ཁྲིམས་རའི་རྒྱ་བོད་སྐད་གཉིས་ཀྱི་ལོ་ཙཱའི་གནད་དོན་དང་དངོས་གཞིའི་ཁྲིམས་རིག་པའི（བོད་རྒྱ་སྐད་གཉིས）ཆེད་ལས་ཀྱི་འཛུགས་སྐྱོང་གླེང་བ།

（དེབ་སྔོན་མར་མཐུད）

གསུམ། བཅའ་ཁྲིམས་ལོ་ཙཱའི་ཚད་གཞི་གཅིག་གྱུར་མིན་པ།

མི་འབོར་འཁོར་རྒྱུག་མང་ལ་གྲོང་ཁྱེར་ཅན་གྱི་འཕེལ་རྒྱས་མགྱོགས་ཤིང་། གྲོང་ཁྱེར་ནང་གྲམ་སྡོད་བྱས་པའི་གྲངས་ཉུང་མི་རིགས་ཀྱི་མི་འབོར་རྒྱུན་བཞིན་འཕར་བ་དང་འཁོར་རྒྱུག་མང་བར་བརྟེན། བཅའ་ཁྲིམས་ལོ་ཙཱའི་ཚད་གཞི་གཅིག་གྱུར་མེད་པས་ཁྲིམས་རའི་འདྲི་གཅོད་སོགས་ཀྱི་ལོ་ཙཱ་ནི་ལག་ལེན་ཁྲོད་དུ་ཡང་དག་འོང་བར་ཁག་པོ་ཡོད། ཤེས་གསལ་ལྟར། རང་རྒྱལ་གྱི་བོད་འབྲེལ་ས་ཁུལ་དུ་བཅའ་ཁྲིམས་ལོ་ཙཱའི་དཔར་གཞི་མང་པོ་ཡོད། བོད་རང་སྐྱོང་ལྗོངས་སུ་བོད་རང་སྐྱོང་ལྗོངས་མི་དམངས་ཞིབ་དཔྱོད་ཁང་གིས་སྒྲིག་སྒྱུར་མཛད་པའི《རྒྱ་བོད་ཁྲིམས་ལུགས་ཚིག་མཛོད་ཆེན་མོ》ཚད་གཞིར་འཛིན། ཚིག་མཛོད་འདི་ནང་ཁུལ་གྱི་དཔྱད་གཞིའི་ཡིག་ཆའི་རྣམ་པའི་ཐོག་ནས་བོད་འབྲེལ་ས་ཁུལ་ཐུན་མོང་དུ་སྤྱོད་མེད། མཚོ་སྔོན་ཞིང་ཆེན་གྱིས་མཚོ་སྔོན་དགེ་ཐོན་སློབ་ཆེན་ཁྲིམས་རིག་པ་དང་སྤྱི་ཚོགས་རིག་པ་སློབ་གླིང་གིས་ཡིག་སྒྱུར་དཔེ་སྐྲུན་བྱས་པའི་ཁྲིམས་རིག་པའི་བསླབ་གཞི་དག་ལོ་ཙཱའི་ཚད་གཞིར་འཛིན། ཀན་སུའུ་ཞིང་ཆེན་གྱིས་ཀན་སུའུ་ཞིང་ཆེན་ཁྲིམས་དཔོན་སློབ་གླིང་འབྲུག་ཆུའི་ཡན་ལག་སློབ་གླིང་གི་ལས་དོན་མི་སྣས་ཡིག་སྒྱུར་དཔེ་སྐྲུན་བྱས་པའི་བོད་རྒྱ་སྐད་གཉིས་ཀྱི་ཁྲིམས་དཔོན་གསོ་སྦྱོང་གི་བསླབ་གཞི་ལ་ཚད་གཞིར་འཛིན། དེར་བརྟེན་པར་གཞི་ཁག་དབར་ཆེད་ལས་ཐ་སྙད་ཁ་ཤས་དང་དེ་བཞིན་ལྟེ་བའི་གནད་དོན་གྱི་ལོ་ཙཱ་གཅིག་གྱུར་བྱུང་མེད།

བཅའ་ཁྲིམས་ལོ་ཙཱའི་ཚད་གཞི་གཅིག་གྱུར་མེད་པའི་གནད་དོན་ཚད་ལྡན་དུ་གཏོང་ཆེད། ངེས་པར་དུ་དངོས་གཞིའི་ཁྲིམས་རིག་པ（བོད་རྒྱ་སྐད་གཉིས）ཆེད་ལས་བསླབ་དེབ་ལོ་ཙཱ་བྱ་རྒྱུ་ནས་འགོ་འཛུགས་དགོས། ལས་དོན་དེ་ལེགས་སྒྲུབ་བྱེད་པའི་སྔོན་འགྲོའི་ཆ་རྐྱེན་ནི་བོད་ཁུལ་ཐུན་མོང་དུ་སྤྱོད་པའི"རྒྱ་བོད་སྐད་གཉིས་ཀྱི་བཅའ་ཁྲིམས་ཚིག་མཛོད་ཆེན་པོ་རྩོམ་སྒྲིག་བྱས་ཏེ་ཆེད་ལས་ཐ་སྙད་ཚད་ལྡན་དུ་གཏོང་བ་དང་། དངོས་གཞིའི་ཁྲིམས་རིག་པའི་བསླབ་དེབ་ཆ་ཚང་ལོ་ཙཱ་བྱེད་དགོས། རྒྱུ་མཚན་ནི་དངོས་གཞིའི་ཁྲིམས་རིག་པ（བོད་རྒྱ་སྐད་གཉིས）ཆེད་ལས་ཀྱི་སློབ་མས་གཅིག་གྱུར་དུ་ཕྱོགས་བསྒྲིགས་བྱས་པའི་བོད་ཡིག་པར་གཞིའི་བསླབ་དེབ་སློབ་སྦྱོང་དང་བེད་སྤྱོད་བྱས་ན། ལོ་ཙཱའི་འགལ་བ་དང་ལོ་ཙཱ་ལ་གནད་དོན་རེ་ཟུང་ཡོད་ནའང་སློབ་མ་སྤྱི་ཚོགས་ཐོག་བསྐྱོད་པ་དང་བཅའ་ཁྲིམས་ལས་དོན་བསྒྲུབས་རྗེས་ཁྱབ་སྤེལ་བྱས་ན་ཡོངས་ཁྱབ་ངང་དང་ལེན་དང་བེད་སྤྱོད་བྱེད་སྲིད། དེ་ལྟར་བྱས་ན་གཞི་ནས་བཅའ་ཁྲིམས་ལོ་ཙཱ་ཚད་ལྡན་དང་གཅིག་གྱུར་འོང་བར་འགན་སྲུང་བྱེད་ཐུབ། དེ་མ་གཏོགས་སྐད་གཉིས་ཆེད་ལས་དེ་མདུན་སྐྱོད་ཀྱི་ཤུགས་མེད་པར་མ་ཟད། ཁྲིམས་རའི་ལོ་ཙཱའི་གནད་དོན་ཡང་མང་པོ་འབྱུང་སྲིད།

བཞི། ལོ་ཙཱ་བའི་འགན་འཁྲིའི་ལམ་སྲོལ་འཐུས་ཚང་མིན་པ།

ཁྲིམས་རའི་ལོ་ཙཱ་བ་ཞིག་ཡིན་པའི་ངོས་ནས་བར་གནས་དང་།

དྲང་གཞག །དྲང་བདེན་བཅས་ཀྱི་རྣམ་འགྱུར་རྒྱུན་འཁྱོངས་དང་། གཟབ་ནན་དང་དོན་དངོས་གྱི་ཐོག་ནས་གཏུག་བཤེར་ཞུགས་མཁན་ལ་ཆེད་ལས་རང་བཞིན་གྱི་བཅའ་ཁྲིམས་ལོ་ཙཱ་གནང་དགོས་པ་ལས། དོན་དངོས་ཀྱི་གོ་དོན་ལ་རྐང་བཙུགས་ནས་འཁྱོག་བཤད་དང་རྫུན་སྨྲས་ཚེ་དེ་མཚུངས་ཀྱི་བཅའ་ཁྲིམས་འགན་འཁྲི་འཁུར་དགོས། དེའི་ཐད་རང་རྒྱལ་གྱི《ཉེས་ཁྲིམས》ཀྱི་དོན་ཚན་སུམ་བརྒྱ་དང་ལྔ་པའི་གཏན་འབེབས་ལྟར། ལོ་ཙཱ་བས་ཉེས་དོན་གཏུག་བཤེར་ཁྲོད་རྫུན་སྨྲས་ཚེ་ཉེས་དོན་འགན་འཁྲི་འཁུར་དགོས། གཏན་འབེབས་དེ་ནི་རྐང་བཙུགས་ནས་དོན་དངོས་དང་འགལ་བའི་ལོ་ཙཱ་བྱས་པས་འཁུར་དགོས་པའི་འགན་འཁྲི་ཁོ་ན་ལས་གནས་ཚུལ་གཞན་པའི་ལོ་ཙཱའི་གནད་དོན་ཐོན་པར་གཏན་འབེབས་བྱས་མེད་ལ། 《དམངས་དོན་གཏུག་བཤེར་བཅའ་ཁྲིམས》དང《སྲིད་འཛིན་གཏུག་བཤེར་བཅའ་ཁྲིམས》ཁྲོད་དུ་ཡང་རྫུན་སྨྲས་ནས་ལོ་ཙཱ་བྱས་པའི་སྐོར་གྱི་གཏན་འབེབས་གང་ཡང་མེད། དེའི་རྐྱེན་གྱིས་ལོ་ཙཱའི་ལས་ཀ་གཟབ་ནན་དང་ཞིབ་ཚགས་མེད་པ་དང་།

གང་འདོད་ལྟར་བཅའ་ཁྲིམས་ཀྱི་ཡིག་ཆ་ལོ་ཙཱ་བྱས་པས་ལྡོག་ཕྱོགས་ཀྱི་ཤུགས་རྐྱེན་དང་ཚོད་འཛིན་མང་པོ་བཟོས། དེར་བརྟེན་ཁྲིམས་འཛུགས་ཐད་ལོ་ཙཱ་བའི་འགན་འཁྲི་དང་འགན་འཁྲི་བདའ་འདེད་ལམ་སྲོལ་གསལ་པོ་བྱེད་པ་ནི་ཁ་ཚ་དགོས་གཏུགས་ཤིག་གོ །

ལྔ། གཅིག་གྱུར་གྱི་ལོ་ཙཱའི་འགྲོ་གྲོན་ལམ་ལུགས་མེད་པ།

གཅིག་གྱུར་དང་ལུགས་མཐུན་གྱི་ལོ་ཙཱའི་འགྲོ་གྲོན་ལམ་ལུགས་མེད་པས། ཁྲིམས་འཛིན་ལག་ལེན་ཁྲོད་ས་ཁུལ་གཅིག་པའི་ཁྲིམས་འཛིན་ལས་ཁུངས་ཀྱིས་ལོ་ཙཱ་བའི་འགྲོ་གྲོན་མི་འདྲ་ལ། ཁྲིམས་འཛིན་ལས་ཁུངས་ཀྱིས་ཐད་ཀར་ལོ་ཙཱའི་འགྲོ་གྲོན་གཏོང་བའི་བྱེད་སྟངས་དེས་ཀྱང་ཁྲིམས་ཁང་གི་ལས་ཀའི་ཆེད་དུ་ཡིན་པའི་འདུ་ཤེས་ཀྱི་སེམས་ཁམས་ཤུགས་ཀྱིས་འབྱུང་བ་དང་། ལོ་ཙཱ་བ་རང་ཚུགས་ཀྱིས་གཏུག་བཤེར་ལ་ཞུགས་པའི་གཏུག་བཤེར་གནས་བབ་དང་ནང་བརྙན་ལ་ཡང་གནོད་ཀྱི་ཡོད།

གསུམ་པ། ཁྲིམས་རའི་ལོ་ཙཱའི་ལམ་སྲོལ་འཐུས་ཚང་གཏོང་བའི་བསམ་གཞིག་འགའ།

གཅིག དངོས་གཞིའི་ཁྲིམས་རིག་པའི（བོད་རྒྱ་སྐད་གཉིས）ཆེད་ལས་ལམ་སྲོལ་ཆ་ཚང་གཏོང་བ།

ཁྲིམས་རའི་ལོ་ཙཱའི་གནད་དོན་དག་ཐག་གཅོད་པའི་གནད་འགག་ནི་སྐད་གཉིས་ཁྲིམས་དཔོན་གསོ་སྐྱོང་བྱེད་པའི་གནད་དོན་ཡིན། གནད་དོན་དེ་ཐག་གཅོད་བྱེད་པར་ཆེས་ནུས་ལྡན་གྱི་ཐབས་ལམ་ལེགས་ཤོས་ནི་དངོས་གཞིའི་ཁྲིམས་རིག་པའི（བོད་རྒྱ་སྐད་གཉིས）ཆེད་ལས་ལམ་སྲོལ་འཐུས་ཚང་གཏོང་བ་དང་སྐད་གཉིས་ཁྲིམས་རིག་པའི་ཆེད་ལས་ཕུལ་བྱུང་སློབ་མ་གསོ་སྐྱོང་བྱས་ཚེ་ངོ་བོའི་ཆ་ནས་སྐད་གཉིས་ཁྲིམས་དཔོན་དང་ཁྲིམས་རའི་ལོ་ཙཱ་བ་དཀོན་པའི་གནད་དོན་ཐག་གཅོད་ཐུབ། རྒྱུ་མཚན་ནི་མ་ལག་ལྡན་ཞིང་ཆེད་ལས་ཀྱི་སྐད་གཉིས་ཁྲིམས་རིག་པའི་རྒྱབ་ལྗོངས་ཡོད་པའི་སློབ་མ་བྱུང་རྗེས་ད་གཟོད་མི་རིགས་ས་ཁུལ་གྱི་སྐད་གཉིས་ཁྲིམས་དཔོན་གྱི་ལས་གནས་སྐོང་བའི་མཛོད་དུ་འགྱུར། ཡུན་ཐུང་ལ་གནས་སྐབས་རང་བཞིན་གྱི་སྐད་གཉིས་ཁྲིམས་དཔོན་སྦྱོང་བརྡར་བྱས་ཀྱང་རྩ་བའི་གནད་དོན་ཐག་གཅོད་བྱ་མི་ཐུབ།

གཉིས། ཁྲིམས་རའི་ལོ་ཙཱའི་ལམ་ལུགས་འཐུས་ཚང་འཛུགས་པ།

རང་རྒྱལ་གྱི་ཁྲིམས་རའི་འདྲི་གཅོད་བརྒྱུད་རིམ་ཁྲོད་ཡོངས་ཁྱབ་ཏུ་ནོར་བ་འདི་འདྲ་ཞིག་ཡོད་སྟེ། ཁྲིམས་རའི་ལོ་ཙཱ་བར་གཞན་གྱིས་མཐོང་ཆུང་བྱེད་སླ་ལ། ཁྲིམས་རའི་འདྲི་གཅོད་བརྒྱུད་རིམ་ཁྲོད་དུ་ལོ་ཙཱ་བ་ནི་ཡོ་བྱད་ཁོ་ན་ཡིན་པར་འདོད། ཉེས་བགྲང་པ་དང་། དག་འབུད་མཁན། འདྲི་གཅོད་ཕྱོགས་གསུམ་གྱིས་ལོ་ཙཱའི་ལས་དོན་ལ་ངོས་འཛིན་འདང་ངེས་མེད་པ་དང་ལོ་ཙཱ་བའི་ཡང་སྙིང་མ་རྟོགས་པས། ལོ་ཙཱའི་ལས་དོན་ནི་ནུས་མཐུ་ཆེ་བའི་ལས་དོན་ཞིག་ཡིན་པར་བསམ་གཞིག་བྱས་མེད། དེར་བརྟེན་ཁྲིམས་འཛུགས་སྐབས་གྲངས་ཉུང་མི་རིགས་ཀྱི་ལོ་ཙཱ་བའི་གོ་གནས་གཏན་འབེབས་ཁ་གསལ་བྱེད་དགོས། དཔེར་ན་ཆེད་གཉེར་གྱི་ལོ་ཙཱ་བའི་ལས་གནས་འཛུགས་པ་དང་། བབ་མཚུངས་ཀྱི་བཅའ་ཁྲིམས་ཁེ་དབང་དང་བཅའ་ཁྲིམས་འོས་འགན་གཏན་འབེབས་གསལ་པོ་བྱེད་དགོས། དེ་ལྟར་བྱས་པས་ལོ་ཙཱ་བའི་ཁེ་དབང་འགན་སྲུང་དང་། བཅའ་ཁྲིམས་ཁེ་དབང་སྲུང་སྐྱོབ། ལོ་ཙཱའི་ལས་ཆོད་ཆེ་རུ་གཏོང་ཐུབ།

གསུམ། བཅའ་ཁྲིམས་ལོ་ཙཱ་བའི་ཐོབ་ཐང་ཆོག་འཐུས་ལམ་ལུགས་འཛུགས་པ།

བཅའ་ཁྲིམས་ལོ་ཙཱ་བའི་ཐོབ་ཐང་ཆོག་འཐུས་ལམ་ལུགས་སྐོར་ལ་ཕྱི་གླིང་དུ་ཉམས་མྱོང་ཕུན་སུམ་ཚོགས་པ་ཡོད་པས་ཟུར་དཔྱད་བྱས་ཆོག་སྟེ། དཔེར་ན། ཨ་མེ་རི་ཁའི་རྒྱལ་ཕྲན་མཉམ་འབྲེལ་ཁྲིམས་རའི་ངག་ཐོག་ལོ་ཙཱ་བའི་ཐོབ་ཐང་རྒྱུགས་ལེན་དང་། ཉི་ཧོང་གི་ཁྲིམས་འཛིན་ཡིག་སྒྱུར་མཐུན་ཚོགས་རྩ་འཛུགས། ཨོ་སི་ཁྲུ་ལི་ཡའི་གཞུང་ཕྱོགས་ལས་ཁུངས་ཀྱིས་ཁྲིམས་རའི་ལོ་ཙཱ་བའི་ཐོབ་ཐང་ཁས་ལེན་གྱི་མ་དཔེ་ལྟ་བུ་རེད།

བཅའ་ཁྲིམས་ལོ་ཙཱའི་དཀའ་གནད་དང་རེ་འདུན་མཐོ་བས། ངེས་པར་དུ་བཅའ་ཁྲིམས་ལོ་ཙཱ་བའི་ཐོབ་ཐང་ཆོག་འཐུས་ལམ་ལུགས་བཙུགས་ནས། བཅའ་ཁྲིམས་ལོ་ཙཱ་ནོར་འཁྲུལ་ཅན་དང་། ཚད་ལྡན་མིན་པའི་སྣང་ཚུལ་གཏན་དུ་སེལ་དགོས། དེ་ཡང་རིགས་གཉིས་ཀྱི་ལམ་ནས་ལམ་ལུགས་འདི་འཛུགས་ཆོག

༡ དངོས་གཞིའི་ཁྲིམས་རིག་པའི（བོད་རྒྱ་སྐད་གཉིས）ཆེད་ལས་ཀྱི་མཐར་ཕྱིན་སློབ་མར་མཚོན་ན། སློབ་སྐར་ནི་མཐར་ཕྱིན་དང་ལག་ལེན་གྱི་རེ་འདུན་དང་མཐུན་པས་བཅའ་ཁྲིམས་ལོ་ཙཱ་བའི་ཐོབ་ཐང་དཔང་ཡིག་གནང་ཆོག །རྒྱུ་མཚན་ནི་མིག་སྔའི་དངོས་གཞིའི་ཁྲིམས་རིག་པའི（བོད་རྒྱ་སྐད་གཉིས）ཆེད་ལས་བསླབ་ཚན་དང་གསོ་སྐྱོང་དམིགས་འབེན་ལ་བལྟས་ན། བཅའ་ཁྲིམས་ལོ་ཙཱའི་བསླབ་ཚན་དང་། ཁྲིམས་འཛིན་ཡིག་རིགས་ལོ་ཙཱའི་བསླབ་ཚན་ཡོད་པ་མ་ཟད། ངག་ཐོག་ལོ་ཙཱའི་སྦྱོང་བརྡར་བསླབ་ཚན་ཁ་སྣོན་བྱས་པས། མཐར་ཕྱིན་སློབ་མའི་སྐད་གཉིས་ལོ་ཙཱའི་ནུས་པ་ཁོང་དུ་ཆུད་པ་དང་། གསོ་སྐྱོང་ནུས་པ་མངོན་འགྱུར་བྱུང་ཡོད།

༢ མིག་སྔར་རང་རྒྱལ་གྱི་བོད་འབྲེལ་ས་ཁུལ་དུ་བོད་ཡིག་གིས་བཅའ་ཁྲིམས་ཀྱི་ལས་རིགས་ཐོབ་ཐང་རྒྱུགས་ལེན་ལག་བསྟར་བྱེད་མུས་ཡིན་ལ། རྒྱུགས་གཞི་བོད་ཡིག་ཡིན་ལ། རྒྱུགས་ལན་ཡང་བོད་ཡིག་ཡིན་དགོས་པས། ཡིག་ཚད་ལོངས་མཁན་ལ་བཅའ་ཁྲིམས་ལོ་ཙཱའི་ཐོབ་ཐང་དཔང་ཡིག་གནང་ཆོག

བཞི། བཅའ་ཁྲིམས་ལོ་ཙཱ་བའི་ཁེ་དབང་དང་འོས་འགན་གསལ་པོ་བྱེད་པ།

བཅའ་ཁྲིམས་ལོ་ཙཱ་བའི་ཁེ་དབང་དང་འོས་འགན་ཁ་གསལ་བཟོས་ན། ཕྱོགས་གཅིག་ནས་བཅའ་ཁྲིམས་ལོ་ཙཱ་བའི་ཁྲིམས་ཀྱི་གནས་བབ་གཏན་འཁེལ་དང་། ཕྱོགས་གཞན་ཞིག་ནས་བཅའ་ཁྲིམས་ལོ་ཙཱ་བའི་ཞིབ་ཕྲའི་ལས་དོན་མ་ལག་ཅན་དུ་གཏོང་བར་ཤུགས་སྣོན་ཐུབ། ལོ་ཙཱ་བ་དང་། ཆོད་སྡོམ་པ། དཔང་མི་ཚང་མ་རང་ཚུགས་ཀྱི་གཏུག་བཤེར་ལ་ཞུགས་མཁན་དུ་གཏོགས་པས། གཏུག་བཤེར་ལ་རམ་འདེགས་གྱི་ནུས་པ་གང་ལེགས་འདོན་བཞིན་ཡོད། ལོ་ཙཱ་བར་ཉེས་དོན་གཏུག་བཤེར་ཁྲོད་རང་ཉིད་ཀྱི་མི་ལུས་བདེ་འཇགས་ལ་འཇིགས་སྐུལ་ཐེབས་དུས། ཁྲིམས་འཛིན་ལས་ཁུངས་ལ་སྲུང་སྐྱོབ་བྱེད་པའི་རེ་ཞུའི་དབང་ཆ་གནང་དགོས། ལོ་ཙཱ་བའི་བྱ་སྤྱོད་ལ་གཅུན་འདོམས་བྱེད་ཆེད་བཅའ་ཁྲིམས་ཀྱི་འོས་འགན་ཁ་གསལ་བྱས་རྗེས། ཚད་མཐོན་པོའི་ངང་ནས་ཁྲིམས་ར་དང་དོ་བདག་གི་བསམ་དོན་མངོན་པར་བྱེད་པའི་འོས་འགན་གཙང་བཞེས་དང་། ལོ་ཙཱ་བྱེད་སྐབས་རྫུན་མི་སྨྲ་བ་དང་དོ་བདག་གི་བསམ་དོན་འཁྱོག་བརྗོད་མི་བྱེད་པ་སོགས་ལོ་ཙཱ་བའི་ཁེ་དབང་དང་འོས་འགན་ནི་ཁྲིམས་འཛུགས་ཐད་ཀྱི་བླང་བྱ་གལ་ཆེན་ཡིན།

ལྔ། གནད་དོན་གཞན་དག་ཐག་གཅོད་པའི་ཇུས་གཞི།

ཁྲིམས་རའི་ལོ་ཙཱའི་འགྲོ་གྲོན་ཚད་གཞིའི་གནད་དོན་ཏེ་རྩོམ་སྒྱུར་ལས་དོན་གྱི་འགྲོ་གྲོན་ཚད་གཞི་གཞིར་བཟུང་ནས་ཁ་གསལ་དུ་གཏོང་བ་དང་། ཁྲིམས་ཁང་གི་ལོ་ཙཱའི་འགྲོ་གྲོན་ནི་བཅའ་ཁྲིམས་ཡིག་སྒྱུར་མཐུན་ཚོགས་བཙུགས་ནས་འགྲོ་གྲོན་སྤྲོད་པའི་ཕྱོགས་སུ་གོམ་ཁ་སྒྱུར་འོས།

ཁྲིམས་རའི་འདྲི་གཅོད་ཁྲོད་ཀྱི་ལོ་ཙཱའི་ནང་དོན་ལ་ཞིབ་བཤེར་ལམ་ལུགས་འཛུགས་པ་དང་ལོ་ཙཱའི་བསམ་འཆར་མི་འདྲ་བར་ཁྲིམས་ཀྱི་སྐྱབས་བཅོལ་གོ་རིམ་འཛུགས་དགོས།

ལོ་ཙཱའི་སྒྲིག་སྲོལ་འཐུས་ཚང་འཛུགས་པའི་ཁོངས་སུ་ཁྲིམས་རའི་འདྲི་གཅོད་བརྒྱུད་རིམ་དུ་ལོ་ཙཱ་བ་ཟུར་གཡོལ་བྱེད་པའི་སྒྲིག་སྲོལ་དང་། ཁྲིམས་རའི་ལོ་ཙཱ་ཁྲིམས་མཐུན་མིན་པས་གོ་མི་ཆོད་པའི་སྒྲིག་སྲོལ། ཁྲིམས་རའི་འདྲི་གཅོད་བརྒྱུད་རིམ་དུ་མི་རིགས་ཀྱི་སྐད་ཡིག་ལྟར་འདྲི་ཞིབ་མ་བྱས་པས་གོ་རིམ་རང་བཞིན་གྱི་ཁྲིམས་སྡོམ་སྒྲིག་སྲོལ་སོགས་ཚུད་ཡོད་དོ། །གོང་གི་གནད་དོན་འདི་དག་ད་རུང་མུ་མཐུད་དུ་ཞིབ་འཇུག་བྱེད་དགོས། །（རྫོགས་སོ།）