དེའི་ཕ་རོལ་དུ། (ཞར་བཀོད་གཉིས)

གཙང་པོའི་འཕྲེད་གཞུང་བཅད་པའི་རི་བོ།

རི་བོ་མཐོ་དྲགས་པས་ཉི་ཟླའི་བྱོན་ལམ་བཀག་འདུག

གཙང་པོའི་རབ་ཁ་བཅད་པའི་ཕ་རོལ་དུ།

གླག་མིག་རྒྱང་དུ་བསྲིངས་ཀྱང་མཐོང་ལམ་རི་བོས་བཀག་འདུག

སེམས་ཀྱི་ཀོ་གྲུས་གཙང་པོའི་འཕྲེད་གཞུང་བཅད་ན།

དེའི་ཕ་རོལ་དུ།  རི་བོ།  ཡང་ན།  རི་བོ་ལྟ་བུའི་སྒྲིབ་ཡོལ།

རྨོངས་པ་ངོ་མཚར་སྐྱེ་བྱེད་ཀྱི་སྒྱུ་མའི་སྔགས་རྫས་ཨེ་ཡོད།

མིག་གི་ར་མདར་སེམས་པ་སྦྲན་པའི་འཇིག་རྟེན་གྱི་ཁོལ་པོ།

རྟོག་པའི་ར་བ་བརྒལ་བའི་ཕྱི་རོལ་དུ།

ཐ་སྙད་ཀྱི་ནགས་ཚལ་དུ་སྙིང་རྗེའི་སེང་གེ་ཨེ་ཡོད།

མི་ཚེ་གང་ལ་བརྒལ་མ་མྱོང་བའི།  དེའི་ཕ་རོལ་དུ།

ཡང་སྙིང་ཅི་ཞིག་ཡོད་དམ།

2021.11.7

སྒོ་ར་རྙིང་པ།

ཉི་འོད་ཀྱིས་འཇམ་ཤ་ཐོན་པའི་རྨོ་བོའི་སྐྲ་ལོའི་ལྗོན་པ།

ལྗོན་པའི་གཡུ་ལོ་དཀྲིགས་པའི་སེམས་ཀྱི་བྱ་ཁྱུའི་ཚང་མལ།

རྨོ་བོས་མི་ལོ་ག་ཚོད་ལ་བགྲངས་ཏེ་ཟད་པའི་སེན་མོའི་ཉག་ཁའི་ཀློང་།

ཆོག་ཤེས་དང་ཞི་བས་འཚོས་ཏེ་མི་ལོ་ག་ཚོད་འགོར།

ལས་ཀྱི་རླུང་བུས་གཡོབ་པའི་ལྗོན་པའི་རྩ་ལག

རླུང་བུའི་ལག་པས་བྱིལ་བའི་ཉི་མའི་བུ་ཆུང་།

སེར་ལམ་ལམ་གྱི་ཉི་མའི་བུ་ཆུང་སྡོང་རྩར་ཟགས་དུས།

སྒོ་ར་རྙིང་པའི་རྡོ་གཅལ་གཡུ་དཀར་མེ་ལོང་འདྲ།

མ་ཎི་ཡིག་དྲུག་མཐོང་དུས་རྨོ་བོ་འཛུམ་བྱུང་།

སྒོ་ར་རྙིང་པ་མཐོང་དུས་འགྲོ་དྲུག་སྐྱིད་སོང་།

སྲོད་དུ་ཁ་ཆར་བུ་ཡུག་མ་འཚུབ།

ཐོ་རེངས་བཙག་དང་བསེར་བུས་མ་གཙེས།

སྒོ་ར་རྙིང་པ། རྨོ་བོའི་མཚན་ལམ་རིང་མོར་རྨིས་པའི་སྒོ་ར་རྙིང་པ།

ཉི་འོད་ཀྱིས་འཇམ་ཤ་ཐོན་པའི་རྨོ་བོའི་སྐྲ་ལོའི་ལྗོན་པ་ཨང་།

2022.2.23

སྲོད་དུ།

ཉི་ནུབ་མཚམས་སུ་བྱ་ཁྱུ་ཚང་མལ་དུ་ལོག་སོང་།

རི་བོའི་གྲིབ་མས་སྐྱིད་ཆུའི་འཕྲེད་གཞུང་བཅད་འདུག

བདག་གིས་གྲུ་ཁ་འདིར་གླུ་བའི་རྒྱལ་སྲས་སུ་ཞིག་ལ་བསྒུག་ཆོག

ལོ་ངོ་སྟོང་ཕྲག་ལ་རྨིས་པའི་རྨི་ལམ།  

ཟླ་བའི་གཙང་པོ་བྲུག་པ་ནང་བཞིན། 

སུ་ཞིག་གི་སེམས་ཁོང་དུ་ནར་སོན་པ་ནས།

བུམ་པ་རི་ལྟར་རྔམ་བརྗིད་ཀྱིས་འགྱིངས་འདུག

གནས་མོ་ལགས།  གཉན་དཔོན་གྱི་ངག་ལ་ཉོན།

མདང་སུམ་རྨིས་པའི་རྨི་ལམ་ཁོག་གང་སྦས་ཏེ།

ཞག་གསུམ་འདྲིས་པའི་བྱམས་པའི་རྟ་ཁ་བླངས་ཏེ།  

ཀོ་གྲུ  ཀོ་གྲུ  ལས་ཀྱི་ཀོ་གྲུ་ཆུ་མོའི་གཞུང་ལ་ཐོངས།

གནས་མོ་ལགས། ལྟོས།

གཡུ་ཆུང་དྲུག་དཀར་ལྟ་བུའི་བྱམས་པ་ཤར་རིའི་རྩེ་ནས་བྱོན་བྱུང་།

ཁྱོད་ཀྱིས་འགྱུར་མེད་དམ་ཕྲུག་རང་སེམས་དམར་པོར་སྐྱོན་རོགས།

2021.9.18