ་རོང་ཆེན་བཅོ་བརྒྱད། མོན་ཚོ་ཁག་ལྔ། སྤུ་ཆུ་ལུང་དྲུག་སོགས་ལས་གཞན་མིན། དེར་ལོ་རྒྱུས་ཁྲོད་ཀོང་པོ་དང་། ཉང་པོ། ལོང་པོ། དྭགས་པོ། སྤོ་བོ། རྫ་ཡུལ་སོགས་འདུས་ཡོད་ཅིང་། གཙོ་བོ་དྭགས་ཀོང་ཉང་གསུམ་གྱི་ཁོངས་སུ་འདུ། མལ་གྲོ་གུང་དཀར་ནས་ཀོང་པོ་བ་ལ་བརྒལ་རྗེས་ཀྱི་ལུང་གཞུང་དེའི་ཆུ་བོའི་འབབ་རྒྱུན་རྣམས་ལ་དེང་སྐབས་ཀོང་པོ་སྟོད་དུ་གྲགས་ཤིང་། དེ་ནས་ཆུ་ཕྲན་མང་པོ་རིམ་པར་འདྲེས་པས་རྒྱ་མདའ་ལ་སླེབས་སྐབས་རྒྱ་མདའི་ཆུ་ཞེས་འབོད། ཆུ་ཕྲན་དེ་ཡང་རིམ་པར་བརྒྱུད་མཐར་ཉང་ཆུར་འདྲེས་ཤིང་། ཀོང་པོ་སྨན་གླིང་རྫོང་ནས་ཉང་ཆུ་དང་ཡར་ཀླུང་གཙང་པོར་འདྲེས་པའི་བར་གྱི་ཡུལ་ཁམས་ལ་སྔོན་གྱི་ལོ་རྒྱུས་ཁྲོད་ཉང་པོ་དང་ལོང་པོ་ཞེས་འབོད། དེ་བཞིན་དུ་ཡར་ཀླུང་གཙང་པོའི་འབབ་ཡུལ་ལྷ་ས་དང་ཉེ་བར་ལྷོ་ཁ་ཕྱོགས་ནས་བརྒྱུད་དེ་དྭགས་པོའི་ཡུལ་ལ་འབབ་ཅིང་།

དེ་ནས་ཀོང་པོའི་བར་གྱི་ཡུལ་ཁམས་ལ་དྭགས་པོ་ཞེས་བྱ། ལྷ་ས་ནས་རིམ་པར་སྟག་རྩེ་རྫོང་དང་། མལ་གྲོ་གུང་དཀར་རྫོང་། ཀོང་པོ་རྒྱ་མདའ་རྫོང་རྣམས་བརྒྱུད་ནས་སོང་བས་ཀོང་པོ་ཉིང་ཁྲི་ལ་སླེབས། ཀོང་པོའི་ཡུལ་ནི་ས་གཤིས་གཤིན་ཞིང་གནམ་གཤིས་དྲོ་གྲང་སྙོམས་པ། འབྲུ་རིགས་དང་ཤིང་ཏོག་སོགས་ཀྱི་ཐོན་ཁུངས་བཟང་ལ། ཡུལ་ཁམས་ཀྱི་མི་དག་གིས་འཚོ་གནས་གཙོ་བོ་ནི་ཞིང་ལས་རེད། ཁམས་ཀྱི་འབྲོག་པའི་ཁ་དཔེ་ལ། ཀོང་པོ་མཛེས་པའི་ལུང་པ། །ཨ་ལྕོའི་ཕ་ཡུལ་བརྗེད་ས། །ཞེས་གྲགས་པ་ལྟར་ཡུལ་འདིའི་སྣོད་ཀྱི་བཀོད་པ་ནི་འཇིག་རྟེན་གྱི་རང་བྱུང་གི་དཔལ་རྣམས་མ་ཚང་བ་མེད་པ་ཞིག་ཏུ་འདུག །རི་ཚོགས་རྣམས་མཐོ་ཞིང་། ལུང་གཞུང་ཁོད་ཡངས་པ། རི་རྩེ་ན་གངས་དང་རྫ། རི་སྐེད་ན་ནགས་དང་སྤང་། རི་འདབས་ན་ཆུ་ཀླུང་དང་མཚེའུ་སོགས་ཀྱིས་མངོན་པར་བརྒྱན་ཅིང་། རྩི་ཐོགས་དང་སྨན་ལྡུམ་སོགས་ཀྱང་ཡུལ་ལུང་གཞན་ལ་མེད་པ་འདྲ་མིན་སྣ་ཚོགས་སྐྱེས་པའམ་སྐྱེ་སྟོབས་ཆེན་པོ་ལྡན་པ་སོགས་ཡུལ་ཁམས་གཞན་ལས་ཁྱད་དུ་འཕགས་པའི་ཡོན་ཏན་དུ་མ་མངོན། ནགས་ཚལ་དང་། སྤང་གཞུང་། རྫ་རི། མཚོ་མོ་སོགས་ལ་རི་དྭགས་དང་། འདབ་ཆགས་བྱ་རིགས། གཅན་གཟན་སྣ་ཚོགས་སོགས་རི་སྐྱེས་སྲོག་ཆགས་མང་དུ་གནས་པ་སོགས་མདོར་ན་ཀོང་པོ་རོང་ནི་མ་བཅོས་ལྷུན་གྱིས་གྲུབ་པའི་མི་ཡུལ་གྱི་ཞིང་མཆོག་ཅིག་ཡིན།

ཡུལ་འདིར་གདོད་མའི་རྒྱལ་ཕྲན་སིལ་མ་བཅུ་གཉིས་བགྲང་སྐབས་ཏུན་ཧོང་ཡིག་རྙིང་སོགས་ལས་རྐོང་ལ་བྲེ་སྣའམ་རྐོང་ཡུལ་བྲེ་སྣ་ཞེས་འབྱུང་བའི་ཀོང་ཡུལ་བྲེ་སྣ་ལྟེ་བ་བྱས་པའི་ཡུལ་ཁམས་ཏེ་ཀོང་སྟོད་ཨོ་རོང་ནས། ཀོང་སྨད་ཀོང་འཕྲང་བར་ལ་ཀོང་རྗེ་དཀར་པོའི་དབང་བསྒྱུར་ས་ཁུལ་དང་། ཀོང་སྟོད་དྭགས་སྨད་གཉིས་ཀྱི་མཚམས་ཀྱི་ཡུལ་ནི་མཆིམས་རྗེའི་མངའ་ཁོངས་སུ་གཏོགས། དེ་ནས་རིམ་པར་སྤོ་བོ་ཡུལ་ནས་བོད་ཀྱི་བཙན་པོ་ཐོག་མ་གཉའ་ཁྲི་བཙན་པོ་སྐུ་འཁྲུངས་པ་དང་བོད་ཀ་གཡག་དྲུག་གི་རྗེར་བཀུར་པ་དང་། བོད་ཀྱི་བཙན་པོ་གྲི་གུམ་བཙན་པོ་ལོ་ངམ་གྱིས་བཀྲོངས་རྗེས་ཡུམ་སྲས་རྣམས་ཀོང་ཡུལ་དུ་ཡུལ་བྱོལ་ལ་ཕེབས་པ་ལས། ཕྱིས་ཀྱི་ཀོང་པོའི་རྒྱལ་པོ་ཀོང་དཀར་པོ་རྗེ་གྲི་གུམ་བཙན་པོའི་སྲས་ཉ་ཁྲིའི་རྒྱུད་པ་ཡིན་པར་ཀོང་པོ་གཡུང་དྲུང་འཛིན་གྱི་བྲག་བརྐོས་བཀའ་གཙིགས་སུ་གསལ། རྒྱལ་པོ་ཁྲི་སྲོང་ཡབ་སྲས་ཀྱི་སྐབས་ཀོང་དཀར་པོ་རྗེ་ལ་དམིགས་བསལ་གྱིས་སྔ་ཕྱིར་བཀའ་གཙིགས་གནང་ཡོད། སྡེ་སྲིད་ཕག་མོ་གྲུ་པའི་སྐབས་ཀོང་སྟོད་ཀོང་སྟད་ཕག་གྲུའི་ཁྲི་སྐོར་དུ་གཏོགས་པར་བཤད་ལ། དེའི་ཕྱིས་གཞུང་ས་དགའ་ལྡན་ཕོ་བྲང་སྐབས་ཀོང་པོའི་ཁུལ་དུ་རྩེ་ལ་སྒང་དང་།

ཇོ་མོ། ཞོ་ཁ། རྒྱ་མདའ་རྫོང་བཅས་ཀོང་པོ་རྫོང་བཞི་ཞེས་གྲགས་པའི་སྲིད་འཛིན་ས་ཚུགས་བཙུགས་པ་སོགས་བོད་ཀྱི་ལོ་རྒྱུས་ཁྲོད་ཤར་ཀོང་པོ་རོང་གིས་གོ་གནས་ངེས་ཅན་བཟུང་ཡོད།

གཅིག །བྲག་གསུམ་མཚོ་དང་མཚོ་རྫོང་དགོན།  

ཀོང་པོ་བ་ལ་བརྒྱབ་ནས་རིམ་པར་ཤར་ཕྱོགས་ལུང་གཞུང་དེད་དེ་སོང་པས་ཀོང་པོ་རྒྱ་མདའ་རྫོང་དུ་འབྱོར། རྒྱ་མདའ་ནས་མུ་མཐུད་དེ་མར་ཅུང་ཙམ་སོང་བས་བྲག་གསུམ་མདའ་ལ་སླེབས་ཤིང་དེར་བྱ་ཁྱུང་གི་ལྷ་ཁང་ཞིག་ཡོད་པ་མཇལ། དཀོར་གཉེར་བ་རྒད་པོ་ཞིག་ཡོད་པ་དེས་བཤད་ན་ལྷ་ཁང་དེར་སྐུ་ཞོགས་མེད་ཅིང་། གཙོ་བོ་ཡུལ་ལུང་འདིའི་སྔོན་ཆད་ཀླུ་གདོན་ནད་ཀྱི་གནོད་པ་བཟློག་ཕྱིར་ལྷ་ཁང་འདི་བཞེངས་ཞེས་བཤད། ལྷ་ཁང་དེར་གཙོ་སྐུ་བྱ་ཁྱུང་དང་གཡས་སུ་ཐུབ་པ། གཡོན་དུ་གུ་རུ་སོགས་འཇིམ་པས་གསར་དུ་བཞེངས་འདུག་ལ། ལྡེབས་རིས་ལ་ཁྱུང་གི་རིགས་དཀར་སེར་དམར་ལྗང་སྣ་ཚོགས་དང་། ཡུལ་ལྷ་གཞི་བདག་རྟ་ལ་བཞོན་པ་འགའ་རེ་བྲིས་འདུག །

དེ་ནས་ལུང་པ་ཕུ་འདེད་བྱས་ནས་བསྐྱོད་པས་བྲག་གསུམ་ལུང་པར་སླེབས། ཀོང་པོའི་ཡུལ་གྱི་སྐད་ལ་བྲག་གསུམ་ལ་ར་བཏགས་ཀྱི་སྒྲ་མ་ཐོན་པས་བག་གསུམ་ཞེས་འབོད། རྒྱ་མིས་དེང་སྐབས་巴松措ཞེས་འབོད་པ་ཡང་སྒྲ་དེ་ལས་བྱུང་། དེ་ཡང་དེང་གི་ཉིང་ཁྲི་གྲོང་ཁྱེར་གྱི་གནས་ཡུལ་བྲག་ཡིབ་ས་ཁུལ་ལ་དེང་སྐབས་རྒྱ་མིས་巴宜ཞེས་འབོད་ཅིང་། དེ་བྲག་ཡིབ་ཅེས་པ་ར་བཏགས་མེད་པར་བཀླགས་པས་བག་ཡིབ་ཅེས་པའི་དོན་རེད་འདུག །ཀོང་པོའི་གླུ་དབྱངས་ཤིག་ཏུ་ཨ་ལ་བ་ཀྲ་ཧེ་ཞེས་པ་དེ་ཨ་ལ་བཀྲ་ཤིས་ཤོག་ཅེས་པའི་དོན་ཡིན་པར་བཤད་པ་བཞིན་སྔོན་རྗེས་འཕུར་འདོགས་སོགས་སོ་སོར་ཕྲལ་ནས་ཀློག་སྟངས་ཤིག་ཡོད་པ་འདི་བརྡ་རྙིང་པའི་ཡི་གེ་ཀློག་སྟངས་ཤིག་ཡིན་པ་འདྲ། བྲག་གསུམ་མདོ་ནས་བྲག་གསུམ་མཚོ་བར་དུ་སྤྱི་ལེ་སུམ་ཅུ་ཙམ་ཡོད་ལ། བྲག་གསུམ་མཚོ་ནི་དེང་གི་རྒྱལ་ཁབ་ཀྱི་Aརིམ་པ་ལྔ་ཅན་གྱི་ཡུལ་སྐོར་ལྗོངས་རྒྱུའི་ས་ཚུགས་རེད་འདུག་ལ། ཤར་ཀོང་པོ་རོང་ལ་ལྷོ་ཀོང་པོ་དང་། བྱང་ཀོང་པོ་གཉིས་སུ་བགྲང་བ་ལས་བྱང་ཀོང་གི་ཁོངས་སུ་བརྩི། བྲག་གསུམ་མཚོ་ནི་གཡུ་འབྲུག་སྔོན་མོ་ནགས་ཀླུང་དུ་ཉལ་བ་ལྟ་བུའི་བྲག་གསུམ་ལུང་པའི་ནང་དུ་ཆགས་ཡོད་ཅིང་།

བོན་གྱི་ལོ་རྒྱུས་ཁག་ཏུ་བཤད་པའི་མུ་ཁྲི་བཙན་པོའི་སྐབས་ཀྱི་བོན་གྱི་འདུ་གནས་ཆེན་པོ་སོ་བདུན་ཞེས་བགྲང་བའི་གྲས་སུ་ཉང་ལུང་ཤིང་ནག་ཅེས་བྱུང་བ་དེ་ནི་བྲག་གསུམ་ལུང་པ་ཡིན་པར་བཤད་པས་ད་ལྟའི་བར་དུ་འདི་ཡས་མས་སུ་བོན་ཆོས་ལ་དད་པ་བྱེད་མཁན་མང་པོ་ཡོད་པ་དང་། དེ་ནས་རིམ་པར་ནང་བསྟན་གྱི་བསྟི་གནས་ཤིག་ཏུ་ཡང་གྱུར་ཏེ་མཚོ་ཆེན་དེའི་འགྲམ་ཟུར་གཡས་སུ་ཕྱོགས་པའི་མཚོ་ནང་ན་རི་དེའུ་ཞིག་ཡོད་ལ། རི་དེའུ་དེའི་སྟེང་དུ་མཚོ་རྫོང་དགོན་པ་ཞེས་སྔ་འགྱུར་རྙིང་མའི་གཏེར་ཆེན་སངས་རྒྱས་གླིང་པའི་གདན་ས་རྙིང་མ་པའི་དགོན་པ་ཞིག་ཆགས་ཡོད་ཅིང་། དེ་ནི་འགོས་ལོ་ཆེན་པོའི་དེབ་སྔོན་ནང་དུ་ཀོང་ཡུལ་མཚོ་རྫོང་ཞེས་བཤད་པའི་མཚོ་རྫོང་ནི་དགོན་གནས་ཀྱི་རྣམ་པར་ཆགས་པའི་མཚོ་རྫོང་དགོན་འདི་ལ་ཟེར་བ་ཡིན། ད་ལྟའི་བར་དུ་མཚོ་རྫོང་དགོན་པ་ནི་ནང་པའི་གནས་རྩ་ཆེན་ཞིག་ཡིན་པར་ཡང་བཤད་ཡོད་དོ། །དེ་ཡང་བྲག་གསུམ་ཞེས་པའི་བྲག་གསུམ་ནི། གཡས་ལུང་ན་ཀ་ཡ་མི་འདུལ་ལྷའི་བྲག །གཡོན་ལུང་ན་མཚོ་ཆུ་དར་མ་བཙན་གྱི་བྲག །

དབུས་ན་སྨན་དང་ལྷེབ་ལུང་རྡོ་རྗེ་བྲག་སྟེ་དེ་གསུམ་ལ་བྲག་གསུམ་ཞེས་འབོད་ཅིང་འཕགས་པ་རིག་གསུམ་མགོན་པོའི་གནས་ཡིན་པར་བཤད། བོད་ཀྱི་ས་དབྱིབས་སྲིན་མོ་གན་རྐྱལ་དུ་ཉལ་བ་ལྟ་བུ་ཡིན་པའི་བཤད་རྒྱུན་ལྟར་འདིར་ཡང་། གནས་ཆེན་པོ་བརྒྱད་དང་དུར་ཁྲོད་ཆེན་པོ་བརྒྱད་དང་མཉམ་པའི་གཙུག་ལག་ཁང་སོགས་ཡོད་པ་ལས། རྐང་གཡས་འབྲུ་ལ། རྐང་གཡོན་ཝ་རུ་རྣེ་ཚལ། ལག་གཡས་རྫ་ཕུ། ལག་གཡོན་གནམ་ཕུབ། ལྟེ་བ་ཀོང་ཡུལ་ནག་མ་མའི་མཚོ་རྫོང་ཡིན་ཞེས་མཚོ་རྫོང་གནས་ཡིག་ཤིང་དཔར་མ་ལས་གསུངས། ཡུལ་གང་ཞིག་ས་ཡི་ལྟེ་བའམ་དཀྱིལ་ཡིན་པར་འདོད་པའི་ལྟ་ཚུལ་ནི་གནའ་ནས་ཡོད་པའི་སྲོལ་རྒྱུན་ཞིག་ཡིན་ཞིང་། ནང་བསྟན་པ་དག་གིས་འཛམ་གླིང་ས་ཡི་ལྟེ་བ་རྡོ་རྗེ་གདན་ཡིན་པར་བཤད་པ་དང་། ཡང་བོན་པོ་རྣམས་ཀྱིས་འཛམ་གླིང་ས་ཡི་ལྟེ་བ་སྟག་གཟིག་ཡུལ་ལམ་གངས་རི་ཆེན་མོ་ཏི་སེ་ཡིན་པར་བཤད་པ་དག་སྟོན་པ་དང་ཆོས་ཀྱི་ཆེ་བ་འདོན་སྟངས་ཤིག་རེད། འདི་ཡང་དེ་ལས་མ་འདས་ཏེ་གནས་ཀྱི་ཆེ་བ་བརྗོད་སྟངས་ཤིག་རེད། གྲུབ་ཆེན་ཨུ་རྒྱན་པའི་ཨུ་རྒྱན་ཡུལ་གྱི་ལམ་ཡིག་ཏུ་ཨུ་རྒྱན་ཡུལ་གྱི་མི་འགྱུར་བའི་གཟེར་ལྟ་བུར་ཕྱོགས་བཞི་ལ་སྒོ་བཞི་ཡོད་པར་གསུངས་པ་བཞིན། འདིར་ཡང་མདའ་ན་ཧམ་ཕྲང་ལྕགས་ཀྱི་སྒོ། བར་ན་རྡོ་རྗེ་བྲག་གི་སྒོ། ཕུ་ན་གནམ་ཕུར་ཤིང་གི་སྒོ། མཚོ་གཉན་མེ་འབར་བྲག་རི་གནམ་ལོང་སོགས་ཡོད་པར་བཤད་ཡོད་དོ། །

གཞན་ཡང་མཚོ་སྟོད་ན་ཚེ་དཔག་མེད་ཀྱི་དཀྱིལ་འཁོར། མཚོ་སྨད་ན་ཐུགས་རྗེ་ཆེན་པོའི་དཀྱིལ་འཁོར། དབུས་ན་མཚོ་རྫོང་འདི་དབང་དྲག་འབར་བའི་ཕོ་བྲང་ཡིན་ཞེས་བཤད་ཅིང་། སའི་ཆགས་དབྱིབས་ཀྱི་དཔྱད་ན། གནམ་གཡུ་འབྲུག་སྔོན་པོ་གྱེན་ལ་རྒྱུག་པ་འདྲ་བ། ས་གཞི་གཡུ་ཡི་མཎྜལ་ཕུལ་བ་འདྲ་བ། རྒྱབ་རི་རྒྱལ་པོ་གདན་ལ་བཞུགས་པ་འདྲ་བ། མདུན་རི་ལྕགས་སྡིག་ཐུར་དུ་རྒྱུགས་པ་འདྲ་བ། གཡས་རི་མེ་ལྟར་འབར་བ། གནས་འདིར་མཐུ་རྩལ་ཆེ་བའི་རྟགས། གཡོན་རི་དུང་ཆེན་འབུད་པ་འདྲ་བ། གནས་འདི་སྙན་གྲགས་ཆེ་བའི་རྟགས། ཤར་ནས་བལྟས་ན་རྡོ་རྗེ་ཕག་མོ་འགྱིངས་པ་འདྲ་བ། ལྷོ་ནས་བལྟས་ན་གུ་རུ་པདྨའི་དབུ་ཞྭ་འདྲ་བ།  ནུབ་ནས་བལྟས་ན་མཚོན་ཆ་མང་པོ་བཀྲམ་པ་འདྲ་བ། བྱང་ནས་བལྟས་ན་མཎྜལ་སྟེང་དུ་ཚོམས་བུ་བཀོད་པ་འདྲ་བ་སོགས་དུས་བཞིར་ཞི་རྒྱས་དབང་དྲག་གི་ལས་བཞི་དང་འདྲ་བར་ཡོད་པ་སོགས་གནས་ཡིག་ཤིང་དཔར་མར་བཤད་དོ། །མཚོ་རྫོང་འདིར་སྔོན་སློབ་དཔོན་པདྨ་འབྱུང་གནས་སོགས་སྐྱེས་ཆེན་མང་པོས་ཞབས་ཀྱིས་བཅགས་ཤིང་བྱིན་གྱིས་བརླབས། གཏེར་ཁ་ཆེ་ཆུང་གྲངས་མེད་པ་མང་པོ་སྦས་པ། ཕྱིས་སུ་གཏེར་ཆེན་སངས་རྒྱས་གླིང་པ་བྲག་གསུམ་རྡོ་རྗེ་བྲག་གི་འགྲམ་ནས་སྐུ་འཁྲུངས་ཤིང་ཟབ་གཏེར་གྱི་སྒོ་ཕྱེས་པ་དང་། མ་ཧཱ་གུ་རུ་དྲག་པོ་རྩལ་ཡིད་བཞིན་ནོར་བུའི་འབག་སྐུ་ཡུལ་གྱི་བསོད་ནམས་ཀྱི་རྟེན་དུ་བཞེངས་པ་དང་གཏེར་ཆེན་ཉིད་ལ་ལན་མང་དུ་གསུང་འབྱོན་པ་སོགས་ངོ་མཚར་བའི་རྟགས་མཚན་མང་པོ་བྱུང་བར་གསུངས།  

བཤད་སྟངས་གཞན་ཞིག་ལ་མཚོ་འདི་ནི་སྔོན་བདུད་རྗེ་ཁྱབ་པ་ལག་རིང་གི་བླ་མཚོ་ཡིན་པར་བཤད་ཅིང་། བོན་གྱི་ལོ་རྒྱུས་ཁག་ཏུ་བདུད་ཁྱབ་པ་ལག་རིང་སྟོན་པ་གཤེན་རབ་དང་རྫུ་འཕྲུལ་སྣ་ཚོགས་པ་འགྲན་ཏེ་མཐར་སྟོན་པ་ལ་འགྲན་དུ་མ་བཏུབ་པར་སྟོན་པའི་འཁོར་དུ་བཀོད་པར་བཤད་པ་དང་། ཡང་བཤད་སྟངས་ཤིག་ལ་གླིང་གེ་སར་གྱིས་བདུད་ཀླུ་བཙན་རྒྱལ་པོ་ཆམ་ལ་ཕབ་པའི་གནས་ཡུལ་འདི་ཡིན་པར་བཤད་ཅིང་། ཕྱོགས་བཞིར་ཡོད་པའི་བླ་ཤིང་རྣམས་བཅད་པ་དང་། བླ་འབྲོང་བསད། བླ་མཚོ་འདི་ཡང་བྱིན་གྱིས་བརླབས་པར་བཤད།    

གཏེར་ཆེན་རིག་འཛིན་སངས་རྒྱས་གླིང་པ་ནི་བོད་རབ་བྱུང་བཅུ་དྲུག་པའི་ལྕགས་ཕོ་འབྲུག་གི་ལོ་སྟེ་སྤྱི་ལོ་1340ལོར་བྲག་གསུམ་རྡོ་རྗེ་བྲག་ཏུ་ཡབ་སྟག་ལུང་སྨྱོན་པ་དང་ཡུམ་ཨ་ཧཱུཾ་རྒྱན་གཉིས་ཀྱི་སྲས་སུ་འཁྲུངས་པ་དང་། ཀརྨ་པ་རོལ་བའི་རྡོ་རྗེ་དང་བླ་མ་བྱང་ཆུབ་རྡོ་རྗེ། མཁས་གྲུབ་བླ་མ་ཆོས་ཀྱི་བློ་གྲོས་སོགས་མཚན་ལྡན་གྱི་བླ་མ་མང་དུ་བསྟེན། དགུང་ལོ་25ནས་ཟབ་གཏེར་གྱི་བརྡ་སད་དེ། སྤུ་རི་ཕུག་མོ་ཆེ་ནས་བླ་མ་དགོངས་པ་འདུས་པ་དང་ཐུགས་རྗེ་ཆེན་པོའི་སྐོར་རྣམས་གདན་དྲངས། དེ་ནས་བཟུང་དཀར་ཟུག་འཕྲང་དང་། རྗེ་བོ་རོང་། རྩེ་ཆེན་བྲག །ལོང་པོ་བྱང་སྡེ་འབུམ་པ། ལང་པོ་ཀ་མདའ་འཕྲང་། ཀོང་པོ་མཆིམས་ཡུལ། ཙ་རི། རྒྱ་ལ་གཤིན་རྗེའི་རྦ་དོང་།

བསམ་ཡས་མཆིམས་ཕུ་སོགས་ནས་གཏེར་ཁ་ཆེན་པོ་བཅོ་བརྒྱད་དང་། གཏེར་ཕྲན་གྲངས་ཀྱིས་མི་ལངས་པ་བླངས། དེ་ཡང་དགོངས་འདུས་སོགས་ཟབ་གཏེར་ཁག་གི་འགྲོ་དོན་ནི། བསྐྱེད་རིམ་བརྟན་པ་ཐོབ་པ་བྱེ་བ་འབུམ༔ མངོན་སུམ་གྲུབ་པའི་རྟགས་ཐོན་འབུམ་ཕྲག་བརྒྱད༔ ཟག་མེད་སྒྱུ་ལུས་གྲོལ་བ་ཁྲི་ཕྲག་དགུ༔ དངོས་གྲུབ་སྣ་རེ་ཐོབ་པ་དུང་ཕྱུར་བརྒྱ༔ ཐར་པའི་ས་བོན་ཐེབས་པ་རྩིས་ལས་འདས༔ དུས་གཅིག་མ་ཡིན་བརྒྱུད་མར་རིམ་བཞིན་འབྱུང༔  ཞེས་གསུངས་པ་ལྟར་འགྲོ་དོན་ཤིན་ཏུ་ཆེ་བ་བྱུང་ཞིང་། སློབ་མའི་ཚོགས་ཀྱང་ཤིན་ཏུ་མང་པོ་བསྐྱངས་པ་སྟེ། དགོངས་འདུས་ཁོ་ན་ལ་ཡང་བཀའ་བབ་བརྒྱུད་པའི་ཆུ་བོ་ཆེན་པོ་ཉི་ཤུ་ཡོད་པར་བཤད་པ་དང་། གཏེར་ཁ་གཞན་རྣམས་ལ་ཡང་ཆོས་བདག་ཤིན་ཏུ་མང་པོ་ཡོད་པ་ལས། ཀུན་གྱི་གཙོ་བོ་ཀརྨ་པ་རོལ་པའི་རྡོ་རྗེ་དང་།

བྱ་ཁྱུང་བ་དཔལ་ལྡན་སེང་གེ། ཞྭ་དམར་པ་མཁའ་སྤྱོད་དབང་པོ། སྣེ་གདོང་གོང་མ་ཆེན་པོ། ས་སྐྱ་བསོད་ནམས་རྒྱལ་མཚན། གཡག་སྡེ་པཎ་ཆེན། ཆོ་སྟན་མཁན་ཆེན་བསོད་ནམས་བཟང་པོ། འབྲི་གུང་ཆོས་ཀྱི་རྒྱལ་པོ་སོགས་དང་། ཁྱད་པར་དུ་སྐུའི་སྲས་ཡེ་ཤེས་རྡོ་རྗེ་དང་། ཆོས་བདག་སློབ་མ་བྱ་ཁྱུང་པ་དཔལ་ལྡན་སེང་གེ་གཉིས་ལས་སྲས་བརྒྱུད་དང་སློབ་བརྒྱུད་ལ་མཁས་གྲུབ་རིམ་པར་བྱོན་ཞིང་། རྩེ་ལ་གོང་འོག་དང་། མདོ་ཁམས་ཏ་བླ་སྔ་ཕྱི་སོགས་ལས་བརྒྱུད་དེ་དགོངས་འདུས་ཟབ་གཏེར་ཡིད་བཞིན་ནོར་བུའི་གཙོ་བོར་གྱུར་པའི་གཏེར་ཁ་རྣམས་གངས་ལྗོངས་མཐའ་དབུས་ཀུན་ཏུ་ཁྱབ་པར་གྱུར། མཐར་སྤྱི་ལུགས་ལྟར་ན་དགུང་ལོ་ལྔ་བཅུ་ང་ལྔ་པ་སྤྱི་ལོ་1396ལོ་དང་། བོད་རབ་བྱུང་བདུན་པའི་མེ་ཕོ་བྱི་བའི་ལོའི་ཟླ་གསུམ་པའི་གནམ་གང་ཉིན་དགོན་པ་བྱང་ཆུབ་གླིང་དུ་སྐུ་འདས་སོ། །

གཉིས། ཀོང་པོ་ཆུ་ཇོ་བོ།

ཀོང་པོ་གཡུང་དྲུང་འཛིན་ནས་བོན་རིའི་ཕྱོགས་སུ་ཅུང་ཙམ་སོང་བས་ཀོང་པོ་ཆུ་ཇོ་བོ་བཞུགས་པའི་དགོན་པར་སླེབས། ཀོང་པོ་ཆུ་ཇོ་བོ་ཞེས་གནའ་ནས་ཐོས་མྱོང་ཡང་དེ་རིང་མ་གཏོགས་མཇལ་མ་མྱོང་།  དགོན་པ་འདི་ནི་དེང་སྐབས་སྔ་འགྱུར་རྙིང་མའི་ཆོས་བརྒྱུད་འཛིན་མཁན་ཞིག་རེད་འདུག་ལ། དེའི་ནང་རྟེན་ལ་གུ་རུ་གཙོ་འཁོར་གསུམ་དང་སྟོན་པའི་འབག་སྐུ་སོགས་མང་པོ་བཞེངས་སྐྲུན་བྱས་འདུག དེ་བཞིན་དུ་བདུད་འཇོམས་སྐུ་ཕྲེང་གཉིས་པ་འཇིགས་བྲལ་ཡེ་ཤེས་རྡོ་རྗེ་དང་། མཁན་ཆེན་འཇིགས་མེད་ཕུན་ཚོགས་གཉིས་ཀྱི་སྐུ་པར་མཆོད་སྟེགས་སྟེང་སྦྱར་འདུག །དེར་སྐུ་ཞོགས་གསུམ་བཞི་ཞིག་བཞུགས་ཀྱང་ཉིན་དེར་བསྙེན་གནས་གསོལ་སྦྱོང་དུ་བཞུགས་ནས་ངག་བཅད་གནང་འདུག་པས་དགོན་པའི་ལོ་རྒྱུས་སྐོར་ལ་སྐད་ཆ་ཅི་ཡང་འདྲི་ས་མ་རྙེད། ཆུ་ཇོ་བོའི་སྐུ་བརྙན་ནི་གཙུག་ལག་ཁང་གི་སྦུག་གི་མཆོད་སྟེགས་སྟེང་དུ་བཞུགས་སུ་གསོལ་ཞིང་། དེ་ཡང་འཕགས་པ་སྤྱན་རས་གཟིགས་ཐུགས་རྗེ་ཆེན་པོ་ཕྱག་བཞི་པ་རྡོ་ལེབ་ཅིག་ཏུ་བརྐོས་པའི་སྐུ་ཞིག་རེད། ཕར་བལྟས་ཚོད་ལ་རྡོ་སྐུའི་རིང་ཚད་ལ་སྨི་གཅིག་ཙམ་དང་། ཁ་ཞེང་ལ་ཁྲི་ཙེ་གཉིས་ཙམ་ཡོད་འདུག །ཆུ་ཇོ་བོའི་སྐོར་ལ་དམངས་ཁྲོད་དུ་གཏམ་རྒྱུད་མང་དུ་བཤད་རྒྱུ་ཡོད་ཅིང་། དེ་ཡང་ཡོངས་སུ་གྲགས་པ་ནི། སྔོན་ཞིག་ལ། ཀོང་པོ་འབེན་བྱ་བའི་མི་གླེན་པ་ཞིག་ཡོད་པ་དེ་ལྷ་སར་ཇོ་བོ་ཤཱཀྱ་མུ་ནེ་མཇལ་དུ་སོང་ཚེ་ལྷ་གཉེར་བ་མེད་པའི་སྐབས་དང་འཁེལ་ནས་ཇོ་བོའི་མདུན་དུ་བཤམས་པའི་ལྷ་བཤོས་དང་མར་མེ་རྣམས་མཐོང་བས་འདི་ནི་ཇོ་བོའི་ཞལ་ཟས་ཡིན་པ་དང་། མཆོད་མེ་བསྒྲོན་པ་ནི་ཞལ་ཟས་མི་གྲང་པའི་ཆེད་དུ་ཡིན་པས་རང་གིས་ཀྱང་བཟའ་འོ་སྙམ་སྟེ། ལྷ་བཤོས་རྣམས་མཆོད་མེའི་མར་ཁུ་ལ་བསྲེས་ནས་ཟོས་ཤིང་ཇོ་བོའི་ཞལ་ལ་བལྟས་པས་ཇོ་བོ་ནི་འཛུམ་དམུལ་དམུལ་བཞུགས་འདུག་པར། ལྷ་བཤོས་ཁྱི་ཡིས་ཁྱེར་ཡང་འཛུམ་དམུལ་དམུལ། མཆོད་མེ་རླུང་གིས་བསྐྱོད་ཀྱང་འཛུམ་དམུལ་དམུལ། འདི་པ་ནི་བླ་མ་བཟང་སྙམ་སྟེ་ལྷམ་ཡ་གཅིག་ཕུད་དེ་ཇོ་བོ་ལ་འདི་ཁྱེད་ལ་བཅོལ་བ་ཡིན། ང་ཁྱེད་ལ་སྐོར་བ་ཞིག་བྱེད་དུ་འགྲོ་བ་ཡིན་ཞེས་སོང་། ལྷ་གཉེར་སླེབས་ནས་ལྷམ་དེ་འདོར་གྲབས་བྱེད་སྐབས་ཇོ་བོས་གསུང་འབྱོན་ནས་འདི་མ་འདོར། འདི་ང་ལ་ཀོང་པོ་འབེན་གྱིས་བཅོལ་བ་ཡིན་གསུངས། སླར་ཁོ་འོང་ནས་ལྷམ་བླངས་ཏེ་བླ་མ་བཟང་པོ་ཁྱོད་ཡིན། སང་ལོ་ཁྱོད་ངེད་ཚང་ལ་ཤོག་དང་། ངས་ཕག་བཤས་ནས་ཤ་བཙོ། ནས་བཙོས་ནས་ཆང་བསྙལ་ཏེ་བསྒུག་འདུག་ཅེས་བཤད་པར་ཇོ་བོས་ཀྱང་འོང་བར་ཞལ་བཞེས་ཐོབ། ཀོང་པོ་འབེན་ཁྱིམ་དུ་འབྱོར་རྗེས་རང་གི་ཆུང་མར་ངས་ཇོ་བོ་རིན་པོ་ཆེ་གདན་འདྲེན་བྱས་ཡོད། ཁོང་ནམ་བྱོན་མི་ཤེས་པས་རྒྱུན་དུ་ཉམས་འཇོག་བྱོས་ཞེས་བཤད། ནམ་ཞིག་འགྲོ་བ་རྣམས་ཀྱིས་མོས་བློ་དང་མཐུན་པར་ཇོ་བོ་ཐུགས་རྗེ་ཆེན་པོ་ཕྱག་བཞི་པ་ཞིག་ཏུ་སྤྲུལ་ནས་ཀོང་པོ་སྨན་ལུང་གི་ཆུའི་ནང་དུ་བྱུང་བ་དང་། ཁོའི་ཆུང་མ་ཆུ་ལེན་སར་འགྲོ་སྐབས་ཆུའི་ནང་དུ་ལྷ་ཡི་གཟུགས་བརྙན་ཞིག་ཤར་ཡོད་པ་མཐོང་བས་ཁྱོ་ག་ལ་ཁྱོད་ཀྱི་མགྲོན་པོ་དེ་ཡིན་ནམ་ཞེས་བཤད་པས། ཁོ་འཕྲལ་དུ་བརྒྱུགས་ནས་བལྟས་པས་ཇོ་བོ་ཆུ་ནང་དུ་ཤར་ཡོད་པ་མཐོང་བས། ཨ་ཁ་ཁ། མ་བཟང་། ཇོ་བོ་ཆུ་ནང་དུ་ལྷུང་འདུག་སྙམ་སྟེ་གཙང་པོའི་ནང་དུ་ལྕེབས་ནས་ཇོ་བོ་ལ་འཐམ་པས་དངོས་སུ་བཟུང་ནས་ཁྲིད་ཡོང་རྒྱུ་ཡོད་པ་ཞིག་བྱུང་། དེ་ནས་ཁྱིམ་དུ་འོང་བའི་ལམ་བར་གྱི་ཇོ་བོས་ཁོང་འཁོར་བ་མི་ནག་གི་ཁྱིམ་དུ་མི་འགྲོ་གསུངས་ཏེ་རྡོ་ཆེན་པོ་ཞིག་ཡོད་པ་དེར་ཐིམ། རྡོ་དེ་ལ་རང་བྱོན་དུ་ཤར་བས་རྡོ་ལེབ་ཇོ་བོ་དང་། ཐོག་མར་འཁྲུངས་ས་ཆུ་ནང་ཡིན་པས་མི་ཀུན་གྱིས་ཆུ་ཇོ་བོ་ཞེས་བརྗོད། ཅེས་གྲགས་པའི་གཏམ་རྒྱུད་ནང་གི་ཇོ་བོ་འདི་ཡིན་པར་བཤད། ལྷ་སྒྲུང་ལྟ་བུའི་གཏམ་རྒྱུད་འདི་ནས་ང་ཚོས་ཤེས་ནུས་པ་ནི། སེམས་ལ་དད་པ་བརྟན་པོ་ཞིག་ཡོད་ཚེ་ཆོས་ཞེས་པ་ནི་སྐྱེ་བོ་མཆོག་དམན་ཚང་མར་འདྲ་མཉམ་ཞིག་ཡིན་ཞིང་། གཙོ་བོ་སེམས་ཀྱི་དད་པ་དང་མི་གཞི་བརྟན་པོ་ཡོད་མེད་ལ་རག་པ་ལས། དབང་གྲགས་སོགས་འཇིག་རྟེན་གྱི་མཚན་སྙན་ཡོད་མེད་ལ་འབྲེལ་བ་མེད་པའི་དངོས་ཡོད་གནས་ཚུལ་གསལ་པོར་བསྟན་པ་དང་། ཡང་ཕྱོགས་གཞན་ནས། ང་ཚོའི་གནའ་རབས་མེས་པོ་ཚོ་ནི་མི་གཞི་བརྟན་ཅིང་ཁ་དོན་ཚིག་ལ་གནས་མཁན་ཞིག་ཡིན་པའི་གནས་ལུགས་ཤིག་བསྟན་པ་མ་ཡིན་ནམ། （མུ་འགོད）