འཕྲིན་ཡིག་ཅིག (ཞར་བཀོད་གཉིས)
བུད་མེད་ཅིག་མཚོ་འགྲམ་དུ་བསྡད་འདུག
སྐབས་འདིར། མོ་ནི་ས་གཞི་ཡིན།
རྦ་རླབས་ཀྱིས་མཚོ་ཁའི་བྱེ་ཐང་ལ་ཡང་ཡང་རྡེག
མོས་མིག་ཟུང་བཙུམས་ནས་མི་ཞིག་དྲན།
སྔོ་བསངས་ཀྱི་རྒྱ་མཚོ་ནི་རྨི་ལམ་ཞིག་དང་འདྲ།
བུད་མེད་ཀྱིས་མགོ་བོ་དགྱེ་ནས་ནམ་མཁར་བལྟས།
སྐབས་འདིར། མོ་ཡང་རྒྱ་མཚོ་ཡིན།
བྱིའུ་ཆུང་ཞིག་ནམ་མཁའ་ནས་ཡལ་སོང་།
ཉི་འོད་སྔར་བཞིན་ཞི་ཞིང་འཇམ།
སྔོ་བསངས་ཀྱི་ནམ་མཁའ་ནི་གབ་ཚིག་ཅིག་དང་མཚུངས།
བུད་མེད་ཀྱིས་མནོ་བསམ་ཅི་ཡང་མ་བཏང་པར།
ཡར་འགྲེང་ནས་མིག་ཟུང་རྒྱང་རིང་ཕྱོགས་སུ་ཅེར།
མོའི་ལག་ཏུ་འཕྲིན་ཡིག་ཅིག་བསྣམས་འདུག
འཕྲིན་ཡིག་ཏུ་མི་ཞིག་གི་མིང་ཡིག་བྲིས་ཡོད།
འོན་ཀྱང་བུད་མེད་ཀྱིས་ཤེས་ཏེ།
རང་གིས་སྐད་གསེང་མཐོན་པོས་འབོད་མི་ཕོད།
དེའི་ཕྱིར་ཐེངས་མ་བརྒྱ་ཕྲག་ལྷག་ལ།
སྔོ་བསངས་ཀྱི་མཚོ་འགྲམ་དུ་བསྡད་དེ།
རང་ཉིད་གཅིག་པུས་འགོ་བརྩམས་ཤིང་།
རང་ཉིད་གཅིག་པུས་མཇུག་བསྡུས།
བདག་གི་སྙན་ངག་ལ་ཕུལ་བའི་སྙན་ངགa
ཁྱེད་རང་ལོག་ཆོག་ས་ཞིག་མེད་པས་སྐྱོ་ཨང་།
ཁེར་རྐྱང་གི་ཚིག་འབྲུ་དེ་དག་གིས་སྐབས་རེར།
རྒྱང་རིང་གི་མི་ཞིག་གི་མིང་ནས་འབོད།
སྐབས་མང་པོ་ཞིག་ལ་དུངས་སེམས་དང་འདྲ་ནའང་།
དེ་ནི་ཤོར་ཟིན་པའི་རྗེས་ཀྱི་སེམས་གསོ་ཡིན་པ་སུ་ཡིས་ཤེས།
ཉག་ཤིན་ཏུ་ཕྲ་བའི་མཛེས་སྡུག་གི་རྟོག་པའི་ཕོ་བྲང་ན།
ཁྱེད་ལ་དུས་རབས་མང་པོའི་རྗེས་ཀྱི་མི་ཞིག་གིས་བསྒུག་ཡོད་ངེས།
ཁྱེད་རང་སྙིང་ཀར་སྦྱོར་ཞིང་མཆོད་པ་འབུལ་མཁན་གཅིག་པུ་དེ།
བདག་གི་སྙན་ངག་ལགས། ཁྱེད་ཡང་བསྐྱར་ཐེངས་ཤིག་བཀླགས་ཏེ།
འཇིག་རྟེན་འདིའི་བརྩེ་བའི་ཆ་ཤས་གསར་པ་ཞིག་གཞི་ནས་རྙེད་ཀྱང་སྲིད།
My Queenལ་ཕུལ་བའི་སྙན་ངག
བརྩེ་དུང་ནི་དཔྱིད་ཀ་ཚེས་ཤིང་མེ་ཏོག་བཞད་འོས་པ་ཞིག་ཡིན།
ཞི་འཇམ་ནི་ཉི་འོད་བཞིན་སྲོད་ཀའི་མེ་ཏོག་གི་སྟེང་དུ་འཕྲོས་འདུག
ཕྱིར་དྲན་ནི་རུ་ནང་གི་མཚེར་སའི་ལྷས་འདབས་དང་།
རྩྭ་ལྗང་གི་མལ་ཁྲི་བཞིན་ཆུ་ཕྲན་དེའི་འགོ་ཁུངས་ན་ཡོད།
སྐལ་བ་བཟང་པོ་ནི་ཕལ་བའི་ཁྱིམ་ཚང་གི་བུ་མོ་ཆུང་ཆུང་ལ།
རྒྱལ་ཁའི་ངང་བྱ་བ་རེག་སོང་བས་ཕ་མའི་ངོ་གདོང་དུ་མངོན་འདུག
ལེགས་སྐྱེས་ནི་རྐང་པ་ཤིན་ཏུ་ན་སྟེ་བགྲོད་དཀའ་བའི་ཨ་མ་ལ།
“མ་ལོ། ཁྱེད་བཞུགས་སྡོད་དང”ཟེར་བའི་བུ་མོ་ཞིག་ཡོད་པ་དེ་ཡིན།
ཡོད་ཚད་ནི་མང་པོ་མི་དགོས་ཏེ་ཆ་ཚང་བས་ཆོག
མི་ཚེ་ནི་རྣམ་ཤེས་གཅིག་ལ་དབང་བའི་དག་གཙང་གི་ཆོག
གྱེས་བྲལ་ནི་ལྷན་འཛོམས་ལ་བཞག་པའི་ཐེངས་རྗེས་མའི་སྤྲོ་དགའ་བླ་ལྷག་དང་།
ལྷན་འཛོམས་ནི་ནམ་ཡང་སྙིང་གཏམ་བརྗོད་པའི་ཕྱིར་དུ་ཡིན།
རྟེན་འབྲེལ་ནི་སྙིམ་པར་བླངས་ནས་རོ་བརྒྱ་མྱོང་བ་དང་།
ལྷ་ཚོགས་ཕྱོགས་སུ་མཐོ་རུ་མཆོད་པའི་དཀར་ལམ་ལམ་གྱི།
འབྲོག་མོ་བརྒྱ་ཡིས་བཞོས་པའི་འོ་མའི་སྦྲང་ཆར་ལགས།
བློ་དཀར་གཞུང་དྲང་ནི་གཙང་ཆུ་དྭངས་མོ་ཞིག
ལན་རེར་ནམ་མཁའ་དང་མཚམས་རེར་སྤང་ཐང་དུ།
ཆེས་ཉག་ཕྲ་བའི་མཛེས་སྡུག་ཁུར་ནས་དལ་བུར་རྒྱང་ལ་འབབ།
སྙིང་གཏམ་ནི་སེམས་ཀྱི་ཟེའུ་རུ་དཀྲུག་པའི་ཚིག་གི་མར་ལོ།
ཡིད་ཆེས་ནི་མཐོ་རུ་བཏེགས་པའི་སྨྲ་བརྗོད་ཀྱི་དད་པ།
ཡ་རབས་ནི་ཁ་ལེན་ཚིག་བརྩི་དང་།
དྲིན་ལན་ནི་ལག་ལེན་བྱེད་པའི་སྐད་ཆ་རེ་རེ་ཡིན།
གཉེན་སྡེབ་ནི་མོ་ཨང་སོ་དགུ་པ་དང་།
བར་ཐག་ནི་སྤྱི་ལེ་སུམ་བརྒྱ་དྲུག་ཅུའོ།།