ཁ་སང་གི་རྨི་ལམ།

དགོང་ཁའི་ཉི་འོད་ཀྱིས་བགྲེས་པོ་དེའི་གྲིབ་མ་རིང་ནས་རིང་དུ་འཐེན་པ་དང་འདྲ་ཞིང་། གསེར་མདོག་གི་ཉི་འོད་ཀྱིས་ཁང་རྩེག་དང་རླངས་འཁོར། ལམ་འགྲམ་གྱི་ལྕང་སྡོང་། མཐའ་ན་ལམ་འགྲོ་བ་དག་ལ་གསེར་ཆུ་བྱུགས་པ་སེར་ལམ་ལམ་དུ་གཏོང་། བལྟས་ཚོད་ཀྱིས་གསེར་གྱི་བྱེ་མ་རིམ་པ་ཞིག་བྱུགས་པ་དང་འདྲ། བགྲེས་པོས་རིང་དུ་འཐེན་པའི་གྲིབ་མ་དེར་སྤོས་ནས་མདུན་ནས་མདུན་དུ་བསྐྱོད།

གྲིབ་མ་ནི་འཐེན་ཐིགས་ལྟར་རིང་ཞིང་། བགྲེས་པོའི་མི་ཚེ་ཡང་འཐེན་ཐིགས་དང་འདྲ་བར་ཧ་ཅང་སྤྱིར་བཏང་བ་ཞིག་ཡིན། གྲིབ་མ་ནི་རིང་དུ་འཐེན་ཡང་། སྨི10ལས་འདའ་མི་སྲིད། སྤྱིར་ན་སྨི10ཡི་ལམ་ཐག་ཧ་ཅང་ཐུང་བས། བགྲེས་པོས་སྐར་ཆ་འགའི་དུས་ཚོད་ལས་མ་བཀོལ་བར་ལམ་ཐག་དེ་སོང་ཚར་ཆོག ཡིན་ཡང་ཁོའི་གྲིབ་མ་ནི་ཁོར་འགྲོགས་ནས་མདུན་ནས་མདུན་དུ་བསྐྱོད་ཅིང་། དེ་ནི་བགྲེས་པོའི་བསྐྱུར་ཐབས་མེད་པའི་ཆ་ཤས་ཤིག་ཡིན་པས། ཁོ་ལམ་ཐག་དེ་ལས་བརྒལ་མ་ཐུབ།

དགོང་ཁའི་ཉི་འོད་ཀྱིས་དངོས་པོ་མང་པོ་ཞིག་ལ་གསེར་མདོག་བྱུགས་ནའང་། ཉི་འོད་ཀྱིས་བགྲེས་པོའི་མདུན་ཕྱོགས་ཀྱི་གྲིབ་མས་གཡོགས་པའི་ལམ་དེར་ཅིས་ཀྱང་གསེར་མདོག་བྱུགས་མི་ཐུབ། བགྲེས་པོས་གོམ་པ་སྤོ་ཐེངས་རེར། ཉི་འོད་ནི་སྲིབ་ནས་བཞུར་བའི་ཆུ་དང་འདྲ་བར་རྐང་མཐིལ་དང་ས་གཞིའི་བར་ནས་མདུན་དུ་མྱུར་བར་བཞུར་ཡང་། བགྲེས་པོས་རྐང་བ་སར་སྤོས་པ་དང་ལྷན་དུ་འོད་དེ་ཡང་གྲིབ་མས་ཁྱུར་མིད་བྱས་སོང་།

རེད་ཡ། ཉི་མས་འཇིག་རྟེན་ཁམས་ཡོངས་ལ་འོད་སྣང་སྦྱིན་ཐུབ་ཀྱང་། དེ་ཡིས་ཀྱང་སེལ་མི་ཐུབ་པའི་མུན་པ་ནི་ནམ་ཡང་མེད་མི་སྲིད།

ལང་ཚོ་དར་ལ་བབས་པའི་གཞོན་དུས་སུ། ན་གཞོན་དེ་དག་གི་སེམས་སུ་ཕུགས་སེམས་ཀྱི་མེ་ལྕེ་དྲག་ཏུ་འབར་ཞིང་། མེ་ལྕེ་དེས་བསྐུལ་ཏེ། ན་གཞོན་ཚོས་རང་གི་ཕུགས་སེམས་མངོན་འགྱུར་བྱེད་ཆེད་ཡུལ་ལུང་གང་མང་འགྲིམས། ས་དེ་དག་ནས་རང་གཅིག་པུས་བྱ་བ་རླབས་ཆེན་གང་མང་བསྒྲུབ་རྒྱུའི་འཆར་གཞི་ཡང་བཀོད། ཡིན་ཡང་མི་ཚང་མས་རང་གི་ཕུགས་བསམ་དེ་མངོན་འགྱུར་བྱེད་ཐུབ་པ་ག་ལ་སྲིད། དེ་ལས་མང་ཤོས་ཀྱིས་ཐང་ཆད་དང་ཡིད་མུག་རུམ་གང་ཁུར་ནས་ཕྱིར་ཕ་ཡུལ་ལ་ལོག ཉུང་ཤོས་ཤིག་གིས་ཕམ་ཁར་མགོ་མ་བསྒུར་བར་མུ་མཐུད་དུ་འབད་པ་བྱས། ཡིན་ཡང་མཇུག་མཐར་རྒྱལ་ཁ་འཐོབ་མཁན་ཧ་ཅང་ཉུང་།

ལྷུན་གྲུབ་ཀྱིས་གྲལ་མགོར་བསྡད་པའི་མི་དེར་བལྟས་ཏེ་ཧད། སྤྱིར་སྟོན་མོ་བྱེད་སྐབས་གྲལ་མགོར་འདུག་མཁན་ནི་སྡེ་བའི་ནང་གི་བགྲེས་པོ་དག་ཡིན་ནའང་། ད་ཐེངས་གྲལ་མགོར་འདུག་མཁན་ནི་སྔོན་ཆད་མཐོང་མ་མྱོང་བའི་ན་གཞོན་ཞིག་རེད། གཞན་གྱིས་བཤད་རྒྱུར། མི་དེ་ནི་གྲོང་ཁྱེར་ཆེན་པོའི་ཚོང་བ་ཞིག་རེད་ཟེར་ཞིང་། ཁ་སྐད་ནས་བཤད་ན་གྲོང་ཁྱེར་བ་ཞེས་པ་དེ་རེད། རང་སྡེ་བའི་ཁྲོད་གྲོང་ཁྱེར་ནས་བྱ་བ་བྱེད་མཁན་མི་འདི་ལས་མེད་པས། སྡེ་མི་ཚང་མས་ཁོར་བརྩི་བཀུར་ཚད་མེད་བྱེད། ཡང་བགྲེས་པོ་ཚོས་བཤད་རྒྱུར། ཁོ་གྲོང་ཁྱེར་ནས་སྡེ་བའི་ནང་ཕྱིར་ཡོང་སྐབས་རྒྱ་སྐད་ནས“དེད་ཁོན”ཞེས་པའི་བྱ་བ་ཞིག་སྒྲུབ་ནས་ད་གཟོད་ཕྱིར་ཡོང་ཟེར། སྡེ་བའི་ནང་གི་བགྲེས་པོ་ཚོས་རྒྱ་སྐད་མི་ཤེས་པས“དེད་ཁོན”ཞེས་པ་དེ་ཅི་ཡིན་མ་ཤེས་པས། ཚོང་བ་དེར་དྲིས་ཚེ་ཁོས་ཁྱོད་ཚོ་ནི་གྲོང་ཁྱེར་ལ་འགྲིམ་མ་མྱོང་བས་དེའི་ཧ་གོ་དཀའ་ལ་ཧ་གོ་ནའང་ཕན་པ་མེད། གང་ལྟར་བྱ་བ་དེ་ནི་སླ་མོ་ཞིག་གཏན་ནས་མིན་ཞེས་བརྗོད།

ལྷུན་གྲུབ་ནི་སྡེ་བའི་ནང་གི་སློབ་ཆུང་སློབ་མ་གཅིག་པུ་ཡིན་ལ། གཞན་གྱིས་ཧ་མི་གོ་རུང་ཁོས“དེད་ཁོན”ཞེས་པའི་མིང་ཚིག་དེའི་ཧ་ལོས་གོ ཁོས་མིང་ཚིག་དེའི་ཧ་གོ་རུང་། ཧ་མི་གོ་རྒྱུ་ཞིག་ཡོད་པ་ནི་ཕྱིར་སྡེ་བའི་ནང་ཡོང་སྐབས་ཀྱང་སྒོར་མོ་སྐྱིས་ནས་རླངས་འཁོར་གྱི་པ་སེ་ཉོ་མཁན་ཞིག་ལ་ཅིའི་ཕྱིར་སྡེ་མི་ཚོས་འདི་འདྲའི་བརྩི་བཀུར་བྱེད་དགོས་པ་དེ་རེད། ཁོས་ཨ་ཕར་རྒྱུ་མཚན་འདི་དྲིས་ཀྱང་། ཨ་ཕས་ཁོ་ལ་ལན་ཚིག་གཅིག་ལས་མ་སྟེར།

མི་དེ་ནི་གྲོང་ཁྱེར་བ་རེད།

ཆང་གིས་བཟི་བའི་རྐྱེན་གྱིས་ལྷུན་གྲུབ་ཀྱི་གདོང་མདོག་དམར་པོར་གྱུར་ཅིང་། ཁོས་གད་མོ་དགོད་ཞོར་སྟོད་གོས་ཀྱི་གློ་ཁུག་ནས་མིས་བཟོས་ཀོ་བའི་སྒོར་ཁུག་ཅིག་བླངས། དེ་ནས་སྒོར་ཁུག་ནས་དཀར་ནག་སྤེལ་མའི་འདྲ་པར་ཞིག་བླངས་ཏེ་མདུན་ཅོག་སྟེང་བཞག ཁོའི་གམ་ནས་བསྡད་པའི་ཚེ་འབུམ་གྱིས་ཡ་མཚན་པའི་ཚུལ་གྱིས་འདྲ་པར་ལ་བལྟ་ཙམ་བྱས་རྗེས་ལྷུན་གྲུབ་ལ་འདི་ནི་ཅི་རེད་ཅེས་དྲིས། ལྷུན་གྲུབ་ཀྱིས་དགོད་ཞོར་པར་ངོས་ཀྱི་བྱིས་པ་དེ་གཉིས་ལ་མཛུབ་མོ་བཙུགས་ནས་འདི་ནི་ང་དང་ངའི་སྤུན་ཡ་ཀླུ་འབུམ་རེད་ཅེས་བཤད། ཁོས་ཆང་ཧུབ་གང་འཐུང་རྗེས། བྱིས་པ་གཉིས་ལས་གཟུགས་ཐུང་དེར་མཛུབ་མོ་བཙུགས་ཤིང་། ཁ་ནས་ང་ཞེས་པའི་སྒྲ་གདངས་ཤིག་བཏོན་རྗེས་ལག་གཡས་ཀྱིས་རང་གི་བྲང་ལ་ཐལ་ལྕག་རྒྱག་ཞོར་དུ་འདི་ནི་ཕུ་བོ་ང་ཡིན་ཡ། ཞེས་སྐད་རིང་བཏོན།

ཚེ་འབུམ་གྱིས་ལྷུན་གྲུབ་བཟི་རྗེས་ཀྱི་ཉམས་ལ་བལྟས་ནས་དགོད་ཞོར། ཡ་ཕུ་བོ་ལྷུན་གྲུབ། ཁྱོད་ཆུང་དུས་ཀྱི་རྣམ་པ་འདི་ཅི་འདྲའི་སྙིང་རྗེ་བོ་ཞིག་རེད་ཨང་ཞེས་བཤད། ལྷུན་གྲུབ་ནི་སྤྱིར་ན་ཆང་གིས་བཟི་བས་གདོང་ནི་སྨིན་དྲགས་པའི་ཀུ་ཤུ་དམར་པོ་ལྟར་དམར་བ་དེ་ལྷག་པར་ཇེ་དམར་དུ་གྱུར་ཅིང་། ཚེ་འབུམ་གྱིས་གལ་སྲིད་ལྷུན་གྲུབ་ཀྱི་གདོང་ལ་བེམ་ཏོལ་ཙམ་བརྒྱབ་ན་རྡོལ་ནས་ཁྲག་བཞུར་ལོས་ཡོང་སྙམ་པའི་ཚོར་བ་ཞིག་སྟེར།

ལྷུན་གྲུབ་ཀྱིས་ཚིག་འདི་ཐོས་རྗེས་ཚེ་འབུམ་ལ་སྡང་མིག་བགྲད་ནས་བལྟས་ཤིང་། ཁ་ནས་ཨ་བ་ཨ་མ། གདོན་ནག ཁྱོས་ང་ལ་སྙིང་རྗེ་རྒྱུ་ཅི་ཡོད། ཅེས་མགོ་སྔ་མེད་པའི་ཚིག་འགའ་བཤད་ཅིང་། མཐར་ཆོབ་སྒྲ་དང་བཅས་མགོ་བོ་མདུན་ཅོག་སྟེང་རྡེབ་ཅིང་། དེ་ལྟར་འགུལ་རྒྱུ་མེད་པར་གྱུར། ཚེ་འབུམ་གྱིས་མགོ་བོ་གཡུག་གཡུག་ཙམ་བྱས་ནས་ལྷུན་གྲུབ་ཀྱིས་ཅོག་ཙེ་ཐོག་ཏུ་བཞག་པའི་པར་དེ་ཕྱིར་སྒོར་ཁུག་ཏུ་བསྡུས་ཤིང་། སྒོར་ཁུག་དེ་ཡང་ལྷུན་གྲུབ་ཀྱི་གློ་ཁུག་ཏུ་བཅུག་རྗེས་བཟི་ནས་ར་རོ་གསུམ་པའི་ཚད་ལ་སླེབས་པའི་ལྷུན་གྲུབ་རྒྱབ་ཏུ་ཁུར་ནས་སྒོར་བུད་ཅིང་ལྷུན་གྲུབ་ཉལ་སའི་ཉལ་ཁང་དེར་སོང་། ཉལ་ཁང་ཞེས་བརྗོད་རུང་། དོན་དངོས་སུ་ཉལ་ཁང་དེ་ནི་ཐོག་ཁང་ཞིག་གི་རྡོ་སྐེའི་འོག་གི་དངོས་རྫས་རྫབ་རྫོབ་འཇོག་སའི་ཁང་མིག་ཅིག་ཡིན།

ཚེ་འབུམ་གྱིས་བཟི་ནས་ཁྱི་རོ་ལྟར་གྱུར་པའི་ལྷུན་གྲུབ་ཁོའི་མལ་ཁྲིའི་སྟེང་གཡུགས་རྗེས་དབུགས་རིང་ཞིག་འཐེན་ནས་སྒོར་བུད།

ཆང་ཁང་ནས་ཞབས་ཞུ་བ་བྱས་པའི་ལོ་ལྔའི་རིང་ལྷུན་གྲུབ་ནི་ནམ་ཟླ་དུས་བཞིའི་ཉིན་རེ་རེར་ཁང་ཆུང་འདི་ནས་མི་ཉལ་ཐབས་མེད་ཡིན་ཏེ། དེ་ནི་ཁོར་ཉལ་ཁང་འདི་ལས་མེད་པའི་ཕྱིར་རོ༎

ཆང་ཁང་གི་ཞབས་ཞུ་བ་གཞན་དག་ཚོས་ལྷུན་གྲུབ་ལ་ཁྲེལ་དགོད་བྱས་ཤིང་། ཁོར་ཧཱ་ལེ་པོ་ཐུ་ཞེས་པའི་མཚང་མིང་བཏགས། གློག་བརྙན་ནང་གི་ཧཱ་ལེ་པོ་ཐུ་ལྷུན་གྲུབ་དང་འདྲ་བར་རྡོ་སྐེའི་འོག་གི་ཁང་མིག་ཅིག་ཏུ་བསྡད་ཅིང་། ཁོ་ཡང་ལྷུན་གྲུབ་དང་འདྲ་བར་དཔྲལ་བ་ན་རྨ་ཞིག་ཡོད། ལྷུན་གྲུབ་ཀྱིས་བཤད་པ་ལྟར་ན་ཁོའི་དཔྲལ་བའི་རྨ་ནི་ཁོས་ཆུང་དུས་རྡུང་རེས་བརྒྱབ་ནས་བཞག་པའི་རྨ་ཁ་རེད་ཟེར།

ཡིན་ཡང་ལྷུན་གྲུབ་དང་ཧཱ་ལེ་པོ་ཐུ་གཉིས་མི་འདྲ་བའི་ཆ་ཞིག་ཡོད་པ་ནི། ཧཱ་ལེ་པོ་ཐུ་ཡིས་མཐུ་གཏོང་ཤེས་ཤིང་། དེ་མ་ཟད་ཧཱ་ལིས་པོ་ཐུ་ནི་གློག་བརྙན་གྱི་མི་སྣ་གཙོ་བོ་ཡིན། ལྷུན་གྲུབ་ཀྱིས་མཐུ་གཏོང་ག་ལ་ཤེས། དེ་མ་ཟད་ཁོ་ནི་དོ་དགོང་ཁོས་འཐུང་བའི་ཆང་དེ་དང་འདྲ་བར་ཧ་ཅང་རྒྱུན་མཐོང་ཅན་ཞིག་དང་སྤྱིར་བཏང་བ་ཞིག་ཡིན། ཐད་ཀར་བཤད་ན་ལྷུན་གྲུབ་ནི་རང་གི་མི་ཚེའི་མི་སྣ་གཙོ་བོ་ཡིན་སྲིད་པ་ལས་མི་གཞན་གྱི་འཚོ་བར་ཤུགས་རྐྱེན་ཐེབས་སྲིད་པའི་མི་སྣ་གཙོ་བོར་ནམ་ཡང་འགྱུར་མི་སྲིད།

སུ་ཡིན་རུང་ལོ་ན་གཞོན་དུས་སུ་སེམས་ལ་སྤོབས་པས་ཁེངས་ཤིང་། སྐབས་དེའི་བསམ་ཚུལ་འགའ་ཤས་ནི་ལོ་མང་བོའི་རྗེས་སུ་ཕྱིར་འདང་བྱས་ན་སྟོང་སེམས་དང་འཁྲུལ་སྣང་ལས་མེད། ལོ་བཅུ་ཕྲག་གི་རྗེས་སུ་ལྷུན་གྲུབ་ཀྱིས་ད་ལྟའི་ཉལ་སའི་ཁང་མིག་ཐབས་སྡུག་འདི་ཡིད་ལ་འཆར་ཐེངས་རེ་རེར་ཁོས་སྔོན་ཆད་ཁང་ངན་འདི་ལྟ་བུ་ཞིག་ནས་ཇི་ལྟར་ལོ་ལྔར་འཚོ་བ་རོལ་བ་བསམ་བློ་གཏོང་ངེས།

གཞོན་དུས་སུ་ལྷུན་གྲུབ་ཀྱིས་བྱ་བ་མང་པོར་བསམ་བློ་མ་བཏང་བར་རྗེས་ཀྱི་འཚོ་བའི་སྐོར་ལ་འཆར་ཡན་བྱས་ནས་བསྡད། སྐབས་འགར་རྨི་ལམ་དུ་ལོ་མང་བོའི་རྗེས་སུ་རང་ཉིད་ཕྱུག་པོར་གྱུར་ཅིང་མཛངས་མ་ཞིག་ཆུང་མར་བླངས་ནས། རླངས་འཁོར་རྟགས་ཅན་སྐོར་ཏེ་ཕྱིར་ཕ་ཡུལ་ལ་ལོག་པ་རྨིས། ཁོས་ནམ་རྒྱུན་རང་གི་འཚོ་བ་ཇེ་ལེགས་ཇེ་རྒྱས་སུ་གཏོང་རྒྱུ་དེ་དམིགས་འབེན་དང་པོར་བཟུང་ཡོད། སེམས་ཤུགས་དང་ཕུགས་འདུན་དེའི་དབང་གིས་ཁོས་ལས་ཀར་འབད་བརྩོན་དང་སྒོར་མོར་སེར་སྣ་བྱས་ཏེ་ལོ་ལྔའི་རིང་སེན་མགོ་ཁྲག་དང་སེན་གཏིང་རྣག་བྱས་ནས་སྒོར་ཁྲི་བཅུ་ལྷག་བསགས། ཁོས་སྒོར་མོ་འདིས་མ་རྩ་བྱས་ཏེ་གྲོང་ཁྱེར་འདི་ནས་ཁང་བ་ཞིག་ཉོ་དགོས་བསམ།

བལྟས་ཚོད་ཀྱིས་ལྷུན་གྲུབ་ཀྱི་ཕུགས་བསམ་དངོས་ནས་མངོན་འགྱུར་བྱེད་བཞིན་ཡོད་པ་འདྲ། འོན་ཀྱང་དོན་དངོས་ཀྱི་འཚོ་བ་ནི་འཆར་ཡན་བྱས་པ་ལྟར་དེ་འདྲའི་བྱ་བ་ལམ་འགྲོར་ཡོང་རྒྱུར་ག་ལ་སྲིད།

གཉིད་ལས་སད་རྗེས་ཀྱི་ལྷུན་གྲུབ་ལ་མགོ་ཤིན་ཏུ་ན་བའི་ཚོར་བ་བྱུང་། ཁོས་གཉིད་མ་སད་ཀྱི་ངང་ནས་ཆང་ཁང་གི་སྦྱིན་བདག་ལ་ཁ་པར་བཏང་ནས་ཉིན་ཕྱེད་ལ་གནང་བ་ཞུས་རྗེས་སླར་ཡང་གཉིད་དུ་ཡུར།

ཡང་རྨི་ལམ་དུ། ཁོས་ལོ་མང་སྔོན་སྡེ་བའི་ནང་ཡོང་བའི་ཚོང་བ་དེ་དང་མཉམ་འབྲེལ་བྱས་ནས་ཀུང་སི་ཞིག་བཙུགས་ཤིང་ཀུང་སིའི་ཚོང་དོན་དབྱར་མཚོ་བཞིན་རྒྱས་ཏེ་ལྷུན་གྲུབ་ལ་ཟླ་རེར་སྔོན་གྱི་ཟླ་ཕོག་གི་ལྡབ་བཅུ་ལྷག་ཙམ་གྱི་ཡོང་སྒོ་ཡོད། ཁོས་མུ་མཐུད་སྒོར་མོ་བསགས་ནས་ཚོང་རྒྱབ་ཅིང་། སྔར་ལས་ལྷག་པའི་ཁེ་ཕན་རེག

ལྷུན་གྲུབ་ཕྱུག་པོར་གྱུར་སོང་། ད་ལྟ་ཁོའི་སྔོན་ཆད་ཀྱི་ལས་གྲོགས་ཏེ་ཚོང་བ་དེས་ཀྱང་ལྷུན་གྲུབ་མཐོང་རྗེས་གུས་གུས་བྱམས་བྱམས་ཀྱིས་ཁོར་སྦྱིན་བདག་ཅེས་འབོད་ངེས། དེ་ལྟར་ཕྱུག་པོར་གྱུར་ནས་ལོ་གཅིག་ཙམ་འགོར་རྗེས་ཁོས་རང་ལ་ལོ་སི་ལེ་སི་རྟགས་ཅན་གྱི་རླངས་འཁོར་ཞིག་ཉོས་ཤིང་། སྐྲ་སེར་པོ་དང་མིག་སྔོན་པོ་ཡིན་པའི་མཛངས་མ་ཞིག་ཆུང་མར་བླངས། ལོ་དེའི་ལོ་སར་སྐབས་ཁོས་རླངས་འཁོར་དེ་བསྐོར་ནས་ཆུང་མ་དང་མཉམ་དུ་ཕ་ཡུལ་ལ་ལོག སྡེ་འགྲམ་ལ་སླེབས་དུས་སྡེ་མི་ཡོངས་སྒོར་བུད་ཅིང་ལག་ལ་ཁ་བཏགས་བཟུང་ནས་ཁོར་སྣེ་ལེན་བྱས། རྒན་རྒོན་ཚོའི་གདོང་ལ་འཛུམ་གྱིས་ཁེངས་ཤིང་མཐེ་བོང་བགྲངས་ནས་ལྷུན་གྲུབ་ལ་བསྟོད་བསྔགས་བྱས། དེ་མ་ཟད་ཕྱི་རྒྱལ་ནས་སློབ་སྦྱོང་བྱེད་བཞིན་པའི་ཕུ་བོ་ཀླུ་འབུམ་གྱིས་ཀྱང་ཁོར་ཁ་པར་བཏང་ནས་རྟེན་འབྲེལ་ཞུས། ལྷུན་གྲུབ་ཀྱིས་ཁ་པར་ནས་ཕུ་བོའི་རྟེན་འབྲེལ་གྱི་སྨོན་ཚིག་ལ་ཉན་ཞོར་གློ་ཁུག་ནས་ཐ་མག་ཞུའེ་ཅ་ཞིག་བླངས་ཏེ་མེ་སྒྲོན་ཞིང་། དེ་ཧུབ་གང་རྔུབ་རྗེས་ཡིད་ཚིམ་པའི་ངང་ནས་ཁེར་དགོད་ཅིག་བྱས།

གློ་བུར་དུ། ཁྱི་ནག་པོ་ཞིག་གི་ཁ་ནས་ཝབ་ཝབ་ཝབ་ཅེས་པའི་སྒྲ་ངན་འབྱིན་བཞིན་ཁོའི་ཕྱོགས་སུ་རྒྱུགས་ཡོང་། སྐྲག་སྣང་གི་རྐྱེན་གྱིས་ལྷུན་གྲུབ་ཀྱིས་མིག་ཆེས་ཆེར་བསྒྲད་ནས་ཅེར།

ལྷུན་གྲུབ་གཉིད་ལས་སད་བྱུང་། སྔས་འགྲམ་གྱི་ཁ་པར་ལས་རྣ་ལ་གཟན་པའི་ཅོང་སྒྲ་གྲགས་བཞིན་འདུག ཁོས་ཁ་པར་འདིས་རང་གི་རྨི་ལམ་ཡག་པོ་དཀྲོགས་ཤིང་། རྨི་ལམ་ཁྲོད་ཀྱི་ཁྱི་དེའི་ཁ་ནས་འབྱིན་པའི་སྒྲ་ངན་ཡང་ཁ་པར་གྱི་ཅོང་བརྡ་ཡིན་པ་ཚོར། ཁོའི་སེམས་སུ་འཚིག་པའི་མེ་ལྕེ་རབ་ཏུ་འབར་ནས་ལག་གི་ཁ་པར་འདི་གྱང་ངོས་ལ་འཕངས་ནས་བཅག་ན་སྙམ། ཡིན་ཡང་ཁོས་ཁ་པར་ལག་ལ་བཟུང་ནས་གཡུག་རྒྱུའི་སྟངས་སྟབས་བྱས་ཀྱང་གཡུག་མ་ཕོད། དངན་པ་ཞིག་དྲངས་རྗེས་ཁོས་ལག་པ་མར་བཞག་ཅིང་ད་དུང་སྒྲ་གྲགས་བཞིན་པའི་ཁ་པར་ལ་ལྟ་ཙམ་བྱེད་ཞོར་ཅོང་བརྡའི་སྒོ་བརྒྱབ།

དྲ་མ་ཆུང་ཆུང་ལས་ཕྱི་རོལ་གྱི་སྣང་བརྙན་གསལ་བོར་མཐོང་ཐུབ།

མཚན་མོར་སླེབས་པས་ཕྱི་རོལ་གྱི་འཇིག་རྟེན་མུན་པས་གཡོགས། ཡིན་ཡང་གྲོང་ཁྱེར་འདིའི་ག་ས་གང་དུ་འོད་སྣང་གིས་ཁྱབ་ཅིང་། ཁང་རྩེག་མཐོན་པོ་དང་སྲང་ལམ་ཆུང་ཆུང་སོགས་ག་ས་གང་ན་ཡང་མི་ཚོགས་ཀྱི་འཚང་ཁ་རྒོད། མི་དེ་དག་གིས་གློག་སྒྲོན་སྣ་ཚོགས་བཀར་ནས་མུན་ནག་གི་འཇིག་རྟེན་འདིར་འོད་སྣང་གིས་བསྲེགས་པའི་ཁུང་བུ་མང་པོ་བཟོས།

མཚན་མོའི་གྲོང་ཁྱེར་འདི་ནི་ཉིན་མོ་ལས་ཀྱང་ཟིང་ཟིང་འུར་འུར་དུ་སྣང་། ཁང་ཆུང་གི་དྲ་མ་ནས་གྲོང་ཁྱེར་འདིའི་ཟུར་གཅིག་མཐོང་ཐུབ་ལ། ཉིན་མོ་དང་མི་འདྲ་བར་ལམ་འགྲམ་ན་ཡོད་པ་དག་ཀྱང་གདོང་ལ་རྣམ་འགྱུར་མེད་པའི་ལས་བྱེད་པ་དག་མིན་པར། ཆང་ཁང་དང་བསྲེག་ཟས་ཁང་སོགས་སུ་དགོད་སྒྲས་ཁེངས་པའི་མི་ཚོགས་ཡིན། སྐབས་འདིར་ཉིན་མོ་དང་བསྡུར་ན་ལམ་འགྲོ་བ་དེ་འདྲའི་མང་པོ་མེད་ནའང་འདུ་འཛི་ཆེ་བའི་རྣམ་པ་འདིས་ལྷུན་གྲུབ་ལ་ཚོར་བ་ཡ་མཚན་ཞིག་སྟེར། ཕྱི་རོལ་གྱི་འཇིག་རྟེན་ལ་ཇི་འདྲའི་འུར་ཟིང་ཆེ་ན་ལྷུན་གྲུབ་ཀྱི་ཁང་མིག་ནི་དེ་འདྲའི་ལྷིང་འཇགས་རེད། དོ་མི་མཉམ་པའི་གྲུ་ཁ་འདི་ནས་གློ་བུར་ལྷུན་གྲུབ་ཀྱི་སེམས་ཚོར་དུ་འཇིག་རྟེན་འཁོར་སྐྱོད་བྱེད་སྐབས་ཁོ་ལུས་སོང་བའམ་ཡང་ན་ཁོ་ནི་ད་ལྟ་འཇིག་རྟེན་འདི་དང་འབྲེལ་བ་སྤུ་ཙམ་ཡང་མེད་པར་སྣང་། སེམས་ཚོར་འདིས་རྐྱེན་བྱས་ནས་ལྷུན་གྲུབ་ལ་སྙན་ངག་འབྲི་འདོད་སྐྱེས་བྱུང་། ཁོ་མལ་ལས་ལངས་ཤིང་ཁོའི་དཔེ་སྒྲོམ་ནས་སྨྱུ་གུ་བཙལ། ཁོས་ཁ་ནས་དཔེ་སྒྲོམ་ཞེས་བརྗོད་རུང་། དོན་དངོས་སུ་དཔེ་སྒྲོམ་ཞེས་པ་དེ་ནི་ཚགས་པར་སོགས་དངོས་པོ་རྫབ་རྫོབ་འཇོག་སའི་ཤོག་སྒམ་ཞིག་ཡིན། ཁོས་སྐར་མ་འགའི་རིང་ལ་དཔེ་སྒྲོམ་ནས་སྨྱུ་གུ་བཙལ་ཞིང་། མཐར་ལྕགས་སྨྱུག་ནག་པོ་སྟེང་ན་བཙའ་ཆགས་ཡོད་པ་ཞིག་རྙེད། ལྕགས་སྨྱུག་དེ་ལག་ལ་བཟུང་ནས་འཚབ་འཚུབ་ཀྱིས་དཔེ་སྒྲོམ་ནས་བླངས་པའི་ཚགས་པར་ངོས་སུ་ཡི་གེ་འགའ་བྲིས། ཡིན་ཡང་ཁོས་བྲིས་པའི་ཡི་གེ་དེ་དག་ལ་མདོག་མེད་པས། ཤོག་ངོས་སུ་སྨྱུ་གུས་བཏོད་པའི་རྗེས་ཤུལ་ལས་ཅི་ཡང་མཐོང་མི་ཐུབ། ལྷུན་གྲུབ་ཀྱིས་ཁ་ནས་དམོད་ཚིག་སྣ་ཚོགས་འདོན་ཞོར་ལག་གི་ཚོན་མེད་པའི་སྨྱུ་གུ་དེ་མར་གཡུགས།

སྐབས་འདིར་ཁ་པར་གྱི་སྒྲ་གྲགས་བྱུང་། ལྷུན་གྲུབ་ཀྱིས་ཀྱང་སྨྱུ་གུ་གསར་བ་འཚོལ་རྒྱུའི་མཚམས་བཞག ཁོས་འཐད་ལ་མི་འཐད་ཀྱིས་ཁ་པར་ལག་ལ་བཟུང་ནས་འཆར་ངོས་ལ་བལྟས་པས་སྦྱིན་བདག་ཅེས་པའི་ཡི་གེ་གཉིས་མཐོང་བྱུང་། སྙན་ངག་འབྲི་འདོད་ཀྱི་བསམ་པ་ཡང་ཁ་པར་འདིས་བཅོམ་སོང་།

རང་ལ་སེམས་གསོ་བྱེད་ཆེད་ལྷུན་གྲུབ་ཀྱིས་ཁ་ནས་ཤུབ་ཤུབ་ཏུ་སྙན་ངག་ནི་དགའ་ཕྱོགས་ཡིན་པ་ཙམ་ལས་དེ་འདྲའི་གཙོ་བོ་མིན། ཆང་ཁང་གི་བྱ་བ་ནི་འཚོ་བའི་ཆེད་དུ་ཡིན་ཞེས་ཁེར་བཤད་བྱས། སྐར་ཆ་འགའི་རིང་ལ་རང་གིས་རང་ལ་སེམས་གསོ་བྱས་རྗེས་ཁོས་ཁ་པར་དེ་བླངས།

ཁ་པར་ལས་སྦྱིན་བདག་གི་ངར་སྐད་གྲགས། ཁོས་སྐད་གསེང་མཐོན་པོས་ལྷུན་གྲུབ་ལ་གཤེ་གཤེ་བཏང་ཞིང་། ཁྱོས་ཉིན་ཕྱེད་ལ་གནང་བ་ཞུས་ནས་ཉིན་གང་བོར་ལས་ཞུགས་མི་བྱེད་པའི་རྒྱུ་མཚན་ཅི་ཡིན་ཞེས་དྲིས་བྱུང་། ལྷུན་གྲུབ་ཀྱིས་ཁ་མ་གྲགས་པར་བསྡད། ཁོ་རྨི་ལམ་གྱི་ཞིང་ཁམས་ནས་ཕྱིར་ལོག་རྗེས་སྙན་ངག་འབྲི་རྒྱུའི་བསམ་བློ་སྣ་ཚོགས་བཏང་ནས་འདུག་པ་ལས། ལས་ཞུགས་བྱ་རྒྱུ་བརྗེད་སོང་། སྦྱིན་བདག་གིས་རང་ལ་གཤེ་གཤེ་ཡིད་འཚིམ་པ་ཞིག་བཏང་བར་ཉན་ཚར་རྗེས་དགོངས་དག་ཞུས་ནས་སྒོར་བུད།

དབྱར་གྱི་མཚན་མོ་ནི་ཉིན་མོ་ལས་བསིལ་ཞིང་། རླུང་བུ་བསིལ་མོ་གདོང་ལ་ཕོག་དུས་སེམས་ཁོངས་ལ་བདེ་བའི་ཚོར་བ་ཞིག་སྟེར། ལྷུན་གྲུབ་ཀྱིས་གོམ་པ་ཇེ་དལ་དུ་བཏང་ཞིང་ཚོར་བ་འདི་རོལ་མྱོང་བྱས།

ཡང་ཁ་པར་ལས་གྲགས་པའི་ཅོང་སྒྲས་ཁོའི་སེམས་ཁམས་དཀྲུགས།

ཐེངས་འདིར་ཁོར་ཁ་པར་གཏོང་མཁན་ནི་སྦྱིན་བདག་མིན་པར་ཁོའི་གྲོགས་པོ་ཚེ་འབུམ་རེད། ཚེ་འབུམ་གྱིས་གྲོགས་པོ་ཚོས་ཆང་ཁང་ནས་ཁྱོད་ལ་བསྒུགས་ནས་བསྡད་ཡོད། ད་ཁྱོད་མྱུར་དུ་ཡོང་ངམ་ཞེས་བརྗོད། ལྷུན་གྲུབ་ཀྱིས་ཡ་ཡ་ཞེས་ལན་འདེབས་ཞོར་གོམ་པ་ཇེ་མགྱོགས་སུ་སྤོས་ནས་ཆང་ཁང་དུ་སོང་།

སློབ་མ་ཡིན་ཡང་ཆོག ལས་བྱེད་པ་ཡིན་ཡང་ཆོག ཉིན་མོའི་དུས་སུ་མི་ཚང་མས་རང་རང་གི་བྱ་བའི་ཆེད་དུ་འདུར་རྒྱུགས་བྱེད་ཅིང་། སྐབས་དེར་འཚོ་བའམ་སློབ་སྦྱོང་གང་གི་ཆེད་དུ་ཚང་མས་ལུས་སེམས་སྒྲིམ་ཞིང་དགོས་མིན་སྣ་ཚོགས་ཀྱིས་མནན་ཡོད་པས། ཉིན་མོ་ནི་རང་ལ་མི་དབང་བའི་འཚོ་བ་དང་དུས་ཚོད་ཀྱིས་དབང་སྒྱུར་ཟིན་པའི་གཞན་དབང་དུ་སོང་བའི་དུས་ཤིག་ཡིན། མཚན་མོའི་དུས་སུ་ཁྱོད་ལ་འདི་མིན་གན་མིན་ཞེས་པའི་སྐྱོན་བརྗོད་བྱེད་མཁན་མེད་ཅིང་། ཉིན་མོ་དང་བསྡུར་ན་ལས་ཀ་དགོས་མིན་ཡང་ཉུང་། དེའི་རྐྱེན་གྱིས། དྲ་ཁང་དང་ཆང་ཁང་སོགས་ཀྱི་ཡོང་སྒོ་ཆེས་བཟང་བའི་དུས་ནི་ནམ་ཡང་མཚན་མོ་ཡིན།

ལྷུན་གྲུབ་ཀྱིས་ལས་གཉེར་བྱེད་སའི་ཆང་ཁང་ཡང་འདི་ལྟར་ཡིན་ཏེ། ཉིན་དཀར་གྱི་དུས་སུ་ཡོང་མཁན་ཧ་ཅང་ཉུང་ཞིང་། ཕལ་ཆེར་མེད་པའི་ཚད་ལ་སླེབས་ཡོད། འོན་ཀྱང་མཚན་མོར་དེ་ལྟར་མ་ཡིན་ཏེ། ཆང་ཁང་ཆུང་ཆུང་ནང་དུ་མགྲོན་པོས་ཁེངས་འདུག ལྷུན་གྲུབ་ཆང་ཁང་གི་སྒོ་ཁར་སླེབས་དུས་མགྲོན་པོ་ཚོའི་སྐད་སྒྲ་དང་དགོད་སྒྲ་ཐོས་བྱུང་། ཁོས་ཡུད་ཙམ་ལ་ཐེ་ཚོམ་བྱས་རྗེས་ནང་དུ་སོང་།

ཆང་ཁང་ཆེ་རྒྱུ་མེད་རུང་གཙང་སྦྲ་ཡག་པོ་བྱས་ཡོད། ཆང་ཁང་གི་དཀྱིལ་ན་ལུས་ལ་བོད་ལྭ་གྱོན་ཞིང་མགོ་ལ་བོད་ཞྭ་གོན་པ། ལག་ན་ཁ་བཏགས་བཟུང་བའི་མི་རྫུན་མའི་དཔེ་དབྱིབས་ཤིག་ཡོད་ཅིང་། མདུན་སྟེགས་ལོགས་ཀྱི་གྱང་ངོས་སུ་གཡག་མགོའི་རུས་པ་ཆ་ཚང་ཟངས་ཀྱིས་རྒྱན་པ་ཞིག་ཀྱང་བཀལ་ཡོད། གྱང་ངོས་ཀྱི་ངོས་གཞན་དག་ཏུ་པ་ཏྲ་དང་རྣམ་བཅུ་དབང་ལྡན་སོགས་ཀྱི་རི་མོས་རྒྱན། ཆང་ཁང་གི་སྦྱིན་བདག་ནི་རྒྱ་མི་ཞིག་ཡིན་རུང་འདི་འདྲའི་མཛེས་བཟོ་བྱེད་སྟངས་ཀྱིས་བོད་ཀྱི་མགྲོན་པོ་མང་པོ་བཀུག་ཡོང་། ལྷུན་གྲུབ་ཐོག་མར་གྲོང་ཁྱེར་འདིར་ཐོན་དུས་ཀྱང་བཟོ་བཀོད་འདིར་བལྟས་ནས་ཆང་ཁང་འདི་ནས་ལས་གཉེར་བྱ་རྒྱུའི་ཐག་བཅད། ཁོས་ལོ་འགའི་རིང་ཆང་ཁང་འདི་ནས་ལས་གཉེར་བྱས་པ་མ་ཟད། ཆང་ཁང་གི་མགྲོན་པོ་མང་ཤོས་ཀྱང་བོད་མི་ཡིན་པས་ཁོ་ལ་མཚོན་ན་ཆང་ཁང་འདིར་བསྡད་ན་དོན་སྙིང་གལ་ཆེན་ཡོད། དེ་ནི་ཆང་ཁང་འདི་ཁོ་དང་བོད་མི་གཞན་དག་འབྲེལ་འདྲིས་བྱེད་ས་གཅིག་པུ་རེད།

ལྷུན་གྲུབ་ཆང་ཁང་དུ་སླེབས་རྗེས་གོས་བརྗེ་ཁང་ལ་སོང་ནས་བོད་ལྭ་གྱོན། གྲ་སྒྲིག་བྱས་ཚར་རྗེས་ཁོ་གྲོགས་པོ་ཚོ་བསྡད་ཡོད་པའི་གནས་དེར་སོང་།

ཡ། ལྷུན་གྲུབ། དེ་རིང་ཁྱོའི་སེམས་ལ་ཅི་ཞིག་དྲན་བྱུང་། ང་ཚོས་ཁྱོད་འབོད་དུས་ཁྱོའི་སེམས་ལ་དགའ་སྤྲོས་ཁེངས་ནས་ང་ཚོར་བཀའ་དྲིན་ཞུ་ཆེད་དུ་བོད་ལྭ་འདི་གྱོན་པ་ཡིན་ནམ། ཡང་ན་ཁྱོད་ས་འདིའི་རྒྱ་མོ་ཞིག་གི་བློར་བབས་ནས་མག་པ་འགྲོ་རྒྱུའི་འཆར་གཞི་བཀོད་བཞིན་པ་ཨེ་ཡིན།

ཚེ་འབུམ་གྱིས་ལྷུན་གྲུབ་མཐོང་རྗེས་དེ་ལྟར་ཀུ་རེའི་ཚིག་འགའ་བརྗོད།

ཚེ་འབུམ་ཁྱི་རྒན། ཁྱི་ཁ་ཟུམ།

ཧ་ཧ་ཧ་ཧ་ཧ།

ཅོག་ཙེ་འདིར་བསྡད་ཡོད་པའི་མི་ཚང་མ་བགད་བྱུང་།

ཡ། ད་ཀུ་རེ་འདི་ནས་མཚམས་འཇོག ཁྱོས་གློ་བུར་དུ་བོད་ལྭ་གྱོན་དགོས་དོན་ཅི་ཡིན།

ཚེ་འབུམ་གྱིས་ལག་པ་གཡུག་གཡུག་ཙམ་བྱས་རྗེས་དེ་ལྟར་དྲིས།

ཕེ། ཨ་བ་ཨ་མ། འདི་ནི་སྦྱིན་བདག་གིས་གཏན་ཁེལ་བྱས་པའི་སྒྲིག་ལམ་གསར་བ་རེད། མི་གྱོན་ཐབས་མེད།

སྒྲིག་ལམ་འདི་འདྲའི་ཡ་མཚན་ཞིག་གཏན་ཁེལ་བྱེད་དགོས་དོན་ཅི་རེད།

མི་ཤེས། གོ་ཐོས་ལྟར་ན་སྦྱིན་བདག་གིས་ཆང་ཁང་གི་ཡོང་སྒོ་ཇེ་མཐོར་གཏོང་ཆེད་རེད་ཟེར།

ཨེ། ལྷུན་གྲུབ། ཁྱོས་ལས་གཉེར་མ་བྱས་པར་འདི་ལྟར་བསྡད་ན་སྦྱིན་བདག་གིས་ཁྱོད་ལ་གཤེ་གཤེ་མི་གཏོང་ངམ།

ཧེ་ཧེ། དེར་སྐྲག་མི་དགོས། ངས་ད་ཅི་ཞབས་ཞུ་བ་གཞན་པ་དག་ལ་དྲིས་ཟིན། སྦྱིན་བདག་སྒོར་བུད་སོང་ཟེར།

ཧ་ཧ་ཧ། དེ་ན་བཟང་། ཤོག དེ་ན་འཐུང་ཡ།

ཡ། བཀྲ་ཤིས་བདེ་ལེགས་ཕུན་སུམ་ཚོགས།

དགོད་སྒྲའི་ཁྲོད་ཁོ་ཚོས་དགའ་དགའ་སྐྱིད་སྐྱིད་བྱས།

ཀུ་རེ་དང་བཟི་གཏམ་སྣ་ཚོགས་ཀྱི་ཁྲོད་ནས་མུན་རུབ་སོང་། ལྷུན་གྲུབ་ཀྱིས་ཨ་རག་མང་པོ་འཐུང་མི་ཐུབ་པའི་རྐྱེན་གྱིས་སྐབས་འདིར་བཟི་ལ་ཉེ་སྟེ་གདོང་ཡང་དམར་པོར་གྱུར།

ངས་ཁྱོད་ལ་བཤད། ཁྱོས་ཡག་པོར་ཉོན།

ཚེ་འབུམ་ནི་བཟི་ནས་དྲན་པ་མི་གསལ་བར་གྱུར་ཀྱང་གཟབ་ནན་གྱི་རྣམ་འགྱུར་ཞིག་བསྟན་ནས་ལྷུན་གྲུབ་ལ་འདི་ལྟར་བཤད།

ཕུགས་བསམ། ཕུགས་བསམ་ཞེས་པ་ནི… …

ཚེ་འབུམ་གྱིས་གློ་བུར་དུ་ཚིག་མཚམས་བཅད་ཅིང་ཁུ་ཚུར་བཅིངས་ནས་ཡར་ལངས།

ཨེ། ཁྱོད། ཧཱ་པ། ང་ལ་སྡང་མིག་བགྲད་དོན་ཅི་ཡིན། རྡུང་རེས་རྒྱག་བསམ་པ་ཡིན་ནམ། ང་ཡང་ཁྭ་ཏ་སྐྱག་གཟན་ཞིག་མིན།

ཁོས་ཕར་གྱི་མི་ཞིག་ལ་མཛུབ་སྟོན་བྱས་ནས་གཤེ་གཤེ་བཏང་། རྒྱ་མི་དེས་བོད་སྐད་ཧ་མི་གོ་རུང་ཚེ་འབུམ་གྱི་རྣམ་འགྱུར་ལ་བལྟས་ནས་ཁོས་བཤད་བཞིན་པའི་ཚིག་བཟང་རྒྱུ་ཅི་ཡང་མེད་པ་ཚོར། དེ་བས་རྒྱ་མི་དེ་ཡང་རབ་ཏུ་ཁྲོས་ནས་ཡར་ལངས་ཤིང་ཚེ་འབུམ་ལ་མཛུབ་སྟོན་བྱས་ནས་སྐད་གསེང་མཐོན་པོས་དམོད་མོ་བྱས། ཚེ་འབུམ་གྱིས་མི་དེས་རང་ལ་རྣམ་འགྱུར་ངན་པ་བཟུང་ཡོད་པ་མཐོང་རྗེས་ལྷག་ཏུ་ཁྲོས་ནས་མྱུར་ཏུ་ལག་གཡས་ཀྱིས་དེམ་བེ་སྟོང་བ་ཞིག་བཟུང་ཞིང་ལག་གཡོན་གྱིས་མི་དེ་ལ་མཛུབ་སྟོན་བྱས་ནས་དམོད་ཚིག་སྣ་ཚོགས་བཏོན།

ཚེ་འབུམ་བཟི་ཡོད་ཀྱང་མི་དེ་བཟི་མེད། ཁོས་ཚེ་འབུམ་གྱིས་ལག་ལ་དམ་བེ་བཟུང་ནས་རྡུང་རེས་བྱེད་པའི་གྲ་སྒྲིག་བྱས་ཡོད་པ་མཐོང་རྗེས་མྱུར་ཏུ་ལག་ལ་དམ་བེ་གཉིས་བཟུང་ཞིང་འུར་བརྒྱབ་ནས་ཁོའི་གམ་གྱི་མི་རྣམས་བོས། གནས་དེར་བསྡད་ཡོད་པའི་རྒྱ་མི་དག་གིས་ད་ཅི་ནས་ཁོ་གཉིས་ཀྱིས་ཁ་རྩོད་བྱེད་བཞིན་པ་དེ་ལ་ཉམས་བཞག་ཡོད་པས་ཚང་མ་ཡར་ལངས་ཤིང་ལག་ལ་ལག་ཆ་གང་རྙེད་བཟུང་།

གནས་ཚུལ་འདི་ལྟར་གྱུར་པ་མཐོང་རྗེས་ཚེ་འབུམ་ཅུང་དཔའ་ཞུམ་པར་གྱུར་ནས་དགོངས་དག་ཞུ་དགོས་མིན་ལ་བསམ་བློ་གཏོང་སྐབས། ཕ་ཀིའི་ཕྱོགས་ནས་ལུས་སྟོད་ཤ་རྗེན་ལ་བུད་པའི་མི་སྟོབས་ཆེན་ཞིག་ཡར་ལངས་ནས་གྲོགས་པོ། ཁྱོད་དཔའ་ཞུམ་མི་དགོས། ཁྱོད་ལ་ས་འདི་ནས་གཞན་གྱིས་ཐུབ་ཚོད་བྱ་རྒྱུ་ནི་དཔེ་མི་སྲིད། ཁྱོའི་རྒྱབ་ན་ད་དུང་ང་ཚོ་ཡོད་ཅེས་བརྗོད།

རེད། ང་ཚོར་ཐུབ་ཚོད་བྱེད་དུ་འཇུག་མི་རུང་།

ཨ་བ་ཨ་མ། ད་དུང་ང་ཡོད།

སྐྲག་མི་དགོས། གདོན་ཕྲུག་འདི་དག་གསོད་ལ་ཁད་ཅིག་བརྡུང་ན་འགྲིག

ཆང་ཁང་གི་ཕྱོགས་སོ་སོ་ནས་མི་མང་པོ་ཡར་ལངས་ཤིང་ཚང་མས་ཁྲོས་པའི་རྣམ་འགྱུར་བསྟན། ཆང་ཁང་ན་བསྡད་ཡོད་པའི་རྒྱ་མི་གཞན་དག་གིས་གནས་ཚུལ་འདི་མཐོང་རྗེས་ཀྱང་དཔའ་མ་ཞུམ་པར་ཡར་ལངས།

ལྷུན་གྲུབ་ཀྱིས་གནས་ཚུལ་འདི་མཐོང་རྗེས་སྐད་ཅིག་མ་དེར་བཟི་དྭངས་ཤིང་། བཟི་ནས་དྲན་པ་མི་གསལ་བར་མགོ་ན་བའི་ཚོར་བ་ཡང་ཡལ་སོང་། ཁོས་ཕྱོགས་གཉིས་ཀས་རྡུང་རེས་བྱེད་པ་འགོག་འདོད་ཀྱང་ད་ལྟའི་གནས་ཚུལ་འདི་ནི་ཁོས་ཚོད་འཛིན་བྱེད་ཐུབ་པ་ཞིག་མ་རེད།

སྐྱག་གཟན། ཁྱོས་འདི་ཅིག་མྱོང་།

ལུས་སྟོད་ཤ་རྗེན་ལ་བུད་པའི་མི་དེས་ངར་སྐད་སྒྲོག་བཞིན་ཁོའི་གམ་ན་ཡོད་པའི་རྒྱ་མི་ཞིག་གི་གདོང་ལ་ཁུ་ཚུར་བརྒྱབ།

མི་དེའི་ཁུ་ཚུར་གྱིས་རྡུང་རེས་ཀྱི་འགོ་བརྩམས་ཤིང་། སྐད་ཅིག་མ་དེར་ཆང་ཁང་དུ་དམོད་མོའི་ངར་སྒྲ་དང་ཤེལ་དེམ་གྱི་ཆག་སྒྲ། ཀི་སྒྲ་སོགས་ཀྱིས་ཁེངས། སྐབས་དེར་གནས་གང་ནས་གཡུགས་ཡོང་བ་མི་ཤེས་པའི་ཤེལ་དེམ་ཞིག་ཆང་ཁང་དཀྱིལ་གྱི་གློག་ཏོག་ལ་ཁེལ་ནས་ཕག་སྒྲ་དང་བཅས་གློག་ཏོག་བཅགས་སོང་།

གློ་བུར་མུན་ནག་ཏུ་གྱུར་པས་ཚང་མས་སྐད་ཅིག་མར་རྡུང་རེས་བྱེད་པ་མཚམས་བཞག་མོད། རྣ་ལ་གཟན་པའི་སྐྱག་གཟན་ཞེས་པའི་དམོད་ཚིག་ཅིག་དང་ཤེལ་དེམ་གནས་ག་གེ་མོར་ཕོག་ནས་བཅགས་པའི་སྒྲས་སླར་ཡང་འཛིང་རེས་བྱེད་པའི་འགོ་བརྩམས།

མུན་ནག་གི་ཁྲོད་ནས་མིའི་གཟུགས་དབྱིབས་ཙམ་ལས་ཅི་ཡང་མི་མཐོང་བའི་ཁར་མི་ཚང་མ་རང་རང་གི་གང་འདོད་ལྟར་གནས་གང་སར་བསྡད་ཡོད་པས། ས་གང་ན་མི་སུ་ཡོད་པའི་བརྡར་ཤ་གཅོད་རྒྱུ་ནི་ཧ་ཅང་དཀའ་མོར་གྱུར།

སྤྱིར་ལྷུན་གྲུབ་ནི་ཆང་ཁང་གི་ཞབས་ཞུ་བ་ཞིག་ཡིན་པའི་ཁར་བྱ་བ་འདི་ནི་ཐོག་མར་ཚེ་འབུམ་གྱིས་གཞན་ལ་ཕོག་ཐུག་བཏང་ནས་བསླངས་པ་ཡིན་པས། རང་ཉིད་འཛིང་རེས་འདིར་ཞུགས་ན་མི་འགྲིག་སྙམ་ནས་ཁྱོད་ཚོས་རྡུང་རེས་མ་བྱེད། བྱ་བ་ཡོད་ན་ང་ཚོས་གྲོས་བྱས་ནས་ཐག་གཅོད་ཆོག་ཅེས་འུར་བརྒྱབ། འོན་ཀྱང་ཁོའི་སྐད་ཆ་དེར་དོ་སྣང་བྱེད་མཁན་མ་བྱུང་བར་མུ་མཐུད་རྡུང་རེས་བྱས་ཤིང་། མུན་ནག་གི་ཁྲོད་ནས་སུ་ཞིག་གིས་ཤེལ་དེམ་གྱིས་ལྷུན་གྲུབ་ཀྱི་མགོར་བརྒྱབ་ནས་བཅག

ལྷུན་གྲུབ་ཀྱི་དྲན་པ་རབ་རིབ་ཏུ་གྱུར་ཅིང་། ཁོས་རང་གི་མགོ་ནས་གཤེར་གཟུགས་དྲོན་མོ་ཞིག་བཞུར་ནས་ཡོང་བ་ཚོར། དྲན་པ་མི་གསལ་བར་གྱུར་རུང་ཁོས་གཤེར་གཟུགས་དེ་ནི་ཁྲག་ཡིན་པ་ཤེས་སོང་།

སྐབས་དེར་ལྷུན་གྲུབ་ནི་གླང་ཆེན་སྨྱོན་པ་ལྟར་རབ་ཏུ་ཁྲོས་ཤིང་། གཞན་གྱིས་རང་ལ་བརྡུང་ན་རང་གིས་ཀྱང་མི་དེར་འགྱོད་པ་སྐྱེ་རུ་འཇུག་དགོས་སྙམ། ཡིན་ཡང་མུན་ནག་གིས་གཡོགས་པའི་ཁོར་ཡུག་དེ་ནས་ཁོས་མི་སོགས་གསལ་བོར་མི་མཐོང་བར་མ་ཟད། ཆང་བཏུང་ཉེས་ཀྱིས་ར་རོར་གྱུར་ཅིང་འགོར་གཞན་གྱིས་དེམ་བུས་བརྒྱབ་རྗེས་གོམ་པ་གཡོ་འཁྱོམ་བྱེད། འཁྱར་འཁྱོར་གྱིས་མདུན་ལ་གོམ་པ་འགའ་སྤོས་རྗེས་ཁོས་མིའི་གཟུགས་ཤིག་མཐོང་བྱུང་། ལྷུན་གྲུབ་ཀྱིས་ཁྱི་རྒན་འདི་ནི་ངའི་མགོར་ཤེལ་དེམ་གྱིས་རྒྱག་མཁན་ལོས་ཡིན་སྙམ་སྟེ་མི་དེ་མནན་ནས་དེའི་གདོང་ལ་ཁུ་ཚུར་སེར་བ་བབས་པ་ལྟར་གཞུས། སྐབས་དེར་ལྷུན་གྲུབ་ཀྱིས་མི་ཞིག་གིས་ཁོའི་རྒྱབ་ནས་ཁོ་ལ་ཁུ་ཚུར་རྒྱག་བཞིན་ཡོད་པ་ཚོར། ཡིན་ཡང་ཁོས་མི་དེར་ཁ་ཡ་མ་བྱས་པར་བློ་སེམས་རྩེ་གཅིག་གིས་རང་གི་ལུས་འོག་ཏུ་མནན་པའི་མི་དེར་སྲོག་བཞག་ནས་ཁུ་ཚུར་གྱིས་གཅར།

ཁོའི་མིག་གཉིས་ནི་དམར་པོར་གྱུར་ཅིང་མགོའི་སྐྲ་ཡང་ཁོང་ཁྲོའི་དབང་གིས་གཟེངས་འདུག སྐྲ་མཚམས་ནས་ཁྲག་བཞུར་ཡོང་རུང་ཁོས་དེར་དོ་སྣང་མ་བྱས་པར་རང་གིས་མནན་ཡོད་པའི་མི་དེར་ཁུ་ཚུར་གྱིས་རྡུང་ཚུལ་ནི་འཇིགས་སུ་རུང་བའི་སྲིན་པོ་ཞིག་གིས་རང་ཉིད་ཀྱི་དགྲ་བོ་གསོད་བཞིན་པ་དང་འདྲ།

ལྷུན་གྲུབ་ཀྱི་རྒྱབ་ན་ཡོད་པའི་མི་དེས་ལྷུན་གྲུབ་ལ་ཁུ་ཚུར་གྱིས་ཅི་འདྲ་གཞུས་རུང་ཕན་འབྲས་མེད་པ་མཐོང་བས། ལག་ལ་ཤེལ་དེམ་ཞིག་བཟུང་ནས་ལྷུན་གྲུབ་ཀྱི་མགོར་བརྒྱབ།

ཕག་སྒྲ་དང་བཅས་ཤེལ་དེམ་གྱི་ཤེལ་སྙིགས་དང་ལྷུན་གྲུབ་ཀྱི་ཁྲག་གཉིས་བསྡོངས་ནས་བར་སྣང་དུ་འཕྱོ། དེ་དང་མཉམ་དུ་ལྷུན་གྲུབ་ཀྱི་དྲན་པ་ཡང་རྩ་བ་ནས་ཤོར་ཏེ་བརྒྱལ་སོང་།

ལོ་འདིའི་དགུན་ཁ་ནི་སྔོན་ལས་ལྷག་པར་གྲང་ངར་ཆེ་བ་འདྲ། ལྷུན་གྲུབ་ཀྱིས་ལུས་ལ་དགུན་ལྭ་མཐུག་པོ་ཞིག་གྱོན་ཞིང་རི་ལུང་ཀུན་གཡོགས་པའི་ཁ་བ་མཐུག་པོའི་ཁྲོད་ནས་མདུན་དུ་སྐྱོད། ཁོས་གོམ་པ་སྤོ་དུས་ཁོའི་རྐང་བ་ནི་ཤ་ལ་ཟུག་པའི་ཚེར་མ་དང་འདྲ་བར་ཁ་བའི་ནང་དུ་ཟུག་འགྲོ། ཁོས་རང་གི་རྐང་བ་ཁ་བ་ལས་ཕྱིར་འདོན་ཐེངས་རེ་རེར་ཁ་བའི་འདབ་མ་མང་པོ་ཞིག་ཀྱང་ཁོའི་གོམ་འགྲོས་དང་བསྟུན་ནས་ཁོའི་རྐང་མགོ་ནས་མཆོང་ལྡིང་བྱེད། ཁ་བ་མཐུག་པོའི་ཁྲོད་ནས་དཀའ་ངལ་གྱིས་གོམ་པ་སྤོ་ཐེངས་རེར་ཁོས་ཐོག་མར་ལ་ཕུག་འབལ་བ་ལྟར་རང་གི་རྐང་བ་ནི་ཁ་བ་མཐུག་པོ་ལས་འབལ་དགོས།

ཁོས་གྲང་ངར་འགོག་ཆེད་ལག་པ་གློ་ཁུག་ཏུ་བཅུག གློ་ཁུག་ཏུ་ལྕགས་སྨྱུག་ཅིག་ཡོད་པ་དེར་རེག་བྱུང་། ལྷུན་གྲུབ་ནི་ས་གང་ལ་སོང་རུང་ལྕགས་སྨྱུག་འདི་ཁྱེར་འདུག འདི་ནི་ལོ་འགའི་སྔོན་སྡེ་བའི་ནང་ཡོང་བའི་གྲོང་ཁྱེར་བ་དེས་རང་ལ་གནང་བའི་ལག་རྟགས་རེད། ཁོས་རང་ཉིད་ནི་སྡེ་བའི་ནང་གི་སློབ་མ་གཅིག་པུ་ཡིན་ཞིང་། གྲོང་ཁྱེར་བ་དེས་ཀྱང་རང་ལ་རེ་བ་བཟུང་ནས་ཁོར་ལྕགས་སྨྱུག་འདི་ལག་རྟགས་ལ་གནང་བ་ཡིན་སྙམ་ཡོད། ཁོ་ཚོའི་སྡེ་བའི་ནང་སློབ་མ་ཁོ་གཅིག་པུ་ལས་མེད་པས་ཚོང་ཁང་དུ་ཡང་ལྕགས་སྨྱུག་གིས་ཡི་གེ་འབྲི་བར་མཁོ་བའི་སྣག་ཚ་བཙོང་རྒྱུ་མེད། ཡིན་ཡང་ཆེས་ཐོག་མ་ནས་བཟུང་ཁོས་ལྕགས་སྨྱུག་འདི་བཀོལ་སྤྱོད་བྱ་རྒྱུའི་ཐད་ལ་བསམ་བློ་བཏང་མ་མྱོང་། ཁོ་ལ་མཚོན་ན་ལྕགས་སྨྱུག་འདི་ནི་ཡི་གེ་འབྲི་སྤྱད་ཀྱི་ཆ་བྱད་ཅིག་མིན་པར་ཁོའི་སེམས་ཀྱི་ཕུགས་འདུན་བཅོལ་ས་ཞིག་ཏུ་གྱུར་ཡོད།

ལྕགས་སྨྱུག་ཆུང་ཆུང་འདིས་རང་ཉིད་གྲོང་ཁྱེར་ཆེན་པོ་ལ་དགའ་བའི་སེམས་པ་ཟུར་ཙམ་མཚོན་ཡོད། མདང་དགོང་ཁོར་རྨི་ལམ་ཞིག་རྨིས་ཤིང་། རྨི་ལམ་དུ་ཁོ་ནི་གྲོང་ཁྱེར་བ་ཞིག་ཏུ་གྱུར་ཡོད་པར་མ་ཟད། ཁོས་ཉིན་རེར་སློབ་དེབ་ལས་མ་གཏོགས་མཐོང་མི་ཐུབ་པའི་རྒྱ་ཁོག་ཀྱང་འཐུང་ཐུབ།

གྲོང་ཁྱེར་ལ་འགྲིམས་པ་དང་། གྲོང་ཁྱེར་བ་ཞིག་འགྱུར་རྒྱུ་ནི་ཁོའི་ཕུགས་བསམ་རེད།

ཡིན་ཡང་ཕུགས་བསམ་མངོན་འགྱུར་བྱེད་པའི་སྔོན་ལ་ཐོག་མར་ཁྱིམ་ལ་ལོག་དགོས། ཁོ་ཚང་ཕྱུག་རྒྱུ་མེད་ཅིང་། ལོ་རྙིང་ཉི་ཤུ་དགུར་དགུ་ཐུག་ལ་དགོས་པའི་ཟས་རིགས་དགུ་ཡང་ཚང་དཀའ་སྟེ། མཐའ་ན་ཆུ་དང་ཚྭ་སོགས་བརྩིས་ཀྱང་ཟས་སྣ་དགུ་འདང་དཀའ།

རི་ལུང་ཀུན་ཡོངས་སུ་གཡོགས་པའི་ཁ་བར་ཉི་འོད་ཕོག་ན་བལྟས་པ་ཙམ་གྱིས་མིག་མི་བདེ་བར་མཆི་མ་འཛག་ཅིང་རབ་རིབ་བྱེད།

སྨན་ཁང་གི་གློག་འོད་ཀྱང་དེ་དང་འདྲ།

མིག་ཕྱེ་བའི་ཚེ་ན། ཁོར་འོད་སྣང་འདི་མ་ལོབས་པས་མིག་བཙུམ་བཙུམ་བྱས། ཁོས་རང་ཉིད་གནས་འདིར་ཇི་ལྟར་བསླེབས་པ་མི་ཤེས་ལ། གནས་འདི་ས་གནས་གང་ཡིན་པ་ཡང་མ་ཤེས། རང་གི་མགོར་དངོས་པོ་ག་གེ་མོས་བསྡམས་པའི་ཚོར་བ་མི་བདེ་བ་ཞིག་བྱུང་། ལག་པ་བསྲིངས་ནས་རེག་ཚེ་དེ་ནི་སེང་རས་ཡིན་པ་ཚོར་བྱུང་།

སད་བྱུང་བའི་ལྷུན་གྲུབ་ཀྱིས་བྱ་བ་ཅི་ཞིག་བྱུང་བར་ཕྱིར་དྲན་བྱས། ཁོའི་དྲན་པའི་ཁྲོད་ཁོ་ནི་ཆང་ཁང་གི་མི་ཞིག་གིས་འཇབ་རྒོལ་བྱས་ཤིང་། མི་དེའི་ལག་གི་ཤེལ་དེམ་ཡང་རང་གི་མགོར་བརྒྱབ་ནས་བཅགས་སོང་། དེའི་རྗེས་ཀྱི་དྲན་པ་ནི་ཧ་ཅང་གསལ་བོ་མིན། ཁོས་རང་གིས་མི་ཞིག་ལུས་འོག་ལ་མནན་ནས་གཅར་བ་ཙམ་ཞིག་ཤེས། དེའི་རྗེས་ཀྱི་བྱ་བ་ཅི་ཡང་དྲན་གྱིན་མི་འདུག

ལྷུན་གྲུབ་འཕག་འཚག་བྱེད་བཞིན་ཡར་དགྱེ།

མིག་ལམ་དུ་མངོན་པ་ནི་དཀར་ཞིང་གཙང་བའི་གྱང་ངོས་ཡིན་ལ། སྣ་ལམ་དུ་ཡང84དུག་སེལ་གཤེར་ཁུའི་དྲི་མ་ཁྱབ་ཡོང་། ཁོའི་འགྲམ་ན་ཡང་མལ་ཁྲི་ཞིག་ཡོད། མལ་ཁྲི་དེའི་སྟེང་ཁོས་ཆང་ཁང་ནས་མཐོང་བའི་ལུས་སྟོད་ཤ་རྗེན་ལ་བུད་པའི་མི་སྟོབས་ཆེན་དེ་ཉལ་འདུག མི་དེས་ལག་གཡས་ཀྱིས་འགྱིག་གི་ཟ་ཕོར་ཞིག་བཟུང་ནས་ཟ་ཕོར་དུ་ཡོད་པའི་ཤ་ཁུ་འཐུང་བཞིན་འདུག ཁོའི་ལག་གཡོན་ལ་ཆག་ཤིང་བརྒྱབ་སྟེ་སེང་རས་ཀྱིས་སྐེར་བཏགས་ཡོད། ཁོའི་མིག་ལྕིབས་དང་འགྲམ་པར་ཡང་གཞན་པས་གཅར་བའི་ཤུལ་སྔོན་ནག་ཆགས་ཡོད། ཚེ་འབུམ་ནི་མི་དེའི་མལ་ཁྲིའི་འགྲམ་ན་བསྡད་ཡོད་ཀྱང་། ལྷུན་གྲུབ་སད་པ་མཐོང་རྗེས་མྱུར་ཏུ་ཡར་ལངས་ནས་ཁོའི་གམ་ལ་བཅར། སྐབས་འདིར་ལྷུན་གྲུབ་ཀྱིས་ཀྱང་རང་ནི་སྨན་ཁང་ན་ཡོད་པ་ཚོར། ཁོས་ཚེ་འབུམ་ལ་ཁ་བརྡ་བྱས་རྗེས་ད་གཟོད་བྱ་བའི་མགོ་རྔ་ཆ་ཚང་བར་ཤེས་སོང་། མདང་ནུབ་རང་ཉིད་ཆང་ཁང་ནས་བྱུང་བའི་རྒྱག་རེས་བྱེད་པའི་དོན་རྐྱེན་ཁྲོད་བརྒྱལ་སོང་ཞིང་། ཚེ་འབུམ་གྱིས་རྒྱག་རེས་ཀྱི་དོན་རྐྱེན་དེའི་ཁྲོད་རྨས་སྐྱོན་ཕོག་ཚད་ཚབས་ཆེས་ཆེ་བ་ནི་འགྲམ་གྱི་མི་སྟོབས་ཆེན་འདི་དང་ལྷུན་གྲུབ་རེད་ཟེར། མི་སྟོབས་ཆེན་འདི་གཅིག་པུས་རྒྱ་མི་གསུམ་ལ་རྒྱག་རེས་བྱས་ཤིང་དེ་ལས་རྒྱ་མི་གཅིག་རྨས་ཏེ་སྨན་ཁང་དུ་གཡུགས། ཡིན་ཡང་ཁོ་ལའང་རྨས་སྐྱོན་ཕོག་སྟེ་ཁོའི་ལག་གཡོན་པ་ཡང་མི་དེ་དག་གིས་བཅག རྡུང་རེས་མཇུག་རྫོགས་རྗེས་ཁོ་ཚོས་རྨས་སྐྱོན་ཕོག་ཡོད་མཁན་དག་སྨན་ཁང་དུ་སྐྱེལ། སྐབས་དེར་ཚེ་འབུམ་གྱིས་ལྷུན་གྲུབ་མཐོང་བྱུང་། ཁོ་ནི་ཆང་ཁང་དཀྱིལ་གྱི་མི་རྫུན་མའི་དཔེ་དབྱིབས་དེར་ཞོན་ཞིང་དེའི་ལུས་སྟེང་ནས་བརྒྱལ་འདུག དེ་བས་ཁོ་ཚོས་ཀྱང་ལྷུན་གྲུབ་སྨན་ཁང་དུ་སྐྱེལ།

ལྷུན་གྲུབ་ཀྱིས་གནས་ཚུལ་དེ་ཐོས་རྗེས་གདོང་མདོག་སྨིན་དྲགས་པའི་སིལ་ཏོག་ཙོལ་རིལ་ལྟར་དམར་པོར་གྱུར་ཅིང་ཡུན་ཙམ་ཞིག་ལ་ཁ་གྲགས་རྒྱུ་མེད་པར་བསྡད། ཚེ་འབུམ་གྱིས་མཐོང་རྗེས་ལྷུན་གྲུབ་ནི་ཁོང་ཁྲོའི་དབང་གིས་གདོང་དམར་པོར་གྱུར་སོང་བསམ་མོད། དོན་དངོས་སུ་ལྷུན་གྲུབ་ནི་ཁོང་ཁྲོའི་དབང་གིས་གདོང་དམར་པོར་གྱུར་པ་ག་ལ་ཡིན། ཚེ་འབུམ་གྱི་ཚིག་དེ་དག་ཉན་རྗེས་ལྷུན་གྲུབ་ཀྱིས་མདང་དགོང་རང་གིས་ཚེ་སྲོག་གི་ཉེན་ཁར་མ་འཛེམས་པར་གཅར་སའི་མི་དེ་ནི་ཆང་ཁང་དཀྱིལ་ན་ཡོད་པའི་མི་རྫུན་མ་དེ་ཡིན་པ་ཤེས་པས་ཁོ་ངོ་ཚ་སྟེ་གདོང་དམར་པོར་གྱུར་པ་ཡིན། མི་སྟོབས་ཆེན་དེ་ཡང་མལ་ཁྲི་ལས་མར་བབས་ཏེ་ལྷུན་གྲུབ་ཀྱི་གམ་ནས་བསྡད་ཅིང་ལྷུན་གྲུབ་ལ་མཐེ་བོང་ཞིག་བསྟན།

ཇོ་བོ་རིན་པོ་ཆེ། གྲོགས་པོ་ཁྱོད་དཔའ་བོ་རེད།

མིན། མིན། དེ་ནི… …

ཧ་ཧ་ཧ། ངས་ཐོག་མར་ཁྱོད་ལ་མཉམ་འཇོག་དུས་ཁྱོས་ད་དུང་ང་ཚོར་རྒྱག་རེས་མ་བྱེད་ཅེས་འདུམ་ཅི་ཐུབ་བྱེད་བཞིན་ཡོད། དེ་དུས་ངས་ཁྱོད་ནི་སྐྲག་ཡོད་པ་ཨེ་ཡིན་སྙམ་ནས་ཁྱོད་ལ་མཐོང་ཆུང་བྱས་ཟིན། ཨེ། དོན་དངོས་སུ་ཁྱོད་ནི་སྡར་མ་ཞིག་ག་ལ་ཡིན། ཁྱོད་ནི་དཔའ་རྒོད་ཅིག་རེད།

ཨ།

ཡ་གྲོགས་པོ། ཁྱོས་ཤོད་དང་། ཁྱོད་ལ་མདང་དགོང་འདི་འདྲའི་རྨས་སྐྱོན་ཚབས་ཆེན་ཕོག་རུང་མ་བྲོས་པར་བསྡད། ཁྱོད་རྨས་མཁན་དེ་ཡང་མི་ངར་བ་ཞིག་ཡིན་སྲིད། ཁྱོས་མི་དེར་བཅར་ནས་ཚད་ཅི་འདྲ་ཞིག་ལ་བསྐྱལ་ཡོད།

ལྷུན་གྲུབ་ཀྱིས་ཐོས་རྗེས་ཁོས་ཁ་འགུལ་ཙམ་འགུལ་ཙམ་བྱས་པ་ལས་ཅི་ཡང་མ་བཤད།

གྲོང་ཁྱེར་ལ་སླེབས་པ་ནས་བཟུང་། ལྷུན་གྲུབ་ལ་

ཉིན་ཐོ་འབྲི་རྒྱུའི་གོམས་གཤིས་ཆགས་སོང་། ཁོས་ལག་གི་ཉིན་ཐོ་མཐུག་པོའི་ཁ་ཟུམ་ཞིང་། མགོ་ཡར་དགྱེ་ནས་གནམ་ལ་བལྟ་བཞིན་ཁ་མ་གྲགས་པར་བསྡད། ཁོའི་གམ་གྱི་བུ་ཆུང་གིས་ཁོས་ཁ་མ་གྲགས་པ་མཐོང་རྗེས་འཚབ་ནས་ཁོའི་ལག་པར་འཇུས་ནས་གཡུག་གཡུག་བྱེད་ཞོར་རྒྱ་སྐད་དག་མོས་ཨ་ཕ་ཨ་ཕ། ཁྱོས་མུ་མཐུད་དུ་ཤོད་ཡ། མུ་མཐུད་དུ་ཤོད་ཡ་ཞེས་ནན་བརྗོད་བྱས།

ལྷུན་གྲུབ་ཀྱིས་དགོད་ཞོར་དུ་བུ་ཆུང་གི་མགོར་ལག་པས་བྱིལ་བྱིལ་ཙམ་བྱས་ནས་མུ་མཐུད་དུ་བཤད།

དེའི་རྗེས། ཨེ། དེའི་རྗེས་སུ་ཨ་ཕའི་བྱ་བ་བོར་སོང་། དེའི་ཁར་རྒྱག་རེས་ལས་ཆང་ཁང་ལ་བཟོས་པའི་གྱོང་གུན་ཚང་མ་ངས་འཇལ་དགོས་སོང་། ཨ་ཕས་ལོ་མང་བོར་བསགས་པའི་སྒོར་མོ་མང་ཤོས་ཀྱང་དེ་ལྟར་ཚར་སོང་། བྱ་བ་དེ་འདྲ་ཞིག་བྱུང་རྗེས། སྦྱིན་བདག་གིས་ཨ་ཕ་ཆང་ཁང་གི་ལས་གཉེར་བ་ལས་སྒོར་ཕུད་པར་མ་ཟད། ཁང་ཕྲུག་དེ་རུ་ཡང་སྡོད་དུ་མ་བཅུག དེའི་རྗེས་ཀྱི་ཟླ་བ་གཅིག་གི་ཡུན་ལ་ཨ་ཕར་གནས་སྡོད་བྱེད་ས་མེད་པས་མགྲོན་ཁང་ཞིག་ནས་འདུག་ཐབས་བྱས། ཨ་ཕའི་སྒོར་མོ་ཚར་ལ་ཉེ་དུས་ད་ལྟའི་ལས་གནས་འདིར་མི་བསྡུ་རྒྱུའི་བརྡ་ཐོ་མཐོང་བྱུང་། སྐབས་དེར་ངས་ཐག་བཅད་ཟིན། ང་ནི… …

ཁོའི་ལྟག་རྒྱབ་ཀྱི་ཁང་བ་དེ་ནས་བུད་མེད་ཅིག་སྒོར་བུད་བྱུང་། བུད་མེད་དེས་ཕ་བུ་གཉིས་མཐོང་རྗེས་ཁ་ནས་སྐྱག་པ། ཁྱོའི་ལོ་རྒྱུས་དེ་དག་བུ་ལ་བཤད་རྒྱུར་ངོ་མི་ཚའམ་ཞེས་ལྷུན་གྲུབ་ལ་སྐྱོན་བརྗོད་བྱས། དེ་རྗེས་མོས་ཁ་མུར་མུར་ཙམ་བྱས་རྗེས་བུ་ཆུང་ལ་བལྟས་ནས་ཁྱོས་ཨ་ཕས་བཤད་པའི་རྫབ་བེ་རྫོབ་བེ་འདི་དག་མ་ཉན། འགྲོ་ཡ། ང་ཚོ་ཟ་མ་ཟ་རུ་འགྲོ་ཟེར་བཞིན་བུ་ཆུང་ཁྲིད་ནས་ཁང་བའི་ནང་སོང་། བུ་ཆུང་གིས་ཀྱང་ཨ་མའི་ཁར་ཉན་ནས་འོ་ཡ་ཨ་མ་ཞེས་བརྗོད།

ལྷུན་གྲུབ་ཀྱིས་ཆུང་མས་རང་ལ་ཁ་ངོ་མི་སྟེར་བ་མཐོང་རྗེས་མི་བདེ་བའི་ཚུལ་གྱིས་མགོ་འཕྲུག་འཕྲུག་ཙམ་བྱས་ནས་གང་ལྟར་ང་ནི་གྲོང་ཁྱེར་བ་ཞིག་ཏུ་གྱུར་ཡོད་ཅེས་སྐད་དམའ་མོས་ཆིག་ལབ་གཅིག་བྱས་རྗེས་ཡར་ལངས་ཤིང་ཉིན་ཐོའི་ཟིན་བྲིས་དེ་རྐུབ་སྟེགས་སྟེང་དུ་བཞག་ནས་ཁང་བའི་ནང་དུ་སོང་། ཡུད་ཙམ་ལས་མ་འགོར་བར་ཁང་བ་ལས་དགོད་སྒྲ་དང་སྐད་སྒྲ་གྲགས་བྱུང་།

རླུང་གཡུགས་བྱུང་ལ། རླུང་བུས་སྒོ་ཁའི་རྐུབ་སྟེགས་སྟེང་བཞག་པའི་ཉིན་ཐོའི་ཁ་ཕྱེ་ནས་ཤོག་ངོས་རེ་རེ་སློག མཐར་ཤོག་ངོས་ཤིག་ལ་སླེབས་རྗེས་སློག་མཚམས་བཞག་བྱུང་། ཤོག་ངོས་དེར་འདྲ་པར་ཞིག་བཞག་ཡོད། འདྲ་པར་གྱི་ངོས་སུ་ནུབ་ལྭ་གྱོན་པའི་མི་གཉིས་ཀྱིས་དགོད་ཞོར་དུ་ལག་འཇུ་བྱེད་བཞིན་ཡོད། དེ་ལས་གཡོན་ཕྱོགས་ཀྱི་མི་དེ་ནི་བལྟས་ཚོད་ཀྱིས་ལྷུན་གྲུབ་ཡིན་པ་ཤེས་ཐུབ། ཟ་མ་ཟོས་ཚར་ནས་སྒོར་བུད་པའི་བུ་ཆུང་གིས་འདྲ་པར་དེ་སར་ལྷུང་ཡོད་པ་མཐོང་རྗེས། ཁ་ནས་ཨ་ཕ་ཨ་ཕ་ཞེས་འུར་རྒྱག་ཞོར་ཁང་བའི་ནང་རྒྱུག་ནས་ལྷུན་གྲུབ་བོས་ཤིང་། པར་དེར་མཛུབ་སྟོན་བྱས་ནས་ཨ་ཕ། འདི་ནི་ཁྱོད་ཡིན་ནམ། ངས་པར་འདིའི་གཏམ་རྒྱུད་ཤེས་འདོད་ཅེས་བརྗོད། ཡིན་ཡང་ལྷུན་གྲུབ་ཀྱིས་ཁ་མ་གྲགས་གོང་ཆུང་མས་ཁྱོའི་ཨ་ཕར་གཏམ་རྒྱུད་དེ་འདྲ་མང་བོ་ཞིག་ག་ལ་ཡོད་ཅེས་སྐད་བརྒྱབ།

ལྷུན་གྲུབ་ཀྱིས་དགོད་ཞོར་དུ་པར་དེ་ལག་ལ་བཟུང་ནས་བལྟས། པར་ངོས་ཀྱི་མི་གཉིས་འཛུམ་གྱིས་ལག་འཇུ་བྱེད་ཀྱིན་འདུག རྒྱབ་ལྗོངས་ནི་འཚིག་ཇ་འཐུང་ས་ཞིག་ཡིན། འདྲ་པར་གྱི་རྒྱབ་ངོས་སུ་བོད་ཡིག་གིས་འདས་ཟིན་པའི་དྲན་པ་ནི་རྡུལ་ཆགས་པའི་མེ་ལོང་ཞིག་ཡིན། རྒྱུན་དུ་ཕྱིར་དྲན་གྱིས་མེ་ལོང་ངོས་ཀྱི་རྡུལ་དེ་དག་མ་ཕྱིས་ན་ནམ་ཞིག་མེ་ལོང་ནི་རྡུལ་གྱིས་གབ་ནས་ཅི་ཡང་མཐོང་མི་ཐུབ་པར་འགྱུར་ངེས་ཞེས་བྲིས་ཡོད། ཁོས་འདྲ་པར་དེ་སླར་ཟིན་བྲིས་ཀྱི་བར་དུ་བཅུག་ཅིང་རྐུབ་སྟེགས་སྟེང་བསྡད་རྗེས། རང་གི་བརླ་སྟེང་ལག་པས་རྡེབ་ཙམ་བྱས། བུ་ཆུང་གིས་ཀྱང་ཧ་གོ་ནས་ཁོའི་བརླ་སྟེང་དུ་བསྡད། དེ་ནས་ཁོས་པར་དེའི་གཏམ་རྒྱུད་བརྗོད་བྱུང་།

སྐབས་དེར་ང་ནི་ལོ་སུམ་བཅུ་ལྷག་ཡིན། ངས་ཁྱོའི་ཨ་མ་ངོ་ཤེས་ནས་ཀྱང་དུས་ཡུན་རིང་བོ་མ་འགོར། ངས་ཁྱོད་ལ་སྔོན་ནས་བཤད་མྱོང་བའི་གྲོང་ཁྱེར་བ་དེ་ནི་པར་ངོས་ཀྱི་མི་གཞན་པ་དེ་ཡིན། ཁོ་དང་མཉམ་དུ་ཇ་འདི་འཐུང་རྒྱུ་ནི་ངས་སྔ་མོ་ནས་གྲ་སྒྲིག་བྱས་ཟིན། ང་ཚོས་བྱ་བ་མང་བོ་གླེང་བྱུང་། དེ་དུས་ཁོ་ནི་སྔོན་ཆད་སྡེ་བའི་ནང་ཡོང་དུས་ལས་ཀྱང་བྱ་བ་ལམ་འགྲོར་སོང་བའི་སྒང་ཡིན། པར་འདི་རྒྱག་དུས་ཁོ་ནི་ཀུང་ཟི་ཞིག་གི་སྦྱིན་བདག་ཏུ་གྱུར་ཡོད། ཨེ། དེ་དུས་ངས་ད་གཟོད་ཁོའི་མིང་ཤེས་སོང་། ཁོའི་མིང་ལ་བློ་བཟང་ཟེར། ང་ཁོ་དང་ངོ་འཕྲད་དུས་ཧ་ཅང་འཚབ་བྱུང་། དེའི་སྔོན་ལ་ཨ་མ་ངེད་གཉིས་ཀྱིས་ནུབ་ལྭ་ཞིག་གླས། ནུབ་ལྭ་འདི་གླས་ན་རིན་གོང་མི་མཐོ་རུང་དེར་གཏོར་སྐྱོན་བྱུང་ན་སྒོར་ཁྲི་གཅིག་འཇལ་དགོས། མཇུག་མཐར་ལྭ་བ་ཕྱིར་སྤྲོད་ཁར་ཨ་མས་ལྭ་བ་དེའི་མཆན་ཁུང་གི་གནས་སུ་སྐུད་སྣེ་ཐུང་ཐུང་ཞིག་འབུར་ཡོད་པ་མཐོང་། ཧ་ཧ་ཧ། སྐབས་དེར་ཁྱོའི་ཨ་མ་ནི་སྐྲག་ནས་གདོང་ཡང་དཀར་པོར་གྱུར་སོང་། མོ་སྐྲག་ནས་ད་ཅི་བྱ། ད་ནི་མ་འགྲིག ད་ནི་མ་བཟང་། ལྭ་བར་གཏོར་སྐྱོན་ཤོར་སོང་ཞེས་ཐེངས་མང་པོར་བརྗོད། ངས་མོར་སེམས་གསོ་བྱེད་ཞོར་ཁ་རོག་གེར་ལག་པས་སྐུད་སྣེ་དེ་འཐེན་ནས་བཅད། དེ་ནས་ངས་མོ་ལ་ཁྱོས་ཅིག་བལྟས། ལྭ་བ་འདིར་སྐུད་སྣེ་གང་ན་ཡོད། ཁྱོའི་མིག་ལམ་ལ་འཆར་བ་དེ་ནི་འཕྲུར་སྣང་རེད་ཅེས་བཤད། ཁྱོའི་ཨ་མ་དངོས་ནས་རློམ་སོང་། ལྭ་བ་དེ་ལག་ལ་བཟུང་ནས་ཐེངས་མང་པོར་ཞིབ་ལྟ་བྱས་རྗེས་ངུ་སྐད་ཀྱིས་བདེན་གི ངོ་མ་སྐུད་སྣེ་མེད་གི སྐྱིན་ཚབ་ཀྱང་འཇལ་མི་དགོས་ཞེས་བརྗོད། ཧ་ཧ་ཧ་ཧ… …

ལྷུན་གྲུབ་བགད་ནས་མཆི་མ་ཡང་བཞུར་ཡོང་། ཁོས་མཆི་མ་ཕྱི་ཙམ་བྱས་ནས་མུ་མཐུད་དུ་བཤད་འདོད་དུས། ཁང་བའི་ནང་ནས་ཨ་རོགས། ད་ཁ་རོག་འདུག་རྒྱུ་ན་ཞེས་ངོ་ཚ་བ་དང་ཁོང་ཁྲོ་སྐྱེས་པ་བསྡོངས་པའི་སྐད་ཅིག་གྲགས་བྱུང་། ལྷུན་གྲུབ་ཀྱིས་ཀྱང་དགོད་ཞོར་དུ་ཡ་ཡ་ཞེས་བརྗོད།

ཆུང་མས་ཚིག་མཚམས་བཅད་པའི་རྐྱེན་གྱིས་ལྷུན་གྲུབ་ཀྱིས་ཀྱང་བྱ་བ་འདི་བཤད་འདོད་མེད་པར་གྱུར། བུ་ཆུང་ནི་ལོ་ཆུང་བས་སྒོར་ཁྲི་ཞེས་པ་དེ་ཚད་གང་འདྲ་ཞིག་ཡིན་པ་མི་ཤེས་ཤིང་། ཁོས་ཨ་མ་ནི་འཚབ་ནས་ངུ་ལ་ཉེ་དུས་ཨ་ཕ་ཅིའི་ཕྱིར་བགད་པ་ཡང་མི་ཤེས། དེ་བས་བུ་ཆུང་ལ་མཚོན་ན་བྱ་བ་འདིས་ཁོར་སྤྲོ་སྣང་སྤུ་ཙམ་ཡང་སྟེར་མ་ཐུབ། ད་ལྟ་ཨ་མས་འདི་ལྟར་ཚིག་མཚམས་བཅད་པས་ཁོས་ཀྱང་ཨ་ཕར་གཏམ་རྒྱུད་གཞན་པ་བཤད་དུ་བཅུག་ན་འགྲིག་སྙམ།

དེ་བས་བུ་ཆུང་གིས་འདི་ལྟར་དྲིས། ཨ་ཕ་ཨ་ཕ། ཁྱོས་ཨ་མ་ཅི་ལྟར་ངོ་ཤེས་པ་ཡིན།

བུ་ཆུང་གི་ཚིག་དེ་ཐོས་རྗེས་ལྷུན་གྲུབ་ཀྱིས་དགོད་ཞོར་དུ་ཨེ། དེ་ནི་ལོ་ཞིག་གི་དགུན་ཁ་ཡིན། ས་གཞི་ཡོངས་ལ་དངུལ་ལྟར་དཀར་བའི་ཁ་བས་གཡོགས། སྐབས་དེར… …

ཆུང་མ་ཁང་བ་ལས་སྒོར་བུད་ཅིང་བུ་ཆུང་ལ་བལྟས་ནས་ད་ཁྱོས་ལས་བྱ་མི་འབྲིའམ་ཞེས་སྐྱོན་བརྗོད་བྱས། བུ་ཆུང་གིས་འཐད་ལ་མི་འཐད་ཀྱི་རྣམ་འགྱུར་ཞིག་བསྟན་རུང་མོས་བཙན་གྱིས་ཁྲིད་ནས་ལས་བྱ་འབྲི་རུ་སོང་།

ལྷུན་གྲུབ་ཀྱི་ཆུང་མར་འདི་འདྲའི་གོམས་གཤིས་ཡ་མཚན་ཞིག་ཡོད་དེ། རྒྱུན་དུ་ལྷུན་གྲུབ་ཀྱིས་བུ་ལ་ཁ་བརྡ་བྱེད་སྐབས་མོས་ཚིག་མཚམས་གཅོད། དེར་ལྷུན་གྲུབ་མ་ལོབས་ཀྱང་ལོབས་དགོས་ཏེ། གང་ལྟར་འདི་ནི་རང་གི་ཆུང་མ་ཡིན་པས་སོ།།

རང་གི་ཁ་བརྡར་ཉན་མཁན་གཅིག་པུ་ཡང་ཁྲིད་སོང་རྗེས་ལྷུན་གྲུབ་ཀྱིས་དབུགས་རིང་གི་དངན་པ་ཞིག་དྲངས་ནས་ལག་གི་ཉིན་ཐོའི་ཁ་ཕྱེ། ཁོས་ཆུང་མ་ཁོ་གཉིས་ངོ་འཕྲད་པའི་སྔོན་གྱི་བྱ་བ་བྲིས་ཡོད་པའི་ཤོག་ངོས་ལ་བལྟས་ནས་འདང་རྒྱག་ཏུ་ཤོར།

ཆང་ཁང་གི་སྦྱིན་བདག་གིས་ལྷུན་གྲུབ་སྒོར་ཕུད་རྗེས་ཁོ་ལ་གནས་སྡོད་བྱེད་ས་ཡང་མེད་པར་གྱུར། སྐབས་དེར་ཁོ་ལ་འདེམས་གསེས་ཀྱི་ལམ་ཀ་གཉིས་ལས་མེད། དེ་ནི་ཕྱིར་ཕ་ཡུལ་གྱི་རྩྭ་ཐང་ཆེན་པོར་ལོག་པའམ་ཡང་ན་གྲོང་ཁྱེར་འདི་ནས་མགྲོན་ཁང་ཞིག་བཙལ་ནས་བསྡད་དེ་ལག་གི་སྒོར་མོ་མ་ཚར་བའི་སྔོན་ལ་སྒོར་མོ་ལེན་ཐབས་ཀྱི་བྱ་བ་ཞིག་རྙེད་ཅི་ཐུབ་བྱེད་རྒྱུ་དེ་ཡིན། སྡེ་བའི་ནང་གི་མི་རྣམས་ཀྱིས་ཁོ་ནི་གྲོང་ཁྱེར་བ་རེད་ཅེས་བརྗོད་ཅིང་། རྒན་རྒོན་རྣམས་ཀྱིས་ཀྱང་ཁོར་བསྟོད་བསྔགས་བྱེད་བཞིན་ཡོད། གལ་ཏེ་ཁོ་ནི་འདི་ལྟར་ཕམ་ཁ་རུམ་གང་བསྡུས་ནས་ཕྱིར་ཕ་ཡུལ་ལ་ལོག་ན་སྡེ་བའི་ནང་གི་མི་རྣམས་ཀྱིས་ཁོར་ཁྲེལ་དགོད་བྱེད་ངེས་སྙམ། དེ་བས་ཁོས་གྲོང་ཁྱེར་འདི་ནས་འདུག་རྒྱུའི་ཐག་བཅད། དེའི་རྗེས་སུ་ཁོས་གྲོང་ཁྱེར་འདི་ལས་རིན་གོང་ཆེས་སླ་བའི་མགྲོན་ཁང་ཞིག་བཙལ་ཞིང་དེ་རུ་གནས་སྡོད་བྱས། ཐོག་མའི་ཉིན་འགའི་རིང་ཁོས་ཉིན་རེའི་ཇ་ཐེངས་གསུམ་པོ་ཆད་དུ་མ་བཅུག ཡིན་ཡང་ཉིན་འགའི་རྗེས་སུ་སྒོར་མོ་གྲོན་ཆུང་བྱེད་ཆེད་ཞོགས་ཟས་མི་ཟ་རྒྱུའི་ཐག་བཅད། ལྷུན་གྲུབ་ཀྱིས་སྔོན་ཆད་དུས་དེབ་ཅིག་ནས་མཐོང་ཟིན་པ་སྟེ། དུས་ཡུན་རིང་བོར་ཞོགས་ཟས་མ་ཟོས་ན་མཁྲིས་སྐྲན་འབྱུང་སྲིད། ཁོས་རང་ལ་སེམས་གསོའི་ཚུལ་དུ་ཉིན་འགའི་རིང་ལ་ཞོགས་ཟས་མ་ཟོས་པ་ཙམ་གྱིས་མཁྲིས་སྐྲན་འབྱུང་མི་སྲིད་ཅེས་བརྗོད། དེ་ནས་ཡང་ཉིན་འགའ་འགོར་རྗེས། ཁོས་ཉིན་རེའི་སྒོར་མོ་བཀོལ་ཚད་ལ་བལྟས་རྗེས་ནུབ་ཟས་མི་ཟ་རྒྱུའི་ཐག་བཅད། མཐར་ཁོས་ཉིན་རེར་སྟབས་བདེ་ཐུག་པ་གཅིག་རེ་མ་གཏོགས་མི་འཐུང་རྒྱུ་བྱས།

སྒོར་མོ་ཚར་ལ་ཉེ་བས་ཁོས་ད་ཐེངས་ཕྱིར་ཕ་ཡུལ་ལ་མི་ལོག་ག་མེད་ཡིན་སྙམ། ཉིན་ཞིག་ལ་མ་བསམ་ས་ནས་ཁོས་ལམ་འགྲམ་གྱི་གློག་སྡོང་ཞིག་གི་སྟེང་དུ་ཉི་འོད་ཁུལ་ཆུང་ཞེས་པར་སྒོ་སྲུང་ཞིག་བསྡུ་རྒྱུའི་བརྡ་ཐོ་སྦྱར་ཡོད་པ་མཐོང་། སྐབས་དེར་ཁོ་ཐེ་ཚོམ་མེད་པར་དེར་འགྲོ་རྒྱུའི་ཐག་བཅད།

ལྷུན་གྲུབ་ཀྱིས་ཉིན་ཐོའི་ཁ་ཟུམ། ཁོས་ད་ལྟའི་ཆུང་མ་ཐེངས་དང་བོར་ངོ་འཕྲད་དུས་ནི་ཁོ་སྒོ་སྲུང་བྱས་ནས་ཟླ་བ་གཅིག་ཙམ་ལོན་དུས་ཡིན། སྟོན་མཇུག་གི་རླུང་བུ་ལུས་ལ་ཕོག་པ་ཙམ་གྱིས་ཅུང་གྲང་བའི་ཚོར་བ་སྟེར། གནམ་ནས་ཀྱང་ཁ་ཆར་འདྲེས་མ་ཟམ་མེ་ཟིམ་མེ་ཞིག་འབབ་གྱིན་འདུག ཆར་ཐིགས་འགའ་ལྷུན་གྲུབ་ཀྱི་ལྭ་བའི་གོང་བ་ལས་ནང་དུ་ལྷུང་སྟེ་ཁོའི་བྲང་གཞུང་བརྒྱུད་པས། ཁོས་གྲང་འདར་ཞིག་བྱས།

ཨེ། ཕ་ཡུལ་གྱི་དགུན་ཁ་ནི་འདི་ལས་ཀྱང་གྲང་ངར་ཆེ། འོན་ཀྱང་རང་ནི་ལོ་མང་བོར་གྲོང་ཁྱེར་ནས་འཚོ་བ་རོལ་བས་ས་འདིའི་གནམ་གཤིས་ལོབས་པར་གྱུར། རེད་ཡ། རང་ནི་སྔ་མོ་ནས་གྲོང་ཁྱེར་བ་ཞིག་ཏུ་གྱུར་ཡོད། ད་ནི་ཕ་ཡུལ་ལ་འགྱུར་ལྡོག་ཅི་འདྲ་ཞིག་བྱུང་ཡོད་པ་གསལ་བོར་ཤེས་ཐབས་མེད་པའི་གྲོང་ཁྱེར་བ་ཞིག་ཏུ་གྱུར་ཡོད།

ལྷུན་གྲུབ་ཀྱིས་བསམ་གཞིག་བྱེད་ཞོར་ཡར་ལངས་ནས་ཉིན་ཐོ་མཆན་འོག་ཏུ་བཙུར་ཞིང་ལག་པ་གཉིས་ཀྱིས་རྐུབ་སྟེགས་བཟུང་ནས་ཁང་བའི་ནང་དུ་སོང་།

ད་ཐེངས་ནི་ཁོས་ལོ་མང་བོའི་རིང་ལ་གྲོང་ཁྱེར་བ་ཞེས་པའི་རང་གི་མཚན་སྙན་འདི་སེམས་ལ་དྲན་དུས་ང་རྒྱལ་གྱི་བསམ་བློ་མེད་པ་ཐེངས་དང་པོ་ཡིན།

དྲ་མ་ཆུང་ཆུང་ལས་ཕྱི་རོལ་གྱི་སྣང་བརྙན་གསལ་ལ་མི་གསལ་བ་ཞིག་མཐོང་ཐུབ།

རྒྱ་ལམ་ན་རླངས་འཁོར་སྣ་ཚོགས་ཆུ་བོའི་བཞུར་རྒྱུན་ལྟར་རྒྱུན་མི་ཆད་པར་འགྲོ་བཞིན་ཡོད། ལྷུན་གྲུབ་དྲ་མའི་འགྲམ་ནས་བསྡད་ཅིང་དྲན་པའི་མེ་ལོང་སྟེང་གི་ས་རྡུལ་ཕྱིར་དྲན་གྱིས་ཕྱིས།

སྒོ་སྲུང་གི་བྱ་བ་གཉེར་ནས་བཟུང་། ཁོས་གནས་འདིའི་སྡོད་མི་མང་བོ་ངོ་ཤེས་སོང་། དེ་ལས་རྒན་རྒོན་ལ་ལས་སྐབས་འགར་ཁོ་དང་མཉམ་དུ་སྦག་རྒྱག སྒོ་སྲུང་བྱས་ནས་བཟུང་ཁོས་སྦག་རྒྱག་སྟངས་མང་བོ་ཤེས་ལ། རྒྱ་སྐད་ནས་མཱ་ཅང་ཞེས་པའི་རོལ་རྩེད་ཀྱང་རྩེ་ཤེས་སོང་། ཡིན་ཡང་ཁོའི་ཆུ་ཚད་མི་བཟང་སྟེ། རྒྱུན་དུ་སྒོར་མོ་ཤོར་བ་ལས་ལེན་པའི་གནས་ཚུལ་ཧ་ཅང་ཉུང་། ཤོར་ཐེངས་ཆེས་མང་བ་ནི་ཁོས་སྒོར་ཉི་ཤུ་ལྷག་ཤོར་བ་དེ་ཡིན། སྒོར་ཉི་ཤུ་ནི་མང་པོ་ཞིག་མིན་རུང་ཁོ་བོར་མཚོན་ན་མི་ཉུང་རྒྱུ་ཡང་མེད་པས། ཕམ་ཁ་རེག་པ་ནས་ཉིན་དེར་ཚིག་པ་ཟ་ནས་སེམས་མ་སྐྱིད་པར་བསྡད།

དེ་དུས་ནི་ལྷུན་གྲུབ་ཀྱིས་བུ་ཆུང་ལ་བཤད་པ་ལྟར་གྱི་དགུན་ཁ་ཞིག་མིན་པར་སྟོན་ཁ་ཞིག་ཡིན། སྟོན་མཇུག་གི་ཉིན་དེ་ལྷག་པར་གྲང་ངར་ཆེ། སྒོ་སྲུང་ཁང་དུ་མི་བཞིས་སྦག་རྒྱག་བཞིན་ཡོད། དེ་ལས་མི་གཅིག་ནི་གདོང་དམར་པོར་གྱུར་ཅིང་། སྐེའི་གཉིད་ལོག་འཕར་རྩ་དང་རྩེ་ཆུང་ཡང་རྒྱས་ནས་སྦོམ་པོར་ཆགས། བལྟས་ཚོད་ཀྱིས་ས་འབུ་ནག་རིང་ཞིག་ཁོའི་སྐེར་འཁྱིལ་བ་དང་འདྲ། ཁོས་སྐད་གསེང་མཐོན་པོས་སྐད་ཆ་བཤད་བཞིན་ཡོད་ཀྱང་ཁོའི་སྐད་ནི་མི་གཞན་པ་གསུམ་པོའི་དགོད་སྒྲ་དང་སྐད་སྒྲས་ཡོངས་སུ་བཀབ།

ཧ་ཧ་ཧ།

ཧ་ཧ། དེ་རིང་རྒྱལ་ཁ་འདོད་པ་ཐོབ་བྱུང་།

ཧེ་ཧེ། ལྷུན་གྲུབ། ཁྱོའི་ངོ་མདོག་མི་བཟང་བ་ཅིའི་ཕྱིར་ཡིན།

ཤོག ད་དུང་རྒྱག་ཡ། མུ་མཐུད་དུ་རྒྱག་ཡ།

ཨ་ཡོ། ཁྱོས་དུས་ཚོད་ཅིག་བལྟས། ད་ང་ཁྱིམ་ལ་འགྲོ་དགོས། དེ་མིན་ཆུང་མས་ང་ལ་གཤེ་གཤེ་གཏོང་ངེས།

སྐྱག་པ། ཁྱོད་ཆུང་མར་སྐྲག་པ་དེ་དགོད་བྲོ་བ་ལ།

ཧིན། ང་ཆུང་མར་སྐྲག་པ་དེ་བདེན། ཡིན་ཡང་ཁྱོད་ལ་སྐྲག་སའི་ཆུང་མ་ཞིག་ཀྱང་མེད། མི་རེང་ཁེར་འདུག་ཁྱོད་ནི་ང་ལས་ཀྱང་དགོད་བྲོ་བ་ཞིག་རེད། ཨ་རོགས། ད་ཁྱོའི་ལོ་ཚོད་འདིར་རང་ལ་འཁོར་སའི་ཆུང་མ་ཞིག་མེད་ན… …

ཧ་ཧ་ཧ། ཁྱོས་ལྷུན་གྲུབ་ལ་ཐུབ་ཚོད་མ་བྱེད་ཡ།

ཧ་ཧ་ཧ་ཧ། ང་དགད་ནས་ཕོ་བ་ན་བཞིན་འདུག

ད་ཀུ་རེ་མི་རྩེ། ང་ཁྱིམ་ལ་ལོག་དགོས།

མ་འགྲོ་ཡ། ད་དུང་ཐེངས་གཅིག་རྩེ།

ད་ཆོག ད་ཆོག ཁྱོས་འདི་ལྟར་བཤད་ནས་ང་ཚོས་ཐེངས་བཞི་ལྔ་ཙམ་རྩེ་ཟིན།

སྒོ་སྲུང་ཁང་ལས་མི་གསུམ་སྒོར་བུད་ནས་རང་རང་སར་སོང་། ལྷུན་གྲུབ་ཀྱི་སེམས་ལ་ཚིག་པ་ཚད་མེད་ཟ་ནས་ཡར་ལངས་འདོད་ཀྱང་མེད་པར་རྐུབ་སྟེགས་སྟེང་མི་དེ་གསུམ་ལ་རྒྱབ་གཏད་ནས་བསྡད། མི་གསུམ་པོ་སྒོར་བུད་རྗེས་ད་གཟོད་ཁོའི་ཁ་ཕྱིར་འཁོར། ཁོས་ཁ་པར་བླངས་ནས་དུས་ཚོད་ལ་བལྟས། གས་སྲུབ་འགའ་ཡོད་པའི་ཁ་པར་གྱི་འཆར་ངོས་སུ་རྩྭ་ཐང་ཆེན་མོ་ཤར་ཞིང་། སྤང་ཐང་དུ་ནོར་ལུག་འགས་མགོ་མར་དུད་ནས་རྩྭ་ཟ་བཞིན་ཡོད། དེ་ལས་འཆར་ངོས་དཀྱིལ་གྱི་ནོར་གནག་ཅིག་གིས་མགོ་ཚུར་འཁོར་ནས་འཆར་ངོས་ལ་བལྟས་འདུག ནོར་དེའི་མགོར་ཨ་རབ་ཨང་གི22:17ཞེས་ཤར་འདུག

མི་དེ་གསུམ་སོང་རྗེས་ལྷུན་གྲུབ་ཀྱི་སེམས་ཅུང་རྣལ་ལ་བབས། ད་ནི་ངོ་མ་འགོར་ཡོད་པ་འདྲ། རང་ཉིད་འདི་ལྟར་བསྡད་རུང་བྱ་བ་ཅི་ཡང་ལས་རྒྱུ་མེད་པས་སྔ་མོར་ངལ་གསོས་ན་སྙམ། དེ་ནས་ཁོས་སྒོ་སྲུང་ཁང་གི་གློག་གཟིམས་ཤིང་ལྭ་བ་ཕུད་ནས་མལ་ཁྲིའི་སྟེང་ཉལ། ཡིན་ཡང་ད་ཅི་སྦག་རྒྱག་སྐབས་རྩེ་རོགས་གསུམ་པོའི་ཚིག་དེ་དག་སེམས་ལ་དྲན་པས་ཁོའི་སེམས་ལ་ཡང་བསྐྱར་ཚིག་པ་ཟོས་ནས་གཉིད་ཀྱང་ཡེར་བར་གྱུར། ཁོས་མིག་བཙུམ་ནས་གཉིད་ཅི་ཐུབ་བྱས་རུང་ཚིག་དེ་དག་ནི་སྐྱག་པར་སྦྲང་ནག་འཁོར་བ་ལྟར་ཁོའི་སེམས་སུ་འཁོར་ནས་བསྡད། ཡུན་གྱིས་ཁོའི་ཚིག་པ་ཟ་བ་དེ་ཡང་ཁོང་ཁྲོར་གྱུར། ཁོས་བྱ་བ་གཞན་པར་བསམ་བློ་བཏང་ནས་དེ་རིང་གི་བྱ་བ་འདིར་བསམ་བློ་མི་གཏོང་ཐབས་བྱས་རུང་། མཇུག་མཐར་བསམ་བློ་ནི་གང་ལྟར་བྱ་བ་འདིའི་སྟེང་འཁོར་འགྲོ།

མལ་ཁྲིའི་སྟེང་ཉལ་རུང་ཁོར་གཉིད་མི་ཁུག་པས། ཡར་དགྱེ་སྟེ་ལྭ་བ་གྱོན་ནས་སྒོར་བུད།

དགུན་ཁ་མ་ཐོན་རུང་ཁ་བ་ཟམ་ཟིམ་ཞིག་འབབ་བཞིན་ཡོད། ས་ལ་ཁ་བ་སྲབ་མོ་རིམ་པ་ཞིག་གིས་གཡོགས་ཤིང་། རླུང་དེ་ལུས་ལ་ཕོག་པ་ཙམ་གྱིས་ཧ་ཅང་བསིལ་བའི་ཚོར་བ་ཞིག་སྟེར། ལམ་ན་ལམ་འགྲོ་བ་མང་པོ་མེད་ཀྱང་མང་ཤོས་ཀྱིས་ལུས་ལ་དགུན་ལྭ་མཐུག་པོ་གྱོན་ཞིང་གོམ་སྟབས་འཚབ་འཚུབ་ཀྱིས་རང་རང་སར་འགྲོ་བཞིན་ཡོད། དཀར་གཙང་ལྷད་མེད་ཀྱི་ཁ་བ་དེ་ལུས་ལ་འཕྲད་མ་ཐག་ཏུ་ཞི་ནས་ཆུའི་ཟེགས་མར་འགྱུར་འགྲོ། ཆུའི་ཟེགས་མ་དེ་ཡང་སྐད་ཅིག་མར་ཞི་ནས་མེད་པར་འགྱུར།

སྟོན་མཇུག་གི་རླུང་བུ་གྲང་ཞིང་བསིལ་ལ། ཁ་བ་ནི་དེ་ལས་ཀྱང་གྲང་ཞིང་བསིལ། ཡིན་ཡང་རླུང་བུ་དང་ཁ་བ་ནི་ཅི་འདྲའི་གྲང་བསིལ་ཡིན་རུང་དེ་ཡིས་ལྷུན་གྲུབ་ཀྱི་ཁོང་ཁྲོའི་མེ་ལྕེ་གཞོམ་མི་ཐུབ། ཁོས་རྒྱ་ལམ་འགྲམ་གྱི་ལམ་འགྲོ་བ་དག་ལ་ལྟ་ཞོར་ཁ་ནས་ཀྱང་བོད་སྐད་ཀྱིས་དམོད་ཚིག་སྣ་ཚོགས་བཏོན། ལམ་འགྲོ་བ་ཚོས་ཁོས་བཤད་པའི་ཚིག་དེ་དག་ཧ་མི་གོ་བས་སྣང་མེད་བྱས། དེ་ལྟར་སྐར་མ་འགའ་འགོར་སོང་། ལྷུན་གྲུབ་ཀྱི་ཁོང་ཁྲོ་དེ་ཞི་བར་ཉེ། ཁོས་རང་གི་སྤྱོད་ལམ་འདི་འགྲིག་མིན་ལ་བསམ་བློ་བཏང་། ཁོ་ཁོང་ཁྲོ་ལངས་དོན་ནི་རང་གིས་སྦག་རྒྱག་དུས་ཕམ་ཁ་རེག་པ་ཡིན་པས། བྱ་བ་དེ་ནི་ལམ་འགྲོ་བ་འདི་དག་དང་འབྲེལ་བ་སྤུ་ཙམ་ཡང་མེད། འདི་ནི་ཁོ་ཚོའི་སྐྱོན་མིན་པར་རང་གི་སྐྱོན་ཡིན། ཁོ་ཚོས་རང་གིས་བཤད་པ་ཧ་མི་གོ་རུང་རང་གིས་འདི་ལྟར་ཁོ་ཚོར་དམོད་ཚིག་བཏོན་ན་དངོས་ནས་མི་བཟང་སྙམ།

ཁོས་དེ་ལྟར་བསམ་བློ་གཏོང་ཞོར་དང་འགྱོད་བཤགས་བྱེད་ཞོར་དུ་འགྲོ་དུས་ཁོའི་འགྲམ་གྱི་མི་ཞིག་གིས་ཕྱགས་མས་ཁ་བ་ཕྱགས་སྐབས་གཟབ་གཟབ་མ་བྱས་པར་ཁ་བ་ཉུང་ངུ་ཞིག་ཁོའི་རྐང་མགོར་ཕྱགས། སྐད་ཅིག་ཉིད་དེར་ཁོའི་སེམས་ཀྱི་ཡལ་ལ་ཉེ་བའི་ཁོང་ཁྲོ་དེ་སྔར་བཞིན་ལངས་ནས་མི་དེར། ལོང་བ། ཁྱོའི་མིག་ལ་མདའ་ཟུག་པ་མ་ཡིན་ནམ་ཞེས་གཤེ་གཤེ་བཏང་།

བསམ་ཡུལ་ལས་འདས་པ་ཞིག་ལ། མི་དེས་ཀྱང་ཐེ་ཚོམ་མེད་པར་ལྷུན་གྲུབ་ལ་སྡང་མིག་ཅིག་བགྲད་རྗེས་བོད་སྐད་དག་མོས། ཁྱི་ཁ་ཟུམ། ཁྱོད་ཁྱི་ལྡོམ་ཞིག་དང་འདྲ་བར་ལམ་འགྲམ་འདི་ནས་ཡར་ལངས་ནས་ཅི་བྱེད། ཧིན། ཁྱོས་ཁྱོའི་རྒྱབ་ཀྱི་ཁུལ་ཆུང་འདི་བསྲུང་ནས་བསྡད་ཡོད་ཚུལ་ལ་བལྟས་ན་ཁྱོད་ནི་ཧཱ་པ་ཞིག་དང་འདྲ།

ཚིག་རྣོན་པོ་དེ་དག་ལ་ལྷུན་གྲུབ་ཀྱིས་ཚིག་ལན་སྤྲོད་རྒྱུ་མ་རྙེད། ཁོས་ཁ་གདངས་ནས་ཅི་ཞིག་བཤད་འདོད་རུང་ཁ་ནས་ཅི་ཡང་བཤད་མ་ཐུབ། ཕ་རོལ་བའི་སྐད་ལ་ཉན་ན་ཕ་རོལ་བ་ནི་བུད་མེད་ཅིག་ཡིན། བུད་མེད་དེས་རང་ལ་ཁྱད་གསོད་དང་དམའ་འབེབས་སྣ་ཚོགས་བྱས་ཀྱང་། མོའི་སྐད་གདངས་ནི་རྣར་སྙན་པ་ཞིག་ཡིན་པས། སྐབས་དེར་ལྷུན་གྲུབ་ལ་ཁྲོང་ཁྲོ་ལངས་རྒྱུ་མེད་པར་མ་ཟད། ཁོའི་སེམས་སུ་མོས་གླུ་ཞིག་བླངས་ན་སྙན་ཁོ་ཐག་རེད་སྙམ། འོན་ཀྱང་སྐར་ཆ་འགའ་མ་འགོར་བར་ཁོའི་སེམས་སུ་ཡ་མཚན་པའི་བསམ་བློ་འདི་འདྲ་ཤར་དོན་ཅི་ཡིན་ཡང་སྙམ། བུད་མེད་དེས་ཀྱང་རང་གིས་བཤད་པའི་ཚིག་འདི་དག་བཙན་ཡོད་པ་ཚོར་ནས་ལྕེ་སྣར་ཙམ་བྱས་རྗེས་ཁོར་དགོངས་དག་ཞུས།

ལྷུན་གྲུབ་ཀྱི་སྐྱེ་གཟུགས་བུད་མེད་དེ་ལས་རིང་བས་བུད་མེད་དེས་ཁོར་སྐད་ཆ་བཤད་སྐབས་མགོ་ཡར་མ་དགྱེ་ཐབས་མེད་ཡིན། སྐབས་དེར་ལྷུན་གྲུབ་ཀྱིས་ཀྱང་བུད་མེད་དེའི་ངོ་གསལ་བོ་མཐོང་བྱུང་། བུད་མེད་དེར་ངོ་གདོང་ཡག་པོ་ཞིག་ཡོད་ཀྱང་གྲང་བའི་རྐྱེན་གྱིས་བྱད་བཞིན་དམར་པོར་གྱུར་འདུག མོའི་མིག་གིས་ལྷུན་གྲུབ་ལ་བལྟས་ནས་ཁོའི་རྣམ་འགྱུར་ལ་ཉམས་བཞག་ནས་བསྡད།

སྐབས་དེར་ལྷུན་གྲུབ་ཀྱིས་བཤད་འདོད་པའི་ཚིག་ཚང་མ་བརྗེད་སོང་། ཁོང་ཁྲོའི་དམོད་ཚིག་ཡིན་ཡང་ཆོག དགོངས་དག་གི་ཚིག་ཡིན་ཡང་ཆོག ཚང་མ་མེད་པར་གྱུར་ཅིང་ཁ་ནས་ཅི་ཡང་བཤད་མ་ཐུབ་པར་བསྡད། ཁོས་བུད་མེད་དེའི་གདོང་ལ་བལྟས་ནས་ཧད། བུད་མེད་དེས་ཀྱང་ཁོས་མིག་ཅེ་རེར་རང་གི་ངོར་བལྟས་འདུག་པ་མཐོང་རྗེས་ངོ་ཚ་ནས་མགོ་ཐུར་སྒུར། མོའི་སྟངས་སྟབས་མཐོང་རྗེས་ལྷུན་གྲུབ་ནི་ད་གཟོད་ཚུར་སྣང་བྱུང་སྟེ་ཁ་ནས་སྐྱོན་མེད་སྐྱོན་མེད། དགོངས་དག་ཞུ་དགོས་པ་ནི་ང་ཡིན་ཞེས་བརྗོད། བུད་མེད་དེས་མགོ་ཡར་དགྱེ་ནས་ཁོའི་ངོ་ལ་བལྟ་ཙམ་བྱས་པ་ལས་མོའི་ངོ་གདོང་སྔར་ལས་དམར་པོར་གྱུར་ཏེ་མགོ་ཐུར་སྒུར་ཞིང་ཁ་ནས་གསལ་ལ་མི་གསལ་བའི་ཨིན་ཞེས་པའི་སྒྲ་ཞིག་བཏོན།

སྟོན་མཇུག་གི་རླུང་བུས་ལམ་འགྲོ་བ་ཚང་མ་འདབ་ཆགས་ཚང་མལ་ལ་དེད་པ་བཞིན་གཞོན་ནུ་ཕོ་མོ་འདི་གཉིས་ལ་ཁོར་ཡུག་བསྐྲུན། ཁ་བ་ཟམ་ཟིམ་ཞིག་གནམ་ནས་བབས་ཏེ་མི་འདི་གཉིས་དལ་གྱིས་པང་དུ་བཟུང་། ན་གཞོན་ཕོ་མོ་འདི་གཉིས་ཀྱི་གདོང་དམར་པོར་གྱུར་ནས་རེ་ཞིག་ཁ་མ་གྲགས་པར་བསྡད། ཡིན་ཡང་མཛེས་པའི་སྣང་བརྙན་འདི་དུས་ཡུན་རིང་བོར་རྒྱུན་འཁྱོངས་བྱེད་མ་ཐུབ། རྣ་ལ་གཟན་པའི་རླངས་འཁོར་གྱི་གླིང་བུའི་སྒྲ་ཞིག་གིས་ཆུའི་ཝུ་བ་གཏོར་བ་ལྟར་སྣང་བརྙན་འདི་གཏོར།

སྐབས་དེར་མོ་ངོ་ཚ་སྟེ་ཁ་ཕྱིར་འཁོར་ནས་འགྲོ་གྲབས་བྱས། ལྷུན་གྲུབ་ཀྱིས་འཚབ་འཚུབ་ཀྱིས་རླངས་འཁོར་དེའི་སྒོ་ཕྱེ་རྗེས་ཁ་ལོ་བས་ཁོར་གཤེ་གཤེ་གཏོང་བའི་ཚིག་དེ་སྣང་མེད་དུ་བཞག་ཅིང་། འདུར་མ་རྒྱུགས་ཀྱིས་བུད་མེད་ཀྱི་གམ་ལ་བཅར་ནས་ལྡབ་ལྡིབ་ཀྱིས། ང་། ང་ལ་ཁྱོའི་ཁ་པར་ཨང་གྲངས་བཤད་ན་ཆོག་གམ་ཞེས་བརྗོད། བུད་མེད་དེ་ཡིས་རེ་ཞིག་ཁ་མ་གྲགས་པར་མགོ་ཐུར་སྒུར་ནས་མགོ་ལྡེམ་ལྡེམ་ཙམ་བྱས་རྗེས་མོའི་ཁ་པར་ཨང་གྲངས་བཤད། ཡིན་ཡང་ད་ཅི་ལྷུན་གྲུབ་ཀྱིས་སྣང་མེད་བྱས་པའི་ཁ་ལོ་བ་དེས་སྐབས་དེར་ཡང་རླངས་འཁོར་གྱི་གླིང་བུ་བཏང་བྱུང་། ཁོས་སྒོ་སྲུང་ཞིག་གིས་ཀྱང་རང་སྣང་མེད་བྱས་པ་མཐོང་བས་ཚིག་པ་ཟ་བཞིན་ཡོད།

རླངས་འཁོར་གྱི་དུང་སྒྲས་བུད་མེད་ཀྱིས་ཁ་པར་ཨང་གྲངས་བཤད་པའི་སྐད་གདངས་ཡོངས་སུ་མནན་ནས་ཅི་ཡང་ཐོས་མི་ཐུབ་པར་གྱུར། ལྷུན་གྲུབ་འཚབ་ནས་ཁྱོས་ཅི་ཟེར། ངས་མ་གོ་ཐལ། བསྐྱར་དུ་བཤད་ན་ཆོག་གམ་ཞེས་བརྗོད། བུད་མེད་ཀྱིས་སྔར་བཞིན་ཁ་མ་གྲགས། ཡིན་ཡང་མོས་ལྷུན་གྲུབ་ལག་གི་ཁ་པར་དེ་བླངས་ནས་ཁ་པར་ཨང་གྲངས་ཤིག་བཏགས་རྗེས་ཁ་པར་ཕྱིར་སྤྲད། དེ་ནས་མོས་མགོ་ཡར་དགྱེ་ནས་ལྷུན་གྲུབ་ལ་དགོད་འཛུམ་ཞིག་བསྟན་རྗེས་ཁ་ཕྱིར་འཁོར་ནས་བུད་སོང་། ལྷུན་གྲུབ་ཀྱིས་མོའི་རྒྱབ་གཟུགས་ལ་བལྟས་ནས་ལག་གཡས་མཐོན་པོར་ཡར་བཀྱགས་ཤིང་ཤེད་ཀྱིས་གཡུག་གཡུག་བྱས། བུད་མེད་དེ་ཕ་གིའི་སྲང་ལམ་ཞིག་ལ་སོང་ནས་མི་མཐོང་བར་གྱུར་རྗེས་ད་གཟོད་ཁོས་ལག་པ་མར་བཞག

ཁོས་ལག་གི་ཁ་པར་ལ་བལྟས་ནས་དགོད་ཞོར་ཕྱིར་སྒོ་སྲུང་ཁང་གི་ནང་དུ་སོང་། དུང་སྒྲ་རྒྱག་མཁན་གྱི་ཁ་ལོ་བ་དེས་སྒོ་སྲུང་འདིས་མགོ་ནས་མཇུག་བར་རང་ལ་ཁ་ཡ་ཡག་པོ་མ་བྱས་པ་མཐོང་རྗེས་སྤྲོ་བ་མེད་པར་གྱུར་ནས་བུད་སོང་།

ཉིན་འགའི་རྗེས་སུ་ལྷུན་གྲུབ་ཀྱིས་བུད་མེད་དེར་ཁ་པར་བཏང་ནས་བོས་ཏེ་འཚིག་ཇ་འཐུང་བར་སོང་།

དེ་ལྟར་ཁོ་གཉིས་ཀྱི་འབྲེལ་བ་ཇེ་བཟང་ནས་ཇེ་བཟང་དུ་གྱུར་ཅིང་། མཐར་ཁོ་གཉིས་གཉེན་སྒྲིག་ནས་ཁྱིམ་ཚང་གསར་བ་ཞིག་གྲུབ།

ལྷུན་གྲུབ་ཀྱིས་ཉིན་ཐོའི་ཁ་ཟུམ་བྱུང་། ཁོའི་ཆང་ཁང་གི་བྱ་བ་བོར་ནས་བཟུང་། ཁོས་ཡུན་རིང་བོ་ཞིག་ལ་བོད་མི་གཞན་དག་དང་འབྲེལ་འདྲིས་བྱས་མ་མྱོང་། ཁོས་ནམ་ཞིག་ལ་རང་གིས་བུད་མེད་འདི་འདྲ་ཞིག་ངོ་འཕྲད་སྲིད་པར་བསམ་བློ་བཏང་མྱོང་མོད། འོན་ཀྱང་འདི་ལྟར་ངོ་ཤེས་པ་ནི་ཁོའི་བསམ་ཡུལ་ལས་འདས་པ་ཞིག་རེད། ཁོའི་མགོ་ཕར་འཁོར་བ་ཙམ་གྱིས་བུ་ཆུང་དང་ཆུང་མ་གཉིས་མཐོང་། བུ་ཆུང་གིས་ལས་བྱ་འབྲི་བཞིན་ཡོད་ཅིང་། ཆུང་མས་ཁོའི་འགྲམ་ནས་ཁོས་ལས་བྱ་འབྲི་བར་བལྟས་འདུག བུ་ཆུང་གིས་འབྲི་བཞིན་པའི་ལས་བྱ་དེ་ནི་དཀའ་མོ་ཞིག་ཡིན་པ་འདྲ་སྟེ། དེ་ནི་ཁོའི་གདོང་གི་རྣམ་འགྱུར་ལས་ཤེས་ཐུབ། ཆུང་མས་ཁོའི་ལས་བྱའི་ཁྲོད་ཀྱི་ནོར་སྐྱོན་དག་དག་བཅོས་བྱེད་བཞིན་སྐབས་འགར་ཁ་ནས་འདི་འདྲའི་སླ་མོ་ཞིག་ཀྱང་ནོར་སོང་ངམ་ཞེས་སྐྱོན་བརྗོད་བྱས། མོས་དེར་བལྟས་ནས་ཚིག་པ་ཟ་བཞིན་ཡོད་པ་འདྲ་སྟེ། མོའི་གདོང་དམར་པོར་གྱུར་འདུག ཁོས་ཆུང་མའི་གདོང་དམར་པོར་གྱུར་པ་ཐེངས་མང་བོར་མཐོང་མྱོང་། ཡིན་ཡང་ཁོའི་སེམས་སུ་ཆེས་མཛེས་པ་ནི་ནམ་ཡང་ཐེངས་དང་བོར་ངོ་འཕྲད་དུས་མོའི་གདོང་དམར་པོར་གྱུར་པ་དེ་ཡིན།

ཡང་ཁོས་བུ་ཆུང་ལ་བལྟས་བྱུང་། བུ་ཆུང་གིས་ལས་བྱའི་འདྲི་གཞི་འགྲོལ་མ་ཤེས་པར་མ་ཁར་སོ་བཏབ་ནས་བསམ་བློ་གཏོང་བཞིན་འདུག ཁོས་བུ་ཆུང་ལ་བལྟས་ནས་བསྡད།

གལ་ཏེ་སྔོན་ཆད་ཁོ་ནི་རང་གི་འཚོ་བ་ལས་བསམ་བློ་གཏོང་མི་དགོས་པའི་མི་རྐྱང་ཞིག་རེད་ཟེར་ན། ད་ལྟ་ཁོ་ནི་ཁྱིམ་ཚང་ཞིག་གི་ཁྱིམ་བདག་ཡིན། ཁོས་སྔོན་ལྟར་རང་གཅིག་པུའི་འཚོ་བའི་གནད་དོན་ཐག་བཅད་པ་ཁོ་ནས་མི་ཆོག ཁོས་ད་ལྟ་ཆུང་མ་དང་བུ་ཆུང་གཉིས་ལའང་བསམ་བློ་གཏོང་དགོས།

ཁོས་ལག་གི་ཉིན་ཐོའི་འབྲི་དེབ་དེར་ཞིབ་ལྟ་བྱས། དེ་ནི་ཟིན་བྲིས་མཐུག་པོ་ཞིག་ཡིན་ལ། རྒྱབ་ཤོག་མིས་བཟོས་གོ་བས་བཏུམ་ཡོད། དུས་ཡུན་རིང་བོ་འགོར་སོང་བའི་རྐྱེན་གྱིས་ཟིན་བྲིས་ཀྱི་ཤོག་ངོས་ཀྱང་མདོག་སེར་པོར་གྱུར་འདུག ཁོས་རང་ནི་མི་གཞན་དག་དང་མི་འདྲ་བ་ཤེས། གྲོང་ཁྱེར་འདི་ན་ཡོད་པའི་མི་མང་ཤོས་ནི་རྒྱ་མི་ཡིན། དེ་མ་ཟད་བོད་མི་ཉུང་ཤོས་དེ་དག་ཚང་མ་ཡང་ཆུང་དུས་ནས་གྲོང་ཁྱེར་འདི་ལས་འཚོ་བ་རོལ་བ་ཡིན། གང་ལྟར་ཁོས་ངོ་ཤེས་པའི་བོད་མི་རྣམས་ནི་ཁོ་དང་འདྲ་བར་ས་ཕྱོགས་གཞན་ནས་གྲོང་ཁྱེར་འདིར་ཡོང་བ་མེད།

ལོ་བཅུའི་སྔོན་ལ། ཁོ་ནི་ལོ་ཉི་ཤུ་རྩ་གྲངས་ཀྱི་གཞོན་ནུ་ཞིག་ཡིན། དེ་དུས་ཁོས་ངེས་པར་དུ་བྱ་བ་རླབས་ཆེན་འགའ་སྒྲུབ་དགོས་སྙམ། ངོ་མ་དེ་དུས་ནི་སྡེ་བའི་ནང་གི་རྒན་རྒོན་ཚོས་བཤད་པའི་མགོ་ན་གནམ་མ་གཏོགས་མེད་པའི་ལོ་ཚོད་རེད། ད་ལྟ་ནི་དེ་འདྲ་ག་ལ་ཡིན་ཏེ། ལོ་མང་བོའི་རིང་ལ་ཁོ་དང་མཉམ་དུ་གྲོང་ཁྱེར་འདིར་ཡོང་མཁན་དག་ཀྱང་ཚང་མ་ཕ་ཡུལ་ལ་ཕྱིར་ལོག་སོང་། སྔོན་ཆད་ཁོའི་གྲོགས་པོ་ཚེ་འབུམ་གྱིས་ཁོ་ལ་འདི་ལྟར་བཤད་མྱོང་།

ཨ་རོགས་ལྷུན་གྲུབ། ཁྱོས་མི་དེ་དག་ལ་ལྟོས་དང་། ཁོ་ཚོ་ཚང་མ་ཕ་ཡུལ་ལ་ཕྱིར་ལོག་སོང་། ཨེ། དེ་ལས་མི་འགའ་ང་ཚོའི་སྡེ་བའི་རེད། ངས་ཁྱོད་ལ་བཤད། སྤྱིར་ན་ང་ཚོ་ཚང་མ་གྲོང་ཁྱེར་འདིར་ཡོང་བའི་དམིགས་ཡུལ་ནི་གཅིག་འདྲ་ཡིན། ཡིན་ཡང་ཁོ་ཚོས་རྒྱུན་འཁྱོངས་བྱེད་མ་ཐུབ། བོད་མིའི་ཁ་དཔེར་རྟའི་བཟང་ངན་རྒྱུགས་ན་ཤེས་དང་མིའི་བཟང་ངན་ཡུན་གྱིས་ཤེས་ཟེར་བ་ལྟར་འུ་གཉིས་ཀྱིས་ངེས་པར་དུ་རྒྱུན་འཁྱོངས་བྱེད་དགོས། ང་ཚོའི་གསེར་ལྟར་འོད་ལམ་ལམ་གྱི་ཕུགས་བསམ་དེ་མངོན་འགྱུར་བྱེད་དགོས། ཤོག ཆང་འཐུང་། ཆང་འདི་འཐུང་རྗེས་སང་ཉིན་འུ་གཉིས་ཀྱང་རང་རང་སོ་སོའི་འཚོ་ཚིས་ཆེད་དུ་འདུར་རྒྱུག་བྱེད་དགོས། གང་ལྟར་རྒྱུན་འཁྱོངས་བྱོས།

ལོ་མང་བོ་འགོར་རུང་ད་དུང་ལྷུན་གྲུབ་ཀྱིས་བྱ་བ་འདི་དག་སེམས་ལ་བཟུང་ཡོད། སྔོན་གྱི་བྱ་བར་རྗེས་དྲན་བྱེད་དུས། ཚེ་འབུམ་གྱི་སྐད་ནི་རང་གི་རྣ་ལམ་དུ་གྲགས་བཞིན་ཡོད་པ་དང་འདྲ་ཞིང་། ཁོའི་རྣམ་འགྱུར་ཡང་མིག་ལམ་དུ་ཤར་ཡོང་། དེ་དུས་ལྷུན་གྲུབ་ཀྱིས་རང་གི་རྣམ་འགྱུར་ཀྱང་དེ་འདྲ་ཞིག་ཡིན་ངེས་སྙམ་སྟེ། ཁོའི་སེམས་སུ་ཡང་འཆར་ཡན་སྣ་ཚོགས་ཡོད། ཡིན་ཡང་ད་ལྟ་གྲོང་ཁྱེར་འདི་ན་རང་གཅིག་པུ་ལས་མེད་སོང་། ལོ་བཅུ་ལྷག་གི་སྔོན་ཏེ། ཁོས་ཆང་ཁང་ནས་རྡུང་རེས་བརྒྱབ་ནས་ལས་ཀ་ཤོར་བའི་ཉིན་འགའི་རྗེས་སུ། གོ་ཐོས་ལྟར་ན་མཚན་མོ་ཞིག་ལ་མི་འགས་ཚེ་འབུམ་གྱིས་དེ་ཉིན་ཆང་ཁང་ནས་རྩོད་གཞི་བསླངས་པར་འཁོན་ལན་སློག་ཆེད་ཁོ་མི་མེད་སའི་སྲང་བར་ཞིག་ལ་ཁྲིད་ནས་སྐོར་རྡུང་བྱས། དེ་ནས་ཟླ་བ་གཅིག་ཙམ་ལས་མ་འགོར་བར་ཚེ་འབུམ་ཡང་ཁོ་ཚོའི་སྡེ་བའི་མི་དེ་དག་དང་འདྲ་བར་ཕྱིར་ཕ་ཡུལ་ལ་བུད་སོང་།

ལྷུན་གྲུབ་ཀྱིས་བྱ་བ་འདི་ཤེས་དུས་ཟླ་གསུམ་བཞི་ཙམ་འགོར་སོང་། ཚེ་འབུམ་ཕྱིར་ལོག་དུས་ཁོ་ཕ་ཡུལ་ལ་འགྲོ་བཞིན་པའི་བྱ་བ་ནི་མི་སུ་ལའང་མ་བཤད། སྐབས་དེར་ལྷུན་གྲུབ་ཀྱིས་ཉིན་མཚན་བསྟུད་མར་རང་ཉིད་ལ་བྱ་བ་གསར་བ་ཞིག་ཨེ་རྙེད་ཆེད་དུ་འདུར་རྒྱུག་བྱེད་བཞིན་ཡོད་པས་ཁོས་ཚེ་འབུམ་གྱི་བྱ་བར་དོ་སྣང་མ་བྱས། ཁོས་སྒོ་སྲུང་གི་བྱ་བ་རྙེད་ནས་ཀྱང་ཟླ་བ་གཉིས་འགོར་རྗེས་ད་གཟོད་གྲོགས་ཚེ་འབུམ་གྱི་བྱ་བ་འདི་ཐོས་བྱུང་། དེའི་རྗེས་ཁོས་ཀྱང་ཐེངས་མང་པོར་ཚེ་འབུམ་ལ་ཁ་པར་བཏང་མྱོང་། ཡིན་ཡང་ཚེ་འབུམ་གྱི་ཁ་པར་ནི་ནམ་ཡང་མི་འཕྲོད།

དེ་ནས་བཟུང་ཁོ་དང་ཚེ་འབུམ་གྱི་འབྲེལ་བ་ཆད་ཅིང་། ཁོ་ཡང་སྤང་ཐང་ཆེན་མོ་ནས་ཡོང་ཞིང་གྲོང་ཁྱེར་འདི་ནས་རྐང་ཟིན་པའི་མི་གཅིག་པུར་གྱུར། དེའི་རྗེས་སུ་ཁོས་ཀྱང་ཕྱིར་ཕ་ཡུལ་ལ་ལོག་དགོས་མིན་ཐད་ཐེངས་མང་པོར་བསམ་བློ་བཏང་ནས་ཐེ་ཚོམ་གྱི་དྲ་རྒྱར་ཚུད་ཡོད་སྐབས། ཚེ་སྒྲོན་ཞེས་པའི་བུད་མེད་ཅིག་ཁོའི་མི་ཚེའི་འཚོ་བར་འཛུལ་ཡོང་། དུས་དེ་ནས་བཟུང་ཕྱིར་ཕ་ཡུལ་ལ་ལོག་རྒྱུའི་བསམ་བློ་བོར་སོང་།

མི་མང་ཆེ་བ་དང་འདྲ་བར་ལྷུན་གྲུབ་ཀྱི་མི་ཚེ་ནི་ཧ་ཅང་སྤྱིར་བཏང་ཞིག་ཡིན། ཁོས་རང་གི་མི་ཚེའི་ཁྲོད་ཆེས་གལ་ཆེ་བའི་ཉིན་གཉིས་ནི་གཉེན་སྒྲིག་གི་ཉིན་མོ་དང་བུ་ཆུང་སྐྱེས་པའི་ཉིན་མོ་ཡིན་སྙམ་ཡོད། ཡིན་ཡང་ཁོ་ལ་མཚོན་ན་བྱ་བ་འདི་དག་ནི་དངོས་ནས་གལ་ཆེ་རུང་མི་གཞན་གྱིས་དེར་ཉམས་འཇོག་བྱེད་མི་སྲིད། རྒྱུ་མཚན་ལྷུན་གྲུབ་ནི་ཧ་ཅང་སྤྱིར་བཏང་གི་མི་ཞིག་ཡིན་པའི་ཕྱིར་རོ།།

གྲོང་ཁྱེར་ནས་ལོ་མང་པོར་འཚོ་བ་རོལ་བས་ལྷུན་གྲུབ་ཀྱང་སྔ་མོ་ནས་གྲོང་ཁྱེར་བར་གྱུར་ཡོད། ལོ་ཟླའི་རླུང་བུས་ཁོའི་གཞོན་དུས་ཀྱི་སེམས་ཤུགས་ཡོངས་སུ་བཅོམ་ཞིང་། འཚོ་བའི་ཁུར་བོ་ལྗིད་མོས་ཁོའི་སྒལ་བ་མནན་ནས་སྒུར་དུ་བཅུག དུས་ཚོད་ཀྱི་སྒྱུ་མས་ཁོའི་མགོ་སྐྲ་ཚང་མ་དཀར་པོར་སྒྱུར།

ལོ་མང་པོ་འགོར་ཞིང་། ལྷུན་གྲུབ་རྒས་སོང་། ཁོའི་བུ་བསམ་གཏན་ནར་སོན།

ལྷུན་གྲུབ་ཀྱིས་རང་ཉིད་རྒས་སོང་བ་ཁས་ལེན་མི་འདོད་རུང་དེ་ནི་ཟློག་ཐབས་མེད་པའི་དོན་དངོས་ཡིན། ཟླ་བ་འགའི་སྔོན་ལ་ཁོའི་ཆུང་མར་ཧོན་ལོག་གི་ནད་བྱུང་ནས་སྨན་ཁང་དུ་ནད་སྡོད་བྱས། ནད་ལྡང་སྐབས་མོས་རང་གི་མིང་ཡང་བརྗེད་འགྲོ། ལྷུན་གྲུབ་ཀྱིས་ལོ་མང་བོའི་སྔོན་ལ་བློ་བཟང་བོས་ནས་འཚིག་ཇ་འཐུང་སྐབས་ཁོས་ནད་འདིའི་སྐོར་གྱི་བྱ་བ་ཙག་ཙིག་བཤད་མྱོང་། ཁོས་བཤད་པ་ལྟར་ན་ཕ་ཡུལ་གྱི་རྒན་རྒོན་རྣམས་ལ་ནད་འདི་བྱུང་བའི་གནས་ཚུལ་ཧ་ཅང་ཉུང་། ཁོའི་བསམ་ཚུལ་ལྟར་ན་བགྲེས་པོ་རྣམས་རྒྱུན་དུ་འགུལ་སྐྱོད་དང་གཞན་ལ་ཁ་བརྡ་བྱས་ན་ནད་འདི་ཕོག་པའི་སྲིད་ཕྱོད་ཇེ་དམའ་ལ་གཏོང་ཐུབ། ཕ་ཡུལ་གྱི་བགྲེས་པོ་རྣམས་རྒྱུན་དུ་དགོན་པར་སྐོར་བར་འགྲོ་ཞིང་སྐོར་ལམ་ནས་མི་གཞན་དང་ཁ་བརྡ་བྱེད་པས་ནད་འདི་ཕོག་གིན་མེད་ཟེར། ལྷུན་གྲུབ་ཀྱིས་ཀྱང་ས་འདིའི་དགོན་པ་ཞིག་ལ་སྐོར་བ་བྱེད་འདོད། དེའི་ཕྱིར་ཁོ་ས་འདིའི་དགོན་པ་ཞིག་ལ་མཇལ་སྐོར་དུ་སོང་།

ཁོས་དུས་ཚོད་ཕྱེད་ཀའི་རིང་ལ་གྲལ་བསྒྲིགས་ནས་དགོན་པའི་པ་སེ་ཉོས་ཤིང། དེ་ནས་སྐར་མ་བཅུ་ལྷག་ལ་གྲལ་སྒྲིག་རྗེས་ད་གཟོད་དགོན་པའི་ནང་ལ་ཐར། ཡིན་ཡང་ཁོས་སྒོ་ལམ་མཚམས་ན་གྲྭ་བ་ཞིག་གིས་སྐད་གསེང་མཐོན་པོསVIPཉོས་ན་ནང་དུ་ཕེབས་ནས་མཆོད་མཇལ་བྱས་ཆོག་ཅེས་འུར་རྒྱག་པ་ཐོས་རྗེས་ཁོ་ཆད། དེ་ནས་བཟུང་ཁོས་ས་གནས་འདི་ནས་དགོན་པར་སྐོར་བ་བྱེད་རྒྱུའི་ཐད་ལ་བསམ་བློ་བཏང་མ་མྱོང་།

ཁོའི་བུའི་མིང་ལ་བསམ་གཏན་ཟེར་ཞིང་ད་ལྟ་སློབ་ཆེན་ན་ཡོད། ཁོ་ནི་སློབ་སྐབས་རེའི་དབྱར་གནང་དང་དགུན་གནང་མ་གཏོགས་ཁྱིམ་ལ་མི་ལོག དེ་མ་ཟད་ལྷུན་གྲུབ་ཀྱི་ཆུང་མ་ཡང་ནད་ཀྱི་དབང་གིས་སྨན་ཁང་དུ་བསྡད་ཡོད། དེ་བས་ལྷུན་གྲུབ་ཀྱིས་བྱ་བ་གང་རུང་ཞིག་བཙལ་ནས་ཉི་མ་གཏོང་ཐབས་བྱེད་འདོད། ཁོས་རང་གི་ཁང་བ་ལས་སྔོན་གྱི་བྱ་བ་བྲིས་པའི་ཉིན་ཐོ་དེ་རྙེད་བྱུང་། ལོ་མང་བོ་འགོར་བ་དང་བདག་དམ་བྱས་པ་མི་བཟང་བས་ཉིན་ཐོའི་རྒྱབ་ཤོག་ཀྱང་བོར་བར་མ་ཟད། ཤོག་ངོས་མང་ཤོས་ཆུས་བརླན་ནས་སླར་སྐམ་པས་ངོས་ཀྱི་ཡི་གེ་ཡང་མི་གསལ། ཁོས་ཉིན་ཐོའི་ནང་དོན་ལ་བལྟ་སྐབས་མིག་ཤེལ་མ་གོན་ན་ངོས་ཀྱི་ཡི་གེ་ཡང་གསལ་བོར་མཐོང་མི་ཐུབ། ཁོ་ལོ་ན་མཐོ་བས་ཡིད་འཛིན་གྱི་ནུས་པའང་ཉམས་པར་གྱུར་ཏེ་སྔོན་གྱི་བྱ་བ་མང་བོ་ཞིག་བརྗེད་ཟིན།

ཁོས་རང་ནི་ཕམ་ཁར་མགོ་སྒུར་མཁན་ཞིག་མིན་སྙམ་མོད། འོན་ཀྱང་ད་ཐེངས་ཁོས་ལོ་ཟླར་མགོ་མ་སྒུར་ཐབས་མེད་བྱུང་།

ཉིན་འདི་དག་གི་རིང་ལ་ཁོའི་བུས་རྒྱུན་དུ་ཁོ་ལ་ཕུགས་བསམ་ཕྱོགས་ཀྱི་ཁ་བརྡ་མང་པོ་བྱས། ཁོས་བུ་ལ་ཁྱོའི་ཕུགས་བསམ་ཅི་ཡིན་ཞེས་དྲིས་མྱོང་། ཡིན་ཡང་བུས་ཁོར་བསམ་ཡུལ་ལས་འདས་པའི་ལན་ཞིག་བཏབ།

ཨ་ཕ། ངའི་ཕུགས་བསམ་ནི་སྤང་ཐང་ཆེན་པོར་ལོག་སྟེ་འཚོ་བ་རོལ་རྒྱུ་དེ་ཡིན།

ཨ། ཁྱོས་ཅི་ཟེར། ཁྱོད་བཟི་ཡོད་པ་ཡིན་ནམ།

ཨ་ཕ། ངས་ཁྱོད་ལ་རྫུན་བཤད་པ་མིན། ང་ངོ་མ་སྤང་ཐང་ལ་འགྲོ་བསམ།

བྱ་བ་འདི་དག་སེམས་ལ་ཤར་དུས། ལྷུན་གྲུབ་ཀྱི་སེམས་སུ་ཧ་ཅང་རྙོག་འཛིང་ཆེ་བའི་སེམས་ཁམས་ཀྱིས་ཁེངས་འགྲོ། ཁོས་རང་གི་མི་ཚེ་གང་བོའི་དུས་ཚོད་བཀོལ་ནས་རང་གི་ཐོབ་ཐང་ནི་འབྲོག་མི་ཞིག་ནས་གྲོང་ཁྱེར་བར་སྒྱུར། ཡིན་ཡང་ད་ལྟ་ཁོའི་བུ་ནི་ཁོ་དང་ཡོངས་སུ་ལྡོག་ཡོད། ཁོས་བྱ་བ་འདི་དག་ཁ་ཡ་མི་བྱེད་ཐབས་མེད་ཡིན། དེ་མ་ཟད་ཁོས་བུའི་བསམ་བློ་ཡང་སྒྱུར་མི་ཐུབ།

ལྷུན་གྲུབ་ཀྱིས་བྱ་བ་འདི་དག་ལ་བསམ་བློ་གཏོང་མཚམས་བཞག་ནས་བློ་སེམས་རྩེ་གཅིག་གིས་བརྙན་འཕྲིན་ལ་བལྟས། བརྙན་འཕྲིན་ལས་ཀུང་ཟི་ག་གེ་མོའི་སྦྱིན་བདག་བློ་བཟང་གིས་སྒོར་མོ་མང་བོ་ལྐོག་ཟ་བྱས་རྗེས་བྲོས་རུང་མ་ཐར་བར་ཉེན་རྟོག་པས་བཟུང་ཟིན་ཟེར། ཁོས་མིང་འདི་ཐོས་མྱོང་བ་ཞིག་ཡིན་སྙམ་རུང་ནམ་ཞིག་ལ་ཐོས་པ་མ་ཤེས་པས་བསམ་བློ་བཏང་། སྐབས་དེར་བསམ་གཏན་གྱིས་བོས་བྱུང་།

ཨ་ཕ། ང་སྤང་ཐང་ཆེན་མོ་ནས་འཚོ་བ་རོལ་འདོད།

ཡང་སྐད་ཆ་འདི་ཐོས་བྱུང་། སུན་པ་ལ།

ངས་ཟླ་བ་འགའི་རིང་ལ་ཞོར་ལས་བྱས་ནས་སྒོར་མོ་ཁྲི་གཅིག་ཙམ་བསགས་ཡོད། ད་ཐེངས་ང་སྤང་ཐང་ལ་འགྲོ་ངེས་ཡིན།

སྐད་ཆ་འདི་ཐོས་རྗེས་ལྷུན་གྲུབ་འདང་རྒྱག་ནང་དུ་ལྷུང་། ཁོས་རང་ཉིད་ལོ་ན་གཞོན་དུས་སེམས་ལ་དྲན་བྱུང་། དེ་དུས་ཁོས་ཀྱང་སྒོར་མོ་བསགས་ཡོད་ལ། མ་འོངས་པའི་འཚོ་བར་རེ་འདུན་ཚད་མེད་བཟུང་ཡོད། ད་ལྟ་ཁོའི་བུ་ལ་ཡང་བསམ་བློ་འདི་འདྲ་ཞིག་ཡོད་རྒྱུ་ནི་རྒྱུན་ལྡན་སྣང་ཚུལ་ཡིན། བུ་ལ་སློབ་གསོ་བྱེད་ཆོག་རུང་བས་ཉན་པའི་ངེས་པ་མེད་ཀྱང་ཁོས་བུ་ལ་ཁ་ཏ་སློབ་གསོ་བྱེད་རྒྱུའི་རེ་ཐག་ཆད།

བསམ་གཏན་གྱིས་ཨ་ཕས་ཁོར་ཁ་ཡ་མི་བྱེད་པ་མཐོང་རྗེས་ཁོས་མུ་མཐུད་དུ་འདི་ལྟར་བཤད།

ད་ལོའི་དབྱར་གནང་སྐབས་ངས་བསགས་པའི་སྒོར་མོ་དེ་དག་བཀོལ་ནས་སྤང་ཐང་ལ་ཡུལ་སྐོར་དུ་འགྲོ་རྒྱུ་ཡིན། ངལ་གསོས་མ་ཐག་ཏུ་ང་འགྲོ་རྒྱུ།

ལྷུན་གྲུབ་ནི་ཕྱིར་དྲན་དུ་ཟུག་འདུག་པས་ཁོས་བུས་བཤད་པའི་སྐད་ཆའང་གསལ་བོར་མ་ཐོས། དེ་བས་ཁོའི་ཁ་ནས་ཨ་ཨ། ཁྱོས་ཡང་བསྐྱར་གཅིག་ཤོད་ཅེས་བཤད། བསམ་གཏན་གྱིས་ཁོའི་རྣམ་འགྱུར་མཐོང་རྗེས་ཨ་ཕར་རང་ཉིད་སྤང་ཐང་དུ་འགྲོ་རྒྱུར་མོས་མཐུན་མེད་པར་ཁྲོས་འདུག་སྙམ་སྟེ་ཁ་མ་གྲགས་པར་སྒོར་བུད་སོང་།

གང་ལྟར། བསམ་གཏན་ནི་རྩྭ་ཐང་ལ་འགྲོ་རྒྱུ་ཐག་ཆོད་རེད། ལྷུན་གྲུབ་ཀྱིས་བསམ་གཏན་ལ་ཐེངས་མང་པོར་ཁ་བརྡ་བྱས་རུང་ཕན་འབྲས་མ་བྱུང་། སྔོན་ཆད་ཡིན་ན་བྱ་བ་འདི་འདྲ་ཞིག་བྱུང་བར་ཁོས་ཆུང་མར་གྲོས་བྱས་ནས་ཐག་བཅད་ཆོག ཡིན་ཡང་ད་ལྟ་ཆུང་མར་ཧོན་ལོག་ནད་བྱུང་ནས་སྨན་ཁང་དུ་བསྡད་ཡོད་པས། མོར་གྲོས་བྱེད་ས་ག་ལ་ཉན། ད་ནི་ལྷུན་གྲུབ་ཐབས་ཟད་སོང་། ཁོས་བསམ་གཏན་ལ་ལམ་ནས་སེམས་ཆུང་བྱོས་སོགས་སྐད་ཆ་འགའ་བཤད་རྒྱུ་ལས་ཕན་མི་ཐོགས། སྔོན་ཆད་བསམ་གཏན་གཅིག་པུ་ས་ཐག་རིང་ལ་སོང་མ་མྱོང་། ད་ཐེངས་ཁོ་གཅིག་པུ་འདི་ལྟར་སོང་ན་ལྷུན་གྲུབ་ཀྱང་སེམས་མི་བདེ། འོན་ཀྱང་ཁོ་ནི་ཇི་ལྟར་སེམས་མ་བདེ་རུང་ཐབས་མེད།

སློབ་གྲྭས་དབྱར་གནང་སྟེར་བའི་ཉིན་དེར་ལྷུན་གྲུབ་ཀྱིས་ཉིན་གང་བོར་སྒུག་རུང་བསམ་གཏན་ཕྱིར་རང་ཁྱིམ་ལ་མ་ཡོང་། དགོང་རུབ་ལ་ཉེ་དུས་ཁོའི་ཁ་པར་སྟེང་འཕྲིན་ཐུང་ཞིག་སླེབས་བྱུང་།

ཨ་ཕ། ངས་མེ་འཁོར་གྱི་པ་སེ་ཉོས་ཡོད། ཁྱེད་ཀྱི་སེམས་བདེ་མོ་བྱོས་ཆོག ང་ནི་ཐེངས་དང་བོར་འདི་ལྟར་རང་གཅིག་པུ་ས་ཕྱོགས་ཐག་རིང་ལ་སོང་བ་ཡིན་མོད། འོན་ཀྱང་ངས་དྲ་ལམ་ནས་ཡུལ་སྐོར་འགྲོ་སའི་ས་གནས་ལ་རྒྱུས་ལོན་བྱས་ཡོད། གང་ལྟར་ང་ནི་ལམ་ལ་ཆས་ཟིན། གལ་ཏེ་ཁྱེད་ལ་མཁོ་བའི་དངོས་པོ་ཡོད་ན་ངས་ཁྱེད་ལ་ཉོས་ཆོག

འཕྲིན་ཐུང་ཀློག་ཚར་རྗེས་ལྷུན་གྲུབ་ཀྱིས་མིག་ཟུང་བཙུམ་ནས་དབུགས་རིང་ཞིག་འཐེན་ཞིང་སྐྱོ་ལྷང་ལྷང་འདང་རྒྱག་གི་ནང་དུ་ལྷུང་། མཇུག་མཐར་ཁོའི་སློབ་གསོས་ཀྱང་གོ་བ་སྤུ་ཙམ་ཡང་ཆོད་མེད་པ་འདི་རེད། ཁོས་བརྙན་འཕྲིན་ཁ་ཕྱེ་ནས་གློག་བརྙན་བལྟས་ནས་ཉི་མ་འཁྱོལ་ཐབས་བྱས། ཁོས་ཕྱི་རྒྱལ་གྱི་གློག་བརྙན་ཞིག་བལྟས་ནས་སྐར་མ་ལྔ་མ་འགོར་བར་བརྙན་འཕྲིན་གྱི་འཆར་ངོས་ནས་ཁྱེད་ཀྱིས་སྐར་མ་ལྔའི་རིང་ལ་རིན་མེད་ཀྱིས་བལྟས་ཆོག་ཅིངVIPཉོས་ན་གློག་བརྙན་ཆ་ཚང་བར་བལྟས་ཆོག་ཅེས་པའི་ཡི་གེ་འགའ་ཤར། ལྷུན་གྲུབ་ཀྱིས་ཁ་ནས་ཨ་ཙི་ཟེར་བཞིན་བརྙན་འཕྲིན་དེ་ཨ་མདོའི་ཐད་གཏོང་ལ་སྒྱུར། ཡིན་ཡང་ཁོས་སྒྱུར་མ་ཐག་ཏུ་བརྙན་འཕྲིན་ནི་ཆག་སོང་བ་དང་འདྲ་བར་འཆར་ངོས་ཀྱི་རི་མོ་འགུལ་རྒྱུ་མེད་པར་གྱུར། དེ་ནས་སྐར་ཆ་འགའ་མ་འགོར་བར་ཡང་བརྙན་འཕྲིན་ནསVIPཉོས་ན་གང་འདོད་ལྟར་ཐད་གཏོང་བལྟས་ཆོག་ཅེས་པའི་ཡི་གེ་འགའ་ཤར།

ལྷུན་གྲུབ་ཀྱི་སེམས་ལ་ཚིག་པས་ཁེངས་ཏེ་བརྙན་འཕྲིན་གྱི་སྒོ་རྒྱབ་རྗེས་ཁ་ནས་ཨ་བ་ཨ་མ། ལོ་འགའི་རྗེས་སུ་འབྱིན་རྔུབ་བྱས་ན་ཡངVIPམེད་ན་མི་ཆོག་པར་འགྱུར་རྒྱུ་ཡིན་ནམ་ཞེས་འཁང་ར་བྱས།

ད་ལྟ་བརྙན་འཕྲིན་ནི་བལྟ་རྒྱུ་མེད། བུ་ལ་ཁ་པར་བཏང་ན་ཡང་བུས་མི་ལེན། ལྷུན་གྲུབ་ཚིག་པ་ཟ་རུང་ཐབས་མེད་པར་མལ་ཁྲིའི་སྟེང་ཉལ།

དེ་ལྟར་ཉིན་གསུམ་བཞི་ཙམ་འགོར་སོང་། ཉིན་མོའི་དུས་སུ་ཁོ་སྨན་ཁང་ལ་སོང་ནས་ཆུང་མར་ནད་གཡོག་བྱེད་དགོས། མཚན་མོ་ཁོ་ཕྱིར་ཁྱིམ་ལ་ལོག་ནས་ངལ་གསོ་བྱས། ཁོས་བསམ་གཏན་ལ་ཐེངས་མང་བོར་ཁ་པར་བཏང་རུང་བསམ་གཏན་གྱིས་ཐེངས་གཅིག་ཀྱང་མ་བླངས། ལྷུན་གྲུབ་ཀྱིས་བསམ་གཏན་ཁྲོས་འདུག་པས་ཁོར་ཁ་ཡ་བྱེད་མ་འདོད་པ་ལོས་ཡིན་སྙམ།

ཡིན་ཡང་དེ་ལྟར་གཟའ་འཁོར་གཉིས་འགོར་རུང་བསམ་གཏན་གྱིས་སྔར་བཞིན་ཁོའི་ཁ་པར་མི་ལེན་པས་ཁོས་སེམས་ཁྲལ་ཚད་མེད་བྱས། ཁོས་རང་གི་ངོ་ཤེས་ཚོར་བསམ་གཏན་ཨེ་མཐོང་ཞེས་དྲིས་ཀྱང་ཚང་མས་མ་མཐོང་ཟེར། དེའི་རྗེས་ཁོས་ཕ་ཡུལ་ལ་ཕྱིར་སོང་བའི་སྤུན་ཡ་ཀླུ་འབུམ་ལ་ཁ་པར་བཏང་ནས་བསམ་གཏན་ཕ་ཡུལ་ལ་ཨེ་སླེབས་ཞེས་དྲིས་པར་སླེབས་མ་བྱུང་ཟེར། ལྷུན་གྲུབ་ཀྱི་གློ་སྙིང་སྟོད་ལ་འཚང་ནས་ལྷག་པར་ཚབ་བྱུང་།

ཁོས་ཉི་མ་རེ་རེར་བསམ་གཏན་ལ་ཁ་པར་བཏང་རུང་མི་འཕྲོད་པར་སྒོ་གཏན་འདུག

མཚན་གུང་ཞིག་ལ་ཁོ་ཉལ་ཡོད་དུས་མི་ཞིག་གིས་ཁང་བའི་སྒོ་བརྡུངས་ཤིང་སྒྲ་དེས་ཁོ་གཉིད་ལས་བསླངས། ཁོས་མཚན་དཀྱིལ་ལ་སུ་ཞིག་གིས་སྒོ་བརྡུང་སྲིད་སྙམ་བཞིན་སྒོ་ཕྱེ་ནས་བལྟས། སྒོ་ཁར་ལངས་པའི་མི་དེ་མཐོང་རྗེས་ཁོ་རེ་ཞིག་ཧད་པར་གྱུར།

མི་དེ་ནི་ཁོའི་བུ་བསམ་གཏན་རེད།

བསམ་གཏན་གྱི་བྱད་བཞིན་སེར་པོར་གྱུར་ཅིང་མཆུ་ཡང་གས་ཡོད། ལྷུན་གྲུབ་ཧད་ནས་བསྡད་ཡོད་དུས་བསམ་གཏན་གྱིས་ཤི་མ་གསོན་གྱིས་ཨ་ཕ་ཞེས་བོས། དེ་བས་ལྷུན་གྲུབ་ཀྱང་ཚུར་སྣང་བྱས་ཏེ་མྱུར་དུ་བསམ་གཏན་ནང་ལ་ཁྲིད། ཁོས་བསམ་གཏན་ལ་ཅི་ཞིག་བྱུང་སོང་སོགས་དྲི་བ་སྣ་ཚོགས་དྲིས་ཀྱང་བསམ་གཏན་གྱིས་མགོ་མར་སྒུར་ནས་ཁ་མ་གྲགས། ལྷུན་གྲུབ་ཀྱིས་བུ་ལ་ནད་བྱུང་བ་ཡིན་ནམ་ཞེས་སེམས་ཁུར་བྱེད་དུས་བསམ་གཏན་གྱིས་ཡ་ང་བའི་སྐད་ཀྱིས་ཨ་ཕ། སྟབས་བདེ་ཐུག་པ་ཡོད་དམ། ང་ལྟོགས་ནས་སྲན་མི་ཐུབ་གི་ཟེར། ལྷུན་གྲུབ་ཀྱིས་འཚབ་འཚུབ་ངང་སྟབས་བདེ་ཐུག་པ་བཙལ་རུང་གཅིག་ཀྱང་མ་རྙེད། ཁོ་ཅི་བྱ་གཏོལ་མེད་དུ་གྱུར་སྐབས་ཕ་གིའི་རྩམ་སྒམ་མཐོང་བྱུང་། དེ་ནི་སྤུན་ཀླུ་འབུམ་གྱིས་ཁོར་བསྐུར་བ་ཡིན།

རྩམ་སྒམ་དེ་མཐོང་དུས་ལྷུན་གྲུབ་ཀྱིས་བསམ་གཏན་ལ་རྩམ་པ་བརྫི་དགོས་མིན་བསམ་བློ་བཏང་། བསམ་གཏན་གྱིས་ཆུང་དུས་ནས་རྩམ་པ་ཟ་མ་མྱོང་བས་ད་ཐེངས་འདི་ལྟར་ཐེངས་དང་བོར་རྩམ་པ་ཟོས་ན་ཕོ་བར་ཆུ་སྐྱུར་ལངས་མིན་བསམ་བློ་བཏང་། ཡིན་ཡང་རང་ཁྱིམ་ན་གནས་སྐབས་རྩམ་པ་ལས་ཟ་རྒྱུ་མེད་ཅིང་། བསམ་གཏན་བཀྲེས་སྐོམ་གྱི་གདུང་བས་མནར་ནས་མཆུ་སྐམ་ཞིང་གས་པ་དང་བྱད་བཞིན་སྐྱ་སེར་དུ་ཆགས་པ་སོགས་མཐོང་རྗེས་སེམས་ནས་མ་བཟོད་པར་རྩམ་རྒན་ཞིག་རྫིས་ཏེ་བྱིན། བསམ་གཏན་གྱིས་ཧམ་ཟ་བྱས་པས་ཐེངས་འགར་བརྣངས་པར་གྱུར། ཁོས་ཨ་ཕས་རྫིས་པའི་རྩམ་པ་ཟོས་ཚར་རྗེས་མ་རྒྱགས་པར་ལྷུན་གྲུབ་ལ་ད་དུང་དགོས་ཞེས་བརྗོད། ལྷུན་གྲུབ་ཀྱིས་འཚབ་འཚུབ་ངང་ཡང་བསྐྱར་རྩམ་རྒན་ཞིག་རྫིས་ནས་བྱིན། བསམ་གཏན་གྱིས་སྔར་བཞིན་ཧམ་ཟ་བྱས་རྗེས་ཡང་ཆུ་ཕོར་བ་གང་འཐུང་། རྩམ་རྒན་དེ་ཟོས་ཚར་རྗེས་སྒྲེག་པ་ཞིག་བྱས།

ལྷུན་གྲུབ་ཀྱིས་ཁོས་ཟོས་ཚར་སོང་བ་མཐོང་རྗེས་ཁོ་ལ་དྲི་བ་འགའ་དྲིས།

ཁྱོད་ཡུལ་སྐོར་ལ་སོང་བ་མིན་ནམ། ད་ལྟ་འདི་འདྲའི་ཡ་ང་བའི་རྒྱུ་མཚན་ཅི་ཡིན།

བསམ་གཏན་གྱིས་མགོ་གཡུག་གཡུག་ཙམ་བྱས་པ་ལས་ཁ་མ་གྲགས།

དེ་ན་ཁྱོས་བསགས་པའི་སྒོར་མོ་དེ་དག་ད་དུང་ག་ཚོད་ལྷག་ཡོད།

མེད། ཚང་མ་ཚར་སོང་།

ཁྱོད་སྤང་ཐང་ལ་སོང་བ་མིན་ནམ། ཨ་ཁུ་ཀླུ་འབུམ་གྱིས་ཁྱོད་སྤང་ཐང་ལ་མ་ཡོང་ཟེར། ཁྱོས་ཁ་པར་མི་ལེན་དོན་ཅི་ཡིན། ཉིན་འདི་དག་གི་རིང་ལ་ཁྱོད་གང་ལ་སོང་བ་ཡིན།

དེ་ལྟར་ལྷུན་གྲུབ་ཀྱིས་དབུགས་ཐེངས་གཅིག་ལ་དྲི་བ་གསུམ་བཏོན། བསམ་གཏན་གྱིས་ལན་འདེབས་འདོད་པར་ཁ་ཤ་འགུལ་ཙམ་བྱས། ཡིན་ཡང་སྐར་ཆ་འགའི་རྗེས་སུ་ཁོའི་ཁ་ནས་བཤད་པའི་སྐད་ཆ་ནི་དྲི་བའི་ལན་ག་ལ་ཡིན།

ཨ་ཕ། ངའི་ཕོ་བ་མི་བདེ་གི ངའི་ཁོག་པའི་ནང་གཟེར་གི་ཟེར་བཞིན་ལག་པས་གསུས་པ་སྐྱོར་ཞིང་རྒྱབ་སྒུར་ཙམ་བྱས་ནས་གདོང་ནས་ཧ་ཅང་ན་ཟུག་ཆེ་བའི་རྣམ་འགྱུར་བསྟན། ཐོག་མར་ལྷུན་གྲུབ་ཀྱིས་ཁོས་བྱ་བྱེད་རྫུན་མ་སྟོན་བཞིན་ཡོད་སྙམ། འོན་ཀྱང་ཁོས་བསམ་གཏན་གྱི་བྱད་བཞིན་སྔོན་ལས་སྐྱ་སེར་ཆགས་ཤིང་སྐྲ་མཚམས་ནས་ཀྱང་རྔུལ་ཆུ་བཞུར་བཞིན་པ་མཐོང་རྗེས་ཁོས་ད་གཟོད་དེ་ནི་བྱ་བྱེད་རྫུན་མ་མིན་པ་ཚོར།

བུ་ན་ཟུག་གིས་མནར་བའི་རྣམ་པ་མཐོང་རྗེས་ལྷུན་གྲུབ་ཀྱི་གདོང་ལ་ཡང་རྔུལ་ཆུ་རིམ་པ་ཞིག་ཆགས་བྱུང་། ཁོས་མྱུར་དུ120ལ་ཁ་པར་བཏང་ཞིང་བསམ་གཏན་ལ་བལྟས་ནས་སེམས་ཁྲལ་བྱེད་བཞིན་སྨན་པ་སླེབས་པར་སྒུག

རྣ་ལ་གཟན་པའི་མྱུར་སྐྱོབ་རླངས་འཁོར་གྱི་སྒྲས་མཚན་མོ་འདིའི་ལྷིང་འཇགས་ཡོངས་སུ་དཀྲོགས་སོང་།

ཞོགས་པའི་ཉི་འོད་ཀྱིས་མུན་པ་སེལ་ཞིང་ཡང་ཞིང་འཇམ་པའི་རླུང་བུ་མིའི་ལུས་ལ་ཕོག་པ་ཙམ་གྱིས་བདེ་བའི་ཚོར་བ་སྟེར། ཉིན་གསར་བ་ཞིག་གི་འགོ་བརྩམས་ཤིང་། མི་རྣམས་ཀྱིས་ཀྱང་ལས་ཀའི་འགོ་རྩོམ་བཞིན་མཆིས། ལྷུན་གྲུབ་ཀྱིས་དྲ་མ་བརྒྱུད་ནས་ཕྱི་རོལ་ལ་བལྟས་འདུག་ཅིང་། ཁོའི་འགྲམ་ན་བསམ་གཏན་ནད་ཁྲིའི་སྟེང་ཉལ་འདུག ལྷུན་གྲུབ་ཀྱི་ན་སོ་བགྲེས་པས་མིག་རབ་རིབ་ཏུ་གྱུར།

དྲ་མ་ལས་ཕྱི་རོལ་གྱི་ཡུལ་ལྗོངས་ཅི་ཡང་མཐོང་མི་ཐུབ།

ལྷུན་གྲུབ་ཀྱིས་འགྱོད་པ་བྱེད་བཞིན་ཡོད། བསམ་གཏན་གྱིས་སྔོན་ཆད་རྩམ་པ་ཟོས་མ་མྱོང་པའི་ཁར་མདང་དགོང་བཀྲེས་ལྟོགས་ཀྱི་རྐྱེན་གྱིས་ཧམ་ཟ་བྱས་པས་རྒྱུ་ལྷག་གི་གཉན་ཚད་བྱུང་ནས་བཤའ་བཅོས་བྱས། ལྷུན་གྲུབ་ཀྱིས་གལ་ཏེ་མདང་དགོང་ཁོས་བསམ་གཏན་ལ་སྟབས་བདེ་ཐུག་པ་ཉོས་ཡོད་ན་འདི་འདྲའི་གནས་ཚུལ་སྐྱོ་བོ་ཞིག་འབྱུང་མི་སྲིད་སྙམ། ཁོས་རང་གིས་ཐེངས་དང་བོར་རྒྱ་ཁོག་ཟོས་པ་སེམས་ལ་ཤར། དེ་དུས་ཁོ་ཡང་བསམ་གཏན་དང་འདྲ་བར་རྒྱུ་ལྷག་གི་གཉན་ཚད་བྱུང་།

ཁོའི་འགྲམ་གྱི་ནད་ཁྲིའི་སྟེང་བསམ་གཏན་གན་རྐྱལ་དུ་ཉལ་འདུག ཁོས་ལག་ལ་ཁ་པར་བཟུང་ཞིང་ཁ་པར་གྱི་འཆར་ངོས་ལ་བལྟས་ནས་དགོད་བཞིན་འདུག ལྷུན་གྲུབ་སྐར་མ་འགའི་རིང་དྲ་མའི་འགྲམ་ནས་ལངས་རྗེས་ཁ་ཕྱིར་འཁོར་ནས་བསམ་གཏན་ལ་འདི་ལྟར་བཤད།

ཁྱོས་བྱ་བའི་འགོ་རྔ་ཆ་ཚང་བར་ཤོད་དང་།

བསམ་གཏན་གྱིས་ལག་གི་ཁ་པར་སྔས་འགྲམ་ལ་བཞག་ནས་ལན་བཏབ།

དེ་ཉིན་ངས་སྒོར་མོ་དང་དངོས་པོ་དག་ཁྱེར་ནས་སྤྱི་སྤྱོད་རླངས་འཁོར་ལ་བསྡད་དེ་འགྲོ་རྩིས་བྱས། ཡིན་ཡང་ཞེས་རེ་ཞིག་ཁ་མ་གྲགས་པར་མ་ཁར་སོ་བཏབ་ནས་འཁང་རའི་རྣམ་འགྱུར་ཞིག་བསྟན་ཞིང་། ཡུད་ཙམ་ལ་བསམ་བློ་བཏང་རྗེས་ད་གཟོད་མུ་མཐུད་དུ་བཤད།

དེ་ཉིན་ང་སྤང་ཐང་ལ་འགྲོ་བསམ་སྟེ་སྤྱི་སྤྱོད་རླངས་འཁོར་ལ་བསྡད་དེ་མེ་འཁོར་ས་ཚིགས་སུ་སོང་མོད། གྲོང་ཁྱེར་གྱི་མཐའ་ནས་ང་ཚོ་ཚང་མ་བཀག་བྱུང་། ཏོག་དབྱིབས་ནད་དུག་གི་ཤུགས་རྐྱེན་གྱིས་གྲོང་ཁྱེར་གཞན་ལ་འགྲོ་འདོད་ན་ཐོག་མར་མི་སོ་སོ་གཟའ་འཁོར་གསུམ་ལ་ལོགས་སུ་བཀར་ནས་ནད་པ་མིན་པ་ཁག་ཐེག་བྱེད་དགོས། ལོགས་སུ་བཀར་བའི་ཉིན་དེ་དག་ལ་ང་ཁང་ཕྲུག་ཅིག་ཏུ་བཅུག སྡོད་རིན་དང་ཟས་རིན་སོགས་ཚང་མ་རང་གིས་སྤྲོད་དགོས་པས། ངའི་སྒོར་མོ་ཡང་དེ་དུས་ཚར་སོང་། དེའི་ཁར་ཁོ་ཚོས་སྐྱེལ་ཡོང་བའི་ཟ་མའི་སྤུས་ཀ་ངན་ཞིང་འཁྱགས་པ་ཡིན་པས་ངས་ཟ་མི་འདོད། དེའི་ཕྱིར… …

དེ་ནས་བསམ་གཏན་གྱིས་བཤད་མཚམས་བཞག་ཅིང་དབུགས་རིང་གི་དངན་པ་ཞིག་འཐེན། ལྷུན་གྲུབ་ཀྱིས་ཉན་ཚར་རྗེས་ཧད་ནས་བསྡད།

དགོང་ཁའི་ཉི་འོད་ཀྱིས་ས་གཞི་ཡོངས་སེར་ལམ་ལམ་དུ་བཏང་། བགྲེས་པོ་ཞིག་སེར་ལམ་ལམ་གྱི་འགྲོ་ལམ་བརྒྱུད་ནས་མདུན་དུ་འགྲོ་བཞིན་ཡོད། ལམ་ནི་ཉི་འོད་ཀྱིས་སེར་ལམ་ལམ་དུ་བཏང་རུང་བགྲེས་པོ་དེ་ཤར་ཕྱོགས་ལ་འགྲོ་བཞིན་ཡོད་པས་ཁོའི་མདུན་གྱི་གོམ་པ་རེ་རེ་ནི་ཁོ་རང་གི་གྲིབ་མས་གཡོག་པའི་མུན་ནག་ལ་མ་སྤོས་ཐབས་མེད་ཡིན། ཁོའི་མདུན་གྱི་དངོས་པོ་ཚང་མར་ཉི་འོད་ཀྱིས་གསེར་མདོག་རིམ་པ་ཞིག་བྱུགས། མདུན་གྱི་མུན་པ་ནི་རིང་བོ་ཞིག་མིན་རུང་བགྲེས་པོ་དེ་ནམ་ཡང་མུན་པ་འདི་ལས་བརྒལ་མི་ཐུབ་ལ་བརྒལ་ཡང་མི་སྲིད། ཁོའི་ཁ་གཏད་དུ་བོད་ལྭ་གྱོན་པའི་ན་གཞོན་འགའ་དགའ་སྤྲོའི་ངང་ཚུར་ཡོང་ཞིང་ཉི་མར་ཁ་གཏད་ནས་ཁོས་སོང་ཟིན་པའི་ལམ་དེ་བརྒྱུད་ནས་ནུབ་ཕྱོགས་སུ་ཆས། བགྲེས་པོས་ཅི་ཞིག་སེམས་ལ་དྲན་བྱུང་བ་ལྟར་འགྲོ་མཚམས་བཞག

སྔོན་ཆད་ཐོག་མར་གྲོང་ཁྱེར་ལ་སླེབས་སྐབས་ང་ནི་སྡེ་བའི་གཟི་བརྗིད་ཡིན། འོན་ཀྱང་ད་ལྟ་སྡེ་བའི་ནང་གི་ན་གཞོན་མང་བོ་ཞིག་གྲོང་ཁྱེར་ལ་སླེབས་བྱུང་བས། གྲོང་ཁྱེར་བ་ཞེས་པའི་ཐོབ་ཐང་ཡང་དེ་འདྲའི་གཟི་བརྗིད་དང་ལྡན་པ་ཞིག་མིན་པར་གྱུར། སྤུན་ཡ་ཀླུ་འབུམ་གྱིས་བཤད་པ་ལྟར་ན། སྡེ་མི་ཚོས་རང་གིས་སྒོ་སྲུང་གི་ལས་ཀ་གཉེར་བཞིན་པ་ཤེས་སོང་ཞིང་ན་གཞོན་འགས་ཁོར་འཕྱ་དམོད་ཀྱང་བྱེད་བཞིན་ཡོད་ཟེར།

བགྲེས་པོས་གློ་ལུ་ཞིག་བྱས་རྗེས་མདུན་གྱི་ལམ་ལ་བལྟས།

ཉི་འོད་ཀྱིས་བགྲེས་པོའི་གྲིབ་མ་ནི་འཐེན་ཐིགས་ལྟར་རིང་ནས་རིང་དུ་འཐེན། བགྲེས་པོའི་ལག་ན་སྤོས་འགྱིག་གི་ཟས་སྒམ་ཞིག་བཟུང་ཡོད་ཅིང་ཟས་སྒམ་དུ་སིལ་ཏོག་འགའ་ཡོད། ཁོའི་ལག་གི་ཟས་སྒམ་དང་ཟས་སྒམ་ནང་གི་སིལ་ཏོག་ནི་ཁོའི་མི་ཚེ་དང་འདྲ་བར་ཧ་ཅང་སྤྱིར་བཏང་བ་ཞིག་དང་ཧ་ཅང་རྒྱུན་མཐོང་ཅན་ཞིག་ཡིན། ཡིན་ཡང་རྒྱུན་མཐོང་གི་སིལ་ཏོག་འདི་དང་ཟས་སྒམ་འདི་ནི་སྨན་ཁང་གི་འགྲམ་ན་ཡོད་པས་རྒྱུན་ལྡན་གྱི་རིན་གོང་ལས་མཐོ། ལན་རེར་ཆེས་སྤྱིར་བཏང་བའི་དངོས་པོ་གང་ཞིག་གནས་ག་གེ་མོར་སླེབས་རྗེས་སྤྱིར་བཏང་བ་མིན་པར་འགྱུར།

ལྷུན་གྲུབ་ཀྱིས་ལྗིད་ཏིག་ཏིག་གི་གོམ་པ་རེ་རེ་སྤོས་ནས་མདུན་དུ་བསྐྱོད། ཁོ་སྨན་ཁང་ལ་སོང་ནས་ཁོའི་བུ་དང་ཆུང་མར་འདུག་རོགས་བྱེད་དགོས།

2023ལོའི་ཟླ2ཚེས28ལ།