བླ་བྲང་ལ་འབྱོར་བའི་མཐོང་ཐོས།

རྨད་བྱུང་ཉི་ཟླ་ཟུང་གི་བྱིན་རླབས་འོག།

ཐུགས་རྗེ་འོད་ཀྱི་སྣང་བ་འབུམ་བཀྱེས་ཤིང་།།

སྟོང་ཕྲག་སྨོན་ལམ་བསྔོ་བའི་དང་རྟེན་ལ།།

བསོད་ནམས་སྟོབས་ཀྱིས་དངོས་གྲུབ་དཔལ་བརྙེས་ཤོག།

སྙན་པའི་ཚིག་གི་སྦྱོར་བ་བདུད་རྩིའི་ཆར།།

འབེབས་མཛད་དཔལ་ལྡན་བླ་མའི་ཞབས་ལ་འདུད།།

ཐུབ་བསྟན་འོ་མཚོ་རྒྱས་པའི་རྟེན་འབྲེལ་ལ།།

ཆོས་སྐུ་པདྨོའི་འཕྲིན་ལས་རྒྱས་གྱུར་ཅིག།

གནམ་ལ་བསོད་ནམས་སྟོབས་ཀྱི་ཉི་ཟླ་ཤར།།

ས་ལ་རྟེན་འབྲེལ་བཀྲ་ཤིས་གཡས་སུ་འཁྱིལ།།

མི་ལ་ཕུན་ཚོགས་ཕྱྭ་གཡང་དཔལ་དུ་བཞད།།

སྙན་པའི་གྲགས་པ་འབྲུག་སྟོང་ལྡིར་བ་དང་།།

ས་གསུམ་ཁྱོན་ཀུན་འགེངས་པའི་དག་ཞིང་འདིས།།

སུམ་བཅུ་རྩ་གསུམ་གནས་ལ་སྐྱེངས་པ་སྟེར།།

བྱང་ཆུབ་སྙིང་པོའི་སྒྲུབ་པ་ལྷུར་ལེན་ཞིང་།།

ཡེ་ཤེས་ཏིང་འཛིན་རྒྱ་མཚོའི་བང་རིམ་ལ།།

མཚན་དཔེ་དཔལ་འབར་མཆོག་གི་ཞིང་ཁམས་འདིས།།

བརྒྱ་བྱིན་ཁང་བཟང་དམན་ལ་རབ་བཀོད་ཅིང་།།

གངས་ལྗོངས་སུམ་རྩེན་གཉིས་པའི་མཚན་འཛིན་པ།།

རྟགས་བརྒྱད་རི་མོ་སྡུག་གུར་བཞད་པ་དང་།།

བསྟན་པའི་མཛད་འཕྲིན་དབྱར་མཚོ་རྒྱས་པ་ཡི།།

གནས་མཆོག་ཉི་མ་བླ་བྲང་ཀྲོང་ངེར་འགྱིང་།།

རྒྱལ་བ་གཉིས་པ་བློ་བཟང་གྲགས་པ་ཡི།།

བསྟན་པའི་ཉི་ཟེར་ཕྱོགས་བཅུར་འཕྲོས་པའི་མཐུས།།

སྐལ་ལྡན་གདུལ་བྱའི་སྒོ་གསུམ་དག་ཕྱིར་དང་།།

ཕྱི་སྣོད་བཅུད་ཀྱི་འཇིག་རྟེན་རྒྱས་ཕྱིར་དུ།།

མདོ་སྨད་བླ་བྲང་བཀྲ་ཤིས་འཁྱིལ་བ་རུ།།

ཆོ་འཕྲུལ་སྨོན་ལམ་ཆེན་མོའི་སྒོ་གླེགས་ཕྱེས།།

རྟེན་འབྲེལ་རི་མོ་བཀྲ་བའི་ཉིན་འདི་ཚོར།།

རིགས་རུས་དབྱེ་མེད་བོད་རྒྱ་སོག་གསུམ་དང་།།

སྐྲ་སེར་མིག་ལྗང་རྒྱལ་ཕྱིའི་མི་སྣ་སོགས།།

ཕྱོགས་ཀྱི་མགྲོན་པོ་སྐར་མའི་མགུལ་རྒྱན་བཞིན།།

ཐུབ་བསྟན་བདེ་འབྱུང་གཙུག་རྒྱན་ཡོངས་བསྐོརད་ཅིང་།།

ན་རྒས་གྱོལ་པོ་དད་པའི་ལག་རྟེན་ལ།།

བསྙེས་པའི་མཐུ་ཡིས་ཕྱག་དང་སྐོར་བར་རེམ།།

མདུན་རིའི་གོས་སྐུ་ཐང་ཆེན་ཡངས་པོ་རུ།།

ཆོས་ཀྱི་དབང་ཕྱུག་ཐམས་ཅད་མཁྱེན་པ་ཡི།།

མཁྱེན་བརྩེའི་བདག་པོ་སངས་རྒྱས་བཅོམ་ལྡན་འདས།།

སྐུ་ཡི་བཀོད་པ་འཇིག་རྟེན་ཁམས་སུ་འཁྲུངས།།

བྱམས་དང་བརྩེ་བའི་སྤྱན་ཟུང་འཛུམ་མེར་བཞད།།

ཐུགས་རྗེ་ལྕགས་ཀྱུས་འགྲོ་དྲུག་བདེ་བར་འདྲེན།།

ཀུན་ཏུ་བཟང་བོ་སླར་ཡང་གནས་འདིར་བྱོན།།

བྱིན་གྱིས་བརླབས་པའི་མཛད་འཕྲིན་མཁའ་ལས་ཡངས།།

ཚེ་བསོད་རླུང་རྟ་དར་བའི་རྟགས་མཚན་དང་།།

མི་འདོད་བགེགས་རིགས་འཇོམས་པའི་དན་རྟགས་ཡིན།།

རིན་ཆེན་གཙུག་ལག་ཁང་གི་རྒྱ་ཕིབས་ལས།།

གསེར་གྱི་གཟི་འོད་ས་སྟེང་ཡོངས་ཁྱབ་ཅིང་།།

ཉིན་མོའི་མགོན་ཡང་སྐྱེངས་པའི་ཚུལ་བཟུང་ནས།།

ཡུད་ཙམ་ཆུ་འཛིན་གསེང་ནས་བཞའ་ཙམ་བྱས།།

འདྲེན་བྱེད་མིག་གི་བསོད་ནམས་དམན་པའི་ཕྱིར།།

གཟི་འོད་བཀྲག་མདངས་ཅན་ལ་བལྟ་མི་བཟོད།།

མི་ཞུགས་ཚོགས་ཆེན་འདུ་ཁང་རབ་བརྗིད་པའི།།

མདུན་གྱི་ཐང་ཆེན་ཡངས་ཤིང་བདེ་བའི་ཀློང་།།

འཆམ་གྱི་མཛེས་པ་ལྷ་ཡི་གར་དུ་འཁྲུལ།།

དྲན་པའི་སྙེ་མ་ཞིང་འདིར་བྱོན་པར་རིགས།།

ཡིད་ཀྱི་དང་བ་སེམས་ཀྱི་གསེང་ནས་བཞད།།

ཡིད་ཆེས་སྤང་ལ་དད་པའི་མེ་དཔུང་མཆེད།།

སྒོ་གསུམ་གུས་པའི་དང་རྟེན་བྲག་ལ་ཟུག།

ཡར་ངོ་ཆུ་ཤེལ་དཀྱིལ་འཁོར་རབ་རྫོགས་ཉིན།།

རྟེན་འབྲེལ་སྟོང་གི་ཕུན་ཚོགས་ཕྱྭ་གཡང་འཁོར།།

རྨད་བྱུང་ངོ་མཚར་སྟོང་གི་སྒྱུ་འཕྲུལ་བཞིན།།

ས་ལ་མེ་ཏོག་འབུམ་གྱི་འཇའ་གུར་ཕུབ།།

བི་ཤྭ་ཀརྨའི་མཐུ་ལས་བཞེངས་འདྲའི་དཔྱིད།།

བསྐལ་བ་སྟོང་གི་རྒྱལ་བ་སངས་རྒྱས་བཅས།།

དག་པའི་ཞིང་འདིའི་ལྗོངས་སུ་ཕྱག་ཕེབས་མཛད།།

མི་ངོ་ལྷ་ངོ་འཕྲད་པའི་སྐལ་བཟང་སྨིན།།

ཚེ་ལ་བསོད་ནམས་སྟོབས་ཀྱི་དཔལ་བརྙེས་པའི།།

དད་ལྡན་ཁྲི་མ་འབུམ་གྱི་འདོད་མོས་བསྐངས།།

ལས་འབྲས་དཀར་ནག་གསལ་བའི་མེ་ལོང་ལས།།

རྒྱུ་འབྲས་རྒྱ་མར་ཡོ་གཟུར་མེད་པར་མདོག།

རྣམ་འདྲེན་ལྔ་བ་བྱམས་པ་མགོན་པོའི་སྐུ།།

གླིང་སྐོར་གདན་འདྲེན་མཛད་པའི་ཆོ་ག་ལ།།

ཏིང་ཤག་རྔ་སྦུབས་སིལ་སྙན་རབ་དཀྲོལ་ཞིང་།།

ཆོས་དུང་དཀར་པོའི་སྙན་ཆ་ངང་གིས་ཕྱེས།།

བདུག་སྤོས་དྲི་བསུང་མཚོ་སྤྲིན་རྒྱས་པའི་དཔལ།།

གསུང་ཆོས་སྒྲ་དབྱངས་སྒྲོགས་ཤིང་དང་བ་འདྲེན།།

ས་བཅུའི་དབང་ཕྱུག་མི་ཕམ་མགོན་པོ་མཆོག།

བསྟན་པ་འཆར་བའི་རྟེན་འབྲེལ་སྨོན་ལམ་འགྲིག།

བདེ་ལྡན་ཐར་བའི་ལམ་ལ་འདྲེན་མཛད་ཅིང་།།

ཆོས་ཀྱི་འཁོར་ལོ་བསྐོར་བའི་རྟགས་མཚན་ཡིན།།

ཀླུ་དབང་རྒྱལ་བོའི་བང་མཛོད་གཏམས་པ་ཡི།།

རིན་ཆེན་གཏེར་མཛོད་ཕྱེས་འདྲའི་ནོར་རྫས་དག།

ཀུན་གྱི་སྤྱན་ཟུང་འཛུམ་པའི་བདུད་རྩི་དང་།།

ཡིད་ཀྱི་དང་བ་འདྲེན་པའི་གཡང་རྟེན་ཡིན།།

ལྗོངས་འདིར་ཕུན་ཚོགས་དགེ་ལེགས་ཡོངས་སྨིན་ཅིང་།།

རྣམ་དཀར་དགེ་ལ་ཕྱོགས་པའི་མཆོད་སྤྲིན་རྒྱས།།

དད་པའི་སྟོབས་ཀྱི་རྦ་རླབས་དྲག་གཡོས་པས།།

གདན་རབས་ཀུན་ཏུ་གནས་འདིའི་རྗེས་འཇུག་ཅིང་།།

ཕྱོགས་བཞིའི་ཞིང་གི་རྒྱལ་བ་སྲས་བཅས་ཀྱི།།

དམ་ཆོས་མཐའ་དག་འཛིན་པའི་རྒྱུ་རུ་བསྔོ།།