བོད་ལུགས་གསོ་རིག་གི་དྲེག་ནད་གྱུར་ཚུལ་དང་ནུབ་ལུགས་གསོ་རིག་གི་ཐུང་ཧྥུང་གཉིས་ཀྱི་དབྱེ་ཞིབ།

ནང་དོན་གནད་བསྡུས།

ལོ་ངོ་སྟོང་ཕྲག་དུ་མའི་སྔོན་ནས་བོད་ལུགས་གསོ་བ་རིག་པའི་གཞུང་ལས་དྲེག་ནད་ཀྱི་རིག་གཞུང་ཚུལ་བཞིན་གྲུབ་ཡོད་པ་དང་ལག་ལེན་གྱ་ནོམ་པ་ཞིག་ཡོད་པ་ནི་ཀུན་གྱིས་མཁྱེན་གསལ་ལྟར་ཡིན་ལ། སྐབས་འདིར་བོད་ལུགས་གསོ་རིག་གི་དྲེག་ནད་གྱུར་ཚུལ་དང་ནུབ་ལུགས་གསོ་རིག་གི་ཐུང་ཧྥུང་གཉིས་ལ་ཡིག་ཚང་དང་ནད་ཐོག་ལག་ལེན་བར་གྱི་གཤིབ་བསྡུར་བྱས་ཏེ་བོད་ལུགས་གསོ་རིག་གིས་གཞུང་དགོངས་ལ་དེང་རབས་ཀྱི་ངོས་འཛིན་བརྟག་ཐབས་མ་ལག་གྱི་ཚད་གཞི་གང་ཡོད་དབྱེ་ཞིབ་དང་ཕྱོགས་བསྡོམས་བྱས་ཡོད།

གླེང་གཞི།

དེ་ཡང་དེང་རབས་སྤྱི་ཚོགས་འཕེལ་རྒྱས་དབྱར་མཚོ་ལྟར་རྒྱས་བཞིན་པའི་སྒང་འདིར་དྲེག་གི་མནར་བའི་ནད་ཅན་ཉིན་རེ་བཞིན་ཇེ་མང་འགྲོ་བཞིན་པ་དང་དེ་དག་སྤྱིའི་ནད་རྟགས་ལ་ངོས་འཛིན་བྱེད་ཐུབ་ཀྱང་དེང་རབས་ཀྱི་ཚན་རིག་ལག་རྩལ་གྱིས་བརྟག་ཐབས་དང་མཉམ་འབྲེལ་བྱས་པའི་དཔྱད་རྩོམ་སྤེལ་བ་ཉུང་བར་སྣང་བས་དེ་ཕྱིར་ད་ཐེངས་གནའ་དེང་ཟུང་འབྲེལ་གྱིས་སྒོ་ནས་དྲེག་གི་ནད་ཀྱི་རྒྱུ་རྐྱེན་གྱུར་ཚུལ་ཕྱོགས་གཉིས་ནས་དབྱེ་ཞིབ་དཔྱད་བསྡུར་བགྱིས་ཁུལ་བྱས་ཏེ་རིག་གཞུང་ཞིབ་འཇུག་དང་ནད་ཐོག་ལག་ལེན་སྐབས་བེད་སྤྱོད་ཐུབ་པ་བྱ་རྒྱུ་ནི་ཕྲག་ཏུ་བབས་པའི་འོས་འགན་ཡིན་པས་རང་བློས་གང་དཔོག་གིས་དཔྱད་པ་བྱས་ཡོད།

དང་པོ། དྲེག་ནད་ཀྱི་རྒྱུ་རྐྱེན་དང་གྱུར་ཚུལ།

བོད་ལུགས་གསོ་བ་རིག་པའི་དཔལ་ལྡན་རྒྱུད་བཞིའི་བདུན་པ་ཐོར་ནད་གསོ་བའི་སྐབས་ལེའུ་ང་བདུན་པ་དྲེག་ནད་གསོ་བའི་ལེའུ་གཅིག་གི་བདག་ཉིད་ཅན་བསྟན་ཡོད་པ་དང་དེ་མིན་གཞུང་དང་ཉམས་ཡིག་ཡན་ལག་བརྒྱད་པའི་སྙིང་པོ་བསྡུས་པ། གཙང་སྟོད་དར་མགོན་ཟིན་ཏིག །རྒྱུད་ཆུང་བདུད་རྩི་སྙིང་པོ། གསོ་དཔྱད་ཉི་མའི་འོད་ཟེར། ཕྱག་སྨན་རིན་ཆེན་རྒྱལ་མཚན། བྱང་པའི་ཡན་ལག་བརྒྱད་པ། བྱེ་བ་རིང་བསྲེལ། མན་ངག་པོ་ཏི་དམར་པོ། ཕྱག་རྡོར་མགོན་པོའི་གཅེས་བསྡུས། ལྷུན་སྡིངས་དགོས་འདོད་ཀུན་འབྱུང་། ཀོང་སྤྲུལ་ཟིན་ཏིག་སོགས་ལ་ལྟ་ཀློག་བྱ་ཁུལ་བགྱིས་པས། རྒྱུད་བཞི་ལས་ཕྱིས་བྱུང་བའི་གཞུང་རྣམ་ནི་རྒྱུད་བཞིའི་རྩ་ཚིག་གཙོ་བོར་རང་སོར་བཞག་དེ་གསུངས་པ། རྒྱུད་བཞི་ལས། རྒྱུ་རྐྱེན་ཁྲག་འཁྲུག་བྱེད་པའི་ཟས་སྤྱོད་བསྟེན། །ཉིན་པར་གཉིད་ལོག་སྐྱིད་པར་འདུག་པ་དང་། །དྲག་ཤུལ་རྐྱེན་གྱིས་རླུང་ཁྲག་འཁྲུག་པ་ཡིན། །ཞེས་གསུངས་པ་དང་། ཡན་ལག་བརྒྱད་པའི་སྙིང་པོ་བསྡུས་པ་ལས། ཁྲག་ནི་འཁྲུག་པར་བྱེད་པའི་ཟས། །

ཚ་བ་དང་ནི་མི་འཕྲོད་པ། །བསྟེན་དང་སྦྱོར་བ་ལོག་པ་དང་། །ཉིན་ཉལ་མཚན་གཉིད་ལོག་དང་། །ཉལ་པོ་དྲགས་དང་སྐྱིད་པར་གནས། །ཆགས་པའི་སྤྱོད་པ་མང་བསྟེན་དང་། །སྣད་དང་སྦྱང་བ་མ་བྱས་པས། །ཞེས་གསུངས་པ་དང་། ཡང་ཕྱག་རྡོར་མགོན་པོའི་གཅེས་བསྡུས་རིན་ཆེན་ཕྲེང་བ་ལས། དྲེག་ནི་དྲག་ཤུལ་རྐྱེན་གྱིས་རླུང་ཁྲག་འཁྲུགས། །དྲེག་ཅན་རྔུལ་འདྲེས་ལྷམ་དོག་པ་ལས་འབྱུང་། །ཞེས་གསུངས་པ་དང་།

ཕྱག་རྡོར་མགོན་པོས། སྤྱི་རུ་མན་ངག་མེ་བུམ་སོགས་མང་ཡང་། ། རྒྱུད་ལས་ལྷག་མེད་དེ་ཕྱིར་ནད་རྣམས་ཀྱི། །རྒྱུ་རྐྱེན་བརྟག་བཅོས་ཟས་སྤྱོད་དཔྱད་ལ་སོགས། །གཙོ་བོ་རྒྱུད་བཞི་ཉམས་སུ་ལེན་པ་གནད། །

ཅེས་གསུངས་པ་ལྟར་རྒྱུད་བཞི་ལས་རྒྱས་པ་ཞིག་མེད་ཀྱང་། མཁས་པ་སོ་སོའི་ཉམས་མྱོང་གི་རྩལ་ལས་འཁྲུངས་པའི་དགོངས་ཚུལ་མི་གཅིག་པ་དུ་མ་ཡོད་པ་ནི་གོང་གི་དྲེག་ནད་རྒྱུ་རྐྱེན་བཤད་སྐབས་ལྷམ་དོག་པ་ལས་བྱུང་བ་ཞེས་པ་དམིགས་སུ་ཚིག་ཟིན་གྱིས་སྟོན་པ་ནི་ཕྱག་རྡོར་མགོན་པོ་ཁོང་གི་གསོ་བཅོས་སྐབས་གསོ་བྱར་འཕྲད་མྱོང་བ་དག་ཡིག་ཐོག་ཏུ་ཕབས་པ་ཡིན་ལ། སྐབས་འདིར་གུས་པས་དཔྱད་ན་རྒྱུ་ནི་རྒྱུད་བཞིའི་དགོངས་པ་གཞི་བཞག་སྟེང་སྐབས་དེར་ལྷམ་དོག་པ་ཞེས་གོམ་པ་མང་པོ་རྒྱག་པའི་དུས་ཁྲག་རང་བཞིན་འཁྲུགས་ཡོད་པའི་སྟེང་ལྷམ་གྱིས་བཙིར་བས་ཁྲག་འཁོར་རྒྱུགས་ཀྱི་གེགས་བྱས་པས་རྐྱེན་ཙམ་དུ་བཞག་པར་སྙམ་མོ། །དེ་བཞིན་བོད་ཀྱི་གསོ་རིག་ལས་དྲེག་ནད་ཀྱི་རྒྱུ་ནི་ཁྲག་རང་ཡིན་པ་གསལ་པོ་བསྟན་པ་དང་།

ཁྲག་ལ་ཡང་རྣམ་པ་མ་གྱུར་བའི་སྐབས་སུ་ལུས་འཚོ་ཞིང་གནས་པའི་ལས་བྱེད་པ་དང་། རྣམ་པ་མ་གྱུར་བའི་སྐབས་སུ་ལྡང་ཚད་ཡང་སྙིམ་པ་བདུན་དུ་བཞག་ཡོད། གལ་ཏེ་དེ་ལས་འཕེལ་ཟད་འཁྲུགས་གསུམ་གྱུར་ཚེ་ནད་ཅན་ནམ་ནད་ཀྱི་ངོ་བོ་གྱུར་པ་ངོས་འཛིན་དགོས་སོ། །རྒྱུད་ལས། རྣམ་པ་མ་གྱུར་ནད་ཀྱི་རྒྱུ་འགྱུར་ལ། །རྣམ་གྱུར་མ་སྙམ་ནད་ཀྱི་ངོ་བོ་ཡིན། །ཞེས་གསུངས་པ་དང་། རྒྱུ་རླུང་ཡིན་ཞེས་པ་ནི། རྒྱུད་ལས། རླུང་ནི་ཚ་གྲང་གཉིས་ཀའི་ཁྱབ་བྱེད་ཏེ། །ཉི་མ་ལྡན་ན་ཚ་བའི་གྲོགས་བྱེད་ལ། །ཟླ་བ་ལྡན་ན་བསིལ་བའི་གྲོགས་བྱེད་འགྱུར། །

ཞེས་གསུངས་སོ། །ཡང་རླུང་ནི་སྣ་འདྲེན་མཇུག་སྡུད་འཐོར་དང་ཁྱབ་པར་བྱེད། །རང་རྒྱུད་རྩུབ་ཅིང་ནད་མང་འཁྲུགས་པའི་ཕྱིར། །ཐོག་མར་རླུང་གི་བཅོས་ཐབས་བཤད་པར་བྱ། །གསུངས་པ་བཞིན་རླུང་ནི་གང་ལའང་མ་ཁྱབ་པ་མེད་པས་རྣམ་པ་མ་གྱུར་པའི་སྐབས་སུ་རྩ་བའི་རླུང་ལྔའི་བྱེད་ལས་ཀྱིས་ཟ་ཉལ་འགྲོ་འདུག་སྤྱོད་ལམ་རྣམ་བཞིའི་ལས་གཙོ་བོ་བྱེད་ཀྱི་ཡོད་ལ། སྐབས་དེ་ལྡང་ཚད་ཡང་ལྒང་ཕུག་གང་གི་ཚད་དུ་གནས་ཡོད། སྙིང་བསྡུས་ལས། མི་ཡི་ཁྲག་ནི་འཁྲུགས་འགྱུར་ཞིང་། །རླུང་སྐྱེད་ཟོས་པས་རླུང་གི་ནི། །འཕེལ་བས་འཁྲུགས་ཏེ་ལམ་གཞན་ཞུགས། །དེ་བཞིན་ཁྲག་ཀྱང་ལམ་འགགས་ལ། །དང་པོ་གནོད་པ་འགྱུར་བ་ཡིན། །ཞེས་གསུངས་སོ། །

མདོར་ན་དྲེག་ནད་ཀྱི་རྒྱུ་ནི་རླུང་ཁྲག་གཙོ་བོ་ཡིན་པ་གཞི་བཞག་སྟེང་རེ་འགས་ཆུ་སེར་གསུངས་པ་ནི་ཁྲག་དང་ལྷན་དུ་ཡོད་པའི་ཆུ་སེར་ལ་ངོས་འཛིན་དགོས་པ་སྙམ་ལ། རྒྱུད་ལས། རྙིང་ནས་དྭངས་མ་འདྲིལ་ཟགས་བྱེར་འགྱིང་བཞི། །བྱེར་བས་དུག་མཛེར་མེ་དབལ་འོར་དུ་ལྷུང་། །འབྲས་དང་སུར་ཡ་དྲེག་དང་གྲུམ་བུ་དང་། །ཞེས་གསུངས་པ་མ་ཞུ་བའི་སྐབས་སུ་ཁ་གསལ་པོ་གསུངས་པ་དྭངས་མ་ཞུ་བ་དེས་རྒྱུ་བྱས་པས་དྲེག་ནད་འབྱུང་བ་ཚིག་ཟིན་དངོས་སུ་བསྟན་མེད་ལ། འོ་ན་དྲེག་ནད་ཀྱི་རྒྱུ་ཁྲག་ཡིན་པ་ལས་དྭངས་མ་ཡིན་ཞེས་མི་གསུངས་དོན་ཅི་ཡིན་ཞེ་ན། ཁ་ཟས་བཟའ་བཏུང་གང་བྱས་པ་དེ་དག་དྭངས་མ་ལེན་པའི་རྩ་ལམ་དག་བརྒྱུད་ནས་མཆིན་པའི་གནས་སུ་འགྲོ་བ་དང་། མཆིན་པའི་གནས་སུ་མཁྲིས་པ་མདངས་བསྒྱུར་གྱི་བྱེད་ལས་ལ་བརྟེན་ནས་ཁྲག་གི་ཁ་དོག་དམར་པོ་བསྒྱུར་གྱི་ཡོད་ལ། སྐབས་འདིར་དྭངས་མ་མ་ཞུའི་རྒྱུ་དེ་མཆིན་གནས་སུ་ཁྲག་འགྱུར་སྐབས་ཚ་སྐྱུར་ཟས་རིགས་འཕྲད་ཚེ་ལྷག་པར་ཁྲག་ངན་རྒྱས་ཏེ་རྣམ་གྱུར་དྲེག་གི་ནད་བསྐྱེད་པ་ཡིན་པས་དྲེག་ནད་ཀྱི་རྒྱུ་ཁྲག་བཞག་པའི་རྒྱུ་མཚན་ཡང་དེ་ལྟར་ཡིན་པར་འདོད་དོ། །དེ་མིན་དམིགས་བསལ་གྱི་རྐྱེན་ལ་ཁྲག་ངན་རྒྱས་པ་དང་། མཁལ་ནད། མཆིན་ནད་ལེབ་བརྒན་རྒྱས་པའི་ནད། གཅིན་སྙི་ཟ་ཁུའི་ནད་སོགས་བླ་གཉན་གྱི་ཚུལ་དུ་བསྐྱེད་པ་སྟེ་རྐྱེན་དང་། 呋塞米དང་氢氯噻嗪སོགས་ཆུ་སྨན་རིགས་དང་། 硝苯地平དང་། 氨氯地平སོགས་ཁྲག་རྩ་འབྱེད་པར་བྱེད་པའི་སྨན། 阿司匹林དང་异烟胫སོགས་གཉན་ཚད་སེལ་བའི་སྨན་བསྟེན་དྲགས་པས་དྲེག་ནད་བསྐྱེད་པ་མཐོང་མང་འདུག་ལ་གྱུར་ཚུལ་ནི་གོང་གི་བཤད་པའི་རླུང་ཁྲག་འཁྲུགས་སྟེ་ལག་པའི་གྲུ་མོ་དང་རྐང་པའི་མཐེབ་མོར་གཙོ་བོར་གནས་པ་ཁྲག་གི་ནང་དུ་དྭངས་སྙིགས་ལེགས་པར་ཕྱེ་མ་ཐུབ་པའི་སྙིགས་མ་དག་ཚིག་ཆེན་ནས་ཚིག་ཆུང་བར་དུ་ཚུལ་བཞིན་རྒྱུ་མ་ཐུབ་པས་གནས་དེར་དམིགས་བསལ་ནད་ཀྱི་ལྡང་བའོ། །

གཉིས་པ། ནུབ་ལུགས་གསོ་རིག་གི་དྲེག་ནད་རྒྱུ་རྐྱེན་དང་གྱུར་ཚུལ།

དེང་རབས་གསོ་རིག་གིས་དྲེག་ནད་ཀྱི་རྒྱུ་ནི་ཕེའུ་ལིང་嘌呤ཞེས་པ་ཁྲག་གི་ནང་གྲུབ་ཆ་དེ་ཡིན་ལ། དེ་ནི་རང་གི་ལུས་ལ་རང་བཞིན་ཡོད་པ་ཞིག་རེད་ལ། ཕྱི་ཡི་ཆུ་གནས་སྲོག་ཆགས་སོགས་ཀྱི་ཤའི་ནང་གཙོ་བོ་ཡོད་པའི་དངོས་པོའི་གྲུབ་ཆ་ཞིག་ཡིན་པས་དེ་དག་གི་ཤ་སོགས་ཟོས་པས་嘌呤གི་གྲུབ་ཆ་དེ་དག་གཅིན་ནང་ཚད་ལྡན་འཁོར་རྒྱུག་གིས་ཕྱི་དོར་མ་ཐུབ་པས་དྲེག་ནད་ཀྱི་རྒྱུ་ཡིན་པ་དེ་འཕེལ་བས་ལྷན་གཅིག་བསྐྱེད་པའི་རྐྱེན་ཡིན་པ་དང་། བོད་ལུགས་གསོ་རིག་ལས་ཁྲག་ངན་ཞེས་པ་གཉིས་གཅིག་སྤྱིར་ཁྲག་ན་ཡོད་པ་འདྲ་རུང་བྱེ་བྲག་嘌呤དེས་གཅིན་སྐྱུར་ཀྱི་ཚད་གཞི་མཐོན་པོ་ཆགས་པས་དྲེག་ནད་སློང་རྐྱེན་ཡིན་པ་ནུབ་ལུགས་པས་གཅིན་སྐྱུར་འཕེལ་བ་（高尿酸症）ཞེས་པ་འདི་འཕེལ་མེད་ན་དྲེག་ནད་ལ་བཞག་རྒྱུ་མེད་པ་འདི་ནི་དཔྱད་པ་བྱ་གཞིའི་ཡུལ་དུ་གྱུར། གཅིན་སྐྱུར་དུས་ཡུན་རིང་པོ་ཚད་ལས་འཕེལ་བས་མཁལ་མའི་གནས་སུ་དྭངས་སྙིགས་ལེགས་པོ་ཕྱེ་མ་ཐུབ་པ་དང་ཁྲག་རླུང་སོགས་ནད་རིགས་གཞན་གྱི་བླ་གཉན་ལས་བྱུང་བ་མདོར་ན་རྫས་འགྱུར་བརྟག་འབྲས་ལས་གཅིན་སྐྱུར་ལྡང་ཚད་རྟེན་ཕོ་དར་མ་ལ་208-416རྟེན་མོ་དར་མ་ལ་149-358ཡན་མན་རྒྱུན་ལྡན་ཡིན་པ་དྲྭ་ཚིགས་ལས་བཤད་འདུག་ལ། དེ་མཐོ་དམན་གྱིས་དྲེག་ནད་ངོས་འཛིན་ཡིད་རྟེན་བྱེད་སའི་གཞི་བཅོལ་བ་རེད། ནད་གཞི་གྱུར་ཚུལ་ནི་ཐོག་མར་ཁྲག་བསྐྱེད་པ་ནས་རིམ་བཞིན་ཚིགས་གཞི་དང་ཆུ་རྒྱུས་སོགས་ལ་ཞེན་ནས་གཟེར་ཟུག་དྲག་པོ་ལྡང་བ་དང་། མཐར་རྙིང་པ་གྱུར་ཚེ་ཕྱིའི་ཚིགས་གཞི་དེ་དག་གི་གནས་སུ་རྡོག་རྡོག་ཆགས་པ་ནང་དུ་དཀར་པོ་རྡོ་ཞོ་འདྲ་བ་དང་། འགའ་རེར་བཙོ་མ་ལྟ་བུའི་མང་པོ་མཉམ་དུ་ཆགས་པ། རེ་འགའ་རྣག་ཏུ་ཁུག་པ་བཅས་འབྱུང་འདུག་ལ། དེའི་རྐྱེན་གྱིས་ནང་དུ་མཁལ་ནུས་ཉམས་པ་དང་། མིག་གིས་མི་མཐོང་བ། རྣ་བ་འོན་པ་བཅས་བླ་གཉན་གྱི་ནད་དུ་མ་འབྱུང་བཞིན་ཡོད་པའོ། །

གསུམ་པ། དབྱེ་ཞིབ་ཕྱོགས་བསྡོམས།

དཔེར་ན་སྔོན་ང་ཚོའི་སྨན་ཁང་དུ་དྲེག་ནད་ཀྱི་རྟགས་ཡོད་པའི་ནད་པ་བཅུ་ལ་བོད་ལུགས་གསོ་རིག་གིས་བལྟ་རེག་དྲི་གསུམ་གྱིས་དྲེག་ནད་ངོས་འཛིན་པ་དང་། ནུབ་ལུགས་ཀྱི་གཅིན་སྐྱུར་རྫས་འགྱུར་བརྟག་དཔྱད་བྱས་པ་བརྒྱུད། ནད་པ་བདུན་ལ་གཅིན་སྐྱུར་ཚད་ལས་བརྒལ་བ་དང་དྲེག་ནད་ཀྱི་རྟགས་ཡོད་པས་དྲེག་ནད་ཡིན་པ་ར་སྤྲོད་བྱུང་ལ། ནད་པ་གསུམ་ལ་གཅིན་སྐྱུར་བརྟག་འབྲས་ཚད་ལྡན་ཡིན་ཡང་དྲེག་ནད་ཀྱི་རྟགས་ཡོད་པ་རེད་འདུག །བོད་ཀྱི་གསོ་རིག་ལས་ཕྱི་རྟགས་སློང་བ་རྒྱུས་བརྟག་པ་དང་། ནང་རྟགས་མཚན་ཉིད་རྟགས་ཀྱི་བརྟག་པ། གསང་བརྟག་ཕན་གནོད་གོམ་པའི་སྒོ་ནས་བརྟག་དཔྱད་བྱས་པ་བརྒྱུད་དྲེག་ནད་ཀྱི་རྟགས་ཡང་དག་འདུག་པར་བོད་ལུགས་གསོ་རིག་ལས་དྲེག་ནད་ཀྱི་ངོས་འཛིན་བྱེད་ཆོག་ལ། ནུབ་ལུགས་པས་ཁས་རྩ་བ་ནས་ལེན་གྱི་མེད། དེ་ཕྱིར་དྲེག་གི་ནད་ལ་རྫས་འགྱུར་བརྟག་འབྲས་ཀྱི་གཅིན་སྐྱུར་70%ར་སྤྲོད་བྱུང་ལ་30%རྫས་འགྱུར་བརྟག་འབྲས་ནང་གཅིན་སྐྱུར་ཚད་ལྡན་ཡིན་ཡང་ནད་པར་དྲེག་གི་ནད་རྟགས་ཡོངས་སུ་ཡོད་པས་གཅིན་སྐྱུར་མཐོ་དམན་ཁོ་ནས་དྲེག་ནད་ཡིན་མིན་ར་སྤྲོད་བྱེད་ཐུབ་ཀྱི་མི་འདུག་ལ་དེང་རབས་རྫས་འགྱུར་བརྟག་ཐབས་ལེགས་པོ་ཡོད་ནའང་འདི་ལྟ་བུ་ཉམས་ཞིབ་བྱས་ཚེ་གནད་དོན་མི་ཉུང་བ་ཞིག་འདུག་པས་དྲེག་ནད་ན་བའི་དུས་ཡུན་དང་འཚོ་བའི་གོམས་གཤིས་འཚོ་གནས་བྱ་ཡུལ་སྨན་རིགས་བསྟེན་མིན་གསོ་བྱའི་རང་བཞིན་སོགས་ལ་དཔྱད་ཞིབ་བྱས་པ་བརྒྱུད། དེ་སྔོན་ལག་ལེན་ཁྲོད་ཀྱི་ཐེེ་ཚོམ་ཡོད་པ་ནད་ཐོག་དངོས་ཀྱིས་ཕན་འབྲས་ལ་གཞི་བཅོལ་ནས་ར་སྤྲོད་བྱ་ཁུལ་བྱས་ཀྱང་། ནད་པའི་གྲངས་ཀ་ཉུང་བ་དང་།

དུས་ཡུན་ཐུང་བ་རང་ཉིད་ཀྱི་མྱོང་བ་ཞན་པ་བཅས་ཀྱི་ཡིན་ཀྱང་སྲིད་པས་སླད་མུ་མཐུད་གོམ་གང་མདུན་སྤོས་ཀྱིས་གཏིང་ཟབ་པའི་སྒོ་ནས་ཞིབ་དཔྱད་བྱ་རྒྱུའི་ཆོད་སེམས་བརྟན་པོ་ཡོད། །